ankawa
منتدى الهجرة واللجوء => الهجرة و واللاجئين => الموضوع حرر بواسطة: hassan W في 15:01 29/10/2010
-
السلام عليكم اخوان شخباركم
اني راح احجيلكم اليوم عن تجربه واقعيه
اللي هي تجربتي اني
اني اخوكم كنت بامريكا عشت بيها 16 سنه
عشت بيها اجمل ايام حياتي عندي شغلي وبيتي
وتزوجت الحمدلله وطلعت زوجتي لعمان سويتلها معامله وبعدين استلمت الفيزا لكن لضروف انتهت مدة الفيزا وهي مسافرت وهسه هي عالاي او ام
مقدملها
رجعت اني للعراق من سنه واربع شهور
تقريبا
تركت شغلي وصورولي العراق جنه من شغل وكل شي
اني بنيت بيت بالعراق الحمدلله
ورجعت وهسه بعد سنه واربع اشهر ندمت على الساعه اللي رجعت بيها
هسه اخوكم قرب يفلس
وماكو لاشغل ولاشي
ماخليت مكان مارحت ماكو وضائف
ولا شي هو هذا العراق العضيم
مو قصدي تجريح او شي
بس اني احجي عن تجربتي اني برجوعي للعراق ندمت الف مره بل مليون مره
وشكرا لكم
بس حبيت اوضح الامر
-
رجعت بعد 16 سنة من امريكا الى العراق....يعني متجنس .وندمان ......عادي ارجع لامريكا شنو المشكلة و ليش الندم؟ تجربة خضته و منجحت بيه.
وملكيت شغل بالعراق... اخويه انت كونك متجنس امريكي و لغة عندك توب مفروض. فالتقديم على الشركات الموجودة الامريكية كلش سهل الك و الك اولويه وامتيازات اكثر من هوايه ناس. ليش ماكو شغل؟
اخويه انت شغلتك و قصتك مبهمه.
-
اخويه اشكرك على مرورك والرد
اني منتظر زوجتي هي هسه دتتنظر موعد السفر
والموافقه الامنيه
اخويه اني متجنس وين مااقدم يكولولي لازم تقدم من امريكا
لان ميصير من العراق
ومن ضمنهم الاخ علي جي ال اس
شرحتلي وضعي كال ميقبلون امريكي
-
اني حبيت انطيكم تجربتي والفرق بين حياتي بامريكا وحياتي بالعراق
-
اي خويي طبعا تلاكي صعوبه لان انت عندك شغلك وبيتك
بمريكه
ان شاء الله يوم تنقبل زوجتك وتجي لامريكه
وتستقرون يارب
والف شكر خوي عالتوضيح
-
مرحبا اخي
يعني انت حضرتك متشوف اخبار على كل القنوات بدون استثناء حتا لنكول هاي تكذب واللخ تنافق,على اي اساس بنيت قرارك الخاطيء واسمحلي استعمل هاي العبارة لان لو جان صدك العراق تجاوز المرحلة الى بر الامان ماجان العراقيين لحد الان يسوون المستحيل حتا يطلعون ويخلصون وجان الامم المتحدة بطلت توطن عراقيين مو زودت العدد وجان كلنا رجعنا على بيوتنا واشغالنا اللي تركناها وهجينا بس حتا نسلم على حياة اولادنا بغض النظر عن كل الاوضاع السيئه
كان المفروض تنتظر فد 10 سنوات اخرى عالاقل وتقيم الوضع.على كلن ماصار شي مثل ميكولون وانت مجنس ارجع وفوض امرك ال رب العالمين وابدي مرة ثانيه من الصفر وكول حسبي الله ونعم الوكيل
لتزعل اخويه بس اكو 1 يعيش بمريكا 16 سنه وتريد تعجبك العيشة بالعراق ??? ??? ??? ???
