ankawa
منتدى الهجرة واللجوء => الهجرة و واللاجئين => الموضوع حرر بواسطة: windy في 10:23 13/10/2010
-
السلام عليكم اخواني واعزائي الكرام
اليوم راح احكيلكم شنو اللي صار ويانا من اول دخولنا الى اميركا الى الان بشكل مختصر
طبعا احنا كانوا محددين النا ولاية بنسلفانيا وطول فترة السنة ونصف واكثراللي انتظرنا بيها الامنية كلما نسالهم بعمان يكولون ولايتكم بنسلفانيا مدينة فيلادلفيا حتى اتعرفنا على ناس وعرفنا اسم منظمتنا بس لما اتصلوا بينا على خط الرحلة كالوا انتو رايحين على ولاية فلوريدا طبعا هذا لان رايحين بلا كفيل بكيفهم وين ميودوك يودوك
واول ما حطينا رجلنا بمطار فلوريدا واستقبلنا موظف المنظمة العراقي واحنا كيفنا لان عراقي تفاجئنا انه هذا الموظف يحجي على العراقيين وهم عبارة عن 4 عوائل قبلنا بحرقة ويسب ويلعن (تخيلوا هذا اول لقاء وية المنظمة )
بعدين اخذنا للمنظمة والتقينا بالكيس مانيجر وفهمتنا انه الويلكم مالتكم 900 لكل شخص واعطونا كفت 100 دولار لكل واحد اني وزوجتي بعدها ودونا للبيت اللي اختاروه النا واعطونا مجموعة خواشيك وسكاكين مالت فواكه اذا اشوفهم بالزبل ما اخذهم
دخلنا البيت عبارة عن غرفة كبيرة كل الاغراض فيها وممر صغير بيه بس قنفة وحدة(يعني غرفة وصالة)بس الغرفة الوحدة نفسها للنوم والاكل والتلفزيون وكلشي (مومشكلة )بس المشكلة بالحشرات والصراصير اللي اكتشفناها لاحقا فخابرنا المالك وبعثنا واحد يرشرش بالبيت بكل الزوايا بس بلا فايدة .
طبعا الاكل او الغدا اللي جابوه النا عبارة عن 4فلافل كبيرة وسلطات حسبوه علينا 38دولار فقط
وراها بيومين رحنا للمنظمة وقعنا اوراق وشوفونا برنامج العمل مالتهم ويانة (وبعدين اكتشفنا لاعدهم برنامج ولا بطيخ وحتى من يحددون وقت او ساعة ما اتذكر مرة التزموا بيها بينما بالدورة التثقيفية رسمونا صورة تختلف تماما )حتى مرة كلي الكيس مانجر ترى كل اللي تعلمتوه بعمان بالدورة التثقيفية خطا
وراها تركونا خمسة ايام لحد سال علينا ولا ابد فاضطريت اتصل بيهم واذكرهم بموعدنا وخابرت العراقي لان احنا بذيك الفترة منعرف غيره تفاجئت انه صار عصبي جدا وظليت عشر دقايق بس اهدا بيه
ودونا اول شي على الوك وتلقيحات الطفلة وراها رجعت الصنطة بعد اسبوعين تذكرونا اخذونا على السوشل انتظرنا عشرة ايام يلة سوونا مقابلة على الفو ستامب يعني احنا تقريبا 20 يوم بس نصرف اكل من عدنا لاتكولون وين الكفت 100دولار وينها فلوريدا ولاية سياحية وكلشي بيها غالي واحنا اضطرينا من الكفت نشتري نواقص البيت الاساسية مثل قوري سكاكين خواشيك ادوات ومواد تنظيف كلنا هسة راح يجينا الفود ستامب بينما كل المنظمات تقريبا اول شي يسووه للاجئ هو السوشل حتى على رقمه بنفس اليوم يسوون مقابلة الولفير الفود ستامب والكاش والمدكيت فيستلمون الفود من اول اسبوع
وبما انه كاعدين لاشغلة ولا عملة ولا تلفزيون ولاانترنيت طلعنا نتمشى وعلى وصف الموظف العراقي دورنا ودكينا الباب طلعنا واحد عراقي طار من الفرح من شافنا اتذكر علامات وجهة عبالك شايف واحد من اهله حسينا عنده حجي هواي واول ما كال اني لو كنت ادري بيكم او اعرفكم كان اكللكم لاتجون هنا!! شنو القصة سالناه اثاري المنظمة مأجرتله بيت بيتنا بالنسبة اله جنة ! حار جدا وبصيف فلوريدا مثل حر الهند وطبعا صراصير تطفر بكل مكان وفوك هذا خلوه قبلها بفندق لمدة اسبوع او اكثر خصموا من فلوسه 1000 دولار وهذه هي اول عائلة عراقيةتدخل هذه المدينة وعلى هالمنظمة
الشغلة الثانية اللي تفردت بيها هذه المنظمة دون سابقاتها ولاحقاتها وهذا عن المالك انه وحدة من العوائل كعدوها بيت كانت بيه اثاث الظاهر الامريكن اللي كان ساكن ترك اثاثه المنظمة حسبتها على العائلة الاثاث وكطعوا من فلوسهم سعره وجابوا وصولات رسمية بهذا !!
