ankawa
منتدى الهجرة واللجوء => الهجرة و واللاجئين => الموضوع حرر بواسطة: malak.ali في 23:38 23/05/2011
-
السلام عليكم ورحمة الله وبركاته
هناك وظائف مترجمين شاغره مع احد الوحدات الامريكيه القتاليه
يعني مو كاعد وساكت بالمعسكر تطلع تفتر وياهم بشوارع بغداد
السؤال هو
هل يوجد خطوره في هذا العمل ؟؟؟
هل العمل معهم يعتبر مغامره
ام لا يوجد اي خطوره
اريد نصيحتكم رجاءءا
-
توجد خطورة ليش ماكو خطورة قابل هايه القوات الامريكية راح تفتر بسويسرا.
هيجي شغلا ما بيه نصيحة اخويه ;D . كلمن و ضروفه لا واحد يكدر يكلك روح و الهوه بضهرك و اتروح و تجيك طلقه تايهه انوب يفوت بخيطتك ولا يكدر يكلك لا اتروح لان احتمال انت محتاج شغل و فلوس و هايه بيه خوش مورد الك فراح يكطع رزقك.
تحياتي
-
اخي العزيز هو العمل مع الامريكان بشكل عام خطر والاخطر منه العمل بوحدات فعالة اي تفتر وما يسمى بالجوال ... ولكن لكل شيء ثمن وحتماً الان الخطورة اقل بكثير من السابق لكن ليست حتمية لان الاوضاع في المستقبل مجهولة وقد تكون نحو الاسوء لا سامح الله ويبقى الموضوع متروك الك في تقدير الموقف وحساسيته من سكنك والمكان اللي تعمل فيه .
تمنيايت بالتوفيق
-
اشكركم اخواني الاعزاء
فعلا هي شغله محيره متعرف تغامر لو تكعد وتسكت
-
أخي العزيز هذا شي ميكدر احد يقرره الك ويكون منافق الكثير غامروا وبيهم عايشين وبيهم الان مع الاموات ونطلب الهم الرحمة حسب الوضع وقرائتك للامور نوبة اصيب ونوبة اتخيب اني مثلاً في مرحلة يجوز غامرت وكانت جداً جداً صعبة والان خارج البلد مقدم على IOM لكن الكثير من الزملاء كان حظهم سيء ومحالفهم العمل ... وطبعاً هذا مو بس مع الامريكان يجوز تعمل وياهم والله يوفقك وتكدر اتغير حياتك وتحسن من لغتك عن طريقهم ويجوز انت كاعد ابيتك وتجيك مشكلة متعرف منين لتفهم كلامي تشجيع الك اني من زمان حلمي الطلعة من العراق بكل ثمن من كان عمري 18 سنة لكن مو شرط انت يكون رأيك مثلي ربما عندك رأي مختلف ... والله يوفقك اخي العزيز .
تحياتي
-
روحك = 1300 دولار فقط
حسب علمي اخت ملاك
-
ربي يحفظنا ويحفظكم ويبعد الشر عن كل عراقي شريف وعن كل مسلم شريف وعن كل انسان شريف
-
حبي انتة شدكول اعتبر واحد سالك اشراح اتجاوبة ;)
عيني الله يسهل عليك وتلكة شغلة اتكون اتحافض بيهة على حياتك وخاصة اذا كنت مسؤل على عائلة انتة فكر بيهم وين يرحون اذا متت لا سامح الله والك العمر الطويل انشاء الله
صحيح الامور تعبانة بالعراق والشغل قليل والله يعينكم اخوية انتة شوف واستخير واسال وربي يحميكم ويحفضكم اينما كنتو يا شباب العراق وتبقة رؤسكم مرفوعة وين ما رحتو
ربي الفرج من عندك
-
اختي ملاك الاعمار بيد الله.. .. اكو هواية ناس اشتغلت وية الامريكان و ما صار بيهم شي و اكو ناس كاعدين ببيوتهم انقتلو لاسباب تافهة.. انتو استخيروا و الي بيه خير الله يقدمه.. الموضوع خطر و مو سهل.. بس بالظروف الصعبه بال2005 و 2006 و الناس جانت تشتغل لان مضطره.. بيهم الي استشهد و بيهم الي بعده.. الاعمار و الارزاق بيد الله سبحانه و تعالى...
-
يمعود روح هيه موته لو موتين اقلها تموت على التبريد................وانته بكيفك تريد تموت بالهمر لو على ايد السيد ...
