ankawa
منتدى الهجرة واللجوء => الهجرة و واللاجئين => الموضوع حرر بواسطة: Wingo في 01:00 10/04/2013
-
السلام عليكم و رحمة الله و بركاته:
هذا السؤال من أجل زوجتي الغالية لعل و عسى تقدر تصبر أكثر مما صبرت و تتحمل أكثر مما تحملت من القلق و المشقة و الغربة لحد الآن.
بعضكم يعرف انه إحنا من الذين عانينا كثيرا من تأخير منظمة الهجرة و موضوع إعادة التوطين إلى امريكا
في هذه الأيام تمر الذكرى السنوية الرابعة (4 سنوات) منذ مقابلة المحلفين الأولى في 2009، و أمنيتنا رجعت إنتظار قبل ما يتوقف الموقع بأسبوع.
و هذه الفترة من سجلنا بالأمم المتحدة في الأردن و حولونا إلى إعادة توطين في 2008 إلى اليوم كلها عدم إستقرار و قلق و ضغط نفسي رهيب علي و على زوجتي و معاناتنا بس الله العالم بيها، و زوجتي العزيزة ما تقدر تتحمل بعد و دائما حزينة و متضايقة، و الحمد لله على كل حال.
المهم السؤال هو:
كم واحدة من الأخوات إبتعدت عن أهلها أو عائلتها لمدة 6 سنوات أو أكثر أو أقل من دون أن تلتقي بيهم لمدة لا تزيد عن شهر إلى شهر و نصف (قصدي كل مجموع اللقاءات و الزيارات)؟
و ما هي الطريقة اللي قدرتوا بيها تتأقلمون مع الوضع و تتحملون و تتجاوزون هذه الفترة العصيبة و هل أنه بعد السفر إلى أمريكا الأمور تصير أهون و لو حتى شيء قليل و إلا تستمر المعاناة و تزيد؟؟
و لكم الشكر الجزيل
الله تعالى يفرج همومنا جميعا
و لا تنسونا في دعائكم
اخوكم
Wingo
-
الله يفرج همكم اخي العزيز ويارب بجاه هالساعات المباركة نسمع خبر سفركم قريبآ ( دعوة من غريب لغريب ) ويارب الله يستجيبها
وبالنسبة للامنية الي رجعت انتظار ان شاءالله يارب تكون امنية قبل السفر ابشر وتفائل بالخير
وبالنسبة لموضوع زوجتك فحقها يااخي بس شنسوي والله كلنا بهالحال انتظار وتعب ونفسية متدمرة واحنا هم بغربة من 2007 ليهسة ومعزولين عن العالم
بس شنسوي الواحد لازم يتأقلم ويصبر ولابد رب العالمين يجازي صبرنا خير وان شاءالله راح يجازيها لزوجتك على صبرها وياك كما جازه النبي ايوب عليه السلام وزوجته معه على صبرها وتفانيها واخلاصها
تحياتي اختكم
Emerald سورية
-
الله يفرج همكم ويعجل بسفركم يارب .الصراحه اني بعدني ماسافرت ولاجربت الغربه بس اكيد لكوني متزوجه بمكان بعيد عن عائلتي اشوف التلفون بيه فائده كبيره يعني اني التقي بيهم تقريبا بالشهر مره او مرات تصير مرتين بس الاتصال يهون عليه كلش هوايه وياحبذا لو تكون الاتصالات المجانيه صوت وصوره حتى تكدر تسولف ويه اهلها براحتها وتشوفهم وخلي تتصل حتى لو يوميه وصدكني هذا راح يخفف عليها هوايه والله ينطيها الصبر ويحفظكم ويفرجها علبكم باقرب وقت لان هم الانتظار والقلق يخليها تشتاق لاهلها اكثر .
بالتوفيق يارب
-
عليكم السلامة والرحمة
اولا حقكم وكل الحق معكم الانتظااااار صعب ومدمر ولكن اذا احنة الاب والام منضحي من اجل اطفالنة
ومستقبلهم لعد ليششش خلفنهاهم للقهر والمعانات !!!!!
