ankawa
منتدى الهجرة واللجوء => الهجرة و واللاجئين => الموضوع حرر بواسطة: ammar4_u في 18:28 02/12/2010
-
السلام عليكم اخوان
اتمنى ان تكونوا باحسن حال
اخوان اريد اعرف بخصوص الجنط الي ناخذه ويانه بيه قياسات معينه يعني الابعاد لو اي جنطه سفر نكدر ناخذه ؟؟؟؟ لان اليوم ردت اشتري جنط وخفت تطلع اكو ضوابط معينه فاجلته على ما تردون عليه
وبالنسبه للجنط تنشحن مباشر الى امريكا من مطار بغداد لو من مطار عمان تنشحن الى امريكا؟؟؟
وبالنسبة للذهب شكد اكدر اخذ والفلوس همين ؟؟؟
طبعا اذا شاء الله اني سفرتي المفروض يوم 12 -12 الى مشكن بس لحد الان ممستلم خط سير الرحلة
شكرا مقدما
-
للرفع
... أهل الخبرة
-
ان شاء الله درب السلامة
للرفع
-
اخوان اريد اعرف بخصوص الجنط الي ناخذه ويانه بيه قياسات معينه يعني الابعاد لو اي جنطه سفر نكدر ناخذه ؟؟؟؟ لان اليوم ردت اشتري جنط وخفت تطلع اكو ضوابط معينه فاجلته على ما تردون عليه
اخي اخذ الجنط الي تعجبك بس اتكون اشكالها معقوله
لتهتم للقياسات والاشكال المهم متجاوز ال 23 كيلو
وبالنسبه للجنط تنشحن مباشر الى امريكا من مطار بغداد لو من مطار عمان تنشحن الى امريكا؟؟؟
الجنط تنشحن الى امريكا متشوفها الا باول ولايه توصلها بامريكا سواء من عمان او من العراق
وبعدها تنشحن الى الولايه الي راح اتروحلها
وبالنسبة للذهب شكد اكدر اخذ والفلوس همين ؟؟؟
الذهب اخذ كميه الي اتريدها بس ايكون مضموم ومحد ايشوفه
لان اذا شافوا راح ايسجلوا بالجواز وهاي بالنسبه لبغداد بس
اما بامريكا محد ايحاسبك
والافضل ان يلبسوا جوه الهدوم
طبعا اذا شاء الله اني سفرتي المفروض يوم 12 -12 الى مشكن بس لحد الان ممستلم خط سير الرحلة
ان شاء الله سفره موفقه وتوصل بالف سلامه
وهسه يتصلون بيك ايبلغوك على خط الرحله
شكرا مقدما
ممنونين
وتدلل
-
بس اضيف فقط
اخذ ام الجروووووووخ القوية حتى تساعدك بالسحب
وخلي لكل جنطة علامة اكتب بيها اسمك
تحياتي
-
أخوية ليش مااتعب نفسك شوية وتشوف المواضيع الهامة الارشيف قصدي
أخوية لورانس العرب خسرنا واللي كان كان مو قصة هوار وقصي بس هو الحظ الاسود
-
شكرا لكل الاخوان وان شاء الله الاخبار الطيبه للجميع
-
اخي العزيز اني سافرت من بغداد الى ميشغن
خط الرحلة رح يكون بغداد عمان نيويورك ديترويت
الجنط اخذ اي نوع بشرط الوزن ميكون اكثر من 20 كيلو غرام واني محد سالني على الوزن لان اغلب الجنط كانت اكثر من عشرين
بعدين شكد تريد تاخذ فلوس محد يسالك عليهن ولا شفت احد سال واحد من اللي سافروا على الفلوس
فيما يخص الذهب فقط مطار بغداد يسالون عليه فنصيحتي خلي اهلك يلبسوه الذهب لان اكو بعض الموظفين بالمطار يصرون على تسجيل الذهب بالجواز.واني ما صار ويايه هذا الشي لكن شفت واحد سجلوا ذهب زوجته بالجواز
واكو هواي معلومات مهمة رح تفيدك للسفر وخط لسفر اكتبلي واني بالخدمة
رح تستفيد منهه اول متوصل واخوية ترة الجو هسا بميشغن موووووت برد احسب حسابك
وان شاء الله توصل بخير واي شي اني حاضر
-
نسيت اكولك ان الجنط تنزل بكل مطار توصلولة يعني مو تنشحن مباشرة لامريكا وهذ اللي يضوج ويتعب
-
اخي الغريب في الوطن شكرا على المعلومات القيمة واي معلومة عندك تفيدني رح اكون شاكر لشخصك الكريم اذا اتنورنه بيه اما موضوع البرد صحيح الولاية باردة بس المفروض بكل مكان اكو تدفئة ومع ذالك اني هم افتريت بالكرادة والمنصور ملكيت قمصلة تتحمل بردهم فكلت اول ما اوصل رح اشتري مناك احسن وخاصة الكرسمس جاي وخوش سيل يسون على الكرسمس ;D ;D ;D
بس الصراحة افتر راسي بشغلة كل مطار ندخلة نستلم بيه الجنط لان اني مسافر ترانزيت الجنطه ما اشوفه يعني تتحول من طيارة لطيارة تلقائيا شنو جماعة الاي او ام شديسون بروحهم ؟؟؟
وتبقى المشكلة بالذهب شلون رح نطلعه يعني حتى لو اخلي الاهل يلبسوه اكيد بتفتيش النساء رح يشوفوه ؟؟؟ وما اتوقع يقبلون ياخذون فلوس وحتى لو سجلوه بالجواز ميهمني بس اخاف اعبر الحد الي خاليه ومثل مسمعت 100 غرام ولو ممتاكد من الرقم
وبالنسبة للموضوع الادوية عادي اذا اخلي الادوية بالجنطة وياه الوصفة الطبية
ومرة اخرى اكرر شكري لحضرتك ولكل الاخوان
-
اخي اني قصدت على البرد بس بالطريق لان رح تبقون بمطار عمان اقل شي عشر ساعات وبمطار نيويورك اقل شي 6 ساعات ..هذا اللي صار ويانة .. اما بالبيوت فاكيد اكو تدفاة.
