منتدى الهجرة واللجوء => الهجرة و واللاجئين => الموضوع حرر بواسطة: vincenzo في 02:11 27/06/2010
العنوان: مقابلة الفيزا ببغداد...تفاصيل وملاحظاتي
أرسل بواسطة: vincenzo في 02:11 27/06/2010
التفاصيل: 1-قبل يوم المقابلة اخذت غراض مبيت ورحت بتت ببيت ولد صديقي قريب من مكان المقابلة حتى اولا متأثر علية اي قدرات اذا طريقي بعيد وضلينه اني وياه كاعدين للصبح وكل ما واحد من عدنه يطفي ويغفه تقريبا الثاني يكعده ويكله حرامات تعب سنتين معاملة يروح الى ان صارت بالخمسة الصبح بعد كمت احوص وهوه غفه فكعدته بالكوة وكتله يلله وصلني لان سيارتي عفتهه باب بيتهم. وهذا اجراء ممكن يستفاد منه اللي محافظات او بعيدين عن المنطقة الخضراء ومداخلهه من يم الرشيد.
2-وصلت يم الخارجية قبل السته الصبح حتى جماعة التفجيرات بعد ما رايحين للدوام هههههه وتمشيت للبوابة رقم ثنين وتفاجأت انه الشارع اللي يطلع من جسر الجمهورية من باب الشرجي ويوصل للقادسية مفتوح للاخير سيارات وكلش عادي بس كلشي عالسايدين كونكريت عالي بس هذا فد اجراء كلش حلو وحتى الازدحامات هم مو مثل قبل فتيهت بصراحة لان متعود انه تقاطع الشارع اللي جاي من الجسر وكرادة مريم وية الشارع اللي جاي من العلاوي تكون منطقة مغلقة تماما وتخوف.
3-سألت شرطي كتله بالنص (عندي مقابلة منين ادخل؟) فلاحظوا انه ولا جبت ذكر امريكا بالطاري وهاي خلوهه ببالكم من تحجون وية احد او تسألون عن اي شي لا تذكرون امريكا وسفارتهه لان راح تتفاجأون مثلي انه الكل يعرف بس ميحجونهه بالنص فانتو هم خلوهه سكته...المهم دلاني الولد ودخلت اول شي سيطرة مالة جيش عراقي تفتيشهم تافه وبس لازم تشوفهم جواز وجنسية او شهادة جنسية (يعني تشوفه شغلتين ام الصورة بس كلشي ما ياخذ منك) وتطلع كبل عبالك دتمشي بالشارع اللي يودي للقادسية بس وره الكونكريت الى ان توصل لسيطرة اخوانا الاكراد (كل السيطرات اللي ذكرتهه او راح اذكرهه هي عبارة عن كرفان بيه كم واحد) وهم يفتشون ويشوفون جوازك وتطلع منهم ويشوفوك نفق تدخل بيه يفوت من جوة هذا الشارع اللي شرحته قبل شوية ويطلعك من جهة الخارجية والرشيد (بوكتهه تذكرت لعبة Recoil مالة الدبابة لان يشبه انفاقهه ههههه)....اول ما تطلع من النفق يتغير العالم اول شي تلكة جك بوينت مالة هذولة اللي من بورتوريكو مدري منين لابسين عبالك مرشدين سياحيين بغابات افريقيا وكل واحد شايلة تفكه مال صيد وحتى بعدين سوولهم تعداد ورة فد نص ساعة من ما اني اجيت لعد شوفوا اني شكد من وكت جاي...هذولة يجيكون اسمك بالجواز وية القائمة اللي عدهم ويفتشوك زين وتطلع من منهم تلكة شارع يفصلك عن فندق الرشيد بس تعبره واكو دجة بالحديقة تكعد تنتضر عليهه بس ما اسولفلكم شنو الحديقة شكد لطيفة لو النافورة شكد حلوة يعني عبالك انت مو ببغداد اللي هيه عبارة عن كولكشن مالة جنابر ومزابل.
