ankawa
منتدى الهجرة واللجوء => الهجرة و واللاجئين => الموضوع حرر بواسطة: ابن ميشكان في 13:58 16/09/2010
-
السلام عليكم
مشكلة اكثر الاشخاص الذين يودون السفر الى امريكا
وهي المشاكل العائليه بخصوص السفر وارجو من الاخوه والاخوات باعطاء حلول بخصوص المشاكل التي لربما نقع فيها مع ال اي او ام بسبب المشاكل العائليه
انا امر هذه الايام بمشكله وهي بان الخوف الذي يتولد اثناء التجربه الحياتيه وهي السفر الى امريكا وخاصه من الزوجه
نحن الرجال نستطيع ان نتحمل الغربه ومشاكل العمل صحيح ليس الجميع بل هنالك نساء تقوم باعمال افضل من الرجال
ولكننا وليس انا فقط نجد مشاكل قويه جدا وهي بان زوجاتنا واهالي زوجاتنا يرفضون الابتعاد عن بناتهم والزوجات تجد صعوبه كبيره بترك اهلها وتكون متقلبه بين الحين والاخر احيانا تتمنى السفر واحيانا ترفض تركها للاهل والاقارب بسبب قوة الترابط بينهم
انا وزوجتي قمنا بعملية مقابله اولى ومقابلة المحلف ثانيه ولكني ارى تردد غير طبيعي على زوجتي بخصوص السفر يوم تقول لي اتمنى ان اسافر وايوم تقول لي بانها لا تستطيع ترك الاهل
مع العلم بانه تم تحديد لي موعد فحص طبي وهو قريب
ما اطلبه منكم وهو كلاتي اخوان واخواتي
هل استطيع ان احذف اسم زوجتي من السفر واذهب للفحص الطبي لوحدي
هل يتم الحذف عن طريق ارسال رساله الى ال اي او ام بواسطة الايميل
هل الحذف يؤثر على سير معامله السفر حيث يتم التاخير في الموافقه الامنيه
هل استطيع عمل لم شمل لها بعد السفر
هل الحذف يؤثر بشكل سلبي على عائلتي امي وابي واخوتي حيث يتم لهم التجيل ايضا مع العلم باني انا من قمت بعمل طلب اللجوء للعائله
مع العلم باني انا وزوجتي لنا كيس نمبر واحد
-
اخي اتصل بيهم وافتهم منهم احسن الك ......واعتقد مشكلك مو سهلة بالنسبة للزوجة...ياريت لو تقنعهة...بس خاف تقتنع وتوصل هناك ترجع نفس المشكلة.....وهاي مشكلة هواية عوائل مو بس انت..
-
السلام عليكم
اخويه العزيز عندي فد مداخله بس مو موجه الك بصوره خاصه وانما بصوره عامه للجميع الازواج والزوجات مصلحه ومستقبل العائله فوق كل اعتبار يعني افكر بولادي شنو مستقبلهم شنو حياتهم اذا بقو بالعراق العظيم ومن ناحيه الاهل كا ام واب اكيد همه الهم الاوليه بكلشي لان همه الي ربونا وسهرو الليل علمود راحتنا ولو اتظل الف سنه منوفي ربع الي سوه اللناكبرونا و صرنا اصحاب عوائل قصدي من كل هذا هسه بالوقت الحالي الاتصالات اطورت ياخويه من تلفونات الى انترنيت والى الخخ...
