ankawa
منتدى الهجرة واللجوء => الهجرة و واللاجئين => الموضوع حرر بواسطة: مازولا في 15:43 10/11/2009
-
السلام عليكم اخواني الاعزاء ... ان شاء الله الكل بخير ... اليوم خابروني من السفارة و كالو لي تعال استلم الجوازات بيهه الفيز ... كالو تعال ساعه تلاثه الظهر ... اني كلت شويه خلي اتعزز عليهم جان اكوللهم ما اكدر اليوم لان عندي اجتماع مهم بهال الوكت (لا ترة دا اضحك وياكم اني صدك عندي اجتماع تره مو شغله دا اتعزز لو ما ادري شنو) ... كلتلهم اجي باجر جان يكولون باجر عطله (هاي شلون شغله) لازم الخميس اروح استلمهه ... يلله ان شاء الله اروح الخميس و استلمهه ... اييييييييي اخيرا بعد سنه و تلث تشهر خلصت ... و هسه راح تبدي الرحله الاصعب ... اخواني الاعزاء اني كلبي ديدك 180 باللوفه و متخربط و ما اعرف شاكول ... الحمد لله و الشكر و ان شاء الله تنحل جبسه كل اللي نايمه عليهم طابوكه ...
اخواني و حبايبي ... اريد اشكر الكل كل الموجودين بالمنتدى من صغيرهم لجبيرهم ... و كلمه الشكر هيه قليله بحقكم لكن ان شاء الله تصير فرص و اكدر اساعد المحتاجين للمساعده مثل ما دتسوون ...
هسه نجي نحجي على اللي جاي ... اني ما اعتقد راح اكدر اقدم على المساعدات لان ما اعرف شوكت راح اسافر ... و ذوله يريدون جواب و تاكيد خلال عشر ايام من صدور الفيزا ... تكلمت اليوم ويه المدير الجبييييير مال المشروع و كاللي انت عندك ست اشهر ... و كال انو راح يحاول ان يشوفلي من خلال علاقاته فرص عمل بامريكا و لو هيه صعبه بس راح يحاول ... و اني هم كاعد هنا و دا اشتغل بهاي الفترة ... هيه الصدك غير حيرة ... اني مو على المساعدات ... بس تكتات الطيارة يعني شويه تكسر الظهر ... احنه خمسه يعني بالقليل رح تصير بحدود خمس تالاف دولار ... اضافه الى انو اني من راح اروح هناك صدك اقاربنه هناك راح نروح يمهم بس لا اندل و لا اعرف منين اسوي الكرين كارد او وين اروح على السوشيل نمبر و من هاي السوالف اللي لازم الواحد اول ما يوصل يسوييهه ... على كل ... ان شاء الله من نريد نطير انتو موجودين و ما تقصرون ...
بالمناسبه ان شاء الله احنه رايحين على اريزونا – بيوريا كلهه نص ساعه عن فينكس ... يلله الله كريم و كل عقده و الهه حل مثل ما انحلت الجبسه مالتنه و خلصنه ...
مع تحياتي و تمنياتي بالتوفيق للجميع ... اخوكم مازولا
-
اخوية العزيز مازولا,
شايف كل الخير اخوية العزيز وبشرك الله بلخير, والف الف الف الف مبروك, بلموفقية ان شاء الله حبي . وتسافر واتفرحنة وتوصل هناكة ..
ريفولفر
-
الف مبارك اخويه مازولا والحمد لله انفكت الجبسه اخيرا
بالتوفيق في ايروزونا
وان شاء الله راح تتخذ القرار المناسب في ما يخص البنفتس (( اخذه ولا تلح )) اسمع كلام اخوك ابو عبد الله
بالتوفيق عمي وشايف الخير اغاتي
-
الف مبروك اخي مازولا وانشاءالله تسافر بخير وسلامه اتمنالك التوفيق والنجاح
-
مبروك وشايف كل الخير ودير بالك اخي متقدم على البنفتس ترة مفيدة جدا بالتسبة لانجاز المعاملات هناك. وثانيا انتة الك حق اتقدم على البنفتس مو ورة عشرة ايام من اصدار الفيزا او هيج شي, لا الك حق اتقدم الى حد مايبقة ثلاثين يوم من الفيزا مالتك واتكون اكسباير بهذاك الوقت ما الك حق اتقدم.
