ankawa
منتدى الهجرة واللجوء => الهجرة و واللاجئين => الموضوع حرر بواسطة: غراب البين في 22:32 01/10/2012
-
بالبداية شباب السلام عليكم أنا عضو جديد أرجو منكم قبولي صديق دائم لكم انا قدمت على منضمة iom في سنة 2011 عندما قدمت على هذه المنضمة كنت متردد لعدة اسباب اذكرها بعد اكمال قصتي بعد شهر من تقديمي أرسلو لي الكيس نمبر طبعا رسلولياه عن طريق رسالة عالايميل الخاص بي وبنفس الوقت أتصلو بي من عمان الموضفة التي أتفائل بصوتها وقالت هذا الكيس الخاص بك
بعدها بشهر واحد فقط أتصلو بي وحددو المقابلة الاولى وعندما فتحت ايميلي وجدت هناك تحديد لموعدين المقابلة الاولى وبعدها باسبوع المقابلة الثانية ومرفق مع المقابلة الثانية استمارة طويلة جدا معلومات عندما ثهبت للمقابلة الاولى كانو لطفاء معي وبعدها باسبوع على المحلف الامريكي بعد المقابلة الثانية بشهر اتصلو بي للفحص الطبي وبعدها بشهرين وصلت اوراقي للكفيل هذه العملية كولها في 6 اشهر أنها سريعة اليس كذلك ولكني متردد من الأسف لأسباب اولها زوجتي رافضة الموضوع من البداية وأنا لأني موضف حكومي وتعرفون الموضف في العراق ماذا اصبح فأنا حاير في امري أذهب أخاف اتندم ما أذهب أخاف اتندم والله لا ايحير عبدة علما أن عائلتي متكونة من 4 أشخاص أنا وزوجتي وأثنان من الاطفال والنصيحة شباب لمصلحتي وانشالله السفر العاجل للجميع
اخوكم غراب البين
-
أخي اذا زوجتك معارضة موضوع السفر وانت موظف ومتردد , ابقه أفضل
-
اخي العزيز
فكر باطفالك من دراسة وترفيه ومستقبل
وافرض انه اجتي هاالفرصة لاهلك من كنت صغير وهمه رفضوا السفر شراح يكون هسة رأيك هل توافقهم انهم بقوك هنا لو احسن السفر وانت هسة هناك
كذالك اطفالك من يكبرون
ضحي من اجل اطفالك
-
السيد " ........... " الله يكفينه شر اسمك عموما
حضرتك من الواضح جدا انك اتخذت القرار بعدم السفر ... و هذا بي جزء كبير من المنطق
و ما تريد نصيحة بهذا الموضوع ... لا ابدا ؟؟؟ حضرتك اتريد نشجعك بهذا القرار
اخي .. انته الوحيد اللي اتقرر ومحد يكدر يكلك شنو اللي يلائمك
و طبعا لعائلتك دور كبير في مشاركتك باي قرار تتخذه لان هاي حياتهم ومن حقهم يقررون
-
اخويه العزيز اسمع كلامي انته مشتغل ويه الامريكان والك حق اتروح والك حق ترجع اذا معجبك الوضع اهناك , سوي اجازه بدون راتب سنه ينطوك مال سنه مادام انته موضف بالحكومه واتوكل على الله روح لهناك خلال سنه تكدر تقرر تبقه او الوضع ميعجبك تكدر ترجع وهسه اكو ناس بالمنتدى مع احترامي للكل يهجمون عليه هذا ياخذ مكاننه باللجوء الي ميعجبه الحجي مشكلته مو مشكلتي .لان انته لمن اشتغلت ويه الامريكان اذا صار بيك شي لاسامح الله محد كال هاي اخذ مكاننه بالمصيبه...اخذلك اجازه سنه واتوكل على الله ....الندم على الفعل اهون من حسرة عدم فعله
لا تشيل هم ربك موجود
-
اول شي اخي القرار بيدك انت وعائلتك واذا لم تقدرو تقرور اطلب منك ان تصلي ركعتين استخاره وتصفي نيتك اذا شفتك نفسك بعد صلاة الاستخاره مرتاح اعمل بها واذا تشوف نفسك متضايه فلا تعمل بها وشكرا ارجو ان فهمت مني
-
كل الهلا باخونة العزيز غراب البين نقبلك صديق و نتشرف بيك ليش لا قابل عداوة ؟؟
