ankawa
منتدى الهجرة واللجوء => الهجرة و واللاجئين => الموضوع حرر بواسطة: ام مهند في 11:40 14/06/2011
-
اخواني واعزائي العينكاويين هذا الموضوع اريد اطرحة عليكم حتى تنطوني حل او رأي وارجو لا تلوموني لان الي بيّه مكفيني وهواي شبعت ملامة من ابو مهند .
احتمال يحددولنه مقابلة محلف نهاية هذا الشهر او بداية الشهر القادم وكالو موقف الشخص من الخدمة العسكرية مهمه جدا وبصراحة ابو مهند ما موجود عنده دفتر الخدمة وكتاب تسريحه وهو اصلا دافع بدل جان يعني المستمسكات العسكرية صارلنه هواي ندور عليهه ماكو على كولة المصريين ---فص ملح وذاب--- طبعا هو غضبه كوله خلاه عليه على اساس اني المذنبه واني الي مضيعتهن هو هذا طبع الزوج العراقي وللأسف لويش هو ينزل غضبه على زوجته من هو يخطأ ما اعرف مع احتراماتي للكل عموما ما لكينه المستمسكات وبالمقابله الاولى كلنه بانو دفتر الخدمه ما موجود مفقود او تالف وما نعرف مصيره بس يعني سمعت كلام بانو هاي المستمسكات ضرورية جدا بمقابلة المحلف واحتمال اذا ما موجوده حتى يصير رفض من قبل المحلف او تكون القضية تحت الدراسه يعني تتأخر اريد اراء اصحاب الخبره والي مقابلين محلف او عدهم اي معلومات بهذا الشأن علما انو احنه مقدمين على IOM بغداد
تحياتي للكل ودعوتي للمشاركة اذا امكن
-
ام مهند حقج تقلقين و تضوجين بس انشالله سهلة و ماتأثر عليكم ذاك التأثير انتوا كلولهم دافعين بدل همة كلش زين يدروون بسالفة البدل و هواية ناس دافعة بدل صحيح الوثائق لو موجودة يكون احسن بس مو مهم لدرجة انو ينطوكم رفض..ماعتقد احد ناطي رفض لعدم وجود دفتر خدمة... تحياتي الج و لاتشيلين هم سهلة انشالله..بلتوفيق
-
اختي العزيزة اني نفس حالتكم وكلشي ما اخذت وهمة سئلوني وكتلهم شككتهم بسبب الاوضاع الي مر بيهة البلد وما كال اي شي المحلف بس كام يسال اسئلة روتينية على العسكرية والافضل لكم ان تطبقون المثل الي يكول \ خير الكلام ما قل ودل \ لان كل ما يكثر الكلام يكثر التجيك الامني عليكم وتمنياتي لكم بالسفر القريب \ اخوكم صفاء الصحفي
-
اخ ميسي شكرا على تفائلك ورفع معنوياتي والله هاي شغلتنه يوميه ابو مهند صاير اعصاب من وره شغلة يومية سالفة ويومية كأبه شكل
اخ صفاء وبعدين يعني شنو الي صار بعد مقابلتك للمحلف جتي الموافقة لو بعدك تنتظرهه وشكرا جزيلا على مرورك
-
اختي العزيزة ام مهند
بالنسبة لموضوع دفتر الخدمة العسكرية عدم وجوده لايؤدي الى رفض او قيد الدراسة من قبل المحلف لكن وجود دفتر الخدمة العسكرية يسهل على المحلف الاسئلة والقتاعة بموضوع الخدمة العسكرية فقط يعني ماله ربط بقصة التهديد او الحالة الانسانية المحالين بموجبها للتوطين ...
-
واضح اخ عمر وشكرا على مرورك بس ابو مهند يريد كولشي كامل ويكول صح احنه قاسمين بس لازم يكون حجينه منطقي لان ما معقوله شخص يتلف مستمسكاته مال خدمة عسكرية
-
أختي العزيزة ان شاء الله تكون مقابلة سهلة عليكم وتصير سوالف ....
هي من ناحية مهمه يعني اتكدرين اتكولين 50% مهمه لان هيه تنطي مصداقية للكلام عن الخدمة بس وداعتج اكثر الي سافرو ما عدهم دفتر خدمة ومو شي ضروري 100% اتوكلي بالله أختي وان شاء الله موفقين
-
دفتر الخدمة من المستمسكات المهمه, و وجوده اتعزز و تؤكد المعلومات الخاصة بالعسكريه. لكن عدم وجود الدفتر لا يعطي للمحلف سبب لرفض القضيه ابدا....
