ankawa
منتدى الهجرة واللجوء => الهجرة و واللاجئين => الموضوع حرر بواسطة: حبيبي بحار في 07:50 04/08/2010
-
الاخوان الاعزاء
يرجى المساعدة بأعطائي معلومات عن ولاية تنسي مدينة ناشفل بالتحديد حيث اني سأغادر اليها بعد اسبوعين وليس لدي كفيل او اية معلومات عن هذه الولاية.
اشكر مساعدتكم
اختكم حبيبي بحار
-
مدينة ناشفيل تقع في ولاية تنساس يمكن تكدرين عن طريق الانترنيت تعرفين حالة الجو والموقع
بشكل عام يوجد فرص عمل جيدة الجالية العراقية الموجودين هناك هم من الغالبية اكرادوهناك عرب من بلدان مختلفة
الايجارات كالاتي شقة غرفة وصالة ومطبخ مع مخزن حوالي 500 دولار
المساعدات لعائلة مكونة من الاب والم وطفل ايجار لمدة ثمانية اشهرمع فودستامبيقطع الايجار في حال العثور على عمل بينما يستمر للاطفال
الروضة هنا ليست مجانية والاسعار بشكل عام متواضعة والمدينة بشكل عام متواضع
لغير معلومات اخر يمكنك ارسال رسالة لي عل الخاص وراح ازودك بعنوان وايميل عائلة انشاءالله ميقصرون بمساعدتك
موفق انشاءلله
-
ولاية تنييسي ويسموها ميوزك ستي لانه الفيس بريسلي من عدها...مليانة مصريين وصوماليين..والداون تاون مالتها وره التسعة مينفات...المدينة طبعا جميلة جدا وجوها حلو جدا اول ما توصلون بالسلامة اذا ما عجبتكم حوولوا لنيويورك هواي احسن بالمساعدات
تحياتي
-
اخوية نبهان
شكرا على المعلومات الي انطيتها، اذا عندك معلومات عن فرص العمل بيها؟
تكدر تكلي شلون اكدر اغير الولاية مالتي من دون ان تنقطع عني المساعدات التي تقدمها المنظمة، صحيح انه اول ما اوصل اكدر اكول غيرولي الولاية؟
اختك
حبيبي بحار
-
عيني باعي
تشوفين منو هيه المنظمة اللي متكفلتكم وتدورين وين اكو الها فروع بغير ولايه وتكدرين بهالحالة تغييرين لغير ولايه بيها نفس فرع المنظمة...واذا ردتي تغييرين لولاية ما بيها فرع للمنظمة (لنيويورك مثلا) فكل اللي عليج تسويه انهو تجيين لنيويورك وتسكنين وتقدمين على مساعدات الولاية بس الشغلة تطوول خمسة واربعين يوم يالله تبدي مساعداتج بيها؟
الفكرة الاحسن هي
انتي اول ما توصلين لتنيسي تكولون للمنظمة فلوس الايجار احنا ندفعها للاندلوورد او وره ما تخلصون اوراقكم يعني السوشيل والفوود والمديكيد يعني تاكللها شهر تقريبا فانتي براس الشهر الثاني تلمين اغراضج وتجيين لنيويورك وثاني يوم تقدمين على المساعدات بهالحالة انتي عندج مساعدات مال شهر ماخذتها من تنسيي وراح تنتظرين خمس واربعين يوم هنا بنيويورك يعني بس تدبرين امرج على 15 يوم تطلع وراها مساعدات وتخلصين من تنيسسي وشكوولات المعلمييين الجدعان...من عزة بعينهم تارسيها لتينسي ونيو جرسي...مع هذا انتي بس اوصلو بالسلامة واني ان شاء الله اساعدكم بهالشغلة؟
تحياتي
-
اخي العزيز
صديقه لي طلعتلها ولايه نورث كارولينا اول موصلت كالت ما اريدها عندي كفيل ابولايه اريكون الي سوتهه انو موقعت على اي ورقه في ولايه نورث كارولينا وره اسبوع حولت على اريكون بس تكاليف سفرتها من نورث الى اريكون هي الي دفعتها واستمرت المساعدات عليها بس اتكول اقل من الي يجي مباشرة الاريكون لان احنه يسمونه لجوء ثانوي وهي حاليا مرتاحه واتكول المساعدات مو طبيعيه باريكون
فانته الي اتسوي شنو اذا معجبتك ولايه تنسي من توصل لتوقع اي توقيع وشوفلك عرف ابغير ولايه اخرى وحول عليها بس اتكون تكاليف السفر الىالولايه الاخرى عليك
ودمت
اختك
جورجيا
-
الاخ نبهان، خوفتني من شغلة المصريين يعني الواحد وين مايروح يلكى الكدعان كدامة سحبان الله.