وربي ايوفقك
اخوك روس ابن العراق
-
شايف كل الخير وتوصل بالسلامة
المساعدات اللي اعرفة همة قبل سنة من بدة البرنامج الجديد مال 5000 كالو لازم اتقدم من بغداد قبل متجي بس يا اخي اني هواية جماعتي اجو على حسابهم ومنانا قدمو ومشت الامور بس انت احسنلك قدم من بغداد لان اخاف تجي وايفرون القايش عليك لان اشو هواية دنسمع اخبار انه ديعصلكون وية جماعة ال SIV
-
الف الف الف مبروك
وان شاء الله توصل بالسلامه
والموفقيه للجميع
نهاد ابو علي
-
الاخوان الاعزاء
ريفولفر
ابو عبدالله
عكعك
روس
ابو اندرو
و نهاد
شكرا على كل شي و ما قصرتو
اما بخصوص المساعدات ... بعد نقاش مستفيض ويه وزاره الداخليه قررنا ما هو اتي ... ان نقدم على المساعدات و نطلب موعد سفر في اخر شهر من الاكسباير ما ل الفيزا ... يعني بشهر الخامس ... و اذا صار حجي الشركه صدك و لكولنه شغل قبل موعد السفر راح نبلغ المنظمه حتى يغيرولنه موعد السفر و نبقى وياهم الى ان استلم الشغل اذا الله سهلهه ويانه ...و الله كريم ... اول شي خلي استلمهه باجر للجوازات و اشوفهه للفيزا ...
شكرا و الف شكر للجميع ... و تحياتي و تمنياتي للكل بالموفقيه ... اخوكم مازولا
-
اخي العزيز
اول شي الف مبروك وانشاء الله تشوف بيه كل الخير
بس اريد انبهك الى انه الفيزا مو 6 اشهر بس 3 اشهر وانت لازم تعد نفسك للسفر خلال هذه الفترة لانه اذا انتهى مفعوله راح توكع نفسك بمشكلة والله يوفقك
ابو رامي
-
الف مبروك اخونا وهمزين لكينا واحد من جماعة الSIV يحجيلنا اللي صار بس كوللنا اخوية انت شوكت قابلت بسفارة بغداد بأي تاريخ وشكد طولت المدة بين المقابلة ووصول الفيزا؟ أفيدونا أفادكم الله ومبروك مرة ثانية
-
السلام عليكم
شايف كل الخير اخ مازولا ومبروك ان شاء الله
اتمنى لك حياة جديدة وسعيدة ببلاد العم سام والله يوفقك
Echo 9
-
اخي مازولا
شايف كل الخير والف مبروك على استلام الفيزا وياربي ان شاء الله يوم تحديد موعد السفر
عيني اخ مازولا هيه العافيه بالتداريج
اول شي هسه افرح بالفيزا واصفن شويه ورتب وضعك
وانت بدل متدفع 6000 (5×1250 تقريبا) على التذاكر هاي اتفيدك هناك الاشهر الاولى اتمشي نفسك بيها
وحتى اذا منا سوولك واسطه على شغل وهذا الي صار ويه جماعتنا
لازم لما اتروح واتحصل الكرين كارت او السوشيل (ياهو الي يجي كبل)
وبعدين اتقدم الابلكيشن وياخذ فتره لما ايقابلوك وبعدين فحص الدراك تيست
وبعدين لما ايبتون بالموافقه وايسوولك اورينتيشن
يعني اقل شي شهرين الاولى( اذا مو اكثر) بالخسائر راح تضطر تعتمد على المساعدات
فخلي فلوسك تنفعك هناك
ولتفرط بالمساعدات علمود شهر اضافي هنا
واتوكل على الله
وان شاء الله ايسهلك كل امورك
وبالتوفييييييييييييييق
اختك ريم
-
السلام عليكم
أخي العزيز مازولا
الف مبروك أستلام الفيزا والله يسهل أمرك ويوصلك بالسلامة.
حاول أن تقدم على المساعدات لانها تنفعك ومثل ما كالت الاخت ريم الفلوس اللي هسه عندك تفيدك هناك اول فترة.
اكو نقطة ثانية مهمة وهي انتوا ما شاء الله خمسة أشخاص بعين العدو تحتاج الى ضمان صحي حتى لو متستخدمه وان شاء الله متحتاجه بس اول فترة المساعدات هي اللي توفرلك التأمين الصحي فنصيحه قدم على المساعدات.
