ankawa
منتدى الهجرة واللجوء => الهجرة و واللاجئين => الموضوع حرر بواسطة: اهل النخوه في 18:12 02/11/2009
-
السلام عليكم اهل المنتدى الكرام لقد اتصلت بالا اي او ام بعمان قسم السفر واعطوني موعد بشهر ال 11 لكن والله الصراحه انا جدا متالم من هذا السفر واقول يجوز من اروح يرحلوني الى بلدي للان عندما قدمت على البرنامج كنت اعمل بشركه وعامل بها شهادة كزوره وهي شهادة تخرجي واقول عندما اذهب راح يحسون او عندما اعمل راح يستفسرون عليه ويحسون بالسالفه ويرحلوني للان تعلمون انتو الي يقدم على الا اي او ام يجب ان يكون عامل مع الامريكان وانا نعم عملت لكن الشركه مالتي لاتعلم اني عامل هيج شيئ ولو يعلمو راح يقولون انت مامشمول بالعمل معنا للانهم كانو يريدون خريجي جامعه وانا لست بخريج جامعه وهناك اخاف الا اي او ام يقولون مادام الشركه مالتك انت عامل بها تزوير اذا راح نرجلك يا اخواني شتنصحوني الرجاء اخواني انتو لن تعرفو ماذا سيكون لكن نصيحتكم الي وانا عملت هذا الشيئ والله لسبب العيشه التي كنا نعيشها والحمد لله لكن كان عملي نظيف وعندي حتى توصيات من الامريكان بعملي الجيد لكن هاي الشغله خايف منها واسف اذا الموضوع ذكرته من قبل لكن هذا بالتفصيل واشكرك اخواني الرجاء المساعده انا اخوكم بالله
-
اخويه المحترم اتركه على الله وهي ان شاءالله تمشي من دمن عراقيل
وسافر بلموعد الي قالوا الك وابد ما تتردد افرظ ما حسوا بلتزوير الي انت تقوله وبنفس الوقت انت رفظت السفر
راح تتندم وتقول ياريت ما رفظت السفر
فخليه على الله احسن شي
وبعدين اغلب العراقين قصصهم مو حقيقيه بس لازم تقدملهم شي
واظربلك مثال احنه لما تقابلنه اول مقابله وهي مقابلة التوطين المستشاره الي قابلتنه كانت امريكيه
وقالت قصتكم عملولياها كفلم وقولولياها
فيعني همه (مو غشمه) يعرفون الواحد
واسفه لو طولت عليك بس راي اتوكل على الله ولا تشيل هم
وان شاءالله خير
-
وعليكم السلام
ان شاء الله يصير خير
لا تيأس حبيبي
اهم شي انت اشتغلت مع جهة اجنبية .. بغض النظر ان شهادتك لم تكن حقيقية .. يعني انت خدمت هذه الجهة بعملك وهذا شي ما ينكروه
صح ؟ ومو بعيدة في حال اتصلوا بهذه الجهة ستيم كفالتك من قبلهم
بالتوفيق وخليها على الله حبيبي
تحياتي لك
-
اشكركم اخواني الاعزاء واخواتي وبارك الله بكم ويارب ييسر الامور للجميع وانشاء الله راح اتوكل واذهب والي به خير الله يقدمه تحياتي مره اخرى لكم يا احبائي
-
السلام عليكم
اخي العزيز مادام انت اشتغلت وياهم هذا هو اهم شئ والشهاده مو مشكله وانت اذا سافرت ووصلت ماكو اي احد يكولك وين شهادتك , توكل على الله وسافر ومااحد راح يسأل على شهادتك ومنين متخرج واتمنالك التوفيق.