يعني انته واني وزوجاتنا يكدرون يتصلون بالاهل ويشوفوهم وشغله اساسيه وره سنه من وصولك الى امريكا انته او زوجتك او اي شخص من العائله من بعد ميحصل الكرين كارت يكدر يرجع ويشوف الاهل على خير وسلامه وفوك كل هذا المره تتبع رجلها وين ميروح هذا الصح وبكل الاديان والشرائع السماويه واتقبل مروري وكلامي الصريح بس هذا الصح وحاول اتقنع ام الجهال بان اتغير رئيها كليله لخاطر الاطفال ومستقبلهم
ان مع العسر يسرا
robin - cairo
-
عزيزي dr1985
انا اخاف ان اقنعها مثل كل مره وبعدين تقلب وخاصه اذا تحدد لنا موعد سفر ورفضت الذهاب في تلك الحاله سيتم الغاء كل شي حسب ما قرات بانه يجب على الكيس نمبر ان يحضرون جميعا واذا لم يحضروا فانه سيتم تاجيلهم لفتره طويله
-
عزيزي Robin Hood
والله انا قلتلها بان هنالك انترنيت وتستطيعين التواصل معهم صوت وصوره ولكن التقلب بالراي دائم
وبخصوص الاطفال لم نرزق بلاطفال لحد الان وحيث اننا نرغب بان نتعالج هناك لانه العلاج هناك افضل بكثير وكلنا نعلم ما هو الطب لدينا في العراق وما هي الادويه
ولكني اطلب منكم هل هنالك اي احد حذف زوجته من الكيس نمبر الخاص به واذا تم الحذف ما هي العواقب بالنسبه للمعامله مع ال اي او ام
وشكرا
-
السلام عليكم
وينكم شباب للرفع
ان شاءالله اسافرون على خير وسلامه وترزقون بدرزن جهههاال ;D
ان مع العسر يسرا
robin - cairo
-
انا اشكر كل من يبدي النصيحه وبارك الله فيكم جميعا
انا حاولت بكل الطرق وياليت لو زوجتي ترفض بشكل نهائي ولكنها متقلبه وذلك بسبب بعض الاقارب ( مع الاسف )
ولكني يا اخوان ويا اخوات لن اترك هذه الفرصه ابدا ولهذا انا اطرح عليكم اسئلتي من جديد لمن يعرف معلومه عنها وهي
هل استطيع ان احذف اسم زوجتي من السفر واذهب للفحص الطبي لوحدي
هل يتم الحذف عن طريق ارسال رساله الى ال اي او ام بواسطة الايميل
هل الحذف يؤثر على سير معامله السفر حيث يتم التاخير في الموافقه الامنيه
هل استطيع عمل لم شمل لها بعد السفر
هل الحذف يؤثر بشكل سلبي على عائلتي امي وابي واخوتي حيث يتم لهم التجيل ايضا مع العلم باني انا من قمت بعمل طلب اللجوء للعائله
مع العلم باني انا وزوجتي لنا كيس نمبر واحد
-
اخي العزيز انا اللي اعرفه ان الزوجة تعيش مع زوجها على الخلوة والمرة بعدين انت وين ماخذها للصومال ؟
وانا اقول ان اهلها ليس لهم حق لان الزوجة تابع لزوجها وهاي فرصة العمر
لعد احنا مو عفنا اهلنا ونبقى 3 سنوات ومانشوفهم ونتحمل المفروض ابوها وامها يتمنون الخير لبنتهم ويشجعوها على الذهاب
والله هاي وجهة نظري
اختك ام زيد
-
اخي سامي الاخوه كفوا ووفوا بالموضوع العاطفي والعلاقات الاجتماعيه
واني راح اجاوب على اسالتك فقط
هل استطيع ان احذف اسم زوجتي من السفر واذهب للفحص الطبي لوحدي
بعد الموافقه على الحذف راح تبدي اجراءات جديده ويتحددلك مواعيد جديده
هل يتم الحذف عن طريق ارسال رساله الى ال اي او ام بواسطة الايميل
نعم بواسطة الايميل
هل الحذف يؤثر على سير معامله السفر حيث يتم التاخير في الموافقه الامنيه
التاخير يشمل كل المقابلات
هل استطيع عمل لم شمل لها بعد السفر
ليس مباشرة وانما ياخذ وقت طويل