اخي العزيز صااار سنة وشهرين من سافر زوجي واطفالي وحتى ماشاء الله اطفالي كبرواااا بعيد عن حضني
هل اني مجبرة احتمل كل هذي المعانات طبعااااااا مجبرة مدام شفت اطفالي مرتاحين وسعيدين بحياتهم
الجديدة ليششش مااتحمل احسن ما ابقيهم بالعراق وادمر مستقبلهم بنص الانفجارات والتخلف العلمي
من صبر ضفر يا اخي وكلة متحملة لجل عين سعادتهم الكل اهل واقارب واصدقاء ايكولون اشون متحملة فراقهم
كلهم الله سبحانه وتعالى انطاني صبر وانطاهم صبر الف الحمد الله
والله لما اشوفهم متفوقين بدراستهم كل تعبي ومعاناتي ايروح واحسن فعلا حققت انجاز وصبري
مراااح بلاش وان شاء الله الفرج القريب للجميع امينننن
اختكم/ ريد روز سابقا
-
اخويا العزيز اصور اغلب العوائل الي طلعو من بغداد يمروون بحالتكم اني من 2005 طلعت من بغداد ويا زوجي واطفالي
صحيح اول سنتيين كانت كثير قاسيه علينا او بمعنى عليه اني لكن بمرور الوقت اتاقلمت مع الوضع بحيث انا لم ازر بغداد منذ خروجي الى شهر السابع الماضي اول زياره لي ولمده عشرين يوم فقط فلا اتصور ان زوجتك لم تتاقلم الى الان لكن اخي الي يقلقها ومضوجها عدم الاستقرار
ورؤيتها للسنين التي تمر امامها دون تقدم هذا ينعكس على نفسيتها والطريقه يا اخي ان رغم معزه الاهل والاخوه والاخوات واهميتهم بحياتك
فعائلتك اتكون اهم ونتحمل ونصبر علمود اطفالنا رغم اشتيقنا الشديد لاهلنا واني ايضا من 2008 مقبولين توطين وفاحصين اربع مرات و الهاي اللحظه انتظر بسوريا بحيث لما انقبلنا توطين ابني الكبير كان في صف الثاني متوسط وهو اليوم المفروض اول سنه له بالجامعه شنو راي زوجتك
سلملي عليها وكولها والله حاسه بيها بس عائلتك اهم واذا اتحب اتكلم معاها فاني حاضره
اختك ام راما من سوريا
-
من 2006 مشايفة اي احد من اهلي بس نت و التلفون و صار الوحدة و اﻷنعزال جزء من شخصيتي و شخصية كل عائلتي و كل وقتي بلبيت و يم الجهال و تمر الساعات و أﻷيام كانها ثواني و هي اثقل من كل حمول و اوزان الدنيا محد يعرفني و ﻻ اعرف احد اﻷ ما قل او ندر حتى الجيران اتعودوا على وضعنا بحيث كل شهر او اقل تصعدلي جارتي تسال و تسلم بﻻ اي عتاب بس تطمئن شلنا لو بعدنا ساكنين .
اما الكأبة و الملل و التوتر و الوحدة الكل حاس بيها و يمر بيها و هو ينتضر السفر لو امنية و الخ من مراحل الجؤ و كلها ما كنا نعرف بيها مع اﻷسف و لو كنا نعرف كان رفضنا امريكا لكن قدر الله و ما شاء فعل و كل تأخيرة و بيها خيرة .
نصيحة ما اعرف اقدملك غير المودة و الرحمة بيكم و كل ما يمر واحد بأزمة ضوجة يهون علية الطرف الثاني و الصبر و الدعاء و الصﻻة ماكو احلى منها و ان امكن اطلعوا شوية غيروا جوا و ضلوا على تواصل مع اﻷهل من خﻻل النت و التلفون .
و ترة كلنا على هلمرار و ما عدنا غير رب العالمين شايفنا و حاس بينا و ياربي يعوضنا كلنا بما هو افضل مما شفنا من تعب و ارهاق و الخ .....
اما ما هو حجر ثباتنا و صبرنا لكل هلمرار هو مستقبل اﻷطفال و بس .....ﻻن وين نرجع و المن همة اهلنا الي هناك عينهم علينا و يكولون نيالكم و كل اﻷخبار بلتلفزيون تخبل مشكل يا لوز من انفجارات و غيرها من عدم توفر اﻷمان و فقدان كل الخدمات و غيرها و ما خفي اعظم و اﻷمراض و ألوبة ........
