ankawa
منتدى الهجرة واللجوء => الهجرة و واللاجئين => الموضوع حرر بواسطة: لوسي البغداديه في 17:27 04/08/2010
-
اخواني الله يخليكم ساعدوني لوجه الله
جتني هاي رساله من المنظمه يكولولي سنتصل بيكي للمقابله مع العلم اني مقابله مقابله ثانيه بس الفحص شنو عيدوليها يريدون مع العلم اني دزيتلهم وضليت اتوسل يعجلون بقضيتي وردولي اي رساله
Thank you for your e-mail.
We have checked your case, and it’s in progress.
Please expect to be contacted in the future once you are scheduled for a second interview.
If your phone number changes at any time, please send us the new number. This is because we will need to call you to schedule your second interview. Please reference your case number when you send updated information.
We appreciate your patience.
Kind regards
Info Center
الله يخليكم ردو عيه لان راح موت
-
اختي العزيزة لوسي .. اختي لا تخافين على كيفج وية نفسج شوية، اعتقد حسب علمي ان هاي الرسالة هي مجرد auto reply ، يعني رسالة آلية للي يدزلهم ايميل دائما"، لان ما معقولة ايذكرون موضوع مقابلة محلف وانتي اصلا" مقابلة!!..هذا رأيي، واتمنى الاخوة اللي في المنتدى اللي عدهم الجواب الاصح ان يغنونا بجوابهم الشافي...يا ربي ينطيج الصبر للانتظار ولجميع الاخوة.
-
الاخت لوسي البغدادية
الجواب الشافي موجود عندي لأن صارت وياي هذي الحالة.
طبعآ اني قابلت مقابلة محلف ومنتظر نتيجة المقابلة ولكن تفاجأت بأيميل اجاني يبلغني بأني قد اجريت المقابلة الأولى وراح اقابل مقابلة ثانية بشهر الثامن .. بهذي الحالة افتر عندي الديلكو ودخت بهذا الموعد..
ففتحت ايميلهم وسويتله اعادة ارسال وكتبت بي اريد توضيح وتفسير لهذا الموعد الجديد لأني قد اجري المقابلة الثانية مع ألمحلف ومنتظر النتيجة فهل سوف اقابل مقابلة ثالثة. هل اللغيت مقابلتي السابقة. ارجو التوضيح.
وبالنهاية كتبت تواريخ مقابلاتي الأولى والثانية.
محد جاوب على ايميلي ورجعت ودزيت غيره وبكلام جديد وهم محد جاوب.. بعدين فكرت كلت هو اذا اكو موعد مقابلة اكيد راح يتصلون بية قبل يوم او يومين من المقابلة وراح اكللهم بالسالفة..
وصدك حصل ماكنت اتوقعه اتصلو بية قبل اسبوع من تاريخ اليوم ويبدو انهم مافاتحين ايميلي نهائيآ. لأن اول ماعرفتني البنت بنفسهة كالت عندك موعد بفلان يوم بشهر الثامن واني نزلت عليهة بشرح الحالة وكلتلهة اني قابلت مقابله اولي بفلان تاريخ ومقابله ثانية بفلان تاريخ فجاوبتني وكالت (عن جد) كلتي وداعت خالي رأسآ صدكت هههههه.
بعدهة كالت بس انتظر شوي وكالت صح صح انته اجريت مقابلة محلف وهذا خطأ من عدنا وكلتلهة يعني الموعد الجديد يلغى؟
كالت نعم الغيه لاتروح
كلتلهة ماأريد الأخطاء تؤثر بسير اجرائات قضيتي رجاءآ
كالت لاابدآ ماتأثر ابدآ.
كلتله ارجو ارسال ايميل رسمي بألغاء الموعد كالت اوكي
باي باي.. باي باي
بعدهة حطيت راسي اريد انام فد ساعة وجان يدك موبايلي دولي عمان يعني تقريبآ بعد ربع ساعة من الأتصال الأول.
اني كلت يالله راح يعتذرون مني ويكلولي اسفين عالخطأ وراح نجازيك بأنجاز سفرك خلال يومين .. حظر جنطتك... هههههههه..
جان يكلمني واحد مستعجل وكال اخي الموعد خطأ وقد اللغيناه..
كلتله يمعود انتظر اشكاعد تحجي خلي نتفاهم وافهمك شنو السالفة ورأسآ خبزته بالقصة كلهة وبالحديث الي دار بيني وبين الي اتصلت قبله وكال اوكي مظبوط امشي مثل ماكلمتك زميلتي.. كلتله اوكي شكرآ وارجو ان تبعث ايميل رسمي بألغاء الموعد كال (هلا ببعتلك ايميل) كلتله اوكي. باي..... باي..
انتهت السالفة ومادزولي ايميل الى البارحة دزولي ايميل بي الغاء للموعد وبي رسالتي القديمة الي ارسلتهة لهم.
وكاتبين بنهاية رسالتهم بالأنكليزي نأسف لهذا الألتباس الذي حصل من قبلنا..
.....وانتهى....