تقبل مروري
عيني بغداد
-
مبروك استلام الفيزا و على الخير
ان شاء الله توصل بالف سلامه
نصائح الاعضاء كلش مهمه اخذها بعين الاعتبار
بالتوفيق للجميع
-
السلام عليكم اخواني الاعزاء ... هسه راح اكتب ملخص للي دزيته و اللي دزوه اليه ويه التواريخ ... هسه اني فاتح الايميل و مطلع الرسائل و دا انقل التواريخ و الشغلات ... بس هاي طلع الحجي كلش هوايه ... عود اني كلت ملخص ههههه
15/9/2008 اول ايميل دزيته الى الـ SIV على اليميل ادرس IraqSIVapplication@state.gov شرحتلهم بيه حالتي و شغلى و التهديدات اللي صارت لي و كل المعلومات اسمي و عائلتي و الامريكان اللي مشتغل وياهم و ايملاتهم و سويت اتاجمنت للركومنديشن لتر و الباج و الفريفكيشن لتر و الـ DS-157 و كلتلهم اذا تريدون شي بعد اني حاضر
15/9/2008 جاوبني اوتوميتد ريبلاي كلي لا تجاوب على هذا الايميل و احنه راح ندرس الشي اللي دزيته و نجاوبك اذا نحتاج شي
9/10/2008 جاوبوني و كالولي شكرا على اختيارك هذا البرنامج (عبالك مسوي عليهم فضل) و رادو مني هاي الاشياء ... DS-157 مره ثانيه و لازم كامله بكل التواريخ مال العسكريه (جنت ما كاتبهه كلهه) ... نسخ من الهويات الي و لكل واحد بعائلتي ... الايميل الرسمي للي سوالي الريكومنديشن ... ملخص للتهديدات اللي تلقيتهه ... و البايوكرافك داتا لكل واحد من عدنا اني و عائلتي ... و كالو بعد استلام كل هاي راح يسوون بروسس للمعامله
3/11/2008 دزيت الهم كل اللي رادو مني ... اني اشتغل على راحتي ... و كلت الهم همينه اذا يريدون شي بعد لا يستحون خلي يكولون راسا و من هاي العين و يتدلل الحلو
11/11/2008 همه اتصلو بالسوبرفايزر مالي ديشوفون اني صدك حباب و خوش ولد لو بس حجي و طلبو منه ... تاكيد الركومنديشن لتر حقيقيه ... اني باقي لو عايف الشغل و سيرتي زينه بالشغل ... و كالوله انت امريكي امريكي لو كلاوات ... و كالوله مازولا هذا خو مو يهدد الامن القومي مال امريكا ... و هم شكروه كلش هوايه
12/11/2008 جاوبهم السوبرفايزر و كال الهم هذا بركبتي
وراهه صارت صنطه ........... و فجاه
25/11/2008 استلمت الكوم افروفال ويه التهاني و التبريكات ... و كالو دز اوراقك بالبريد العادي الى نبراسكا ... اول شي اطبع الابروفال و اخلي نسخه منه ويه الاوراق ... و املي الفورم I-360 ... نسخة من البسبورت , شهادة الميلاد او الهويه مترجمه ... نسخه من الريكومنديشن ... و ادزهه على العنوان اللي دزوه الي على البريد العادي مثل ما كلنه
اني هم دزيت الاوراق على البريد السريع و كعدت انتظر
27/1/2009 استلمت الـ National Visa Center ايميل انهم استلمو المعامله من نبراسكا و كلشي على حسب الاصول ... و رادو كومه شغلات ... اول شي الـ DS-230 الجزء الاول و الجزء الثاني لكل واحد ... نسخة من الباج ... الاوراق المدنيه, شهاده الميلاد, شهادة الزواج, هويه الاحوال, و شهاده الجنسيه ... شهادة حسن سير و سلوك من كل بلد انت بيه لمده اكثر من سته اشهر ... البايوكرافكال داتا ... نسخه من الباسبورت نوع G ... صور من هاي ام 5*5 ... هاي كلهه سكان و اندزهه على الايميل NVCSIV@state.gov. و كل الاوراق لازم تكون مترجمه و نرفق شهاده مكتب الترجمه ... و اخر شي كالو اذا تريد تاخذ المساعدات لازم تملي الفورم DS-234