الاخت جورجيا، اشكرج جداً على المعلومات القيمة الي انطيتيها اليه، بس ممكن اسأل شنو الاوراق الي ما اوقعها حتى اكدر اغير ولايتي
اختكم حبيبي بحار
-
حبيبي بحار وجورجيا الاعزاء
بالضبط هي يسموها هجرة ثانية ولا تحتاج الى كفيل اللي يريد يحول يحول داخل امريكا بلا كفيل واني سويتها لعائلة قبل شهرين جبتهم من اوهايو لنيويورك
تحياتي
-
الاخ نبهان المحترم
ممكن تفهمني بالظبط سأسوي اول ما اوصل لان بصراحة اني كنت اتمنى اروح لسان دييغو بكاليفورنيا.
اشكر تعاونك وياية
اختك حبيبي بحار
-
حبيبي بحار
نصيحة لوجه الله
لا تروحين الى لنيويورك
المساعدات بيها رهيبة
الولاية امينة جد نسبة لباقي الولايات
وكلشي بيها فيكه ويخبل
انتي اول ما توصلين بالسلامة ابقي فد شهر طلعي السوئيال والاوراق كلها الباقية وسوييلج ززركة لنيويورك وشوفيها او وراها اخذي كتاب قطع علاقة من المنظمة مالتكم وتعالي لنيويورك انتي وعائلتج وقدمي على المساعدات وشغلتها سهله جدا تفض بيوم او يومين بس تتحملين خمس واربعين يوم على ما تطلع مساعداتج بالكامل يعني تحملوها مو مشكلة لان وراها راح تندعيلي ان شاء الله ومع هذا انتي هم شوفي تينسسي اذا عجبتكم ومساعداته زينه عودين ابقي وره ما تقارنيها بنيويورك...ومن الله يسهل وتريدون تسافرون عوود انطيني خير انطييج تلفوني ومن توصلون بالسلامة خابروني واني ان شاء الله ارتبلكم اذا ردتوا تجوون لهنا
تحياتي
-
اشكرك اخوية نبهان
ان شاء الله من اوصل نكون على اتصال .
اختك
حبيبي بحار
-
اختي العزيزة:
في البداية ياجماعة على كيفكم وية ولاية تنسي. الوضع مو لهاي الدرجة من السوء. الولاية جدا لطيفة وحلوة. اني عايشة بيهة صارلي شهرين اني و زوجي واخوية. بالبداية الصراحة كلت هاي وين جايبينة الله لينطيهم. بس من بدينة نطلع وانطب واتعرفنه على مدينة ناشفل الصورة اتغيرت تمااااااااما. اختي العزيزة حبيبي بحار: الولاية حلوة مو لان عايشين بيهة!!!!! بس لان هية مناسبة وحالهة حال اي ولاية اخرى. عاصمتهة مدينة ناشفل اللي ايسموهة كنتري ميوزك ستي. اتكدرين تنزلين للداون تاون (وهناك الكل ايغني) بالنهار وخصوصا ايام العطل وتتونسين وهسة ان شاء الله اتشوفون بيهة هواية سياح. المدينة بيهة مواصلات وين متريدين اتوديج. و الاكراد اهنا ممقصرين عدهم محلات كلشي بيهة حتى لحم حلال وخبز مثل خبزنا بالعراق واتكدرين تشترين منهم كلشي بالفود ستامب. واكو مولات كلش حلوة وبيهة مدينة مائية وباركات كومة وحديقة حيوانات. واما المصريين والصوماليين فبصراحة مو ابكد العراقيين. وبالاجماع الولاية بيهة كل الاجناس والاعراق. الجو اهنا كلش رطب وحار بس هادي وين متروحين تبريد. والدنية على غفلة تبدي تمطر. واذا اتحبين نتواصل اكتبيلي على ايميلي الخاص وحتى اذا اتريدين نلتفي عالفيس بوك حتى تتضح الصورة اكثر. اني ما اقصد ان اغالط اخواني اللي جاوبوج بارائهم بس حبيت اتقل لحظرتج الصورة الاخرى للولاية لان ماكو شي بالدنية اله وجه واحد كلشي بي حلو و محلو. وحبيت اشاركج تجربتي وكيف كنت كارهة الولاية بالبداية بس بعدين اتضحت الي الصورة. وان شاء اله ايساعدج جوابي هاذة واراء اخواني الافاضل بتحديد القرار المناسب الج ولعائلتج. تحياتي. اختك ريم
-
الاخت ريم المحترمة
اشكرج جداً على الصورة الواضحة الي انطيتيه عن مدينة ناشفل، اذا ممكن تكوليلي عن فرص العمل بيها؟
اختج حبيبي بحار