ankawa

منتدى الهجرة واللجوء => الهجرة و واللاجئين => الموضوع حرر بواسطة: cricket في 08:47 08/12/2009

العنوان: لا ارض احلام ولا هم يحزنون
أرسل بواسطة: cricket في 08:47 08/12/2009

راي شخصي
اربعة امور يجب ان تعرفها عن امريكا
1- اذا كنت تعتقد انك في ارض الاحلام فانت مخطئ على الارجح انك غادرت ارض الاحلام التي لا تتحقق اما بسبب سياره مفخخه او عبوه ناسفه
2- اذا كنت تعتقد انك ستضع ساقا فوق ساق ويعمل الجميع لتحقيق اسباب راحتك لانك لاجئ او توطين او ضمن برنامج كذا او كذا او لانك في العراق كنت مدير او مترجم او.. او.. او.. فانت مخطئ لان هنا تتحقق الاحلام بالعمل ( المضني ) الذي قد يكون صغيرا جدا لا يتناسب مع كل شهاداتك او موهلاتك والذي سوف لن تجده بسهولة والذي يكون بمميزات تافهة قد لا تكون سببا كافيا للقدوم الى هنا مثل ( تعرف وتشعر بمعنى كلمة انسان  - القانون الذي لا يفرق بين غني وفقير ومواطن ومسؤل وفلان لانه ابن عم فلان - لاول مره تبدئ بالتفكير بما يمكن قد نسيناه وهو المستقبل )
3- اذا كنت تعتقد انك تستطيع نقل كل عاداتك وتقاليدك المكتسبه بالقبليه او البيئيه او المنهجيه التي تعودت عليها فانت اكبر مخطئ لان الكثير منها يخالف القانون والعرف السائد هنا ( العادات والتقاليد وليس الدين او المعتقد كي لا يتوهم البعض ) وانصحك بان لا تاتي الى هنا .. ابقى هناك
4- اذا كنت تعتقد انك افضل منهم لانك مختلف من ناحية الدين او القوميه او اية امور اخرى فانت مخطئ لانهم لسبب ما حاليا باعتراف الجميع رقم 1 في اغلب الامور فحاول ات تكتسب منهم الجيد وتعمل به بدل من ان تنظر الى السئ وتقعد طول النهار تنتقده بالبالتوك والمنتديات وتوهم الناس فان لم تستطع لا تاتي الى هنا .. ابقى هناك
وشكرا.

العنوان: رد: لا ارض احلام ولا هم يحزنون
أرسل بواسطة: Abo Rami في 09:06 08/12/2009

والله اخي العزيز يمكن اعتقد كلامك فيه تناقض كثير ,,, رجاءا مالذي تريد ان تقول من خلال هذا الطرح ؟ هل تريد منا ان (نبطل ) مانجي لامريكا لو شنو ؟ وهل تعتقد ان الخيارات التي امامنا في العراق كثيرة لنختار عدم القدوم لامريكا ؟للتوضيح رجاءا

العنوان: رد: لا ارض احلام ولا هم يحزنون
أرسل بواسطة: cricket في 09:17 08/12/2009

اشكرك اخي ابو رامي على مرورك الكريم
لكن راي كان واضح جدا ليس فيه اي تناقض ومميزات هنا عن هناك وضعتها بين الاقواس وتقديرك الشخصي هو الحكم

العنوان: رد: لا ارض احلام ولا هم يحزنون
أرسل بواسطة: AbU.SaRa في 09:29 08/12/2009

 أخوية العزيز كريكت هذا هو رأيـــــــك الشخصي وأنت أدرى بي ...يعني كلام الأخ من كال ( يعني ما تريدنه نجي الأمريكا) هو راح يكون جواب كلمن راح يرد عالموضوع أني متأكد ....بس يا أخوان ترة هذا رأي شخصي وأنطرح يعني لحد يكبر الموضوع ....وبالنسبة الهاي النقاط أخوية العزيز ترة كلمن يعرف وضعه وأكو ناس الى حد هاي الساعة هي متهددة وما متحملة الوضع فمجبور يغادر.......خلي نشوف الردود

العنوان: رد: لا ارض احلام ولا هم يحزنون
أرسل بواسطة: ★AbN✰BaGhDaD★ في 09:30 08/12/2009

كلمن عقلة براسة يعرف خلاصة  ,,,,واهم شي قناعة الانسان نفسة  بلي  يسويه ,,يبقى لو يسافر !!!!