ابو انس
شيكاغو
-
اشكركم اخي ابو انسيارب يوفقك ويوفق الجميع والله هاهيه انشاء الله راح اتوكل ويارب ماكو شي اني هم كلت اخذ الكرين كارد واروح لاي دوله اعمل بها حتى لو كندا يكولون للان خوش شغل بها وتحياتي للجميع
-
اخي العزيز تتوقع ابو ال اي او ام ايكلك راويني شهادتك قبل ميصعدك للطياره
يمعود هنا لا الشهاده يعترفون بيه ولا خبرتك ويه الشركات الامريكيه بالعراق هم يعترفون بيه
اتوكل ع الله وتعال
تحياتي
-
اخوية العزيز اتوكل على الله يا شهادة يابطيخ منو يعترف بيه اهناك اخوية شهادتك مضبوطة مزورة هية متفيدك اهناك اتوكل على الله وابدي حياتك ولتوكف ولتباوع لوره
روح والهوة بظهرك ، وبالتوفيق ان شاء الله
-
اشكر الجميع على الاجوبه والله انتو اعزاء عليه مع العلم لم اعرفكم ومع كل ذلك يارب يوفقكم ويوفق الجميع بس تدرون واحد يحسب للبعيد تحياتي لكم وامنياتي بكل الخير للجميع
-
السلام عليكم اخي الغالي اتوكل على الله واروح وتره من توصل هناك محد ايدور وراك اولا انته معاملتك اصوليه ومشتغل سنه وعندك توصيات يعني كلشي تمام وميهم هذا الشي .,الي اني لاحظت ان تذكره اكتر من مره اتوكل على الله وبالموفقيه وبس توصل هذا الشي انساه للابد واهتم بصحتك ولاتفكر اهواي وان شاء الله تفرج
-
توكل بالله وسافر وانسه السالفه
-
اخويه هذا الموضوع يمكن انته كاتب بيه قبل انسه الموضوع حتى بينك وبين نفسك
-
اخي ابو النخو
توكل على الله وروح ولاضيع الفرصه من ايدك الحيات فرص واغتنمها
عمي بس توصل بالسلامه نصيحه هذه الشهاده انساها واذا حبيت روح ادرس من الصفر بنفس الشهاده يعني لاتعادلها وادرس بيها من جديد
المهم انته اشتغلت وياهم واكيد عندك خبره خويه صدقني همه شايفين بيك انته متعرفه ممكن يعرفون شهاده مزوره لاتفكر وروح ابدي حياه جديده اعتبر نفسك والد من جديد
هو منو العنده شهاده وراح يشتغل بيها الكل باديه من الفر وهذا الحجي انساه مزوره ولاتكله الى احد وكنه مصار روح وابدي من الصفر والله يوفقك عمي هو الشفنى مو شي من خيال ومحد ميصدقه
والله اخويه اليصير بالعراق كله محد يصدقه وشي من الخيال روح واتوكل على الله تره الندم بعدين ميفيد
اخوك اريد وطن / انتضار اجراءت السفر لكندا ( سفاره الصبر )
-
توكـــــل على الله صديقي العزيز..........نص الشباب سووا هيج شي...وهاي بالعكس تدل أنوا أنت سبع وبطل كدرت تحصل على شغل وويا شركة أمريكية أحسن من غيرك عوف الشهادة على صفحة.....توكل على الله والشهادة ترة بأمريكا ما راح يسألوك عليها ولا راح تستفاد منها بالبداية والله كريم.....
