ankawa
منتدى الهجرة واللجوء => الهجرة و واللاجئين => الموضوع حرر بواسطة: ابو عماد في 20:09 05/02/2010
-
اخواني واخواتي الاعزاء
تحية طيبة....
ملفي كان معلق قيد الدراسة من شهر الثاني 2009 بارحة علمت باني مرفوض 100% علمت من خلال ايميل من دائرة الهجرة الامريكية مكتوب مع الاسف الشديد قانون الهجرة لا ينطبق عليك وسوف نرسل لك كتاب الرفض قريبا الى عمان وارسلنا نسخة من كتاب الرفض الى الامم المتحدة في عمان.
اخوان مو مشكلة رفض رفض ولكن ليش بعد سنة ملفي قيد الدراسة هسه يرفضوني ليش ما رفضوني من الاول اثناء المقابلة.
وما اقدم استنئاف لان 100% يرفضوني مرة اخرى
اخواني واخواتي الاعزاء لا اريد ان اهبط من معنويات الملفات قيد الدراسة اعتقد بس انا مرفوض لان سمعت اكو هواية من الملفات قيد الدراسة سوف يستلمون القبول قريبا.
اخواني هسه اريد منكم المشاركة متى الامم المتحدة يوطنوني الى دولة اخرى؟ بعد كم يوم او شهر؟
ارجوا مشاركة المرفوضين من امريكا اللذين تم توطينهم الى دولة اخرى؟ اشكيد يطول؟
وهل قوانين الهجرة الامريكية نفس قوانين الهجرة الكندية والاسترالية؟
وحاليا يا دولة من دول التوطين ياخذ من الامم المتحدة عمان ؟
وشكرا لكم مقدما
اخوكم: ابو عماد المرفوض
-
مرحبا اخي الكريم ابو عماد
تذكر من دزيتلك مسج على الخاص؟
يا اخي مثل ما قلت لك قبل اسبوع او اسبوعين
انشالله خير . ولا تنقهر وضوج . عسى ان تكرهوا شيء فهوة خير لكم
معاناتك طبعا اني كلش حاس بيهة . ومقدر الي اتمر بيه حضرتك
بس صدكني ممكن الك بيهة صالح
احد المقربين الي مر بنفس ضروفك . وانت الان بالوضع السليم مئة في المئة
نظرا لكل تلك الفترة التي قضيتها مع الاي او ام . والوفد همة رفضوك مو انتة رفضتهم
الان الي راح يصير لازم اتلح على المفوضية بالاميلات والمناشدات
احد المقربين الي نفس موضوعك بالضبط بس بالشهر العاشر من السنة الماضية وبعد الانتضار الطويل
واستلامه نفس الرفض
اتصلوا به المفوضية واعلموه انه ملفه في الاي او ام قد انتهى نهائيا وسوف نتصل بك للتوطين الى بلد ثاني
بعد مدة قصيرة اتصلوا به للتوطين على فلندا . وذهب وقابل الوفد
وبعد شهر قالوا له مبروك على القبول واكمل جميع اجراءاته
الشخص سافر بتاريخ 28-1-2010
اي بعد رفضه من قبل امريكا باربع اشهر سافر الى فلندا
اي كل الفترة ماطولت اربع اشهر الى موعد الطيران
انشالله قضيتك تكون نفس الشيء
ونشالله الموفقية .
-
أخي الغالي أبو عماد
و الله هذا الخبر فاجأني بشكل كبير ، الله يقويك و الله يزيح عنك هذا الهم.
الحمد لله على كل حال ، لا تحزن و لا تقلق أبداً
{وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}
يا أخي الكريم توكل على الله عز و جل و ما تشوف إلا الأمور محلولة بسرعة بإذن الله و كما ذكر أخوي حمادة.
الحمد لله ، المهم عرفت النتيجة و خلصت من هذا الإنتظار و القلق المزعج بدون نتيجة.
أخوي الغالي مو كل ما نتوقع شي يصير مثل ما نتوقع ، أحياناً الأمور تجري بمقادير قدرها الله عنا و تخالف كل توقع نتوقعه.
