ankawa

منتدى الهجرة واللجوء => الهجرة و واللاجئين => دردشة منتدى الهجرة واللاجئين => الموضوع حرر بواسطة: ابو نعنوع في 07:21 24/08/2011

العنوان: الهجره الى اليونان
أرسل بواسطة: ابو نعنوع في 07:21 24/08/2011
اخوان اعذروني لان نزلت الموضوع هنانه بس شسوي قسم الدردشه وسدوه الي ما يخافون من الله وين الواحد يروح يعني
اتمنى من الاخوه الاعداء(الاداريين) اسف اقصد الاعضاء(الاداريين) ان ما ينقلوه بالسرعه الممكنه خلي الناس تقراه وتشوف شكو ماكو

شلون واحد يكدر يألف كذبة نيسان بالعراق , صارلي كم يوم محتار , منين اجيب كذبة قوية ,,, منين يا ربي , المشكلة احنا شعب ما متعودين على الكذب , لان حرام , واحنا شعب يصدك المسلسلات التركية والمكسيكية , ويعتقد نهاية الافلام الهندية نهاية طبيعية وتنزل دموعنا عليها , والله خطية اميتاب عمت عيني عليه , للموت وماعاف  حبيبته, شعب نصدك بكل شي , اذا واحد كَال اني سيد نبوس ايده ونحطها على راسنا , واذا واحد كَال اني رجل دين نشيل قندرته ونحطه كدامه , واذا واحد كًال احنا اكثر بلد بالمنطقة استقرارا من الناحية الامنية , نكَله عاشت ايدك , والله متكَول الا الصدك , واذا واحد كَال اني بحياتي ما جنت بعثي , راسا نكَله صحيح , والله انت بحياتك ما لبست زيتوني , واذا واحد كَال رايح  لإيران بس اكمل دراستي وارجع ندعليه  بالنجاح  والتوفيق ونحط صورته على الكوسترات والكيات وبراس الشارع , و حتى قاسم عطا حشاكم  , شيكول احنا نصدك , ومرة رئيس الوزراء كَال اسمي جواد المالكي كَلناله طبعا , شنو قابل منعرفك  ابو كاظم  , وبعدين كَال لا يابه  طلع اسمي نوري المالكي , كَلناله هاي  شنو ابو اسراء اكو واحد ميعرف انت نوري المالكي .

 احنا مصدكَين بالدستور ومصدكَين  بالعلمية السياسية وبالمصالحة الوطنية وبالشراكة الوطنية وحتى كالونا انتو طلعتوا مو شعب ,  انتو مجرد مكونات واطياف واحنة مصدكَين , ومصدكَين راح نصير احسن دولة بالعالم , ومصدكَين ان رفع الزبالة من محلة الشيخ عمر يكلف صابر العيساوي 43 مليار دينار شهريا , ومصدكَين انه واحد اسمه كامل الزيدي هو افضل شخصية لرئاسة مجلس محافظة بغداد , ومصدكين مام جلال يعمل لمصلحة العراق من كسرة وعطش لبوب الشام , ومصدكَين  بصالح المطلك  صار نائب لرئيس الوزراء من اجل مستقبل العراق , ومصدكَين بهادي العامري راح يسوي مطارات العراق افضل من مطارات ماليزيا , لانه خبير مطارات وقطارات وانفاق , ومصدكَين كلشي , اي شي تريد تكَوله والله احنا مصدكَين  , بس لتحلف والله مصدكَيك , مصدكَين شهادتك ونعرف انت دكتور  ومصدكَين لحيتك  والطمغة بكَصتك , ونعرف انت تقي وورع ودمث ابن دمث وتصلي صلاة الفجر بوضوء صلاة المغرب , وانك تتلو القران اناء الليل واطراف النهار وانك زاهد في الدنيا متوجه بقلب سليم الى الاخرة .. احنا مصدكَين  ,, مصدكَين بكل شي , لو ما مصدكين ما انتخبناكم , شنو احنا مجانين ننتخب كذابين , حشاكم من الكذب , لا عيني والله مصدكين , والشعب من يكول  : كذاب نوري المالكي كذاب , اصلا الشعب هو اكبر كذاب , ليش هو منو انتخب نوري المالكي , منو انتخب خالد العطية , منو انتخب حسن السنيد , منو انتخب علي الدباغ , منو انتخب اياد علاوي منو انتخب الملايات البحرينيات , مو الشعب نفسه , الشعب هو ابو المشاكل ,, منو دمرنا غير الشعب , شعب يصدًك كلشي  , حتى  اذا اجاهم واحد ياباني وكَلهم اني موسوي يكَولوله دخيل بختكك , والله عرفناك مولانا , ماشا الله حتى اللاب توب مالك اسود , واذا اجاهم واحد بلجيكي ابن بلجيكي وكاعد يم ارمي سترونك وهو الي ساعدهه بالبلان بي  وكلهم اني من اهل العمارة ,رأسا يصدكَون , اي نعرفك , بيتكم بالمجر يم الفرن, انت مو رجل زهرة بت عليوي  وخالتك بدرية  , تفضل استريح  ابو مطشر .

