ankawa
منتدى الهجرة واللجوء => الهجرة و واللاجئين => الموضوع حرر بواسطة: sniper1980 في 11:22 27/06/2012
-
أخوان السلام عليكم ورحمة الله وبركاته....
أكو موضوع جاي ياكل ويشرب وياي الا وهو موضوع تعييني.... انا متعين معيد بجامعة وطلع توطيني وخذيت اجازة سنتين بدون راتب واتوكلت ورحت لامريكا وبعد السنتين رجعت حتى اشوف مسألة وضيفتي فالمسؤولة على الاجازات كلتلي انت استنفذت رصيدك تماما مال الاجازات ولازم لو ترتبلك اجازة مال لجنة طبية 6 اشهر قابلة للتجديد او تستقيل وما مضمونة رجعتك بعد كم سنة....المسألة فكرت بيهة بعقلي وبقلبي فالعقل يكول ابقى والقلب يكول ضل بالخارج وخلي جهالك يتونسون ويتعلمون وياخذون فرصتهم بالحياة... مشاركاتكم مع التقدير
اخوكم ابو روان
-
اني راح اترك تعييني وبراتب فوق الجيد حتى اسافر لان مستقبل عائلتي احسن ومضمون بامريكا
-
لا ارجع للعراق واذا على ونسة الجهال وديهم كل جمعه لمدينه الالعاب واشتريلهم شاميه وشعر بنات
-
ابقى بل عراق يمعود اكو واحد محصل تعين وميضل وان شاء الله الوضع يتحسن
-
التعيين بالعراق فرصه لا تتكرر
و خصوصا معيد بالكلية .. وخصوصا اذا ماكنت مهجر و لا مهدد
ماشاء الله صار يومين المنتدى كله متعين وميريد يسافر ??? ??? ??? ???
-
UP
-
اذا انتم كاتلين روحكم على التعيين شكو توازونة خلونة نشوف دربنة لو هي لو ماكو سفر وشغل ماكو لو مسافر ومتعيين عجيب وغريب هلحياة
-
مشكورين الاخوان على مشاركاتهم القيمة ومشاطرتهم لي الراي وبالنسبة للاخ هذا عراقي انا متعين صارلي 8 سنين مو هسة جاي ادور تعيين ولا جاي انافسك بالطلعة وانا حبيت اتشارك مو اتعارك وياك الرأي... تحياتي وبالتوفيق للجميع يا رب
-
ابقه بالعراق !
-
هههههههههههههههههههههه يمعود اني صارلي 12 سنة متعين واذا اجه السفر اعوف التعيين اللعين و انعل ابو الوظيفة لابو العراق
-
عيني انت خلك معيد ...لو مدرس جامعي و حاصل عل ماجستير كلنا بيها مجال
المعيدين 10 ابربع ....
اسف لان ضايقني موضوعك فلازم ارد هذا الرد
تحياتي
معقولة سيد " ضائع " شنو هذ الجواب ؟؟؟
ليش تتهين الاخ
ولو اكو هواي ناس تكره اصحاب الشهادات لان هو الدولة وقادته مزورين كلهم
احسن واحد بيهم يقراء ويكتب و مزورله شهاده
-
..خلك عند اهلك وبلدك اشرف لك
وتعرف تربي ولادك صح
-
أخوان السلام عليكم ورحمة الله وبركاته....