فيما يخص الذهب اني ما اعرف انته شكد تريد تاخذ وياك بس اكيد اذا كمية كبيرة وتلفت الانتباه رح يحاسبوك عليهه .. اني اخذت وياية بحدود 22 مثقال ومحد سالنا عليه والفلوس نفش الشي
وفيما يخص الجنط.. نعم اخي اكثر شي بهذلنه هو الجنط..لان نزلناهه بعمان وصعدناهه مرة ثانية لنيويورك ونزلناها بنيويورك وصعدناهه مرة ثانية لديترويت وانشلع كلبنه بيهه .اني كان عبالي نسلمهه في بغداد ونستلمهه في ديترويت..
اذا عندك اطفال جيب دفتر لقاحاتهم كلش كلش مهم
واني حاضر
-
فيما يخص الادوية
اني اخذت وياية علاكة متروسة ادوية من هاي اللي تعجبك ومحد سالني عليهه لا وصفة ولا هم يحزنون
-
الف شكر اخي الغريب في الوطن والله يرحك مثل ما ريحتني لان عندي صيدلية ادوية
ان شاء الله التوفيق الك ولجميع الاخوان
-
مبروك اخويه على السفر انشاء الله توصل بسلامه لامريكيه بس احد يعرف ارقام تلفون مال مسؤلين عن تفاصيل الرحله من بغداد الى عمان او جدولات السفر
-
السلام عليكم اخواني واخواني في المنتدى
مرحبا اخ عمار
طبعا الكل ما قصر وياك بالنسبة للجنط والاسئلة الاخرى
بس انا اجيت قبل شهر ونصف واحب افيدك بشي
اتصلوا بيه قبل السفر بثلاثة ايام وكالوا كل شخص مسموح اله جنطتين ام 20 كيلو وجنطة باليد ام كيلوا وتكدر تاخذ اكثر من 5 يعني 10 او تشيل جنطتين وهذا الحجي بس مطار بغداد يحاسب عليهن ام بقية المطارات ماكو احد حسبنا لا على الوزن ولا شي وبمطار بغداد ممكن الجنطة تكون 22 او 23 ماكو مشكلة
والجنط بكل مطار تنزل وياك
مسار الرحلة مالتك من بغداد وعلى ما اعتقد بغداد-عمان-نيويورك-مشغن
راح تنزل الجنط ابمطار عمان وبمطار نيويورك وانوب تشحن الجنط لمشغن
وماكو واحد سأل عن فلوس او اي شي واذا جايب وياك ادوية خليهم بالجنط المشحونة لان بمطار نيويورك ميقبلون الا الادوية الي بيها وصفة طبيب وكذلك الادوات الحادة مثل مكص او مقراضة هم خليهم بجنط الشحن والعطورات لان مطار نيويورك يفتشون على كلشي
واتمنى انه افدتك بهاي المعلومات
تحياتي العراقي
-
السلام عليكم
بالنسبه للجنط مو مهم ابعادها وشكلها المهم وزنها يعني اهم شي الجنطه متتعدى
الوزن المقرر الي هو 20كيلو للجنط الكبار و5كيلو للهاند باك وجنطه اللابتوب ميحاسبون عليها كوزن
اني الي سويته اخذت جنطه جبيره مال لابتوب وخليت بيها كل الاقراص واكسسوارات اللابتوب
بالنسبه للفلوس محد سألنا ع الفلوس وشكد عدنه نهااااااائيا
بالنسبه للذهب اخي الكريم محد حاسبني عليه كنت لابسته وحتى بالتفتيش مطلبو مني انزعه
فقط دخلنا بجهاز السونار وعدينه بس اني الذهب مالتي تسجل بالجواز بمطار عمان لان جان مبين وجنت كلشي ما اعرف بخصوص الذهب لذلك تسجل بالجواز يعني تكدرون تلبسو وتخفوو بالملابس اللابسيها
ومن شافو هم قررو نظريا وزنه وعوائل ويايه اصلا مكاللولهم ع الذهب اهم شي تخفي
طبعا هذا الحجي بس بمطار عمان ،بقيه المطارات لا سالو ولا كالو
بالمناسبه جنطه اليد هم ميحاسبون عليها كوزن بس الهاند باك والجنطه الجبيره