هواي  ناس  محالفهم الحظ   ...وهواي  ناس  طلعوا من بلدانهم مديونين وخلال فترة قليلة كونوا حالهم ورتبوا

امورهم

تحياتي  

ابن بغداد
فرجينيا  

العنوان: رد: لا ارض احلام ولا هم يحزنون
أرسل بواسطة: eng.a7med في 09:39 08/12/2009

شكرا اخي cricket  على الموضوع

و هذا رايك الشخصي و وجهة نظرك الي اتفق وياك بيها الى حد كبير

تحياتي

العنوان: رد: لا ارض احلام ولا هم يحزنون
أرسل بواسطة: migrant في 10:00 08/12/2009

شكرا على هذا الموضوع..واعتقد كلامك واقعي..اخوان اعتقد الي يريد يوصله الاخ cricket من كلامه هو انه الانسان لازم يصبر  و يحاول يتكيف مع البيئة الي عايش بيهه حتى يعرف يعيش...

واكوو مثل لازم كل المهاجرين يخلوه ابالهم "" NO Pain.... NO Gain "  ;)

العنوان: رد: لا ارض احلام ولا هم يحزنون
أرسل بواسطة: المهندس حمودي في 12:01 08/12/2009

الاخ Cricket

تحية طيبة
وشكرا على الموضوع

انت بالبداية كلت انه رائي شخصي 
 . صحيح اكو ناس تعتقد انه هيه ارض الاحلام والارض الموعودة . بس مو النه احنة العراقين اول ما نروح .. لا . هاي يرادلها وقت وجهد وتعب . وما كو شي يجي بالسهل .

بس تعرف انت اكو ناس فقدوا اهلهم واحبابهم واعزائهم والدور الهم هسه اذا ما يطلعون بروحهم العزيزة . فلذلك هم يروحون لامريكا ( من لا جارة) . وثانيا هم الي دا يطلعون كلهم المهندسين والمترجمين والدكاترة . مع العلم ان البعض لايحمل شهادات عالية . ولكن من شخص يصعد الى منصب عالي يكون سهلة عليه . بس من ينزل الى الاسفل هذا شي كلش صعب . لذلك اكو هواي نا ما دا تتحمل الوضعية من يروح هناك . وين كان هنا فلوس وشغل واموره زينة .. وويرن يروح هناك يعيش على المساعدات يشوفها ما تصرف .

وهذا رائي كذلك بالموضع .
تحياتي
اخوك
المهندس حمودي

العنوان: رد: لا ارض احلام ولا هم يحزنون
أرسل بواسطة: دنفش في 12:59 08/12/2009

اخي المحترم كاتب الموضوع
انت تكول امريكا مو ارض الاحلام  يا اخي اليوم الثلاثاء الدامي وشفت بعيني محد كلي اني كنت بشارع فلسطين من صار الانفجار وتصور جنت مقرر افوت من شارع الزوراء اللي صار بي ايضا انفجار يم الفنون الجميلة يعني منا منا اكو انفجار ثلاث ساعات الى ان وصلت للبيت  وكلت واللة هاي عيشة الواحد لو يرجع لو ما يرجع للبيت انت وحضك لا واللة شما اشوف بامريكا افضل من اللي اشوفة من هذا البلد اللذي تحكمة العمائم واللحي  ويبقى كل من ورأية           تحياتي

العنوان: رد: لا ارض احلام ولا هم يحزنون
أرسل بواسطة: ok_ok755 في 13:26 08/12/2009