بالنسبة الموضوع حضرتك و حسب ما قريت انو انت تقديم 2011 يعني مع الاسف مو من جماعة الطابوكة الذهبية ;D ف عليه انت يحتاجلك فد ربعية مال طابوك من ال IOM تنام عليك فد سنتين بالعراق حتة تستوي زين ( العفو اقصد قضيتك تستوي مو انت ;D) بالعراق و حتة فد مرة تشوف العراق شراح يصير بعد فد سنتين من جميع النواحي ابتداءا من الناحية الامنية و مرورا ب انتهاك ابسط حقوق للانسان و مصادرة الحريات و انتهاءا ب قضية عبث الجهلة بالبلد و قيامهم بما يدعون انه بناء و اتطوير و هو كلة صح بناء ولكن كبناء قصر على الرمل ( لان كلشي بدون تخطيط ) و اولها الاكثار من السيارات و اغلاق الطرق بوجه المواطن المسكين الذي وجد نفسه في ليلة و ضحاها بين مطرقة الارهاب و التفجيرات و سندان قوات الامن و عمليات بغداد و جرائاتها الصارمة و الى اخره وراها ياللة تقرار قرر ما راح تندم عليه
اخوك عذاب
-
اني اكول تبقى عندك وظيفة وراتب زين واطفال وبيت وسيارة ملكك يعني مستقر اذا هذا اللي عندك اتسمي استقرار قتبقى احسن لان انته تعرف كلش زين من توصل لهناك تبدي من الصفر وهذا الشي هواية ناس ما يتقبلوا من حقهم ....
بالمناسبة جيرانه 17 سنة خدمة وعافته وطلعت وعايشين جوى الملك بدجة
وانته هذا مو قرارك وحدك ماطول اهل بيتك رافضين الفكرة ما الك حق ان تجبرهم بس كولي صدقة لعينك شلون جبرتهم على المقابلات
واهلا وسهلا بيك وعذرنا طولنا بالكلام
-
الســــــلام عليكـــم شبــــاب.... ;)
تحيــة طيبــة الى الجميــــع والـــردود.... بـــــس انـــي عندي بعض الملاحظـــات... :o
اذا بقيت افراد العائلـــة ما يوافقــون يطلعـــون فلا اجرب تطــلع وبعديــن الاهل على طـــــــول الوقـــت راح يلمـــوك وانت مراح اشـــوف دربـــك... :(
واذا بقيــت هم راح تبقـــى حسره بقلبك ليـــش اني مـــا سافـــرت... :-\
انـــي رائي اشوف ام البيــت شنـــو اتكــول...؟ اذا ما تقبل اســـــافر فـــلآلآلآلآلآلآ تعب نفســـك.... لان راح اتكلك رجعنـــي الاهلـــي هســـه... :o
وانت صوجك جبتنـــي لهنــــا وغيره من كلام وبكــــــي .... :'(
للعـــــــــــــــــــلم شبـــاب هذا الكلام عن طريــق تجارب بعض الاصدفاء في ولايـــة ماريلانـــد.... :-X
وان شاءالله التوفيـــق من الله سبحانـــه وتعالــــى... اذا تحب تسال اي شوال في بالك ممكـــن مراسلتــي على نفس الموضوع للفائده للجميــع مع الشكـــر الجزيــــل.... :)
-
شكرا اخوية الغالي عالملاحضة وشكرا للأعضاء على ارائهم المتعددة مختصر الكلام أنا أندم بالحالتين مثل ما كال ابن عمي أذا تروح خاف تتندم واذا متروح هماتين تتندم والله العضيم شباب اني صارلي حوالي سنة من 2011 بالي مو صافي اكول اذا طلعت اروح لو لا وبناتي شنو مستقبلهن واني شنو مستقبلي وهكذا لحضات اشوف الشارع العراقي واكول احنه عايشين بالكوة بنص التراب والزبايل والبشر الي ما يرحم والقانون الي بيه محسوبية ومنسوبية بس تطلع اروح ولحضة اشوف حجي زوجتي اشلون من تسمع طاري السفر تبجي وانقهر عليهة والله اني حاير المشكلة بالي ابد ما صافي واني اسوق تجيني افكار واني انام واني اكول واني امشي حته واني اسولف علة غير موضوع ويه شخص هماتين تجي علة بالي اروح لو لا حته راح اتصير بيه حالة نفسية وشكرا الكم وياريد الي ماشية امورة عدل هناك يذكر علمود شوية تشجيع بالمناسبة اني اخواني كولهم باميركا والمشكلة ايكولون الشغل ضعيف احنه عزابية وعدنه بالشقة روميت ومملحكين عالايجار انته عندك عائلة يعني لازم اتحسب شقتك وحدك والايجار تدفعة كولة
-
اخويه حسب ماکتلک سوي اجازه بدون راتب روح اذا معجبک ارجع هذا من حقک وانته ما ما خذ مکان اي واحد
-