-
اخوية يرحم والديك انت مكون نفسك ومستقر وعندك بيت اكو واحد يرجع للعراق علمود يبدي من الصفر هاي المو مرجوة منك لاتزعل اخي بس والله ننقهر من نسمع واحد من اخوانة او وحدة من خواتنة العنكاويين وغير العنكاويين يتبهذل بعد مارتب وضعيتة اخوية عالعموم ارجع لامريكا وانت شفت الوضع بالعراق وعلى كولة اختنا زهرة الصبار لو البلد زين جان كل الناس رجعت واستقرت الك الله ياعراق والكم الله ياعراقيين.
ارجوا ان تتقبل مروري اخوك حسين السالم.
-
هلا وغلا بأخوي حسن شلونك يارب بالخير دوم نلقاك
مشكوووووووور اخوية على النصيحة ويارب يوم سفرك انت وزوجتك
تحياتي وسلامي لزوجتك
-
تسلمون عالمرور بس هاي هي صارتلي عبره واخذت قسم على نفسي ماارجع للعراق لو اخر يوم من عمري
والله كريم اني فوضت امري لرب العالمين
-
لا اله الا الله
يا اخي يعني ورة 16 سنة بأمريكا لو ترجع لدبي متعجبك فما بالك بالناصرية!!!!!!!
-
كان الله في العون
اخي العزيز ان شاء الله اخذت عبره وخلي ببالك ان العراق بلد للزياره وليس للسكن
اخوك كلكامش
-
ان شاءالله الله كريم للزياره العراق وليس للاستقرار
-
اي هذا الحجي الي يريح وارجع لامريكا احسن
-
اخي حسن ان شاء الله تخلص معاملة زوجتك وتاخذهم هيه وابنك واتهج
على الاقل انت عندك جنسيه والبلدان مفتوحه كدامك وطريق الرجعه سهل
واعتبرها هاي سفره سياحيه لمجاهل الناصريه
وان شاء الله تكضي على خير
-
اخويه الغالي حسن الورد
اللهم رب يلم شملك بزوجتك وابنك وترجع الى بلدك الثاني وتستقر وتبدي من جديد ... يا اخي العزيز هاي رجعتك اعتبره تجربه انت سويته بحياتك ولا تاكل اله هم لان صارت بعد ولاتنسى هذا شي مكتوب الك من رب العالمين ولازم اتمر بيه . فاخوي توكل على الله وها هيه وين متصفى خليه تصفى
اخوك محمود العاني
-
اخي حسن صدك جذب اعرف انه احنة العاقيين على نياتنة بس مو لهالدرجة اعذرني على الكلام مو قصدي اكو واحد يعوف امريكا يجي للتراب والسيان وللسيطرات والازدحامات القاتلة
ارجو منك ان تخبرنا عن الولاية التي كنت تعيش بها وما هي احسن الولايات للعيش بالنسبة لنا نحن العراقيين ارجوك لاتبخل علينا اخبرنا عن الولايات التي لاينصح بها والتي بها اعداد كبيرة من الزنوج حتى نتجنبها ان ذهبنا الى اميركا شكرا جزيلا واتمنى لك الموفقية
-
والله كلامك ينطي عبرة للي ميعتبر وفعلا العراق مو مال رجعه هسه
والله يسهلك دربك بالايام الجايه
-
اخي خلينه العراق للاخوه الايرانين والاخوه السوريين يتحكمون بي وايحنه العراقين النه الله بس كول الحمد لله انو ايحنه بامريكا بس اويلي على اهلنه واخوتنه الفقره الي بقو لا الهم ناصر ولا معين بس رب العالمين . اوييييلي امووت قهر من اشوق اوضاع عراقنه هيجي بس اكيد انشاء الله تصفى
-
