ankawa

منتدى الهجرة واللجوء => الهجرة و واللاجئين => الموضوع حرر بواسطة: بغدادي76 في 09:41 14/06/2011

العنوان: الحكوني .... تذكرة طائرة ؟ لو إنتقام ؟ .... SIV
أرسل بواسطة: بغدادي76 في 09:41 14/06/2011
أخوان اجتني تفاصيل الرحلة لأمريكا , بس فد شي دمار وإنتقام

من بغداد - لعمان
بعمان إنتظار 11 ساعة و 45 دقيقة !!! ونطير لفرانكفورت بألمانيا
وبفرانكوفت ننتظر 6 ساعات و 55 دقيقة ياله نطير لنيورك !

أخوان هاي ألهه حل ؟ أكدر آني اشتري التذكره بدون ما أتنازل عن البنفتس ؟
زين اخوان اللي مسافرين مارين على هيج رحلة ؟
زين انتظار 11 ساعة 45 دقيقة وين ؟ بالمساطب ؟ لو اكو فندق ؟ لو شنو ؟ تره ماترهم وآني ويايه مرة حامل
وفوكاهه 7 ساعات بألمانيا
وبعدين تجي الرحلة الداخلية همين !
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: احمد عباس في 09:47 14/06/2011
الله يساعدك
تقريباً 12 ساعه ترانزيت
شوف حتى لو همه راح يبيتوكم على المساطب فه انت تكدر تكعد بفندق المطار بس على حسابك
لكن ام ال 7 ساعات هاي شويه واكفه على 7 ساعات تدفع مال يوم كامل فندق
بس اذا عندك مره حامل هاي هي شسوي لازم ترتاح
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: TROY في 09:54 14/06/2011
اخوية اذا انتة السفر مالتك الساعة بالوحدة راح توصل المانيا بالليل ينطوك غرفة ترتاح بية بية سرير نكدر تنام بس اذا وصلت بالنهار لالمانيا لا ما ينطوك غرفة لان هذا الشي صار وية ابن عمي واللة ايسهلك اتحملة شون ما جان هية يومين ونص يلة توصل ولايتك


                                                                          بالسلامة
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: y3soob في 10:25 14/06/2011
الله يعينك اخوية.. بس مثل ما تفضل الاخ قبلي من حقك بالاردن تاجر غرفة بفندق المطار تكضي بيها فد8 او 9 ساعات وقت الانتظار.. الله يسهل الكم و ان شاء الله توصلون بالسلامة
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: بغدادي76 في 10:27 14/06/2011
نوصل سته ونص  الصبح لألمانيا
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: نــــــــــوار تيتــــــو في 10:37 14/06/2011
الله يكون بعونك  :'( :'( :'( :'( :'( :'( :'( :'( :'( :'(
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: ميمي2010 في 10:39 14/06/2011
الله يعينك يارب على هذا التعب ويسهل طريقكم وتوصلون بالف سلامة
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: فارس الغربة في 10:43 14/06/2011
والله اخي حيل صعبه صدك الله يساعدك

توصلون بالسلامه
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: messi10 في 10:46 14/06/2011
يمعود صدك جذب احلى شي بالدنيا الترانزيتااات وداعتك روح طش بالمطارااات ميخلصن و متشبع .. توكل بالله و اتونس هاي سفرة العمر .. بس اذا عندك الاهل وياك صحيح صعبة عليهم شوية بس انشالله ينطوكم غرفة بفندق و حته اذا منطوا اصرفلك شوية شسوي حته يرتاحون ..تحياتي الك و بالتوفييق
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: SARA CALIFORNIA في 10:53 14/06/2011
دقيقة عيني تره ميصير هيج هاي مو تذكرة كولتك انتقام >:(
اخي انته اتصور تكدر تشتري التكت مالتك بنفسك و مياثر عالبنفتس مالتك اني اعرف اكو واحد ويانه بالمنتدى جان سوه هيج,,,بس لتكلي منو لان نسيته ;D عالعموم انته اتصل بيهم و بلغهم بالشغلة,,,و خاصة موضوع زوجتك الحامل لان هاي خطية راح تتبهذل...
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: احمد عباس في 11:39 14/06/2011
ساره ماعتقد يصير
لان هوايه ناس تنتضر موعد سفر لا شهر ولا شهرين
ومستعدين يشترون التكت على حسابهم بس يسافرون

وهمين ميقبلون

جان الناس كلها سوت هيج بدال مكاعد بالاردن يدفع ايجارات الى ان يحددوله موعد سفر
يدفعها تكت ويسافر احسن مينتضر

