ankawa
منتدى الهجرة واللجوء => الهجرة و واللاجئين => الموضوع حرر بواسطة: لور في 00:02 22/09/2010
-
اخواني الاعزاء سلام عليكم
اخواني انا بالعراق وعندي اقاربي اخبرني بوجود منظمه للهجره تقبل لاجئين من داخل العراق وهذه المنظكه لها فروع في العراق والمنظمه موجوده في تركيا ولديها فروع في العراق وتقابل العراقين ولاحت قدمت عليها ودفعت 200 دولار للمعامله وتصلت بالمعتمد لان الموعد مالتي بسنة 2012 على مود يقدم الموعد قال لي تدفعين 25 ونقدم الموعد مالتك وعلى اساس هاي الفلوس للمحامين الي يخلونهم ودايخه وما اعرف خاف ابيع ذهبي وغراضي وكل شي ما احصل اخوان منتظره ردكم ونصيحنكم؟
السؤال للاخوان
هل صيحيح اكو هيج منظمه للهجره تسهل السفر الى الدول الاوربيه
وبصراحه انا ما املك 25 ورقه راح اضطر ابيع ذهبي واغراضي اذا تنصحوني بيها ومنتظره ردكم
وهذا الرابط او الموقع مالتها
http://irtrioe.org/index.php?option=com_content&view=article&id=2&Itemid=3
http://irtrioe.org/index.php?option=com_content&view=article&id=52:2010-07-24-16-21-29&catid=1:aalan&Itemid=5
-
اختي الكريمة هاي المنظمة كلاوات وهية تقديم الاستمارة 50 دولار وليس 200 دولار
وتقبلي مروري
-
ارسالي العنوان الى منظمة الهجرة الدولية لشؤن اللاجئيين واستفسري منهم اكو هيجي منظمة او لا اذا كالوا ماكو لا تجازفين وتنطين فلوسك تاكدي منهم بارسال العنوان
-
اختي الكريمة ديروا بالكم من المحتالين.
-
اختي الكريمه هاي الطرق صارت قديمه
لا تتصورين اكو سفر وقبول الا عن طريق الامم المتحده او دائرة الهجره
اما اي شغله غيرها تعتبر نصب في نصب
حافظي على ذهبك واغراض بيتك احسن من الندم لان اليروح مايرجع
تقبلي مروري
الفريدو
-
اختي نور طبعا انت حقج والغركان يتعلك بقشه ولكن رب العالمين يكول( ولا ترموا بأيديكم الى التهلكة ) حبيبتي اني اعتقد الشغلة المضبوطة والأكيدة والي ما بيهه خوف هي التقديم عن طريق ( un ) او عن طريق (iom ) او التقديم على ( فيزا الشنغن ) من سفارات دول اوروبا الي بدول الجوار . اما هذه المنظمات الوهمية والي تشتغل فقط عن طريق الأيميل فما اعتقدهم صادقين والمفروض يثبتون مصداقيتهم للناس على اقل تقدير لازم الناس تراجعهم بمقراتهم وتندل طريقهم وتشوف موظفيهم . موكاعدين مجموعة نصابين يجرون بفلوس العالم ويضحكون عليهم ...... اولي على العراقيين الكل كامت تاجر بيهم حتى اتعس الناس والدول . وتقبلي نصيحتي وديري بالج مويامن تعب يامن شكه ويامن على الحاضر لكه . وبالتوفيق . اختك كوكي .
-
اختي العزيزة
ابد ابد ابد لاتفكرين تنطين اي فلس لانه كلها كلاوات بكلاوات اللهم هل بلغت اللهم فاشهد
-
اختي والله راح احجيلج عن تجربة هذولة منظمة وهمية وجذابين واني سجلت عدهم وتندمت لان سجلت وحتى للامانة حتى اتصدكين اني سجلت ابمكتبهم اللي بكركوك قرب المحكمة القديمة الطابق الاول اختي هذولة جذابين نصابين حرامية ديرو بالكم اخواني احد يروح عليهم لان هذولة يلعبون بمشاعر الناس واعصابهم ويستغلون حاجة الناس للسفر والخلاص من هالجحيم وهاي عن تجربة شخصية وليس حجي سمعتا
-
لالالالالالالالالالالالالالا احذري من هذه الالاعيــــــــــب
هاي الموده ماشيه هالايام وخصوصا من قبل الاقارب
يعني اعرف شخص شقيقه نصب عليه وبيعه كل مايملك
وهسه الرجل في اسوء حالاته تصوري شقيقه نصب عليه
والكثير الكثير من هذه الحالات حدثت بالعراقيين .
