ankawa

منتدى الهجرة واللجوء => الهجرة و واللاجئين => الموضوع حرر بواسطة: eng.mathio في 06:43 12/05/2012

العنوان: تفاصيل شهر في منيسوتا
أرسل بواسطة: eng.mathio في 06:43 12/05/2012

السلام عليكم
طبعا مثل ما واعدتكم ومثل ما تتذكرون انتوا اني كتلكم راح اسولفلكم على كل شي صار وياي من طبيت امريكا لحد الان ورة ما حجيتلكم على تفاصيل الرحلة الي كانت بشهر الرابع الماضي يعني راح اكمل شهر هنا بامريكا ..

وهذا رابط الموضوع مال رحلة سفري http://www.ankawa.com/forum/index.php/topic,572411.msg5564917.html#msg5564917
 وهسه نسولف وراها

اول ما وصلت من مطار شيكاغو لمطار منيسوتا الساعة 10 بالليل نزلت بالمطار وما اعرف شسوي لان صفيت وحدي لان الظاهر بس اني جنت عل منيسوتا .. المهم ظليت حاير لان استلمت الحقيبة مالتي ومال لكيت لا المنظمة ولا كفيلي خفت اني متيهه بس كلت لروحي هو اني بالمطار قابل وين الكاهم بمطعم صمد .... المهم كلت خل اكعد بالمطار حتى لو للصبح والله كعدت خلصت ربع ساعة ولكيت واحد فوك راسي  اسيوي واكف سلم .. كلي انت فلان كتله نعم كلي اني من المنظمة كتله يا راكل اول غير كدة ورة ما حلفلي ( طبعا شقة مو صدك ) كلي لعد كفيلك وين كتله شفتك وما شفتة والله واحنا دنسولف اجاني الكفيل جان يدور مكان يطبك سيارته وما اطول عليكم انطاني ابو المنظمة كارد مال طعام كلي هذني من مكان اسمة كب فووود وكلي نلتقي بعد يومين وراح ...
وراها كفيلي اخذني كلي يلة كتلة وين كال لشقتي كتلة زين والشقة ما مأجريلي شقة كال ما كلولي شي عن شقة الك كلي اني كتلهم اني استقبلة ... والله رحت وياه لشقتة ولكيتة طابخ دجاج وكلت يبو هنا ولحكني دجاج الكفيل ... المهم اكلت وارتاحيت وسولفنا ونمت هذا الي صار بليلة وصولي ..
وثاني كعدت الساعة 8 الصبح عل احلى جووو يخبل جو بارد ومغيم ... كفيلي كلي امشي وياي لاهم شغلة لازم نسويها كتله شنو هي كال نفتحلك حساب بالبنك... طبعا اخذني لبنك اكيد تعرفوه ( wells fargo ) وسوالي حساب ولاول مرة بحياتي يصير عندي حساب وديبت كارد طبعا الشغلة حلوة وتحس بنفسك طكيت لان ما شايفين معاملة الموظفين والناس شنو هنا ... عل كل حال كملت شغلة المصرف اخذني الولد هم بجولة بالمدينة وشوفني منيابلس وفريدلي وانوكا وهاي كولومبيا ومايبلوود وروشتر وهاي الاماكن كلها بمنيسوتا وشوفني المسسبي طبعا كلهن قريبات ...

