ankawa
منتدى الهجرة واللجوء => الهجرة و واللاجئين => دردشة منتدى الهجرة واللاجئين => الموضوع حرر بواسطة: عراقي هواي في 17:20 06/03/2011
-
جيّة العيد للشاعر عريان السيد خلف
يناهي الشوك ذمٌـه وذات من ذات
وفرق مابين حالي وحالك إبعيــــد
سنه وصدٌك يِضَـوك الروح لوعات
ويجَملٌي الجروح جروح ويزيــــــد
أبات إبحضن صبري إليال ويباتْ
جرح يصحه وجرح متغصٌب إيهيد
وأكًًول إشوالف السرحان للشــاة
إعله سـجٌه وكًاوداه الإيـيد بالإييـــد
إلك جـانت يحلو الطول جيـات
عجب تبخل علينه إبجيٌـة العيـــــد
******************** **********
تنينه وأملينه إجفونـٌه إبطيفْ
وصبرنه وصبـٌرينه الآه بـــــالآه
وتحسفنه الحســافه وحيف عالحيـف
عله إسواجي الدموع المالهن جـــــاه
وعرفنه وعود حبك غيم بالصيف
المحل وين المطر بالصيف يلكاه؟
إشيصير إعله الترف لو ينحسب ضيف
إعله غفله وعيد وصل الزين محــــلاه؟
أنه إبعازة الموت وحاجبك ســيف
وأمــوت إبغير صدٌة غيض ماريـــد
إلك جانت يحلو الطول جيـٌات
عجب تبخل علينه إبجيٌـة العيـــد
******************** **********
أحن لمسامرك ولكًاك شلكًاك
شَرِي المعشر حلاوة شــوك مابيــــك
يمر صيفك صبر وتنَطٌر إشتــاك
تبيعك عزتـٌــك وبذلـٌـتي أشريـــك
تراك ويه النفس يلماتجي أشراك
وبالدم اليدور تدور أحس بيك
يبو الروح إعله روح إهواك شلهــاك
وإهي إبعيـن الشفاكًـه إليال تِربيــك
أبد ماسامرتها الآه لولاكْ
ولا جـان إعله دربك لاويــه الجيـــد
إلك جانت يحلو الطول جيـٌات
عجب تبخل علينه إبجيٌـة العيـــد
******************** **********
أنه ولا كًـول عنـٌك غير معذور
ولَو ماظَلْ عذر للروح ينكًــــال
لـَجَنْ ون اليساهر ليل معـذور
ألم لو من وكت لو من ولف شــــال
وانه إبحالي إعله صبرك حال مزهــور
صبر ومكابر المحتـــام جَتـــٌال
إلك عمري إعله زين وشين منذور
ولَو من السنيــن إوشال ما ظـــال
لـَـجَنْ يبقه الجفن للطيف مسمور
ويظل راجد عليها النوم ترجيــــد
إلك جانت يحلو الطول جيـٌات
عجب تبخل علينه إبجيٌـة العيـــد
-
فعلا انت عراقي هواي
-
اعتز بمرورك صديقي العزيز شمعة
-
عمي ابو مصطفى
يعني اثنين بنفس اليوم لا اله الا الله
لا وشولن مقطع الثالث من يغنيه فؤاد سالم يشلع للقلب شلع من مكانه
عمي الغالي ممنونين منك حيل
-
اشكرك بلاك كلك ذوق
وروعة
-
عاشت الايادي ابو مصطفى
كلمات حلووووووة
تقبل تحياتي
-
اله محيك لورنس شكرا اسعدني مرورك الكريم