وما نگول الا حسبنا الله ونعم الوكيـــل
-
http://www.ankawa.com/forum/index.php/topic,418827.msg4640124.html#msg4640124
-
اختي دزيتلج عالخاص لان ابوكتها مالكيت الموضوع مالتج وهسا بالصدفة شفت الموضوع فدزيتلج ايا مرة اللخ عالعام حتى تقريه انتي وكل الناس الطيبين يقروا حتى يستفادون من تجربتي ولايخطأون مثلي
الاخت العزيزة لور
السلام عليكم
اولا اعتذر عن التاخير بالرد كوني مشغول بعملي منذ يومين ولم افتح انترنيت
ثانيا بصراحة ضيعت موقع الموضوع مالتج بالمنتدى ولذلك دزيتلج عالخاص
ثالثا اختي العزيزة للاسف احنا العراقيين ناس عاطفيين بشكل ومكد ما كلبنا كبير بسرعة انصدك اليحجي حتى لو قبل مايكمل كلامة ويانا وهذا اللي صار وياي بس عرفت بالمنظمة الوهمية وصدك وهمية راسا بعدها بيومين رحت الى كركوك على اساس انه الفرع الرئيسيي مالهم ابكركوك وقدمت بشهر السابع 2009 وعلى اساس انه طلع القبول ورا ثلث شهور يعني بالعاشر وبعدين ضليت اتابع الموقع مالهم من موقعهم القديم الى ان صار هذا موقعهم الجديد اللي خليتي الرابط مالهم بي.
رابعا اختي العزيزة والله العظيم والعهدة على الرجل اللي جاوبني سالت واحد عراقي بتركيا بانقرة ويعرف جماعة التقديم باليوان وكتلا عليهم كلي بس لا هذولة جماعة كركوك كتلا اي كلي عمي هذولة جذابين والعهدة على كلام الرجل واصلا اني من راح اروح ان شاء الله اقدم بعد فترة هم راح اروح للتاكد منهم مرة اللخ ولو اني صار عندي قناعة بنسبة 90% انهم حاشا جنابكم كذابين
خامسا بس لاحضي من تفتحين موقعهم شلون اكو تغيير في بعض الاحيان في بعض المواضيع ونشر اعلان واخفاء اخر وتلاعب في بعض النتائج وانتي تقدرين تقررين اشكد هما نصابين حاشاكم
سادسا وهو الاهم صار عندي قناعة اكيدة انه يستحيل اكو تقديم للهجرة او اللجوء خارج العراق ويكون التقديم من داخل العراق
سابعا واخير هذا كل اللي عندي واتمنى انه انطيتج شي يفيدج وياربي الله يكون ابعونكم وبعون كل عراقي شريف عندا قلب واحساس وعقل يشتغل وما يكدر ايعيش بهالوضعية الماساوية اللي بالعراق
والسلام عليكم اختي العزيزة واني حاضر لاي استفسار اخر
-
شكرا جزيلا لكل من ساهم بتنبيه الناس من هذا النوع من الاحتيال واعتقد لو فعلا اكو هيج منظمة جان اسمه صار طبل وكان كسحت ال اي او ام ورجاء من كل الاخوة اللي يسمع بهلنوع من الاحتيالات ينبهنه امانة لان اني شخصيا لو احد اجه يكلي اكو هيج شي راسا اصدك واسجل بس الحمد لله والله يكثر من امثالكم اخوان
-
أختي الفاضلة :
آني دخلت للموقع مال هاي المنظمة المزعومة وشفت الكلاو الساطع اللي مثل الشمس ما يتغطى بغربال .
شوفي هاي العبارة( الجوهرية) الواردة في إعلانهم المرقم 85 ( علساس همّـه منظمين !) :
ان ممثلي المنظمة و على رأسهم الدكتور سيف الدين ده مريجي المفوض العام للمنظمة مازالوا يتدارسون مع جميع مسئولي الهجرة في الدول المستضيفة لغرض الموافقة على فتح ابواب الاستضافة و التوطين مجددا. .
هههههههههههههه .. يعني الجماعة بعدهم (يتدارسون !) مع الدول المستضيفة على أمل أن (تفتح !!) أبواب التوطين للعراقيين !!! . شفتي أختي شلون يصير الخرط والتدليس حتى يبوكون الناس المتلهفين !.
شر البلية ما يخرّب ضحك
-
معقولة اكو ناس ليهسة تصدك بمثل هيج منظمات عجيب , عمي لا تبيعن ذهبج و لا غراضج , الله يلعن الوكت و السياسين و كل واحد قشمرنة و ضحك علينا و كال راحيصير اعراق بخير
-
والله اختي اني ويه الاخوه ونفس كلامهم حكلج هم مبينين منظمه نصب واحتيال ويتلاعبون بمشاعر العراقيين ..
