ankawa
منتدى الهجرة واللجوء => الهجرة و واللاجئين => الموضوع حرر بواسطة: arcadia في 20:28 09/09/2010
-
السلام عليكم
انا عضوة جديدة في هذا المنتدى حبيت اشاركم بتجربتي الغريبة والطويلة مع IOM وبمعنى اصح حبيت اسمع منكم حتى افهم شنو اللي دة يصير وياية....اني قدمت تقريبا من بداية البرنامج يعني بعد كم شهر منه في شهر اب 2008 وحصلت IZ بعد مرور سنة تقريبا .....المهم قابلت مقابلة اولى في نهاية شهر 12 2009 طبعا اني مقدمة مع اخي..وبعد المقابلة الاولى باشهر كملنا الفحص الطبي...في شهر مايس الخامس 29-3 قابلنا المقابلة الثانية..وقالوا بعد خمسة واربعين يوم نتصل او نرسل ايميل...اللي صار انهم بعد مرور شهرين تقريبا ارسلوا ديفيرد لاخي وقبل ذلك ارسلوا له جدولة السفر وبعدين وهذا اخر شي ارسلوا له يقولون بانك على جدول السفر وهذا كان قبل عشرة ايام ..المهم والغريب في هذا كله انهم كنسلوا رقمي ولم يشيروا له لا من قريب ولا من بعيد ولا كأني موجودة في الموضوع مع العلم اني صاحبة الطلب الرئيسي...اللي صار ان خلال فترة 45 انتظار كنت قد قدمت لبقية عائلتي (اختي واخي وعائلتهم بعد ان اقتنعوا بصعوبة البقاء في العراق)....طبعا ارسلولهم IZ بعد 13 يوم هذا كان في 2010.
الغريب انهم بدأوا يرسلون ويتصلون بأختي يطلبون منها رسالة تعييني اي الريكومنديشن..وكأنو انا صاحبة الطلب مو اختي...هل هذا معناه انهم الغوا ملفي او اعادوه من جديد مع اهلي (لانهم طبعا احد قمم الغباء والخربطةهناك IOM).اتمنى الللي حصل معاه او سمع بأحد مر بنفس هذا الشي يجاوبني...لاني محتارة انا انتظر ردهم منذ اكثر من ثلاثة اشهر...وما اعرف اني مقبولة او مرفوضة..اسفة على الاطالة
اركيديا
-
السلام عليكم
اختي العزيزه اني مثل حالج بالضبط قدمت من سنه 2008 الشهر ال3 او ال 4 ممذكر لان نسيت اني مقدم اصلا وكلشي كامل ومكمل عندي بس باقي على الموافقه الامنيه لحد هذه اللحظه واني الي دخلت جميع عائلتي لمنظمه الهجره يعني اني صاحب القضيه الاساسي والف الف الحمدلله كليهم سافرو على خير وسلامه وياربي يوم لجميع العراقيين .
واني مازلت انتظر الموافقات الامنيه المهجومه يعني اني عندي موافقه محلف وفحص طبي وطبع اصابع وموافقه ولايه !!!!
وحاط عيني بعين رب العالمين وصابر والصبر من عند الله
ان مع العسر يسرا
robin - cairo
-
اخي روبن ...شكرا على الرد...لكني ما استلمت حتى موافقة المحلف..بمعنى اني ما استلمت اي رد بخصوص قضيتي منذ المقابلة الثانية (المحلف)..مع انهم بعد هذي المقابلة باسبوعين تقريبا اتصلوا بالسبونسر مالتي وسألوها اذا كانت تعرفني انا واخي وهي اكدت هذا لهم..وبعد هذا ما استلمت لا رد محلف ولا تأجيل ولا اي شيء اخر..كل رسائلهم اللاحقة كانت تخص الكيس مال اخي
تحياتي اخي
اركيديا
-
السلام عليكم
اختي اركيديا الله كريم مضيق اذا متفرج ان شاءالله
ان مع العسر يسرا
robin - cairo
-
اختي خلي انصحج نصيحة مهمة
اذا عفتيهم ملحيتي عليهم مستعدين يعوفوج عشر سنين وميسولج شي صدكيني...كل اسبوع اجفتيهم بايميل وشرحيلهم الحالة بالتفصيل وراها اذا مجاوبوج زيدي النبرة عليهم اختي شتنتضرين اني استغرب هيج حالات الناس كاعدة صافنة تنتضرهم...اني عفتهم عافوني سنة مسوولي مقابلة محلف لانه جانت هامل الموضوع الى ان دكيت عليهم يلا سوولي مقابلة يا عيني استعجلي مبقى شي والبرنامج ينسد
-
الله ارحم الراحمين....شكرا اخي روبن
-
شكرا اخي dr 1985 على مرورك وردك...اللي صار اني قدمت وما كنت راغبة بالموضوع ..بس كلت هو اوبشن نضيفه على حياتنا في العراق اللي ما نكدر نعرف شنو يصير بيها بكرة ...لذا وخلال اكثر من سنتين ما حاولت اتصل بيهم ولا مرة ..كنت اكول خلي الامور تمشي وحدها . طبعا ومثل ما توقعت حياتنا اصبحت اكثر صعوبة بالعراق واصبح السفر هو الخيار الافضل النا .ولكنهم في المنظمة ماعرف شنو المعايير اللي تتحكم بيهم . طبعا لازلت ما ارسللهم اي شي .ولكن غرابة التأخير بصراحة يستفز اكبر واحد. وخاصة اني اعمل معهم من اربع سنوات وانا بنت وما منتمية لاي حزب او اي نشاط لا قبل ولا هسة ..شنو سبب الاهمال ماعرف.
