من اجمل ما قرأت من الشعر الشعبي الحديث
للشاعر جبــــــــار رشيد ...طبعا القصيدة
لوحه شعرية فوق الخيال
خذني يمك بعد ماظل كل عذر لا تعتذر
ليل عمري وعمرك مخلص بعد مابيه صبر
خل نلم احلامه ونحفظ صورهن كبل لاياخذهن بدربه الفجر
وخل نلم الباقيات..... اسنيني وسنينك نسويهن عمر
وهنه ميكفن عمر
ونبدي من جده وجديد بواهس اسنين الصغر
ولو وازانه الكبر
خلي تمشي ايامنه بخطوه العاقل من عثر مره ورجع يمشي حذر
خل نعيش الحب ستر
خل نضم ارواحنه ابيناتنه ويا اسرارنا ولا نشتهر
وافتخر بيه ويا روحك وانا وي روحي اظل بيك افتخر
حبني لتظل تعتذر
خل نسوي العشره ورقه ونصنع من الدمعه والضحكه حبر
حتى كل لحظه التمر بالجاي نكتبه شعر
وخل نكول الماضي غلطه وذنب يسجل ذنب من ينذكر
حبني لتظل تعتذر
حبني واجبرني على حبك الروح ماتعشك لون ما تنجبر
السيف ما ينهاب لو ماكو الطبر
حبني لتظل تعتذر
اعترف راح اعترفلك واحنه شو نفس الامر
اثنينه انبعنه بسعر جوه السعر
اثنينه انبكنه حدر شمس الظهر
اثنينه السجين تانتنه نذر
اثنينه اتواهمنه بالحب ننتصر
اثنينه انعاني الغدر
واعترف راح اعترفلك كلبي جان شكد جسر
وانا جتفت الجسر
واناوزيت الحمامه على النسر
واسمع السر الخطر
صنم سويته بديه وادري ما ينفع يضر
وحاطه كبالي وعجيبه الشوك من عنده انتظر
وانت مثلي بهل امر
صنم سويته بديك اشتنتظر
خل نهد اصنامنا وكافي كفر
وبلكي نهده ونستقر
وبلكت اوياي وانا اوياك استمر
وبلكت المامر كبل هسه يمر
وبلكت اجناح العشك لبعيد ياخذنه ويفر
ونترك الممنوع والميصير
خل نغط بالماي مو صرنه جمر
وبلكي نصحه من السكر
وبلكت المامر كبل هسه يمر
خذني يمك
كبل لا يخلص صبرنه ويطفه دم اوجوهنه ونطلع صفر
خذني يمك
كبل لا ينحك ذهبها اطباعنه ونطلع صفر
خذني يمك
كبل لا رمضان يفطر ويفكر العالم مثل جيه صفر
حطني يمك كبل لا يم الصفر نطلع صفر
لوحة تلونت بأجمل وأرقى الألوآن
جُل الشكر والثنآء لك سيدي
لروحك كل الأحترام
[/color]
لوحة تلونت بأجمل وأرقى الألوآن
جُل الشكر والثنآء لك سيدي
لروحك كل الأحترام
[/color]
مروركم من يعطي المشاركة قيمة
شكراً لكي