31/5/2009 دزيت الهم اول ايميل بيه الصور و ثاني ايميل بيه كل الاشياء اللي رادوهه ... جمعت كل المطلوبات لكل شخص من عدنه و سوته فايل مرتب من اول فورمه للاخير و حتى بيه فواصل بين فورمه و الثانيه ... يعني دزيت خمس فايلات ... تره الترتيب هوايه ياثر (يمكن)
1/6/2009 دزولي كالو استلمنه الاوراق و اكعد انت على الشحن احنه نتصل بيك
4/6/2009 دزولي checklist بيهه النواقص اللي يردوهه و كانت دفتر الخدمه العسكريه ...DS-157 لكل واحد ... جواز ابني الصغير (كان عنده جواز اس و كنا دنطلعله جواز جي)
22/6/2009 دزيت كل اللي رادوه
22/6/2009 بنفس اليوم جاوبوني و كالو استلمنه و اكعد انت مره لخ على الشحن
24/7/2009 دزولي ايميل كالو الشغله خلصت و تروح للسفاره تقابل بيهه يوم 23/8 و تسوي قبلهه الفحص الطبي ... بس الفايل اللي دزوه كان مخربط و الاوراق متكرره
2/8/2009 دزيت الهم كتلهم هاي شنو دازيلي اشو الاوراق مخربطه (اني ابو الراهي)
4/8/2009 ال NVC كالو لي انت ليش ادز النه ... احنه معلينه ... شغلتك هسه يم السفارة ... روح اتفاهم وياهم
6/8/2009 دزيت للسفارة كلت الهم الفايل اللي دزولياه مخربط فاذا ممكن يوضحون الامور شويه ...يعني هنا صرت حباب
6/8/2009 جاوبوني الـ NVC ... يمكن السفاره مرزلتهم ... كالولي احنه نشكرك على الايميل مالتك و نعتذر كلش و دزولي الفايل من جديد بيه الموعد و التلقيحات المطلوبه و الفحوصات الطبيه المطلوبه ... لكل واحد من عدنا شنو الاوراق اللي لازم ياخذهه وياه و شنو مكمل و شنو بعد مطلوب
10/8/2009 السفارة دزت لي ايميل بيه موعد المقابله بالوقت و التاريخ ... الساعه عشرة يوم 23/8 و كالو تعال قبل اسبوع جيب الاوراق حتى من تجي بموعد المقابله نكون احنه دارسين الاوراق كلهه و نمشيك على السريع ... وتكدر من تجيب الاوراق تجي وحدك ... بس بالمقابله الكل لازم يكونون حاضرين
11/8/2009 الرابس نت دزولي كالو استلمنه الدي اس 234 و كالو عندك كيس نمبر و من تستلم الفيزا دز النه نسخه
23/8/2009 رحنه كلنه قابلنه و اخذو طبعات الاصابع مالتي و لزوجتي و شلنه ايدينه و حلفنه و وقعنه على الورقه ... بس كالو انتو عدكم نقص شهاده حسن سير و سلوك من العراق ... كتلهم احنه شيودينه للعراق و شلون راح نطلعهه ... كالو جيبوهه من السفارة العراقيه ... و خلو كل الاوراق (الهويات و غيرهه) يمهم بس ما اخذو الجوازات
سويناهه لهاي و طولت تقريبا 5 اسابيع
من قدمناهه كالو شهاده حسن السير مالتكم صارت اكسباير ... لازم تسوون وحده جديده ... كتلهم طبعا اذا احنامقدميهه من البدايه طبعا تصير اكسباير لان مدتهه 6 اشهر ... كالو لازم تسوون وحده جديده و من تجيبوهه جيبو الجوازات وياهه
8/11/2009 كملنا شهادات جديده و وديناهه هيه و الجوازات
9/11/2009 خابروني كالو طبعات الاصابع مو واضحه
10/11/2009 رحنه للسفارة اني و زوجتي سوينه طبعات الاصابع من جديد و كالولنه كلشي خلص بس نضبف الفيزا و نخليهه بالجواز و نخابركم
نفس اليوم بالثنتين الظهر خابروني كالو تعال بالتلاثه استلم الجوازات ... اني كتلهم ما اكدر اليوم اجي باجر كالو عطله ... تعال الخميس استلمهه و كالو الفيزا الاكسباير مالتهه سته اشهر
و ان شاء الله باجر خميس و اني وياهم على الموعد
-
الاخوان الاعزاء و الاخوات العزيزات ... شكرا لكل التهاني و التبريكات و النصائح و ان شاء الله يوم اللي انتو هم تروحون و توصلون (هذا بالنسبه للمواصلين)
الاخ ابو رامي
الاخ ماجلان
الاخ او الاخت (الاسم ما ينعرف) szsz
الاخ ايكو
الاخت ريم عبد
