ankawa

منتدى الهجرة واللجوء => الهجرة و واللاجئين => الموضوع حرر بواسطة: العاشق_1111 في 19:15 13/04/2011

العنوان: صدمه العمر وضاع الامل
أرسل بواسطة: العاشق_1111 في 19:15 13/04/2011
السلام عليكم اخواني الاعزاء بعد جهد جهيد وتحويل على التوطين لمده سنتين وشهر  راجعت ذاك الاسبوع الامم المتحده وكان بالي غير شي انوا ملفي يقدم على احد الدول واذا الموظفه تكلي انته ملفك ماله توطين  واذا  بها تطلق رصاصه الرحمه عليه
ويمعود شلون وهاي جواب الرفض اني متحول على التوطين صار سنتين ودا تماطلون بيه المهم سويت هوسه عليهم لان بصراحه  فقدت السيطره على اعصابي وكات موظفتين جدد بمكان القدمى جاين المهم شرحت الها حالتي  وضعيتي كالت صدك اني حاسه بمعاناتك بس ما اوعدك بشي بس بلكي اكدر ارفع ملفك  مره ثانيه على اللجنه كتله زين هذا شوكت القرار صدر كالت قرر الللجنه بيوم9 شباط 2011
 صدقوني اني هذا المر صار اله اسبوعين بس ماحبيت اكتب الكم خصوصا اخواني المرفوضين من امريكا حتى الا احبطهم ولكن بعد ما شفت انوا من الضروري اشاركم الامر  بلكي احد عنده فكره فد امر نكدر نضغط بيه  على الامم المتحده واني سالت المحامي الي كتبلي الاستئناف طبعا هو تابع لليون كتله الي طالعله توطين يعني هايه  كال اي ملفه ما ينزل للحمايه والامم المتحده تشوفه اكثر من دوله وهي مطالبه انو توطنه لان القرار ما اتوخذ الا همه شافوا حالتك تستحقالتوطين وهاي تكلي بعد مالك توطين
العنوان: رد: صدمه العمر وضاع الامل
أرسل بواسطة: ĈAŃDŶ في 19:17 13/04/2011
موشرط ابد ابد ابد هسه تشوف بعد فترة يحولوك توطين لاتنقهر اخوية ولايظل بالك كل مانع خير ويارب يوم تفرحني وتكول خابروني توطين بلتوفيق
العنوان: رد: صدمه العمر وضاع الامل
أرسل بواسطة: يوزارسيف في 19:23 13/04/2011
الله يكون بعونك اخي وما نكول غير الصبر مفتاح الفرج ، حاول تلح عليهم بالايميلات بلكت يتغير القرار.
العنوان: رد: صدمه العمر وضاع الامل
أرسل بواسطة: العاشق_1111 في 19:27 13/04/2011
والله ياختي (¯`·.ماكنتوشة يسمع منج بس الموظفه تكلي انو اللجنه  قررت انو ملفك ينزل الى الحمايه يعني مالك توطين الك الحق لاجي محمي بسوريا  فقط
ولله تحطمت حياتي  واني اقاسي الامرين بين مراره الغربه وتحطم الاحلام  وخطوره الرجوع الى العراق وما اعرف شسوي
اخي العزيز يوزارسيف انا بسوريا وشلون تصير شغله الاميل  اكون ممنون اذا تفهمني ترى اخوك مستجد  بهاي الشغله  ومشكورين اخواني على مشاعركم الطيبه اتجاهي
العنوان: رد: صدمه العمر وضاع الامل
أرسل بواسطة: ابو خالد في 19:33 13/04/2011
الله يكون بعونك اخوي ولاتيأس من رحمة الله وانشالله يجي يوم وتفرج عليك بأذن الله
العنوان: رد: صدمه العمر وضاع الامل
أرسل بواسطة: تعبان وماعرف في 20:43 13/04/2011
السلام عليكم اخي العاشق كان الله بعونك وصبرك وابدلك خيرا
اخي انته ليش متطلع التركيا وتقدم لئن هناك الامور احسن
وربي يسرامرك وامر كل العراقين
العنوان: رد: صدمه العمر وضاع الامل
أرسل بواسطة: bon في 20:47 13/04/2011
اخي الله يساعدك ويريح بالك بس اني مدا افتهم يعني انت قابلت مقابلة توطين وبعدين رجع ملفك للحمايه؟زين شلون؟ هي  اللجنه من تقابل توطين يعني متخذين قرار انو انت تستحق التوطين شلون يرجعون ب القرار هاي شديسوون بينه :-X ::) ???