الاخ العزيز تحية طيبة اولا واخيرا القرار لك ولكن ادرس الموضوع انا متيقن من انك تريد الافضل لك ولعائلتك قارن وقارن فقط بين الحياة هنا وهناك وستجد بان لامستقبل بالعراق في حال قررت السفر خذ اجازة سنة بدون راتب واذا ماعجبك الوضع ارجع
مع تقديري
اخوك نيوتن
-
اخويه حسب ماکتلک سوي اجازه بدون راتب روح اذا معجبک ارجع هذا من حقک وانته ما ما خذ مکان اي واحد
-
اخي فكر بمستقبل اطفالك وبمستقبلكم انتو وروح سافر وانشاء الله راح تندم وتعيش احله حياة هناك
-
صديقي العزيز اول شي ما اعرف ليش اختي ( زوجتك ) رافضه الموضوع اذا ماكو سبب انت تعرف شلون تخلي المره تقبل السفره وبالنسبه اليه ما احب اكلك ابقى لان اني احجي على نفسي امووت من العراق وما اكلك رووح لان ما احب اخليك بهذا الوضع لان المره ماقابله وان شاء الله توصلون للحل المناسب بس اهم شي ومثل ماكالوا اصدقائي الي سبقوني انه فكر بمستقبل ولدك هناك افضل من هنا
واسف على المطاوله بالكلام
تحياتي الك حب !
-
اخي انت من هسه مسمي نفسك غراب البين
ومادام هذا اسمك متفكر بالروحه ابد(يعني لو اسمك كناري لو الهدهد)صدك جان اختاريت تروح
على كلن الروحه صعبة كلش لامريكا بس اسهل من الرجعه ماكو ;)
-
اخويه العزيز فكر بجهالك كبل كلشي جهالك اهنا شنو مستقبلهم؟؟؟ اذا نجحو بحياتهم و صارت عدهم افلوس فهمه مهددين لانه امورهم عدله واذا فشلوا بحياتهم و فراح ينسحقون اهناك اكو ضمان اجتماعي و الاطفال اينشئون خوش نشئه و يتعلمون و مستقبلهم مضمون الله ايخليك واتمنه تحجي ويه زوجتك بهلمنطق والامر يرجع الك و تحياتي الك
-
تريد الصدك هاي الشغله مابيهه نصيحه كل واحد وبخته اذا جان بالعراق لو بامريكا وا كلك شغله اذا من هسه المره دتلطم لا هوايه راح توصل الطياره لامريكا
-
اخواني واعزائي شكرا على النصائح وشكرا على تعليقاتكم كلامكم معي نابع عن مافي قلوبكم الله يشهد احس اهلي دا يتكلمون معي شكرا الكم
للطرافة اليوم اجيت من الدوام وجان اعمل تمثلية وبنفس الوقت اختبار وجدت زوجتي بالغرفة وجان اعمل حالي الموبايل ايدوك علية على اساس منضمة iom رديت عليهم على اساس اتكلمت مع الموضفة الي في عمان وقلت الهة اتفضلي كلتلهة اي اني فلان وسكتت شوية وجان اطير من الفرح وصرت اكمز ;D زوجتي اتباوع علي واعيونهة اشلون السمجة المزوهرة ;D كلت الصاحبة المنضمة اشوكت انشالله موعدنة للطيارة على اساس كالتلي 21 / 10 / 2011 كلتلهة اوك قبل بيوم نجي الابن البيطار علمود حباية مال الطيارة والحليب مال الطيارة للاطفال سديت الموبايل واني اضحك وفرحان بس تمثيل مضبوط ما خليتهة اتشك ;D ابنفس اللحضة اتصلت على اساس بابن عمي لان هوة هماتين امقدم وعلى اساس بشرته كتلة اي اشكد الوزن الي يطلبوه للاغراض وهكذا المهم سديت الموبايل وردت اشوف ردت فعل زوجتي في حالة اذا صارت صدوك السالفة طبعا بقت زوجتي ساكته وصافنة لمدة ربع ساعة متحجي :-[ وبعدهة كامت تبجي :'( كلتلهة يابة ما عجبج نرجع جان ادكولي شيرجعنة واحنه عبر القارات كلتلهة افلوس وموجودة وطيارة وموجودة وما شالله حدود العراق والتربانة مفتوحة اربع اويالة 24 ساعة وايكولون بس تعالو >:( بعد اشتردين والله شباب قناعتهة صعبة ممكن تعليقاتكم للقناعة علمود اخليهة تقراها بلكي الله يهديهة المهم كلتلهة يابة جذب مو موعد جذبت عليج جان راسن يرجع اللون بوجهة تحياتي الكم اسف عالاطالة
-
الدنيا علمتني كل شيء فيها حظ وبخت . شكد ما تخطط وترتب وتصبر وتبجي وتضحك وتنتظر كل شيء حظ
الله يوفقك لما فيه صالح عائلتك.
