ankawa
منتدى الهجرة واللجوء => الهجرة و واللاجئين => الموضوع حرر بواسطة: معلك في 19:15 17/01/2011
-
أخواني أخواتي...
اني بسوريا صارلي 4 سنوات ولا حس ولا مقابله يعني بعدني عالزيرو وسؤالي هو هل الجندي مكلف ما أله توطين لو لا؟ مع الشكر لكم.
-
وانا 4 سنوات فى الاردن ولا حس ولا خبر.........بس يا اخى الله موجود ورحمته واسعه اخى وبساعه يجى الفرج
-
على كولت المصري ...ومين سمعك.....صارلي خمس سنين بمصر وهاي السادسه وهم كلشي ماكو الله يفرجهه علينه وياريت احد يكدر يفيدك بشي
-
اخي حاول تراسلهم وتتصل و تابع معاهم وماالها علاقه بكونك جندي مكلف حرس جمهوري
وحاول تروح وتقابل موظفين وتلح وتشرح حالك من جديد بمناشده جديده
والله يفرج عليك وعلى الجميع
-
اخوان الي مالين
هاي اغينه الكم هديه حته ما تملون بعد
http://www.youtube.com/watch?v=UeqHw3YD-Vs
-
امممممممممممممممم
لو ما احبك وانت عزيز عليا جان كلتلك احرك نفسك بالباب هجرة
-
اخواني أخواتي ...
شكراً على الرد , لو تعرفون اني شكد دايخ بحيث هذي المدة ما رديت عليكم تعرفون ليش؟ لأن نسيت الpassword مالتي!!!!!! وحتى username !!!!
المهم اليوم حصلتهم وكتبتهم بورقة
على العموم اني دا أراجعهم بكفرسوسه واخر مرة راجعتهم كان يوم 1\3\2011 وكلتلي قيد الدراسة راجعنه بعد 6 شهور طبعاً اني عطبت كلتلها تعرفين اني كم مقابلة مقابل بهل 4 سنوات؟ صفر !!! كلتلي اي أنتظر وتعاركت وياها ورحت على المشرف مالتهم وحجيت وياه وكلي أهدأ واني راح أتابع الموضوع...... ولحد الان ماكو شي بس راح أروح الثلاثاء الجاي وألله كريم.
شكراً مرة أخرى للأخوة و الأخوات اللي جاوبوني
-
الله يسهل امرك اخوي معلك والله ياخوي كلنه مثلك بس نكول متوكلين على الله وماعدنه غيره ويارب تتسهل امورك اخوي
-
شكراً ميمي2010 وباقي الأخوان هسة اني كل ما أكول أروح الثلاثاء أراجع تطلعلي دالغه ومناسبة وعطلة بس هاي الثلاثاء الجاية راح أبات يمهم وشيصير خلي يصير.
-
الله يسهل امرك اصبر اخي
-
الاخ معلك تحية و سلام
الف سلامة لبنتك و يا ربي كل الصحة و العافية
روح طبيب اخصائي بحالة بنتك في سوريا و خليه يكتبلهة تقرير و بعدين ودي التقرير لدائرة الصحة في منطقة باب مصلى للتصديق و بعدهة روح لمستشفى اسمة الاندلس بكفر سوسة لان هذا المستشفى معتمد من قبل اليو ان و اطلب من المستشفى اعطائك تقرير مشابه للتقرير المصدق مع توضيح طلبك انه تريد تقديم التقارير للامم المتحدة لصعوبة حالة بنتك الصحية و روح يوم الثلاثاء لليو ان بمنطقة كفر سوسة و انطيهم التقارير
و اعمل نسخ من هاي التقارير و ضل ابعثهة ايميل و دزهة بريد للامم المتحدة
و ان شا الله يصير خير بلكت يتحرك الملف
و انت ما دام حكيت مع السوبر فايزر ان شا الله خير
و احنا هم صارلنة خمس سنين بسوريا و دنراوح و الله كريم
مع امنياتي بكل الموفقية
اختك اسيل - سوريا
-
الله يسهل الامور انشاء الله
ماعدنة غير الصبر اصبر اخي والله كريم
تحياتي
غزل
-
الاخ ((معللك))
الســلام عليكم ورحمــة الله وبركـــاته
أخـــي وضع لجــوءك مســـتبعد كثرة ذهابك يوم الثلاثاء ممكن أن يكون بيها فرج ...ولكن الامل ضعيف عذرا على هذا الكلام ولكنها الحقيقة وضع اللجوء أخي يتبين مو اكثر من 4اشهر إلى 7 أشعر كأقصى أقصى حــد ممكن هناك من يكسر هذه القاعدة ولكن قليل...