4-المهم اخوكم وصل للانتضار الساعة فد بالستة وشوية اول واحد (ولو اسمي باللستة جان اخر واحد لان ذاك اليوم يلله سويت فحص طبي ويلله دزيتلهم انه اريد اسكورت وخلفلله عليهم ضافو اسمي) ... تمنيت لو ماخذ وياية يطغ لان جنت اغفي والكوسترات مالة السفارة ما وصلت اللا بثمانية وشوية... وراية بدت العالم تجي وكلهه مرعوبة عبالك واحد ديركض وراهم وبيده كاتم بينما اني ما خليت واحد ما سولفت وياه كلت بلكي الكه فد نفر من نفرات عينكاوا بس ماكو وامشي واهوس اس اي في بس طلعو بس تلاثة مثلي والباقي تقبيطة كوستر ونص اشكال والوان واغلبهه زيارة وكم واحد او وحدة دراسة
5-اجه كوسترين تبريد مو طبيعي ونزلوا منهم كم واحد واحد منهم كردي اجانه وكام يصيح بالاسماء ويقارن وية الجواز واللي يتأكد من اسمه يكلله روح اصعد الى ان بقوا بس تلث اربع نفرات هناك ينتضرون ما اعرف شلون دخلوا لهناك جايين وية اللي يقابلون فهذولة يبقون ينتضرون وميجون بالكوستر (مثلا واحد جايب بنته و واحد جايب اخته ...الخ).
6-مشت الكوستر هوااااااي يلله وصلت للconsular section اللي هو بناية سياجهه الخارجي هو هم غرفة جبيرة مالة تفتيش فابو الكوستر كال خلصت فلوسكم انزلوا وسوينه سرة يم الباب مالة التفتيش واخوكم بالساعة ونص بالسرة وما بية اوكف من السهر لان كلساع واحد من الموضفين يطلع يفتيله فتوة...مثلا واحد طلع كال ladies first مع انه سراهم وحد وهاي السالفة ما اتوقعتهه من الامريكان لان شغلة racial بس هذولة الموضفين جانوا كلهم عراقيين واسمائهم حتى كردية وبعدين فريق الطائرة العراقي للمعوقين قبلنه لان هذولة معوقين خطية وهم كلنه ميخالف حتى من وصلي السرة هم كامو يجون ناس وعوائل مدري منين وهم يدخلهم ومعند وياية ... اني فكر هية كوة...بعدين دخلت وعرفت ليش التأخير...طلع كلله من ورة الحزام والساعة يعني لازم تفرغ جيوبك بباكيت زغير وحتى تنزع الحزام والساعة وتفوت بجهاز تطلع من الجهه الثانية لازم ترجع تعبي بجيوبك وتلبس الحزام والساعة...بس ملاحظة دكو ويانة الناقصة انه من اخذوا التلفون وانطونه رسيت اخذوا وياه باكيت الجكاير والجداحة وهنا حقدت على امريكا واوباما.
7-من طلعت من هاية السالفة مالة التفتيش صرت بحوش البناية الفارغ تماما ومحد اكو حتى يكلك وين تروح فصرت سبع ومشيت ليكدام ولكيت الباب و واكف يمة واحد من هذولة حراس ادغال افريقيا وفتت واذا قاعة مو كلش جبيرة مسطيلة ومتروسة كراسي وجماعتنه كلهم كاعدين ناس تنتضر وناس واكفة تملي استمارات ومخبوصين ومحد ينتبهلك لو يجاوبك فاني شمدريني هم كعدتلي على كرسي واذا بعدين انتبهت انه اللي يدخل لازم من كيفه وبقدة قادر يروح لاول شباك بصف الباب والثنين اصحاب التفك ويلكه ورة الجامة كاعد فد واحد من لهجته كردي يكلك "اهلا وسهلا...ماذا لديك اليوم؟" وكل عقله يعني ما يضحك ههههههه كتله اس اي في كال "اعطني جوازك" ... هيه جامة ضد العبوات والانتحاريين وسماعة ومايكرفون مدري وين بحيث حجيه وياك فضيحة بس انت تكدر تحجي وياه على كيف بس عاد شلون يسمعك هاي اللي راح يبقى بنفسي اعرف سرهه...المهم انطيته الجواز لان همه مخلين نزلة كلش زغيرة بالمرمر اللي جوة الجامة اللي ضد الكلشي وكلاشي فكال اوكي روح انتضر يصيحوك بشباك 7.
8-انتضرت فد 10 دقايق مو اكثر واذا واحد شكله امريكي صاح رقمي واسمي فرحتله واكو كامرة تتحرك عجيبة وقمة بالتنكه لوجيا كال باوع عليهه (طبعا احلى شي انه ما تتفاجأ لان شفت كل الاشياء والشبابيك وشيسوون اللي قبلي) فاخذت صورة وبعدين اكو فد شي كدامي عليه خطوات اخذ البصمات هم اخذ بصماتي وكال انتضر هسه يصيحوك بشباك لاخ.
