ankawa
منتدى الهجرة واللجوء => الهجرة و واللاجئين => الموضوع حرر بواسطة: green card في 12:09 16/06/2010
-
مرحبا يا اخواني
طبعا ملفي هو فكر من اول يوم او بالاحرى اني فكر من اول يوم انولدت بيه لانه مواليدي 1980 يعني حرب ايران واستمرت مسلسلات الفكر عندي من الحروب والمآسي
يعني حالي من حال العراقيين الي شافوا بس الظيم والقهر
المهم
طبعا بعد مقتل اخي بسبب الاوضاع الطائفية في بغداد منطقة البياع رجعوا داهموا بيتنا الامريكان بسبب وشاية على اخوي الاكبر مني اخذوه واخذوني وياه . بقيت بالسجن تقريبا 10 ايام وبعدها اطلقوا صراحي
اما اخوي بقى تقريبا شهرين او اكثر وطلع يعني هم ماعنده اي شيء مجرد وشاية
بعدها بكم يوم طلعت من العراق واجيت هنا الى لبنان قدمت على الامم في شهر 12 2008 ومشت معاملتي عادي كل شيء مشى عادي لحد ما كملت الدورة التثقيفية في شهر الواحد 2010
بعدها نسوني ولا احد اتصل علية راجعت الامم قبل كم يوم انطوني موعد مقابلة وبالمقابلة بلغوني بالرفض
طبعا سبب الرفض هو الاعتقال
زين اني طلبت اسوي استأناف كلولي قدم الاستأناف بس راح تكون نسبة النجاح اقل من 1 بالمائة هذا على لسان الموظفة بالامم
اخوان اريد نصائحكم بخصوص الاستأناف
شلون اقدمه يعني اكو شيء مميز اسويه يعود علية بالنفع لو لا ؟؟؟
علما انه الاستأناف لازم يكون مترجم
ارجوا ان تنصحوني
-
الله يساعدك
وانشاء الله الاخوان الي مقدمين استئناف ايفيدوك
-
اخي صاحب الموضوع,
الله يكون بعونك بس لتيأس اكو هوايه ناس اجاهم رفض وقدموا استئناف وانقبلوا...
بصراحه اني عندي معلومات بسيطة عن الرفض يعني من خلال الي قريته بالمنتدى والي اعرفه انه من يسلموك قرار الرفض يكتبولك اجراءات الاستئناف اذا تريد تقدم على استئناف, وينطوك العنوان الي لازم ادز عليه طلب الاستئناف مالتك...اكو شي جدا مهم بالاستئناف حتى يعيدون النظر يالقرار مالتك وهو حاول تقدم ورقه او شي انت ممقدم الهم سابقا ويثبت انه سبب اعتقالك مجان امني يعني انت ممسوي شي لان الامريكان جانوا هوايه يعتقلون ناس بالغلط...بس اذا هم اعتقلوك بالغلط اكيد ينطوك ورقة تثبت انه انت مجان عندك شي ولهالسبب اطلقوا سراحك.. فياريت تقدم هيجي نوع ورقه تثبت صدق كلامك ,واذا ما عندك اي دليل ملموس على هالشي حاول بس بالكلام الي راح تكتبه تشرحلهم الاوضاع الي جانت بالعراق بذاك الوقت والاعتقالات العشوائيه الي صارت وحاول تشرح خطورة الوضع الي جنت عايشه هناك وصعوبة العودة للعراق .
وطبعا لازم الاستئناف مالتك تقدمه بالانكليزي ويا ريت لو تشوف مكتب ترجمه هم يكتبولك طلب الاستئناف افضل واحسن لقضيتك.
انشاء الله يعيدون النظر بقضيتك وتفائل بالخير.
تحياتي
Linda
-
السلام عليكم
اخوية العزيز الله يساعدك ويارب ينفتح بوجهك باب افضل من هذا الباب
اخي ولو كلامي مراح يمكن يعجبك بس هذا الواقع ولازم تتاقلم عليه اخوية ما زال عندك سجن بالعراق يم القوات الامريكية فما اعتقد الك اي فرصة حتى لو كانت وشاية واريد ازيدك من الشعر بيت حتى لو مو مسجون بس عليك معلومات يم الامريكان هم راح اتكون بموقف شك اني كلش اسف لان اكلك هذا الحجي لان ما اريد ابنجك واخليك تعيش احلام وهم ترجع بعدين وتنصدم صدمة ثانية حط عينك بعين الله وشوفلك غير باب وانشاء الله مكتوبتلك الي احسن منها
-
السلام للجميع ....
