ankawa
منتدى الهجرة واللجوء => الهجرة و واللاجئين => الموضوع حرر بواسطة: بغداد1975 في 08:54 31/03/2010
-
مساءالخير ان كان مساءا وصباح الخير ان كان صباحا
اشونكم اخواني واخواتي مشتاقه الكم اهواية وصدكوني اتابع اخباركم من بعيد او من قريب ودائم السؤال عنكم
اتمنى الكل بخير ويارب يدوم عليكم الخير والبركة
حبيت انقل الكم اخر اخباري وبعض الصور في امريكا ولايه اريزونا ويارب تكون نقطه امل وتفاؤل للاشخاص اللي متخوفين من القدوم الى امريكا
اول ماابدي من المدرسه
اختي الصغيره اللي انحرمت من المدرسه 4سنين ومن جنا في مصر رحت لاكثر من مرة واخابر على التربيه علمود يسجلوها وبدون اي ورقه ثبوتيه لسبب سفرنا من العراق بشكل سريع ولوضع العراق سنة 2006وهم الاقرب منا ومايقبلو سجولها وحتى لو جايبه اوراقها الثبوتيه جان لازم ادفع كل سنة 1700جنيه يعني 350دولار سنويا غير الدروس الخصوصيه والكتب والمواصلات وووو اهوايه امور اخواني واخواتي في مصر قريبن من هاي الحاله فالحمدالله الله فتح باب امريكا النا وبعد اول مجموعه تطعيمات لاختي اجى شخص من المنظمة اسمه جبريل اخذ اختي واني وياها وهنا بدت المقارنة الكبيرة دخلنا استقبلو اختي وبعض اللاجئات اللي بعمرها احلى استقبال وسالوني عن لغتها قلت الهم اختي مو كلش بالانكليزي وصعبه انها تؤدي الاختبار فقالو خلاص على عمرها رح نسجلها بالمرحله ال9يعني المرحله الاولى من الثانوية وانطوها لبس الرياضه والقرطاسيه والايدي الخاص بالمدرسه وكل هاي الاحداث وترحيب من الاساتذه والمديره خلتني اني واختي نبجي من الفرحه انها رح ترجع للمدرسه والترحيب الجميل بيها فعرفو بينا احنا مسلمين حددو اكلها البعيد عن الخنزيرولكون اختي انصابت قبل سنين بمرض ارتفاع الضغط وشفائها منه خضعت الى فحص طبي كل يوم خلال دوامها بالمدرسه
ومن ضمن الامور اللي وفرتها المدرسه هو الباص اللي يوديها ويجبيها وهذا الحجي كله احنا ولا فلس طلع من جيبنا فاجى اول يوم مدرسه وواقفين دننتظر باص المدرسه اجوي مجموعه طلاب المتوسطة وقفوا بالسره منتظرين الباص الخاص بيهم اجى الباص وهاي الظاهرة الكل هنا بامريكا يعرفها ان الباص من يوقف اسم الله عليكم لو اوباما مار بالشارع لازم يوقف من السايدين الرايح والجاي ليش يوقفون اخاف طفل من الاطفال يعبر او بلحظة يركض بالشارع فجاة ميتعرض الى حادث واحنا مبهورين بهذا الموقف العجيب اجتي سيارة اطفاء معناها اكو بيت او شي ديحترك اسم الله عليكم وقفت سيارة الاطفاء والله والله والله اني واختي قعدنا نبجي بلحظة اذكرنا اشون الحمايات بالعراق تمشي وتضرب عامي شامي علمود زبال بالبرلمان ومامشت سيارة الاطفاء الا اشرلهم سائق الباص فمشى بكل بطئ وزيد السرعه ورى مسافه
ثاني شي العمل