طبعا اني نسيت ان اكللكم انه احنا طلبنا من المنظمة تغيرنا البيت من الاسبوع الاول بس هم رفضوا طلبنا وكالوا اذا تطلعون نتخلى عنكم ومنكمل اوراقكم فسالناهم اذا شفنا احنا بيت مناسب وبنفس الايجار تقبلون كالوا انتو دوروا بيت وخبرونا الى راس الشهر طلعوا منطين شهرين سوية واحنا كاعدين ندور بيت واكثر من هذا قبل راس الشهر خبرناهم نريد نغير الولاية ومن وراهم راحت علينا ايجارشهر والتامين كله ولما عاتبناهم كالوا المالك طلب ندفعله الايجار بداية ونصف الشهر نحجز البيت على الشهر الجاي زين ليش مكلونا حتى ندبر امورنا ماادري المهم من اتصلت بالمالك وكتله طلع ميدري بس طبعا بعدين غلس ليش لا
مرة او اكثر حاولنا نطلع ونتعود على الطرق ونعتمد على نفسنا ونستغني عنهم ضعنا مرتين بالاضافة الى صرف الفلوس النفر عدهم بالباص 1.5دولار فتركنا الشغلة وخاصة انه متكدر بباصات فلوريدا تظل تفتر بيها لان التبريد قوي رجعنا مرضى خبرناهم بعدها انه احنا نريد تودونا السوك نتسوك كالوا احنا ندليكم مرة وحدة بس وبعدين تعتمدون على نفسكم وما طلعونا الكارت الشهري المخفض الابعد ماخلصنا خردة! بعد اكثر من شهر وبعدين من قررنانترك الولاية وجابونا الحساب طلع الولكم 1100 مو900 على اساس انه ال200 تاخذها المنظمة مالت توصيل العوائل واحتياجاتهم( ماشاء الله) بس بالطوارئ تطلع ال200 زين واذا ماكو طوارئ ؟ ما اعرف مع العلم احنا سالناهم وكلنالهم عدنا ناس بنيويورك اخذوا 1100 كالوا هذا لان نيويورك غالية اللي حصلناه منهم 300دولار فقط واحنا بس شهر وعشرة ايام بالبيت والولكم مالتنا 3300 بعدين حنوا علينا والله هداهم واشتروا اثاثنا.
وحدة من الامور اللي اريد رايكم بيها انه اخونا العراقي اللي يشتغل بالمنظمة كان ينقل كل السلبيات والقضايا اللي كانت تحصل بالعراق للكيس مانجروا وزملاءه للي اقصده مو الاخبار بس اللي يصير بين الناس ومرة احنا مجموعة كاعدين من العوائل وبعد النقاش على وضع العراق والحكومة وووو
كال اني كل مكسرات العراقيين حاجيها للجماعة يعني المنظمة يعني برايكم اخوان هذا مو راح ياثر على تعامل المنظمة معانا لولا؟
اخواني اني متندم لان مااجيت بكفيل اقلها كفيلك ياجرلك بمنطقة زينة تعرفها وباقي فلوسك انت تستلمها حتى مو الا يوديك لان احنا منظمتنا ما احتارت بينا مرة وحدة وتركتنا
عذروني على الاطالة اني حكيت مقتطفات ومو هذا كل اللي واجهناه هذا جزء قليل
المهم انتو تحسبوها زين كفيل لو بلا كفيل قبل متجون ولتكولون راح احد يحير بينا واحب اكللكم ترى موكلشي اللي توقعه راح تعرفه هذه قوانين مو مجرد انكليزي يعني مو مثل ما كالوا تعرف فلوسك وين تروح انت جاي غريب ومأمن وكلك ثقة قابل راح تكللهم طلعولي كل اوراقكم واذا طلعوها شراح تفهم اصلا اذا لحيت يبدون يعاملوك بشكل مختلف صدكوني العوائل تيقنوا انه ناكلوا وميكدرون كلشي يسوون بس ارجع واكول هذه التجربة ربما تكون نادرة يعني ترى كل واحد وحظه
اكو ناس ماعدها كفيل وارتاحت مع منظمتهم واكو العكس وبالنسبة اللي لو يرجعوني افضل اشوفلي كفيل
اعذروني على الاطالة اتمنى التوفيق ولا تستعجلون علي اوعدكم ارد عليكم بالوقت المناسب لان هسة احنا كلش مشغولين
بالمناسبة هذه الولاية سياحية من الدرجة الاولى يعني متفيد اللاجئ ...........
