ankawa
منتدى الهجرة واللجوء => الهجرة و واللاجئين => الموضوع حرر بواسطة: Alrwad في 22:43 01/10/2010
-
السلام عليكم اولا
وثانيا اعتذر عن هذا الانقطاع الطويل بسبب الانشغال بالعمل. شلونكم وشلون المنتدى. ما شاء الله بعدة منور بوجود الاعضاء والاداريين الورود وبوجود الاعضاء الجدد اللي ضايفين عليه مزيد من التألق.
انا اكملت مقابلتي في السفارة الامريكية في بغداد في الشهر الرابع (نيسان) من هذه السنة 2010 وقمت بتسليم الاوراق المطلوبة والجوازات الى الموظف في القسم القنصلي. ومنذ ذلك الوقت لم استلم اي رد من قبل السفارة بخصوص الفيزا. ارسلت ايميل الهم بعد شهر ونصف من المقابلة ولم يردوا عليه وارسلت ايميل اخر بعد مرور 3 شهور وكان الجواب بان المعاملة تحت المراجعة الادارية وارسلت ايميل اخير منذ اكثر من شهر للاستفسار ولم استلم اي رد ما عدا المرسل الالي الذي يؤكد استلام الايميل.
طبعا بالمناسبة اكو هواية ناس اعرفهم قابلوا بعدي وسافروا واني لحد هذه اللحظة لم استلم اي خبر منهم. الصراحة ما اعرف شنو السبب اللي ادى الى تاخير الفيزا, اتمنى من الاعضاء الحلوين ان يشاركوني آرائهم بخصوص هذه المسئلة وهل هناك حالة مشابهة. شكرا مقدما لكل الموجودين والقائمين على هذا الموقع الرائد.تحياتي
الرواد
-
اخي العزيز .....
حالتك ليست الاولى ,,,,,, كل كيس و لها حالة خاصة ,,,,, الكيس مالتك ما تعتمد على وقت المقابلة ,, يعني ما الها شغلة اذا ناس وراك قابلوا و استلموا و سافروا ,,,,, في كثير من الامور الي ترافق الكيس و المقابلة و المعلومات المقدمة و تاريخ الشخص و المقابلة و انطباع القنصل ,,,,,,,
بالتوفيق ان شاء الله
-
هااااا والله هاي مو خوش سالفة...الله يكون ابعونك...بس لا ضيعوا الجواز..ههههههه..اخوي ان شالله تستلمه وتروح لامريكا ...تقبل مروري...
-
لعد صدك انته صارلك هواي ما طاب للمنتدى ;D ;D
عمي سالفه صارت عاديه مال تاخير بعد مقابله مو جديده المهم لاتخاف تجيك وين تروح الفيزه ;D ;D
-
يعني صار اربع اشهر هواية لو اتحاول تتصل بيهم غير الايميل او روحلهم شوف شنو السالفة اتحرك اخوية لضل بس ع الايميل
تحياتي الك
-
اخي لا تهتم عادي بس اللي اشوفه انه يمشون المعاملات بسرعة اصلا من رحت للبريد لكيت كومه طرود مال اس اي في بس دزلهم رسالة و شوف شنو السالفه
-
السلام عليكم
هاي شنو اخوية الغالي الرواد والله كل ظني انته هسه بامريكا
اخي العزيز مثل ماكالوا الاخوان حاول تشوف طريقة للاتصال بالسفارة غير الايميلات
اتمنى شغلتك ما تطول وتسافر بالقريب العاجل باذن الله وتقبل تحياتي
-
اخوية Alrwad
شلونك والله يساعدك ويساعدني على طول الفترة بس ما عدنة غير الصبر اني هم وياك بنهاية الرابع مقابل وجنت ادزلهم يكلولي انت انت دخلت مراجعات ادارية اضافية اصبر واحنة نشكر صبرك اني شسويت فد يوم حيل ضجت ودزيتلهم ايميل مرتب بي رزالة وكلتلهم اريد جوازاتي محتاجه كلت اخاف يضيعوهه ابقيهن يمي ومن يكملون الاجرائات الادارية عد ارجع ادزلهم اياه هاي اذا كملت على كل حال هم ما قصرو دزولي اياهم وكلولي من تكمل المراجعات الادارية اندزلك ايميل حتى ترجعلنة الجوازات
والله العظيم حياتي كلهه تخربطت وصرت معلك بين السما وبين اللكاع حياتي شبه متوقفة بسسب الفيزا لا اكدر اشتري شي للبيت لا اكدر اشتري سيارة اخاف تجي الفيزا والله ما ادري هاي هم ديجازونة جان اشتغلنة وياهم لو ما ادري شنو قصدهم
ان الله مع الصابرين عسى ان تكرهو شيء وهو خير لكم وعسى ان تحبو شيء وهو شر لكم خليهه على الله احسن
-
شلونك اخونا ابو لينا لايظل في بالك هو التأخير يشل الواحد وبعد ما يعرف شيسوي بس هي تجي الفيزا وين تروح توكل على الله وربي يسهل امرك.
-
شكرا جزيلا الى كل الاعضاء الورود اللي شاركوني الموضوع. وشكرا للاخت العزيزة سرى والله يسمع منج ونخلص من معاناة الانتظار. لان الصراحة مثل هيجي حالة تكون شغلة مصيرية والواحد ميعرف اللي راح يصير شنو. يعني صارلي 6 اشهر حياتي متوقفة وكلشي ما اكدر اسوي ولو شي بسيط لان اكول اخاف تطلع الفيزا و اكون مو جاهز ويومية على هل منوال باقي لحد هسة. طبعا حتة الايميل مالتي زهك من كثر ما ادخل واجيك بيه. بس اكول الله كريم وساعة عن ساعة فرج. تحياتي الكم
اخوكم ابو لينا
-
يابا كولو يا لله راح الهوايه وبقه القليل
-
ايساعدك الله طبعا اسوء شي بالهجره الانتظار بدون موعد لان كلشي متكدر تصرف اني منتظر المقابله شهر ال 12انشاء الله ويارب التوفيق الك والنا وتسهيل امرنا ...او لتنسى <عسى ان تكرهو شئ وهو خيرا لكم ..تحياتي