ankawa
منتدى الهجرة واللجوء => الهجرة و واللاجئين => الموضوع حرر بواسطة: لارا العراق في 12:55 31/07/2010
-
مرحبا بالجميع
و شكرا على هذا الموقع الحلو. اتمنى احد ينطيني النصح و المشوره. لان مدا اعرف شسوي
اني حالتي كالاتي
اني مقدمه على ال اس اي في و معاملتي ماشيه بس اني اتزوجت و سافرت لاحدى الدول الاجنبيه و ما احتاج الذهاب لامريكا لان بعد ارتباطي بزوجي مشكلتي انحلت بالحصول على مكان امن لي
يعني بعد خروجي من العراق مراح اكدر احضر المقابله مال ال اس اي في
علما اني حصلت على كل الموافقات اللازمه. يعني بالمختصر المرحله الجايه المفروض تكون المقابله و الي هي مراح اكدر اكملها
بمثل حالتي هل لعائلتي الحق التقديم على ال اي او ام ؟ جنت اتصفح موقعكم و شفت انه الي يريد يقدم اي او ام لازم عنده اي ميل رب العمل مالته الاجنبي
اني مديري سافر و ماعنده ايميل عمل رسمي, و ما اكدر اجيب بعد مره ثانيه اوراق من ال HR
ما الحل ؟؟ هل توجد وسيله للاستفاده من الموافقات الي حصلت عليها من ال siv حتى اقدم لاهلي على ال اي او ام ؟؟؟؟؟ ارجو النصح رجاءا
و لكم جزيل الشكر على المساعده و النصيحه
اختكم لارا.
-
اختي العزيزة
لايمكن التقديم للعائلة عن طريق الاي او ام الا بعد حصولك على فيزا الاس اي في ---- لان لازم ادزين نسخة من الفيزا للاي او ام وبساعتها يكدرون يفتحون قضية لاهلج
تحياتي
-
الاخت صاحبة الموضوع,
نعم تكدرين تقدمين لاهلج على الاي او ام بغض النظر اذا انتي كملتي معاملتج مال الاس اي في او لا ...
اهلج يشملهم البرنامج مال الاي او ام بس من تقدمين اوراقهم قدمي ورقه من المدير مالتج السابق
الي تثبت انتي مشتغله ويهم مو شرط HR letter...
وانتي كلتي انه معاملتج مال الاس اي في ماشيه
معناتها انتي عندج التزكيه من مسؤلج وعلى اساسها انقبلتي ببرنامج الاس اي في لان هاي من الشروط
الرئيسيه علمود يقبلوج...قدميلهم وانشاء الله موفقين.
تحياتي
Linda
-
مع كل احترامي للاخ المهندس سيوفي ..اسمحلي بالمداخله اني قدمت على الاي او ام
لاهلي واني مقدمه على الاس اي في واني قابلت بس بعدني ممستلمه الفيزا واهلي
اجاهم موعد سفر هسه وانشاء الله راح يسافرون عن فريب.
تحياتي
Linda
-
اخت لندا ---
مااتصور انه اكو هيج شي --- مو قصدي اطلعج غلطانة لا العفو --- بس اللي نعرفة انه لازم تكون حاصلة عالفيزا بصورة فعلية وبساعتها تكدر تقدم نسخة منها للمنظمة علمود يفتحون كيس جديد للعائلة
اكو موضوع قبل فترة نزل ومااتذكرة وين (يجوز بالصفحة الثانية) شخص راسل الاي او ام علمود يفتح قضية لاهلة وهو محصل عالفيزا -- ردوا عليه المنظمة انه لازم يدز نسخة من الفيزا مالتة ومعلوماتة الشخصية بالاضافة الى معلومات الاشخاص اللي يريد يضيفهم
تحياتي
-
شكرا لكل الاراء الي سمعتها من كل الاصدقاء
اني اكدر اجيب كل الركمنديشنات المطلوبه (لان بعدني محتفظه بيها ) بس الشي الوحيد الي ما اكدر اوفره عنوان مديري
مديري سافر و ماعنده عنوان عمل- بس هوت ميل او ياهو ميل - و الي هو غير مسموح بيه على اساس انه مو عنوان عمله
ممكن اقدم الchief of the mission approval الي دزولياه بالسابق من معاملة ال اس اي في ؟؟
و انتو تعرفون اني محصلت على ال جيف اوف مشن ابروفال إلا بعد الاتصال بمديري (من كان لازال بالوظيفه ) و تاكيد عملي و كل هاي التفاصيل الي تعرفوها
شكرا على اراء و مساعدات الكل
شــــــــــــــــــــــكرا جزيلا للجميع
اختكم لارا
-