العنوان: رد: صدمه العمر وضاع الامل
أرسل بواسطة: AROMATICS في 20:53 13/04/2011
يااخي لا تيأس من رحمه الله ومن ساعه لساعه فرج ورب العالمين ماينسه عباده واتمنى من رب العالمين ان يفرج عليك وعلى كل اللاجئين العراقيين باقرب وقت لان كلنه اتمرمرنه من ضيم الغربه الله يعينك
العنوان: رد: صدمه العمر وضاع الامل
أرسل بواسطة: العاشق_1111 في 20:56 13/04/2011
نعم اخي بون  اني قابلت توطين شهر 3 \2009  وبعدين  حولوني على امريكا وشلعوا كلبي شهر 11 2009 كملت المقابلتين بالهجره  وسنه كامله واو اكثر يالله قابلت وفد يوم 5\8\2010 واجاني قيد الدراسه  شهر 11 وبعدين اجاني الرفض نهايه شهر 12 وهاي جر عر وهاي تاليها
اخي العزيز تعبان  اشكرك على كلماتك العذبه ودعواتك الصادقه  وشغله تركيا انته مدام عندك هنا ملف يطلع عندك هناك وهو نفس الشغله يعني كتله هاج شوفي الجواز اني مارجع ختم واحد من طبيت ماطلعت  وناس رايحين خري مري وطلعتوهم انتوا ما اعرف شلون قوانينكم
العنوان: رد: صدمه العمر وضاع الامل
أرسل بواسطة: abo shams في 21:02 13/04/2011
اخي العزيز الله يبارك بيك قدر الله وما شاء فعل الله يسهل امرك ويجوز ربي كاتبلك الخير بغير مكان الله يسهل امورك و يريح بالك وتوكل على الله فما خاب من توكل عليه وقل حسبي الله ونعم الوكيل بكل شئ
العنوان: رد: صدمه العمر وضاع الامل
أرسل بواسطة: العاشق_1111 في 21:10 13/04/2011
اشكرك اخي العزيز HASSAN45  ويارب تفرج على الجميع ةومشكور عيني ابو خالد ولله ياخوان ما اعرف شسوي  يعني ترجع لهناك الموت ماتعرف باي ساعه  والله اخويه الاصغر مني اخذو من كدامي وما كدرت اسويله شي  بسيطره حكومه المليشيات من 2007 ولحد لان ماله اثر  صفوه ا كيد وهنا مراره الغربه والوحده وظلام المسقبل يعني لحد هسه لا وظيفه لازوجه لا اطفال لااستقرار العمر قهر بقر انكضى اللهم اليك اشكوا ضعف قوتي وقله حيلتي انت رب المستضعفين وانت ربي الى من تكلني يارب الى بعيد يتجهمني ام الى عدوا ملكته امري
العنوان: رد: صدمه العمر وضاع الامل
أرسل بواسطة: SARA CALIFORNIA في 21:17 13/04/2011
اي همه هاي سوالفهم,مو جديدة على احمد راضي,,الله يعينك ويصبرك :'( :'( :'(
العنوان: رد: صدمه العمر وضاع الامل
أرسل بواسطة: ARMY STRONG في 21:21 13/04/2011
الله كريم حبيبي
اهم شي لا تيأس
و السفر قسمه و نصيب
انشاء الله .... الله يعوضك بااحسن من امريكا

يجوز بيها صالح ;)


ARMY STRONG
كروب SIV
على عناد كل مدسوس ;)
العنوان: رد: صدمه العمر وضاع الامل
أرسل بواسطة: العاشق_1111 في 21:26 13/04/2011
نعم اخي الكريم ابو شمس قدر لله ماشاء فعل  وحسبنا الله ونعم الوكيل والله ياخي اني اريد اي بلد يبعدني عن حدود العراق العزيز الذي ضاقت بيه بنا الارض بما رحبت ولكن  مانقو ا لا يارب اانت اعلم بحالنا ولقد نزل بنا من البلاء ما انته بيه اعلم ارحمنا يا ارحم الراحمين