اولا حمد الله على السلامه للجميع وحمد الله على سلامتك دنفش

ثانيا شكرا على موضوعك واني احترم رائيك بس يا اخي اذا تجي وتفكر زين وتسوي مقارنه بين الوضع بالعراق والوضع بامريكا برائيك يعني ومن خلال كلامك الوضع بالعراق احسن ؟
انت غلطان اخي العزيز ابسط شي اذا تجي تقارن بين الخدمات فاكيد بامريكا احسن بمليون مره واذا تجي تقارن الاسعار راح تشوف هم امريكا ارخص من العراق واذا قارنت نسبة البطاله راح تشوف امريكا اقل من العراق انت تعرف هسه شكد ناس ما عدهم شغل بالعراق ؟ اني ضربتلك هاي الامثله البسيطه بس اكو شي مهم جدا ما ذكرته لانه اكيد تعرف وهوه الامن والامان هل تعتقد هذا الشي موجود بالعراق ؟ اسالك انت مأمن على نفسك من تطلع للشارع ؟ انت مأمن على نفسك من تكعد بالبيت ؟ انت تكدر تمارس ديانتك بكل حريه بالعراق ؟ تكدر تعبر عن رايك بمنتهى الصراحه بالعراق ؟ ما اتوقع منك راح تكول نعم على اي سوال من هاي الاسئله فيا اخي فكر زين قبل ما تنزل هيجي موضوع ما اعرف شنو الي تريده بس احب اكلك مو ظروف كل الناس سوه.

تقبل تحياتي

العنوان: رد: لا ارض احلام ولا هم يحزنون
أرسل بواسطة: راهب الحب في 13:40 08/12/2009

أخوية العزيز كريكت :::
صـّح لِسانك وعاشت إيدك إللي طبعت هذا الموضوع ...
والمثـل يگول ::: إللي بي خيــر يجيب نقـش ...
ولو كان بأميركـا النقش يبين بعد سنين عمل مُضني فهو أحسن وأفضل من لا شيء ...
تمنياتي إلك بالتوفيق أخوية العزيز ودُمت بألف الف خيـــر .... †




                          أخــوكــُم / وسـام بهنـام داؤد الخابـــوري

العنوان: رد: لا ارض احلام ولا هم يحزنون
أرسل بواسطة: ريم عبد في 13:48 08/12/2009

اخوان الاعزاء
الاخ كريكت لا ديكول تعالوا ولا ديكول ابقوا
بس ديكول انظروا للامور بمنظار واقعي
انت اذا مجبور على الطلعه او عندك هدف محدد اتريد اتحققه
اتوقع راح تبذل جهد وتعب والم حتى اتحققه
ولتتفائل  بشكل مفرط حتى لتنصدم بالواقع
والي ايحسب للامور بشكل أكثر واقعي راح يكدر يتعايش بحال افضل
وهئ نفسك نفسيا وماديا وثقافيا حتى تقوى على مجابهة المصاعب الي اتواجهك
وكل واحد راح ايواجه ضرف مختلف فاتحسب لكل الضروف
والله ايسهل على الجميع وايوفقهم

العنوان: رد: لا ارض احلام ولا هم يحزنون
أرسل بواسطة: ابوجنة في 15:14 08/12/2009

موضوع حلو وردود احلى واتمنى من الكل ياخذون فكرة ويدروس الموضع بجدية مو بعصبية وسرعة لان فكرة السفر هذه فقط فكره مرعبة كيف اذا كانت الى امريكا؟؟
  اخواني هذه الطروحات نريد نستفاد منها ونبني فد خلفية من كلام الي عايش في امريكا ونحظر نفسنا لهذا الشي على الرغم من اختلاف الاراء لان هذا شي شخصي ومثل ما قرات لاحد الاخوة انه كلمن تحكه ضروفه ويمكن هسة اكو كثييييير ناس مقدمين وسافروا وفعلا ما محتاجيها بس لان عدهم مميزات تأهلهم للسفر .. بس الي فقد شخص عزيز والي فقد مكانه والي انخطف ابوه او اخوه بسبب عمله ودفع فلوس وتهجر هل تتوقع من هذا الشخص انه يزرع امل وينتظر حصاد؟؟ لا مستحيل اني من الناس كل هذه الاشياء حصلت معاية وهسة واني كلي ثقة ومسؤول عن كلامي لو ملكوني مدينتي والله ما ابقى لان نفسيتي تأثرت وصار بيها فد شرخ ما يتصلح .. صح وطن بس ما اكدر افكر بيه بعد ولا افكر اعيش بي ... وهذه ايضا وجهة نظر واني شخصيا احترم كل وجهات النظر المطروحة .. وتحياتي

اخوكم
ابو جنة المصلاوي

العنوان: رد: لا ارض احلام ولا هم يحزنون
أرسل بواسطة: Abo Rami في 15:39 08/12/2009

