ankawa
منتدى الهجرة واللجوء => الهجرة و واللاجئين => الموضوع حرر بواسطة: naseerx5 في 11:44 06/03/2013
-
بالحقيقة حاولت الاكي مثل ما يكولون الواهس انه اتكلم واخوض في هذا الموضوع واني متاكد انه قصتي اكو هواية قصص مشابهة لذلك اطرحهة للعبرة
طبعا اني مقدم من 2009 ولحد هذه اللحظة وبنجاح ساحق
عندي بنات اثنين واثناء الفحص الطبي اكتشفنة انه زوجتي حامل واجاني طفل ثالث والحمد لله ولكن منذ ان قدمت ولحد ما اكتشفت المشكلة او تفاقمت اني بكل لحظة وبكل يوم مر علية واني افكر انه شوكت راح اسافر وشلون بكل لحظة وبكل يوم من افتح عيني الصبح اذكر لحد ما اغمضهة الى ان صار هاجس اقرب للجنون لان تقريبا الحياة توقفت بالنسبة الي كمت اي شي ينطرح علية اقيسة مع السفر هل راح يناسب لو لا
اذا شغل جديد او وضعية جديدة , هملت البيت وهملت زوجتي وبناتي وصرت عصبي على اتفه شي يمر علية والضروف التعبانة في بغداد ساعدت على الموضوع لان شغلي تعبان جدا ويادوب كنت الاكي اجيب اكل لعائلتي فصار املي بالسفر
اني مع زوجتي على وفاق تام قبل مسالة السفر واعتبرهة حياتي كلهة واحبهة حب مو طبيعي وبالمقابل هية ايضاً ولكن مع التقديم بدت تكثر مشاكلي وياهة واني ما اعرف ليش تصورت انه هية الغلطانة واستمرت مشاكلي وياهة لمدة 4 سنوات الى صارت حياتي اشبه بالكابوس الى ان مرة اكتشفت انه هية تتصل باختهة تحظيرا لاجرائات طلبهة للطلاق من عندي , بهاي اللحظة انهاريت وصار عندي اقرب للانهيار العصبي لان حسيت احلى شي بحياتي راح يروح من عندي من اجل حلم لو يصير لو ما يصير وهية من شافت وضعيتي عرفت انه اني تغيرت وصحيت على زماني.
وراهة صارحتني انه هاي الفترة كلهة والمشاكل الي صايرة كلهة لان اني ممنتبه لعائلتي ورادتني انتبه واعواف الاحلام
وانه اعيش حياتي لان جنت دا اكل بنفسي ومأذي نفسي ومأذي عائلتي بسبب هذا الموضوع
والحمد لله رجعت حياتنة طبيعية بعد انه ردت افقدهم, نصيحتي لاخواني واخاوتي رغم انه نصيحة صعبة انه تعيشون حياتكم لان هاجس الهجرة خلانة نتقوقع وخطوة ما نتقدم للامام بسبب انتضار مجهول لو يصير لو ما يصير
اني بالنسبة الي بعد هذه المشكلة صار السفر شي ثانوي اتمناه بس ما عايش علمودة لان سعادتي الحقيقية مع عائلتي وزوجتي الحبيبة
مو بالسفر ونتمنى انه محد يحس بقيمة الي عندة بثمن غالي وانما يصحى على زمانة
اسف للاطالة ولكن حبيت اشارككم التجربة
اخوكم العبيدي
-
عــمي أنـــتـــه مـــنزل المــوضوع حتى أسويلنه مشـــــاكل عائلية :-\ :-\ :-\
شدعي عليك >:( >:( >:(........ههههههههههههه
قــريتــهم مـــوضوعك بالبيت حــتى اكللهم مو بس أني هيج
هالمرة أستــلمــوني حجي يمكــن الربيع العربي راح يصير بيتي ;D
عــاشــت أيدك أخوية والله يفرجــها عليك وعــلينه وعلى كل منتظر
تقبل تحيـاتي
ابو ســماني
-
عيوني الك ابو سماني
والله لو تدري شكد ندمان على 4 سنين ضيعتهة وسعادتي جانت كدام عيني
الحمد له على كل حال واذا الموضوع يضايقك عيوني الك امسحة بس ارسلي رسالة وتامر
-
لالالالالالالالالالا يـــا غـــالي
أخـــــــــوك 10 ســـــــــنين من عــمره هـــدر
و5 ســـــــنين للتوطــين راحـــت فدوة و3 بــلدان أفتر بيــها
بالعــكس هــاي نصــيحة طــيبة وجــزاك الله خــير
لأنــك حــبيت أشـــارك أخـــوتك بتجربتك
ابو ســماني
-
الله يكون بعونك اخوية ...احنة هم من بداية 2010 و لحد الان كلشي ماكو و حجيك صحيح ..صدك هذة الموضوع خاانة نتقوقع و كل شي نريد نسوي نقيسة علة السفر ..و تالي لابو علي ولا مسحاتة ...احسن نصيحة هو ان تعيش حياتك عادي و تنسة هذة الموضوع و من يصير عود ذاك الوكت يحلهة الف حلال
-
هوة بالحقيقة مو الف حلال ..