الاخ green card الله يكون بالعون تره صدكني مو مسألة فكر ولا شي كول الحمدلله هاي الله كاتبها انك تتعطل صدكني كلها كتبة رب العالمين للجميع يمتحن صبره بهيج مواقف صدكني اخويه اني مره خابروني التوطين نطوني موعد وضليت نايم بذاك اليوم مع العلم منبهات 2 جنت ناصبهن بس الله ما كاتبلي اروح اقابل وتأخرت 3 شهور على هالموقف وحمدت ربي على كل شي
فلا تيأس اخويه واني اايد رأي الاخ موفق الو منار بالي طرحه همه نبشو وراك لحد ما طلعولك هاي السالفه
بس والله حيره يعني فحصت انت وكلشي؟
لان الدوره تجي وره استلام الملف والفحص هاي علمود الواحد لمن ما يستلم الضرف وينطو موعد فحص يبقه بيها فزه الشغله
عموما" الله كريم وتهون يا صديقي
اخوكم
احمد الدوري
الاردن_عمان
-
واني أأيد كلام اخويه احمد الدوري وكلشي مكتوب عند الله سبحانه
ورغم اني سامع كثيرين كانو معتقلين عند الامريكان وانقبلو توطين وسافرو
بس هاي الشغله ماعرف شنو الحيثيات الي خلتهم يرفضوك بالوقت الي انت مكمل كل شي
اخويه هي مزاجات واكو ناس متستاهل وممتضررين من كل شي وجذبو بالقصة وسافرو وراحو
واكو ناس فعلا محتاجه ومتضرره ولو نرفضو لو بعدهم على الشحن .
خلي عندك ايمان بالله وماينسد باب اذا مينفتح بعده الف باب.
-
اشكر كل الاخوة الي ردوا على الموضوع مالتي
واني ما ازعل من اي كلام بالعكس كلها احطها بخانة النصح والمساعدة
بس بما انه اني ما عندي اي مكان اروح له في العراق وخصوصا بعد مقتل اخوي لذلك راح انتظر ردهم على الاستأناف
وبلكي الله يوفقنا
والله اني الصراحة ما كاتل نفسي على امريكا اني اريد اي دولة اخلص بيها من هذا الوضع الي اني بيه هسة
يعني لا اقامة ولا شغل بيه خير ولا سفر ............... وين الواحد ينطي وجهة
-
اخوية العزيز
اخوك مصطفى هم ساكن بلبنان
وأي شي تحتاج أنا بلخدمة
انا دااكمل جامعة هنا وهم مقدم وداأنتظر..
اذا اكدر افيدك باي شي بس كلي
تحيــــــــــــــــــــــــــــــاتي
-
الله يساعدك اخوي والله انقهرت عليك هواي الله يساعدك وان شاء الله تنفتح بوجهك كل ابواب الخير يارب واعذرني والله ماعندي اي معلومة بهيج موضوع تقبل مروري
-
السلام عليكم اخي الغالي
الموضوع عادي وطبيعي بس اعتقد انه انته مرفوض من الامنيه مو من المحلف لان لو من المحلف كان لافحصت ولادخلت دورة تثقيفيه بس اوراق مالتك والبصمات لمن دخلت الامنيه طلعت شغلت الاعتقال مالتك الي يم الاميريكان فشغلتك صعبه اني انصحك انتظر وان شاء الله تتحول لبلد احسن من اميريكا مثل ماصار وياي اني انرفضت بسنه 2008 واتحولت على فنلندا بالشهر التاسع سنه 2009 وانقبلت والحمد لله هاه طبعا سويت استئناف وورة سنه بالضبط اجتي النتيجه وهم كانت رفض ولنفس سبب المحلف
نجي اشلون اتسوي استئناف بالبدايه هل انته كلولك الك حق اتسوي استئناف
اذا كانوا منطيك الحق بالاستئناف
فهاي الخطوات الي لازم اتسويها
انته طبعا تعرف ليش اجاك الرفض يعني السبب مال الرفض وهو مثل ماناته كلت التوقيف عند الاميريكان بسبب الاشتباة او واحد ايريد ايسويلكم مشاكل يعني كيديه تجي تشرحلهم انه انته ما عندك شيء كنت وورة فترة اسبوعين طلعت واخوك طلع ورة شهرين مثل ما انته كلت وانتوا ناس مسالمين بس وماعندكم مشاكل وانه اكو ناس كانوا متربصين بيكم وبس ايريدون ايسولكم مشاكل فهمه الي بلغوا منمه انته متعرفه ناس طائفيين والدليل على انته ما عندك شيء تم توقيفك لمدة اسبوعين بس وحتى اخوك ما عنده شيء وطلع وره شهرين من بعد ما القوات الاميريكيه اتاكدت انكم ناس نظيفين واحب اكلك انه الاستئناف هو مجرد رساله تكتبها للشخص الي رفضك وتشرحله بيها النقاط الي هو خاف منها او فهمها غلط ورفضك بسببها واترجمها وتكتب اسمك ورقم الملف واتوديها الهم وتنتظر الى انه ايقررون بامرك وان شاء الله خير وتقبل مروري والله ولي التوفيق