و ياربي سهل الكم سفركم و تنسون كل هلمعاناة
و ياربي يوم للجميع انشاء الله
و من يتقى الله يجعل له مخرجا و يرزقه من حيث ﻷ يحتسب
ياربي بحق هلكلمات ترزقنا السفر بأسرع وقت يارب .
-
عزيزتي رسيل والله انعصر قلبي من دااقره كلامج ومعاناتج يارب الله يفرج همج وتسافرين قريبا لاولادج بجاه هالاذان الديأن يمي
ويارب تفرج عليكم جميعآ خواتي والاخ العزيز وينكو وعائلته وعلينا يارب والجميع
تحياتي اختكم
Emerald سورية
-
أخواتي و الله أنا عاجز عن شكركم
و تألمت جدا لسماع قصصكم و معاناتكم
الله تعالى يفرج الكرب عنكم جميعا
راح أخلي زوجتي تقرأ ردودكم الكريمة و إن شاء الله هذا يكون مساعدة لها حتى تتحمل و تصبر أكثر مما صبرت و الله يريح بالها و بالكم
و الله ينعم علينا جميعا بالإستقرار و الطمأنينة
-
أخي العزيز الغالي وينكو , تحيتي واحترامي وتقديري لكم .
رغم ان دعوتك كانت للاخوات العزيزات من الاعضاء لكني وبعد قرائتي بتمعن لمل كتبن , فاضت روحي بمشاعر شجن وحزن عميق على شعبنا وما الت اليه ظروفهم واردت ان اكتب لاختي الكريمه كلمة وجيزة تعبر عما اختلجني من مشاعر اثناء قراءتي ردودهم الاخوية الرائعة :
( اذا أردت انا ان افتخر واتشرف بهذا الفخر لاحدا نسائنا فلا افتخر لمن تهيأ لها كل شيء من مستلزمات الحياة بكل انواعها وأعطيت كل ما تهواه وما تحتاجه وتريده من هذه الدنيا بضمنها رؤية اهلها واصدقائها واقاربها ومحبيها , لا والف لا , فليس لها عذر ان تقف امامي وتدعي انها نجحت بكفاحها على الحلو والمر مما تكابده وتعانيه ,,,,, اذا اردت ان افتخر يا عزيزي فسوف لن افتخر الا باختي العزيزة ( زوجتك ) ومن حذا حذوها , ويشهد الله على مشاعري هذه ,, افتخر بها اختا انتصرت على الدهر وما يضمه لنا من مرارة ونجحت في الانتصار عليه من اجل فلذات كبدها , اطفالها ,,,,
اقف لها بكل قوامي وهامتي احتراما واعتزازا وتقديرا , وارفع كلتا يدي لله سبحانه وتعالى ان يجازيها على صبرها بالخير الذي تحبه وما يرضي الله سبحانه وتعالى ويوفقها ويجعل هذه الايام ذكريات حلوة لها حين تمر وتنقضي بالفرج القريب العاجل بعونه تعالى .
-
اخي العزيز Wingo :
لن اتكلم عاطفيا فقد سبقني الاخوان والاخوات وقدموا ما يعجز عن وصفه اللسان فجزاهم اللله كل خير.. سأتكلم بالاستناد الى المنطق والتحليل والعقل والمستقبل.... فكر معي ما هي الخيارات المتاحة امامك:
(1) تستمر في معركة الصمود والجهاد من اجل حياتك وكرامتك وحريتك ومستقبل ابنائك.
(2) تتراجع عن المشروع وتعود الى العراق وتفتش عن وظيفة او مشروع في بركة آسنة وفاسدة ولا مستقبل ولا آمان فيها.
(3) تختار حل وسط بان تحدد مهلة للصمود ولتكن 2013 وانا على يقين بان الله رب العالمين سييسر السفر لجميع المنتظرين خلال هذا العام.
اخواتنا ونسائنا صبرن سنيين طويلة جدا على الغربة من اجل مستقبل الاولاد ... يعني اذا انت رجعت وصار شي لا سمح الله من يتحمل المسؤولية ... انت .. الزوجة... اللي نصحوك بالتراجع......
