السلام عليكم ورحمه الله وبركاته
حبيت اسأل سؤال لكل المغتربين
و كلنا نتمنى نرجع لو نشووف بغداد حتى لو من بعيد.
بس شنو رأيكم لو عدكم ساعة وحدة انزورون بغداد!!!!
تروحون لو لا ؟؟؟؟؟
واذا تروحون ...
شنو اول مكان تفكرون تروحوله ؟؟؟
بأنتظار اجوبتكم يا مغتربين
اني بالنسبة الي اروح ابوس ايد امي
اخوان اذا اريد احچي وافتح گلبي للايام الحلوه مايبقى بيه حيل .
شتذكر بغداد وايام ابو نؤاس وحدايقه والكرادة لو باب الشرجي والمنصور وحدايق الزوراء
ومطاعمه وحتى مطاعم البتاوين هم احن الهن رغم عدد الذبان الموجود بالمركه خصوصا ;D
وكراج النهضة وكراج العلاوي چم مره بايت هناك من تنسد بغداد ومرات
السايق يحرك الفجر واني نايم وما اگعد الا وره ساعه هههههههههه.
لو اتذكر البصرة . الجزائر ومناوي باشا وابو الخصيب وبساتينها الرائعة
وشط العرب والشختورة والجوله بــ 1000 دينار هههههههه
وكباب حجــــــي خضير وابو عباس ابو السمبوسه خضير بالعشار وكورنيش شط العرب ومنتزه الخورة
والزبير ايام العيد. والشرجي (الرطوبة العاليه) والاعدادية المركزية وايامهه الحلوه.
لو اتذكر الكوت وشارع المشروع وساحة العامل ومطاعمهه ومطعم 1000عافية
ومدرستي واصدقائي والهورة والعباسية والحيدرية وداموك ودجلة والكورنيش والمقاهي والحدايق
وسدة الكوت وملعب الكوت والدوري چنه صغار نروح نشوف لعبات نادي الكوت .
لو اتذكر الموصل وباب الطوب والدواسة وشارع حلب ابوالسينمات وسوگ النبي يونس
ودورة النافورة وشارع المصارف والمجموعة ومطاعمهه الرهيبة ولحم بعجين ام الربيعين
والغابات والمقاهي على دجلة والزوارق بدجلة.
لو الفلوجة ام الخير والمطاعم المشهورة والدليمية وحجي حسين وايام العيد الحلوه هناك
وعامرية الفلوجة ومجمعها السكني الي بي ناس من كل محافظات العراق والحبانية والسفرات.
لا تخبلني ابو الضياع بكل مكان هناك عندي ذكريات بس هسه ما اريد ارجع حتى لا اكره ذكرياتي هناك
وحتى ابقه محتفظ بحنيني وشوقي لهذا البلد الي كان في يوم من الايام مليء بالخير والحب واتمنى يرجع
باسرع وقت.