ankawa
منتدى الهجرة واللجوء => الهجرة و واللاجئين => الموضوع حرر بواسطة: hon في 19:09 25/07/2010
-
عندي شهادة دبلوم مترجمة ومصدقة من وزارة الخارجية فهل استطيع ان اقدمها لمن يهمه الامر في اميريكا بانه انا خريج اعدادية بدلا من جلب شهادة الاعدادية بمنطق اني تخرجت من الاعدادية قبل ان ادخل المعهد 0 وانا عندي ايضا وثيقة
بالعربي صادرة من الاعدادية لابلاغي بالدرجات وقت ائذا وهي صغيرة يمكن وضعها في الجيب فهل استطيع ان اقدمها بدل الوثيقة الرسمية الكبيرة
-
اخوية دبلوم المعهد لاتعوض عن وثيقة الاعدادية الرسمية.انت بعدك بالعراق؟ لو هسه بامريكا؟
-
اذا تقدر جيب الشهادة وترجمها شنو المشكلة يعني؟
-
الاخ كوندا اني في خارج العراق يعني اكدر اوصي واحد يدزها الي لاني سمعت انه مينطوها الا يجي صاحب الشان نفسة لين بيها طبع اصابع فصدك ه\ا الحجي
-
لا اخوية يصير تسوي وكالة ويطلعولكياها وترة وثيقة الاعدادية كلش سهلة وتطلع مترجمة همين.
-
اخوية العزيز ترة الشغلة موكلش سهلة بس سهلة اني سويتها قبل ما اسافر و طولت شهر تقريبا لانه صار بيها بعض المشاكل ورح احجيلك الي صار وياية
اول شي اتسوي اتروح للتربية الى مدرستك تابعة الها يعني اذا الكرخ تروح لتربية الكرخ صايرة بشارع حيفا واذا الرصافة اني ما اعرف
وين المهم تسحب استمارة اسموها استمارة بعدها تاخذها وتروح مباشرتا الى المدرسة الى انت متخرج منها توصل للمدرسة شوية
تذكر الايام القديمة وبعدين تدخل على الكاتب اتكلة املي هاي الاستمارة رح ياخها ويكتب درجاتك الى ماخذها بالسادس الاعدادي طبعا اتاكد من الدرجات وية المحاسب وتاكد من الاسم و ااكد جيك قبل متطلع من عندة جيك الدرجات والمواليد والاسم لانه غلطو وياية
ومن رحت للتربية رجعوني بعدين ارجع للتربية ماخذ وياك ورقة الدرجات وطبعا لازم بيها طمغت المدرسة ارجع لل عرضحلجي حتى
ارتبلك اياها وراها ادخل للتربية طبعا ها الورقة الى اخذتها من ال عرضحلجي اسمها شهادة السادس لغرض التصديق والترجمة المهم
ورها ادخل للتربية و حتشوف الشباك الى رح اتراجع يمة رح اتذب المعاملة بعدين رح ياخذون منك المعاملة وينطوك موعد تجي تستلمها
حوالي اسبوع بعدين وره اسبوع ترجع للتربية اول شي تاكل لفة فلافل وتشرب جاي برة وترح تدخل تلكه استمارتك موقعة من قبل
المدير العم حسب الاصول تاخذ الورقة وتراجع شباك لاخ هم ما ادري شرح اوقعون بعدين اكلولك روح للذاتية طبعا انت مثل البطل متعرف
هي وين صايرة شرح اتسوي حبيبي اتروح الى اقرب فراش موجود وتسالة هو راسن رح يعرض خدماته وكلك تعال وياية...... تروح وياه
ودخلون بغير بناية وهو رح يمشيلك بيها انت كلشي متسوي وره شوية رح يطلع طبعا من يطلع مخلص المعاملة انت رح اتصير حباب
وطلع الورقة الزرقة ام الخمس الاف وتحطها بجيبا اليسرة مو اليمنه لانه يزعل ترة هههههههههه ............المهم اخوية وراها تتوجه الى
وزارة التربية او هي احدى مديريات وزارة التربية قبل الساعة 11 توصل زين اخوية لانه همة يستلمون الطلبات من 8:30 الى ال:11
طبعا هل مرة تاخذ وياك نسخة من الجواز والغرض من الروحة الى هناك هو حتى اترجم الوثيقة طبعا اول ما توصل رح تلكا الشعب
العراقي كلة واكف بسره رح تتونس اخوية اول متشوف المنضر انت شتسوي رح اتكمل كبل لانه هو هذا ما الة علاقة بالشغلة الى جاي
عليها رح تدخل بفد بناية اول متدخل على ايدك اليسرة رح اتشوف فد حايط خشب بي فتحة مدورة طبعا انت نتعرف هذا شنو رح تتقرب
يم الفتحة رح تلكة فد واحد رجال جبير كاعد وكدامة وصولات فرح تعرف انو هذا هو المحاسب رح اتكص وصل وتكولة عندي شهادة لغرض
التصديق والترجمه رح اكلك انطيني 15 دينار بسرعة و متدري ليش بسرعة...... على العموم تاخذ الوصل والفايل الى بي الشهادة
ونسخة جوازك المستنسخة ملون وتروح تدخل بعد رح اتشوف فد غرفة على ايدك اليمنه بيه كراسي وعالم كاعدين تدخل الغرفة رح
اتشوف غرفة بداخل هاي الغرفة بيها شبال تروح للشباك رح اتشوف موضف تنطي المعاملة ورح اكلك تعال بعد اسبوعين حتي تستلم
الوثيقة ورة الساعة 11. المهم ورة اسبوعين لتروح روح ورة 15 يوم يعني اسبوعين ويوم رح اتشوف ان شاء الله الوثيقة خلصانة.....