اخوي على الاقل اصبر هذه السنة فقط ولا تكن مثل ذاك الرجل الذي افطر في يوم 29 من رمضان وقال اني بعد ما اتحمل.. واصبح من الخاسرين.
اخوك المخلص نور الدين
-
عزيزتي رسيل والله انعصر قلبي من دااقره كلامج ومعاناتج يارب الله يفرج همج وتسافرين قريبا لاولادج بجاه هالاذان الديأن يمي
ويارب تفرج عليكم جميعآ خواتي والاخ العزيز وينكو وعائلته وعلينا يارب والجميع
تحياتي اختكم
Emerald سورية
شكرااا الك اختي العزيزة على دعائك وبارك الله بيكم وربي يحفظكم ويحفظ عوائلكم
الكم ولا اشوفون مكروه انه هو السميع العليم
-
رحمتك ربي
اخي العزيز wingo وزوجته الغاليه
يارب يفرج عنكم ويسعدكم ان شاء الله
اخي العزيز وزوجته الغاليه ولكل المنتظرين والفرج قريب ان شاء الله
نحن من الاسر التي انتظرت طويلا واكيد تعرفون قصتي وكثير من الاحداث التي لم تكتب على العام
ونصيحه من اختكم ويارب يهديكم ويصبركم مبقى شي ان شاء الله
تره اكثر العوائل مرت بالضروف التي تقاسونها ويمكن اكثر مع احترامي للكل
وهناك عوائل والله شاهد في سوريا تعاني الامرين ولكنها صامده ويارب يبارك بيكم وبيهم
اختي الغاليه
صبرتي هوايه واعرف الحسره الي بالقلب للاهل ولكن الذي تنتظريه ويارب بالقريب العاجل تبشرينه بكل خير والله امريكا تستاهل وبمجرد ان تصعدي الطائره التي تخرجكم من الاردن تشعرين بأنك قطفتي ثمار تعبك وتعب زوجك في سبيل مستقبل اطفالك وأمانهم
اخي العزيز واختي الغاليه
حاولي التواصل مع الاهل عبر الانترنيت وليحاول الاهل المجيء الى الاردن ولو لفتره بسيطه وأنا متاكده من انك سوف تشعرين بالتحسن
يارب يعينج ويصبرج ودائما فكري انه شغلتكم خلصت ومبقى شي وتره هي بلحظه تشوفين التغير ويارب للخير
اسفه طولتها عليكم بس اخويه wingo واكيد زوجته واطفاله ألكم مكانه عزيزه عدنه
اصبروا الله يخليكم والله مبقى شي
تحياتي ياغالين
اختكم ام شاهين
-
الاخ المحترم وزوجته العزيزه
اختي العزيزه انت صبرت هوايه وباذن الله وصلتوا لنهاية الطريق واحنه العراقيات صبورات ونتحمل لان الدنيا قست علينا وعلمتنا الصبر يمكن هسه تكولين خلص صبري بعد مااكدر صح وحقج لان الاهل مستحيل يتعوضون بس تسلحي بالصلاة والدعاءستخفف عنك الكثيروفراق الاهل صعب جدا وكلنا مثلج عزيزتي نعاني بعد ان كنا نزور اهلنا يوميا تغير الحال وصار فراق طويل لكن لخاطر اطفالنا يجب ان نصبر ونقدم المزيد من التضحيات حتى لايعيشون العذاب الي عشنابالعراق وصدكني يااختي احنه بسوريا وظروفنه صعبه جدا بس متحملين احنه كلنا اخوات وصديقات وحاضرين نقدملج اي مساعده ندعو من الله يسر سفركم باقرب وقت بجاه الحبيب المصطفى وتفرج عالجميع وتصير سوالف
(ان بعد العسر يسرا)
اختكم الملاك الاول
-
أخوتي و أخواتي و الله انا و زوجتي عاجزين عن شكركم
جزاكم الله بكل خير و رزقكم الفرج بعد الشدة
كلامك ساعدنا و ريحنا و أعطانا دفعة امل حتى نصبر أكثر و نتوكل على رب العالمين
الله تعالى يفرج همومكم و يجمعكم بكل إنسان غالي على قلوبكم و يسعدكم في الدنيا و الاخرة
-
اخي الفاضل Wingo
سوي حساب لزوجتك خليها تدخل عالمنتدى هم تسلي نفسها شويه وهم تتواصل ويه اخواتنا البعيدات عن اهلهن حتى يخففن عنها وان شاء الله كلنا ما نقصر ونتواصل وياها عالخاص ونحاول نخليها تنسى وتنشغل شويه.