سبعة حجارات على فلوريدا
-
ان شاءالله شدة وتزول واللي جايات ياربي تكون اكثر انفراج الكم وترتاحون والايام الجاية اكيد افضل وكونوا اقوياء لمجابهة هاي الظروف متمنيا لكم كل الخير والموفقية والسعادة.
اخوكم:
شكوماكو -عمان-
-
أختي ماكلتيلنه اسم المنظمة اللي تسببتلكم بهذي المعانات , علمود غير ناس تحذر منهه.
-
اخي ويندي الحمد لله الي طلعتوا وخلصتوا من هاي الولايه
وان شاء الله تكتبلنا من ولايتك الجديده واتشوف الفرق
وياربي يوفقكم
-
الأخ وندي هذا العراقي الي أستلمكم أكيــــــــــــــد حليبة مو مال أم ......... حليـــــــــــــــبة مال مساعدات وعيونك
لأن لو عراقي وحليبة مال أم جان رجفت لحمتة علة بني جلدة بس هذا مشكوك بجذورة
قل حسبي الله ونعم الوكيــــــــــــــــــــــــل فقط لأ غير
والله يعوضك أن شاء الله
أخوك
Baguncero
-
الله يكون بعونك اخي ويبارك بيك ويسعدك بولايتكم الجديده
وهذه المواضيع المنطقيه الواضحه تساعد الكثيرين من اخوانك
المقبلين على سفر .
الف رحمة على والديك والحمدلله خلصت من هذه المنظمة التعبانه
وظروف الحياة الصعبة في فلوريدا
-
أخي وندي ألف مبروك على خلاصكم من العذاب .. ومبروك والحمد لله على السلامة في ولايتكم الجديدة ..
بس اذا ممكن الى أي ولاية أنتقلتوا .. وعلى يا منظمة كنتوا بفلوريدا حتى الكل يستفاد من المعلومة
وبالتوفيق بولايتكم الجديدة وأنشاء الله يجعلهه ولاية الخير والرزق يارب .
أختك كوكي .
-
السلام عليكم
الله يساعدك اخ وندي ويصبرك ان شاء الله ويعوضك كل الخير بولايتك الجديدة وان شاء الله تشوف الخير بيها .
-
مرحبا اخ وندي
الله يخليك انت وين باي مدينة بفلوريدا لان اني صارلي شهر اجمع معلومات عن فلوريدا لان كفيلي بيها ومتردده ان اكتب اواروح بغير ولايه تالي اليوم بس توكلت على الله ودزيت الاسماء لل اي او ام
وارجع هسه اشوف اللي كاتبة انت شنو هالصدفه صار عندي احباط بلكي تكلي باي مدينة انتو جنتو وهل المنظمة نفسها بكل فلوريدا ام تختلف من مدينة لاخرة
جاوبني الله يخليك
-
الاخ العزيز windy
من كل قلبي اشعر بالاسى و التعاطف معك للظروف السيئة التي مررت بها لكن اخي العزيز ارجو من حضرتك عدم التعميم على كامل ولاية فلوريدا. اول خطأ وقعت فيه هي مجال كتابتك هو انت كتبت وصلنا مطار فلوريدا و لمعلوماتك يوجد العشرات من المطارات في ولاية فلوريدا ففي كل مدينة اكثر من مطار. الخطأ الثاني انه انت قلت فلوريدا و كان من الافضل لو حددت اي مدينة في فلوريدا لانه بيها عشرات المدن الكبيرة منها ميامي و اورلاندو تالاهاسي و جاكسونفييل و كانزفييل و فيها القاعدة الفضائية كاب كانفيرال و غيرهم فأي مدينة تقصد. اما الخطأ الثالث فأنت لم تحدد المنظمة التي قامت باستقبالك . لانه حسب معلوماتي في فلوريدا ثلاث منظمات انسانية ناشطة في مجال مساعدة اللاجئين و هم (اولا المنظمة اللوثريةـ ثانيا منظمة خلاص العالم ـ وثالثا المنظمة الكاثوليكية الخيرية) فأي من المنظمات من قام بأستقبالك؟
ارجو منك اخي ان توضح كل المعلومات للاخوة اللاجئين الذين يرومون المجئ الى فلوريدا كي لا تلتبس عندهم الامور.
ان الامور في جاكسونفييل على غير ما ذكرت . فكل من اعرفهم و ان كان العدد محدود لم يتشكى احد من سوء المعاملة او الاستغفال من قبل المنظمات بل فقط من قلة المساعدات و محدودية المدة التي تشملها المساعدات. كما ان غلاء الاسعار ليس في كل الولاية بل لمعلوماتك تعتبر فلوريدا من ارخص الولايات حيث ان ضريبة المبيعات فيها هو 7 بالمئة بينما في غيرها يتراوح بين 8 و 12 بالمئة. الا انه في المدن السياحية الكبيرة مثل ميامي و اورلاندو نعم الاسعار غالية و هي مدن لا تناسب معيشة اللاجئ او المهاجر الجديد.