اخواني الاعزاء
رجاءا رجاءا خلي نسال انفسنا السؤال التالي
شنو الي راح يتغير ويه كل واحد بينا بعد 5سنين من حياتنا او حياة اطفالنا ؟؟؟؟؟؟؟؟؟؟؟؟؟؟؟؟؟؟؟؟؟ سواء كان بالعراق او كان في امريكا؟
جوابي على هذا السؤال هو انه بالعراق انت ماضامن شنو الظروف الي راح تصير بيه وخير دليل التفجيرات الي هزت بغداد اليوم والحبل على الجرار والله يستر من قادمات الايام
اما في امريكا والله اعتقد انه الانسان الكفوء هو نفس الانسان الي كان بالعراق واعتقد انه سبل النجاح هو الي يصنعه بعد توفيق رب العالمين وهذا اني اكوله من تجربه غربه خارج العراق لمدة 14 سنة شفت ناس هم ايضا كانو ناجحين بالعراق كدروا ينجحون خارج العراق والفاشل بالعراق لو تحط روحك بيه هم يبقى فاشل لو كان بامريكا او في الصين او في العراق مع احترامي لاراء الجميع
ابو رامي

العنوان: رد: لا ارض احلام ولا هم يحزنون
أرسل بواسطة: cricket في 16:23 08/12/2009

اشكر جميع الاخوه على المرور الكريم  وحصل ما توقعت وفسر كل شخص من اي منظور قراء الموضوع وحلله اخص بالردود
الاخ دنفش
حمد الله على سلامتك انا قلت ان ارض الاحلام هي الي تبددت بها احلامنا بالسيارات المفخخه والعبوات الناسفه وقلت ايضا ان من مميزات البلد وكان بين الاقواس ان القانون واحد يطبق على الجميع سواسيه ابتداءا من اوباما شخصيا ونزولا فهل تعتقد اني كنت انصح ببلد مثل ما تفضلت حضرتك تحكمه العمائ.... واللح.......... اتمنالك الموفقيه وانشالله تتحقق احلامك ببلد تحقيق الاحلام ( عرفت يا بلد اقصد )

الاخوان راهب الحب  وابو رامي

الاخت ريم عبد

طبعا اشكركم على ردودكم وعل مساعدتكم الي في شرح ما احاول ان اوصله للاخوان القراء وما شرحتموه هو ما اقصده بالظبط

 

العنوان: رد: لا ارض احلام ولا هم يحزنون
أرسل بواسطة: ghwa في 16:47 08/12/2009

السلام عليكم اخوان احنة بالعراق مجنة كاعدين بلا شخل بس اللي مايشتخل يكول ماكو شخل بس انتة تنكض نفسك الكتب السماوية تكول وربنة هم يكول منك حركة ومني بركةنعرف التقاليد والاعراف تختلف بامريكة بس العراقي يبقة عراقي وين مي يروح

العنوان: رد: لا ارض احلام ولا هم يحزنون
أرسل بواسطة: john simon في 17:07 08/12/2009

اعزائي الكرام
تحية طيبة
اولا شكرا على تحليل (ارض الاحلام بانها في الواقع ليست ولييست يطيخ ايضا)
اولا حسب رائي ان هذا التحليل في مكانه لانه كثير من شعبنا العراقي يتصور عندا مجيئه الى الغرب سوف تفتح له جميع الابواب, وكما ذكر الاخ او يضعون رجل على رجل او كلشي يجي الهم, او طبعا هذا غير صحيح, فاذا كان الشخص متعلم او غير متعلم يجب او يتعب لاجل او يشق طريقه في بلاد الغرببة وليس مثل الحالة في بلاده يعتمد على اهله واصدقائه.
ثانيا تطرق الكاتب على العادات والتقاليد, فانها هنا تختلف كثيرا ولا دخل لها في الدين طبعا, لانه العدات الشرقيية تختلف عن العادات الغربية, لذا يجب ان نأخذ العادات الجيدة  ونضيفها الى عاداتنا التي تعلمناها في بلادنا.
ثالثا حذر الكاتب من اللذين ييتصورون عندما يصلون الغررب سسوف تتحسسن امورهم المعيشة ويستطعون ان يحصلو على كل شي يتمنوه.
لذا يجب على اغلب اللذين يصلون اليي الغرب ان لاينخدعو بالمظاهر ويقلدو اصحابهم بكل الاشياء, وابسط الامثلة مكان ما يششتريي مويبائلل واحد يشتري اثنين ويتعاقد مع شركات الاتصالات بعقود طويلة الامد على اساس المكالمات مجانا او بعدين يتفاجئ يقوائم كبيرة لايستطيع تسديدها.
واود ان اقدم شكري للكاتب لانه كل هذا الشيئ سسمعته من اخوانيي العراقين الذين هاجرو  وبقو مدة طويلة بالبلد يتكلمون نفس الشيئ, مع العلم اني في المانيا يمكن ان اكد هذا شي ايضا وشكرا
وارجو المعذرة من الاخوة الذين اخالفهم بالرئيي والسلام
اخيكم
جوسي البغدادي استشاري للاجئين والمهاجرين المانيا