هل الحذف يؤثر بشكل سلبي على عائلتي امي وابي واخوتي حيث يتم لهم التجيل ايضا مع العلم باني انا من قمت بعمل طلب اللجوء للعائله
لا عائلتك مالها علاقه بهذا الفصل
مع العلم باني انا وزوجتي لنا كيس نمبر واحد
اكيد
اخي راح احجيلك على اجراءات فصل الزوجه والزوج
اولا اتقدم طلب بانسحابها من الملف
وراح يتصلون بيها بالتلفون ويتاكدون من رغبتها بالانسحاب والسبب
ينلغي اسمها من الملف وهذا ياخذ وقت ايضا
تعاد مقابلة المحلفين بالنسبه الك ويتم الا ستفسار عن سبب انسحابها وهل حياتها غير معرضه للخطر
وقد يتنافى هذا مع اقوالكم السابقه وقد يؤثر على مصداقيتكم
واذا سافرت انت لايمكنك سحبها عن طريق المنظمه
وانما بمعاملة لم الشمل وهاي معامله تاخذ وقت طويل
وياربي يهديها وايسهلها عليكم واذا سافرت وياك هاي مو اخر الدنيا تكدر ترجع شوكت متريد حتى قبل متنتهي السنه
وذاك الوكت اتقرر اذا يعجبها تبقى بالعراق لو ترجع لامريكا
على الاقل تاخذ قرار بعد خوض التجربه مو قبلها
-
والله هذا الموضوع كلش كلش مهم
واحنه دنمر بنفس الظروف
يعني الزوجات مشكلة والله اني الي اعرفه كل مرة تمشي ورة كلام زوجها شيكول المفروض تسوي
وبعدين هاي امريكا وبلد مطور وفوك كل هذا ديساعدوك يعني احسن من الدول العربية الف مرة
بس المشكلة الي عدنة هي مو علمود ترك الاهل
الحجه انه بلد يكره الاسلام وفساااااد ومن هذا الحجي وكلهم مخدرات وهذا التفكير
وطبعا احنه الخوف الي عدنة نفس الي عندك لا يجي يوم السفر وتكول ماروح
!!!!!!!!!!
-
السلام عليكم
اخي هذه رسالة الى زوجتك
السلام عليكم اختي العزيزة
اختي هذه مشكلة طبيعية اني صار سنة بامريكا و زوجي واولادي الله يخليلياهم وياية بس اني كل يوم احن و ابكي مشتاقة الى اهلي
بس لازم تعرفين شي اذا اجيتي الى امريكا كلش سهل ترجعين تلغين لجوئك وترجعين الى العراق وكل الي تدفعيه هو تذكرة الطيارة واكو عائلة سووها ورجعوا بس اكو عشرات العوائل بقوا بامريكا لان الحياة هنا كلش هواي احسن من العراق والدول العربية
وانتي لاتفكرين هذا لجوء وغربة واعتبريها سفرة و اذا خصرتي هذه الفرصة يمكن بعد 100 سنة ماتوصلين الى امريكا واني حاليا قدمت على الكرين كارت وانشاء الله من استلمه اروح الى سوريا واشوف اهلي لان اهلي بسوريا
وطبعا هنا النت سريع يعني تحجين ويا اهلج صوت وصورة وتخابريهم من الموبايل اكو كارتات تنباع بدولارين تحجين بيه ساعة وربع ونتفرج بالنت بث مباشر القنوات العربية والعراقية وهنا اذا ضجتي بس اطلعي تمشي وشوفي الطبيعة الحلوة والناس الي مرتاحين كل واحد عمرة 100 سنة وطالع يركض لان خايف على صحته
اما بخصوص الاسلام والمسلمين هذا بلد حر يعني اذا واحد نظرلك نظرة مو حلوة تشتكين عليه وتكولين هذا عنصري واهم شيء لازم تعرفيه هنا اكو عدد هائل من المسلمين عرب وباكستانين وهنود وافغان واتراك وافريقيين وامريكان وهنا كل مدينة بيها جوامع ومدارس اسلامية وبرمضان المساجد تسوي كل يوم فطور مجاني ويوميا صلات تراويح وصلات العيد سووها بملعب كرة قدم لان المسجد صغير يعني مكان عام . وطبعا اكو المطاعم العربية والاسلامية والمحلات الي تبيع منتجات حلال .