9-ورى هم فد 10 دقايق لخ صاح علية شباك 9 مدري 8 وبيه فد شايب حباب وردة مال الله يمكن اصله اردني كال راح اطلب منك اوراق وتنطيني اي شي اكولكياه ... طلب الجنسية وترجمتهه وشهادة الجنسية وترجمتهه (وهاية الاخيرة شكد حلو اللا شوية جان عفطلي على ترجمة اخونا التكساسي رغم انه مشت بالان في سي لان كال وين اجازة المترجم و وين توقيعة وطمغته او اني هيجي افتهمت فاصلا ما اخذهه وكال مو مهمه) وال DS230 و ورة شوية رجعلي كال هذا حقل 11 منو؟؟ كتله صديقة امريكية كال اي شأسمهه؟؟ فارتبكت رغم انه شغلي صح لان رقم 11 يريدون بس عنوان الصديق الامريكي اللي تريد تروح يمه...المهم انطاني قلم وكتبت اسمهه مو الكامل وعادي فانطاني ورقة استمارة كال روح اكتبلي اسماء ومواليد (بالسنة فقط) جميع اخوانك واخواتك (طبعا بكيفك عربي لو انكليزي) فرحت مليتهه وكعدت كبال شباكه ومن رجع للشباك اشرتلي كال تعال وانطيتهه اله من هاية الفتحة الزغيرة وبأت الطلبات من جديد ... صحيفة 57 ... انطيته... محكومية هههههه كتله عندي تعهد لان بوكتهه من رادوهه الان في سي جان صاير يمهه تفجير هههههههههه شايفين الوت من هيج فهوه كال "ها ها اوكي مو مشكلة" واصلا ما اخذ التعهد مالتي اللي اني تعبان عليه وموقعة وطابعة ومحترمهم ويمكن بعد طلب شغلات مو فد شي يعني اعتقد كلنه عدنه وشايليهه بذاك اليوم وكال انتضر يصيحوك بغير شباك. ها ونسيت الضرف مال الدي اج ال اصلا ما يحتاجوه وانما بس الوصلين اللي وياه وبيوم القبله من رحت اجيب الوصل من الدي اج ال لكيت ولد جاي من الديوانية مقابلته بيوم قبلي والافندي جاي بيوم القبل المقابلة وما ملحك عالدي اج ال ورايح للمقابلة بلا ضرف فشفته بالدي اج ال دياخذ ضرف بعد المقابلة لان عادي قابلوه بس كالولة تدزلنه باي ميل الوصل اللي وية الضرف.
10-بهالاثناء من كعدت انتضر جان كبش الفداء فد ولد قبلي جاي من كركوك ديناضل وية ابو المقابلة وفوكاهه بالعربي وفضيحة بس ما اعتقد اللي مو من جماعة الاس اي في ديعرفون شنو القصة فاني كللي اذان صاغية واكتشفت انه اللي يقابل اصلا فد واحد ولا عبالك امريكي وشكله شرق اوسطي بس يحجي امريكي تماما وعربي فصحى واسألته كلش روتينية واتذكر سأل الولد ليش بطلت فجاوبه لان الشغل خلص ومن خلص الولد ورة شوية صاح اسمي...طبعا مقابلة الولد كلهه دقايق هيجي مو اكثر من ربع ساعة.
11-من صاحلي اول شي سلم علية بالانكليزي وبدأ يحجي وياية كلله انكليزي (ذاك الولد كلله عربي واكو ولد قبله اسمه الاصلي جوني فبدأ وياه بالانكليزي بس يمكن شافة مو شي فحول عربي بس شو اني حيل اخذه الواهس واني هم كيفت وكمت استعمل شوية كلمات غريبة حتى الكاعدين مو يم الموضوع)...اول شي رفع ايده اليمنه فاني هم رفعت اليسرة فابتسم من ارتباكي وشكد مطفي ونعسان فاني هم كمت اضحك على نفسي ونزلتهه ورفعت اليسرة وكتله اسف خربطت لان اني اصلا يسراوي ههههههه هو يحجي كومة وانت بس تكول I do حتى لو يفشر عليك...وراهه يكلك انت فلان زين؟؟ شجنت تشتغل؟؟ قبلهه شجنت؟؟؟ هسه شنو؟؟ ليش بطلت؟؟ طالع من العراق لو لا؟؟ خادم عسكرية لو لا؟؟ درجتك الحزبية بزمن العفلقيون؟؟ شناوي تسوي بامريكا ومن هالسوالف اللي كلهه واجوبتهه موجودة بالمواضيع السابقة...بس اللي ضوجني وخوفني هو انه لح ليش بطلت؟ ومتأكد انه ما مطرود؟؟ فكتله يابة هاية ورقة الشركة الاولى اجتني ورى كل الاحداث وبيهه انه اني جنت employee with good standing و من رجعت للشغل ولكيت الشركة الجديدة الله يحفظهم بجاه الحبيب بو رقيبة اخذو باجي وسوولي مقابلة مال باج وغلطت بكم رقم ففشلني بالمقابلة وبعد ما كدرت اشتغل وياهم وابوك الله يرحمه فهو بين اقتنع بس الله اليستر (الاسألة اللي عددتهه عالسريع ما دوختكم بيهه لان كلهه جان جوابي عليهه never لان اخوكم سالم مسلح واللا شوية جان صرت نبي).