العنوان: رد: لا ارض احلام ولا هم يحزنون
أرسل بواسطة: freeman2 في 20:10 08/12/2009

اخي العزيز
شكرا لك فعلا موضوعك وكلماتك صحيحة مئة بالمئة ويجب التخلص من جميع العنصريات واي انواع التفرقة (من يا عمام انت ..؟) او هل انت شيعي او سني او مسلم او مسيحي او كردي...الخ هذا الاسئلة لم تكون موجود في اي قاموس لاي عراقي ولكن نجدها حاليا..وللاسف هناك اناس تتكلم عن الكثير من السود بامريكا وكانه السود هم ليسوا بشرا وهناك من يسميهم عبيد.!!!! ولا اعرف كيف يفكر البعض؟الانسان هو الانسان يااخواني..
اخوكم
ابوهدى-مصر
بأنتظار الامنية

العنوان: رد: لا ارض احلام ولا هم يحزنون
أرسل بواسطة: violin في 20:49 08/12/2009

مرحبا اخواني الاعزاء.
اني قريت الموضوع والردود . واني مع رأي اخوية دنفش بكل كلمة كالهه.
وبعدين احنة شنو مستقبلنة بالعراق لو بأي دولة من دول الجوار او الخليج اشو اقامة وماعندنة ولا عدنة مستقبل.اقل شي امريكا تحفظ كرامتك وتنطيك جواز محترم  وتكدر تأمن مستقبلك . هذا كلة منو منطيكيا المالكي لو اهل العمايم الدمرونة والشتتونة.المهم اكول الاخواني اللي يردون يطلعون الامريكا توكلو على الله وروحوا الله يوفقكم ويوفق الجميع.
تحياتي الكم.

العنوان: رد: لا ارض احلام ولا هم يحزنون
أرسل بواسطة: hani hani في 22:35 08/12/2009

طبعا شكرا موضوع حلو والردود احلى بس  حبيت اوضح شيئ او اضيف شيئ
ممكن السفر يكون تجربة يعني الي يشوف نفسه ممتغير عليه شيئ او ظروفة صعبة هناك خيار العودة موجود باي وقت وهذا اليئ مااصور اكو احد يكول لا يعني الي يريجع من الخارج هسه منو يمة بالعراق مو مثل قبل

العنوان: رد: لا ارض احلام ولا هم يحزنون
أرسل بواسطة: عبدالوهاب الدوري في 22:55 08/12/2009

اني ماريد ادوخ روحي بالرد واسف اذا اكون ضد هذ الموضوع
بس اريد اكول شغله الكل الاعضاء   كل من ضد هذا الموضوع يفتهم وحيصير براسه خير

                 واشكركم

العنوان: رد: لا ارض احلام ولا هم يحزنون
أرسل بواسطة: vincenzo في 23:12 08/12/2009