أكو موضوع جاي ياكل ويشرب وياي الا وهو موضوع تعييني.... انا متعين معيد بجامعة وطلع توطيني وخذيت اجازة سنتين بدون راتب واتوكلت ورحت لامريكا وبعد السنتين رجعت حتى اشوف مسألة وضيفتي فالمسؤولة على الاجازات كلتلي انت استنفذت رصيدك تماما مال الاجازات ولازم لو ترتبلك اجازة مال لجنة طبية 6 اشهر قابلة للتجديد او تستقيل وما مضمونة رجعتك بعد كم سنة....المسألة فكرت بيهة بعقلي وبقلبي فالعقل يكول ابقى والقلب يكول ضل بالخارج وخلي جهالك يتونسون ويتعلمون وياخذون فرصتهم بالحياة... مشاركاتكم مع التقدير
اخوكم ابو روان
اني اخوية هم متعين بالعراق حالياً من قبل 6 سنوات او بمكان راقي جداً او راتب محترم اعتقد 20 مليون عراقي يتمنى ايتعين بهذا المكان او هذا كلها راح اعوفه او اغادر من اجل مستقبل اطفالي من اجل اعيش واعيشه بمجتمع تسوده العدالة الاجتماعية و من اجلالنظافة والتحضر والابتعاد عن هتك خصوصيتك وكرامتك الي يومية تنهتك وباستمرار في بلدنا مع الاسف من الصبح لمن اتفوت على ابو السيطرة ...الخ ، ومن اجل ما احس اكو واحد كاعد ايبوكني ويبوك مستقبل اجيالي يومية او اني ساكت، اخي العزيز المثلك شاف الحياة بامريكا استغرب ايفكر يرجع للعراق او ايرجع اطفاله الى العراق بعد ما شاف ضمانة الحياة اشلون بامريكا، اخوية اني اليوم مجاز قبل لا اذب الاستقالة بالاسبوع الجاي لان سفري بشهر السابع، تدري انسمطت عشيرتي علما اجى السحب مال مولد الشارع حر مو طبيعي او متعاجز اشغل مولدة البيت، او كفت برا ابوع على جيرانا شايب كاعد بالباب على الفي كتلة ها حجي شو برا : كال حارة واطلعت برا على الفي !!! ??? يعني برا ابرد من الجو مع العلم بيته بالـ300 متر ، كلت بكَـلبي ايباه اني اتصير تالي مثل الحجي لا والله الف شكر الج امريكا على قبولي الا اروح او فلا ارجع اوخدم امريكا واكون مواطن صالح من الدرجة الاولى ;D، زين هاي كلها كَـدرت اتدبرها والتراب وين اتروح وين تشرد ... عمي السالفة خربانة .
والله اعتقد المنظف بأمريكا عشيته احسن من وزير عندة بالعراق. او انتة بكيفك
-
عزيزي،
هل التعيين راح يعيشك بحرية وامان ويوفرلك مستقبل الك ولولدك؟ اني ماعرف اذا انت رب عائلة او لا لكن فكر باولادك، تريد تخليهم بمدارس عراقية (معضمها) يصير بيها حديث طافئي وحقد وتمييز؟ اني بوكت صدام وسمعت بالمدرسة مالتي كومة حجي طافئي، هامرة هسة؟
عزيزي، التعيين مو روح الحياة. لازم نكسر التفكير العربي الي تربينة عليه وهو لازم شغل وفلوس. شنو فائدتهم وانت ماعندك مكان بيه تقدير للبشر؟ مع احترامي لكل الاخوان، اني العراق احبة وعشت بيه ايام كلش حلوة. بس اني داحجي الحقيقة، مع الأسف الناس تغيرت، واني اعرف بلدنا مو النة.
افضل اتغرب وتكون حالتي المادية متوسطة، ولا اروح لبلد الي هو بلدي واني منة بس احس اكبر غريب واشبع اهانات وقلة التقدير للبشر.
تعبك بالتدريس وبالتعيين تكدر تستثمرة وتتعبة برة لان لمن تتعب تحصل، وبالعراق تتعب وكلشي متحصل.
نصيحتي الك لان انت حاير، اتوكل وسافر والله يفرجها عليك. مو كلشي بالحياة الفلوس، الفلوس مهمة بس سعادة وراحة وصحة البشر اهم بمليار مرة.
بالموفقية واسف على الاطالة. وأسف من الجميع اذا كان كلامي جارح
-
والله يا اخوان رأيكم هواية اقدره وأحترمه بس انا هم جاي ادرس على شهادة ام السنتين بامريكا وان شاء جاي ارتب اوراقي على الماجستير على الاقل اعوض فقدان وضيفتي بشهادة اعلى والله الموفق
-
اخي نصيحة امشي على رايك لان انته صاحب القرار وانته عشت بامريكا وتعرف الوضع احسن من غيرك بس اني افضل الوظيفة على الهجرة وخاصة اذا كان راتب مجزي مع احترامي لجميع الاراء
-
اخي انت وضعيتك بامريكا شلونها
اني لو منك اضل بامريكا
الوضع بالعراق ميستقر لو بعد ميت سنة
-
اخويه التعين طبعا مايرادله تفكير ترة دوائر العراق تسوة ام وابو امريكا !!!!
