السلام عليكم اخوان
صارلي هوايه بالمنتدى وبين فتره والثانيه تنكتب مواضيع يكون فيها سؤال كلش زغيرون بحيث ما نعرف شلون نجاوب او قصه كلش طويله ومابيهه اي سؤال واضح .
تشوف الموضوع انترس اساله من الاعضاء استفسارات عن السؤال
ممكن جدا يكون السؤال بالطريقه التاليه
لازم الحجي اما يكون كليته بالعربي الفصيح لو كليته بالجلفي حتى ما تنلاص على الي يريد ايجاوب
اني مقدم على برنامج كذا وكذا من الدوله الفلانيه وسؤالي كالتالي ........... ويكتب السؤال
والجواب يكون من الاعضاء يكون بنفس الصيغه لو عربي فصيح لو جلفي كليته وباختصار يكتب الجواب وبدون مقدمات ويكون جواب دقيق و واضح للسائل
شغله ثانيه
ليش نكتب مرات
اسف للاطاله
اذا انت سائل فاكيد تريد تشرح الموضوع مالتك للتوضيح وهذا منتدى خدمي فليش الاعتذار (( ما اتصور تحتاج اعتذار للسؤال عن شي ))
واذا الجواب بي تفسير يتطلب الاطاله (( هم ليش الاعتذار )) لان انت تريد اتوضح للساءل بالتفصيل حتى ما يدوخ
بس اكو ردود يعني صدك تشلع الكلب يرادلهه ساعه ياله تقراها لان حيل طويله وممله ( عبالك تقرير حزبي )
ليش ؟؟ خير الكلام ما قل ودل - لو احنا بس انردد الكلام بدون ما نفكر بيه ؟؟ اختصروا الرد وخلي يكون مركز ودقيق وهذا احلى شي (( بالضبط مثل ردود عكعك التطوى )) مباشره مفهومه ومميزه بالفعل
بعد
شغله روح لصفحه اهم مواضيع المنتدى
اخوان اني جنت اسوي هاي السالفه وبعدين انتبهت انت تريد اتساعد الناس لو تريد اتدوخهم ؟ فاروح انسخ الرابط مال الموضوع المعين من اهم مواضيع المنتدى واخلي بالجواب وابين شنو هذا الرابط علمود اسهل امر السائل لان مو الكل عدهم انترنيت قوي ومو كل الي عدهم انترنيت قوي يعرفون او يندلون هاي الصفحه
مساله الاخطاء الاملائيه علموني الاخوان انه اكو دكمه بصف كلمه ارساله وهي (( معاينه)) اجعص هاي الدكمه راح يطلعلك النص الي انت كاتبه وممكن تراجع الاخطاء وتصلحها بالنص الاصلي وتدز الرساله حتى الكلمات تكون جميله وحلوه و مفهومه (( طبعا اني يمكن اكثر واحد يكتب مزج بالعربي بالمنتدى)) فهاي السالفه الي قبل لا تكون لغيري
بعد شنو ؟
ها
اني من اقرا السؤال اكيد مراح اعرف الي كاتبه اشلون ديفكر بذيج اللحضه ممكن هو يحجي بقهر وبعصبيه واني اكتبله شغله او كلمه اتضايقه بالزايد لان الكلمات مرات ما توصف المشاعر بصوره صحيحه وانتوا تعرفون هاي اسئله خدميه مو قصه علمود انترجم المشاعر الى كلمات فالافضل ان ما نتكتب تعليق (( ايا كان اذا ما نعرف الشخص او ما نعرف شنو هو او ما قاريله فد شكم موضوع ))
وانطيكم مثال من اني اخاطب ريم عبد او فنجنزو او عكعك التطوى اسميهم اسماء مال صديق مثال ريومه او فيني او ابو الفناجز او ابو العكاعك .... الخ
زين اذا ما اعرف الشخص ايصير احجي وياه هيج ؟؟
هذا قصدي مو غير شي
ليش انكررر المواضيع اذا اكو نفسهه ليفوك او ليجوه بسطرين ؟؟
يعني موضوعين نفس المحتوى بغير طريقه واحد ورا الثاني بفارق قصير ؟ ما اتصور اكو داعي بس ممكن تكتب برد افكارك الخاصه بيك بالموضوع الي سبقك وماكو داعي تسوي موضوع كامل علمود سطرين او 3 اسطر
ليش مرات نهمل لموضوع المهم ونجلب بالسوالف وينكلب الموضوع جات بدل الفائده العامه ومعضم مواضيع الجات تنتهي بعركه ما بيهه فايده
اذا الموضوع ما عجبني ببساطه ما اجاوب وخلاص راح اتجنب الكلام والعركات والسوالف التعبانه واذا كلنا سوينا هيج ابد مراح تعلك بالمستقبل
اخوان هاي شغلات اجتب بالي من متابعت المنتدى المستمره وهاي افكاري اني ولا دا اعلق على اي شخص ولا اقصد بيهه اي شي ولا اي عضو مهما كان وانما هي اشياء اجتي ابالي وردت اشاركم بيهه
تحياتي للجميع والله يوفقكم لمساعده الناس
اخوكم ابو عبد الله التكساسي
اسف للاطاله ;D ;D ;D
جذب دا اتشاقه مو اسف للاطاله بس هذا الي اجا ابالي ;D ;D ;D ;D ;D
اكيد تفيدنه حبيبي ليش لا
من ايدك الطيبة وماتفيد ابد ما صايرة
اشكرك جدا والله يديمك ياوردة
وعذرا على الاطالة ;D
رحم الله والديك يالگاعد بتكساس
تفيد المحتارين وتساعد الناس
كلامك مصبوب ذهب والمـاس
تستاهل تنحـّط فوگ العين والراس
هذا طبعك يالعراقي مبجـّي اليأس
شايل غصِن زيتون وتوزع إلنـا الياس
شهمْ وأصيل ومن الگـُصـَة تنبــاس
;D ;D ;D
شتريد بعد هذا هم شعر إرتجالي حصري بس إلك ..
هاي عود إنته ما تريد تصير الأجوبة جــات ;D ;D ;D ;D ;D
تدّّلل يالغالي شوقي وما اگدر اوصفلك شوقي وكتبتلك شويوني على ذوقي ;D ;D ;D ;D
أخــوكــُم / وسـام بهنـام داؤد الخابــوري
ابو عبودي
فعلاً موضوع بيه كل النقاط السلبية الي تبدر بالردود والمواضيع
داسوي مثلك مال آسف الاطالة
;D ;D ;D ;D ;D ;D ;D ;D ;D ;D ;D
تحياتي الك ابو عبد الله