في البداية كنت اشعر ان من الصعوبه العمل في امريكا لما ماسمعته من داير مدايرنا لكن رغم هذا يوجد من كان يبث بينا الامل والحمدالله قبل شهرونص اتصلت بيا المنظمة في الساعه8ونص صباحا قالت اللي الكيس ووركر (هي المسؤوله على العمل )يوجد عمل مؤقت لمده شهر الساعه 9دولار شنو رايج قلت الها موافقه وطبعا هاي مو اول شغله كانت عده اعمال قبلها لكن كان عندي عائق ان ماعندي اجازة سوق وهي شرط من شروط بعض اصحاب العمل حتىمايكون تاخير بالحضور للعمل المهم رحنا احنا ومجموعه عراقين وجنسيات اخرى اخذت كل اوراقي اني بال9ونص يمها هالحجي اني رحت بالباص بس اللي يريد يشتغل يسوي المستحيل وما يتأفأف ويقول هاي شنو ومنو وليش مؤقت لا اتوكل على الله وامشي ليش قولو ليش لان احنا لاجئين ماعدنا اي خبره داخل امريكا وبعض اصحاب العمل يردون هاي الخبرة فمن تجينا هيجي فرصه تخلي عندي تاريخ عمل داخل امريكا والحمدالله كان شغلنا مع شركه اسمها ارمارك وهي ثاني شركة توظيف داخل امريكا الشغل هو في ملعب بيسبول وكان مدته 15يوم وساعات العمل 5الى 6ساعات باليوم واني وظيفتي كاشيرمطعم وجبات سريعه وجانت اول مواجهه مع المجتمع الامريكي من السوبرفايزر (المديروالمديره) الى المنظف شايفين خليه النحل بالضبط احنا هيجي الكل يساعد الكل ينظف الكل يشتغل الكل ينتج ماكو انت جبير واني صغير انت غريب واني ابن البلد هاي غير شفت مواقف والله بجتني ورح احجيلكم موقفين لان طولت عليكم بالحديث
اول موقف هو قبل كل لعبه لازم يغنون النشيد الوطني لامريكا فلازم الكل يوقف بدون اي حركه ولا كلمة فصادف يوم باااااااااااااااااااااااااااارد ثلج والكل لابسين شفقات ومخلين غطى على راسهم بلحظة بدى النشيد الوطني الكل شال الشفقات والهوا باااااااارد ليش احتراما للعلم والنشيد فاسم الله عليكم اني الدمعه طفرت من عيني
الموقف الثاني احنا نجهز اللفات ونخليها بجهاز يبقيها حاميه فاجى زميل ويايا عراقي فتح الجهاز لقى لفه صغيرونة مال المديره فقالي هاي شنو قلت اله هاي لفه مال المديره قالي تدرين فد جوعان هسة اخذ ريست اكل وارجع هالحجي احنا كله بالعراقي والله والمديره واقفه بالقرب منا بس شافت اشاره زميلي على اللفه بدون متعرف شنو الحوار تدرون اشسوت جابت سجينة كطعت اللفه بالنص وراحت انطته نص لزميلي بحيث اني شعر جسمي كله وقف زين هاي اشمدريها واشون فهمت وحتى زميلي تفاجأ وشكرها
اسفه طولت عليكم وعندي اهواية مواقف واحداث صادفتني والله كل موقف ودي لو كامرة اصورها وانقلها الكم
مع جزيل الشكر
اختكم بغداد1975 عبير من اريزونا
-
اهلا ومليون سهلا بك اختي الغالية عبير منورة بين اخوانك واخواتك انشاءللة تكوني انت والاهل بالف الف خير مراحب بك بكل الاوقات
-
شكرا اختي انجي على الترحيب مع الاعتذار الدائم عن تقصيري وياكم
اختكم بغداد عبير1975
-
اهلالالالالالالالالالالالالالالا وسهلالالالالالالالالالالا
بيك اخت عبير وانشاء الله تستقرون وترتاحون انت والاهل
والله يعوضكم ايام الماضيه من تعب
-
ايباااااااااااااااااااااااااااااااااااااااااااه هاي امريكا شكد متخلفة؟؟!!!!!!!!
اعجب شي مال الباص!!!!!!
عمي والله اللي مايروح لمريكا عمرهة خسارة... وقد أعذر من أنذر!!!!!!
