ankawa
منتدى الهجرة واللجوء => الهجرة و واللاجئين => الموضوع حرر بواسطة: مريمانه في 22:48 18/02/2010
-
اخواني واخواتي الاعزاء على قلبي
في البدايه ..احب اسلم على الكل ..واعتذر من الكل لان اني كلش مقصره وياكم ..بس والله ملتهيه واخيرا لكينه من بعد عناء انشالله اتطرقلها بموضوع ثاني..
المهم حتى مادوخكم بس اريد اسولفلكم على شغله صارت ويانه..وماعرف ان كان الها علاقه بتاخير معاملات اللجوء او لا..
واعتقد حتى وان لم تكن سبب في تاخير الاجراءات ..فهي بحد ذاتها..ازعاج وعراقيل وواحدنا مناقصه هم فوك همه..
المهم طولتها عليكم..
طبعا منطلع من العراق غيرت جنسيتي..والموظف كاتب مواليدي غلط هي 22 كاتبها 12وطبعا من شفت الغلط ملحكت اصلحها لسوء الاوضاع ال بداء تزداد من سيئ الى اسوء طلعنا لمصر..وقدمنا على الهجره من خلال مكتب باربرا ..وطبعا صوروا كل اوراقنا ومستمساتنا..ومن الدوخه الي احنه بيها نسيت شغله المواليدونرفقت الاوراق لليو ان ..وبعدها الاهل احتاجو الجناسي الاصليه بالعراق ودزيتهن..وطبعا حتى الجواز ال ج صدر بالواليد الغلط استنادا على الجنسيه..وطبعا من قابلتني المحلفه وسالتني على مواليدي كتلها على مواليدي الصحيحهالي هي22 جان تكولي بس وين جنسيتج كتلها ببغداد احتاجوها ودزيتهن..كالت لان جوازج وجنسيتج المصوره عدنه تكول مواليدج يوم12..فشرحتلها السلفه بالخطا الي صار من قبل الموظف ..وظل الي وكت اصححها..
كالت احنه راح نتاكد من هذا الموضوع ..كالت يعني انتي بالعراق السجلات الاصليه للاسره تكول 22 كتلها اي..واني دائما اذكر تاريخي الصحيح واشرح الخطاء الي صار..
المهم وصلنا مرحله الموافقه والتجييك الامني.بعد الحصول على موافقه المحلف طبعا...وتاخرت بحدود4 أشهر من سالنا بالاي او ام ..بوطتها لورنس فهمنا ..كال انتي عندج غلط بالمواليد كتله اي ..كال لان مبين عندي
دازين لبغداد اخطارين واحد بمواليدي الصح والثاني بمواليد يالغلط..حتى يتاكدون اي واحد بيهم الصح..
وكال هسه انتي مكمله البصمات ومكمله تجييك الاسم وجاي اخطار بمواليدج الغلط بانه فعلا هاي غلط وكال هسه منتظرين يجي الاخطار الثاني وهو الي ياكد مواليدج الصحيحه..وكال هو هذا سبب تاخيركم لانه الامنيه جزئين البصمات جزء وهذا هو الجزء السهل ..والجزء الثاني وهو الاصعب والي يشمل الاسم والمواليد واحد مرتبط بالثاني..ومجتي امنيتي الا لمن وصل تاريخي الصحيح..وبهذا صار تاخيري بسبب غلطه موظف ...مثل ميكول جرة قلم..خطه مدري شلونه ياهو الي يقرا يكول ممبين 22 مبين 12
هاي شغله الشغله الثانيه صارت ويه زوجي
من طلع الجواز ال sمن العراق هم خط الموظف بالانكليزي كلش زين ..والعكس هو الصحيح..بحيث حرف ال i لازكين النقطه بال الحرف مبينه l من وصلنا لامريكا وديطلعون السوشيل سكيورتي اخذو الجواز القديم ..ووصلنا رقم السوشيل وره فتره الاسم غلط كاتبين..haltham...بدل haitham....وطبعاقدمنا طلب ونعاد من جديد وصلحنا الغلط..وهاي عرقله ثانيه بسبب الخط والكتابه..
فاخواني حاولو تتاكدون من كل صغيره وجبيره بتاريخ باسم بالسبيل لان اقل هفوه تاخذ كومه وقت لما تتصلح..
