ankawa
منتدى الهجرة واللجوء => الهجرة و واللاجئين => الموضوع حرر بواسطة: ابو سعدون في 21:59 03/08/2010
-
احبابي العراقيين اللي موجودين بالاردن انا قررت ان اسافر قريبا الى الاردن للتقديم من هناك بعد ما اخذت بنصائح وتجارب الاخوة مع احترامي لبقية الردود والنصائح الاخرى على عيني وراسي ,, اتمنا من اي عراقي عايش بالاردن يدلني ويعلمني على منطقة سكن بيت او شقة تكون مناسبة من ناحية السعر والجيران وياريت ايكون جيراني عائلة عراقية ,, لذلك اتمنا وقبل ما اجي ان احصل على جيران عراقيين في الاردن لنو انا ما امسافر لاي دولة هاي اول مرة بحياتي ومثل ما تعرفون انا عندي عائلة متكونة من زوجة و طفلين والثالث بل طريق يمكن يولد بالاردن اذا شاء الله ,, اذا اكو احد يساعدني ويدلني على منطقة سكن تكون هادئة واهم شي بيها عراقيين اكون ممنون منه جدااااااا ,,, واتمنا من يريد مساعدة ابو سعدون ان يكتب لي ع الخاص تلفونه ام ايميله للتواصل والتفاهم او ع القليل ينطيني رقم موبايله مال الاردن حتا من اوصل اتصل بيه ونا اتشرف بكل عراقي شريف غيور طيب ولكم من الله الثواب والاحسان ومني لكم الدعاء خالص الدعاء مني ومن ام سعدون .
-
السلام عليكم اخويا ابو سعدون بالبداية اتمنالك كل الموفقية بالخطوة الجاية من حياتك .... رغم انو اني ما عشت بالاردن بس سافرتلها اكثر من 10 مرات , طبعا الله يستر على هذا البلد الجميل و الامن و يزيدهم امان و تطور , طبعا بهاي ال 10 سفرات كل الناس العراقيين الي التقيتهم هناك ناس طيبين هواي من الغني الى الفقير و كلنا فقيرين لرحمة الله , بس انتة راح تسافر و راح تسكن بمنطقة راح تحكمها ظروفك المادية يعني ما تدري شراح يصير هناك انصحك تكعد بالكاردنز لان منطقة حلوة و رخيصة نوعا ما يعني تكدر تلكي شقة ايجارها فد 250 دولار بالشهر و بيها كافة احتياجاتك يعني غرفة نوم و صالة و مطبخ , العيشة هناك تقريبا نفس التكاليف بالعراق و شوية فارق بسيط , بلد يحكما القانون و النظام بشكل كلش مرتب و حلو و الناس هناك تحب الي يحبها و يحترمها يعني كل واحد حاير بروحة و هاي اهم فقرة , لا نفاق و لا واحد يحجي على واحد , كل الخدمات متوفرة و الاخوان العراقيين هناك متساعدين بشكل حلو و ان شاء الله هم راح يجون الاخوة هم ينوك معلومات تساعدك
-
توصل بسلامهانته والعائله الكريمه
وانشاء الله اهل الخير هوايه والعراقيين تره كول وفعل
-
اخي ابو سعدون ان شاء الله اخذت القرار الصحيح وياربي يوفقك
اذا على العراقيين بالاردن فوين متروح تلكيهم جيرانك
والاردنيين هم مو قاصرين هم خوش ناس بيهم
بس انت اهم شي تختار المنطقه الي اتناسبك
اذا اتريد قريب على المنظمه اكو ضاحية الرشيد ويم اسواق السلطان قرب الطوارئ وبداية صويلح
هاي المناطق كلها قريبه على الي اي او ام
وهيه هم هادئه واسعارها مناسبه وتنفع للعوائل
واكثر العراقيين تقريبا ايسكنون بالجاردنز
وماشاء الله بالمنتدى عدد كبير منهم
وان شاء الله ميقصرون وياك
-
مرحبا