والحمد لله اني صار سنة اخذ اولادي للمدارس واتسوق للبيت واني ادرس بالجامعة واروح للمستشفى وتقريبا يوميا اركب باص واني محجبة والحمد لله ماشفت اي تصرف سيء من احد وبالعكس اكو ناس هواي يسالوني عن الاسلام ويتعجبون ان الاسلام سهل ومفيد والحمد لله عندي صديقات امريكيات اطلع وياهن واعزمهن الى بيتي ويعزموني في بيتهم وهن مسيحات وعلمتهن لبس الحجاب والطبخ العراقي وعلموني انكليزي وشوية اسباني وعلموني سياقة واذا عندي موعد مستشفى وزوجي بالدوام اترك اطفالي عند وحده من صديقاتي واني ارعى اطفالهم من يحتاجوني هنا الاصدقاء اهل وطبعا عندي صديقات عراقيات ازورهم ويزوروني وبيناتنا اتصالات ودائما نحاول نساعد بعضنا
ملخص كلامي مو كلشي سيء بامريكا بيها الحلو وبيها المر مثل اي مكان بالعالم بس لازم نضحي لأجل مستقبلنا ومستقبل اطفالنا
واسفة اذا طولت عليج بس اني حاولت ان اساعدك لوجه الله تعالى
-
السلام عليكم اخواني واخواتي الاعزاء
الموضوع حلو وشيق ويحتاج يتناقش
انا هم جاي امر بنفس الحاله عندي زوجتي امررمرتني ما تريد تسافر وتعوف اهلها بس انا المشكله مكمل كل شي وباقي بس عالسفر.
دزيت الهم ايميل حتى افصل زوجتي عني واسافر بوحدي و خابرتني موظفه اي او ام تريد تتاكد من رغبة زوجتي من عدم السفر بس زوجتي جانت مموجوده بوكتهه وكلتلي اخابر بعد ساعه لبين ما ترجع زوجتي وذاك يوم وهذا يوم بعد ما خابرة هاي الموظفه
وانا هسه حاير اشاسوي بهاي الورطه. بس اكول الله كريم تفرج.
-
اشكرج اختي ام مصطفى على كلامج الجميل
تحياتي
-
اخوان السلام عليكم
اني الي رأي بهذا الموضوع وسمحولي بالمداخلة وياكم والتعقيب على الموضوع
اني اكول المرأة الي ما تمشي بطريق زوجها مالها كل لازمه لان اي بنت يوم الي تتزوج او تطلع من بيت اهلها يصبح بيت زوجها هو البيت البديل والحياة الجديدة الها والي لازم تتقبلها بحلاوتها مرارتها ... او من ناحية ثانية اذا هي الحجة اهلي شلون ابتعد عنهم فاعتقد الظروف الي مرت على كل الشعب العراقي اجبرت الكثير والكثير من هاي العوائل على المفارك وصار كلمن بوادي بس بقينه نتشاوف في الانترنيت ونسمع صوتهم اهلنه واصدقائنا بالتليفون وهذا حال اغلب العراقيين
وثالثا هو السفر الى امريكا هي فرصة وتجربة الي الله يوفقه بيها كان بها راح يستقر بحياته والي يشوف الوضع ميوالمه يكدر يرجع الى بلده او اي بلد اخر او محد راح يمنعه ... لذلكاني استغرب ياخوان ليش البعض م الزوجات يرفضن الذهاب لانه كل الحجج الي اسمعها هي كلها حجج باطلة ومالها اي موجب ... اعتذر على الاطالة .. واكول يا اخوان هي مو سفرة سياحية عاجبني او معاجبني هو موضوع تقرير مصير وفرصة ما تكرر ابد
تحياتي الكم
-
زين سؤال لكل الي قدموا ووصلوا اخر مرحلة اذا زوجاتكم ما يريدون يسافرون ليش مو من البداية كان لغيتوا اسمهم وقدمتوا بوحدكم لو هسى بالاخير يلى كالوا ما نريد نسافر لعد وين جانوا من البداية وثانيا كلمة للزوجات الي رافضين السفر مع ازواجهم بحجة ما نكدر نفارق اهلنا اذا هلكد متعلقين باهلكم شكو اتزوجتوا جان بقيتوا بحضن اهلكم مو كان احسن والله عجيب اموركم !!