ثاني يوم اتصلوا بينا المنظمة كلولة لكفيلي جيبة وتعال بس المشكلة جان كفيلي مشغول بالشغل ووظل يماطل وياهم لمدة 3 ايام طبعا اخيرا وداني الهم والتقوا بينة الكيس ووكر ووياة بنية ثانية كلش حبابين وانطوني الويلكم عبارة عن شيك صار عندي مجموع الفلوس الي استلمتها منهم 1155 بين الكاش وبين الكارد ..هاي بس الويلكم وانطوني بطانية ومخدة جدد وشراشف ووياهن قمصلة وجفوف ولفاف وكليتة كالوا الجو بالشتا بارد وراح تحتاجهن .. وفعلا كانوا رائعين
اكيد راح تسألون عن شغلة الشقة سألتهم كلولي راح ننطيك الكاش 250 دولار  للايجار بس هاي الشغلة الوحيدة مو زينة من جانبهم .. لان كانت حجتهم انت اعزب وكفيلك كال استقبله واحنا عدنا هواي عوائل نريد نأجر الهم السكن والله تالي كملنا من المنظمة ورجعنا للبيت .
وراها كام يجيني الكيس ووكر ياخذني سوالي السوشيل سكيورتي نمبر وكملي الفود ستامب والحمد لله استلمته ورة اسبوعين ضبط وهذا الي صار وية المنظمة كلة اما الي صار وياي فمن وصلت لحد الان يمكن كل الطلعات الي طلعتهن ما يجاوزن 10 طلعت صار شهر لان كفيلي مشغوول بشغلة واني ما عندي لا اجازة سوق علمود اشتري سيارة واطلع بيها ومنتظر اريد امتحن على الاجازة والمشكلة الاكبر انو مدينتي لا بيها مترو ولا بيها شي بس باصات تمر كل نص ساعة وبصراحة بعدني عندي رهبة من صعود الباص لان تدرون شوية الواحد بصعوبة يطبع بس ستوني بدت عندي ارهاصات الطلعة وحدي لان رحت قبل شوية للكاز ستيشن اشتريت جكاير واجيت .... واكلول بلكت وية الايام شوية تصير عندي قابلية اطلع وحدي ولو اني هم طلعت تمشيت للبارك الي يمي بس مليت منه لان ماكو ناس تمشي بالشارع بس سيارات واني افتر وحدي بالشارع مثل ابو  العتيك .. يلة ادعولي بلكت الله يفتحها عليه واكوم اصادق عالم
اعذروني طولت عليكم
اخوكم من منيسوتا
ماثيو
ها نسيت اكلكم كفيلي اخذني سوالي اشتراك بالجيم الي قريب علينا وكمنا نروح اني وياه بالليل يومية بس هم بقت مشكلتي الاختلاط

العنوان: رد: تفاصيل شهر في منيسوتا
أرسل بواسطة: angel_2012 في 06:53 12/05/2012

حمدالله على السلامة انشاءلله تشوف كل الخير بولايتك ربي يوفقك ماثيو

العنوان: رد: تفاصيل شهر في منيسوتا
أرسل بواسطة: eng.mathio في 07:01 12/05/2012

تسلمين وربي يوفقج انجيل على هذا الدعاء الجميل

العنوان: رد: تفاصيل شهر في منيسوتا
أرسل بواسطة: انيس الجالسين في 07:04 12/05/2012

حمدا لله على سلامتك .. ونتمنى لك التوفيق دائماً
لطفاً .. لو وضعت رابط موضوعك الاول الذي نوهت اليه في بداية كلامك
 لكي يتسنى لمن يدخل أن يعرف تفاصيل الرحلة من البداية

العنوان: رد: تفاصيل شهر في منيسوتا
أرسل بواسطة: ام الهنا في 07:13 12/05/2012

الحمد لله على سلامة الوصول ،،، اخي الرهبة بالبداية فقط وعود نفسك على الخروج وحدك ولتعتمد هوايه على الكفيل لان هناك مشاغل الحياة كثيرة ، واهم شي هالفترة ركز على موضوع العمل حتى يساعدك بالايجار وباقي المتطلبات .

ومن تسيطر عالوضع اكتب عن ولاية منيسوتا كل شي .... ونتمنالك التوفيق بحياتك .

ام الهنا

العنوان: رد: تفاصيل شهر في منيسوتا
أرسل بواسطة: eng.mathio في 07:32 12/05/2012

اخي انيس الجالسين صار وتدلل خليت الرابط واتشرفت بمرورك العطر تسلملي يارب
اختي ام الهنا ان شاء الله تنحل وية الوقت هاي المسألة وربي يخليج على النصيحة وان شاء الله يوم سفرج

العنوان: رد: تفاصيل شهر في منيسوتا
أرسل بواسطة: انيس الجالسين في 07:46 12/05/2012

مقتبس من: eng.mathio في 07:32 12/05/2012

اخي انيس الجالسين صار وتدلل خليت الرابط واتشرفت بمرورك العطر تسلملي يارب
اختي ام الهنا ان شاء الله تنحل وية الوقت هاي المسألة وربي يخليج على النصيحة وان شاء الله يوم سفرج