انا الان اتمنى يرفضوني. حنى اعرف شنو اسوي بالخطوة الجاية. ممكن اسافر على اوربا في حالة الرفض. وابلغ المنظمات في اوربا ما حصل معي. وانا متأكدة ان شاء الله احصل اللجوء هناك. انا متاكدة لو اننا عملنا مع اوربيين لكن الحال غير الحال. ولكن الامريكان امرهم غريب والله. الله كريم
اركيديا
-
شكرا اخي علي على ردك....اني ما استلمت اي شي من عدهم بعد مقابلة المحلف حتى اسويله ريبلاي....هم اهملوا طلبي فقط
كان المفروض يردون علية بعد 45 يوم ولكني ما استلمت اي شي يخص قضيتي منذ 3 اشهر ونصف
تحياتي لحضرتك
تركيديا
-
شكرا اخي علاء مرة اخرى على ردك واهتمامك ...اخي انا كنت قد راسلتهم مرة واحدة فقط لاني كنت حابة افهم ماذا يحصل وكان ردهم قبل ايام بانهم لا يعرفون الوقت اللازم الذ ستاخذه قضيتي لكي يردوا علية بالايجاب...وكاني مثلما دائما اقول ..فليت براغي جسر واشنطن ..مع العلم معظم اصدقائي اللي قدوموا معي راح يحصلون الكرين كارد
-
اخت اركيديا
بالنسبة للتاخير ,, ماكو غير الاهمال وعشوائية عمل الاي او ام سبب مبرر لتاخر الرد عليك
والدليل قضية اخيك اللي ماشية بالاتجاه الصحيح وهو مقدم معاك بنفس اليوم وقابلتوا بنفس اليوم
وصدقيني تدخل القسمة والنصيب بشكل كبير في سير المعاملات.
حبيت انبهك ع شيء مهم ,, يجب ان يكون الربط بينك وبين عائلتك ربط ضعيف وليس قوي
حتى من تستلمين ايميل جدول السفر تسافرين ولا تنتضريهم لان قضيتهم لازالت ببدايتها
وممكن اذا انتضرتيهم ومر ع امنيتك سنة ستعاد مرة اخرى
بالتوفيق ان شاءالله
-
السلام عليكم ...شكرا اخي لورنس
لا اعرف ماذا يعني الربط الضعيف او القوي مع عائلتي....انا حينما قدمت قبل اكثر من سنتين كنت فقط انا واخي الاصغر بالكيس وحصلنا على رقمين متتاليين للكيس مالتنا وكنا قد اتممنا كل الامقابلات والفحص مع بعض. ولكن بعد ذلك بدأت قضيته بالتحرك وقضيتي كانت ساكنة. بعدها قدمت لبقية عائلتي (بعد ان اقتنعوا بجدوى السفر) المهم قدمتلهم قبل شهرين تقريبا واستلموا IZ بعد ايام من التقديم..هل تعتقد بـن التأخير في قضيتي هو بسبب ربطي مع عائلتي ؟؟ مع اني لم اطلب ذلك منهم ؟؟
مع العلم نحن تقديمنا جميعا من بغداد
واذا كان هذا صحيحا ...مذا افعل لكي اغير نوع الربط..مع اني لم استلم منهم اي اشارة بخصوص ربطي مع عائلتي ؟؟
مع خالص شكري وتقديري
اركيديا
-
شوفي اخت اركيديا
طبعا اخوك عمره فوق ال21 لان منطينه اي زت بوحده
شوفي مسالة تاخرهم بالرد عليك لان ضفتي اهلك وياك هذا شيء اني استبعده
لان همه يكدرون يمشون اجراءات قضيتك واجراءات اهلك تمشي بوحدها
هسه نجي للربط
اذا اتصلوا باخيك وانطوه موعد سفر فمعنى هذا ان الربط بينه وبينك ضعيف
لان لو كان قوي كان مينطوه موعد سفر الا بعد ان تتبعيه انت ويوصلك ايميل الجدولة