-
صباح الخيررر :
اولا واخرا القرار قرارك لكن يبقى وضعك انته الداخلي داخل اسرتك داخل منطقتك رتب كل امورك قبل متخطو هيج خطوه الي يكولوك ماكو اي خطرر كله تكذب لا اكو خطرر لكن ليش مثل 2500 او 2006 تغيرر واذا حسيت حالك محتاج الوظيفة جدا جدا وماعندك اي حل امامك توكل على الله واشتغل واذا ممحتاج العمل وامورك يعني مقبولة هم براحتك لكن بصراحة العمل مع القوات الامريكية بالنسبة الي جدا ممتع
وشكرااا
-
اخي العزيز اعتقد صار عندك تصور كامل عن الموضوع خلال ردود اخوانه ويبقى القرار الك وادعو الله سبحانه بالتوفيق بقرارك
-
ماكو لتخاف كرايبنه واصدقاء هواي اشغلوا ومصارلهم شي
-
وين الربط بين هالموضوع وموضوع الهجرة واللاجئين مع تقديري لصاحب الموضوع ؟؟؟؟
-
اخوية اذا الراتب نفس ايام قبل 1400 دولار تسوة المغامرة اما اذا سبعة نصيحة اخوية لاتعب نفسك التكسي احسن من شغلهم تقبل تحياتي
-
اخي العزيز يبقى القرار الك مع احترامي للاخت سارة اذا اقاربها مصارلهم شي هذا مو دليل ممكن انت باول طلعة ايصيرلك اشياء وتكون في خبر كان هاي روح مولعبة وراها الكل اتلومك اتكول ضحى بحياته من اجل لفلوس انت اسعى ورة مستقبلك وحياتك وما اتريده بالضبط اما الحياة والممات هي بيد الله سبحانه والامور كل يوم ازيد خطورة وانت عندك تصور اكثر من عدنه لانك مازلت في العراق للعلم شغلة الجوال مو لان عدهم شاغل لا لكن من قبل اربع سنين عدما كنت في العراق محد يفضلها من المترجمين لخطورتها لهذا تلكة دائماً شاغرة وبيها مجال المترجمين غالباً يفضلون القواعد الثابتة .
بالتوفيق اخي
-
اخي ابن العراق صحيح كلامك بس هيه شنو العيشة بالعراق هم عيشه!!!!!!!!!!!!!!!!! وشنو حياة الانسان بلا عمل كابة وقهر وكعدة بالبيت قولي شراح يحصل شغل اذا مو بالواسطة ؟هاي اذا لكه احد يسويله واسطه بعدين ممكن تكون هاي الايام خطرة لان هسه جيش المهدي هم قام يطلع عضلاته خل يصبر كم يوم يشوف شلون تصير الامور ويقرر بالشي الي يناسب ظروفه
-
اختي العزيزة سارة احب انوه على ان عنواني هو "ابناء العراق" ... اما بخصوص الخطر انت نفسج جاوبتي بان جيش المهدي بدأ استعراض قوته اضافة الى استهداف المترجمين من جميع التيارات والكتل تقريباً هاي نقطة النقطة الثانية يعني ممعقولة اذا ماكو شغل لازم يرمي نفسه بالنار ثم مو شرط الشغل بالدولة اني مثلا عندي كان مكتب والحمد لله كنت اطلع اكثر من الوظيفة لهذا متعينت وهو مترجم يعني مجالة موجود في مكاتب الترجمة او الشركات خصوصا الان الاستثمار على قدم وساق بالعراق من قبل الشركات الاسيوية والاوربية وكلنه نعرف اخوانه العراقيين ضعفاء جداً باللغة لدرجة اشاهد التلفاز كلية الهندسة تطلب من العمادة يجعلون المنهج بالعربي وهم كلية الهندسة اللي اقل معدل من 85 واعلى وانت قيسي ... مع احترامي لرأيج مع هذا اني تركت المجال اله لكن منكدر انكله عرض نفسك لخطر التفجير والقتل احسن مما تتعرض لافة الجوع والقحط !!
تحياتي للجميع
-
??? ??? ??? على شنو كاعد تحجون ومتعبين نفسكم ؟؟؟؟؟؟؟؟؟؟؟
هاي وين العمل الشاغر في الترجمه في العراق لو في باكستان اذا في باكستان بيه مجال بس بالعراق ماكو هيج حجي لان الشركة انهت العقد للمترجمين قبل 3 ايام من اليوم وبعد ماكو اي تعيين جديد او اعادة تعيين في المعسكرات الامريكه خلوها ببالكم
تحياتي للجميع