أنا أتذكر نفسي مثل هذا الوقت قبل سنة و كنت قد بدأت الرحلة مع الأمم المتحدة التي قررت تحويلي إلى أمريكا ثم بدأت الرحلة مع الIOM و كنت متوقع بشدة أنني سأكون في أمريكا قبل نهاية 2009 بشكل شبه مؤكد بناءاً على ما شاهدته من حالات مشابهة لأصدقاء لي ، و ها أنا الآن ما زلت بإنتظار قرار المحلف !!
فخليها على الله ، و ما تشوف إلا أن الأمور تجري بسرعة و يسر و تسافر و تستقر في مكان يمكن أفضل لك من أمريكا !
و أنت قلت سابقاً أن المرفوضين سيكون لهم الأولوية في إعادة التوطين في الأمم المتحدة ، و إن شاء الله الدول المضيفة ستبدأ بفتح المجال لتوطين أعداد من العراقيين.
السنة الماضية على ما أذكر كندا و ألمانيا حددت الأعداد التي ستستقبلها من اللاجئين بعد الشهر الثاني.
فتفاءلوا بالخير تجدوه
و الله يجازيك على نياتك الطيبة بكل خير
أسأل الله تعالى أن يرزقك التوطين في القريب العاجل في مكان أفضل 1000 مرة من أمريكا و أدعوه أن يرزقك الإستقرار و الطمأنينة و الموفقية و النجاح
تحياتي
Wingo
-
اخواني الطيبين hamada2 و Wingo المحترمين
شكرا لكم الف الف شكر ..... اشكر ردودكم الطيبه.
الله كريم وانشاءالله كلكم مقبولين...
اخواني هسه بس اريد اعرف متى الامم المتحدة يوطنوني الى دولة اخرى؟ بعد كم يوم او شهر؟
ارجوا مشاركة المرفوضين من امريكا اللذين تم توطينهم الى دولة اخرى؟ اشكيد يطول؟
وهل قوانين الهجرة الامريكية نفس قوانين الهجرة الكندية والاسترالية؟
وحاليا يا دولة من دول التوطين ياخذ من الامم المتحدة عمان ؟
وشكرا لكم وتمنياتي لكم بالموفقية
اخوكم: ابو عماد المرفوض
-
اخي العزيز ابو عماد الله يكون بعونك على هذا القرار الظالم من قبل IOM يعني بعد هذا الانتظار القاتل يأتي الرفض حسبي الله ونعم الوكيل منهم
اخي الغالي اني ارفضت يوم 7/7 /2009 وبعده قدمت استأناف وايضا تم رفضي والحمد الله بتاريخ 4/10 لكن بفضل الله تم توطيني بشهر 12 على المانيا وانا الان بأنتظار الوفد الالماني
اسأل الله القدير ان يمنحك الافضل من امريكا وان يرزقك السفر القريب اللهم امين
اخوك
ابو شهد
-
اخي العزيز 79النرجس المحترم
شكرا لك الف شكر على دعواتك وردك السريع وانشاءالله تسافر قريبا
-
اخوية ابو عماد ولا تدير بال عسى ان يكون خير لك وانشاء اللة تتوطن بدولة بية خير الك يارب
-
يمعود ولا تضوج رحمة لاهلك شكتلهم ورفضوك انى عندى مقابلى بشهر الثالث واريدهم يرفضونى وانت ربك يحبك وبية صالح الك وهسة تتذكر وربى يوديك بلد احسن
-
حسبي الله ونعم الوكيل
اخي الغالي ابو عماد خليه على الله عزوجل اخي انت تريد واني اريد والله يفعل مايريد
ان شاء الله يجازيك كل الخير
-
اخي احمد سلطان المحترم
والله كلامك على راسي يا اخي والله ملينه صارلي / 15 شهر / قد الدرسه
-
اخي ابو عماد
اني اصلي لاجلك ان الله يفتح الابواب امامك وان شاء الله تشوف الخير قريبا في كل ما تتقدم له
سلام الله معك
اخوك يوجد امل
-
الله يصبرك اخونه الغالي ابو عماد ويعوضك الاحسن يارب والله اني كلش خفت وماادري حاسه بس وره هالانتظار الرفض الله اليستر وان شالله عن قريب تبشرنه بالتحويل على دوله اخرى بيها خير يارب وبالموفقيه للجميع يارب لختكم شجرة الدر
-
اخي ابو عماد المحترم اني اشوف القرار اجه بصالحك لان انته صبرت هوايه وشغل هذا
الامل حيز من تفكيرك ومستقبلك وصحتك واحيانا يكون القرار السلبي ايجابي على صحتنا
وتخطيطنا للحياه وامالنا المستقبليه وهذا الشي الي حصل باراده رب العالمين وقد يكون كاتبلك
الي افضل منه والي يعوض الصبر الي صبرته اضعاف مضاعفه ولا يسعني الا ان ادعوا من الله
التوفيق لك ويعوضك خير ان شاء الله وانشاء الله يتصلون بك عن قريب لتوطينك بدوله اخرى
تحياتي واتمنالك الفرج القريب باذن الله
-
السلام عليكم اخوي ابو عماد ولا يهمك وكل تأخيره وبيهه خيره الله سبحانه وتعاله رايدلك الاحسن لان هواي ناس يردون يرفضونهه وميكدرون لان تتاخر عليهم وملفهم محد يعبره ..........