واذا صدك الهم القدره ع تسفير الناس جان الحكومه الموقره ما بقتها وغلقتها لان الحكومه ضد تسفير الشعب ..وحافظي ع ممتلكاتج ولا تمشين وره حجي المنظمات وان شاء الله الله يفرجها عليج وتكدرين تسافرين حارج العراق وتقدمين بشي رسمي ومضمون ..
اختك - شيماء
-
قفاصه, كلاوجيه ::) ::) لو اعرف بعد كلمات جان كلتها ;D ;D
-
مبقيتولي شي اكتبة اختي ديري بالج هذولي نصابة اسلم طريق ان تسافرين الى تركيا وتقدمين على اليو ان هناك خلال سنة تسافرين الى امريكا
هي اوربا الي ديوصل الها بعد معانات السفر عن طريق المهربين ديرجعو ه شلون يقبلون واحد كاعد بالعراق وينطوه لجوء او هجرة مع تحياتي
-
هؤلاء نصابة ومحتالين أحذري .
-
شفتي اختي شلون جانت الردود فلا تندفعون ولا تنطون اي مبلغ لان اني هم من خابرتهم وسالتهم ماكو مجال لتسريع الملف كلي واحد منهم اوكي بس لازم تدفع مبلغ 25 ورقة واحنا انوكلك محامي يسرعلك بالملف دشوفي شلون كلاوجية
-
الى كل الخيرين والطيبين العراقيين ...
ومع كل احتراماتي لكل من نصح بهذه الموضوع. الموضوع ميحتاج أتكلم بيه اكثر .. هذا الموقع سواه ولد لشركة او منظمه والى الان مدافعين الاشتراك وهوه بالمناسبه من النوع الرخيص جدا" واشتراكة ميجاوز 75$ بالسنه ..
ومع كامل احترامي اكو منظمه معتمده تشتغل على الياهم والجي ميل والهوت ميل مو حتى اي او ام تكول من مسؤلك الي عنده ايميل رسمي مو؟؟؟؟؟؟
مثل ماكلنه .. اختي العزيزه رجاء" الانتباه اكو غيرهم هوايه وهذوله من زمن السابق موجودين بعمان جانوا وراحوا الى سوريه وهسه الله يجرم بتركيا هيه تركيا بلد التهريب والنصب والاحتيال ..
هذا مو كلام بس عن تجربه ..من جنت اشتغل على طريق عمان وبعدين سوريا والنهايه بتركيا ...واذا تريدون هيجي مواقع اكو كلش هوايه
...المنظمه الاجئين حددت مكانات معروفه جدا" وغيرة كذب ..
والله يحفظ الجميع من هذوله النصابين
-
اختي العزيزه احذري من هيجي نماااااااااذج
الله يسهل امرج ويريرح بالج.
لكم مني كل الحــــب
-
اختي العزيزه .هذا الزمان اخر الازمنه والاحاديث الشريفه تكول .( في اخر الزمان حسن الضن غير جائز )!!!!!!!!!!!!!!!!!!
-
اختي العزيزة ظمي ذهباتج وحطي عينج بعين الله وانسي موضوع هذي المنظمة وتوكلي على الله وقدمي لوعلى اليو ان لو اي او ام
وانشاء الله ايصير خير ومثل مكالو الاخوان ترة ذولي قفاصة وكلاوجية فديري بالج ؟
-
الا لعنة الله على القوم الظالمين اختي ديري بالج وستري على نفسج ترة اليروح منج ميرجع بسهولة وكل هذا وقهر التفكير اذا نطيني فلوسج اختي اسأل الله ان يوفقج ومثل ماكالوا الاخوان اليو ان والاي او ام اضبط شي وتمنياتي لك بتحقيق الاماني ارجوا ان تتقبلي مروري اخوج حسين السالم.