-
والله يابة اني حقيقة علقت على موضوعك بالبداية بس شوية جنت قاسي عليك بس بعد ما اطلعت اكثر على وضعيتك اكول الله يسهلك وانشاء الله امورك مع العائلة تمشي مثل ما تحب انته واحب اوضح فد رسالة لاختنا (زوجتك ) خلي تشوف مستقبل الاطفال اهنا واهناك فد مقارنة صغيرة هي تسويها اضافة اكو عضو قبل فترة كتب انه اكو فحص دوري شامل للاطفال كل ستة اشهر فهو غلس ماراح دزولا ورى يومين رسالة وهو ما ردعليهم ورى يومين ثانية اتصلوا بي كلهم اي والله ادري بس مشغول وباجر اني يمكم فمراح ثاني دزولا اسعاف لباب البيت اخذوا الطفل جيكو ورجعوا الهم هيج حالة بعد شكد لله نوصل احنا هيج مرحلة هذا الحجي مو بس العراق على كولة واحد من الشباب (الشرق الاوسخ ) هاي الميزة وحدها تخلي اكبر واحد يروح شنو ابوية شنو امي ....الهم عليا حق نعم ومديون الهم العمر كله وما اجازيهم بس اطفالي شنو ذنبهم يسددون الدين مالتي واذا واحدنا بي خير من يوصل يرتب اموره ويدز على امه وابوه وهذا حيكون التقاعد مالتهم حاميهم من الجو الوسخ والحر والكهرباء والحصة والانفجار والضيم اللي دنشوفه يوميا.....
واخوية ( هدهد ) لان ما احب اسميك ذاك الاسم اسال اصحاب العوائل شنو استفادتهم خلي ببالك المساعدات عندك اكثر وراتب للاطفال فمعليك بأخوتك (مع احترامي)
اتمنى نفيدك ولو بالشي البسيط
وربي يهدي اهلك لما هو خير الكم انشاء الله
ونصيحة اخيرة (التجربة ما تضر ) ما عجبكم رجعوا
سلامي
-
راح اكوللكم شي اني مؤمن بيه وهو ------------ماكو واحد مقتنع وراضي بالواقع اللي عايش بيه ------------------ودايما نكول السنه اللي فاتت احسن من هاي السنه =================وهاي السنه احسن من الجايه صدكوني ==============وهكذا الحياة تمر ونعيش =============وعى كلام ام كلثوم بتكول لوعايزنه نرجع زي زمان قول للزمان ارجع يا زمان وهات قلب لاحب ولا شاف حرمان تحياتي للجميع واني اسف
-
اخويه العزيز
اني اؤيد كلام اخويه النعيمي جملة وتفصيلا هذا اولا
ثانيا اخويه بروح الماتولك متكولي منين لكيت هذا الاسم يمكن زوجتك من الاسم مزعوجه تره الاسم الي حاطه ابد ميشجع
تحياتي وسلامي الى زوجتك وكوللها روحي والهوى بظهرج يمعوده
اختكم ام شاهين من سوريا
-
شكرا الاعضاء الكرام الله يشهد رجعتولي الأمل وكول كلام تكتبوه خليت زوجتي تقراه والله كريم اني مؤمن بشي أنه البيه خير ايجيبة رب العالمين واكو فد مسأله لاحضتهة من خلال تجربتي ب iom انه ألي ما راغبهة مية بالمية تطلعلة والي ذابح روحة على هاي السفرية ما تطلعلة أتصورو اخر مرة اتصلت بيه موضفة الي بعمان طبعا الرقم دولي مثل لما تعرفون وما نكدر نتصل بيه المهم من اتصلت اني عرفت موضفة عمان قبل ما افتح الخط وكلت هذا موعد ما بيه اي مجال لأن اني