اخوكم صفاء الكرخي
-
اختي الغاليه بغداد
جزيل الشكر لتواصلكِ
بيننا من رغم الضروف
اما عن هذه المواقف فهذا يدل أننا سننعم بحياة افضل
اعتذاري لكِ لتقصيري
لكِ دعواتي
اختك الأمبراطورة_مصر
-
هلا بعبورة الورد . خيه مشتاقيلج و الله . فرحتلج من كل قلبي الله يوفقج ويفتحها عليكم و يحفظكم من كل سوء
-
شكرا اختي بغداد
والله من نشوف هاي الامور نتحسر على العراق والي يصير بي شوف العالم شلون عايشه وشوفي التطور وين وصل والاهتمام بالاطفال والمدارس
واحب اضيف شغله احنا هنا بولايه مين ينطون الطالب من مرحله المتوسطه لابتوب يدرس بي وياخذه ويا للبيت بعد المدرسه فالطلاب كلش يحبون المدرس ودراستهم سهله والمدرسين حيل يهتمون بالطالب ودائما يرفعون من معنوياتهم
-
اختي العزيز اسال الله العلي القدير ان يحفظكي انتي واختك وان يفتح ابواب رزقة بوجهك يارب العالمين
شكرا جزيلا على القصة الحلوا
-
اختي العزيزة عبير ... اني اشكرك جدا على موقفك ويانا و ان شاء الله دائما بالتوفيق و الله يفتحهه بوجهكم دائما و بوجه الطيبين اللي يحبون يساعدون الناس ... مع تحياتي ... اخوج مازولا
-
شكرا اخواني واخواتي
على الرردود واني حبيت ابث بيكم الامل ان امريكا خير انشاءالله لكل العراقين القادمين اللي يردون يعيشون حياه استقرار والعمل بجد والمثابره
اختكم بغداد 1975
-
شكرا جزيلا للاخت العزيز اسال الله العلي القدير ان يحفظكي انتي واختك وباتوفيق والنجاح وشكرا جزيلا على القصة الحلوا
اخوكم ابو ديانا
-
اتمنى لكي التوفيق وان شاء الله كل صعب يهون وتنفتح ابواب الرزق بوجهكم وتعيشون حياة كريمه ولكل عراقي ومهاجر ومغترب اتمنى للجميع الحياة الكريمه والاسقرار
-
اختي الغاليه الف مبروك على العمل وان شاء الله يارب اتحصلين شغل فول تايم وباستقرار وبالموفقيه
بس اريد منج لاتظلين كل موقف تبجين بسببه لان هيج راح متعرفين طعم الفرح والله ولي التوفيق
-
هلو شلونكم احمد شلونه اني سالم ام عبدلله سلم عليج هذه رقمي خابرينه6036062583 باي
-
اهلا وسهلا باختنا العيزة منورة المنتدى حبيبتي والله هاي المواقف تخلي الواحد صدك ما يعرف شيحجي احنا هم شفنا هاي الشغلة هنا مال الباص رهيبة!!!
ومن سولفتيلنا عالمدرسة والاكل اني هم جربت هاي الشغلة هنا هم كلش يحترمون طلبات الاهل بالنسبة للاكل احنا مثلا هم عرفوا بينا مسلمين كالتلي انتو شنو يريحكم كتلها بس اللحم والدجاج اني اجيبله من البيت وانطتني الجدول مال الغدا مال شهر كامل واني كمت احضرله نفس الشي (حتى ما يحس بفرق عن بقية الاطفال) يعني يوم الدجاج اني اسويله نفس اكلهم بس حلال وطبعا هم اصلا ما يقدمون لحم خنزير هنا بالروضات والحمد لله ها صار كم يوم كلش مرتاح وياهم وبيهم طبع كلش يحبون الاطفال ودائما عدهم الطفل اولوية
تحياتي اختي العزيزة وربي يبارك بيج ويديمج للمنتدى
-
الف مبروك ويارب تتوفقون بحياتكم الجديده وترتاحون