-
اخوان اهل المنتدى ماذا اقول لكم انتم والله حقا اهل خير وحمية ويارب ييوفقكم ويعطيكم الصحه والعافيه . واخ ابو ساره انا معطيهم شهادتي الاصليه لجماعة الهجره الحمد لله بس تدرون الي كعد يخليني اوهوس هو اكول من اروح تدرون هاي ايام وبس الرب يعلم بها يكولون انت غير مؤهل لهذا البرنامج للان نحن نريد فقط الذين عملو مع الامريكان وصح عملت لكن بالمعلومات مالتهم قايلين ان يكون الشخص العامل مع الامريكان ذو حسن سيره واخلاق والحمد لله ماعندي شيئ. لكن سيرتي عندهم همه هم اذا راسلوهم جماعة الهجره للشركه مالتي هم راح يكولون شركتي نحن لانعلم بهذا العمل مالته مال تزوير الشهادهوالشركة مالتي كانت طالبه فقط بكلوريوس وهسه يقولون انت يعني حتى في برنامج الشركه مامقبول فانا اقول يرحلوني من البلد والشغله الاهم اخواني ولو اسف والله على الازعاج ودوختكم وياية كلش كلش بس هذا السؤال اريد عليه جواب الصراحه يعني هذا مستقبل السؤال . عندما سالني المحلف قال لي انت عامل جريمه ومامحاسبك عليها القانون قلت له لا. زين اذا هناك ويدرون بالشغله هاي مع العلم التزوير عندهم جريمه مجرد بس نصيحه اريد حتى انهي كل شيئ صح ظوجتكم لكن اكول مجرد مشاركه معي بالتفكير ولو قليل وتحياتي لكم يا اعز اصدقاء وياربي اسمع الاخبار الزينه عنكم وانشاء الله نكون اصدقاء الى الابد مع جزيل الشكر والتقدير.
-
اخونا اهل النخوه
يابه اتوكل على الله وسافر انتي معرف امنين خايف اصلا انت ما راح اتروح وتستغل ابشهادتك هناك فمراح يستوجب اتقدم الشهاده المزوره تمام؟؟؟؟؟
وهما ما راح يدورون عليك هناك هما المهم يودوخك وانت وربك يا موسى
فاخونا روح وكول يا الله
وموفق بس تره مو اتروح هناك وتكون متعلم على التزوير هههههههههه
-
اشكرك اخي انشاء الله الموفقيه لك وللجميع ولا بالنسبة للتزوير انا مقدم شهادة اصليه وحقيقيه لجماعة الهجره ويارب يوفقك تحياتي للجميع
-
اخوية اهل النخوة انت لمن حددولك موعد سفر بعد لا بيها سين ولا جيم من رح توصل كل اللي تسوي هو معاملات السوشيال نمبر وقضايا المساعدات والفود ستامب يا شهادة يا بطيخ هاي صارت فعل ماضي هسة انت بالمستقبل بطل وسواس وروح سافر ولا تباوع الى الوراء تحياتي وبالتوفيق
-
يابا يا شهادة توكل على الله وسافر وتوصل بالسلامة
-
اشكركم جزيل الشكر احبائي الاعزاء واسف والله وخجلان منكم للان جدا تعبتكم معي وصح انشاء الله راح اتوكل على ربي وهو الي مقدر لي هذا الشيئ ولله الحمد واسف مره اخى للان ازعجتكم
-
اخي العزيز مبروك اولا وثانيا اتوكل على الله وان شاء الله تتيسر امورك
-
اخي اهل النخوه
هذا الخوف المفروض ايراودك في بداية مرحلة التقديم
اما الان وبعد ان اجتازيت كل تدقيقات الا اي او ام واجتازيت المحلفين وطلعتلك الامنيه واتحدد موعد السفر
بعد منو راح يلكفها واصلا بعد مالها قيمه هاي المعلومه
وداعتك الي طلعوا من جماعتنا عدهم 3 شهادات جامعيه وتالي اخذوا وياهم شهادة الثانويه حتى ايكملون مناك دراسه عليها
والمنظمه هناك مراح تسالك على شهاداتك وانما ادكلك انت مستعد تشتغل باي شغله اندبرلكياها واكيد انت ادكلهم اي اقبل حتى ليعتبروك متبطر
وهسه انت خربت علينا فرحة السفر
جان المفروض انكلك الف مبروك على تحديد السفر والله ايسهلك سفرتك لو خاف دتطرد عين ;D تره احنا منحسد بالعكس نفرحلك
وياربي ايوفقك بشغل احسن من بغداد
والله وباك
اختك يارا
-
اخي اني اذكر انك نزلت هذا الموضوع وجاوبتك وراح اجاوبك الان اخي اولا :شهاداتنا محد يعترف بيها حتى لو عادلوها لانها فقط لاكمال الدراسة
ثانيا :انت منو راح يشغلك بشهادك
ثالثا :اوراق الي انت قدمتها في المنظمة ماكو احد راح يشوفها لانها راح تغلق ةترزم وتنتهي .