 مشكورين اخوان ARMY STRONG
 sara california  كلامكم العذب  وانشاء لله تفرج على الجميع العراقين يارب
العنوان: رد: صدمه العمر وضاع الامل
أرسل بواسطة: ريم عبد في 21:36 13/04/2011
هاي صار كم حاله سمعت بيها خلال هذا الاسبوع
 يبلغوهم متوطنين وبعدين يكولولهم رجعناكم للحمايه وماعدكم توطين
لازم قربت الساعه :o
وهذه بوادرها :(
اخي العاشق الله يعينك وماعرف شلون اواسيك على هذا الخبر لان فعلا موضوع محزن
ياربي يجعلك الخير في غيره
وماتنسد باب الا يفتحلك ان شاء الله الف باب احسن منها بأذن الله
استمر بالمناشدات
العنوان: رد: صدمه العمر وضاع الامل
أرسل بواسطة: angie-dawood في 21:38 13/04/2011
الله يكون بعونك اخي العاشق نفس السالفة صارت لاخويه من جان بسوريا خابروه كالوا ملفك متحول للتوطين بعد تقديم الاول وظل ينتظر عبرت السنة والثانية وماكو اي نتيجة تالي كتله روح عليهم ميصير تبقى تنتظر بدون فائدة المهم راح جان تكول الموظفة انت منو كال ملفك متحول للتوطين لا متحول ولا شي كال انتوا خابرتوني مرتين مرة تركتوا مسج ومرة كلتوا ملفك تحول للتوطين انتظر من عندنا مقابلة ومن ذاك اليوم اني انتظر على امل تنطوني موعد مقابلة واذا تنكرون عندي الدليل المهم خابرني من يمهم حجيت وي الموظفة وبعد المحادثات طلبت احجي وي محامي مالهم كالوا اتركي رقمك وهو يتصل بيكم تركت الرقم رجع اتصل بيه وكتله هيجي صار وكل هاي الفترة هو ينتظر تالي يكولون ماعندك اي ملف بالتوطين واحنا عدنا الدليل لكلامهم المهم اخر شي بعد المحادثات كال انطيني كم يوم انطيج الجواب وراها باسبوع خابروا اخوية وراح قابلة وخلال سنة من تاريخ المقابلة دخل امريكا شهر السادس السنة الماضية مقصد كلامي كله هو انت قصتك تختلف عن قصة اخوية هو مجان مقابل ولا مرفوض  بس قصدي من هذا كله  هو كلام الموظفين الي باليوان لا تعتمد على مكالمة واحده منهم حاول ان تتـأكد  بنفسك من فايلك اما ان تروح وتستفسر او تحاول تطلب مقابلة المحامي وحاول يكون عندك دليل جديد لاي نوع اظتهاد وتقدمه وتبرهن الهم ان لا يهملون ملفك حتى لو يتحول الى غير دولة المهم هو الامل بالجوء لاي دولة كانت وانشاءلله ربي يفرجها عليك وعلى كل الاخوة والاخوات
العنوان: رد: صدمه العمر وضاع الامل
أرسل بواسطة: شموخ عراقية في 21:43 13/04/2011
  مرحبا اخي
ليش ما الك توطين؟ انت مو مقابل ومرفوص من امريكا؟ يعني ملفم اله توطين ؟ اخي راجعهم وشوف ممعقوله ما الك توطين لو جايك رفض من كندا لا سامح الله جان فهمنه بس مصطلح ما الك توطين هذا لازم تةكف  يمه وتستفسر عن الاسباب وهل اعتقالك اله سبب؟ وللعلم اكو توطين بسوريا الى اكثر من 3 بلدان الك حق اخي وراجع وانشالله موفق
دعائي لك بلتوفيق


ام عبدالله
مصر
[/color]
العنوان: رد: صدمه العمر وضاع الامل