بس انت هسه دز كتاب الرفض للمفوضيه وراسلهم على الاميل يعني خبلهم حتى يتحركون
ولا تنقهر خوي اكثريتنه مثلك والحمد لله سوولنه اعادة توطين ومنتظرين الفرج
انشاء الله تسهل كل امورك ويتصلون عليك وتسافر
اخوك:اربد
-
السلام عليكم ... اخي انا كذلك مثل موضوعك يعني بعد المقابلات في الهجرة الدولية وانرفضت في مقابلة الوفد الامريكي في شهر الخامس 2009 وبعدها عملت استأناف والى الان ما جاني لا رفض ولا قبول على الاستأناف ... ف سؤالي اذا اريد اتوطن في بلد اخر شنو المطلوب اسويه يعني هل تلقائيا اوراقي ترجع لل (UN) حتى تندرس لو لازم انا اروح اقدم طلب مره ثانيه حتى تندرس في بلد اخر .... ارجو المساعده من ذو الخبرة .... ولكم جزيل الشكر ,,, الاعرجي
-
الله يساعدك اخوية ابو عماد والله على هذا التأخير والفترة الطويلة
ان شاء الله الله يكتبلك الخير بغيرها
بالنسبة لي انا مرفوض من شهر 7 ولحد الان اي نتيجة على الاستئناف ماكو
والله كريم
تحياتي لك عزيزي
-
اخواني واخواتي الاعزاء
احمد سلطان / الشذر / يوجد امل / شجرة الدر / عكعك التطوى / اربد / الاعرجي / zain 2009
شكرا لكم على ردودكم ومشاعركم الطيبه الله يوفقكم جميعا
ارسلت نسخة من ورقة الرفض الى الامم المتحدة ... والمفوضية اصلا عدهم ورقة الرفض استلموا من المحلفين بالايميل.
واليوم كالولي انتظر نحن نتصل بيك.... ما اعرف متى يتصلون بي لتوطين الى بلد اخر؟
ارجوا منكم اذا تعرفون منو حاليا مدير الامم المتحدة عمان؟ او مسؤول التوطين؟ اريد اتصل بيهم لاني تعبت هواية. وهل الامم المتحدة حاليا يوطنون لاجئيين الى دول اخرى عدا امريكا؟
وشكرا لكم وتمنياتي لكم بالموفقية والموافقة.