12-من كملنه سالفتنه انطاني طن ورق اشكال والوان من هالفتحة الزغيره بيه شكو شغلات اني دازهه الهم بالمليون سنة الاخيرة ومن ضمنهه رسالتي الهم من رزلتهم عالباج وعدم المحكومية ومضللين حجيي القوي بالاصفر هههههه و وياهن طبعا ورقة وقعت عليهه ما اعرف شنو (يمكن دي اس 230 لان اني اصلا ما جاي اشتغل وياهم) وانطاني هم ورقة كصكوصة زغيرونه كال هذا ال receipt مالتك يمكن مال استلامهم جوازي وكالي شغله غريبة كال شوف هذا الريسيت ما مكتوب بيه اي فلوس فأذا انسألت انته ترة ما دافعلنه اي فلوس للفيزا (هاية الحجاية كلش ريحتني لان سمعت كلمة فيزا) بس ما اعرف ليش كالي هيج واخيرا كال روح انتضر الباص مال 11 واحنا ندزلك ايميل.
13-هاية النقطة الاخيرة خلي شوية اضحككم لهنا كلشي اوكي وسفرة حلوة ومتونسين اني وجماعتي الاس اي في الاشاوس بس اني من كلي خلصت ما مصدك بس اريد اطلع لان الوب على جكارة فطلعت من الباب اللي متروك لان الباب اللاخ هوة اللي اكثر شي يستعملوه بالطبة والطلعة فهذا الباب كلش قوي شكد ما تتصورون يعني اذا تهدة وينطبك ممكن تتفلش البناية فواني دا اطلع جان صاحبي الي قابل قبلي صاحلي من جوة "هاي وين يمعود" وهو قصده انه ننتضر الكوستر جوة عالتبريد مو برة بالتراب فواني التفتت عليه وجان ينطبك الباب على اصبعين من ايدي اليمنه همزين بس انطنكم عمرهم اللا شوية جان انكطموا واشتغلت الدماء والاسعافات وكلهه تتراكض هههههه يا فرحة الما تمت...يعني صدك اني مينطلع بيه وافشل
ردي التالي بهالموضوع راح يكون ملاحظاتي والاشياء اللي شفتهه وما قاريهه بالمنتدى سابقا وانواع الفيزا الاخرى والناس اللي قابلوا عليهه وشصار وياهم
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: عبسي في 04:35 27/06/2010
يسلمو حبيبي فيكي اعرفك تخرب على هذي الشغلات مال يسلمو ومبرووووووووووك ادري شنو مسوي ارهاب للاعضاء مانعهم من الكتابة اشو الموضوع محد معلق عليه صاير شي بغيابي شنو هم فوتوك للسجن الانفرادي ذيج المرة طلعناك بكفالة هسة شلون خربتني ضحك على مال دوام اهل التفجيرات بعدة ما بادي مبروك مرة ثانية وان شاء الله تتيسر كل شغلاتك ااخوك عبسي
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: hussein5582 في 06:00 27/06/2010
هو يحجي كومة وانت بس تكول I do حتى لو يفشر عليك Great job
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: confident في 06:02 27/06/2010
استاذ فنسزو على الخير والبركة ان شا ءالله المقابلة مالتك واتمنى تحصل الفيزة سريعا وما تتاخر بس صدق يراد الك فدم يوم يالله كتبت الي كتبته عاشت ايدك اني استغربت على شغلة ليش سالك على نقطة رقم 11 شنو انت ما مقدم على مساعدات اني المشكلة لحد الان اوراقي بالمراجعة الادارية وكلولوي كلشي كامل بس ما دزيت الورقة مال البنفت كلت اذا الله ستر وحصلت الفيزة عود ادزها واحصل مساعدات ما وقعوك على تعهد انه تسافر خلال 3 شهر من العراق لو لا وماكو تعهد بترك العمل والله كريم
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: Nadia2004 في 09:04 27/06/2010
Good Luck
Nadia
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: ARMY STRONG في 11:42 27/06/2010
مبروك اخويه فنجززززز و يوم استلام الفيزه بااسرع وقت
ARMY STRONG
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: مضروب ليزر في 13:17 27/06/2010
الف الف مبروك اخي فينو و ان شاء الله تستلم الفيزا باسرع وقت ممكن و حمد لله على سلامتك هسة صار عندك ذكرى بالسفارة بس عندي كم سؤال عن المقابلة:
1- سؤال عن العمل الحالي و السابق تذكر كل الوظائف ام فقط الترجمة؟ 2- هل طلبوا بيان الولادة في المقابلة؟ 3- ما هي الاجابة الشافية للسؤال ما الذي تنوي فعله في الولايات المتحدة هل نذكر من اجل اكمال الدراسة ام ذكر ان حياتنا في العراق مهددة؟