القاهرني هو العراقيين يصدكَون كل الناس , بس ابو نعنوع  , شيحجي  يكَولون جذاب , اكلهم فلوسكم راحت , يكتبولي اسكت جذاب , يابه تره يضحكون عليكم , انجب جذاب , اخوان  ابراهيم الجعفري نصاب , واحد كتبلي : صه يا رقيع , شسوي صهيت وامري لله , اختي ام اركان ترى رجلج  متزوج عليج , تضحك ام اركان وتكول ابو اركان ميبدلني بجوليا روبرتس , وهو بشرفي متزوج  رضية ام الحسابات  , يمعود قاسم  قشمروك الجواز يطلع  بورقتين , ليش دفعت ست اوراق , ابو نعنوع انت تغار لان جوازك ما طلع , يابه  بيت ابو حمزة , ابو منتظر نسيبكم مو سيًد , رجال كناني اني اعرف اهله واخو عدنا بالشركة , اسكت عمي متشوف نور محمد بوجهة , خالة ام جمعة ابنج بالمجاميع الخاصة ويحط لاصقات بسيارات الناس , تروح لا افلش راسك بالهاون , ابني اربع وعشرين ساعة كاعد على الفيس بوك ميطلع لباب الحوش , وهكذا يستمر ابناء الشعب العراقي في تكذيبي , كلهم يكذبوني , بس صديقي عبد الرضا المسكين  , شحجي  يصدكَني ,وقبل  كم  يوم  خطية سألني : شو ماكو ابو نعنوع الورد محد يسمع حسك , ظل بالي عليك ؟ ,, كتله يا اخي ابتليت بلوة  , هاي مريام فارس المطربة , بعد حفلة نادي الصيد اجتني للبيت ومتقبل تطلع واني خايف اهلها يحسًون وتصير مشكله , صفن عبد الرضا ودار راسه شوية وبعدين جاوبني بسرعة  : ليش متفلت بيها لسليمانية  وهناك تتزوجها على سنة الله ورسوله ... شتكَولون اسويها واضرب ام نعنوع بوري لو متسوى


العنوان: رد: الهجره الى اليونان
أرسل بواسطة: عراقي هواي في 08:22 24/08/2011
عمي والله مصدكك واوقع بالعشرة
العنوان: رد: الهجره الى اليونان
أرسل بواسطة: IRAQ.CA في 08:34 24/08/2011
 ;Dعاشت ايدك ابو نعيوع
العنوان: رد: الهجره الى اليونان
أرسل بواسطة: ابو نعنوع في 08:45 24/08/2011
عراقي هواي مشكور على مرورك ومشكور لان انت تصدكني حتى بسالفة مريام بت فارس وبارك الله بيك
الاخ IRAQ CA مشكور على المرور الكريم وايدك العايشه خويي
العنوان: رد: الهجره الى اليونان
أرسل بواسطة: عراقي هواي في 09:54 24/08/2011
والله يابو نعنوع شر البليه مايضحك