-
السلام عليكم اخوان
عندي سؤال لكم
هل اصبح من يسأل سؤال وهو يطلب المشورة عيبا او انتقاصا من صاحب السؤال
يعني اذا الله نطى لواحد بيت وسيارة 2011 و زوجة تموت علة تراب رجليه وانت كاعد ابيت ايجار وزوجة اترزلك كل شوية وانت ساكت هل لذاك الشخص دخل فيما اعطاك الله
متى نتعلم ان نرد على السؤال بطريقة لا تنتقص من المقابل ولا تنتهك خصوصياته
ونحن اللذين نعتبر انفسنا اصحاب عقول ترى افضل من الباقين
الله يهينا ويصلح حالنا
اخي صاحب الموضوع
تحية طيبة من خلال ما قرأته من سؤالك افتهمت انك حاليا تدرس لتطوير نفسك و هذا مؤشر جيد ومهم يجعلني اقول لك وبلا تردد لا تفكر بالبقاء في العراق الفرصة امامك لتطوير نفسك
واترك الوظيفة غير مأسوف عليها وان شاء الله يعوظك بأفضل منها في بلدك الثاني الذي سيعطيك كل ما تتمناه من احترام وحرية لك و لاولادك من بعدك وتقبل تحياتي
-
اي بعد شكو اذا دترس هم راح اتعوض شهادة مالتك .... اخي العزيز نصيحة الى الله لاترجع ولا اتفكر بيها بالرجعة .. هسة لو مشايف امريكا بيها مجال بس انت شايفها .. يعني قارن بين العراق .الكهرباء. والوضع الامني .. والعصابات والملشيات والعشاير الي ادور افصول ... واطفالك بالمدرسة لازم اتخيلهم مدرسيين خصوصي ودي وجيب واذا احد اتأخر ضال بالك .. والخطف هذا كلة واكثر موجود بالعراق....... اما امريكا الامان والونسة والضمان الى اطفالك ويصرفون للاطفال الى حد 18 سنة واكيد انت طالع على iom يعني هم اكو مساعدات يعني ماشية الامور اكيده... يا اخي انسى العراق وغير تفكيرك وشوف الحياة على اصولها شوف العالم شلون عايشة شلون اكو احترام للبشر ... والقرار يمك بس نصيحة لاترجع ولا اتفكر واترك موضوع التعيين
-
اخي العزيز...
اتعين و الغي اجازتي و ابقى بالعراق... و ابني بلدي حتى من تستقر الكهرباء اكول اني جنت واحد من اسباب استقرار الماء...
عيني رجاءا بطلو هاي الاسئلة لان المنتدى اصلا لمناقشة قضايا السفر و الهجرة و ما قبل ذلك و ما بعده... هاي الاسئلة معروف شنو القصد من وراها...
و هاي هم تحياتي...
-
اذا عندك بيت ملك ببغداد يعني خمرة للمستقبل فيما لو فكرت بالرجوع بعد سنوات طويلة فسافر وشوف مستقبلك ومستقبل اطفالك بس دير بالك عليهم وواضب على اعطائهم دروس بالدين والاخلاق والقيم مالتنا بشكل يومي بهالوضع مراح تندم على ترك العراق واذا فكرت بيوم من الايام ترجع راح يكون عندك بيت تعيش بي وانت مرتاح ويكون عندك كم فلس جبتهم وياك بعد ان الله وفقك برة ووفق اولادك
الحجي هواية اذا يريد واحد يحجي بس كل واحد من الاعضاء نطاك وجهة نظرممكن ان تبني قرارك على اساسها وبالبداية وبالنهاية الاختيار يرجع الك اخي
مع فائق الاحترام والتقدير
-
حبيبي كولش سهلة ... تكدر تعيش بالعراق ابقى .... ما تكدر تتحمل اطلع ............................. نصيحتي اني اشوف كلبك انه تبقى فلذلك استفاد من راتبك وعيش يم اهلك .... اني مثل حالتي كل يوم علية بالعراق اسوء من الي قبله ولذلك لو راتبي دفتر بالشهر ما ابقى بالعراق
-
اخي صلي صلاة الاستخارة وسوي الي براسك لان هو الصحيح.
يا الله.