وردة .. هكذا يكون الموضوع متسلسل ونافع
بالتوفيق دائماً

العنوان: رد: تفاصيل شهر في منيسوتا
أرسل بواسطة: foxsingluser في 07:56 12/05/2012

حمدالله على السلامة اخوية العزيز

بس هاي مو خوش شغلة مال انتة اعزب   منأجرك لان  العوائل هواية زين بيهچ حالة حيصر وجهك بوجه الكفيل

العنوان: رد: تفاصيل شهر في منيسوتا
أرسل بواسطة: ام الهنا في 08:14 12/05/2012

مقتبس من: foxsingluser في 07:56 12/05/2012

حمدالله على السلامة اخوية العزيز

بس هاي مو خوش شغلة مال انتة اعزب   منأجرك لان  العوائل هواية زين بيهچ حالة حيصر وجهك بوجه الكفيل

بعد اذن الاخ ماثيو ،، الاعزب بنت او ولد اذا ماعنده كفيل المنظمة تشوفله شريك بالسكن وبعدين هوه يدور وحده والمنظمة ايضاً تساعده بالبحث ويبلغ المنظمة في حال حصل البيت ، طبعاً هذا كله بسبب الكفيل المعنوي اللي يستقبل اللاجئ فقط ، ومع ذلك يستطيع الكفيل المعنوي ان يؤجر للاجئ بفترة قرب وصوله لكن مشاغل الحياة تجعل الكفيل الاكتفاء باستقبال اللاجئ فقط . وهاي الامور يوقع عليهه الكفيل اللي يكدر يسوي او لا .
صديقتي ايضاً كان كفيلها معنوي لكن بلغ المنظمة انو هوه يشوفلهه بيت ، ومن وصلت اريزونا لكت الكفيل مأجرلهه بيت وحدهه . الافضل اذا عندك كفيل روحه طويله خلي يشوفلك بيت وحدك والا هذا واقع الكثير من اللاجئين .

وبالتوفيق للجميع ..

ام الهنا

العنوان: رد: تفاصيل شهر في منيسوتا
أرسل بواسطة: a7med_al3ra8e في 08:28 12/05/2012

السلام عليكم . الله يسهل امرك اخي العزيز وتستقر . بس احسن شي شغلة الجم ههههه اخويه بلا زحمه مثل القاعات مال العراق هههههه . اتمنالك الموفقيه بحياتك . تحياتي .

العنوان: رد: تفاصيل شهر في منيسوتا
أرسل بواسطة: the lion في 08:59 12/05/2012

الحمد لله على السلامة مع تمنياتنا لك بالموفقية

العنوان: رد: تفاصيل شهر في منيسوتا
أرسل بواسطة: يمتة الفرج في 09:35 12/05/2012

الحمد لله على السلامة اخوية وبالموفقية ان شاء الله

العنوان: رد: تفاصيل شهر في منيسوتا
أرسل بواسطة: امين عبد الله في 11:14 12/05/2012

الحمد لله على سلامتك وان شاء الله تشوف كل الخير وتتوفق بحياتك وما نسمع من اخبارك الا النجاحات اللي تحققها

العنوان: رد: تفاصيل شهر في منيسوتا
أرسل بواسطة: ** AL SHAEEA ** في 11:24 12/05/2012

الحمد لله على سلامة الوصول وبالتوفيق

العنوان: رد: تفاصيل شهر في منيسوتا
أرسل بواسطة: xxlm569 في 12:12 12/05/2012

حمدلله على السلامه

العنوان: رد: تفاصيل شهر في منيسوتا
أرسل بواسطة: alpha في 12:14 12/05/2012

الف حمد الله على السلامة وبالتوفيق انشالله وانشالله نتلاكه بمينيسوتا لان اني مقدم عليهه والله كريم يجوز نصير صحبان ونتمشى اني وياك مثل اهل العتيك ليش تضل وحدك ;D ;D
تحياتي عزيزي وبالتوفيق

العنوان: رد: تفاصيل شهر في منيسوتا
أرسل بواسطة: gustavo في 12:20 12/05/2012

ههههههههههههههههه.
احلى فقرة مال دجاج الكفيل الي لحكك لهناك.. :D
والله متت من الضحك...