هوة حلال واحد سبحانه بيدة كلشي ..
تحياتي الكم
-
كلام حلو وبالصميم بس واللي عايش بدول الجوار وميكدر ايعيش حياة طبيعية ؟؟؟؟؟؟؟هاي شتحطلها واطيب
ليس لها من دون الله كاشفة الصبر والدعاء ماالنا غيرهم وانت يااخي الكريم صاحب الموضوع الحمدلله لحكت على نفسك وتصرفت الصحيح لانه فعلا اذا كانت الهجرة على حساب البيت والعائلة انعل ابوها هو اصلا احنا فكرنا بيها من اجل عوائلنا ومستقبل اولادنا
-
الى الاخ العزيز صاحب الموضوع
كل الي كتيته صحيح وعشت على هذا الحجي الحلو واني نفس حالتك صار همي بالحياه هو السفر وكثر المشاكل والعصبية الي عندي بحيث اني صار عندي ظغط من ورة التفكير والخوف من باجر بس اكلك احنة مو حقنة ايصير بينه ؟؟هيجي من تكعد وانت ببلدك ومتكدر تحمي نفسك واولادك احنة اتعلقنة بالسفر لان هو الشي الوحيد الي يخلصنة ويهدي نفسيتنة واني اهنيك واتمنالك الحياة الحلوة وية عائلتك ويارب اتسافر
وادعي من الله يفرج هم كل انسان متضايق وان شاء الله هاي الامور كلهه ازمة وتعدي وتصير اسوالف واني رح اصير مثلك وانسى مؤقتا فكرة السفر والله كريم
-
صحيح... لان اني لولا الي شفتة ماكان اتمنى اسافر
لان اريد ابنائي يعيشون حياة احسن من الي اني عشتهة بس الله عز وجل اعلم بالخير وين واني اخذت بالاسباب وقدمت بقت هية حكمته سبحانه وتعالى يوفقنة للي بي خير لدينة ودنيانا حتى وان كان في ما لا نحب
-
السلام عليكم اخويه العبيدي الورده
اني بس اكلك بارك الله بهل بنت الحلال الطيبه الاصيله بنت الاصول اللي تحملتك اربع سنوات انت مسويها ظلمه عليهم....
اخويه الغالي ... والله متسوا كل هذا التعب والمعانات اتركها على الله وعيش يومك ودير بالك على عائلتك لانهم
سندك واطفالك وزوجتك امانه في عنقك الى ان يكبرون ...وكل شوفه وكل ضحكه حلوه من البيبي تسوه ال.................. كلها اخويه العبيدى الغالي والله احنه الله رزقنه بحفيد اخر كل الاجراءات بعد ما كانت مكتمله حتى الامنبه ...والله والله ابدا ما اثر على حياتنه بالعكس فرحتي بالمولود الجدبد طغت على كل شيء بما فيها موضوع السفر وعندي كل ساعة وكل ضحكة تسوا الكثير الكثير ...وكل اللي يقسمه رب العالمين خير وبركه ... هو رزق متدري بأي ساعه يجي ...الله يبارك بيك انتيهت الى بيتك وعائلتك ...وبارك الله بزوجتك العراقيه الاصيله وهذا من عندي وسام التضحيه لهذه المرأة الصابره المضحيه وانشاء الله على عينها وعين الاطفال تشوف الخير والرزق والعافيه ... بارك الله بيكم جميعا والله بسهل امركم ويبعث لكم رزقا حلالا طيبا ..شكرا جزيلا على هذا الموضوع الرائع وهو بلا شك درس وعبره...
اخوك ابو علي
-
ربي يحفظك ابو علي ولا تتخيل انه ناسي وكفاتهة لان قبل الاربع سنوات هم تحملتني بضروف بس الله يدري بيهة
بالنسبة الي هسة اني سعيد
والله يقدرني انه اعوضهة على الي بذلتة علمودي , وهذا عهد علية امام الله
-
الله يبارك بيك اخويه الغالي ...تحياتي وتمنياتي لكم بالحياة السعيده ...وما وصيك بالزغير الله يحفظه ويتربى بعزكم انشاء الله
وحيا الله العبيد...