أرسل بواسطة: saaara في 23:08 13/04/2011
اخويه العاشق الله يعينك والله موسهله الواحد يسمع هذا الكلام بس اني اگول لوترتاح فد اسبوعين وتراجع كفرسوسة واحچي ويه الشاب المسؤول علموضفين اكو موضف هناك يكون مشرف علموضفين اعتقد يفهمك احسن من البنات حتى اسلوبه افضل من الاخت الي تحاچيك من خلف الشباك بلتلفون وابد لتصير عصبي حاجيهم بهدوء احسن اخويه بلكي يتغير الكلام اني اعرف وحده جان ملفهة مغلق گلولهة درسنة ملفج وشفنا انو انتي متستحقين توطين بس حمايه وغذائيه وبعدين وره فتره راحت دتمدد ورقه الحمايه وگلولهة مالفج على كندا يعني مختصر مفيد كل موضف يحچي شكل
العنوان: رد: صدمه العمر وضاع الامل
أرسل بواسطة: البغدادي2011 في 00:09 14/04/2011
أخوية العزيز العاشق..الله يكون بعونك وان شاء الله ينظر بحالك ويسهل امرك..والله قصتك غريبة ولو ماكو شي غريب من هذولة الجماعة
المهم حبيبي انت رايد عنوان المفوضية بسويسرا تفضل وتتدلل

swige@unhcr.org

تقبل تحيات اخوك البغــ2011ـــدادي
[/color]
العنوان: رد: صدمه العمر وضاع الامل
أرسل بواسطة: bhabhan في 00:23 14/04/2011
شنو هاي الصدمه الله ايساعدك ويكون بالعون والله العظيم مصيبه شنو بعد هاي الفترة ويكلولك انته ملفك بالحماية ليش المفروض يحولوك لغير دولة زين انته ليش مسويت استئناف قبل مايرجع ملفك لليوئن بالحماية هاي هم تقصير منك
الله يكون بعونك تقبل دعائي يالهي لهذا المظلوم
اخوك بهبهان
العنوان: رد: صدمه العمر وضاع الامل
أرسل بواسطة: مشلوع كلبي في 04:52 14/04/2011
اخويه الله يساعدك

لكن ثق انو موظفين الامم المتحدة كلما تروح على واحد منهم يكولك شكل وانى التمست هذ الشى وقبل سفرى فى سنه 2009 اخذت جيرانى لكفر سوسه لانو ماكانو مراجعين وهمه موجودين ومسجلين لكن مايراجعون على ملفهم واخذتهم يوم ثلاثاء ولما دخلو وطلعو يائسين كلش والموظف ما ترك الهم امل على ملفهم وانى اواسى بيهم وبالطريق اثناء رجعتنا  اتصلو عليهم من كفر سوسه على موعد مقابله وانو ملفهم بقسم التوطين حتى بوقتها ماصدكو الاتصال وفكرو انو احد نصب عليهم ولكن راحو على الموعد وكملو مقابلاتهم والان فى امريكا

مقصد كلامى انو طلع منهم يائس وبعدين اتصلو عليه

الله كريم انشالله الله يبشرك مثلهم
العنوان: رد: صدمه العمر وضاع الامل
أرسل بواسطة: العاشق_1111 في 16:28 14/04/2011
أخواني الاعزاء السلام عليكم اولا انا شاكر وممتن لكلماتكم العذبه ودعواكم الصادقه وتعاطفكم معي وهذا شي ليس بالغريب على العراقين الاصلاء
ثانيا مشكور اخويه  البغدادي على الاميل