تمنياتي بالتوفيق للجميع ..واسفه على الاطاله
مريمانه ...ويست فرج
ينيا
-
هاي معلومات كولش مهمى بارك الله بيج اختي
-
عاشت ايدج حبيبتي مريمانه على هاذ التنبيه
وان شاء الله الحلقه القادمه ادكولينا لكيتي شغل ان شاء الله
وياربي ايوفقكم وتستقرون وترتاحون
-
تسلمين اخت مريمانه وعاشت ايدج
فعلا موضوع مهم الانتباه للاخطاء الكتابية بالجواز وبهوية الاحوال المدنية
لان دوختها دوخة من تريد تصلح الخطا
وصارت وياي بهوية الاحوال المدنية لزوجتي باسم امها خطا بحرف واحد وصار النا بحدود ال 17 سنة ماشين على نفس الخطا . والتصحيح ينرادله وكت فخليتها تمشي على الخطا نفسه بمعاملة الهجرة
Echo 9
-
اني همين صارت ويايه شغله الجواز G
مواليدي 89 كتبو بالجواز82 والجنسيه والهويه 89
ومشت عليه بالاردن الاقامه مالتي كتبولي 82 وجازه السوق 82
تخربطت كل اموري وباليو ان همين الموضفه كالت شنو القصه كتلها هيج وهيج السالفه مجاوبت بس خايف لا همين ياثر هل موضوع عليه
واني جبت ورقه من السفاره العراقيه بالاردن على هل غلط وكتبولي بالورقه احنه نعترف انو هذا غلط وانو المواليد الصح هيه 89 وتوقيع السفير مادري القنصل وختم السفاره والله كريم
-
بارك الله بك اختي الفاضلة على هذا الموضوع الرائع
زيوس- موزنبيق
-
اختي صاحبة الموضوع مشكورة عالتنبيه لان هذا الشي صار وياية و يمكن وية كل العراقيين اللي سووا جواز بالكم سنة الاخيرة وكتبت تجربتي من حوالي سنة او اقل و وراهه كمت كل ما اسمع بواحد عرف ديريد يطلع جواز انصحه النصيحة التالية:
كل واحد من يقدم على الجواز يروح للدائرة اللي بمنطقته بيوم معين كل فترة حسب جدول محدد من الدائرة للمناطق والمحلات مسبقا.....كولوا اي
راح تكص وصل من البنك اللي يكون غالبا مجاور للدائرة ب25 الف اللي هي فلوس الجواز ... كولوا اي
بعدين تنطي اوراقك ومستمسكاتك والوصل لموضف يجيكهن ويكلك كاملات لو ينبهك عالنواقص ... كولوا اي
اذا اوراقك اوكي ينطوك استمارة تمليهه بقلم ويجيكوهه ويدزوك على شباك او كشك تسلمه كلشي وكلاشي ... كولوا اي
طبعا انتوا متدرون شنو سالفة هذا اللي ياخذ كلشي ويطلب منكم فلوس فوكاهه وعبالكم هو عرضحالجي متغطي بغطاء الدائرة الرسمية بس بالحقيقة هو عنده حاسبة وطابعة ويحول كتابتكم بالاستمارة مالتهم الى طباعة بالحاسبة حتى الدائرة تسويلهه سكان وتخزنهه بالداتا بيز مالتهه (يعني قاعدة المعلومات) ... كولو اييييي
من تستلمون هالورقة المطبوعة قبل لا تودوهه للمدير يوقعهه لو لابو الاستلام ياخذهه منه جيكو مواليدكم وكل معلوماتكم لان هذا اليطبع يمكن متقصد يغلط بمواليد اكبر عدد ممكن من المراجعين...تعرفون ليش؟؟؟
خلي نفرض انه هو غلط بمواليدكم وراحت المعاملة للجوازات العامة و ورى اسبوع او كم يوم هيه فترة استلامكم للجواز من العامة بساحة الاندلس ببغداد راح يجي جوازكم بيه خطأ
ومن تعترضون وتسوون هوسة راح يلبسوكم
اما اذا تسوون مثلي وتسألوهم بالعيني والاغاتي عن سبب خطأهم راح يطلعولكم الاوليات بالكومبيوتر مالة فد موضف وراح تشوفون نسخة سكانر من الاستمارة المطبوعة اياهه اللي طبعهه هذاك الشريف ويكولولك الخطأ مو من يمنة واذا تريد جيبلنه صك الو ال 25 الف جديد وتعال بعد يومين استلم جواز جديد صحيح (خوما نذبهه براس الموضف المسكين ؟؟؟ هو شكد راتبه؟ هههههههههه)
بالمناسبة الجواز الجديد راح يكون رقمة يختلف عن رقم القديم وهاي الشغله هم سوتلي سين جيم بالمعاملة مالة الهجرة
-
شكرا اختي على الموضوع
وعندي استفسار
اسمي بالجواز الثلاثي واللقب صحيح
لكن اسمي اللي مذكور بجواز ابني يختلف بحرف هل يؤثر هذا؟ علما انا سألت موضف الاي او ايم
اللي قابلنا بالمقابلة الاولى وكال (مو مشكلة)
مثلا اسمي mahmoud ali ahmed
اسم ابني saad mahmoed ali
واذا تلاحضون ان كتابة اسمي محمد بجوازي تختلف عن محمد بجواز ابني بحرف (ايييي بدلا من يووو )
فهل في هذا مشكلة ام نعتتمد على كلام الموظف؟
تحياتي