-
الله يكون بعونك اخوية نصير وبعون جميع الاخوة ويارب الفرج العاجل للجميع
عبالي بس اني هذي حالتي لكن واضح ان الكل يمرون بنفس الظروف بسبب الانتظار
الله كريم بلكي هانت وما بقى شي
وللامانة اقول ان كثرة متابعة عينكاوا هم سبب من اسباب التعب والاكتئاب
حاول تقلل من التصفح واقرا بس المواضيع اللي تشوفها ممكن تقدملك معلومة او تفيدك بعدين
هذا رايي طبعا مع احترامي لكل من في المنتدى
-
كلام حلو وبالصميم بس واللي عايش بدول الجوار وميكدر ايعيش حياة طبيعية ؟؟؟؟؟؟؟هاي شتحطلها واطيب
ليس لها من دون الله كاشفة الصبر والدعاء ماالنا غيرهم وانت يااخي الكريم صاحب الموضوع الحمدلله لحكت على نفسك وتصرفت الصحيح لانه فعلا اذا كانت الهجرة على حساب البيت والعائلة انعل ابوها هو اصلا احنا فكرنا بيها من اجل عوائلنا ومستقبل اولادنا
+1
حسبنا الله و نعم الوكيل
و الله يا أخي الحمد لله رب العالمين أنه الأمور بيناتكم رجعت مثل الأول و أحسن، و اللي صار هذا سبب حتى تقوى علاقتكم أكثر و درس مهم تعلمتو منه المحافظة على علاقتكم و أسرتكم، و عسى أن تكرهوا شيئا و هو خير لكم، و ماكو شيء بالحياة أهم من العلاقة الأسرية إلا العلاقة برب العالمين.
كلنا مرينا بهذه الظروف الصعبة و التوتر الأسري، و الحمد لله أنه ما زالت أسرنا متماسكة رغم الظروف القاسية و التوتر و القلق.
يمكن إحنا تعلقنا بأمل السفر أكثر من اللازم بحيث طغى هذا الأمل على كل حياتنا ، و هذا شيء غلط، لإن الإنسان لازم تكون نظرته متوازنة للحياة و لازم يقيم الأمور الجيدة في حياته و ما يضيعها في سبيل تحقيق حلم.
الحمد لله على نعمه الكثيرة
و الله يفرج الهم و الكرب عنا كلنا
-
الحمدلله حفظ بيتك من الخراب ، وكل من الهجرة الغضب وضغوط الحياة والله يااخوية احنا عايشين بنفس المشاكل
وكل منريد نقدم على شي خطوة بحياتنا نفكر بالسفر ،يمكن هاي الاعراض الجانبية للهجرة
موضوعك عبرة لكل الرجال ان ينتبهوا الى عوائلهم اكثر من السفر
اسال الله ان يمن عليكم بالالفة والمحبة وربي يسهل سفركم عن قريب ووتعيشون باحسن حال
ربي يعوض صبركم خير ويحفظكم واهل بيتك اجمعين
تحياتي وتمنياتي لكم بالتوفيق
اختكم سرب الطيور
-
طبعا احب اشكر اخواني واخواتي الي شاركو بالموضوع وبالحقيقة خليت زوجتي تشوف ردود الموقع على الموضوع وبالحقيقة دمعت عينهة لان المصيبة من تعم تهون وشفنة انه الكل ديمر بهالضروف,ويا رب يفتح عليكم من خير الدنيا والاخرة
نسال الله ان يوفقكماخوكم العبيدي
-
الله يكون بعونك اخوية نصير وبعون جميع الاخوة ويارب الفرج العاجل للجميع
عبالي بس اني هذي حالتي لكن واضح ان الكل يمرون بنفس الظروف بسبب الانتظار
الله كريم بلكي هانت وما بقى شي
وللامانة اقول ان كثرة متابعة عينكاوا هم سبب من اسباب التعب والاكتئاب
حاول تقلل من التصفح واقرا بس المواضيع اللي تشوفها ممكن تقدملك معلومة او تفيدك بعدين
هذا رايي طبعا مع احترامي لكل من في المنتدى
حبيبي موزارت انتة الك معزة خاصة والله يبارك بيك
تحياتي
-
اخواني الاعزاء المشكله باختصار هي مشكله نفسيه مثلا شخص عنده عائله ومستقر ومقدم على الهجره من سنه 2009 وفجأه يخابروك يكلولك انت لازم خلال 15 يوم اتسافر يعني يعني الشي البنيته خلال 30 او اربعين سنه لازم يتففك خلال 15 يوم واتروح الى عالم اخر تبدي من الصفر
هاي النقطه الي امرقه كل اصحاب العوائل
لكن صدكوني كل هاي البهذله والانتظار والصبر لا توازي لحظه اتشوف نفسك او احد من افراد عائلتك مقتول او مقطوعه رجله او ايده من انفجار او تشوف جهالك بلصيف ما يكدرون ينامون من حراره الجو والكهرباء مقطوعه وابو المولده معطل المولده مالته لو اخلاق اغلب العراقيين الحقيره والانانيه لو الحكومه التي تتفنن بقتل شعبها
امريكا بيئه امنه لاطفالك وزوجتك هذه اهم شي الي اقصده وهو الامان
اخوكم هيثم رقم الكيس 102 من 2009
-
لكم منا كل الاحترام والتقدير وبارك الله لكم وفيكم على موضوعك اللي ممكن ان يفيد اناس كثيره لكنها كاتمه وساكته وغير مركزه على اهمية العائله ولي بعد اذنكم مداخله بسيطه لو سمحتم .
