ankawa
منتدى الهجرة واللجوء => الهجرة و واللاجئين => الموضوع حرر بواسطة: Wissam London في 14:37 16/07/2010
-
السلام عليكم
شباب بنات
اني وصلت مرحلة ال DS 230 ولازم اختار ولاية هسه؟؟؟
الي عدهم خبره والي وصلو بالسلامة لامريكا بلكي يساعدوني بهذا الشي؟؟؟
تحياتي للكل بالموفقية
-
وسام ...اختيار الولاية يحددة الكفيل مالتك ...وين موجود ..واذا ماعندك كفيل فاختيار الولاية راح يكون بيد المنظمة موبيدك ..عالعموم ..اشوف تكساس هي الافضل
تحياتي
-
اخوية وسام مثل ما كال اخونا هيثم انت لو ما تقدم عالبنفتس وتروح على حسابك معناها تروح باي ولاية تريد.او عندك كفيل ويوقع عالاوراق اللي تطلبها المنظمة وذاك الوقت تروح يمه.او بدون كفيل وبهيج حالة المنظمة تختارلك الولاية.تقبل تحياتي.
-
اخي اولا اختار ولاية عندك بيها اصدقاء او معارف تره هاي شغلة كلش كلش مهمة ولا تكول محد نبهني عليها حتى لو باسوء ولاية كانوا كاعدين ثانيا في حالة عدم وجود اصدقاء او معارف و اذا انت ماعندك عائلة فراي بان تروح للولايات الي بهيا حركة قوية مثل نيويورك او كاليوفورنيا او شيكاغو صحيح اغلى من بقية الولايات بس ايضا الاعمال الي بيها يدفعون الك اكثر يعني نسبة وتناسب على الاقل واحد يشوف ناس نظيفة ومثقفة مو مثل الولايات الجنوبية
-
منون اخواني على الرد
اني اختاريت تكساس اوستن
شنو رايكم.عندي بيها اصدقاء وهم كالو زينة
تحياتي للكل
-
مرحبا اخوان اذا ماكو زحمة ممكن تفيدونا بمعلومات عن ولاية تكساس من حيث المساعدات والجو والعمل ولكم كل الشكر والتقدير
-
newcomer
كلامك صحيح 100%
بالولايات الجنوبية لعبان نفس
الافضل طبعا نيويورك شيكاغو - واشنطن - لاس فيغاس واكو هم جم ولاية يعني هاي الولاية الي يروحلها عايش ملك
لان معظم السكان امريكان مو مثل البقية مكسيكي وصوماي وانت طالع
-
السلام عليكم
اخي العزيز بالتوفيق انشالله وربنا انشالله يسهلها عليك سواء كان بالشمال او بالجنوب ، مثل مااقترح بعض الاخوان، روح للمكان الي عندك بيه صديق او احد عرف ، علمود اقلها التوجيه والنصح بالبدايه ، ولو الواحد يكول حجايه للامانه، اتصور لو بالاسكا و اكو بيها احد من الاخوان الي بالمنتدى ف مراح يقصرون وياك انشالله ، ولو اني بعدني ما مسافر بس الي شفته من بعض الاخوان انو الانسانيه وروح المساعده و حب الخير موجوده بيهم ويساعدون باي طريقه ممكنه، وصدكني اذا انته رايح علمود تعتمد على نفسك فكل الي راح تحتاجه هو كلمه تشجيع بسيطه وانشالله حتى لو حيطان اسمنت (هسه تكول شنو عدنا عماله) كدامك راح تفلشها و توصل للغايه الي هيه راحه اهلك و استقرارهم. وشي اخر يا عمي ، هيه صح اسمها دوله ، بس تره هيه بالواقع قاره بكاملها ، ما عجبك وضعك بفلان ولايه جيك امورك وروح لغيرها ولو اذا وياك عائله ف الانتقال يكون صعب ، بس تره مو اصعب من الانتقال من منطقه الى اخرى ببغداد ، هناك (اتصور وحسب ما انشوف بالافلام وما حجولنا اهلها بالشغل) انو الانتقال من مدينه الى مدينه اخرى او ولايه اخرى مو كلش صعب .
بالنسبه الي ، طلعلي ولايه داكوتا الجنوبيه بالبدايه ، سالت عليها كلولي انو الثلج يوصل الى نص متر ، فرحت كلت وداعا للحر ، صفن عليه واحد وكلي انته ساكن قبل بمنطقه ثلجيه ، جاوبته لا ، كلي يعني عايش طول حياتك ببغداد ، طيب شون تريد راسا اتغير الى مكان الثلج بيه نص متر ، روح للجنوب بالبدايه ووراها لما جسمك يتاقلم على اقل من 50 مئوي الي انتوا على مدار السنه تقريبا ، ذاك الوكت ابدي اصعد للمناطق البارده ، طبعا الاخوان ح يكولون لعد الي بالسويد شنو يسوون يبطلون ، الجواب طبعا لا ، بس اكو فقره ، هاي لاول مره تتاح للعراقي ان يطلب لجوء او هجره و هو كاعد ببيتهم وان يختار الولايه في بعض الحالات ، كل الدول العربيه تتمنى هذا الشي ومعظم العالم النايم او الثالث يتمنى هذا الشي ، هيه فرصه متاحه وشوف الكل لازم ما يضيعها .