اخوكم: ابو عماد المرفوض دوليا
-
عمي ابو عماد السلام عليكم الله ايصبرك على هذا الخبر ويارب تفرج عليك وخليك متفائل بالخير ربك ماينسة عبدة بس لو مقدم استئناف احسن
-
الاخ ابو عماد بعد التحية
الله يكون بعونك بصراحة كلش انقهرت من عرفت على موضوع الرفض لان كلش اقدر احس باحساسك مثل ما تعرف احنا هم بعد الانتظار الطويل اجة رفض بعد الموافقة و لا زلنا بانتظار الخطوة اللاحقة لكن لحد الان الامم المتحدة تقول املكم ضعيف بالتوطين لغير بلد لان اخذتو فرصتكم و انرفضتو لكن احنا بسوريا و اتصور عمان تختلف اما موضوع الاستئناف فقصتة غريبة و هي قدمنة استئناف بشهر السابع بعد الرفض و بعد اسبوعين اتصلو الاي او ام بينة و بلغونة برفض الاستئناف و بعد شهرين و في غفلة من الزمن اتصلو بينة مرة ثانية و قالو تعالو قدمو استئناف ثاني لان عدكم حالة مرضية انسانية و لكن هالمرة ارفقو بالاستئناف كل الوثائق اللي عدكم و هم قدمنة و لحد الان ماكو جواب(اتصور هذا يثبت انه الاي او ام ما قدمت اصلا الاستئناف الاول)
بصراحة تعبنة و ملينة و حتى بعد ما نسال على ملفنة لكن تبقى المشكلة بلا حل و الانتظار اصعب شي
اتمنى لك كل الموفقية و يا رب تسمع الاخبار الطيبة قريبا
اختك اسيل
توطين من 2007
-
الاخ ابو عماد الوردة
اول شئ لا اتضوج واتوكل على الله وصدقني من صالحك لان كل اللي يجيبه رب العالمين خير
اني همينه انرفضت من 13-7-2009 وما قدمت استئناف والفضل يعود بالنصيحة بعدم تقديم الاستئناف الى العضوة البارزة بالمنتدى والمنقطعه حاليا أم يلدا ربي يسهل امرها وتتوفق بحياتها.. بوقتها نصحتني وعلى العام وكالتلي لا اتضيع وقتك واتقدم استئناف وارجع لليو ان مباشر لان المنظمة حبالها طويله وصدقا راجعت نفسي وما رحت قدمت استئناف ....... وهسه ادور على الرابط اللي كتبت بيه هذا الشئ والحمد لله ببداية شهر ال 12 طلعلي توطين على المانيا واتحول ملفي للسفارة وبانتظار الوفد او جواب السفارة للمقابلة
قدم ورقة الرفض وكل 20 يوم قدم مناشدة عن طريق الصندوق اللي بره اليو ان وانشااالله باقرب فرصة يتصلون وياك
واي شئ تحتاج اني حاضر
تحياتي وتمنياتي الك وللجميع بالخير والموفقية
أبو أيمن - عمان
-
والله ماعرف افرحلك لو لا ابو عما بس اتصور هذا ابصالحك بعد هل الانتظار الطويل اتمنى اني ايردولي خبر سواء اي او لا حتى الوحد يعرف راسه من رجليه
-
السلام عليكم الاخ ابو عماد
طبعا مع بالغ الاسف لسماعنا خبر الرفض وان شاء الله تتوطن على بلد غير امريكا بس لدي استفسار من فضلك الايميل الي بعثت عليه وتاءكدت منه خبر رفضك شنو هو لان احد اصدقاءنا طلب منا نساءل لعدم توفر طريقة الاتصال بحضرتك واذا تكرمت تزودنا بالايميل مع تحياتنا وتقديرنا الك اخوك srecan85
-
اخواني واخواتي الاعزاء
مهند المهند/ شمعة/ aseel_msb /abo_ayman / sad-doctor/ srecan58
شكرا لكم جزيل الشكر على مشاعركم الطيبة...
اخ srecan58 المحترم انا عرفت قرار المحلفين بواسطة اخي يعيش في امريكا من سنة 2006 وهو اتصل بمكتب الهجرة والجنسية الامريكية في نيويورك وابلغوه بان ملفي مرفوض من نهاية شهر واحد 2010 واليوم حجيت مع الامم المتحدة نفس الشيء قالوا لي مرفوض وعندهم علم بذلك.
الايميل هو ايميل من نفس ايميل اخوي عرفت الخبر.
وحاليا ماكو توطين مباشر من الامم المتحدة للمرفوضين من امريكا الا بعد دراسة الملف من قبل قسم الحماية ثم يتحول الملف مرة اخرى الى قسم التوطين. يعني يرادله بالقليل 6 اشهر اخرى.