-
الله كريم
-
اخي العزيز اولا قلوبنا معك وربك يسهل ... بس انت قدم استئناف اشخسران؟ ويجوز تنقبل ؟اهم شي لاتدع اليأس يسيطر عليك واتمنالك الموفقية والقبول وكل تأخيرة وبيهة خيرة :)
نور العيون
-
السلام عليكم اخوان اني هم نفس الشغله مالتك اخويه العزيز بس اني بعد مامقابل محلف وهاي صار انتظر من 26\11\2009 ولحد الان واني هم اعرف انهم راح يرفضوني بس شنكول النه لله وهذا السبب الي خلاني ارفض امريكا من البدايه لان همه ماعدهم انت ماعندك شي مدام انت عندك رقم يمهم تبقى محل شكوك ورحت الامم المتحده كتلهم اني كنت معتقل عدهم وراح ياخروني على الالشي وراح يرفضوني يكلي لو ما القوات الامريكه تدري انك ماعند شي جان ماطلعوك بفتره قصيره تقبل على امريكا لو انطيك الملف مالك ومالك لجوؤ وهاي جاي ننتظر بسوريا ولله كريم وما نعرف شنوا الي سوياناه بحياتنا لو صاريرين حراميه او قتله او مرتزقه جان كعد حضنه بس المشكله مانكدر عليها بس نكول حسبنا لله ونعم الوكيل ومع العلم اني عندي ادله على انوا اني مهدد من قبل المليشيات الايرانيه واخويه خطفوه من2007 ولح الان ما اعرف عنه شي دورت ماخليت وحتى مسجل بالصليب الاحمر بس ماحد حاس بالنار الي حنا بيها بس اكول لعل الله يريد بيك خيرا ويسرلك مكان احسن من امريكا وانصحك لاتسوي استئناف ترىتتاخر على الفاضي خلي يروح ملفك على دوله اخرى احسن تقبلوا مروري اخوك العاشق_1111
-
اخي الله يسهل امرك وقدم استئناف وركز على على هاي النقطه واكتب استناف قوي شويه
وبلغه انكليزيه ومرتب والي بي الخير يقدمه الله سبحانه
اتمنالك التوفيق
-
الله يكون بعونك اخوية العزيز بس يعني انت جنت مستلم الموافقة الامنية و بعدين اجاك الرفض ؟؟؟ و انت ذاكر هذا الاعتقال لو لا ؟ اذا لا فهاي شوية صعبة و اذا اي فلازم مثل مكالو الاخوان تحاول تكتب استئناف مرتب و قوي حتى تكدر تقنعهم و صدكني اذا الله كاتبهة فراح يسهلكياهة و ان شاء الله خير
-
لله يكون بعونك ولله يساعدك على مصيبتك لانو مصيبتي مثلك هم مواليد 1980 وهم اخوية انقتل بس صدكني الي بهذا المنتدى من اخوان واخوات همة الي واسوني وساعدوني اتمنى ان تبقى وياهم للتواصل قريت جميع الاراء والي اتمنى الموفقية الك ولله يساعد الوالدة مع تمنياتي بل التوفيق بوبون من عمان
-
اشكركم يا اخوان
اشكر كل من شارك بالموضوع
اشكركم واشكر جهودكم
والله ما عندي كلام اكوله يكفي لشكركم واتمنى في يوم التقي ولو بواحد منكم حتى ابين له كم اني معتز بالاخوة الي ما قصروا وياي
اما بالنسبة للاخ اي سألني عن الحادثة الي صارت معي وهل ذكرتها من اول يوم بالامم او لا الجواب نعم ذكرتها ن اول يوم قدمت على الامم
اما الاخ الي سألني عن هل يسمح لي بأن اقدم الاستأناف الجواب نعم اخبرتني الموظفة (( الامريكية )) انه يمكنني ان اقدم استأناف بس هي بنفسها خبرتني انه الاستأناف جدا جدا صعب ينقبل بس للامانة اكولها ان الموظفة الامريكية كانت متعاطفة معي كثيرا وكانت تسجل كل شيء اقوله تقريبا .. سؤالي هو اذا اني مرفوض وما ترهم لي جارة لويش دا تسجل كلامي بالورقة ؟؟؟!!! ما ادري ليش المهم اني اشكركم ويا ريت لو اكو جواب على هذه الحالة
اما اني ومثل ما كلت الكم ما عندي مكان اخر ولا عندي خيار اخر ابدا