واكيد لمن تشوف حال الاخوات الصعب اللي مفترقات عن اهلهن والاخت رسيل اللي الله يساعدها مفترقه عن اعز الناس اطفالها اكيد راح يهون عليها وضعها والله يصبركم ويفرجها عليكم بالقريب العاجل يارب
تحياتي
-
الصبر مفتاح الفرج
-
الصبر مفتاح الفرج
-
والله العظيم هذا الموضوع بالذات حرك الالم والحسره وحتى بجاني .. 7 سنوات مرت وانا بعيده عن اهلي وابني لم استطع رؤيتهم امي توفت وانا قبل موتها بيوم طلبت منها الدعاء لكي اراها ولكنها رحلت ولم استطع توديعها .تزوج ابني لم احظر عرسه سافر ابني لامريكا ولم اودعه . اتمنى ان اراه ولكن مابليد حيله انا وبناتي الاثنتين في المانيا الغربه قتلتنا الملل والكابه والتقوقع وعدم الاختلاط بالناس كل هذه الامور تدمر النفسيه وتحطمها ..النت وحده هو وسيلتنا للتخاطب مع اهلنا ..الله يساعدنا احنا العراقيين لان اغلب العوائل متشتته ومطشره كل جزء بمكان .. اخي صاحب الموضوع الله يكون بعونك وعون زوجتك والله يصبرها لان صدك شي يوجع القلب الله يسهل امركم ويعجل بسفركم امين يارب
-
والله العظيم هذا الموضوع بالذات حرك الالم والحسره وحتى بجاني .. 7 سنوات مرت وانا بعيده عن اهلي وابني لم استطع رؤيتهم امي توفت وانا قبل موتها بيوم طلبت منها الدعاء لكي اراها ولكنها رحلت ولم استطع توديعها .تزوج ابني لم احظر عرسه سافر ابني لامريكا ولم اودعه . اتمنى ان اراه ولكن مابليد حيله انا وبناتي الاثنتين في المانيا الغربه قتلتنا الملل والكابه والتقوقع وعدم الاختلاط بالناس كل هذه الامور تدمر النفسيه وتحطمها ..النت وحده هو وسيلتنا للتخاطب مع اهلنا ..الله يساعدنا احنا العراقيين لان اغلب العوائل متشتته ومطشره كل جزء بمكان .. اخي صاحب الموضوع الله يكون بعونك وعون زوجتك والله يصبرها لان صدك شي يوجع القلب الله يسهل امركم ويعجل بسفركم امين يارب
الله يكون بعونج اختي الكريمه وينطيج الصبر ويلم شملج باهلج واولادج بأذنه تعالى
-
تسلميلي اختي العزيزه ام اديان .. والله يبارك بيك وبعمرك ومايحرمك من كل عزيز امين يارب
-
تحية اجلال واكبار واحترام وتقدير لكل ام واخت وزوجه وووووووو...الخ وقفت الى جانب ابنها او زوجها او اخيها وصبرت وتحملت وعانت من الفراق اقول لها شكرا لصبرك شكرا لتحملك شكرا لصمودك والتزامك ...فلك في ذلك اجر عظيم ....وارجو ان تتأكدي بان زوجك او ابنك او اخيك لايقل عنك الما وتحملا للاذى ولكن ما باليد حيلة فهذا هو قدرنا في الحياة ويجب ان نقبل به شأنا ام ابينا وما لنا الا الدعاء والابتهال الى الله العلي القدير ان يجمع شمل الجميع بالخير والبركه انه سميع مجيب ...وارجو ان تتقبلو مروري لان الموضوع اثار شجوني ولم اصمد امامه الا بهذا الرد المتواضع اليتيم امام عظمة الموضوع لما يحمل من الم ...شكرا جزيلا ...
عمكم ابو علي
-
الله يفرج همكم ويعجل بسفركم يارب .