طبعا اني حسب نصيحه الولد الي كان ويايا بالشغل ، اختاريت تكساس ، هيوستن ، الحمدلله لكيت احد عرف بيها بالصدفه ، ولما جربت ادور عن معلومات عنها شفت انها مدينه قريبه من الساحل ، يعني حركه تجاريه يعني شغل ، شفت انو بيها رؤو اموال ضخمه ، شركات نفط و شركات عملاقه اخرى ، يعني فرص عمل اكثر ، طبعا همه ما ينتظرون حظرتي علمود انقذهم من الازمه الماليه ، بس الفكره ، ما طول اكو حركه تجاريه ضخمه ، يعني اكو عده اشغال اخرى بالمدينه ، مو مدينه نايمه مثلا او هادئه لدرجه السكون ، غير انو بيها حوالي 4 او 7 مدن جامعيه على مااتصور لان الصراحه دورت بوكتها وما بقى ببالي على مجموع الجامعات بس اذكر انو بيها كذا جامعه وهذا مشجع ايضا ، طبعا همه يمكن بكل مدينه اكو جامعه ، بس الفرق انو ذني جامعات نوعا ما جيده ، وترتيبهن على ما اظن جيد (ترتيبهن على جامعات امريكا).
اكيد المدن الكبار او وسط البلاد يكون احلى ، طقسه احلى ، ناسه عمليين اكثر ، فرص عمل اكثر ، بس بالبدايه اختار شي بسيط ، ووراها روح للشي الصعب والي يحتاج ركض على مدار الساعه ، هذا الي اتصوره بالمدن الكبار ، الساحل الغربي مثل كاليفورنيا او لو انجيلس او الساحل الشرقي مثل واشنطن.
طبعا هذي نصيحه شخص مثلك كاعد ببغداد ، فمعلوماتي تكون قليله ومن حجايه فلان و من قصه فلان ، تبقى الاهم هو نصيحه الموجودين هناك ، والاهم من هذا كله ، رأيك انته لما توصل هناك وتشوف بعينك.
واكو فد شغله اخي العزيز، هو الي يعبر 3 قارات و محيط و بحر ، تصعب عليه تغير ولايه لما يوصل ويستقر ، توصل انشالله بالخير وربنا يوفقك للخير و يسهل امرك.
علي SIV مرحله بحر الظلمات
-
اخوية علاوي ممنون جدا ومثل كلت الي متصرفله الشغلة يغير لغير مكان خاصة اني بحدي يعني اسهل من ان تكون عائلة وياي
مشكورين شباب والله يسهل للكل يارب
-
اخويه اني رايي الشخصي مع احترامي للجميع .. روح اما ولايه نيويورك او كلفورنيا علاقل تظمن مساعدات مستمره بكول الاحوال ونظام الويلفير موجود بس بهالولايتين فقط
-
نيويورك وبس ولا تتورط بغير مكان
-
مثل مكالو الاخوان نيويورك وروح وانت مطمن
-
اصعب مرحله هيه مرحله اختيار الولايه
لان ماكو ولايه كامله
هاي جوها حلو ومرتبه بس شغل مابيها
هاي بيها شغل بس الايجارات غاليه
هاي شغل متوفر وايجارات رخيصه بس جوها حار نار
مادري يعني صدك حيره والمشكله هاي مو يوم ويومين الواحد يروح هناك يريد يستقر يعني خو ميضل مثل البزونه يركض من مكان لمكان
واكو ولايات تريد تدرس يخلوك كليه على عمرك
واكو ولايات يخلوك مدرسه حتى لو جبير
هاي همين تخوف هل سالفه
راح انتحر من التفكير
-
اي مكان بامريكا احسن من العراق
انت بس اوصل ومادام وحدك بعدين حول براحتك
وشكرا
جوني جاك
-
اخ وسام ولو الرد متاخر بس اكلك احسنت على الاختيار لان اختاريت منطقة تعرف بيها احد و ان شاء يوكوفون وياك جماعتك ويساعدوك وخاصة في اول شهر الي هو صعب نوعا ما من ناحية التنقل الى الناحية المعنوية وبعدين انت تكدر تنتقل الى اي مكان. واكلك حضر نفسك للرطوبة لان اني هم بتكساس اتصور اطب تغسل تلبس هدوم نظيفة تطلع بره خمس دقائق علمود تشوف البريد ترجع ريحة هدومك كله زفرة عبالك جنت بسوك السمج هي كل منطقة بيها حسنات وبيها سيئات وشي اهون من شي.