بالنسبه اليه شخصيا بالمقابله الاولى اصلا ما طلب مني ابراز الدفتر ولا سال عنه .بس طبعا سالني على عسكريتي و عن بعض المعلومات و التواريخ وبنهايه المقابلة كلي شعندك مستمسكات تريد اتضيفه انطيني نسخه منه . كتله نعم عندي كثير و من ضمنها دفتر الخدمه ومترجمه همينه . فكلي لا اتحددلي دفتر خدمه لوغيره, اشعندك اوراق قد تفيدك و بي اسمك انطيني اياه....
وطبعا بمقابلة المحلف همينه لا كلي وين دفترك ولا هم يحزنون واني جنت محضره. بس سالني على العسكريه و جاوبته على كد اسئلته و ابوج الله يرحمه.
تحياتي
-
الاخت ام مهند اني كلشي مكمل وباقي بانتظار الامنية فقط وماكو اي مشكله عندي بخصوص الدفتر بيوم المقابلة وحاولوا تاخذون الامور بهدوء لان هذا ياثر على وضعكم النفسي بيوم المقابلة ويارب ايسهل امركم \ اخوكم صفاء الصحفي
-
اختي ام مهند
بالنسبة الى موضوع دفتر الخدمة هو مهم او مومهم حسب الحجي الي كلتوه بالمقابلة الاولى نفسة احجوه او همة كلش زين يعرفون الدفتر مال خدمة اكثرهة مفقودة كلمن شال جنطة او فلت او اتخربطت الاوراق والي اتخلص منة فة احسن شي يكتب تاريخة العسكري في ورقة ويخليهة كدامة علمود يتناقش وية المحلف ويكولة انو هو يذكر هلكد تفاصيل واذا اكو رقم عسكري بعد احسن يسهل اهواية امور مثل مصار بيه اني ولا استلمت الدفتر ورة التسريح بس كتبتلة الرقم العسكري او الوحدات والصنف وتاريخ التسريح يعني تقريبي فمشت الامور او هسة اني منتظر طيران او هو ماعندة اي مانع تسالون عاليه او يتحمل مسؤالية كلامة اهنا راح اكثر ينطي مصداقية للموضوع او الشخص الى امامة يقتنع او للعالم همة يعرفون كلشي
وانشاء الله موفقين
-
اشكركم على المشاركة وعلى الاهتمام والله العظيم طمأنتوني
تحياتي
-
اخوان سؤال اني زوجي مخلص كلية في 2003 اي بعد سقوط النظام وكاللهم اني مخادم عسكرية بسس اني كنت طالب زين احنا عدنه دفتر الخدمة انقدمة لو لا في مقابلة المحلف
-
يعني انتو كلتو لو لا بالمقابله الاولى خادم عسكريه ؟؟؟
-
السلام عليكم اختي ام مهند قابلت وكملت ولله الحمد صحيح يسالون على الدفتر الخمدمه بس كتلومه ضل ب العراق كالت ليش ماجبته كتله محديطلب من دفتر خدمه في الدول الاخره اهم شي جواز السفر فقط وخليته في العراق كتله لو اعرف كان جبته والله على مااقول شهيدوكملت المقابله وراه ب 18 يوم فحصت ولاتهتمين بهذا الموضوع بس يحجي الصحيح وخلص
اخوج من عمان
ابو هجران
-
الاخت ام مهند
اولا موضوع دفتر الخدمة يعزز الكلام الي الواحد يحجي
ثانيا اذا واحد ماعندة مابيها مشكلة وماتاثر سلبا على الموضوع
وانتو مو اول ناس ماعدكم
هواية ناس تلفوه ورة الاحداث من ورة الخوف او كالو بعد منحتاجة
واكو هواية ناس من طلعت بس تريد تنجي بروحه ومدااتفكر والله داخذ بيدي دفتر الخدمة
فيااختي انتو مو اول ولا اخر ناس راح تدخلون بدون هذا المستسك
تحباتي
-
اختي ام مهند..السلام عليكم ... انتو مثل ما حجيتوا بمقابلات السابقه لازم نفسها راح يكون ويا المحلف ..
وبلذات الخدمه العسكريه
راح ياكد عليه... وطبعا راح تبقون على نفس احجايتكم لازايد ولاناقص ...
بمقابلتي ويا المحلف سالني عندك دفتر خدمه او لا من شاف دادور بالاوراق كالي اذا ماموجود مو مشكله.. يعني بما انه اقسمت على قول الحقيقه فهو يعتمد على الحلفان وقول الحقيقه .. والكلام بينكم وبين المحلف مبني على الثقه والقسم ..