حبيبي فينو انشاؤءالله ما يخلص الشهر الا و مخابريك تعال استلم الفيزا
اخوك مضروب ليزر
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: vincenzo في 16:27 27/06/2010
اشكرك عبوسي والله مو شغلة ارهاب ولا انفرادي لان اني هسه حباب وما اسوي وكاحة ابد بس اللغوة مالتي طويلة واني من الناس لو اشوف هيجي قصة طويــــــــــــــلة هم اتعاجز ارد عليهه وبعدين اني نزلتهه بتلاثة الفجر بتوقيت بغداد فاعتقد المهتمين بهاية التفاصيل المملة ما متوفرين
ابو علاوي الوردة والله ولا لكفت منه ولا جلمة بس ادري بيه قسم فكتله اي دو ههههه
حبيبي كونفدنت اني مقدم عالبنفتس وبحقل رقم 10 كاتب N/A وبال11 مخلي عنوان الصديق الامريكي اللي اريد اروح يمه وهو ما اعرف ليش راد اكتب اسمه!!! بالنسبة لورقة البنفتس لازم هسه تدزهه قبل المقابلة و وره الفيزا تدز نسخة ممسوحة ضوئيا من الفيزا للرابس نت اني وقعني مثل ما ذكرت فوك على فد ورقة ما لحكت اقراهه من الارتباك والخوف بس اني مبطل منهم من زمان فما اعتقد هيه مالة ترك الشغل بس احتمال مال وجوب السفر خلال 3 اشهر من استلام الفيزا والعلم عند الله
اختي ناديا واخوية ارمي سترونك اشكركم وانشاء الله تحصلون كل اللي ببالكم وبوقت قياسي مو مثلي
صديقي ابو الليزر 1- بس سأل عن قبل الامريكان كتله طالب وبعد الامريكان كتله ما متعين باي مكان فسأل لعد شلون عايش كتله انطي محاظرات فسأل بشنو كتله اني ماجستير الكترون فانطي رياضيات والكترون ومايكروبروسسر ومن هالسوالف فرأسا غلس وغير الموضوع وخلي ببالك كل حالة وحد يعني يجوز انت وضعيتك غير شكل ومشتغلك فد مليون شغلة قبل وبعد الامريكان فسوالفكم راح تكون وليدة اللحظة 2- ولا ذكروه وياية او وية اي واحد من الاس اي في اللي وياية 3- اني بالنسبة الية كتله اول شي اقبل باول وضيفة احصلهه وبعدين احاول ادرس او اعادل شهايدي وكتله اني من هسه مقدم على بوست-كراد سكول بامريكا اتمنالي التوفيق (wish me luck) هههههه بعد شيكدر يكول وحاول يكون جوابك مقارب لهيج ويفضل ان ما تكول رايح ادرس لو اتونس....بالمناسبة شغلة متهدد وما ادري شنو خلي يولن لان محد كال اي شي عنهه لا اني ولا همه
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: vincenzo في 16:28 27/06/2010
ملاحظاتي: 1- الباص ما يجي قبل الثمانية (زائد ناقص ربع ساعة) بس لان المقابلة هاي مصيرية حاولوا تروحون اوكت بس اللي يصير عنده قدر وميوصل وتروح عليه فاحسنله لا يوصل ويرجع يدزلهم ايميل وراح يحددولة مقابلة بكم يوم يعني مو شغلة صعبة لان همه يعرفون ضروف بغداد 2- اللي يصيرله قدر وميلحك يجيب ضرف من الدي اج ال فمو مشكله يسووله مقابلة وعلى حسب الاصول بس يكولوله تروح تاخذ ضرف دي اج ال ورة المقابلة وتسوي سكان للوصل وتدزلنياه بايميل ولا تنسون للدي اج ال اخذو ورقتين وحدة ام ال10 دولارات و وحدة ام اليك ترة ما عدهم مانع ياخذون منكم 25 الف اذا عراقي (سعر ال11 دولار بالسوك بحدود ال12 الف وربع) 3- عدم المحكومية اذا عندك قدمهه بس اذا مشوك بالان في سي بدونهه مثلا اذا لاعب لعبة مثل لعبتي وياهم اللي ذكرتهه باكثر من مكان وموضوع فابد لا تشيل هم لان ابد ما يدققون او يشددون عليهه ولحد الان ما مستوعب ليش ابو رامي مثلا كالوله دزلنياهه بايميل وعطلوه 4- اذا مو كلش قوي بالانكليزي فاحجي وياه عربي فصحة ترة العامية يومية تدخل بيهه كلمات جديدة وهذولة ما متابعين فما راح يفتهمون عليك ويمكن اكو مترجم بس ما لاحظت هالشئ 5- جماعة الاس اي في همه اللي يخلصون اول الناس والباص يرجعلهم وبعض الاخرين اللي مكملين بالدعش تقريبا (طبعا هذولة الشغلات الاخرى اللي بسرعة يخلصون ويطلعون ويانة بباص الدعش خطية كلهم مرفوضين) 6- جماعة الاس اي في مينطوهم اي علامة قبول او رفض بس هو المعروف انه فد 99% ياخذون الفيزا بس يبقة شكد تطول وهاي هم مينطون اي معلومة عنهه ويفضل ان ما تسأل عن هالشغلتين حسب نصائح اللي قبلنه بينما حالات التفييز الاخرى لا يكولولهم مقبولين لو لا بالسفارة وبنفس يوم المقابلة (على الاقل المرفوضين لان شفتهم بعيني)