بس ميصير
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: ابورحمه في 11:44 14/06/2011
اخويه سامي لي ... شلونك وانشاء الله توصل بالف سلامه
بس صدك هاي شلعان قلب واني سمعت هواي ناس اشتكت من الرحله لانها طويله فعلا" ومتعبه
الله يكون بعونك يا اخويه
بس حسب ما اعرف ما اعتقد تكدر تسافر على حسابك لان انت وقعت اصلا على البنفشري والتذاكر جزء من البنفشري فورم
المهم اتحمل اخويه والله كريم

سلامي وتحياتي لجميع الاخوان

اخوك ابورحمه
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: SARA CALIFORNIA في 11:48 14/06/2011
ساره ماعتقد يصير
لان هوايه ناس تنتضر موعد سفر لا شهر ولا شهرين
ومستعدين يشترون التكت على حسابهم بس يسافرون

وهمين ميقبلون

جان الناس كلها سوت هيج بدال مكاعد بالاردن يدفع ايجارات الى ان يحددوله موعد سفر
يدفعها تكت ويسافر احسن مينتضر

بس ميصير
لا احمد اني مقصدت هيج,,,هو اصلا خلصانة شغلته و فيزته طالعة يعني هاك اخذ فيزتك بيدك,,,بقة شوكت ميريد يسافر يسافر(مع مراعاة موعد الاكسباير مال الفيزة طبعا) تبقى تكت الطيارة يكدر هو يشتريه على مزاجه و اللي يصرفله لان اكو واحد من جماعة الاس اي في سواها بوكتها من استلم الفيزة,,,و هسه يدخلون جماعة الاس اي في و نشوف رايهم
العنوان: حلوووو
أرسل بواسطة: bob2011 في 12:40 14/06/2011
مساء الخيررر "


اخي العزيز الله يساعدك وانشاءالله التساهيل من رب العباد
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: IsamZM1 في 13:54 14/06/2011
الحمد لله انشاء الله ربي تتوفقون بقوة لا اله الا الله ... حسب معلوماتي من اصدقائيكلهة هيج سافرت بس اذا تروح على حسابك تروح عليك البنفت فاصبر والله كريم واقضي الوقت الاطول بفندق المطار ....
عندي سؤال اخوية العزيز
انتة مقدم على siv شوكت كان موعد مقابلتك بيا شهر ويا سنة لان اني هم siv واشو طولت مع العلم كلولي اسابيع قليلة وتستلم الفيزا اشو صار من 13/20/2010 لحد هسة انتظر اذا عندك معلومات بلكي تفيدني بيهة وشكرا الك وبالتوفيق وربي يحفظكم بسفركم انشاء الله
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: لوليه في 14:04 14/06/2011
يمعود ما بيها شي سافر واخلص المهم تسافر تتحمل يومين طيران ولا امنية سنتين والواحد يتونس بالترانزيت مطاراتهم تخبل ومريحة وتشوف دنيا وعالم  ;D :o
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: ابو هنودة في 14:35 14/06/2011
اخي بغدادي 76
 اولا الف الف مبروك وبالتوفيق انشاء الله
ثانيا الفترة الطويلة هي في عمان اذا كان الموعد من بغداد مضبوط حيث ان 12 ساعة لزوجتك صعبة جدا ولكن المشكلة محلولة فهناك فندق في المطار يمكنكم البقاء به لحين موعد الطيارة.
من عمان الى فرانكفرت حوالي 4 ساعات نوعا ً ما سهلة . 7 ساعات في مطار فرانكوت ليست بالطويلة اذا تجولتم بالمطار فسيمر الوقت بسرعة ولكن المشكلة هي في الرحلة الى نيويورك وخاصة بالنسبة الى زوجتك حيث تستغرق الرحلة حوالي 10 ساعات.
المهم ان ترتاحوا في فرانكفورت لا اعلم ان كنتم تستطيعون ان ترتاحوا بالفندق.
اتمنى لكم رحلة موفقة وانشاء الله تتسهل اموركم وتصلون بالسلامة
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: مالي سواك في 14:53 14/06/2011
بغدادي 76 الله ايكون بعونك الله ايسهل امرك ان شاء الله توصل بل سلامة
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: nickazawee في 15:17 14/06/2011
اخي العزيز هذا الموضوع كلش طبيعي وعادي اصلا لان هذا الخط المزعج اغلب العراقييين طايريين عليه طبعا راح اكلك اخبار مو حلو بس اتحملها لان اخوك رايح جاي للعراقي واني اهنا مقيم بامريكا ماشي اولا ... الي يكلك تكدر تاجر غرفه بالمطار كله لا لان انت ما طاير على الملكيه انت راح لامريكا لان الترانزيت بعمان ويخلوك بالفندق ابلاش وخدمه 5 نجوم بحاله وحده الا تكون واصل من العراق على الملكيه وراح اتطير هم على الملكيه لذلك تستفاد من الترانزيت ... ثانيا هاي الرحله متعبه حقيقي لذلك اخذ وياك بطانيه لزوجتك ومخده وهذا الامر مو عيب لا ماكو احد ميسويها اذا اتاخر لفلايت مالته بسبب الجو او مشاكل اخرى .... ثالثا اخي هيه بالنسبه الك مره بالعمر رتب حالك بالتكدر عليه لان ماكو غير حل حبي انت ولازم تتحملون هاي الامور لان الي يسافر لامريكا اول مره يتعذب حقيقي بس بعدين يرتاح ويارب توصل بالسلامه انت وزوجتك وتشوف كل الخير والموفقيه .... اسف على الصراحه بس انت تحتاجها اهنا ههههه
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: windtalker في 15:45 14/06/2011
انته مابيدك شي غير تصبر عادي انشاالله توصل بالف سلامه
وترى هاي شغلة بصيطة وداعتك ولا تدير بال والف مبروك
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: سرى1 في 16:18 14/06/2011
دقيقة عيني تره ميصير هيج هاي مو تذكرة كولتك انتقام >:(
اخي انته اتصور تكدر تشتري التكت مالتك بنفسك و مياثر عالبنفتس مالتك اني اعرف اكو واحد ويانه بالمنتدى جان سوه هيج,,,بس لتكلي منو لان نسيته ;D عالعموم انته اتصل بيهم و بلغهم بالشغلة,,,و خاصة موضوع زوجتك الحامل لان هاي خطية راح تتبهذل...