اخواني الاعزاء واخية صاحب الموضوع ترة السالفة عادية ومابيهاشي اني واحد من ناس جنت حاصل على الاقامة في بلغاريا ولحد الان طبعا موجودة عندي وكنت ذاهب الى السويد لرؤية عائلتي ولابحث عن عمل هناك واسال دوائر الدولة هل استطيع ان اعمل في السويد باقامتي البلغارية وكانت الاجبة لا لاتستطيع ان تعمل في السويد وحتى لو كان العمل انت الي تفتحه يعني سدوها عليه المهم نرجع لسالفتنة وجنت قبل شهرين مقدم علمعاملة امريكا فكلت خلي انتضر المعاملة في السويد الى ان تكمل لاني مقدم عالاس اي في يعني كل تقديمي عالانترنت لامقابلات ولامحلفين ولادورة تثقيفية فقط مقابلة السفارة يعني دان اكدر اكملها من السويد ولكنننننننننن اتصلت باح الاصدقاء في العراق العضيم وباحد الاقارب وهم نفس الحالة اسالهم عن العراق العضيم وهل اكو شغل لوعمل وكان الجواب الشغل متوفر جدا والفلوس مدنعرف وين نوديها من كثرتها وسولي العراق جنة فقررت في وقتها ارجع للعراق لكي اعمل الى ان تكمل معاملتي مالاس اي في ومن تكمل اقرر اذا اسافر او ابقى في العراق وصار الي صار وتورطت ورجعت للعراق العضيم حالي من حال صاحبنة صاحب الموضوع لكيت العراق صاير خرابة والحرامية الي بيه فقط همة الي ديستفادون والواسطات موطبيعية خو الوضيفة اننننننننسه ولاتفكر بيها لان لازم تكون في حزب فلان وعندك علاقات مع فلان وزير لو تدفع رشاوي والله اليعلم راح يوضفوك لو لا وطبعا اكو ناس بالعراق حاليا لو تكلهم اوديكم للمريخ يكولوك منعوف العراق لو للموت لان مستفادين وديفرهدون ويلعبون بالفلوس لعب وعذرا اذا كلامي ضوج واحد لو غث واحد بس هية هاي الحقيقة ونشالله الموفقية للجميع
اخوووكم ابو محمود
-
اخي انت انت متجنس - شكو تدور معملات ولجوء وهجرة ؟ روح سافر حالك حال اي مواطن امريكي ؟ او يجوز اني غلطــــــان :-\
-
واضح من كلام الاخ انه لا يحمل الجنسية الامريكية ، والغريب ان الكثير من جماعة رفحا لهم 15 سنة في امريكا اما اخذوا الجنسية مؤخرا او لم ياخذوها بعد
-
اخ حسن ... تجربة مريرة بالعراق عموما" صار خير ، وانشاءالله ربي يعوضك خير ويكتب اللي بيه صالح الكم ، بس ممكن تحدثنا عن تجربتك في امريكا طيلة ال16 سنة اللي مضت؟
اخوك.....يوزارسيف
-
اخواني الف شكر الكم ولكلامك لكن اني نزلت موضوعي ردا على قناة الفيحاء وعبره لبعض الناس
واني متجنس
ومنتظر اخذ زوجتي وابني لان مااكدر اعوفهم بالعراق العضيم
اخويه ان شاءالله انزللكم موضوع عن ولايات امريكا منو الاحسن للعراقين
-
ورد
-
شنو قصدك اخويه مافهمت؟؟؟؟؟؟؟؟؟؟؟؟
-
السلام عليكم ورحمة الله وبركاته اخ حسن لابأس عليك اخوية العزيز ان شاء الله الي صار هوة خير حتى تمسح الصورة الحلوة الي تركتها ببالك عن العراق قبل 17 سنه واربع اشهر
اخوية العزيز ان شاء الله ترجع لبلدك الي استقريت بيه وعشت بيه سنواتك الحلوة لان يا اخوية البلدمو كاع بس البلد عطاء البلد اهل واصدقاء وذكريات واسقرار يا اخوية صدك كولش ضجت من قريت موضوعك لكن بيها صالح انشاء الله تتوفق بحياتك لانك انسان نبيل تستحق كل خير
بس ردت اسالك اخوية العزيز حظرتك كنت مسافر 16 سنه بالولايات المتحدة ليش ماسويت لم الشمل يعني انت حظرتك من اجيت يلا اتزوجت ودتقدم لعائلتك منا لو شلون ؟