في ردي القادم راح احجيلكم على حالات شفتهه انرفضوا او انقبلوا مو اس اي في واحتمال اتذكر بعد ملاحظات
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: ابو الحسن في 18:08 27/06/2010
عاشت ايدك عمي فنجوزي هذا خوش معجم وفاموس لمقابلة اس اي في بي كلشي وكلاشي من كحة ونزة وفزة ونشلة يعني خصم الكلام مثل الابرة مال جمعة الاحمر المظمد اللي بالطوبجي بس تاخذها لو اكبر فلونزا تفك بنص ساعة الله يسهل عليك عمي ويينور طريقك مثل ماكاعد تنور طريقك اهلك بالمنتدى ابو الحسن - ماليزيا
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: BaghdadGhost في 18:13 27/06/2010
الف مبروك و ان شاء الله تستلم الفيزا بدون منغصات و تاخير ,,,,,, ولو على الي سويته بالمنتدى ربك يمكن راح يسخر الانس و الجن و يصير استلامك للفيزا بسنه 200102000201 ميلادية هههههههههه
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: heart_0f_baghdad في 18:26 27/06/2010
اي علخيررررررررررررر يمعود يوم الفيزا بس سافر :P :P صارلك شكد بالموفقيه 8)
[/color]
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: vincenzo في 19:47 27/06/2010
شمسوي بالمنتدى؟؟ ??? ??? ???
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: *Sandra* في 21:26 27/06/2010
مبروك اخوية فنسنزو وان شاء الله يوم أستلامك للفيزا والسفر بالموفقية
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: koka75 في 22:59 27/06/2010
مبروك اخوية العزيز vincenzo ونشالله تستلم الفيزا باسرع وقت انا قابلت يوم 14 بشهر السادس ولحد الان انتضر الفرج ونشالله مايطولون علينة والموفقية لجميع الاعضاء اخوية صحيح ورة اسبوعين اذا ماستلمت الفيزا لازم اندزلهم ايميل نستفسر عن الفيزا مثل ماكالو بقية الاعضاء لو لا نبقة بالصبر والانتضار والنة الله سبحانه وتعالي شكرا اخوية عالشرح المفصل اخوووك ابو محمود
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: تايه في 16:27 28/06/2010
حبيب قلبي بالخير و ان شاء الله السفر القريب اعذرني كنت مشغول الفترة الفاتت فما كان فرص و اني مقصر اعذرني مرة ثاني اني شسوي هسه اطيع موضوعك يمكن يفيدني بعد سنة (ان شاء الله) بلكي تصيرلي مقابلة تحياتي القلبية
اخوك تايه
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: angie-dawood في 17:02 28/06/2010
الف مبرووووك اخي فنجنزو انشاءلله يوم نبارك استلام الفيزا ربي يوفقك بكل حياتك موفق باذن الله اخي
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: ســـرى في 18:55 28/06/2010
((جماعة الاس اي في مينطوهم اي علامة قبول او رفض بس هو المعروف انه فد 99% ياخذون الفيزا بس يبقة شكد تطول وهاي هم مينطون اي معلومة عنهه ويفضل ان ما تسأل عن هالشغلتين حسب نصائح اللي قبلنه بينما حالات التفييز الاخرى لا يكولولهم مقبولين لو لا بالسفارة وبنفس يوم المقابلة (على الاقل المرفوضين لان شفتهم بعيني)))
حالات الفيزة الاخرى هم مو كلهم يكولولهم بنفس اليوم وهذا عن تجربة فيزة علاج هم ياخذون منهم ظرف الDHL ويكولولهم انتظروا خبر من عدنا بس الجديد انه ممكن تاخذ جوازك منهم ومن يريدون ينطوك فيزا راح يدزون عليك تودي الجواز بس الحالة اللي اعرفها مو اس اي في بس اللي ادري بيه يصير تاخذ جوازك اذا محتاجه والله اعلم.