-
حبيبتى ام نور المنى كلامج كثير لان انى حاسه وعايشه هذه المعاناه الى انتى بيها ان مشايفه ابنى الوحيد من اربع سنوات وهو بامريكا مع ابو المريض بالسرطان وكنت مفارقه بنتى الكبيره ومشايفتها لاكثر من ست سنوات وهى موجودة بمصر وشفتها وتركتها مرة ثانيه
وبنتى الثانيه 3 سنوات وهى فى العراق فقط بنتى اللاصغر هيه معى فى الاردن وتصورى حجم المعاناه والالم لان كل واحد منهم اله همه ومعاناته اضافه الى هم الفركه والغربه وقهر المنظمه الى محاسه بالامنا ومعاناتنا منكول غير حسبي الله ونعم الوكيل على كلمن سوة بينا هيج والله يسهل امورنا كلنا ولم شملنا باولادنا كولوا امين
-
اخي المحترم wingo
اختي الغالية
(ان الله مع الصابرين)
احجيلك قصتي اني من سنة 2007 مشايفة زوجي هو بالسويد واني جنت بعمان وقبل 8 أشهر وصلت امريكا وسويتله لم شمل ودانتظر واصبر والله كريم من سافر جانو اطفالي اصغار وهسه كبرو بس منكول غير الحمدلله على كل شيء لأن كله رب العالمين كاتبه
اخي المحترم ماكو غير نصبر ونندعي والله يفرجها ان شاءالله
يارب تفرج عالجميع وينلم شمل كل العوائل
-
أخواتي العزيزات و أخوتي الكرام أشكركم شكر جزيل على كلماتكم و مشاعركم النبيلة
الأخت ام أديان ، زوجتي تدخل من حسابي و تسمع أخبار المسافرين تصير كآبة هالمرة تريديني أسويلها حساب هههه مو اخاف عليهم هههه ;D
الأخت أم^نور ، الله يكون بعونك و الله تعالى يفرج همك، قصتك أحزنتنا جدا، الله يعوضك خير في الدنيا و الآخرة و يجمعك بأمك المرحومة في الفردوس الأعلى.
الأخوات m.a.n و أمنا الطيبة، الله تعالى يفرج همومكم و يجمعكم بأحبائكم و يقر عينكم.
و الله اللسان يعجز عن شكر كل من ساهم بكلمة طيبة و بمشاعر نبيلة، أنا و زوجتي نحس بعظيم الإمتنان لكل من شارك.
أملنا بالله عز و جل وحده
و تبقى قناعتنا "إنّ الله مع الصابرين"
-
اختي العزيزه الام الطبيه تحياتي الج وكان الله في عونك.. والله اني مثلج مشايفه ابني الكبير صار اكثر من 5 سنين وسافر وظلت بقلبي حسره شوفته .قبل لجوئي لالمانيا اخبروني ان توطيني امريكا .ماشاء الله اولاد الحلال كانو كثر وكلمن كام يفتي براحته شعندج رايحه لامريكا وانتي عندج بنات متخافين عليهن الحياة صعبه هناك بصراحه اني خفت وصدكت طلبت تحويلي لالمانيا لان ابني الثاني بيها وياليتني ماحولت لان ماحصلت غير بس التقيت بابني الثاني الي مشايفته اكثر من 10 سنوات الحمد لله بس هذا الربح الي حصلته من روحتي لالمانيا وكان المفروض يلحكني الكبير حتى نلتم ولكن من كثر شكوايه من العيشه التعبانه والعنصريه والحياة الصعبه والاذيه الي مريت بيها .. سافر الى امريكا هلمره اني تشتت يعني قدري اشوف واحد بس من الاولاد .شحجيلج حبيبتي والله احسن الواحد يسكت ويتحمل ومائلناغير الله سبحانه وتعالى هو وحده يمدنا بالصبر لازم نتحمل نفارك احبابنا وماعدنا غير دموع العين والحسره بالقلوب والالم هاي كظيناها بس بجي والله ..حبيبتي الله يساعدج عل انتي بيه ويعجل بسفركم وينلم شملكم ويسهل امركم امين يارب تسلميلي اختي الطيبه وينطيج الصحه والعافيه ويشافي زوجج من مرضه باذن الله تعالى .. تحياتي الج اختي الغاليه ...