لكن ما كو غير ربك يغير الاحوال
وقبل الاحوال الانفس

والله على كل شي قدير

قبل ساعة كنا نتحدث انا وزميلي بالعمل وجنا واقكفين نستنسخ يم جهاز استنساخ بالشغل اسمه كانون عبارة معمل زغير وفد شي بداعة

صاحبي كال لعد شبينه احنه العرب منكدر نسوي مثل هذا الجهاز كتله احنه بس حجي
كال التاريخ وحجه السيف والفتوحات وكل نتيجه ماكو
هاي كبل وهسة كالت الطائفيه وحجت القوميه نحن قوم نبحب التفاخر بلاشخاص بلا معنى وهمة ولا واحد بيهم مخترع السيفونه
وما اعرف علاج هذا السرطان شنو اذكر كلمه لاحد الخيرين رحمه الله

قال نحن نصنع الطغاة
العنوان: رد: الهجره الى اليونان
أرسل بواسطة: ميمي2010 في 10:00 24/08/2011
عيني ابو نعنوع  مصدكيك وكلامك كله ذهب والله


 بس هاي مال مريام فارس شوية واكفة يعني مو حرام عليك تقهر ام نعنوع بوحده مثل مريام فارس والله حرام ثم حرام
العنوان: رد: الهجره الى اليونان
أرسل بواسطة: Abdullah2006 في 10:08 24/08/2011
ويها وروح انت ومريام فارس وهية تصفه انت ولا غيرك على الاقل نعرفك ههههههههههههههه
العنوان: رد: الهجره الى اليونان
أرسل بواسطة: ابو نعنوع في 10:25 24/08/2011
والله يابو نعنوع شر البليه مايضحك

لكن ما كو غير ربك يغير الاحوال
وقبل الاحوال الانفس

والله على كل شي قدير

قبل ساعة كنا نتحدث انا وزميلي بالعمل وجنا واقكفين نستنسخ يم جهاز استنساخ بالشغل اسمه كانون عبارة معمل زغير وفد شي بداعة

صاحبي كال لعد شبينه احنه العرب منكدر نسوي مثل هذا الجهاز كتله احنه بس حجي
كال التاريخ وحجه السيف والفتوحات وكل نتيجه ماكو
هاي كبل وهسة كالت الطائفيه وحجت القوميه نحن قوم نبحب التفاخر بلاشخاص بلا معنى وهمة ولا واحد بيهم مخترع السيفونه
وما اعرف علاج هذا السرطان شنو اذكر كلمه لاحد الخيرين رحمه الله

قال نحن نصنع الطغاة





هلو خويي ابو مصطفى اسعدني مرورك وهذا الشيء خلاني
اقف باجلال واحترام وانزع لك القبعه لردك وكلامك الجميل
خويي كل الي كلته صحيح احنه عدنه صفة التفاخر والهمبله واصله ويانه الى ابعد الحدود وبعدين كملت عليها سالفت الطائفيه الكشره
واني وياك بعبارة نحن نصنع الطغاة واحب ان اضيف نحن نصنع الطغاة في كل مكان في الرئاسه في العمل في البيت في المنتدى
العنوان: رد: الهجره الى اليونان
أرسل بواسطة: ابو نعنوع في 10:34 24/08/2011
عيني ابو نعنوع  مصدكيك وكلامك كله ذهب والله


 بس هاي مال مريام فارس شوية واكفة يعني مو حرام عليك تقهر ام نعنوع بوحده مثل مريام فارس والله حرام ثم حرام