-
ئي والله أنجي كلامج دوة علجرح
Baguncero
-
شكرا على كل من قام بابداء الراي والنصيحه وشكر خاص للاخت ريم عبد
لقد ارسلت رساله البارحه الى اي او ام وابلغتهم بحذف زوجتي من الكيس نمبر -- لقد حاولت وبشتى الطرق ولكن لا فائده وعلى راي الاخت انجي اذا انتو مو كد الشغله ليش وافقتو من البدايه عالسفر وهسه لا لدينا مثل عراقي معروف وهو ( كل لشه تتعلق من كرعانها ) اخوان واخواتي ارجو من كل من لديه معلومه حول سير العمليه بابلاغنا ليتسنا للجميع معرفة الامور ويا اخ ابو علي العويسي اذا حصلت على اي معلومه ارجو تثبيتها لنا لنكون على علم بكل ما يحصل وشكرا للجميع
-
والله بصراحة يا اخ سامي مع الاسف اللي صار بأن اضطريت تلغي اسم زوجتك
يعني هسة احنة كلنا اهلنا عزيزين علينا بس فاركناهم
وحتى الرياجيل هم ديفاركون اهلهم شنسوي هذا صار حالنا
والله كريم
الله يوفقكم يا اخي وتتسهل اموركم
-
أخوان تعليقا علة هذا الموضوع المهم خلوني احجيلكم قصتي
اني مقدم عالاي او ام بغداد من الاول 2009
تذكروني بال رابع وقابلت الاولى
وبعد شهرين فحصت طبي
بالمقابلة الاخ الاردني كلي عندك مشروع زواج قريب كتلة نعم
كلي حسويلك هولد حتى تسافر انت وزوجتك سوية لان اذا ممتزوج لتحلم تسحبهه الا ورة 5-6 سنوات
واذا متزوج وتسافر وحدك تطول 3 سنين
واخرت نفسي الى ان تزوجت قبل ايام وهسه ضفت زوجتي على الكيس
تأخرت وماعرف شكد حتاخر.......بس احسن منفرق العائلة سنيييين
الفرصة تجي مرة وحدة.......استغلوهه ابشع استغلال واليريد يتزوج خل يتزوج ويطلع وية زوجتة لان يتبهذل وراها
لاسامح الله معجبهم الوضع او انضاقوا......طريق العودة مفتوح
ارجوا ان تخلي زوجتك تقرة كلامنا لان المستقبل النا ولاطفالنا.....ولامستقبل في بلدنا الحبيب...يوميا نسمع اخبار سيئة....كافي لان تعبنا وملينة كلنا والله.......الله يسهل عالكل.....وربي تحقيق امل ومراد الجميع
اخوكم د.كوكس
-
شكرا للاخ dr cox
عزيزي لقد قدمت لها كل النصائح وحتى اني قمت بالعطائها اجور طائرة الرجوع الى العراق في حال لم تتحمل الوضع ولقد فهمتها بوجود الانترنيت للتواصل صوت وصوره وغير اني ابلغتها بانها تستطيع السفر بعد اقل من سنه من تاريخ سفرنا الى امريكا والكثير والكثير من التنازلات ولكن اقولها ومع الاسف ( الاقارب )
انا ارسلت البارحه الجمعه ايميل لل اي او ام ابلغتهم بالغاء اسم زوجتي من الكيس نمبر
الفرصه تاتي مره واحده في العمر ولن اتنازل عنها لو ما يحدث
ولكني اجدد طلبي لكل الاخوه كل من لديه معلومه فليزودني بها للصالح الخاص والعام وشكرا للمشاركه
-