عزيزتي سارة من رخصتك هذا الكلام مو دقيق طبعا يأثر عالبنفتس ما دامه سافر بدون الاي او ام



 
أخوان اجتني تفاصيل الرحلة لأمريكا , بس فد شي دمار وإنتقام

من بغداد - لعمان
بعمان إنتظار 11 ساعة و 45 دقيقة !!! ونطير لفرانكفورت بألمانيا
وبفرانكوفت ننتظر 6 ساعات و 55 دقيقة ياله نطير لنيورك !

أخوان هاي ألهه حل ؟ أكدر آني اشتري التذكره بدون ما أتنازل عن البنفتس ؟
زين اخوان اللي مسافرين مارين على هيج رحلة ؟
زين انتظار 11 ساعة 45 دقيقة وين ؟ بالمساطب ؟ لو اكو فندق ؟ لو شنو ؟ تره ماترهم وآني ويايه مرة حامل
وفوكاهه 7 ساعات بألمانيا
وبعدين تجي الرحلة الداخلية همين !

اخي بغدادي الحجي الدقيق والمضبوط هو انه لـــــــــــــــا تسافر وحدك لامريكا اذا رايد بنفتس

اكو حل ممكن يفيدك وسووه اخواننا بوقتها علمود ارخصلهم بفلوس التذكرة

بما انه انت اس اي في فتكدر تختار مكان السفر يعني تختار المطار اللي تسافر منه

الخطوات اللي تسويها كالتالي: تحجز انت على بغداد-عمان وممكن تحصل على فيزا مرور يسموها اعتقد صلايحتها اسبوع وقبلها انت تتفق وية خلود الحموي انه تسافر من عمــــــــــــان مو من بغداد وبهاي الحالة على الاقل تخصلون من ال12 ساعة مال عمان وهاي اسوأ فترة ترانزيت

شغلة المانيا ان شاء الله محلولة وال6 ساعات ممكن تنقضي بس اخذوا وياكم بالهاند باك (او باك باك) بطانية خفيفة يعني مثل الغطوة ترة المطارات بطبيعتها باردة ثلج

العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: SARA CALIFORNIA في 16:31 14/06/2011
سراوي حبي هذا اللي جنت اقصده يعني اكو شي خياري بالشغلة,,,اتذكر فنجنزو بوكتها سوى هيج بس اني افتهمت انه هو اشترى التكت او مسار الرحلة اللي يعجبه و الجماعة دفعو  ::)
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: سرى1 في 16:35 14/06/2011
سراوي حبي هذا اللي جنت اقصده يعني اكو شي خياري بالشغلة,,,اتذكر فنجنزو بوكتها سوى هيج بس اني افتهمت انه هو اشترى التكت او مسار الرحلة اللي يعجبه و الجماعة دفعو  ::)