اخت ميمي شكراً لردك الرائع
اي ليش ما تصدكين مال مريام فارس هو اني شويه اصلاً اني اخبل وهيه بالحفله ما نزلت عينها عني وكل اصدقائي نبهوني وخصوصاً عبد الرضا صديقي الصدوق ...... وليش انت تحسبين ام نعنوع مثل مريام عمي ام نعنوع لاصوت ولاصوره صايره مثل التلفزيون القديم العاطل ..ثم تعالي عيني الشرع مو حللنه اربعه ..خوما كال خلي تبقى بس ام نعنوع يمعوده خلي نشوف فرج الله ..مو فرج الله ابو الانتخابات لا فرج الله يعني رحمة الله وكرمه .... بالمناسبه اني منفصل من ام نعنوع منذ اكثر من سنه ونصف
العنوان: رد: الهجره الى اليونان
أرسل بواسطة: ابو نعنوع في 10:39 24/08/2011
ويها وروح انت ومريام فارس وهية تصفه انت ولا غيرك على الاقل نعرفك ههههههههههههههه



اخي العزيز عبد الله شكراً لمرورك
وشكراً لكرمك يا كريم مو بالله اروح ويه بت فارس مو احسن اليه وعلى الاقل ان انتوا تعرفوني ويجوز اقنعه واخليه تسوي اغنيه على المهاجرين العراقيين وسبب تاخير اصدار الفيزه الهم ... شوف شلون يعني زواجي راح يكون اله اهداف منطقيه واسباب مقنعه
العنوان: رد: الهجره الى اليونان
أرسل بواسطة: شنايزر في 13:30 24/08/2011
كم انت رائع يا ابو نعنوع

عاشت ايدك وتسلم هالانامل اللي تخط هيجي كلمات

والله انت  تفتح جروحنا بمواضيعك كلها صحيحه ومحد يكدر يكولك لا او انت غلطان او واهم ما دري شكولك

كل كلمه تكتبها احس انها طالعة من صميم وجدانك

فعلا انت غيور  على وطنك بس وين اللي يسمع !!!

ملاحظه : دير بالك على ام نعنوع عاشت وياك عالحلوه والمره وتحياتي الى نعنوع
العنوان: رد: الهجره الى اليونان
أرسل بواسطة: need justice 1 في 13:44 24/08/2011
رائع - راقي - عاشت ايدك - بارك الله بيك
اعتقد كل الكلمات اعلاه قلية بحقك وما توفيك حقك بالابداع والرقي بالطرح والشفافية والجراة
بس تعذرني بشي واحد اذا كلته واحتمال ما اصدكك
من تكول لي انه ادارة عنكاوا كامت تقدر الناس التتعب وتطرح مواضيع مقيدة وقيمة مثل مواضيعك ومواضيع اخوي ابو قمر
من تكول لي هيج اجاوبك تعذرني ما اصدك
مع الاسف كاتب راقي ورائع بكل طروحاته يترجى ناس احتمال ما تعرف تقرا وتكتب انهم ما ينقلون او يحذفون موضوعه
وربك سيدى الفاضل اتالم من شوفك تكتب مثل هيج عبارة باعلى موضوعك لان موضوعك اعلى من ان يدركوه
روووووووووووووووووووووووووح الله يحفظك ويكفيك شر عين المراقب ;D
اقف لحضرتك احتراما وانا رافع لقبعتي والوح بها للاعلى ابتهاجا مني بقراءتي لمولضيعك
العنوان: رد: الهجره الى اليونان
أرسل بواسطة: ابو نعنوع في 15:25 24/08/2011
رائع - راقي - عاشت ايدك - بارك الله بيك
اعتقد كل الكلمات اعلاه قلية بحقك وما توفيك حقك بالابداع والرقي بالطرح والشفافية والجراة
بس تعذرني بشي واحد اذا كلته واحتمال ما اصدكك
من تكول لي انه ادارة عنكاوا كامت تقدر الناس التتعب وتطرح مواضيع مقيدة وقيمة مثل مواضيعك ومواضيع اخوي ابو قمر
من تكول لي هيج اجاوبك تعذرني ما اصدك
مع الاسف كاتب راقي ورائع بكل طروحاته يترجى ناس احتمال ما تعرف تقرا وتكتب انهم ما ينقلون او يحذفون موضوعه
وربك سيدى الفاضل اتالم من شوفك تكتب مثل هيج عبارة باعلى موضوعك لان موضوعك اعلى من ان يدركوه
روووووووووووووووووووووووووح الله يحفظك ويكفيك شر عين المراقب ;D
اقف لحضرتك احتراما وانا رافع لقبعتي والوح بها للاعلى ابتهاجا مني بقراءتي لمولضيعك