اخي توكل على الله وهذا الموضوع اصلا لا تفكر بيه ابدا ........اختك ايات /مصر
-
اتركه على اللة وانشاءللة تسافر بنفس الموعد ربي يوفقك
-
اشكركم خواني واخواتي على الاجابه يارب يوم الفرحه للجميه واختي يارا لا والله انا لن اضم شيئ على احد هذا الواقع وانشاء الله اتوكل وتصير سوالف واشكركم مره اخى احبائي واسف جدا جدا على ازعاجكم نعي والله تحياتي يا غلى اصدقاء
-
اخي اهل النخوه اتكل على ربنا مثل ماقالو الاخوان وانشالله ماكو شي كل انسان من يجي يسافر يخاف من شي معيين,,,انشالله خير واتسافر وتستقر وكلها اتصير سوالف صدكني ,,,اتمنالك الموفقيه والمستقبل الزاهر يارب
-
يارب يارب يوم الفرحه للجميع وخاصة العراقيين بأن يوفقنا ويصبح بلدنا احسن البلدان يارب اميين واشكركم والله على كل حرف منكم للاجابه عليه ولن انسى هذا الفضل منكم واقول الهم ييسر سفري فانت الذي كتبت لي هذا وقدرت لي هذا الشيئ فأن كان لي وللأهلي مصلحة فيه فأعني ويسره لي وان لم يكن لي مصلحة فيه ولا للأهلي فابعده عني وانت اعلم العالمين يارب العالمين وييسر كل اموركم اخواني من سفر وغيره تحياتي لكم ياورود والسلام عليكم ورحمة الله وبركاته.
-
اخويه رحمه لابوك احنا الي شهاداتنا مو مزوره و اصليه كاعدين ننتظر اشهر لو يعترفون بيه لو لا ومعادله و لعبان نفس ,, مدكلي منو سائل شهادتك وين لو منين
محد يسال هنا لا على شهاده ولا على شي بس اهم شي i94 مو مزوره ههههه والباقي لا تشتريه ابفلسين
-
اشكرك اخي ماقصرت والله انشاء الله بس اني مقدم للهجره شهادتي الاصليه لكن الشهادة الي مقدمها للشركه مو اصليه لا عادي انشاء الله ماكو شي بس سؤال بدون زحمه اخي شنو يعني i 94
-
اخي اهل النخوه
الاستماره الي هيه i94 والي ايسموها البعض بالوايت كارت
هاي اول استماره تمنح للغرباء عند دخول لولايات المتحده وتملاء من قبل الوافدين او من قبل منظمات الهجره
وهي بمثابة تاشيرة دخول ومنح الشرعيه لتواجدك على ارض الولايات المتحده لحين حصولك على الكرين كارت
اختك يارا
An I-94 is a form denoting the Arrival-Departure Record of particular foreigners used by U.S. Customs and Border Protection (CBP). U.S. Citizenship and Immigration Services (USCIS) uses Form I-94 also. Form I-94 must be completed at the time of entry to the United States by foreign citizens that are being admitted into the United States in a non-immigrant visa status.[1]
-
اشكرك اختي يارا وماقصرتي وانشاء الله ينور طريقك الرحمن ويجعلكي من احبابه تحياتي لكي وللجميع
-
اتركه على اللة وانشاءللة تسافر بنفس الموعد ربي يوفقك
اخوك عماد الشمري