اي حبي بس فنجنزو شغلته تختلف هو متفق وياهم من البداية انه سفره يكون من عمان هاي اولا

ثانيا سافر عالبري علمود تكون التذكرة الكلية ارخصله وطب لعمان بفيزا مرور ورة ما راواهم فيزة الاس اي في حسب ما كال

الشخص الثاني او اخونا ابو محمود اللي راح جدد اقامته ببلغاريا ومناك كللهم اريد اسافر من اقرب مطار واعتقد بوقتها سافر من مطار فرانكفورت ما اذكر بالتحديد وايضا بالاتفاق وية الاي او ام

يعني المهم بعلم الاي او ام ويسافر وياهم من مطار متفق عليه ويدخل امريكا وية جماعة الاي او ام مو وحده

اما اذا سافر وحده فالبنفتس بعد ما يستحقها وتبقى بقية المساعدات يقدم عليها بنفسه من يوصل

تحياتي
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: مرسي الزناتي في 16:37 14/06/2011
خاله سرى زين الحل شنو ::) ؟

الولد خطيه مو وحده ::)
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: سرى1 في 16:40 14/06/2011
خاله سرى زين الحل شنو ::) ؟

الولد خطيه مو وحده ::)


اقرا الحل فوك عمو مارد مو كلنا يحجز على حسابه لعمان ويتفق مسبقا وية خلود الحوي انه يطير من عمان وية الاي او ام  وبهاي الحالة يخلص من ترانزيت عمان ابو ال12 ساعة وهاي اطول فترة
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: Broken_Man في 16:48 14/06/2011
هذا بعا كلة حجي ,,,,, لان الموعد تحدد و خلص و اي تاجيلبالموعد او تاخير مو من صالحك اخوية سافر شلون ما جان المهم انتة راح توصل و اعتبر نفسك طالع فرضية و شوية شد حيلك و داري المرة و داعتك كلشي يسهل و بالتوفيق
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: مغترب بلا وطن في 17:29 14/06/2011
قال الشاعر

انت كنت لا تدري ف تلك مصيبه وان كنت تدري ف المصيبه اعظمو

اخوية هذا النوع من التذاكر الي بيه انتظار ساعات طويله في مطارات مختلفه يكون سعره رخيص اذا ما مقورن بتذاكر ثانية يكون فيها الترانزيت ساعه او ساعتين , الاي او ام دائما يحجزون ارخص شي لان بالنهاية تخفف عنك سعر التذكره الي راح تدفعها انت, اذا تريد تسافر على حسابك تخسر البنفتس وهذا ذيل الايميل الي انت تعرفه اكيد

هسة اني ددور بالتذاكر من اوسلو الى سان فرانسسكو كلها فوك الاف وخمسميه يورو بس من عدا الي بيها ترانزيت ام 12 ساعة فما فوق اقل من الف يورو.

NOTE:  You must travel on an IOM arranged flight in order to qualify for Department of State resettlement
benefits. Should any of the information you provided on the DS-0234 Form change prior to your arrival in the United States, including pregnancy or the birth of a child, please notify us as soon as possible. Changing your resettlement preference and/or final destination may delay your travel to the U.S., and change requests received within 30 days of your visa expiration date will not be accommodated.
 
Please visit our website for additional information:  www.wrapsnet.org > SIV/Iraqi P-2
.
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: PlatinuM في 17:34 14/06/2011
الف مبروك اخي العزيز والله يكون بعونك
تحياتي لك
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: شنايزر في 17:47 14/06/2011
lالف مبروك عالسفر وبالنسبة لمشاق الرحلة صحيح صعبة بس شنو الهدف ؟ امريكا بداية مستقبل جديد .... اذن تحمل هذة المشاق في سبيل المستقبل والذي اتمناه زاهر لك

                                                 تحياتي
العنوان: رد: الحكوني .... تذكرة طائرة ؟ لو إنتقام ؟ .... SIV
أرسل بواسطة: مرسي الزناتي في 17:47 14/06/2011
روح سافر

يعني صبرت اشهر على انتظار الفيزا ما تصبر 12 ساعه  >:(
تذكر لوعه انظار الفيزا اخويه لو نسيت؟ ::)

لو ينطوني ترانزيت شهر انام بل  مطار هسه اروح على الاقل راح اعرف شوكت ادخل امريكا و الفيزا بل جيب ::)

تحملها شلون ما جان