اشكرك جدا اخي صاحب الموضوع على هالتلخيص المركز جدا لهواي امور واقعية وصحيحة جدا وكلماتك فعلا تدعو للتأمل بجدية من الجميع
اما ردا على بعض الردود المعارضة مثل اخي العزيز ابو رامي
فصدكني اللي تجي ساعته لو يكون بالمريخ هم متتأخر
يعني اني بعيني اليوم شفت قريب من جامع النداء واني عالسريع متنزه لطيف سوته امانة بغداد قبل حوالي سنة بيه ملاعيب بلاستك ملونة الوان حلوة لاطفال المنطقة وجنت الاحظ عوائل عصريات يجيبون اطفالهم يغيرون جو مع انه مساحته كلش زغيرة
اليوم شفته ملاعيبة مايعة من العصف والحرارة مالة الانفجار وبمكان اللون الاخضر مال الثيل لون اسود مال كلشي محترك
يمكن راح تكول هذا شكد رومانسي وناسي الناس اللي اجسامهم تكطعت وصل

على العموم اكلك الخدمات تاخذلهه كم سنة (جوابا على بعد خمس سنين شيصير) وتتصلح واحنا دنلاحظ تحسنهه ببطء خلال السنوات الاخيرة وطبعا مو مال نقارنهه بخدمات الدولة الاولى بالعالم
الامن...اكيد بعد فترة (يجوز طويلة جدا) يصير عدنا نظام ديمقراطي مرتب تحميه اجهزة امنية ومخابراتية مرتبة وننزل من المرتبة الاولى بالعالم بالعمليات الارهابية

فقصد الاخ صاحب الموضوع انه اكو امراض اجتماعية مترسخة بالعقول الباطنة مال معضمنا وهواي ناس يعتقدون انه الفروقات بين هنا وهناك (الخدمات والامان والاحترام والقانون والمستقبل ...الخ) مو كافية لتحمل معاناة تغيير كل طريقة تفكيرة وكل عاداته الاجتماعية اللي ميتحمل يغيرهه

ومثل ما اتفضلت اخي العزيز وحجايتك ذهب انه الفاشل فاشل لو وين متوديه
طبعا اني من جماعة اللي لازم اوصل لامريكا لو يصير العراق ارقى من اليابان ;D ;D

العنوان: رد: لا ارض احلام ولا هم يحزنون
أرسل بواسطة: أبو يوسف في 23:54 08/12/2009

تحياتي وأتمنى تتقبلون مروري لصاحب الموضوع ولكل الأخوة من داخل هذا البيت اومن خارجه ,
يعني بس لدي ملأحظات مفصليه على موضوع أمريكا ,
  تابعتها من خلأل المنتدى ومن خلأل الناس الي نلتقي بيهم ,
يا اخواني النقاط هي 1- لماذا الناس تفكر باللجوء لأمريكا  ؟ يعني جوايه بسيط وهو عراق ليس عراق عراك .
وهذا واقع الحال صدقوني لو أكوا امكانيه للعيش بالعراق بخدمات وامان ولو كحد أدنى خمسين بالميه لما فكر الكثيرون باللجوء لأمريكا .
                          2- لماذا  هاي النعرة والتعصب لكل موضوع حول الرجوع للعراق؟  لسبب بسيط لكون أغلب العراقيين سواء بالمتدى وبغيره عانوا الخطف والطائفيه والتفجيرات وابسطها الحاله النفسيه والذعر الي من تطلع عينك على تجمعات اخاف سيارة لو عبوة تنفجر والمصيبه خوفك مو بس على نفسك على كل شي على عرضك وعلى اطفالك وعلى كل شي وهذا هدف اساسي للي يفجرون سواء بشكل منظم من أحزاب حكوميه او من دول تموت بحب العراق وتتمتى يوميه تصدرله الف مفخخه وعبوه .
                         3-لماذا أمريكا الي بعده مواصل يتوقع جنة الفردوس؟, وانوا بعض الناس يظن ويعتقد أنوا اكوا ناس من تكول يابه شغل ملكينا او نرجع يكولون عليه كذاب وانسان ميحب الخير  لغيره ,يا اخواني تره الشغله نسبية وترجع لنقطه اساسيه وهي الرزق الرزاق يهيه للناس يبسط لناس ويقدر لناس الرزق , يعني أمريكا نفسها بيها ناس مكادي وناس حتى المستشفيات تبنوا أطفالهم هي والمنظمات لكون ما عندهم مصرف يكفون بي أطفالهم لهذا متعتبر بيئة أمنه للطفل البقاء مع عائلته .
                        4- لماذا يظن الناس أن أمريكا بلد يمكن بسهوله التكيف معها بعاداتها وبقوانينها؟, يا أخوان الي ديوصلون أمريكا اناس بالغين وأصحاب عوائل وفاهمين بصورة كامله للحياة أخواني تره لكل بلد عاداته ويبقى الشرق بشرقه والغرب بغربه يعني أمريكا بلد منظم وبلد لديه عاداته الخاصه الي تختلف عن دول حتى اوربيه بعاداته فكيف بالدول العربيه , لهذا أمثله كثيره ومثال بسيط حاليا في أمريكا أناس يروحون وي بناتهم كبار للمدرسه الثانويه خوفا من عادات هذا مجتمع تره هاي مسئلة مو مسئة دين فقط .
                     5- نقطه أخيره أحب أضيفها لكل العقلأء سواء من المسلمين او المسيح او ديانات بقيه , أخواني أذكركم بحكمه لشخص اسمه الطفيل وبغض النظر عن الأسم هذا الشخص لما سمع بنبي أسمه محمد عليه الصلأة والسلأم كلوله ساحر ويفرق بين المرء وزوجه , كال حكمه مدويه الى أخر يوم بحياتي ما أنساها كلمات من ذهب
قال (أني أمروء ذو عقل فلماذا أعير عقلي لغيري ) يا اخوان باختصار ولو موضوع صار طويل يعني أني شخص عندي عقل واعرف افكر بي ليش أداين عقلي لغيري يفكر بي  , الي يريد يجي لأمريكا يجي ويجرب وهي سفره والي ميريد يجي ايضا نعامله بكل مرونه لين يمكن كل شخص له ظرفه الخاص الي يمكن مستقر بالعراق وعنده تعيين يخاف عليه والي لديه ام كبيره او أب ميرد يتبعهم أخواني كلمن ظرفه الخاص وهي أرزاق وتقبلوا مروري وأي خطا بالمفاهيم فأحنا بشر نخطا ونصيب مو ملأئكه  يعني  هاي مجرد وجهة نظر  وتحياتي واسئل رب العالمين الموفقيه للجميع.