بالنسبه للادويه والامور الثانيه شتريد تاخذ اخذ وياك بس تخليهن بالجنطه الجبيره لان بالتفتيش ميفتحوها
مجرد تدخل سونار يعني معليهم شكو بيها واهم شي تنتبه ماكو اي شي بالجنط بيه كبريت لان تدخل سين وجيم
حتى الجكاير كلش عادي اشكد متريد تاخذ وياك اخذ بس تخليهن بالجنطه الجبيره
واتمنالك الوصول بالف الف سلامه
تحياتي الك واي سؤال بهذا الخصوص اني حاضره اجاوبك
وردة بغداد
-
اخوية عمار بس حبيت انبهكم على نقطة انه هسه قبل فترة بدأ استعمال جهاز الاشعة للاشخاص واللي ما يريد يروح تفتيش يدوي يعني لاتخلون الفلوس مثلا بطريقة مشبوهة بالملابس اللي انتو لابسيها ولا الذهب.توصلون بالسلامة.
-
الف شكر الكم والله احس روحي بوسط عائلتي من اقراء نصائحكم الله يحفضكم وان شاء الله التوفيق وتحققون كل الي بالكم ويسهللكم ولد الحلال ويكفي عنكم شر بني ادم
اخي العزيز Al-Iraqi2010 قبل فتره هم قريت بردود احد الاخوان الي مسافرين انه الك حق تاخذ جنطتين ام 20 كيلو طبعا للشخص الواحد ولاكن الخبر محد معلق عليه ومرينه عليه مرور الكرام وحضرتك هسه اكدت هذا الشي لذالك اني من اتصلو بيه من عمان يبلغوني بموعد سفري سالته الي حق كم جنطه فكلي فقط جنطه واحد ام ال 20 كيلو + هاند باك 5 كيلو لذالك رح انتضر اتصالهم لان كالو قبل سفرك بيومن رح نتصل بيك حتى اشوف كم جنطة الي حق اخذ لان مثل متعرف حضرتك هذا الشي يعتمد على الخطوط الي حاجزيلنه بيه بس شنو تقصد بس مطار بغداد حاسبونه عليه يعني اخذو منكم فرق الوزن ؟؟؟ اذا امكن توضح هاي النقطة والف شكر لشخص الكريم
اخي الكريم saif3x ان شاء الله من يتصلون بيه انزل الرقم و ان شاء الله الموفقية
اختي العزيزة وردة بغداد الف شكر لحضرتج وما قصرتي وان شاء الله الموفقية
اختي العزيزة سرى حياج الله على هل معلومة
والف شكر لكل الاخوان الي بصراحه خجلونه
-
اخي العزيز اول شي تاخذ الجنط وياك وتضل لمن توصل الا اخير نقطة الي هية الركوب في الطائرة والجنط مالاتك انت الي اتحطهة باول طياراة تركبهة وبعدين تركب الطيارة وانت بامريكا توصل بسلامة راح تاخذ الجنط 2- البعاد مال الجنط الجنطة تكون كبيرة مال سفر الوزن الاقصى ايكون 20 كيلو والجنطة اليدوية 5 كيلو
-
شكرا للاخوان
اكو موضوع كلش مهم وهو كم جنطة الك حق تاخذ لان 40 كيلو مو شويه وليش حرامات دنشحن اغراضنه
بالنسبه الي رح انتضر مكالمة الي يبلغوني بيه بتفاصيل الطيارة واطرح هذا الموضوع والنتجية رح انزله هنا.
بالنسبة لبقة الاخوان والخوات الي عنده تاكيد على هذا الموضوع خلي يسولفلنه كم جنطه اخذ لكل فرد من عائلته
وشكرا للجميع
-
اخي عمار
اذا سفرك من بغداد ميحقلك غير جنطه وحده ام 20 كيلو ويتسامحون ب3كيلوات فوكاها وحقيبه يدويه ام ال5 كغم
اما من عمان فيحقلهم جنطتين ام ال23 كيلو
-
شكرا اخت ريم على المداخلة بس المشكلة جماعة بغداد ناس ماخذه جنطه وناس ماخذه جنطتين
لذالك رح انتضر من يخابروني ولو لحد الان مخابروا ونشوف شيسمحلونه
ان شاء الله التوفيق للجميع