المفروض تكملين السير بالمعاملة وتبلغيهم انه انتي بالبلد الفلاني وتقابلين بالسفارة الامريكية بهذاك البلد وبنفس الوقت تقدمين لااهلج على اي او ام اني متأكد انه يحقلهم التقديم عليها بس لازم انتي ايضا تكملين معاملتج واذا انتي محصلة الكوم ابروافال بعد شتريدين حالج افضل من هوايا ناس واذا انتي مستقرة بالبلد اللي انتي بيه مو مشكلة خلي الاهل يستمرون بالمعاملة
-
شوفي ست
اول شي الي اني متاكد منه انه الجيف اوف مشن مراح اصير اكسباير وانتي اخذتيها خلاص يعني ثبت ولاءك لامريكا وهاي السوالف فانت بس حصلي الفيزة وقابلي بالسفارة الي انت وين هسة عايشة اخذي الفيزة سلفري لامريكا ارجعلي بعد حصولك على الكرين كارت وهاي هي واني بالخدمة
-
اختي العزيزة كلام الاخت لندا مضبوط هاي اولا.ثانيا انتي تكولين ما كملتي المعاملة لان ما تكدرين تقابلين، اختي العزيزة من مميزات الsiv انه ممكن تقابلين بأي بلد انتي موجودة بيه بس تبلغيهم انه تريدين مقابلتك تكون بالبلد الفلاني وتمشي امورك عادي.للاحتياط حبيبتي امشي بالsiv وقابلي وبذاك الوقت تصير شغلة اهلك مضمونة اكثر ويكونون اصلا هم مقدمتلهم عالiom.
اخوية العزيز سيوفي الاخ اللي طلبوا منه الفيزا لانه اصلا مستلمها اما اللي بعده بمراحل ما قبل استلام الفيزا يقدم لاهله عادي عالiom ماكو اي اشكال بس اللي مستلم الفيزا يقدم نسخة من الفيزا.تقبلوا تحياتي جميعا.
-
شكرا جزيلا على ارائكم الحلوه, و شكرا لمحاولتكم لمساعدتي
اني صار عندي امل من كلام الاخ الي ذكر انه ممكن يعتمدون على ال chief of the mission approval على اعتبار انه ما تصير اكسباير اتمنى تمشي الامور على هذا النحو.
اذا اني ببلد امن و مستقر و عندي اقامه. اروح للسفاره شكوللهم ؟ هي اساس ال اس اي في انه الشخص حياته مهدده و يريد ملجا امن. هسه اني عايشه بامان و بعيده عن اي تهديد. اسفه اذا دوختكم ويايه.
و اني ممنونه لاي راي جديد او فكره .
شكرا جزيلا للجميع. و اتمنالكم التوفيق
لارا
-
خوية انت من اخذت الجيف اوف مشن دزي رسالة الى مركز الفيزة القومي استفسري منهم على حالتك لكن في حالة انه انت مكملة مرحلة نبراسكا وصايرة اوراقك يم جماعة الان في سي فبس ادزين رسالة تاكيد الهم وتكملين الاجراءات وتططلبين مقابلة بالبد الي انت عايشة بي وتاخذين الفيزة وهاي هي واني بالخدمة اذا تحتاجين شي
-
شوفي اختي:
1. مواطني كل دول العالم يتمنون الفيزا والكرين كارد الامريكي فما اعتقد اكو مشكله اذا سويتي المقابلة بالدولة اللي انتي بيهه وحصلتي الفيزا ورحتي لامريكا واستلمتي الكرين كارد ورجعتي للبلد اللي اجيتي منه لان هذا الكريد كارد يضمنلج دخول امريكا يمته ما يعجبج بالمستقبل وهي امريكا احسن مكان بالعالم من كل النواحي
ولو اتوقع انه راح يأخرون مقابلتج لان لازم تدزيلهم ايميل تكليلهم تزوجتي فراح يجيكون الزوج امنيا وتاخذ وقت
هاي لفائدتج واللا شكو اشتغلتي وية الامريكان وعرضتي نفسج للخطر اكثر من سنة؟؟ مو لو مو مو؟؟
2. بالنسبة للمستحق للاس اي في حتى لو كان ما مقدم او مستشهد اثناء تأديته لعمله فيحق لاهله ان يقدمون عالاي او ام ويقدمون اما التزكية اللي تتقدم للاس اي في علمود الكوم ابروفال لو ورقة اثبات التوضيف مال تايتن لو جي ال اس لو الباقين اللي لحقوهم بالبرنامج
ويفضل ان تبلغيهم وية التقديم انتي وين واصله بالاس اي في
3. في حالة حصولج عالفيزا او عدمهه فاهلج راح تركض معاملتهم ركض لان راح يسوولهم قصة تثبت تعرضهم للخطر نتيجة عملج مع الجيش الامريكي مثلا وبهالحالة انتي عابرة التجييك الامني