-
والله يا اخوان رأيكم هواية اقدره وأحترمه بس انا هم جاي ادرس على شهادة ام السنتين بامريكا وان شاء جاي ارتب اوراقي على الماجستير على الاقل اعوض فقدان وضيفتي بشهادة اعلى والله الموفق
اخي الفاضل اذا كان هذا وضعك وستحصل على الشهادة التي تتكلم عنها فانصحك بالبقاء في امريكا
اسوء الاحتمالات ان تكمل شهادة في امريكا وعندك شهادتك العراقية والجنسية الامريكية تحصيل حاصل راح اتخليك اتعيش احسن عيشة باي بلد عربي على سبيل المثال
انتة فكر باطفالك اذا بعد كم سنة سالوك. ليش رجعتنة للعراق. شراح اتجاوبهم
تحياتي
ابو سارة
-
يابه جماعة العراق والتعيين دزوا ايميلات للمنظمة وغلقوا ملفاتكم وخلي العالم تشوف مستقبلها
-
هم نفس الجواب راح اجاوب بهذا الموضوع لان اكو موضع شبيه اله جاوبت علية قبل شوية
شباب على كيفكم وية الرجال هو ديطلب رأيكم ومحتار انتو انطو رايكم وجاوبو على السؤال بدون تجريح و كلام فائض
اخي العزيز صاحب الموضوع باختصار اذا حياتك بالعراق افضل من حياتك باميركا يعني اذا انتة غير مهدد و عندك بيت ملك وعندك سيارة وراتبك حلو وعندك امكانية تطور نفسك وتزيد من راتبك ومستقبلك الوظيفي ابقى بالعراق لان من عندك كل هل امور الي ذكرتها معناها متوفرة وسائل الراحة لان الفلوس تجيب كلشي تجيب الونسة وتجيب الراحة .....الخ واذا مات تملك كل هذني او تملك جزء منهم وتعتقد انو راح تكدر تمتلكهم كلهم بالمستقبل القريب وبفترة قليلة هم ابقى بالعراق اذا توفرت امكانية توفيرهم
اما اذا كان الامر عكس الكلام السابق ابقى باميركا
يعني معادلة سهلة شوية فكر بيها واحسب محاسنها ومساوئها وشوف وين الافضل الك من خلال المقارنة والله يقدم الي بي الخير
تحياتي
-
القرار الاول والاخير لحظرتك طبعا
لكن انا من راي ماكو وجه مقارنة امريكا افضل بالتأكيد
بالتوفيق اخي .
-
عزيزي هذا الامر انته الي تحدده لان الردود على هذا السؤال راح تكون الاجابه من قبل الاخوان يعتمد على تجاربهم الشخصيه واكيد انته تجربتك مختلفه انته اعرف شتريد وتصرف على هذا الاساس
مع حفظ حقك بلسؤال
-
الى الأخ سينيبر موضوعك محلول أوتماتيكياً وهو أولاً أنت في العراق راتبك يحلم بيه كل شخص وأعلم أن في أمريكا 10% من هذا راتبك سوف تحصل عليه هناك في أمريكا ثانياً أنت صاحب شهادة محترمه مع أحترامي لكل الشهادات وكل المهن الحره فيا أخي بلدنا قد دمر بصورة متعمده وثق على الأقل في المستقبل القريب صعب التكهن كيف سيكون بلدنا وكيف تسير والتعايش فيه وخصوصاً قد زرعوا قانون الطائفيه الحقير المقيت وهذا وحده يراد أجيال لكي ينطفىء فالعراق يعتبر الأمان فيه من أهم الأمور وهو فاقد هذا في الوقت الحاضر والمستقبل ...... وأخيراً أذكرك كما ذكرها أصدقائي من قبلي صلي صلاة الأستخاره وخلي الله هو الذي يقرر خير أم شر تقبل مروري
-
يااخي ياصاحب السؤال اي مو هو سؤالك غريب ويحجي الميحجي يااخويه اي مو انت صارلك سنتين بامريكا يعني فتره موقليله اي شلون مدتكدر تتخذ قرار شلون مندمجت بالمجتمع ومدخلت بالسستم مالهم يعني سنتين يمعود متكلي وين جنت زين اذا ممتحمل العيشه هناك ومعاجبتك المفروض متطرح الموضوع بالمنتدى راسا تتخذ قرار بالعوده وخلص بس من تطرح السؤال افهم من سؤالك انه انت دتستهزء بالمنتدى وبالاعضاء لان سؤالك مومنطقي
الله يعينك اذا فعلا موضوعك صحيح وتتخذ القرار الصحيح
مستر بن ضحكتني بجوابك
-
الي يريد شي يعوف شي اخي الكريم ذللك يرجع الك فاذا انت تريد مستقبل لولدك وتريد سلام واستقرار دائمي فطبعا في هذه الحالة ابقى في خارج البلد لانه في العراق لم نرى استقرارا وسلاما طويلا اما اذا ردت الفلوس بس فهاذا بحث اخر
-
بالنسبة لجميع الاخوان الي يريدون يتعينون وديكولون للاخ صاحب الموضوع اكو واحد يعوف تعيينة ....