الاخ عيني غداد
و الاخ شو
شكرا مرة ثانيه ... و احنا مثل ما كلت دندرس الوضعيه و باجر ان شاء الله من نستلم الجوازات نقرر (و القرار تره مو بس بيدي)
مع تحياني و تمنياتي للكل بالتوفيق ... اخوكم مازولا
-
(و القرار تره مو بس بيدي)
ها مازولا ليش هيج ليش هع هع هع هع هع هع هع
يمعود هسه مو عالعام
يعني شويه سهلهه لو شتكول - نعترف والله كريم- ؟؟ ;D ;D ;D
-
ابوعبد الله الورده ... هذا الصدك غير ... شلون ما اشاركهه بالقرار و هيه ويايه على الحلوه و المره ... و تره هذا القرار قرار حياة جديده و الكل لازم يكونون مقتنعين بيه ... ثم اني تره بالبيت رئيس جمهوريه ... يعني كلشي ما بيدي هههههههههه و عندي وزارةالدفاع و الماليه و الاسكان ... و همه رئاسه الوزراء و كل باقي الوزارات و طبعا للوزارات مالتي همه هم بيهه وكيل وزير ... عمي خليهه سكته
مع تحياتي ... اخوكم مازولا
-
السلام عليكم اخواني الاعزاء ... مثل ما كلت ... اليوم يوم استلام الفيزا مالتنه ... رحت للسفارة الساعه بالتلاثه ... و كنت وحدي و ماكو احد غيري من دخلت للقنصليه ... و راسا طلعلي الموظف و اعطاني الجوازات و المظاريف الصفر و المستمسكات الاصليه مالتنه ... و كال هاي المظاريف الصفر ميصير نفتحهه ... همه يفتحوهه بالمطار من نوصل ... و الجوازات كلهه عليهه الفيزا فيزا مهاجر ... بس شنو صار ................ من دا اطلع كمت اكلب واقرا الفيز اللي بكل جواز ........ و فجاه ........... طلع الجواز مال ابني الصغير اللي عمره سنه ة نص ... كاتبين بيه GENDER : F يعني مسوييه بنيه ... جان ارجع للقنصليه و طلبت ادخل من جديد ... و قابلت الموظف مره ثانيه و كتله هيجي و هيجي السالفة ... كلي بسيطه بس ميكدر يسوييهه اليوم لان الدوام راح يخلص فلازم اجي اخذ الجواز مال ابني يوم الاحد و هوه يخابرني و يكلي شوكت ... و اخذ الظرف الاصفر همينه ... بس بقيه الجوازات و الظروف عندي ... زوجتي تكول هاي اكو واحد حاط عينه علينه لان يوميه طالعاتلنه شغله و اليوم راح تطكطك حرمل ... ههههههههههههههههه
يلله الحمد لله كل تاخيرة و بيهه خيرة ... و بالمناسبه الفيزا الاكسباير مالتهه 6 اشهر ... يعني لغايه 9 مايس 2010 ... و هم بهدنه دا نتناقش على الروحه من نقرر (ها شوفو ننننننقرر) راح اكوللكم ...
مع تحياتي و تمنياتي للكل بالتوفيق ... اخوكم مازولا
-
مبروك اختي العزيزة ... ان شاء الله يوم السفر و الاستقرار ... و ان شاء الله بالتوفيق لكل اللي مقدمين ... اني اليوم ان شاء الله استلم جواز ابني ... و راح اطلب ان يكون السفر باخر اسبوع من نيسان ... عندي بس سؤال للطيبين ... اذا ردت اقدم موعد السفر يصير لو ما يصير ... و اذا يصير خلال شكد راح يحددولي موعد جديد؟؟؟؟
مع تحياتي ...اخوكم مازولا
-
الف الف مبروك
الله يكمل معاك
اخوك يوجد امل
-
اختي العزيزة ... ممكن تتبعين هاي الروابط من موضوع الاشياء اللي ناخذهه ويانه
القلاقيل الي تاخذهه و الي متاخذهه وياك من تسافر
http://www.ankawa.com/forum/index.php/topic,308359.0.html
اخواني احبائي اصدقائي استفسار عن المواد الممنوع دخولها الى امريكا
http://www.ankawa.com/forum/index.php?topic=338578.0
معلومه مهمه بالنسبه للمبلغ المسموح دخوله لامريكا ؟؟
http://www.ankawa.com/forum/index.php/topic,339483.0.html
و اكو هوايه مواضيع اخرى عن هذا الموضوع
مع التحيه ... اخوكم مازولا