4. بعد اسرع الهم اذا يفلتون لاحدى الدول ويقدمون مناك
بالنسبة لسيوفي المهندس
حبيبي
الولد اللي تكول عليه قدم لاهله هو اللي كاللهم اني حاصل عالفيزا ولذلك رادوا نسخة منهه
بينما لو كايللهم ما مستلم الفيزا بعد جان يمكن طلبوا الكيس نمبر مالته بالاس اي في او الكوم ابروفال وحسب هو وين واصل
وبكل الاحوال شغلة اهله راح تركض ركض
قبل فوك السنه تناقشنه هنا وتوصلنه الى انه اذا احد افراد فد عائلة هو اس اي في فشغلتهم تصير هواي اسهل بالاي او ام
واني صارلي قرن الح عليك وعلى كم عضو هنا ان يمشون بالاس اي في مالتهم وانتو معندين
يا حبيبي اني شراح احط بجيسي اذا قدمتوا واذا لا
بس الما يعرف تدابيرة حنطته تاكل شعيرة
واللي يصر على رأية الخاطئ بدون ما يحاول يستفاد من تجارب غيرة هو بكيفة بعد
-
شكـــــــــــــــــــــــــــــرا جزيلا للكل
طبعا جنت دايخه دوخه ما صايره, عبالي مايصير اكمل معاملتي لان اني بمكان امن هسه. جنت اظن انه معاملتي خربت. بس اذا اكدر اكمل المعامله حتى و اني ببلد امن فهاي حلم ما جنت احلم بيه. على الاقل شغلة اهلي تصير اكثر ضمان.
شكرا جزيلا للكل و لاجوبتكم و ووقتكم. بس اتمنى انه يقبلون اكمل معاملتي حتى لو اني بامان حاليا.
و بالتاكيد محد تجيه فيزة امريكا او الكرين كارت و يتركه. بس اني عبالي ميحقلي اكمل المعامله. الله يسهل و شكرا جزيلا . كلــــــــــــــــــــــــش ممنونه. الله يبشركم و ييبرد كلبكم. احس مثل بير مظلم و الله طلعني منه. شكرا لكل الي شاركو و ساعدو بوقتهم و بمعلوماتهم . تســــــــــــــلمون
-
برنامج فيزا الهجرة الخاصة ما اله علاقة بمكان وجود المتقدم
لانه مو لجوء
وعدنه هنا اعضاء قدموا من دول اوربية ومن ماليزيا وحتى من كوريا وهسه هم بامريكا
البرنامج كله هو عبارة عن ايميلات واوراق بس اخر شي الواحد يقابل حتى يستلم الفيزا وهو اللي يحدد المكان الي يريد يقابل بيه باي سفارة امريكية وباي دولة
ومثل ما كلتلج
اصلا اكمالج للاس اي في او عدمه ما راح يأثر تأثر جبير على سرعة معاملة اهلج وانما هذا استنتاجنه مبني على القضايا اللي شفناهه انه يكون افضللهم لو تكملين
بس ارجع واكول اكمالج للبرنامج افضل الج
ملاحظة:
اذا بعد ما دزولج ايميل المقابلة فانتي بعدج بمرحلة الان في سي
فحاولي اسرع ما يمكن تبلغيهم بايميل انه انتي تزوجتي وسافرتي وتنطيهم عنوانج الحالي
اذا ممكن تنطينا تاريخ ارسال الباكج للان في سي؟؟؟ وشنو مراسلاتج وياهم بعدين
-
شكرا للجميع. و صارت عندي فكره واضحه اكثر. شكرا لمساعدتكم و لمساهماتكم و اراءكم و بصراحه فادتني جدا. اني عبالي السالفه خربانه و مالها حل.
الحمدلله وا لشكر على وجود منتدى مثل عنكاوا. اني رح احاول امشي بالاجراءات الي ذكرتوها و اكتب قصتي كامله اذا الله راد ومشت الامور على خير
مواعيد المعامله مالتي بصراحه مو كلش اتذكرها بالمضبوط. بس هسه اطلعها من الايميلات و ادزها. بس اني بديت بالمعامله مالتي من نهاية الشهر التاسع من 2009 و دزيت اوراقي لل ان في سي قبل شهر و نص تقريبا. مع العلم انه اني عندي تاخير صار بارسالي للاوراق لان ماكان عندي احد يسويلي المعاملات المطلوبه الي هي شهادة ولاده و هاي السوالف. فجان اكو تاخير من طرفي.
اتاكد من الايميلات و اكتبلكم التواريخ بالمضبوط ان شاء الله. و شكــــــــــــــــــــــــــــــــــــرا للجميع.
تحياتي. لارا
-
اذا شهر ونص بالان في سي فاحتمال بعد هواية عالمقابلة
بس انتي سوي مثل ما كتلج وبلغيهم بتطوراتج بايميل
-
اختنا بشري اشسويتي؟بعد كل هالشروحات؟