اخونا تشرفنا هنا بالاردن وتوصل بالسلامه اسألتك منطقيه لكن القدره الماليه شكد تقريبا لان هسه موسم سياحه الايجارات غاليه نوعا" ما واكيد الاخوان يلي بالاردن يأيدون كلامي اما بصوره عامه عمان الشرقيه ارخص بالنسبه لكلشي لكن عمان صغيره مو بكد بغداد اكيد وتلكي ان شاءالله واحنا الكل وياك وبيك خير وادلل يلي نكدر عليه نسوي ان شاءالله
اخوك
حمودي
الاردن_عمان
-
أبو سعدون الوردة
أهلا بيك يالأردن وأن شاء الله راح توصل لعمان بالسلامة وتشوف بعينك كل الكلام اللي ذكرو الك الأخوان والأخوات قبلي صحيح جدا...خلليني أنطيك فكرة بسيطة عن أسعار أيجارات الشقق بعمان,أنته تحتاج شقة من غرفتين نوم مو أكثر ... وأكثر منطقة بيهه عراقيين هيه ضاحية الرشيد والشقق أغلبهه بناء جديد.. بس خللي ببالك أن الأيجارات بالصيف تكون أغله بسبب موسم السياحة..وأذا توصل بعد نهاية رمضان والعيد تكدر تحصل بضاحية الرشيد بحدود 400 دولار أيجار شهري وأذا تدفع 6 أشهر مقدما تكدر تنزل شوية من مبلغ الأيجار الشهري ... بالمناسبة ضاحية الرشيد قريبة جدا عله مقر الآي أو أم بتلاع العلي...شغلة ثانية خلليهه ببالك انك راح تكعد بالأردن 6 أشهر فأكثر بأنتظار الفرج بس أكيد أنته ما راح تطول هوايه لأن أنته تقديم مباشر بدون المرور بمرحلة التقديم ع اليو أن أولا... وأحنه بخدمة الطيبين
أخوكم ------------------ زياد - أبو الحسن ( عمان )
-
مرحبا
اهلا وسهلا بيك في بلدك الثاني
-
والله ريحتوني وكلش ارتاحيت لهذه الاجوبة التي تدل على طيبة اصحابها ونشاء الله ورا العيد القادم اجي الى الاردن واشكركم من كل قلبي وتكفون والله كول وفعل والنعم منكم اخوتي واخواتي وحياكم الله مع تحيات اخوكم ابو سعدون الي حاليا سهران انتظر الماي لحد الان ما عدنا ماي والكهرب صاير مثل ترفك لايت ----- شكرا شكرا للجميع
-
اخوية هسة الاسعر مال شقق غالية لان صيف فالاسعار ترتفع من الشر السادس للتاسع و انا انصحك اذا اتريد مطقة اسعر معقولة و قريبة من الاسواق تسكن جبل الحسين و تجي بعدة الكاردنز بالمناسبة تكدر تختار بين المفروش و الشقق الفارغة طبعا هم تفرق اذا انت اتحب تشتري اثاث باسعار معقولة و بالنسبة للكهرباء تطلع ارخص من بغداد اذا احسبت فلوس المولد حيث المعدل تقريبا بين 20 و 35 دينار و الجو اهم شي كلش حلو و انشاللة من اللة التوفيق
-
الله يوفق اخونا أبو سعدون وييسر أموره ويارب يقدم ووراها بيوم تمشي أموره وكل اللي مقدمين باذن الله تعالى
والله ينصر الأردن صراحة جزاهم الله خير فتحو ديارهم النا وكذلك سوريا ومصر
على الأقل أحسن من باقي الدول العربية ولكن الله يحفظ ديار كل المسلمين ويارب تفرج النا
-
اخي ابو سعدون انت ان شاء الله اذا سافرت اجر شقه لمدة شهر واحد
وبخلال هذا الشهر راح تتوضحلك كل الامور وتكدر تلكي شقق ارخص واحسن
واتشوف وين المكان الزين الي ايناسبك
وحتى بعدين تاخذ قرار وين تستقر
وحتى اذا اخذت شقه فارغه هم عندك مجال اتثاثثها بخلال هاي الفتره
وبالنسبه للاسواق موجوده يم كل مجمع عمارات
والحياة هناك سهله ومريحه واذا اترتبون مصرفكم اتعيش بنفس مصرف بغداد بس على ارتب وانظف
-
انا تركت عمان قبل سنه وصراحه وين متروح تشوف عراقيين خاصة في الجاردنز و شميساني وتلاع العلي.