-
وينكو الغالي اشكرك على كلماتك الطيبه والله يسعدك دنيا واخره .ولزوجتك الغاليه اكوللها ميخالف تحملي واصبري ان الله مع الصابرين.. وان مع العسر يسر ..وانشاء الله يسر اموركم ويفرج همكم ويريح بالكم ويعجل بسفر الجميع انشاء الله
-
صدك جذب ليش هيج دا يصير بالناس عوائل كل واحد بمكان !!!!!!!!!!!!!!!!!!!!!!!!!!!!!!!!!!
الله يساعدكم ويارب تجمع العوائل المتشتته باقرب وقت
-
الله يبارك بكم أخت أم نور ^^ و الأخ Blue Falcon
اللهم آمين
-
السلام عليكم اخوان , ان شاء الله تكونون عل اتم حال؟
بصراحة مريت بالصدفة على موضوعكم الجياش وقْشَعر إله جسمي وهزني حتى الصميم , اني جديد عالمنتدى وماعرف قصص اغلبكم لكن يجمعني معاكم شي اسمه ألم الشعور واحساس الحنين , عجيب انت ياعراق ابا ينحر اولاده في احضان الوالدات ! , اني في بالي موضوع اللجوء واكو فكرة اقدم عليه فلذلك ارى مستقبل نفسي من خلالكم وشون راح امر بنفس المعاناة , لكن تعرفون شنو اكول لنفسي وإلكم اكوللها انت مثل واحد يريد يعبر شارع عام فاما يبقى بمكانه يراوح وميعبر الى الجهة الاخرى وميحقق شي او يريد يعبر ويوكف بنص الشارع الى ان يفلشه لوري او ينوي ويتوكل على الله ويعبر ويفوز , اذا قررت تعبر اعبر ! هكذا نحنا صرنا على ارصفة الطرقات يارجحنا القلق والحنين فالسبق السبق الى الهدف ولحظة ينتهي الالم ويصبح زمن المعاناة ضرب من ذكريات غابرة تغطيها رمال النسيان ! بالمناسبة تعرفون شنو ارحم وارق واعذب قلب على الانسان ؟! لاقلب حبيبتك ولاقلب ابوك ولا قلب ابنك ولاعمك ولا خالك ولاصديقك ! بلا جدال قلب الام : الام قلب الله في ارضه , الهي يسالني عن وجودك الملحدون ؟! فاجيبهم دليلي عليك قلب امي ونبضها ! .
قد يكون موضوعي مخربط ومابيه وحدة هدف لكن حقيقة حسيت بمعاناتكم وكتبت هاي الكلمات فتقبولها باحسان او ارفضوها بصمت.
لاتنظروا الى سنوات الصبر ولحظات الالم فان ذلك يزيدكم هما وغما بل انظروا الى لحظة الفرج في مستقبل الزمن ! فالدنيا لاتضيق على النبلاء الاّ ليفرجها الحق على نفوس الكرام.
اخيرا اكو حالة روحية تفرج الهم (طبعا اني مو ذاك الالتزام حتى ماصير ابو جاسم بروسكم ) وهي تسبغ الوضوء وتتوجه للقبلة وتفتح القران وتبجي الى ترتاح.
الله يفتحها بوجوهكم ياا هلنه البعيدين القريبين.
-
أخي الكريم
أشكرك على مرورك الجميل و على كلماتك الراقية التي أثلجت صدورنا
أملنا بالله عز و جل وحده و هو اللطيف الخبير
أسأل الله تعالى أن يوفقك في مسعاك و أن يسعدك في الدنيا و الاخرة
-
اخي الفاضل Wingo
سوي حساب لزوجتك خليها تدخل عالمنتدى هم تسلي نفسها شويه وهم تتواصل ويه اخواتنا البعيدات عن اهلهن حتى يخففن عنها وان شاء الله كلنا ما نقصر ونتواصل وياها عالخاص ونحاول نخليها تنسى وتنشغل شويه.
واكيد لمن تشوف حال الاخوات الصعب اللي مفترقات عن اهلهن والاخت رسيل اللي الله يساعدها مفترقه عن اعز الناس اطفالها اكيد راح يهون عليها وضعها والله يصبركم ويفرجها عليكم بالقريب العاجل يارب
تحياتي
اروع ااقتراح ... الله يديمك اختنا الغالية " ام اديان" صدق من سمّاك القناصة.
-
الله يساعدك