هاي شنو حتى بامريكا هم امحدق بالبارك... :P
ههههههههههههههه.

اخويه العزيز مثل ما كلت انته هيه مساله وقت .
لان وجوه جديدة ولغه جديدة وقوانين جديدة ,,,
اخويه اخويه اريدك اطك كم صورة للقاعه تره روحي ملهوفه لقاعاتهم ... ;D
اتريد نصيحتي خاطر تختلط ..." ابتسم وشاركهم باهتماماتهم...".
تحياتي ياورد.

العنوان: رد: تفاصيل شهر في منيسوتا
أرسل بواسطة: assaad2011 في 12:27 12/05/2012

الف مبروك السفر والوصول والحمد لله على السلامة اتمنالك طيب الاقامة والنجاح والتوفيق
اخي العزيز حاول ان تختلط وتجتمع بمحيطك او اي مكان تذهب اليه لان كفيلك مشعوووووووووول
وهدية مني اليك  احلى دجاجة مجمدة نوع الكفيل هههههههههههههههه عوافي

العنوان: رد: تفاصيل شهر في منيسوتا
أرسل بواسطة: سوسو اسو في 12:32 12/05/2012

هههههههههههههههههه الحمد لله على السلامه
ولتشيل هم اكيــــــــــــــد تتأقلم ماطول انت تريد
كل شئ يرادله وكت
وثانيا شبيه الدجاج اليووووم اني مسويه دجاج ههههههههههههههههههه
تحياتي الك

العنوان: رد: تفاصيل شهر في منيسوتا
أرسل بواسطة: Abnaa Al-Iraq في 23:21 12/05/2012

الحمد لله على سلامة الوصول وحاول تندمج بالمجتمع وتحسن لغتك حتى تحصل على عمل لان انت تعرف المساعدات محددة بوقت وايضاً متفيد والواحد ميكدر يعتمد عليها وان شاء الله تتوفق بحياتك الجديدة

العنوان: رد: تفاصيل شهر في منيسوتا
أرسل بواسطة: yasir fakhri في 12:18 13/05/2012

الحمد لله على سلامتك وان شاء الله تشوف كل الخير وتتوفق بحياتك وتحية لكفيلك ووقفته الحلوة وياك

العنوان: رد: تفاصيل شهر في منيسوتا
أرسل بواسطة: اسمر زيونة في 13:16 13/05/2012

  حمدالله على السلامة وهينة شوية شوية  اتصير عرابنا بمينيسوتا ويه اخونا حمادة 2 ..وباانتظار كتاباتك وخصوصاً عن الجيم..

العنوان: رد: تفاصيل شهر في منيسوتا
أرسل بواسطة: storm2000 في 13:43 13/05/2012

الف مبروك بالموفقية

العنوان: رد: تفاصيل شهر في منيسوتا
أرسل بواسطة: ألن في بلاد العجائب في 13:47 13/05/2012

لازم تطلع اخويه و تتعلم السستم يمعود اني اول مره رحت لامريكا افتريت 5 ولايات حتى اشوفهم

العنوان: رد: تفاصيل شهر في منيسوتا
أرسل بواسطة: الريم 2000 في 08:21 14/05/2012

اللة يساعدك لان البداية شوية صعبة حقك بس المهم انت مرتاح وانشاللة تتوفق بحياتك الجديدة وحمدلله على سلامتك

العنوان: رد: تفاصيل شهر في منيسوتا
أرسل بواسطة: shabah في 14:07 14/05/2012

الحمد لله على سلامتك ويارب تتوفق بحياتك الجديدة

عندي بعض الاسئلة عن منيسوتا:
1-شلون الجو هسة عدكم؟
2-شنو اسم المنظمة مالتك وشنو برامج المساعدات مالتها؟وشكد المدة مالتها؟
3-شلونهة المدينة مريحة لان اني عندي اولاد بالثانوية وخايف عليهم اقصد من يروحون للمدرسة ويرجعون من ناحية الامان او لمن يريدون يفترون بالمدينة شلون الامان مالتها وانت تعرف همة بس يريدون يفرفرون وانكليزيتهم يعني زوينة ويقدرون يتفاهمون وية الاخرين؟
4-شلون المحلات عدكم وشلون الاسعار سمعت انو منيبلس شوية غالية؟رحت لمول اوف امريكا ;D؟
5- شلون الشغل عدكم متوفر لو لا؟ اذا ممكن نعرف شنو الاعمال الي يشتغل بيهة العراقيين الي تعرفهم؟ وما هو الحد الادنى للراتب؟
6-البيوت شلونها منيسوتا اسعارها بشكل عام ام الغرفتين او التلاثة ؟
اسف اخوية طولتها عليك