ان موضوع قلقك وتفكيرك لايفسر الا بمدى حـــــــــــــــــــبك لاطفالك ولعائلتك ولاختنا في الله ( زوجتكم الكريمه العزيزه )
ولااضيف غير التالي - كان الله بعونكم جميعا لان كل العراقيين من وجه العموم وبدون استثناء تعبانين وقلقين لانهم من
الطبع الحنين الطيب الاصيل الناكر لذاته والحب لاطفاله وعائلته والمتفاني لتقديم الافضل لابناءه والتخطيط لمستقبلهم
وتاريخنا مملوء بالهموم والمشاكل عبر التاريخ فتجد شخصية العراقي متعبه ومنذ الولاده ولكن يبقى ابن العراق وبدون
مجاملات هو الاصيل ابو النخوه والشيمه ونسائنا ببساطه هم تاج على رؤوسنا ونسال الله لنا ولكم والجميع بالستر والعفو والعافيه
والثبات حين السؤال وبارك الله لكم وفيكم جميعــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــا .
-
الاخ Naseerx تحية طيبة
وقت جميل اتستمتعنا فيه بقراءة موضوعك والذي يضع الاصبع على الجرح فهذه خبرة حياة ونحن نشكرك على نقلها لنا لكيما تجنينا الوقوع في هكذا مطبات.
عن نفسي اقول : حذاري من الوقوع في هكذا مطب فسيكلفنا الغالي. الذين كانوا يذهبون للبحث عن الذهب كان معضمهم يصاب بحمى الذهب , اي وضع التنقيب عن الذهب وزيادة المحصول الهم الاول والاخير تاركين الاعتبارات الاجتماعية خلف ظهورهم وانا بدوري اقول ايانا والسقوط في حمى الهجرة , اي نعم هذا شيء نسعى اليه ولكن علينا ان نعيش ماتبقى لنا وكأننا نعيش للابد في العراق دعوا الحياة تستمر فتلك اللحظة (لحظة السفر) قادمة لامحالة .
إعمل لدنياك كأنك تعيش أبدا و اعمل لآخرتك كأنك تموت غدا
للامام عليًً عليه السلام
-
بداية الكلام اسئل من الله اني يحفظ جميع العوائل الكريمة من كل سوء ومكروه يارب وبالنسبة لموضوع السفر يعني هذا هدف الحياة واي شخص مايوضع هدف بحياته عذراً هذا شخص فاشل هدف الحياة يحتاج الى التضحية والانتظار والصبر والارادة . بالنسبة للخلاص من هذا الواقع الاليم حتى لو المجازفه بالنفس واذا فكرت البقاء هنا فهو الموت بالنسبة لي جربت طريق التهريب القجق مرتين فلم يفلح معي وهذا التجربة الثالثة من سنة 2011 ونقول الله كريم واذا فقدنا الامل من هذا الطريق ماكو غير طريق استراليا وعلى المحيط واكو مثل عراقي لو بالهدف لو بالنجف . اما عن شغلة السفر والتفكير احس نفسي مريض وماكو دكتور يعالجني بشغلة الهوس والتفكير في المستقبل القادم وكل الناس تعتبرنه عايشين بالاوهام والاحلام وهذا هو فايروس الهجرة الي صابنه بس شنسوي هل البلد محد رحم بيه لابذاك الزمن ولاهذا الزمن الطريق الوحيد هو الخلاص من هذا الواقع واحمد ربي انا اعزب وحر طليق وكم ضغطوا عليه الاهل والاقارب ازوج وماعرف شنو واستقر بس اني لازم اوصل لهدفي ان شاء الله وبناء حياة جديده بأذن الله