راح تشوف واي مطاعم عراقيه ومحلات لبيع الصمون والخبز والمواد العراقيه.
ممكن تأجر شقه لاول شهر حتى تفهم الفلم شنو . وممكن تأجر في اسكان (هيا عمان) اللي صاير بتقاطع شارع المدينه المنوره وشارع الجاردنز ويسموه(دوار الواحه) وهي يإيجار يومي او اسبوعي لكنه مكلف قليلا.
بصوره عامه عمان الشرقيه ارخص من عمان الغربيه واللي هي المناطق الراقيه مثل (عبدون و الصويفيه).
وهنالك مناطق شعبيه اكثر مثل صويلح و وسط البلد.
الاعتماد الاول يكون على العراقيين الموجودين في عمان على ان يساعدوك بالنصيحه والتنقل والبحث عن شقه و سياره.
ثم اعتمد كثيرا على الجرائد الدعائيه مثل الوسيط و الدليل وغيرها لان فيها اعلانات للشقق وركز على كلمة (من المالك ) كي تتصل بالمالك او المؤجر مباشرة.
اذا لم تعجبك الطريقه فيمكنك الذهاب الى مكاتب تأجير الشقق وهي مكاتب منتشره بشده واجبها ايجاد شقه لك وتاخذ عموله على ذلك.
عند المرور بأي مطعم او محل عراقي فلا ضير من السؤال عن احوال المنطقه واسعار الشقق فيها.
وانشاء الله الكل يكونون حاظرين للمساعده.
اخوك غسان
-
تذكرت اكو مقهى عراقي يسموه باب الشرجي اسأل عنه وراح يودوك عليه تلقى بيه كل اخبار العالم ويفيدك من ناحية اجار الشقه والمطاعم العراقيه وكل اخبار الجاليه العراقيه في الاردن.
-
ونسيت اذكرك بمسألة اللهجه الاردنيه:
لازم تتعلمهه بأقرب وقت (حيييييييييييييييييييييييييييييييييييل تفيدك) والعراقيين بعمان يعرفون شنو قصدي وخاصة من تصعد تكسي وانته متندل.
لكن ماعدا ذلك الحياة هادئه في عمان.
-
lمرحبا اخواني بالبداية اكول للاخ ابو سعدون يمكن راح اوصل عمان قبلك لان اني بنهاية شهر الثامن راح اطلع لعمان
واني هم نفس احوالك والاخوة الله يباركهم ماقصروا بشي وانشالله يارب يفتحها عليهم عن قريب
اكول اخ غسان اذا تسمحلي اسألك سؤال هذا المقهى اللي اسمه باب شرجي وين صاير بالضبط
وهاي شنو شغلة نتعلم اردني ليش اكو قفاصة مثل سوريا لو شنو الفلم؟
-
الى كل الاخوة اللي شاركوني وقدمولي النصائح لن انسى فضلكم والله رفعتو راسنا ,,,, اخي غسان الاشقر انا بعثت اليك اضافة ع الياهو ارجو ان تقبلني صديق واخ دائم ,,, و شكو ماكو بعد ؟
-
اكول اخ غسان اذا تسمحلي اسألك سؤال هذا المقهى اللي اسمه باب شرجي وين صاير بالضبط
وهاي شنو شغلة نتعلم اردني ليش اكو قفاصة مثل سوريا لو شنو الفلم؟
عيني ابو فله
بالنسبه للمقهى فهو على شارع خلدا ومن توصل انطيك العنوان بالمضبوط وادزك على الرواد الاصليين للمقهى وهمه ناس جدا طيبين.