عزيزي
ارجو منك توضيح النقاط التي ذكرتها لك و ذلك للمصلحة العامة مع التقدير و كل الدعاء لك و لعائلتك بالموفقية في حياتك الجديدة.
اخوك ماجد
-
أتفق مع الاخ ماجد في كل ماقاله
نحتاج الى توظيح انت باي مدينه من ولاية فلوريدا و شنو أسم المنظمة ؟
-
الله يعينكم يارب ويسرلكم الامور والله من حزنى لما سمعته مااعر ف شاكتب بس حسبنا الله ونعم الوكيل ................ انشالله تلكون بالولايه الجديدة سكن احسن ومعامله زينه............. بس ياريت اتوضحون لكل الاعضاء انتو باى مدينه من فلوريدا
-
اخوانى الاعزاء الله يكون بعون جميع العراقيين
الاخ الكريم صاحب الموضوع كان صادق بكل كلام تفضل بيه لان لدى صديق مر بنفس المحنة اللى مر بيهة الاخ الكريم وهى فعلا منظمة تعبانة جدا وللاسف الشديد الشخص الذى يعمل بها يدعى انة عراقى ولكن عراقى من غير غيرة على العراقيين واسمه مهند طارق وللاسف الامريكان كانو عطوفين على الاجئ العراقى اكثر من هذا الشخص وصديقى مر بنفس هذة المحنة
نسال الله العلى القدير ان يفرج الهم عن جميع العراقيين فى الداخل والخارج
اخوكم ابو عبدالله كاليفورنيا سكرمنتو
-
هوه ابو الموضوع كتب الخبر الطيب وفلت !
-
اخى الى يوصل بامريكا مو الكل يكدر يكعد على النت اول مايوصل ماتعرف شنو ظروفه ولساه مامستقر وهوايه ظروف اتحيط بيه لما ير تبها ويستقر وين يروح يرجع للمنتدى والله يسر للجميع
-
اخوتي الاعزاء
خلي احجيلكم شويه وانطو صبر واقرو وتمعنو وداحجيلكم من تجربتي الشخصية اتوقع اني عرفت وين الشغله صارت اذا صدق ظني
اني طلعتلي ولاية فلوريدا مدينة تامبا اكرر مدينة تامبا نفس الشئ حدثلي واجى استقبلني ابو المنظمة عراقي وهي منظمة اللوثرن من اسوا ماراح تواجهون وهذا مو كلامي لان اني وصلت ويايه انو اشتكي عليهم لان عندي محامي واصدقاء امريكان يساعدون الاجئيين كالو شكو شغلات سلبيه تصير يطلع مصدرها منظمة اللوثرن وهذا الشخص العراقي طبعا لو تشوفوه اذا هو نفسه يتعامل وياك كانو دينطي من جيبة وكانو مو شغله ودياخذ عليه راتب وانما ديتفضل عليك مع انو وياه عراقي اخر وهو البرنامج الثاني اللي تتحولون عليه وره برنامج الاستقبال اللي مدته شهر درة مال الله العراقي الاول حتى تلفونه مينطية اني لو ما محامي وجماعتي الامريكان سبوها للمنظمه ايميلات وصارت عركات حتى خافو يقطعون عني المساعدات .
احسن مساعدات تلكوها وهاي بعد التمحيص والتفحيص بولاية كونيكتيكت منظمه ايرس طبعا هاي من جماعه المساعدات نفسهم الاصدقاء مو هاي المنظمة وكالو مجنا نكدر نكلك بالبداية بالايميلات لان ياثر عليك وعلينا.هاي نقظه
النقطه الاخرى ولاية فلوريدا حلوة وجوها للي ميحبون البرد يخبل لان جوها سياحي وتكدر تطلع تدور على شغل مو مثل بالبرد اكو ناس متكدر وكعدت بالبيوت بعدين فلوس التدفئه الكهرباء يعني مو مثل فلوس التبريد وبس تتجاوز مشاكلك ويا المنظمه بالفترة الاولى راح تحب المدينة والولايه ونظرتك تتغير ويصير عندك اصدقاء وناس عرف.
اسف على الاطاله ولكم من الشكر
-
الله يساعد اخي الكريم يارب شدة وتزول
-
الله كريم انته صبرت هواي والله يساعدك
-
اي صح المنظمات صايره كلش ويا العراقيين والسبب نوعا ما احنا
المشكلة يقارنونا ويا افارقة وعبالهم بيت مجان عدنا بوطننا لهذا الله يساعدك وحاس بمعاناتك