أخـــي الحـــــــــــل لموضوعك...الاتي
الذهــاب لعــمان تقـــديم من جـــــديد ملف جـــديد وقصة صادقة بالادلة مع التأكيد بالكتابة بأنك مهدد وعودتك تعني نهايتك بالادلة..بعد 5أشهر يتم الاتصال بك وتباشر بالقضية التي تحتاج فيها من سنة إلى سنتين ونص يله أسافر أنتى وقسمتك....هـــذا الحــل الوحـــيد ....في حـــال إنك خدمـــت في وحــدات فعالة قامت بمعارك في ال91 أو الشـــمال وضعك راح يكــون أصعب بس مو مستحيل السفر...أنتظارك 4 سنوات وانتظار الفرج أعتقد مضيعة للوقت أذا محتاج الهجرة...حاول عدم التكلم بفايل اللجوء القديم ورقمه في عــمان ..أبدأ فايل جديد أفضل ألك..علماً هناك دعم راتب لك ولعائلتك في عمان...وبين ما تشتغل بالفيزة لعمان عسى أن تنفرج عليك بمكانك الحالي، ما أنفرجت أذهب لعمان ....والله يقدملك بيه الخير
تــــقـبل تحــياتـي
ابـــو ســـمـانـــي
-
اخي معلك اني من 2007 اول الناس قدمت ابشهر ال2 بال2009 يله دزو علينه ابشهر ال7 يعني وره سنتين واكو جماعه ويانه همين هسه يله دزو عليهم فمو شرط من اربع اشهر الى سبعه اتبين بس انت مجان المفروض اتكلهم جنت بالحرس الجمهوري او جان المفروض اتكلهم ان انت جنت بيه ونهزمت لان همه تقريبا اي عسكري سابق او حزبي جان ميطلعون
-
أخوان أخوات شكراً على ردودكم وأقتراحاتكم ومساندتكم وأنشاء ألله تتيسر أموركم جميعاً.
طبعاً رحت الثلاثاء 15/3/2011 لكفرسوسة أول واحد أبو الحاسبة دك رقم الملف وبعد صفنه أنطاني ورقة حمرة أني كلت يمكن هذا كارت أحمر يعني طرد أشو كللي روح على الحاسبة الثانية (اللي ورة الشباك) رحت عليها ودكت الرقم جان تكول أنته منضاف بال2010 أني اتخبلت كلتلها أني جاي ومنضاف بال2008 وجنت مخطوف وهذه ورقة موعد الأضافة وهذا جوازي يثبتون أني مسجل عدكم من 2008 هيه شافت كلامي صحيح وكالت أنتو ملفكم اتحول على التوطين من الشهر الثاني وأنتظر شهرين اذا ما اتصلنا تعال راجعنه أني كلتلها لعد أكو تقارير طبية مال بنتي مقدمها ألكم أخاف هذه هم ما مدخليها بالملف كالت عود من نتصل بيكم بالمقابلة شوفها!!! يعني أني طلعت منهم كلشي ما مفتهم فشتكولون أروح الثلاثاء الجاي لو اللي وراه؟ ألله لا يعوزكم على UN .
-
ربي يخلليلك بنتك و تتربه بعزك يا رب
و الله يسهل امرك و امر الجميع و الكل تسافر اني عندي صديقي بعمان طول 4 سنين بس سافر بتاريخ 28\11\2010
و من هذاك اليوم لحد هسه ماعندي اي خبر عليه حته الولايه ما اعرفها جان جيراني و هوه الي خلاني اقدم على ال يو ان
فلا تيأس و اني لو ما صديقي ما اقدم على اليو ان بس هوه جيرانتي و سوالي واهس و رحت قدمت
تحياتي و ربي يصبرك
-
أخواني .. أخواتي
بعد أن غسلت أيدي من ال UN لكيت كفيل بكندا وعندي سؤال اذا أقدم تقرير طبي عن حالة بنتي (النفسية) وهذه حقيقة يعني التقرير موجود اذا أقدمه للسفارة يسرعون المعاملة لو يأخروها لو يرفضونا؟ علماً أنو الكفيل خابرني وكال أنطوك file number أرجوكم فيدونا مع شكري الجزيل لكل من ساندني حتى لو بقراءة الموضوع.
-
منكول غير الله ايسهل امرلك وامر الجميع كول ((( امين )))
-
أخواني.... أخواتي
تحياتي الطيبة
بعد ما حكيت مع مدير اليو أن وكال اني راح اتابع الملف مالتك ولأنه هو أجنبي صدكوني ملفي أندرس وجهز وتحول على التوطين وقابلت مقابة أولى كل هذا صار بشهر واحد فقط يعني اللي ماصار بأربع سنوات يم الجماعة خلص بأربع أسابيع.
المقابلة كانت مع عربية وكانت سهلة مجرد معلومات عامة أعتقد بس كتبتها على الكومبيوتر بالانكليزي حتى يقراها الوفد الامريكي من يجي هيه كالت أنتظر كذا شهر !!! أو احنه نخابرك وهذا كل اللي صار.
صدكوني هذا نتيجة مساندتكم وتمنياتكم ألي ولعائلتي أشكركم شكراً جزيلاً وأنشاء ألله الموفقية لكم وللجميع.
واذا أحد عنده علم ماذا بعد هذه المقابلة يعني بعد شكد ويخابرونه؟ فأرجوكم نورونا ألله ينور عليكم.
شكراً.
-
السلام عليكم
هواي أمور مانقدر نفهمها بالحياة،ولا أحكم الحكماء ولا أذكي الأذكياء يفسرها،بس من يجي الفرج،،،،،من حيث لا تعلم ، راح تفهم ليش هالتأخير وراح تتعجب من القهر اللي عشته والدمع اللي سكبته والألم اللي شعرته ماكان إله لازم ،،،لكن نرجع ونقول إحنا بشر تفكيرنا حدود وقدرة الخالق عظيمة.
تحياتي