اخويه بهبها اني سويت استئناف  والمشكله همه من اتصلوا بيه والمحامي مال اليون  هو من كتبلي الاستئناف  همه اتصلوا بيه  والمشكله من اسالها عن الاستئناف تكول ماكوا بالملف اتصلت بالهجره كالت اي موجود بس بعد ما اكوا اي شي يعني بعد ما بتوا بيه يعني مدا تعرف وين الصدك هسه اريد اقابل المحامي وحتى كالي المحامي انوا بلكي من يجي باتريك نحاول نفتح ملفك ويه دوله اخرى اذا طول الاستئناف  يعني جانت عنجي عده ابواب وعده امال وفجاه انهار كلشي يعني انريد نفتهم ماكوا  وبالنسبه سارا اختي هسه الي جايات بمكان باتريك وهذا انمار المسؤولين الي على الموضفين  نساء اثنين وحده اعتقد اصولولها اسيويه وحده عبالك من اميركا الجنوبيه  هنه هذنه المديرات الجدد وحجيت وياها وكتله اني هاي الادله ما قدمته بالوفد لان جتني متاخره  وعندي تقاير طبيه بس تكلي اني ما بيدي شي هذا قرار اللجنه بس بلكي اكدر احاول اتكلم معاهم بس  ما اوعدك بشي وشغله تريد وقت
العنوان: رد: صدمه العمر وضاع الامل
أرسل بواسطة: العاشق_1111 في 21:08 14/04/2011
حياج الله اختي الكريمه ام عبدالله
نعم اني عندي توطين وكانت خايف من هذا الشي لان سمعت اكوا ناس هم نزلوا فمن قابلت المحامي مال اليون الي كتبلي الاستئناف كتله انوا الي طالع اله توطين يعني هاهيه كال نعم لان هم شافوا قصتك تستحق التوطين  وفوجئت بهذا القرار  دعواتكم ويانا ياختي الكريمه
العنوان: رد: صدمه العمر وضاع الامل
أرسل بواسطة: alzandawi في 09:47 16/04/2011
اخواني الاعزاء الي يقرة رسالتي اني دافتهم من هل الرسائل انو الي يكولولة بلحماية يعني مالة توطين لانه قبل كم يوم والتي خابرت على اليو ان وكلولهة ملفج بلحماية هي رايحة لامريكا وراجعة لانه صار عدهة هوم سك بس كالت احاول مرة ثانية اتندمت من رجعت وكلنه نصحناهة ومفاد يعني الي افتهمة الي بلحماية يعني مابيهة مجال ولكم جزيل الشكر والامتنان والله يسهل اموركم كلكم واني وياكم اعزائي
العنوان: رد: صدمه العمر وضاع الامل
أرسل بواسطة: sara 2011 في 12:45 16/04/2011
اخي العاشق_1111
لتفقد الامل ابد لان اعرف ناس بعمان انرفضو واستأنفو اكثر من مرة وهسة اخير شي انقبلو وسوو فحوصات وبسورية هم اعرف ناس انرفضو مرة وسوو استئناف وانقبلو ورح يسافرون بالعكس كل تأخيرة بيها خيرة وانشالله تنقبل وترتاح وتفرج عليك وعلى الجميع
تحياتي
العنوان: رد: صدمه العمر وضاع الامل
أرسل بواسطة: العاشق_1111 في 17:37 16/04/2011
اختي اسود  المشكله اني اعرف وكان عندي امل انو يتحول ملفي على كندا ولكن اني انصد\مت من تكلي بعد مالك توطين  هاي المشكله يعني اني مقدم من 2008 وطلع توطيني من 3\2009  ولحد اسبوعين من خبرتني انوا مالي  توطين يعني امالي كلها تحطمن من القاع
اختي سارا انشاء ال يسمع منج والله الصبر مل مني ونساني واني اوضاعي   خاصه جدا ومعاناتي الله اعلم بيها ولكن طلبي منكم ومن جميع الاعضاء لاتنسوني من صالح دوعائكم alzandawi  الله كريم هاي همه ماعدهم سياق عمل
العنوان: رد: صدمه العمر وضاع الامل
أرسل بواسطة: sara 2011 في 03:17 17/04/2011
انشالله اخ العاشق
الله يسهل عليك وتنحل امورك