مستعد اعينهم وباماكن كلش زينة وبراتب ممتاز وماريد منهم ولا دينار ... بس اريد شغلة وحدة منهم ان يجيبولي نسخة من ايميل اغلاق كيساتهم واوعدكم بس اشوفهة راح امشيلكم بالتعيين ...
يلة خلوا مجال للمتعينين ومرايدين عيشتهم ولا تعيينهم بهالبلد ويريدون يعيشون ولدهم عيشة زينة ومستوى ثقافي عالي ويضمنولهم مستقبل جيد في كل البلدان ... وحتة ليزاحمونة مدام الكيسات صارت هواية ...
اذا سفركم متوقف على التعيين اني اعينكم ..
-
الاخ صاحب الموضوع خل احجيلك شغلة ... اني مترجم 5 سنين اكلت عبوات بكد سليمة ام اللبن و شفت بلاوي سودة و ضيم الله و عبادة و خسرت اصدقاء و اخوان اكل و اشرب وياهم يطلع مشن و ميرجع ... لاعندي بيت ملك ولا عندي اقارب ولا عندي غير فقط عائلة من 3 نفرات ربي يسلمهم ... شهادة ماعندي لان اشتغلت مترجم بعمر 18 سنة ... لا اكو تعيين بي حظ الي على اعتبار ماعندي شهادة ولا اكو اقارب انتجي علي ولا عندي شغلة اشتغلهة غير الترجمة و انتة تدري هسة ماكو شغل لان الجيش طلع ... طبعا متهدد كومة و شكلي هواية ناس حافضتة والله قبل فترة ضابط بسيطرة شايفني بلشغل و جلب بية كلبي وكف كلت هسة انسحل للسجن ... خصم الحجي هاي كلهة اسباب تخليني اسافر ... انتة اذا وضعك مثلي و اتعس اكيد ابقة برة لا تجي ... بس اذا مرتب امورك اهنا ... ترة مولدة صغيرة تحل مشكلة الكهرباء ... و ماطور جبير و تانكي زين يحل مشكلة المي ... والناس اهلك و ناسك تتحملهم لان انتة واحد منهم ... و عينك ميزانك و اتمنالك التوفيق
-
بالنسبة الي اني مخلص ماجستير هندسة ميكانيكية من عام 2006 ولحد الان ممحصل تعيين وكاضيها كلها شركات اهلية وحاليا عندي اطفال اثنين وساكن ويا اهلي وهذا سبب من الاسباب اللي دفعني على تقديم اللجوء والهروب من واقع العراق اللي يعين بس اهل الواسطات ولو كانت عندي وظيفة ثابتة ومستقر مجان فكرت بالهجرة
-
اخواني الاعزاء احب اشكركم على كلامكم وتجاربكم اللي استشفيت منها هواية امور واحب اعتب فقط اعتب على الاخوان السلبيين اللي يكول عبالك انا حارمهم من الطلعة وما جاي اوافقلهم حتى تمشي ملفاتهم واكوللهم ترى كلمن ياكل حظه ونصيبه بهاي الدنيا والكلمة الطيبة صدقة وانا من حيرتي وحراجة الموضوع حبيت افكر وياكم بحل ما يخليني اندم في يوم من الايام واتمنى للجميع السفر وراحة البال ورحم الله والديه اللي طرح رأيه بأمانة والله الموفق
اخوكم ابو روان البصراوي
-
اخواني الاعزاء احب اشكركم على كلامكم وتجاربكم اللي استشفيت منها هواية امور واحب اعتب فقط اعتب على الاخوان السلبيين اللي يكول عبالك انا حارمهم من الطلعة وما جاي اوافقلهم حتى تمشي ملفاتهم واكوللهم ترى كلمن ياكل حظه ونصيبه بهاي الدنيا والكلمة الطيبة صدقة وانا من حيرتي وحراجة الموضوع حبيت افكر وياكم بحل ما يخليني اندم في يوم من الايام واتمنى للجميع السفر وراحة البال ورحم الله والديه اللي طرح رأيه بأمانة والله الموفق
اخوكم ابو روان البصراوي
ممتاز جداً اخوية العزيز sniper1980 انت جاوبت نفسك حسب قولك ودعائك للكل بـــ( الســــفر وراحـــــــــــــــة البـــــال ) واكيد انت جنت عايش برة وعرفت انه راحة البال بالخروج من العراق يعني لا وظيفة ولا اي شي راح يخلي بالك مرتاح ومطمئن على عائلتك داخل العراق ... وانت براحتك بعد احنة مجرد نبدي راي .
ولك جزيل الشكر
-
اللي يلكي خير من اهله يبات - مثل يقال ولايقاس به -