العنوان: رد: لا ارض احلام ولا هم يحزنون
أرسل بواسطة: النسيم المهاجر في 02:44 09/12/2009

[hيمعووووووووووووووووووددددددددددددددددد هية الامنيه جتي ومارحنه وشفنه الله يخليكم مو متنه من هاي السوالف خلي تجي المهجومه والله كريم كلش كلش الواحد يتحمل سنه وياخذ كرين كارت وين مايريد يروح يمعود والله متنه هاي الامنيه سوتلي فقرات بالقلب



 النسيم الجاثم بسبب الامنيه r]

العنوان: رد: لا ارض احلام ولا هم يحزنون
أرسل بواسطة: ابو عبد الله التكساسي في 03:44 09/12/2009

جيرانا خطفوا,,ابن عمي مات بالانفجار,,والدتي مريضه والدوا ما متوفر بالعراق,,

ها بيرج شمدريك بالي صارلي بس لا انت تطلع واحد من جماعتي لو كرايبنه  ;D ;D ;D

تحياتي لصاحب الموضوع

ابو عبد الله التكساسي

العنوان: رد: لا ارض احلام ولا هم يحزنون
أرسل بواسطة: abomagid في 04:25 09/12/2009

السلام عليكم

اشجابرك على المر غير الامر منا ... هو احنا لو اكو ولو بصيص امل عدنا اهنا بالعراق لا والله ولا انفكر بالغربه ليش هيه سهله بس اشبيدنا على هذا البلد الجريح الي يوميه جرحه يكبر وتفجيرات البارحه اكبر دليل . فأحنا ما لكينا غير حل الهجره في سبيل مستقبل اطفالنا ياخويه صاحب الموضوع ...
وارجو من عندك ان اضيف امر خامس الى الامور الي طرحته بالنقاش وهو .... اكو هيج جسوره عدنه بغداد مثل هاي الجسوره الي خاله اخويه شوقي بالصوره (عرب وين طنبوره وين )؟؟؟؟؟