راح اتحرى عن شغلة تغيير الوفد واشوف شغلة الاستأناف
-
اخي كرين كارد...بعثتلك رسالة على الخاص...اتمنى تكون قراتها....تحياتي وامنياتي لك بالموفقية
-
أخوية العزيز green card شغلتك صح شوية بيه صعوبه بس حذاري من اليئس لأن على ساعة فرج كثير من الناس طلعلهم رفض ونقهرو وبعدين طلعتلهم دولة ثانية مثل أستراليا وكندا يعني قصدي عسى أن تكرهو شيأ وهوه خير لكم وأنشاالله أتكون بيه خير ألك
-
الله يساعدك يمه وانشالله الله يفرج عليك بعون الله وعلى كل العراقين ابنى انى احب افيدك بشغلة الاستئناف لان انى ابنى انرفض واستئنافنا بس الاستئاف يتاخر هوايه وانت لا تمل بس بالنهايه يوافقون بس انت لازم توضح الهم اكثر انو انت واخوك انسجنتو بوشايه من الناس بسبب الطائفيه واتكد الهم انو انت ماتكدر ترجع للعراق وباسلوب مرتب وطبعا بلانكليزى وتستنسخها واتضم نسخة عندك بالعربى وبالانكليزى وتروح اتوديها بعد ماتخلى رقم ملفك وتليفونك واتظل تتصل بيهم كل فترة تتاكد اشصار من الاستئناف والله يسر اموروه بالمقابلاترك يارب----------------------بس احب اوضح شغله للكل بالنسبه للشباب انتو اذ عدكم توقيف لاتذكروه بالمقابلات لان هذا الشى يعطلكم عدنا صديق هو واخته سوى كملو كلشى واخته سافرت وهو وراها بسنة ونص يلا سافر لانو كان بالمقابله حجى على توقيف اله بباب توما يومين لااحد يحجى على توقيف لانو ياخر كل شى
-
اول شيء احب اكوله انه ياربي ما ينشلع قلبج ولا تتعذبين لانه انتم الخير والبركة واحب
اشكر امي العزيزة الي ردت على موضوعي وسمتني مثل ما تسمي ابنها طبعا ما تتصورون شكد اني ارتاحيت لمن قريت رد من وحدة تكلي (( يمة )) ابدا ما راح اكدر اردلها الدين هذا لا والله لانه مجرد احساسها بية هو هذا دليل على نقاوة القلوب ___ طبعا من يوم الرفض لحد هسة ما خابرت اهلي بس الحمد لله لكيت الي ام واخوة هنا بالمنتدى ____ وهاي قليلة جدا انه تحدث اني اتشرف انه اكون ابنج ولو يمكني مو على كد المقام
طبعا الكلام هواي هواي وما اعرف شأرد بس اكول شكرا يا امي شكرا يا امي
اما بالنسبة لموضوع الملف فأريد اخذ رأيكم يعني شتنصحوني اقدم على وفد اخر لو اروح على شغلة الاستأناف؟؟؟
يا ريت لو تنصخوني
طبعا ما انسى الاخوة الي ردوا على الموضوع مشكورين كل الشكر
-
السلام عليكم
اخوية العزيز انتة بالمقابلات جنت ذاكر بانة كنت معتقل من قبل الجيش الامريكي ؟؟لو همة اكتشفو عن طريق الصدفة ؟؟
ان مع العسر يسرا
robin - Cairo
-
اخويه كرين كارد اني من رايي ان اتقدم على وفد اخر وان شاء الله ايكون اوربي المساعدات ممتازة والاحترام مو طبيعي وتعيش ملك والله ولي التوفيق
-
اخي العزيز اولا قلوبنا معك وربك يسهل ... بس انت قدم استئناف اشخسران؟ ويجوز تنقبل ؟اهم شي لاتدع اليأس يسيطر عليك واتمنالك الموفقية والقبول وكل تأخيرة وبيهة خيرة :)
نور العيون
اخي مثل مكالت نور العيون لاتدع السأس يسيطر عليك ;D
-
السلام عليكم
اخوية العزيز الله يساعدك ويارب ينفتح بوجهك باب افضل من هذا الباب
اخي ولو كلامي مراح يمكن يعجبك بس هذا الواقع ولازم تتاقلم عليه اخوية ما زال عندك سجن بالعراق يم القوات الامريكية فما اعتقد الك اي فرصة حتى لو كانت وشاية واريد ازيدك من الشعر بيت حتى لو مو مسجون بس عليك معلومات يم الامريكان هم راح اتكون بموقف شك اني كلش اسف لان اكلك هذا الحجي لان ما اريد ابنجك واخليك تعيش احلام وهم ترجع بعدين وتنصدم صدمة ثانية حط عينك بعين الله وشوفلك غير باب وانشاء الله مكتوبتلك الي احسن منها
شكد صريح ;D