منتهى الموضوع اخوية روح جيبلك استكان جاي وتعال كمل قراية الموضوع وين وصلنا ها لمن اخذت الورقة طبعا هم رح ادققها كلها من
البداية للنهاية واذا اكو اي خطا بيها ترجعها خصوصا اسمك الى بالانكليزي زين اخوية ورها اذا طلعت صحيحة ان شاء الله تا خذها
وبوجهك للخارجية توصل للخارجية........ التصديقات صايرة بمكان بناية تجنيد الكرخ القديم تدخل والمعاملة وياك رح اتشوف واحد لابس
قاط رح اكلك اتفضل اخوية كولة عندي معاملة تصديق رح اشوفها ويكولك رح لفلان شباك تروح تلكة موضف لاخ هم لابس قاط ومتنك
على العالم تنطي المعاملة وكلك انطيني 2500 دينا واذا ماعندك صرافة روح صرف وتعال فالاحسن روح وانت عندك صرافة حتى ليلعب
نفسك ......وراها رح ينطيك رقم ويكلك اكعد هنا انتضر هسة انذيع رقمك من تسمعة انت روح رح تلكا المعاملة خلصانة وراها ارجع للبيت
لانه المعاملة خلصت واخيرا واني هم تعبت من الكتابة بس تدلل علية اخوية الوردة
ملاحظة: انت وين متروح اخذ وياك المحصنات الاربعة (التموينية - الغذائية - السكن - الاحوال المدنية) ولو هي ممطلوبة بس انت تعرف
الدوائر العراقية شلون زينة اجوز على غفلة اكلك اريد ورقة الماء والكهرباء مالتكم مال الشهر الثامن بسنة 83 او وين وثيقة زواج امك
وابوك ههههههه
على العموم وره متخلص المعاملة رح تكره نفسك وتكره حياتك وتقرر بعد متريد اتشوف البلد.
مع تحيات اخوك....
Saif Moon
-
"الوثيقة ورة الساعة 11. المهم ورة اسبوعين لتروح روح ورة 15 يوم يعني اسبوعين ويوم رح اتشوف ان شاء الله الوثيقة خلصانة....."
هاي قويه ,, الله يساعدك على الكتابه اخويه
-
يمعود ماجلان هاي اني حجيتة اذا ماكو وياها اي معرقلات لعد لو احجيلك اني شصار بية جان رجعت تدرس ابتدائية يمكن ردت انضرب بالسيطرة الى يم الاعدادية وطلع اكو خطا باسمي من التربية وجار منع تجول اني ورايح دااجيب المترجمة والى اخره الى ان جبتها والله طلعت روحي.............
-
اخوية سوفي والله وعيونك لو يكولولي هذا اخر يوم بعمرك واذا تجيب وثيقة الاعدادية ونجددلك مية سنة ثانية هم ماروح اسويها عمي صدك كذب هاي كلها داجيب وثيقة الاعدادية وبالسويد اذا ماعندك جواز سفر الي هوة اهم وثيقة تعتبر هاذا الحجي اذا كنت متجنس سويدي طبعا المهم اذا ماعندك جواز سفر تحجز وتروح للمطار راح تلاكي غرفة صغيرة ومكشوفة يعني بيها يمكن ثلاث شبابيك مفتوحة يعني تقريبا احنة نسميها كشك موغرفة وطبعا تعرفون كشك سويدي شلون راح يصير وبداخل المطار راح تلكه كاعد بيه شرطي تروح عليه وتكله اني اريد جواز سفر يكلك انطيني البرشون نمبر والي هوة الرقم المدني مالتك راح تنطيهياه وورة ربع ساعة يكلك هاك حبيبي هذا جواز سفرك وانتهت السالفة هههههه هالنوبة تريدني ادخل بهالمعمعة علمود وثيقة الاعدادية والله عمي الله يساعدك شلون سويتها ويساعد الي راح يسوها من بعدك بس شنكول هذا العراق العضيييييييييييييم
اخوووكم ابو محمود
-
لا اخوية يصير تسوي وكالة ويطلعولكياها وترة وثيقة الاعدادية كلش سهلة وتطلع مترجمة همين.
سرى هاي قبل جانت سهله
هسهفد نوب امصعبيها علمود التزوير يعني المسؤولين يزورون واحنه ولد الخايبه نوكع بيها
جورجيا
-
والله يا أخوان انا صار لي 3 أشهر جاي أركض على الوثيقه و ماكو
ودع هريرة أن الركب مرتحل
-
والله اني احجيلكم بشهر الواحد 2010 سويتها وطولت يومين وخليت الاستلام من قبل شخص واستلمها ودزلياها.
-
اشو اني جبت شهاده التخرج من الاعداديه المهنيه قسم كهرباء ومحد كلبها هنا ولا احد كلي تكدر تدرس لان ردت بس اخذ الشهاده مال اعداديه ما امريكا يعني اعادلها شو كالولي روح عمي ابدي من جده وعتيك
اخويه الغالي لتدوخ نفسك تعال هنا وعلى عمرك رح يختبرووك بالاعداديه
الي يسموها
GED
وره متخلصها اترووح على اي كليه اتقدم ويكلولك الشغلات الي عدهم وتدرس بس مصرفها غالي يعني تاخذ الشهاده وانته صارف بكد فلوس شقه بأربيل
تحياتي الك
اخوك سلفر
-
والله اخت سرى اني سويتها بالظبط 10/3/2010 اظاهر وره الشهر الواحد اتغيرت الاجراءات