ankawa
منتدى الهجرة واللجوء => الهجرة و واللاجئين => الموضوع حرر بواسطة: mohanad.a في 20:13 24/09/2013
-
اخواني الاعزاء ان منظمة ال IOM منظمه انسانيه هدفها رائع ويمثل قمه في الرقي وقد قامت بأنتشال ومساعدة الالاف العوائل وتسهيل هجرتهم من العراق ومن كثير من دول العالم وليس لي اطلاع كبير في حجم الاعمال التي تقوم بها ممكن احد الاخوان يساعدني في توضيح اعمال المنظمه ولكن اريد ان اقول اليس من جزاء من يفعل الخير ان نشكره وهذا اقل شيء ممكن ان تقوم به من من الدول العربيه او الاسلاميه يقوم بما تقوم به هذه المنظمه تاخذ بيد العوائل المهدده ولتي تعيش في خطر (وحتى غير المهدده) لتوطينهم في بلد امين يأمنون فيه على حياتهم ودينهم وتدفع لهم جميع تكاليف السفر والفنادق والفحوصات الطبيه مع دفع ايجار البيوت السكنيه لعدة اشهر مع رواتب ماليه وهذا في نظري هو شي من الخيال والله اشهد اني لا اقول هذا الشي لا للدعايه لهذه المنظمه ولا لاي دوله تساعد في هذا الموضوع وليس هذا من شأني ولكن ارى ان من الواجب والحق ان نعترف بفضل هذه المنظمه وان نجازي عملها بالامتنان والعرفان لا الجحود والنكران وجاء في الذكر الكريم (( وهل جزاء الاحسان الا الاحسان)) وقيل ايضا من لايشكر الناس لايشكر الله \ من من الدول العربيه وحتى الاسلاميه تقوم ولو بجزء يسير مما تقوم به هذه المنظمه وهذا ليس انتقاد لهذه الدول ابد ولكن للمقارنه \ منظمه تتعامل مع الانسان كونه انسان بغض النظر عن عرقه ولونه وجنسه وديانته وشهادته ومستواه المعيشي سواء كان ذكر او انثى طفل ام شيخ طاعن بالسن او عجوز معاقه او فتاة الهدف هو تامين حياه كريمه وامنه لهم \ هذا راي الشخصي والذي دفعني للكتابه هو موضوع الف دفره بيكم IOM للاخ العزيز مهجر وافتخر وهو زميل احترمه واقرأ جميع كتاباته واكيد هو عانى ما عانى من صعوبات التقديم والاجراءات الصعبه والمؤذيه في بعض الحالات وانا اشعر بهذا المعانات لبعض العوائل علما انا ايظا من المنتظرين للسفر واسمع واقرا الكثير من معانات الاخوه والاخوات لسنوات طويله ولكن بالمقابل هناك الاف من العوائل سافرت وانشاء الله جميع المنتظرين يتم سفرهم وانا نيابه عن هذه الالاف المؤلفه من العوائل العراقيه اقول لهذه المنظمه شكرا والف شكر لكم فانتم تقومون بعمل رائع لايمكنني تصديقه حتى في الخيال وارجو من الاخوه والاخوات ان يبدوا اراءهم في هذا الموضوع واذا كنت مخطأ ام صائبا ومن الله التوفيق
-
هلا حياتي
انا من كتبت موضوع الدفرة ترا من باب الضحك واذا انت متابع قديم بعين كاوة كان اكو زميل لنا سابقا كان دائما يستخدم الف دفرة بيكم iom الاخ الكبير والعملاق اسطنبولي ولو علية عتب من راح لامريكا ماعدنا شفناة
فهو ظل يدفر بيهم الى ماهما دفرة لامريكا عاد ياريت يدفرونة هههههههه ونخلص
الحمد لله عندنا امل نخرج من العراق لو واحد بلمية افضل من غيرنا وانا لخاطرك راح ابدل موضوعي
اخوك ابو عادل
الف بوسة بيكم iom
-
اخ مهند كلامك كلش حلو.. مع اني اشوف آراء سلبية بالآي او ام وشفت قصص ناس ومعاناتهم بالانتظار والخربطه احيانا بس لازم نقر ونعترف انو الهجرة بهالطريقة متاحة للعراقيين ومو متاحة لهوايه ناس منكوبين من غير دول وهاي فرصة تقدم لحياة جديدة هوايه ناس يتمنوها ولو بيها اخطاء ولو بيها اهمال احيانا بس مع هذا الفرصة منحت لهوايه هوايه ناس ومن اجلها نشكرهم ودائما نتذكر انو لو ما مفتوح باب الهجرة للعراقيين جان العراقيين محد الهم ابداً وخلي نتخيل لو مموجودة الآي او ام النا شجان سوو العراقيين والمن يلتفتون
-
وهاي الف دفرة مني هههههههههههههههه ;D ;D ;D ;D ;D ;D ;D ;D ;D ;D
-
الله ينتقم منهمو يااا رب..
