ankawa
منتدى الهجرة واللجوء => الهجرة و واللاجئين => الموضوع حرر بواسطة: Avatar في 20:41 08/09/2012
-
السلام عليكم اصدقائي..
ان شاء الله الكل بخير بعد خميس الاعتصام والجاي خميس الغضب والورا خميس الفرج والورا خميس السفر للكل يا رب..
بالنسبة للحقايب عددها واوزانها...تعددت الروايات من قبل اصدقائي الرايحين واللي علة روحة...منهم من يقول لكل شخص فوك عمر السنتين حقيبة واحدة جك ان ام ال 20 كيلو وحقيبة واحدة كاري اون ام ال 5 كيلو بالاضافة الى لاب توب ان وجد...يعني الاب توب ميحسبوا علة الاوزان...
واكو رواية تقول لا بل لكل شخص بالغ حقيبتين جك ان ام ال 20 كيلو زائد الكاري اون باك ام ال 5 كيلو زائد اللاب توب...
والرواية الثالثة تكول لا لا لا جنطة وحدة جك ان بس ام 23 كيلو زائد كاري اون باك ام 5 كيلو زائد لاب توب..
والحلو يكيلك اكو جماعة متعصبين لروايتهم حيل حيل حيل,,ويكولون انوا الجنطة الوجدة الجك ان ام ال 20 كيلوا اي شي زايد ميسولك بوردنك ويكلولك روح سويلنة جنطتك 20 كيلوا وتعال حباب...يعني ذب من جنطتك وسويهة الوزن القانوني..
حبايب افتونا بما رائتموه ...يعني المجرب فدوة الرايح وصاير بي اي شي من هل القبيل خلي يفتينة....وينة ابن ولايتي وينة الجيران يلة عمي بر جارك فدوة..
تحياتي للجميع تقبلوا مني اطيب الامنيات
افاتار
-
up
-
صديقتي سافرت من بغداد اول شي خابروها من عمان وكلولها جنطه ام 23 كيلو لكل شخص و5 كيلو بالطيارة و اللابتوب
قبل يومين من السفر خابروها iom بغداد وكلولها كل شخص جنطين ام 20 كيلو ولازم جنطين يعني ميصير جنطه وحدة جبيرة و 5 كيلو بالطيارة واللابتوب
تمنياتي الك بالسفر العاجل
-
شكرا اليكساندرو على الرفع
شكرا تيولب علة المرور....
يعني الرواية الاصح جنطين ام 20 جك ان وجنطة كاري اون 5 كيلو
الله كريم .... بلكت علما ينطون موعد السفر للحجي يكون واصل الوزن لل 40 كيلو....خخخخخخ
افاتار
-
والله يا اخي اني ضبيت الجنط على اساس 23 لكل جنطه مثل مكلونه الاي او ام
والهاند باك كالو 5 كيلوات بس هي اصلا متنوزن فرح اسويها 6 كيلوات
-
اخويه انت من وين راح تسافر لان من بغداد تختلف عن الاردن
-
اخوية افتار مثل متفضل الاخ مشيكان فوزن الحقائب يختلف من عمان او بغداد وهذا بناءا على القصص الي سمعتها فإذا رحلتك بيها ترانسيت عمان ومن ثم امريكا هاي مسموح لكل شخص أكثر من سنتين بحقيبتين وزن كل وحدة منها ميتجاوز 23 كيلو وحقيبة يد 5 كيلوات ... يعني عندي أقاربي نزلوا ترانسيت عمان عدهم طفل 2 وشوية كلولهم كل واحد اله حقيبتين 23 كيلو وآلام والأب فقط حقيبة يد متتجاوز 5 كيلوات مع حقائب اللابتوب
وعسى الأخوة ينفعوك اكثر بخبراتهم
-
اني اخوية لمن انطو موعد سفر دزولة رسالة الجنط
كالو جنطتين كل وحدة 23 كيلو
و جنطة الهاند باك و جنطة الابتوب
و حتة اتصل و تاكد
-
اخوان اني كتبت موضوع بيه استفسار ........... لان هذا موضوع جدا مهم
السؤال الي يطرح نفسه هنا اذا SIV على مساعدات ال IOM هم جنطتين لو بهاي الحالة جنطة وحدة
-
اخويه العزيز بالنسبه للاوزان هي تعتمد بالدرجه الاولى على شركة الطيران كل شركه شكل مثلا اني بوقتها على المصريه كان الوزن 23 للجنطه الواحده ولك شخص له الحق جنطتين وهاند باك ولاب توب هاي بالنسبه للبالغين اما بالنسبه للاطفال العمر فوق سنتين له الحق جنطتين كل واحد ه23 كيلوا فقط بدون هاند باك وصديقي بوقتها من راح على الخطوط التركيه كالوا الجنطه الواحده 15 كيلوا ولك جق جنطتين ولاب توب وهاند باك . بس اكوا ملاحظه من يصير عندك سفر طول يعني تركب بي عدة طيارات مرات يكولك احنا حاسبين الوزن لا اربعة جنط مو اكثر يعني مثلا اذا انتوا كنت اربعه نفرات فاكيد لازم تشحنون 8 جنط فاني بوقتها كانوا غلطانين ويايه كالوا احنا مسجلين فقط اربعه فمن رحت داسوي الاوكي على التذكره كال لازم تدفع للجنط البقيه فكتله للموظف الكيلي حل اني ماعندي ولافلس كال ميخالف هسه اشوفلك ايها فراح واجاه وبعدين غير الشركه . فانتوا اذا صارا يواكم هذا الشي خلوا موظف ال اي او ام يلكيلكم شركة طيران ثانيه لانه اذا ملكه لازم تدفعون فلوس شحن على كل جنطه
-
دزولي ايميل بيه
جنطه وحده 20 كيلو
وحقيبه هاند باك 5 كيلو
ماعرف بعد
-
اخوية افتار مثل متفضل الاخ مشيكان فوزن الحقائب يختلف من عمان او بغداد وهذا بناءا على القصص الي سمعتها فإذا رحلتك بيها ترانسيت عمان ومن ثم امريكا هاي مسموح لكل شخص أكثر من سنتين بحقيبتين وزن كل وحدة منها ميتجاوز 23 كيلو وحقيبة يد 5 كيلوات ... يعني عندي أقاربي نزلوا ترانسيت عمان عدهم طفل 2 وشوية كلولهم كل واحد اله حقيبتين 23 كيلو وآلام والأب فقط حقيبة يد متتجاوز 5 كيلوات مع حقائب اللابتوب
وعسى الأخوة ينفعوك اكثر بخبراتهم
الله يبشركم بالخير...اني عندي الوالد الامنية مالتة اكتملت .... يعني علة سفر قريب...طبعا من بغداد.. ومن المخضريمن...الله يسهل علة الكل...المهم من الحلو انو الواحد يسمع يكدر ياخذ اكثر وزن ممكن..الله يسهل
ممنون على مروركم والسفر العاجل للجميع
افاتار