وشكرا لكم مرة اخرى
اخوكم ابو عماد
-
اخوان اني اليوم استلمت رفض الاستئناف من اميركا بعد 6 اشهر من الانتظار
احد يعرف شنو الدول المفتوحة حاليا في عمان؟
-
اخي العزيز ياسو
الله يكون بعونك والله ينطيكم فرصة احسن ان شاء الله
ياريت تذكر اخي العزيز انت شوكت انرفضت وشوكت قدمت استئناف
واليوم شكد انتوا هناك كم واحد وكلكم رفض ؟
لانه الكثير مقدمين استئناف وميعرفون شنو النتيجة
تحياتي لك اخي العزيز
-
السلام عليكم
اخي العزيز شكرا على الاجابه وسعه صدرك ---
سؤالي هل هناك ايميل واو رقم تلفون معين ممكن تساعدنه بيه لغرض الاتصال بامريكا او تكليف احد الاشخاص الذين نعرفهم الموجودين هناك لغرض متابعه المعامله شاكرين تعاونكم والله الموفق
-
اخوان اني اليوم استلمت رفض الاستئناف من اميركا بعد 6 اشهر من الانتظار
احد يعرف شنو الدول المفتوحة حاليا في عمان؟
والله هيه مو معلومه بشكل اكيد
بس اغلب الي ينرفضون من امريكا يتحولون كندا وحسب مسمعت هل كم يوم المانيا دتاخذ ناس
-
اخ الفاضل srecan58 فقط اعرف ايميل واراقام تلفونات اي او ام عمان. اما بالنسبة لتكليف احد الاشخاص هناك هذا صعب جدا لان لازم يكون الشخص هناك بامريكا اخ او اخت فرد من افراد عائلتك او منظمة انسانية في امريكا او محامي هجرة.
اخي حاليا افضل طريقة الاتصال بـ IOM عمان فقط. ماكو قوة على الارض يكدر يحرك ملفك بدائرة الهجرة الامريكية عليك بالانتظار لحين ما يجى القرار النهائي. واتمنى لك الموفقية والموافقة...
وشكرا
-
البارحة دزيت إيميل للIOM عمان ic@iom.int و اليوم إتصلوا بي عالتلفون
طلعلي موظف مؤدب و قلي حالياً وضعك مازال قيد الدراسة
قلت له أنتم قلتم أنه لجنة المحلفين الموجودة حالياً ستقوم بالبت بموضوعنا، فقال لي إنتظر شوية على التلفون ، و راح و أنا منتظر في قلق، و بعد شوية رجع و قال إحنا بلغناهم و راح نذكر لجنة المحلفين الحالية بوضعك و إن شاء الله يتخذون القرار، فشكرته ، و إنتهت المكالمة.
و الله يفرج هذا الهم عنا جميعاً :(
-
الله يفرج عليك وعلينه اخي عن قريب والله تعبنه من الانتظار
-
السلام عليكم.....
اريد اعرف كيف طلباتكم انرفضت انتوا مقدمين عالاي او ام من بغداد؟لو اصلا انتوا عاليو ان من عمان.....يعني انتوا عدكم باجات تثبت انه انتوا مساعدين القوات الامريكية او عقود توظيف وية الشركات الاجنبية العاملة بالعراق لو شنو اريد اعرف.....لان اني هم مقدم على iom من بغداد وانطوني case number والرقم 7000وهم كلولي قضيتك قيد الدرس بس يتوفر موعد مقابلة نتصل بيك....لان عندي باج وعقد توظيف مع القوات الامريكية......ارجوا الرد
-
و عليكم السلام
أنا عن نفسي متحول إعادة توطين كلاجئ عن طريق الأمم المتحدة.
الأمم المتحدة هي التي قررت إعادة توطيني إلى الولايات المتحدة الأمريكية و ليس إلى دولة أخرى رغم طلبي تحويلي إلى كندا أو أستراليا.
و ليس لي علاقة بالعمل مع أي جهة أمريكية أو أي جهة أجنبية أخرى ، أبداً .
و ليس لدي أي إنتماء سياسي، لا سابقاً ولا لاحقاً.
و لم أخدم الخدمة الإلزامية لأني تخرجت من الجامعة بعد عام 2003.