وانشالله مياثر على مقابلتكم ودعواتي لتسيهل والقبول بعون الله
-
الله يسلمكم والله حتى الاهل والعائلة ما يوكفون وياي مثل وقفتكم هاي والله صحيح انتو عائلة ونعم العائلة وافتخر اني عضوه في عينكاوه ما اعرف شلون اجازيكم يا اخواني واخواتي الاعزاء ما عندي غير الدعاء للجميع بالتوفيق والتسهيل انشاء الله
تحياتي
-
الاخت الفاضلة ام مهند انا بالنسبة الى مقابلت المحلف وهية محلفة بالاساس طلبت دفتر خدمة انطيتهة كتاب تسريح قبل 2001 وسئلت المترجمة العراقية ليش هاي الفترة ما عندي دفتر خدمة جاوبتهة انه ؤ ما لحكت استلم دفتر خدمة اكو غلط بالرقم الاحصائي مالتي وانا مكلف والمكلف بالعراق عبارة عن لا شيء ما يستطيع ايوصل صتة الى اي احد وفقط عليه الانتضار وكان من المحلفة انه ضغطت شوية علية بالخدمة العسكرية في الاماكن الخدمت بيهة والتواريخ وكنت داءما اغلط بالتواريخ مال خدمتي وصلت بية المرحلة اطلب منهة ورقة وقلم ادون تواريخ خدمتي وعدد نين الانتضار مال الدفتر خدمة فجاوبتني ما كو حاجة وبعدين اجنتي النتيجة المحلف موافقين علية وهسة منتضر رحمت الله وبعدين الامنية وانشاء الله ابو مهند ايقابل وتقابلون والله يسهل اموركم
تحياتي
-
ويسهل عليك اخي العزيز ابو علاوي نيتك صافية وتستاهل الف خير شكرا على مرورك الطيب
-
اختي العزيزة ام مهند
راح احجيلج الي صار ويانا لمن سوينا مقابلة محلف كال لزوجي عندك دفتر خدمة كله مجبته ويايا وحاليا موجود يم اهلي بالعراق وكله ليش مجبته وياك لانه هذا يثبت انك خادم عسكرية كله مفكرنا بيوم راح نحتاجه باي مكان وباي دولة ولو تريدوه ضروري ممكن ندز عليه ويجيبوه بسرعة ونقدمه الكم كال المحلف ميحتاج بس ساله كم سؤال على العسكرية وهاي هية والحمد لله جتنا الموافقة بعد اسبوعين من المقابلة واحنا عايشين بمصر
خليها على الله وكلها تصير سهلة انشاء الله وتشوفون الخير وتسافرون بسرعة همين
-
الله يسلمج ننوسه ويفرجهه عليكم يا رب شكرا على مرورج الجميل وبصراحة دا ارتاح من اقره الردود
اختكم ام مهند
-
مرحبا اخواني اخواتي الكرام يارب كلكم بخير وصحة وعافية وربي يفرجها على كل عراقي منتظر اي خبر حلو يفرحة هو وعائلته.
والموضوع جدا حلو وحبيت اشارك. ولو اني ممقدم بلعراق لكن قابلت قبل يومين محلفين وكان معي دفتر خدمه. وانا وقتها كنت جندي مكلف عادي .. وكانت الي اتقابلني محلفة( اعوذ بالله منها) اقسم بلله الكريم دخلت للمقابلة ساعه عشرة الصبح وطلعت ساعه وحده الظهر (وكلتلي لتروح انتظر )وخلتني ساعه ورجعت قابلتني يمكن ساعه ومنخلصت كلتلي لتروح انتظر وهم انتظرت اكثر من ساعه وصاحتني مرة ثانية تسألني ماطول عليكم السالفة من العشرة الصبح للساعه ستة اله ربع العصر هي على هل الحالة تسال تقريبا ساعه او ساعه وشوية وتطلع (للسوبر فايزر مالتها) واجيب اساله جديدة وتسالني. بحيث ابني الصغير عمره اربع سنين اتخربط وصار (يرجع )اجلكم الله . وهي مو يمها الموضوع. وهذا التاخير والالحاح بالاسئلة لو تعرفون ليش؟ وراح اكولها حتى خاف واحد من الاخوه يغلط بهيج كلمة خلي يكون حذر وينتبه.