ما كتلك مبروك لان انت ما تقبل.تحياتي
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: kunda في 00:05 29/06/2010
الف مبروك اخويا الجبير فنجنزو وان شالله الفيزا باسرع وقت تستلمها يارب ترة اني متابعك ومتابع اخبارك من زمان من قبل ماتستلم الكوم ابروفال الف الف مبروك مرة ثانية ولو اليوم شوية حسيت بخيبة امل وماردت اذكر هالحادثة كدامك اليوم التقيت بشباب اثنين راجعين من امريكا وهمة سافرواعن طريق الاي او ام واحد باقي شهر ونص والثاني 3أشهر وحجوا حجي مزعج عن امريكا كرهوني بعيشتي وهذه اول مرة التقي بناس رايحين على الاي او ام
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: مظلومه سوادي في 08:54 29/06/2010
اهوووووووووووووووووووووو
هاي شلون طلابه
مو الرجال يكول مااريدن تهاني ومبروك ومن هالسوالف شخبصتوا للرجال
عالعموم
مبروك وشايف كول الخير ;D
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: suzie83 في 19:41 29/06/2010
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: vincenzo في 00:56 03/07/2010
حبيبي كوندا هذولة مو شكول امريكا مو هيه امريكا هم متكعد راحة وكامت تلفي شكول شكول ولا يهمك
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: wesam986 في 19:27 13/08/2010
عاااااشت ايدك على الموضوع يا اصيييييييل ويارب الحصول على الفيزا باقرب وقت
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: vincenzo في 19:42 13/08/2010
عمي يا فيزا؟؟ حيــــــــــــل الفيزا ورى يومين من المقابلة صدرت وصارلهه شهر ونص بجيبي
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: Ali from baghdad في 18:55 14/08/2010
السلام عليكم
ولو الموضوع على رأيك (حييييل كلش قديم) بس انكول الف مبروك ، وهسه الخطوه الجايه:
شنو الاشياء الي ناوي تاخذها وياك ؟ وين ناوي اتروح ؟ شوكت انشالله السفر ؟ شنو الاشياء الي ناوي تسويها قبل ما تطلع يعني شنو الي ح تحضره ؟؟؟
ولو هيه تختلف من شخص لاخر لان كل واحد حسب وضعه و وجهته و الي ناوي يسويه هناك و عمله المشتغله قبل و شهادته ، ف مستحيل اكو اثنين ح يسون نفس التحضيرات ، بس اقلها نستفاد من تجربه كل شخص ...
وشكرا لكل مساهماتك و مساهمه كل الاخوان الي ساعدت هوايه اشخاص بهذا المنتدى
علي SIV مرحله بحر الظلمات
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: vincenzo في 19:41 14/08/2010
حبيبي علاوي اكو موضوع عام عالتاخذه والما تاخذة وياك بيه هواي افكار وانت اخذ اللي يفيدك وفكر بغير شغلات تخصك انت وحدك واهم حاول تكتبهه هناك طبعا الموضوع هو موضوع علاوي ثاني هو Baghdad Ghost اسمه القلاقيل تلكاه بالمواضيع المهمه واني منزل بيه كم رابط لموضوع ماثيو قبله ومواضيع سلاما للعراق
رايح لنيو جيرسي السفر من الاي او ام يحجزولنه من الاشياء اللي سويتهه انه اخذت كل انواع التزكيات من الاساتذة اللي مدرسيني ومن الكليات اللي اني جنت مدرس بيهه وطلعت جداريات و وثائق وسيلابس Syllabus لكل شهايدي واجازة سياقة دولية وضليت فترة ادور طريقة اشحن بيهه كتبي واوراقي وبعض القلاقيل الى ان لكيت وشحنت قسم وبعت سياراتي وكلشي عندي ممكن ينباع واتفقت وية ابو جمسي ياخذني لعمان وهو فد واحد عرف وثقة وسبع يكدر يعبرنه احنه وغراضنه وبسعر مناسب وطبعا اشتريت بعض الشغلات اللي ممكن تفيدني هناك مثل بعض الادوية والجنط شغلات لخ
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: Ali from baghdad في 20:11 14/08/2010
فنشنزو
شون شحنت الكتب و المحاظرات ، اني هم دا افكر اخذهن ويايا لو لا ، فكرت بيها ، الكتب المقرره ممكن بعد بحث وتمحيص حيل قوي بالانترنت انو الكاها ، خصوصا اذا ردت اخذ ال text book مال الكليه فهنه كلهن طبعات قديمه وما تسوى ، بالنسبه للمحاظرات والي هيه ملخصات الطالب ، ذني يسون وزن ، وهماتين لما صفنت بيهن ، كلت اذا ح ادرس هناك او اعادل الشهاده ، اول وتالي راح استعير كتب من المكتبه ، وابدي الخص من جده وعتيك ، ولو محاظراتك القديمه تكون على ايدك وكضيت بيهن ساعات خصوصا قبل الامتحانات (ولو الواحد يحجيها امانه هيه يا دوب اسبوع قبل الامتحان النهائي).