العنوان: رد: تفاصيل شهر في منيسوتا
أرسل بواسطة: ابو فرقان في 21:53 14/05/2012

الحمد لله عالسلامة وربي يوفقك ان شاء الله

العنوان: رد: تفاصيل شهر في منيسوتا
أرسل بواسطة: shabah في 01:00 15/05/2012

up

العنوان: رد: تفاصيل شهر في منيسوتا
أرسل بواسطة: eng.mathio في 01:31 15/05/2012

اخواني واخواتي اشكركم جميعا على هذه المشاركات المشجعة وان شاء الله اعمل بنصيحتكم ويارب تسافرون كلكم وتخلصون من اللغوة والانتظار المتعب ..

بالنسبة لاسئلة الاخ صباح فالاجوبة كالاتي :

1- والله خوية هسه الجو كلش حلو  يعني صدك ربيع لا حار ولا بارد درجة الحرارة 20 م بس يكولون بالشتا كارثة البردز
2- اسم المنظمة مالتي هو catholic charities وبرنامجها بالمساعدات مثل باقي المنظمات تنطوك فود ستامب بقيمة 200 وكاش بقيمة 250 للايجار .. اما المدة 8 اشهر
3-والله اني كتلك المدينة ارتاحيتلها من ناحية ناسها ووضعها وشفت طلاب مدارس يرحون ويجون بالباصات فعادي مدينة هادئة وما بيها مشاكل كالوا على اساس اكو مناطق بيها مشاكل بس محد يروحلها لان بعيدة عني .
4 - والله خوية اذا تقصد على الطعام فاكو مكانات رخيصة ومناسبة وتكدر تسوي بيها كوبونز مثل سامز كلب وكب فود واكو مكانات غالية وبالنسبة للملابس فهي عموما شوية اغلى من العراق يعني الحاجة حلوة عدهم بس شوية اغلى ...
5-واله حسب ما كلي الكفيل مالتي منيسوتا بيها شغل احسن من شيكاغو واحسن من كاليفورنيا وكلي الي يريد يدور شغل يحصل وبالنسبة للعراقين اكو عراقيين يشتغلون بكازستيشن واكو بمطاعم واكو يشتغلون كاشير بمولات ضخمة واكو حتى ناس تشتغل وتدرس وبالنسبة للحد الادنى للراتب هو 7 دولارات وربع بالساعة وهذا قانون ميصير تشتغل باقل
6- بالنسبة لاسعار البيوت هنا تطلع بحدود 100 الى 180 الف دولار حسب المكان والمساحة وهذا الكلام سمعتة من كفيلي يعني مو كدامي شفت ..

وتامرني امر
اخوكم ماثيو

العنوان: رد: تفاصيل شهر في منيسوتا
أرسل بواسطة: shabah في 15:18 15/05/2012

تســـــــــــــــــــــــــــــــــلم يا باش مهندس ماثيو

جوابك كان وافي. مشكور و يا رب يوفق الله في حياتك الجديدة

العنوان: رد: تفاصيل شهر في منيسوتا
أرسل بواسطة: كوكي 2004 في 15:43 15/05/2012

ألف ألف مبروك أخويه العزيز ماثيو والحمد لله على سلامة الوصول

والله يجعلها ولاية الخير والرزق والأستقرار عليك ان شاء الله

تحياتي وبالتوفيق يارب

العنوان: رد: تفاصيل شهر في منيسوتا
أرسل بواسطة: تقوى الله في 18:08 15/05/2012

الحمد لله على سلامة الوصول اخويه العزيز
وان شاء الله حياة موفقه
ودير بالك على نفسك من دجاج الكفيل  ;Dا