بهذا اكلج لاتشيلين هم لأن هذي الأيام كاعد تصير خربطة بسبب التسريع بأجرائاتهم وماتأثر هذي الأخطاء على قضيتج ابد على ان تبلغيهم بأيميل بخصوص الأخطاء لكي يعالجوها
اتمنى اكون قد ابعدت التفكير والوساوس من راسج....
تحياتي
أخوكم
ساحر بغداد
-
حبيبتي لوسي لدوخين ولا اتحيرين اتصير احيانا هاي الاخطاء
وانتي مدام مقابله المقابله الثانيه فهذا جاي مره ثانيه متاخر الايميل
ومع ذلك دزيلهم ايميل وكليلهم اني مقابله مقابله ثانيه حتى اتخلصين نفسج من المسؤليه واتثبتين موقفج
-
لوسي البغدادية كيف تريدين بالمستقبل ان يساعدك شخص بالمنتدى وانتي لاتتواصلين بموضوعك ولاتضعين رد او تقييم للذين ابدو لك المساعدة....
احنة مانريد شكرآ بس نريد نعرف ان الوقت الذي استهلكناه في الرد لمساعدتك لم يذهب هباءآ منثورآ..!!
اذا كان تسجيلك بالمنتدى لأجل ان تقرأين فقط فأنا من الأن اكلج انسي شي اسمه مساعدة مني ومن اخواني في المنتدى لأنك لاتساعدين نفسك بالتواصل فكيف تريدين من الأخرين مساعدتك..
نصيحة من اخوج اذا تريدين اخوانج اهنا بالمنتدى يساعدوج أتواصلي معهم ليتعاطو بموضوعك ويعرفون مدى استيعابك لردهم لأن الكل هنا يساعد الكل والكل يهمه شأن الكل فأذا كتبتي موضوع وتركتي من ساهم بموضوعك بدون رد تواصلي فأعلمي بهذه الحاله لن يدخل لمواضيعك اي احد..
اتمنى ان تتفهمي ماقلته وماتزعلين .. فكل ماقلته يصب بمصلحتك اذا كنتي تحبين مستقبلك في هذا المنتدى.
دمتي سالمة.
-
ساحر بغداد عشرة على عشرة!!
-
ساحر بغداد عشرة على عشرة!!
-
السلام عليكم اخي ساحر بغداد اولا تسلم ع التوضيح وربي يسهل امرك انت وكل الاخوه وعل كيفكم شويه ويه لوسي اكيد موقصدها لازم شويه نعذر احتمال ماعدها نت او ضعيف ميفتح وهيه اكيد بغداد وانت ادر بالوضع واكلك سالفه تره الي يدخل للمنتد بعد ميكدر يعوفه يصير عنده ادمان :) :) :o اختكم um reem
-
الأخت um reem
انا وضعت الرد الأول للمساعدة والثاني للنصيحة فلم اضغط علي الأخت لوسي بالعكس كنت قد فدتها بالردين..
اما بالنسبه لتعذرها وعدم وجودها فأقلك انها كانت موجوده تدخل مواضيع وانا شاهدت يوزرها في مواضيع اخرى. ووجدتها ايضآ داخل موضوعها قرأت وخرجت ولو لاحظتي كم عدد مشاركاتها ستجديها ثلاثه فقط..
اما عني انا فلا استهدفها شخصيآ بالعكس دخلت ووضحت لها ماكان يقلقها. بس انا اردت ان اوصل رسالة لها ولغيرها من الجدد ان يسلكو طريق ينفعهم بالمنتدى وهذه اعتبرتها نصيحة من اخ لهم وأكيد لايوجد اخ لايحب الخير لأخيه...
اتمنى من جميع المشتركين الجدد التواصل بالردود والمواضيع فلا تعلمون كم من الفائدة ستجنون من هذا المنتدى.
وصدقوني انا اتصفح واكتب الردود من الموبايل والله شاهد علية.. والكتابه جدآ صعبه ومزعجة.. داعيكم من استهلاك الرصيد.. بس لأجل عيون اخواني بالمنتدى كل صعب وغالي يصير عندي سهل ورخيص..
تحياتي
اخوكم
ساحر بغداد
-
الاخت لوسي البغدادية
حبيت بس اكلج انه اتصلت بمنظمة الاي او ام قبل فترة وطلبت منهم تسريع معاملتي بسبب ظروف معينة ، وقالت لي الموظفة انهم يسرعون فقط الحالات المرضية .
ارجو ان اكون افدت
اختك حبيبي بحار
-
اول شي اشكر لكل من ساعدني والله يحقق امنيته ويعجل سفره اما بلنسبه للاخ ساحر والي اكدو ذالك اكول الله لايعوز احد على احد شاكره مشاركت وبدال متكتب هاي كتباتك ترد على غير ناس وتردلهم لان ممحتاجه مساعدتك لاخواني لي ردولي مقصرو وياي وشكرا مع لعلم اني مو دائما اكعد على نت بحالات نادره مثل هيج موكلش اعرفه للنت واخيرا شكرا على الي يساعدني ربي يعطيكم مثل مساعوني وساعدون ناس بدون اي كلام الله يسفركم ياربي وتشوفون هناك كل الخير