وبالنسبه لتلعم اللهجه فهناك البعض من سواق التاكسي يعتقدون ان العراقي يجلس على كنز من الاموال وميهمه يصرف لذلك اذا كان طريقك يطول ربع ساعه فهو يوصلك بنص ساعه او اوكثر لان حسابهم على العداد وببدال الدينار ياخذ منك عشره.
-
الى كل الاخوة اللي شاركوني وقدمولي النصائح لن انسى فضلكم والله رفعتو راسنا ,,,, اخي غسان الاشقر انا بعثت اليك اضافة ع الياهو ارجو ان تقبلني صديق واخ دائم ,,, و شكو ماكو بعد ؟
اخويه ايو سعدون ضفتك وتتدلل
-
اخويه ابو سعدون العزيز اكو في منطقه الهاشمي الشمالي شقق مفروشه بسعر تقريبي 150 دينار اردني والهاشمي الشمالي نصه عراقيين او منطقه زينه او كلشي بيه من اسواق مدارس مستوصف هلال احمر مجاني للعراقيين فقط كاريتاس ايضل للعراقيين فقط والكراج الرئيسي قريب عليك حته متحير في المواصلات والمنطقه مو غاليه تره الكاردنز غاليه وهيه عمان الغربيه كلش غاليه والفلس الزايد ايفيدك اهنا تره العيشه اذا اشويه متلزم ايدك تره بهذله اني اخوك وانصحك من كل كلبي والله لان لا شغل ولا عمل او هاي الصراحه وشكرا اخويه
-
الله يسهل عليك اخويه ابو سعدون وتوصل بالسلامه
ومثل ما كالو الاخوان وحتى اكو بجبل الحسين وصويلح ايجار بسعر 100 دينار اردني يعني حسب انت وين تحب تعيش اكو الغالي واكو الرخيص والاثاث مو اله من الجديد لان انت كلها كم شهر وتسافر انشاء الله يعني تكدر تاخذ من الاثاث المستعمل
اما بالنسبه للحجي الاردني مهم لان اني صار 6 سنين بالاردن ومن يدرون بيه عراقي ياما يحجون بالسياسه ويضوجوك او سواق التاكسي يقفص عليك ومو كلهم بس اكو هواي مو خوش اوادم
يعني مره بس ابو التاكسي عرف بيه عراقي من الكلام ومن ردت انزل انطيته 10 دنانير حتى ادفع وكتله رجع الباقي جان يكلي انت ما منطيني شي ونكر ويكول انت انطيتني بس ليره وانت قيس
الله يكون معاك واي شي تحتاجه احنه من قصر وياك وهواي راح تلكه عراقيين يساعدوك
-
السلام عليكم اخوان شلونكم ان شاء الله بخير يارب اخوان اي مساعده في الاردن اني ان شاء الله حاضر باي شي اكدر عليه ان شاء الله ما اقصر ولو كل الشباب ان شاء الله متقصر بس اني كوننا قديم بعمان من 2006 لذلك اي امر خدمة لحد يتردد بطلبها وان شاء الله ربي يقدرني على خدمة اهلنا بكل مكان ( ان الله في عون العبد مازال العبد في عون اخيه ) واني اسف اخاف هاي الفترة مدا افتح نت قليل ومقصر اتجاه كل المشاركات وخاصة كروب الي مقدمين من عمان فارجو المعذرة من الجميع ودزيتلك ايميلي عالخاص الك وللاخ ابو سعدون واذا حبيت راسلني على الايميل اي امر خدمة حاضر ان شاء الله ....
-
اتقدم مرة اخرى لكل من شارك بموضوعي وتفاعل معي ,,, اخويا لورنس العراق اشكرك جدااااا وراح ادزلك اضافة على ايميلك وشكرا ---- اخوكم ابو سعدون