اخوكم
ابو ماجد
تحياتي

العنوان: رد: لا ارض احلام ولا هم يحزنون
أرسل بواسطة: cricket في 04:55 09/12/2009

اشكر كل الاخوان الي مروا او ردوا عل الموضوع
للذين اشتبك عليهم مقصدي اقول كتبت الموضوع بعد ان قرات جواب شخص على موضوع ام عراقيه كانت تطلب من العراقيين هنا التكاتف ولو معنويا لمساعدة اخوانهم القادمين الجدد ورد عليها هذا الشحص وحاول ان يعمم تجربته ويطلق تحذيرات ان امريكا طلعت بوري فحبيت ان اقول ان اسباب فشله خاصه بيه لانه قد مر باحد النقاط الي ذكرتها بموضوعي وكان رده باسلوب غير حضاري مع ان الاخوان ريفولفر ايو اندرو وقفوه عند حده
شكرا اخي بيرج الي ايضا من خلال تعليقه شرح وجهة نظر ممتازه
  للعلم انهو سجلت عضويه بالمنتدى بعد وصولي الى امريكا لاني اشعر باني قد ارد شيئا من الجميل من كم المعلومات التي كنت احصل عليها عندما كنت امر كضيف الى هذا الموقع اللطيف والله من وراء القصد
شكرا

العنوان: رد: لا ارض احلام ولا هم يحزنون
أرسل بواسطة: الله...محبة في 07:14 09/12/2009

رأيي الشخصي انه الخلل مو بالحكومات (على الرغم من ان الحكومات اللي مرن على العراق وحدة ازبل من الثانية) ولا بالخدمات ولا غيرها... الخلل بالعراقيين واسمحولي لان هذا رأيي الشخصي ومن حقي اعبر عنه... تخيل جارك اللي عايش وياه 25 سنة يجي فجأة يكلك اطلع من بيتكم و إلك منا لباجر لان انتو ؟؟؟؟؟ ....... و ولا واحد من باقي الجوارين يوكف وياك.... تخيل انه صديقك بالمدرسة ما ياكل وياك لانه انت ؟؟؟؟ نكس... (وهذا موجود من قبل حتى قبل عهد المقبور)

المشكلة انه الانسان يحاول ان يجد ذاته وكرامته (بعيدا عن حالته المادية والمعيشية) لانه اللي فقدناه في العراق شي اكبر من المادة.... تخيلوا احنا هنا بسوريا اللي يكولون عنها تعبانة ومحد مرتاح بيها شفنا فرق كبير.... كل الناس ماخذة حقوقها بالعيش الكريم بس ابقى بعيدا عن السياسة

فيا اخوان القضية كالتالي.... الشيعي بوكت صدام هرب لايران من البطش.... السني هسة هرب للخارج لانه مبقتله عيشة بالعراق... الاقليات كلهم لازم يطلعون لان سنة وشيعة ضدهم (وهذه حقيقة قد تزعل البعض بس تبقى حقيقة).... اللي كان مناصر للطاغية لازم يطلع لانه العراق الجديد وايران ضده.... البغدادي يعيب على الشروكي وعلى كلامه... الشروك يباوعون للبغادة على انه هم كيكية... العراق كله لازال يطلع نكت على الاكراد والدليم والشروك....  الخ...زين الى متى... وبعدنا نحجي بالوطنيات؟؟؟؟؟؟؟  يعني المسألة مو مسألة دين بس... بس الدين ماخذ حصة الاسد فيها

على الاقل نتأمل انه كلنا نلتقي بالخارج وواحد يسلم على الثاني (بمحبة) بدون خلفيات دينية او عرقية او طائفية (ننسى التبعيات والانتماءات شوية) عسى ولعل
مووووووووووووووووووووو   لو مو مو


عذروني بس هذي حقيقة مررررررررررررة
وخلينا نبقي حقيقة وحدة ببالنا كلنا انه الله محبة

████████
    الله   محبة
████████

العنوان: رد: لا ارض احلام ولا هم يحزنون
أرسل بواسطة: violin في 12:44 09/12/2009

اريد اكول الاخوية الله محبة
حجيك كلة صحيح وواقعي .لان كل اللي ذكرتة مريت بيه من الجيران والصديق الى اخره .
واشكر كل اخواني اللي علقو عالموضوع وخاصة birj  لان جان كلامة كلش مركز ومختصر.
انشاءالله الموفقية للجميع.
تحياتي.
اخوكم منتظر المحلفين صارلة سنة ونص