عمي ابو خالد انت الراقي وانت الرائع ..( اخجلتم تواضعنا ) خويي
اني اشكرك على كلماتك الصادقه النابعه من قلبك
كلماتك الرائعه هذه راح تخليني اقدم المزيد وابدع في الكتابه حقيقتاً ردودكم الجميله هذه هي رصيدي الكبير في هذا المنتدى
ورحم الله والديك على هذا الدعاء الجميل وبصراحه هو هذا الي اني محتاجه وخصوصاً هذه الايام
مشكور خويي لمرورك والله يحفظك من كل مكروه ويسهل امرك
العنوان: رد: الهجره الى اليونان
أرسل بواسطة: need justice 1 في 15:34 24/08/2011
والله عمي مواضيعك تجذبني وتشدني من اول حرف اقراه بموضوعك اصير مجبر اكمل قراءة الموضوع الى اخر حرف وبكل حرف احس بمتعة غريبة عجيبة
احس بكلماتك التكتبها تدخل للقلب والوجدان مباشرة
ولا تعتقد باي كلمة اكتبها لك بردي هذا انه مجاملة او فد شي لا سامح الله ولكنها فعلا مشاعري واحاسيسي الاحس بيها وانا اعيش موضوعك.
عمي هسه فرصة للمشرف ينقل الموضوع ويخليه بمقبرة المنتدى ( الدردشة )  ;D
العنوان: رد: الهجره الى اليونان
أرسل بواسطة: ابو نعنوع في 15:39 24/08/2011
كم انت رائع يا ابو نعنوع

عاشت ايدك وتسلم هالانامل اللي تخط هيجي كلمات

والله انت  تفتح جروحنا بمواضيعك كلها صحيحه ومحد يكدر يكولك لا او انت غلطان او واهم ما دري شكولك

كل كلمه تكتبها احس انها طالعة من صميم وجدانك

فعلا انت غيور  على وطنك بس وين اللي يسمع !!!

ملاحظه : دير بالك على ام نعنوع عاشت وياك عالحلوه والمره وتحياتي الى نعنوع



انت السالم خويي وايدك العايشه
خويي بالفعل الكلمات الي اكتبهه هي نابعه من صميم قلبي سواء كانت في مشاركاتي هنا او في كتبي او في منتديات اخرى
بس احاول ان انقل الصوره باسلوب هزلي هادف واحاول ان الجئالى  ما يسمى ب (النقد البناء)
خويي اكو هوايه غيورين على بلدهم وكلبهم يتكطع للي جاي يصير بيه بس ماكو واحد يسمع من اصحاب القرار وكانما الله سبحانه وتعالى ختم على قلوبهم وابصارهم وجعل غشاوه على اذانهم حتى لا يفقهوا القول ولا يتدبروه
اما بخصوص ام نعنوع فكان شر لابد منه وكان افضل القرارات السيئه لان وصلنه الى طريق مسدود واقسم الك هذا كله بسب تاخير اصدار الفيزه لو كانت الفيزه صادره قبل مده من الزمن لكنت الان في امريكا اسعد زوج بالعالم بس شنكول النصيب
مشكور  خويي على مرورك واحسنت باختيار الكلمات يارائع ولو اني هسه راح اصير مغرور من وره كلامكم الحلو ههههه