هي سالتني كلتلي انت جندي مكلف كنت شنوا كان عملكم ؟ كتلها نلزم واجبات على كراج السيارت بالوحده الي كنت بيها او على غرفة الضباط او على مخزن السلاح (المشجب )او على سجنه الوحده الي اني بيها( وهنا الغلط) كلتليمنوا كان بهذا السجن :كتلها اي واحد كان ميحضر الرياضة الصباحيه او محالق لحيته او مملمع الحذاء (اجلكم الله) او يتاخر يوم يومين على اجازته الضابط يحلق شعره صفر ويدخله سجن يأمه يوم او يومن واحتمال كم ساعه ويطلعه..وهاي كانت القشة الي قصمت ظهر البعير..هاي اني هيج كلتها حالها حال باقي الكلام الي كلته ويمكن ساعه 12الهظر كلت هلجملة هاي مال السجن الاكشر وللساعه خمسه ونص هي تسالني على السجن. لا كلكم ولا اتكلولي طلعتني (علي حسن المجيد) اتكلي هاي دخول الجندي للسجن وحلاقة شعره نمرة صفر هاي عمليات تعذيب انت شلون كنت تسكت عليها (ديلا بالله)
بحيث صارت تستفزني واني اعرف بس الحمد لله كنت مسيطر ومشلت عيني من عينها وكل اشوي اتروح للسوبر فايزر وترجع جايبة نفس الاسئله بس بصيغه ثانيه واني اجاوب . واسخف سؤال سالته اتكلي ليش السجن اتخلون عليه حراسات وتلزمون واجبت يمه؟ فاني سالتها : كتلها عفوا بأمريكا انتوا لعد شنخلون على المساجين داخل السجون وحوالين السجن ؟ سكتت ومجاوبت ..فهاي يا اخواني الغلطه الي طلعت مني .. فاحذروا احد يجيب طاري (سجن ) اثناء خدمته العسكرية. واياكم ان اتكولون انوا كنت هارب او كنت انطي فلوس وما اداوم. لان هم كثير يحبون الانسان الملتزم بحياته ومالهم علاقة كانت عسكريتنا ظلم او لا المهم اتخلصها بشرف لان يعتبروها خدمة علم مو خدمة للنظام .
وانا اسف للاطالة حبايبي لان هاي تجربتي انشاء الله متتكرر عند اي اخي عراقي
وربي يوفق الجميع,,
اخــوكــم /يــوســفـي
-
شكرا للمشاركة والله محد مفاهم العراق غير العراقيين هو على اساس اذا كلفوك تحرس السجن تكدر تكول لا ..... ما يعرفون تضيع انت واهلك اذا كلت لا بزمن النظام السابق ... تحياتي الك اخ يوسفي واكرر شكري
-
مشكورة اختي ام مهند وربي يوفقك .. طبعا هم المحلفين يعرفون بوضع العراق اكثر من عدنا صدكيني بس مجرد استفزاز
واني كتلها اذا اكول لا راح اني اصير بمكانه واطلع متئامر وي جندي على معصية اوامر عسكرية..
هي تسكت بس اتريد اشوفني شكول.. المهم انشاء الله ربي يسهلها والنتيجة تطلع قبول لان كلونا يوم 24/6 يتصلون بينا وننتظر ونشوف... وربي يوفق الجميع
اخــوكــم/ يــوســفــي
-
اختي العزيزه ام مهند معظم الي سافروا لايملكون دفتر خدمه فليس له تاثير ..لان راح يعتمد على ما كتب
بالمقابله الاولى حول سير واماكن الخدمه .. ولكن وجودها يعزز من مصداقيه الشخص وجنبه كثير من الاسئله
انشاءالله مقابله سهله باذن الله
اخي يوسفي اطمئن وانشاءالله مقبول وهذا اسلوب استفزازي يتبعوا لمعرفه الحقيقه
تحياتي والتوفيق للجميع
-
ممنونه منك عكعك وين الغطة وبشرني انت وصلت الى امريكا ... واذا اي فبيا ولايه انت حاليا ؟؟ وشكرا لمرورك
-
مشكور اخي العزيز عكعك وربي يطمن قلبك ويريح بالك .. وربي يوفقك ويوفق اخوتي وخواتي العراقييين,,,
اخــوك / يــوســفــي
-
اختي لا تهتمين ولا تديرين بال لان اني نفس وضعكم فقدت دفتر الخدمة عندما تم تهجيرنا من بيتنا ولحد الان ممقابل المحلفين واذا سالني راح اكول هذا الكلام بس المهم اني حافظ اسم الوحدات والتواريخ والاماكن وحتى اسماء آمري الوحدات ولدي الرقم الاحصائي الخاص بي ، وراح اقابل وابد مامهتم المهم الكلام الصدك ، وخلوا اعصابكم باردة عند المقابلة ومن الله التوفيق .
اخوكم عبدون
عمان
-
شكرا لمرورك اخ عبدون والله يسهّل عليك