السلام عليكم أخي سامي الله يسامحها زوجتك والي اعرفة راح تتأخر مثل ماذكرتلك الاخت ريم يعني لو موافقة اختنا زوجتك بأن تسافر وياك واذا ماعجبها الوظع ترجع جان ماراح تتأخر وجان الامر صار أسهل من انو تفصلها من الكيس اتمنالك الموفقية والله يسهل أمرك والحمد لله على كل شي بالنسبة الي تزوجت بال2000 وزجتي اهلها اهنا بالاردن وبال2004 رجعت للعراق وابوها رفض انو تروح ويايا خاف عليها وماردت على ابوها وقالت اني الحك زوجي لو يروح للنار وتحملت الاوظاع بالعراق من كهرباء ومفخخات والاوضاع السيئة وتعرضنا للموت اكثر من مرة بس ربنا نجنا والحمد لله واخر المطاف اجانة تهديد بالذبح ورجعنا للاردن وهسة طلعنا توطين لامريكا وهم ابوها ممقتنع وهي تقول للموت وياك اني متأكد من انو اختنا من تسافر انت بخير وسلامة راح تتندم بس بذاك الوقت ماراح ايفيدها الندم تقبل تحياتي اخوك حمادة عزو@
-
أن بعض الأقارب .......... عـقـــــــــــــــــــــــــــــــــــــــــــــــــــــارب
Baguncero
-
السلام عليكم جميعا... أختي الفاضلة الرجل مامقصر وياج و مقدم كل الحلول و حتى اذا ما عجبج الموضوع تقدرين ترجعين ليش ما قبلتي و بعدين انتي ما تقدرين تفارقين اهلج شلون راح تقدرين تفارقين ابو البيت... !!!
كل مشكلة و الها حل راجعو وضعكم و تقدر تبعث ايميل تلغي بية الايميل الاخير لاتخلون عنادكم يطلع ويأثر على مستقبلكم
اختي اني اخوج و انصحج بان المرية المتزوجة ما الها الا بيتها و رجلها
اللهمة يوفقكم
GM2010
-
اخي سامي محمد
واخي ابو علي العويسي
انتضروا تلفون من المنظمه وياريت اتكون متواجده الزوجه لان اذا مكانت موجوده راح يتاخر الاتصال الثاني وتنشتلون
وبعدها باسبوعين او اكثر راح يبلغوكم بالاجراء التالي وهوه تحديد مقابله منفصله
اختي الغاليه ام مصطفى
الف شكر على هاي الرساله الحلوه والي تفيد كل المتوجهات الى امريكا
وفعلا سرد جميل ومفصل وكلام واقعي ومقنع
ممنونين منج اختنا العزيزه على هاي المشاركه المفيده
-
شكرا لكل من قام بالمشاركه
يا اخ حماده عزو شكرا للمشاركه وكما قلت ستاتي لحظة الندم
يا اخ Baguncero كلامك صحيح وانت وضعت يدك على الجرح
يا اخ GM2010 شكرا على المشاركه ولكن الامر ليس عندا ولكن تخيل اذا تم تحديد موعد سفر ورفضت الذهاب معي تخيل ما الذي سيحدث حسب ما قرات في المنتدى بانه يتم أعاده لكل العمليه
ويا اخت العبير شكرا على المشاركه ولا داعي بان اتشاجر مع زوجتي فهذا موقع هجره وليس موقع مشاكل زوجيه وفقط والشجار والاغصاب لن يجدي لان الاجبار ليس حل للمشاكل وانما لغة الحوار هي الحل الامثل وليس المشاجره
يا اخت ريم شكرا على المشاركه وعلى التعليمات وانا قمت ابلغتها بان باي لحظه يتصلون بها ليتم تبليغها
ورجاء لكل من لديه اي معلومه بهذا الخصوص تبليغنا للصالح الخاص والصالح العام وشكرا