مكمل كولشي من زمان وحته دورة تثقيفية من فتحت الخط تعرفون كالت أنته سيد فلان كلتلهة اتفضلي كالت في حالة أنه غيرت رقم موبايلك بلغنة لأن نعرف أنه انت مهدد على هذا الرقم لكي لا نفقدك لأننا سوف نتصل بك في اقرب وقت كولتلهة الله ايخليج اريد اعرف اني مصيري بالقضية وين وصلت كالت قضيتك بالتشييك الامني بس احنه انوصل صوتك باقرب وقت تحياتي للاعضاء الكرام وشكرا لكم
-
شكرا على دخولك اخوية الغالي وتعليقك بالنسبة الجواب على سؤالك نعم قريبة من بيتنه رابع فرع بس مو هاي القضية القضية الاهم انه هيه ربه بيت يعني مو موضفة ولا طالبة والا عندهة اي التزام الغريب متكدر اتفارك اهلهة هواية ناس كلولي اذا زوجتك معارضة ترة اتأذيك باميركا ومتخليك اتشوف دربك هذا ولك مني جزيل الشكر اخوية الغالي
-
اخويه العزيز
من تسافرون بخير وسلامه اكيد رح تسحب نت للبيت الي تسكن بي
فكوولها لزوجتك الغاليه كلنه مرينه بهاي التجربه وداعت ابني شاهين نور عيني جنت بيني وبين اهلي اربع بيوت وهمينه هاي بيوت عماتي وعمومتي واخواني بس نصيحه افتحلها النت وخلي تسولف ويه امها خواتها واكيد ههههههه كلها قشب لو على الطبخ فكوللها حبيبتي لمصلحت الاولاد لازم تضحين شويه صبري على النت والله كريم وانشالله كلها خير ههههه
تحياتي
اختك ام شاهين من سوريا
-
wife is happy life is happy
-
بالعراق الشغل الي يروح بعد ما يجي ابامريكا الشغل الي يروح تكدر اتعوضة بقت يمك ,احب اضيف انه ابن اختي اول يوم داوم بالمدرسة (صف اول ابتدائي) زميلة فكس عينة بالقلم وانت احسب وين وصلنا اليامرحلة اخوية ماكو مقارنة بين امريكا والعراق
-
اخي الغالي
صلي استخاره
ماخاب من استخار وماندم من استشار
وتوكل على ربك وربك مايضيع عبده (( يقول رب العزة انا عند حسن ظن عبدي بي ))
وهم اكولك اخذ اجازة سنة مو بدون راتب راح اكولك شلون يعني فالنفرض عندك خدمه 5 سنوات يعني عندك رصيد مال 6 اشهر يعني كل سنه 36 يوم هاي يحسبونه براتب تام و6 الباقيات بدون راتب يعني راتب ست اشهر هم راح يساعدك هناك لحد ماتوكف على رجلينك وتمشي امورك
بقت مسئلت زوجتك الله يحفظه بقت انت واسلوبك بالاقناع والتفاهم
الله يسهل عليك وعلينا
-
اخي العزيز,
انا اتفهم وضعك لان اكو نسوان خوافات بالبدايه تكلك لا ما اريد اروح ومن توصل تظل تلح عليك اريد ارجع اريد ارجع وانا صارت وياي بس بعد فتره من اعتادت الوضع انا مرات اشاقى وياها اكلها خلي نرجع تكلي لا انا تعودت هنا .
فنصحتي انت اتفق ويا زوجتك انكم تجون للمريكا لمده سنه وبعد السنه اذا ما غيرت رايها ورادت ترجع رجعها وداعتك وانا اضمن الك خلال اسبوع من رجوعها تكلك الله يخليك ما اريد ابقى بالعراق رجعني لمريكا .
وهاي النصيحه عن تجربه هواي من اصدقائي سوو هيجي .