اختك ام سوسو
-
الله يعينك اخويه ولله
هاذة امر الله تحمل الى ان يطلع سفر عائلتك والله يفرج عنكم انشاء الله
اني همين جنت مسافر من التسعينات وطلعت روحي علما رجعت للعراق ماصدكت رجعت .. و وية ما رجعت اتصوبت بانفجار وسويتلي درزن عمليات وانترس جسمي حديد بعدة مطالع .. وشردت مرة لاخ
الامور ما تنصلح بسنة وسنتين تطول هوااااي
-
اخي العزيز الكثير من الاخوان الموجودين بالعراق و الي امقدمين دائما اتحسهم متحيرين من موضوع السفر خاصة الي شغلهم زين و دخلهم معقول و اخافون من مواجهة حياة جديدة في بلد جديد بالرغم من ان البلد الجديد افضل على عدة اصعدة فسؤالي الك انت اشلون اتخذة مثل هذا القرار و تترك عمل و بيت و تامين صحي اكيد و حياة مستقرة الى بلد شبة ضائع و شي اخر انت مجنس و عندك اكيد خبرة بالقانون الامريكي من باب طول الاقامة في البلد فشنو الي اخر معملة لم الشمل الي باقصى الظروف متاخذ اكثر من 6 شهور ثاني شي رحمة لوالديك من ردة ترجع زوجتك ماحجتلك على الوضع لو اهلك اخوية مع تقديري و احترامي الك انا احسن اكو نقطة غريبة بالموضوع
-
خوان اني اغلب الاخاون يعرفون انو اني مقدم لزجوجتي سبشل فيزا من الاردن والاخت سرى والاخت انجي تعرف بالموضوع بس صارت ضروف ومكدرت تسافر زوجتي
اخويه ليش تحس اكو ان بالموضوع
اني حبيت اوضح الوضع فقط هاي الاخوان رادين هم راجعين للعراق وشوف شنو ضروفهم
-
اخي العزيز اخذ مرتك وروح ولا تفكر بلرجعه لان16سنه موقليله وصارت عند خبره وصرت من اهل البلد مو مثل الي يروح جديد مثل الاطرش بلزفه يعني يصير حاله مثل حالك هسه ميكدر يلكه شغل احتمال وهو متعود عله الدوخه الموجوده حاليا بلعراق لانه عاشه لحضه بلحضه والله يسهل الك ولزوجتك وتروحون بلسلامه
-
اخي حسن اتمنى لك وعائلتك الموفقية والسلامة ارجو من حضرتك تكتب لنا عن الولاايات الامريكية ولو مختصرات منريد انتعبك فنحن متشوقون لمعرفة معلومات ليس لدينا دراية بها عسى ولعل تعطينا فكرة عن كيفية اختيار ولاية مناسبة لان ابمجهودك هذا لربما تختصر على اخوتك اللاجئين الوقت والجهد ليش يروحون يجربون ولاية بعدين يغيرون فقد اضعنا الكثير الكثير من الوقت ومن حياتنا ونتمنى ان تأتي اللحظة التي نضع رؤسنا على المخدة ولا نفكر بكهرباء او ماء او نسمع صوت أنفجار صدقني اكتب لكم الان وقبل ساعة او اكثر حدثت انفجارات لا اعرف اين بالضبط الا ان الطائرات المروحية تحوم فوق بيوتنا الان نحن جميعا بأنتضار مشاركاتك تقبل شكري ووافر امتناني لك
-
اخواني واخواتي نصيحة حتى لو تسمعون انه العراق صار مثل دبي بس اذكروا انه البشر مستحيل راح يرجع مثل الاول ..لان البشر اهنا (مع احترامي للزينين اللي همة قليلين) اتعلموا على الغش والخداع والخربطة والبوك وعدم احترام القانون اضافة الى انه الحرامية اللي ديزيدون واللي همة صاروا واجهة البلد ..وكلمن يريد يرجع خلي يفكر باطفاله وين يرجعهم