(( اللي معناه اكتمال موافقتك الامنية )) حتى تسافرون سوية
يعني
لو فرضنا الربط بينك وبين اخيك ربط قوي فمعنى هذا انه ماراح يسافر الا بعد ان تلحقيه انت
طيب لاسامح الله افرضي انت موافقتك الامنية اتاخرت ؟ ومجتي الا بعد ما مضى سنة
على مجيء امنية اخيك بهاي الحالة راح تعاد امنية اخيك مرة اخرى لان مضى عليها اكثر من سنة
على ضوء هذا
انت بتسهيل الله اذا جاوبوك وكالولك انك بالتجييك الامني فمعنى هذا انه المحلف موافق عليك
لكن بهاي الحالة لازم اخيك ينتضر موافقتك الامنية (( اذا كنتوا تردون تسافرون سوية )) اما اذا
عادي كل واحد يسافر بوحده فخلي اخوك يسافر وانت ابقي انتضري امنيتك ع راحتك
بشرط اذا جتي من وكت واخوك مسافر ف مو بصالحك تبقين تنتضرين اهلك لان همه بعدهم
بالبداية واكيد اذا انتضرتيهم راح تصير امنيتك اكسباير (( مدة صلاحيتها سنة )) ( مو هيه حليب هههه)
هسه
لازم بالبداية يوصلك رد من الاي او ام بخصوص قضيتك لالالالالالازم
حتى نكدر بعدها نقيم الوضعية براحتنا حتى نحدد ياهو الاحسن لك بالربط القوي
او الضعيف سواء مع اخيك او مع اهلك او بيناتكم كلكم
لازم يوصلك رد حتى نكدرر نحدد الوضعية
تحياتي
-
ها اتذكرت
اذا فرضنا انه التاخير بقضيتك بسبب اضافة اهلك عليك ( مثل ما انت افترضتي )
وهذا معناه انه المنظمة عملوا الربط بينك وبين اخيك ضعيف لان قضيته مشت بمعزل عنك
والربط بينك وبين اهلك قوي لان قضيتك واقفة بانتظار اهلك (( طبعا هذا ع افتراضك ))
بهاي الحالة واذا اتاكد هذا الشيء (( بشكل رسمي )) فانت ادزيلهم ايميل
وتخبريهم بان يفكون الربط بينك وبين اهلك حتى انت تمشي قضيتك بمعزل عن
قضية اهلك وتتحررين منهم
تحياتي
-
اخي لورنس ...اشكرك الشكر الجزيل على اهتمامك ومشاركتك واياي بحيرتي بهذا الموضوع (مع اني ما احب اروح امريكا ..لكن سبحان الله كل ممنوع مرغوب) من يوم اللي حسيت انهم دة يماطلون بشغلتي صارت امريكا حلم بالنسبة الي (سبحان الله)
اخي لورنس اني اريد يسافر اخي قبلي لان هذا في صالحي وصالح الاهل على الاقل راح يكون دليلنا مع اني عندي سبونسر وهي صديقة امريكية.
واكيد ارغب بأن يكون ربطي مع اهلي ضعيف ايضا لكي اكون دليلهم اذا الله اراد
لذا اعتقد وبغض النض عن سبب التأخير راح ادزلهم ايميل لجعل الرابط مع اخي واهلي ضعيف...وهي حجارة بغرفة ضلمة مثل ما يكولون اهلنا
مع شكري الجزيل
اركيديا
-
اوكي اخت اركيديا
هذا اجراء صحيح ومهم ما طول انتوا ماعدكم مانع اتسافرون ع مراحل
( اخوك - انت - اهلك )
لكن خلي يكون الايميل اللي ترسليه مزدوج
بحيث هم تسأليهم ع قضيتك وسبب تأخر الرد عليها
وهو تطلب منهم ان يكون الربط ضعيف بين ال ي زت ال3
وبالتوفيق ان شاءالله