-
اختي الفاضلة بعد التحية
ارجو منك الحذر من هذه المنظمات فهي كلها تقوم بعمليات نصب واحتيال واليو ان يحذر منهه كثيرا فليس لك حل غير اللجوء مباشرة الى اليو ان وسوف يقدمون لك المساعة طالما انت متظررة في العراق
ولك الشكر
-
اختي العزيزه للعلم وتاكيد على كلام الاخوان هذول محتالين واحب ابلغج واكدلج ماكو غير اليوان او اي ام
انا من عمان قدمت وحاليا والف الحمد لله في كندا حاليا بس اكلج اقلبي الموضوع لصالحج شلون
طبعن هذا الكلام عام 2008 في شهر 11 او 10 ماتذكر قدمت على اليوان في عمان وكان وضعي جدا صعب ماعندي اقامه وجنت احاول باي طريقه اخرج ماطول الموضوع عليج كل سته اشهر نجدد لازم بصراحه 6 اشهر تعمي الي كل شهر 45 دينار اردني غرامه ضربي الرقم في 3 يعني 180 بالشهر تقريبا وسته اشهر يعني هجمان بيوت عدا الاجار واكل وشرب ...الخ
طبعن الف الف الحمد كان كابوس وتعدا القصد جنت احاول اطلع وفي الاخير وصلت الى ناس كالولي احنه نسرع الموضوع في اليوان بس تطينه رقم بس قبلها مبلغ من الفلوس وماريد ادخل بالتفاصيل يعني اكو عدهم ناس بداخل اليوان ومن هل الافلام
كان عندي الرقم هاتف والقاء يتم في كافتريه بس شلون قلبت الموضوع الى صالحي بصراحه في الفتره القادمه للتجديد في يوان عمان وايامها جانت مزدحمه جدا ونروح من الصبح لاوم وبارده المهم بصراحه كلش ضجت واستفزيت وعند المقابله يابه شوكت تسفرونا وهذا الحجي وتعرفين اجابت الموضف يوجد نظام ودور وووو واني بدون قصد وتفكير طبعن قبل مادخل اشوف بروشورات على الحائط وتاكيد من عمليات النصب وناس تاخذ فلوس للتسريع ومن هاي الافلام وبصراحه مثل مكتلج بدون وعي مع نقاش الموضف وجنت تقريبا بادي اريد امشي بهاي العمليه وبصراحه جنت بعدني مدافع شي وميرفون اسمي او رقمي الجماعه الحاجي وياهم لكي اطيهم فلوس كتله الى موضف اليوان اكيد انتوا هذا الكاتبي البروشورات مالت الناس الي يسون النصب على امثالنه وكاحت انته تحجي انتظر دور واجراءات فكتله اكو ناس طلبو مني فلوس يسرعون بالمعامله وبصراحه اني غركان وحيوصل الامر بي انام بالشارع وانته كاعد دكلي اصبر اني احسن شي حشوف اي طريقه قانونيه غير قانويه بس اريد اسوي حل الى نفسي فكلي يعني شنو تهريب كتله اي طريقه واكو طريقه ناس تكول تاخذ فلوس وتسرع بمعاملتي في اليوان طبعن صفن عليه وطلع من الغرفه وتاخر عليه فد نصف ساعه بصراحه اني كلت الاصت عليه وممكن هسه يتصلون بالمخابرات شرطه يسفروني بس كل بين نفسي اليصير يصير والله رجع الموضف ومع وحده وكلي ممكن تعيد الحجيته
ثم كلي ممكن تهدي نفسك وتشرحنه ملخص الموضوع اطيتهم وصف الشخص القابلته وهاتفه وبصراحه شويه بهرت الموضوع عليهم وبعدها كالولي انتضر مكالمه من عدنا وترجوني بدون مادفع اي فلس وهذول نصابين مهما كالولك حتى كلي لو يراوك باج مالتنه لاتصدقهم لانه نحن هنا جميعا موظفين اليوان في جميع العالم ليس لدينا اي دور بالموافقه او الرفض يوجد ناس خاصين ولايستطيع كان من يكون يصل الهم وهم ناس اصحاب رواتب جدا عاليه ومراقبيين ومحد يكدر يرشيهم او يوثر عليهم واي منضمه او شخص يدعي يستطيع التاثير عليهم كذاب كذاب فختي ملخص الموضوع اني بصراحه بعدها بشهرين فعلن تحول ملفي وبصراحه بعدها اتصلت بالرقم الطيته لجماعه اليوان طلع مغلق وبصراحه اني خفت اسال اليوان على الموضوع والناس هم مسئالوني علي وراها سافرت واني حاليا بكندا
اختي الملخص مهما يعرض عليج واحد يكلج ادر اسوي وافعل ترى اكثرها نصب وبالاخص مايخص اليوان واختي في حال سفرج عن طريق اليوان هو افضل واسلكم طريق يعني هو الطريق الصح وبس
واذا وصلتي الى اي دوله منو يضمن الج يوافقون عليج كلاجىء ممكن بعد سنه من وصولج يرفض الموضوع ويسفروج وهوايه صارت وياهم في السويد والدنمارك ناس وصلت تهريب وبعده بسنه سفروهم ولم يقبلون لجوهم هذ الحجي جان قبل اي اعداد قليله عمي هذا هسه العالم كله يطلب لجوء باسم العراقي هو جنسيته عربيه اخرى ويدعون هم عراقيين علمود اللجوء
نصيحه لاتفكري بذول النصابين وحافضي على نفسج وفلوسج والله يفرجها عليج يارب وتصلين الى بر الامان