شنو الي اخذته من كتب ومراح تكدر تلكاه بالانترنت او تستعيره من المكتبه او حتى تشتريهن مستعملات بسعر البلاش.
طبعا كل اختصاص يختلف عن الثاني ، واتصور الهندسه خصوصا كتب ال Basic science حتكون مفيده الك وما تحتاج تشتري غيرهن.
موتنسى تكوللنا شون شحنتهم ، على يا شركه ، وابيش الكيلو ، وليش اختاريت شركه الشحن هذي ؟
شكرا Vincenzo لمساهماتك
علي SIV مرحله بحر الظلمات
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: vincenzo في 20:33 14/08/2010
حبيبي هيه مو هاية الشغله وانما اني عندي هواي محاضرات اني مسويهه لطلابي وكتب عتيكة تقريبا كلهه بالانكليزي وهاي متلكاهه حتى بامازون لان ينطوك حديث واني ما احبه واني عندي الاف الكتب الالكترونية يعني مخزونة بالحاسبة بس ما اقتنع بهاي السوالف لان هم تأذي العين وهم الكتاب الورقي من تلزمة بايدك يلله تفتهم وتصارع وياه عالفراش وتشخبط عليه وتكتب ملاحظاتك وهذولة سنين وياي وحافظ صفحاتهن وثم خوما اول ما نروح واحنا ما نكدر نجك راسنة بالبداية انوب نلتهي ندور على كتب مثل مالتنه العفناهه بالعراق شنو هالشدة؟؟ وعلى كولتك اللي كاتبهه بايدك ما تتعوض ولو اني شوية اختلف عنك لان دائما جنت متفوق ومن الاوائل ومتونس على اختصاصي وجنت طول السنة اقرة وابحث وادور من الكتب الجدا مهمه اللي لازم اخذهن وبيدي وعلى كلبي هنه قاموسين زغار مورد عربي-انكليزي و انكليزي-عربي وقاموس اوكسفورد هذا الازرك وقاموس ويبستر انكليزي-انكليزي بكد اوكسفورد اجاني هدية بوكتهه من امريكا وسعره فوك الورقة وكتب الجي ار اي والتوفل وكتب مثل Tensor Analysis by Sokolnikoff لان دا اقره بيه هسه وكتاب Digital Control for embedded systems designers وكتاب Sheldon Ross-A First Course in Probability وكتاب P.B.Lathi-Digital & Analog Communications وكتاب Fredrick Rief-Statistical and Thermal Physics وهذني العزاز كلش غير كم ملزمة مال مراجعات عن المايكروكونترولر والبي ال سي والC++ وال Visual C++ وغيرهه
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: Ali from baghdad في 20:42 14/08/2010
طيب وطريقه الشحن رحمه على والديك
اذا ب فدكس فهذي تاخذ 45 دولار على الكيلو اذا ب DHL اظن ارخص بشويه بس هما غاليه اذا بال TNT و Starlight ذوله حبايه اقل بس هم يبقى المعدل عالي
اذا على البريد العراقي ، فسالت مره واظن كان سعرهم اقل بهواي من شركات الشحن بس هم كان شويه عالي
اذا على ال APO فهذا ذهب ، لانه رخيص كلش ومضمون ، فلازم احد عرف جوه علمود يساعد ومرات صعبه لان العرف تقريبا كلهم اختفوا
فشنو الحل بالشحن يا اخي
افيدنا الله يسهل امرك
علي
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: vincenzo في 21:03 14/08/2010
دزيتلك عالخاص لان اكو شغلات متنحجي هنا
العنوان: رد: مقابلة الفيزا ببغداد...تفاصيل وملاحظاتي
أرسل بواسطة: ROCK في 01:00 15/08/2010
مبروك فنجوز .. يرادلك من توصل هناك بالسلامة تجمع مواضيعك بكتاب تسميه (( روح بفالك وهاجر .. تره محد يفيدك باجر )) تأليف ابو الفناجز ..