اخوكم فالكون1982
-
اخي العزيز اني عضو جديد بالمنتدى واني تقريبا مثل حالتك هم امقدم واني اخويه هناك عايش بولاية نيو هامشاير وكل مااساله هناك شلون
عايش يكلي كلش مرتاح وديلح عليه تعال واني متزوج وعندي 3 اطفال وعندي وظيفة ومرتي عندهه وظيفة واهلي امي وابويه هم راح
يرحون بشس المشكلة مرتي امعارضة اتكول انروح عله شنو واعوف الوظيفة وهي متعلقة باهله مشكلو والله اخاف اروح اهناك وتحن ال اهلهه وتنلاص عليه ووممرتاح ذاك الوكت شتسوي وتكولي الواحد عله الأقل ايصيرله بيت ابغداد ويهاجر والله اني محتار مثلك وشسوي مااعرف الى
اصحاب الخبرة القديم بالنتدى
-
اخواني واخواتي السادة الاعضاء الكرام شكرا على ارائكم البيهة نوع من النصيحة الجميلة ورب الجلالة لو ما الحالات الامنية جان جبت الكول واحد هدية على نصايحكم الجميلة وبالنسبة الاخوية الغالي الاخير الي قضيته نفس قضيتي والي ايكول اني موضف وزوجتي موضفة وحاير احب اكولة تبقى نادم طول حياتك اذا متروح واذا اتروح هماتين خاف تندم المشكلة واحد من ايقدم ايصير بيه نوع من حب المغامرة وايريد ايعوف كولشي وايروح واحب اضيفلك شي اخي انه اني اريد اخلص من العراق بس مشكلتي زوجتي والمشكلة اني احبهة وما اكدر اغصبهة بس انته يمكن انته الي متردد من الموضوع وارجع واكول البيه خير ايجيبة رب العالمين وشكرا لكم جميعا
-
السلام عليكم
اخي العزيز مع احترامي لكل الاراء احب اقدملك نصيحة اخوية لان حالتك قريبة جدا من حالتي فاقول لك اخي توكل على الله ولا تلتفت الى الوراء لاني بصراحة لا ارى في مستقبل العراق شي يدعو للتفائل وما تراه اليوم ما هو الا غرور يغتر به البعض وادعوا من الله ان اكون مخطئ بتوقعي لاني بصراحة انظر لاسباب الاستقرار فلا اجدها فمن اين ياتي الاستقرار ( الجار سوء والشعب اصبح خانع وراضي بحاله والحكومة عميلة ) فمن اين ياتي التغير للاحسن فاذا اليوم هدوء فلا اظن هذا الحال مستمر ونسأل الله اللطف .
سلامي ودعواتي للجميع
-
اهلا وسهلا بيك بالمنتدى بس الله يخليك غير غير اسمك
و ثاني شغله السفر لامريكا جدا سهل لان مو على حسابك و شغله لخ روح وشوف الوضع واخذ اجازه سنه مخسران شي اعتبرها سياحه مع العلم اني ضد هذا المبدأ لان اكو ناس تتمنى بس توصل بس عسى ولعل تعجكم الحياة هناك وخلي ببالك ماطول عندك اطفال انت مرايح علمود روحك شكد ميكون عمرك اطفالك ثم اطفالك ثم اطفالك و ما اريد اقارن لان مئات الصفحات متكفي المقارنه بين حياة الطفل هنا وهناك و بس احب اكلك اي واحد مسافر لاي دوله بالخارج من الاقارب من تسأله على الحياة هناك راح يكلك صعبه لعد ليش ميرجعون :-X سوأل يطرح نفسه مو
فلتعتمد على اي شخص بهاي المعلومه روح وجرب حظك وغير حياة اطفالك لان همه امانه بركبتك و الفرصه تجي مره بحياة الانسان فلتضيعها
اختك تيولب
-
اني نفس حالتك ويااهل المنتدى القدامى واللي مسافرين بلكي اتجاوبونه عله نفس السؤال شنسوي نسوانه ماتقبل انروح هناك ايخافون
من الفشل واني اخويه هناك واهلي هم بس اني الباقي متعذب شسوي يااهل الخير وشلونهه الحياة هناك بلمريكا واويه ابولاية نيو هامشاير
كونكورد اويكول كلش زينة للعوائل واني متزوج وعندي 3 اطفال