تحياتي
العنوان: رد: صدمه العمر وضاع الامل
أرسل بواسطة: شكوماكو في 12:21 17/04/2011
حبيبي العاشق ذولة اللي بال يو ان كلامهم يومية شكل ثق اني اول مرة اسمع اللي ينرفض من امريكا بعد مااله توطين  وهاي الناس اللي هسة بكندا وبفنلندا واستراليا والمانيا اللي كانو مرفوضين من امريكا  لعد شنو وكلمن ايكلك طالع قرار بعدم توطين المرفوضين من امريكا مع احترامي الة غير دقيق بكلامة واني اكلك نفس هاي اللي كلتلك بعد ماالك توطين هي نفسهة تخابرك فد يوم وتكلك ملفك اتحول على كندا فانت لا تقلق نفسك والشغلة يرادلهة  شوية صبر ولا تياس من رحمة رب العالمين فهو على كل شيء قدير
العنوان: رد: صدمه العمر وضاع الامل
أرسل بواسطة: ابو الزين في 14:42 17/04/2011
الله يكون بعونك اخي العاشق ترى اليو ان كلشي ميعرفون لان انا امقابل مقابلتين ب اي او ام بعدها اتزوجت فطلبوا مني اظافة زوجتي فرحت على اليون ان حتى اظيف زوجتي ما اشوف غير الموظفة تكلي انت جاييك رفض ممقبول بالتوطين كتلها شلون جاييني رفض وانا ما امقابل الوفد قالت ملفك مرفوض كتلها زين ال اي وا ام اتصلو بيه وكالولي ضيف زوجتك قالت هذا الموجود بعد ساعة اتصلت وقالت تعال ضيف زوجتك نحنا كنا مخربطين
العنوان: رد: صدمه العمر وضاع الامل
أرسل بواسطة: candyman في 18:49 18/04/2011
السلام عليكم ورحمة الله وبركاته اخوية العزيز العاشق قدر الله ما شاء  فعل ودفع الله ما كان اعظم .. ولاتدري اين يكمن الخير لك ولكن الذي نحن متأكدين منه ان الخير كله بيد الله وهو من اختار لك هذا الامر والله اعلم ..وتذكر اخي قصة النبي موسى مع العبد الصالح كيف ان خرق السفينة فيه صالح لأهلها وقتل العلام فيه صالح لأهله وبناء الجدار ..وان بالقصص لعبرة واللع اعلم
اخوك ابو عبد الله
العنوان: رد: صدمه العمر وضاع الامل
أرسل بواسطة: hamdany في 16:30 19/04/2011
اخي العزيز انني اقدر شعورك والله يكون في عونك ويصبرك..نعم اخي العزيز هذا ماحصل لي واقتنعت بالنصيب حيث بدات الام المتحدة اليو ان بتبليغ المرفوضيين من امريكا بغلق ملفاتهم ومنحهم اللجؤ فقط في الدولة اللتي هو موجودين فيها حيث كنت محول على امريكا واكملت المقابلات وجائني رفض ولم اقدم استئناف عسى ان اتحول على دولة اخرى لكن بعد ثلاثة اشهر من الانتظار اتصلو بي واخبروني بعدم امكانية تحويلي لدولة اخرى واخبروني بغلق ملفي وابقى لاجيء في سوريا كانت صدمة كبيرة لي لكن الخير فيما اختار الله والان نسيت موضوع اللجؤ الى الابد وماباليد حيلة
العنوان: رد: صدمه العمر وضاع الامل
أرسل بواسطة: ام يس في 17:53 19/04/2011
الله يصبرك اخي وعسى ان تكرهو شي وهو خير لكم
انشالله يتصلون بيك ويكونون عايدين النظر بملفك ويحولوك الى دوله زينه وترتاح وتمشي امورك وتصير صدمه العمر مالتك سوالف قديمه وخلي املك بالله جبير
الله يصبرك