تحياتي
Eagle
-
تحياتي لك
شوف الردود على موضوعك الكل كارة الiom تعرف اخي
احنا نشكر الي سن القانون
ولكن ندفر موظفيى iom ههههههههه
-
دفره وحده بس اني ... ممكن ؟ بس على وجههم اريدها هههههههههههههه
تحياتي للجميع
-
http://www.youtube.com/watch?v=q3SFXQfE4kk
هههههههههههههههههههههههههههه
+1
-
اتفق معك في كل ماقلته عن الاهداف التي نشات من اجلها المنظمة لكن مااراه ومارايته من هذه المنظمة وعلى الاقل فرعها في العراق
1-فساد اداري غاية في السرية ردت اوكع على علتهم وماكدرت
2-لامبالاة مع قضايا تستحق السرعة ومبالاة وتسريع لناس لي معرفة شخصية بهم الباك كراوند مالتهم اسود وزفت وكانو منتمين الى اجهزة قمعية وكذبو وعدت وراحت مثل الزبد حاليا يوشكون على الحصول على الجنسية بالعافية الله يوفق كل عراقي لكن انا انتقد غباء هذه المنظمة
3-في مقابلاتهم اشوف الواحد مو خاضع لما يسمى مقابلة كونه اشتغل مع قوات التحالف ومتهدد بل -تحقيق-
4-الموظفون العرب فيها من اخس ماخلق الله في هذه الدنيا ولديهم احقاد وثارات كبيرة على كل ماهو عراقي دوافعها كثيرة يتطلب ذكرها الف صفحة
5-التركيز على غير المترجم وعدم وضع اولوية كبيرة له رغما انه كان الجندي المجهول الذي دفع عنهم وعن قواتهم الكثير من الشرور نتيجة سوء الفهم
6-الحاجة الى تغيير كوادرهم وجعلها عراقيين 100% خاصة ان الكثير من العراقيين اليوم مجنسين ولسنا بحاجة الى اردني او سوداني او مصري مجنس
7-عدم الصدق في التعامل وفي الردود
8-اساس عملهم انساني يعني همه ما مسوين فضل عليه ولا عليك بل ملزمين لتوفير فرص الحياة لعوائل او طوائف او اقليات تعاني من القتل او الاضطهاد الديني او العنصري
خلاصة الموضوع وراي الشخصي كمنظمة وكاهداف تستحق الشكر والاحترام لكن كاجراءات وموظفين فاسدة ولاتستحق سوى الدفرات
-
ردا ع الاخ اللي قبلي بالمطالبة بجعل الكادر عراقي...احب اكول اني ممقدم اي او ام ولا اس اي في بس تعلمت هواية من هالموقع وخطية اهلي مطشرين لكن اردني او اي عربي اخر هو كارهنا كارهنا بس اكو اميركان فوك راسهم ومنطيهم رواتبهم اما تجي للعراقي؟ ياخذ راتب من المنظمة تلكيه ولام كل كرايبه وعشيرته ...تعلمني بالعراقيين حتى هنا شيسوون والله يا اخي احن للعراق واحن احجي عراقي واني اصلا طلعت 2009 يعني مو هواية صارلي لكن من اشوف العراقيين باميركا تنسد نفسي من النفسيات...وارجع واكول لو خليت قلبت..بس اني تصدك مقريت كل نقاطك بس طفرت عيني ع انه الكادر لازم يكون عراقي...وتحياتي للجميع بهالموقع ودفرة بحكومات العراق جميعا سابقا وحاليا ولاحقا
-
ردا عععععععع اخ اللي كبلي ؟؟؟؟؟؟
مو كل اصابعك سوى ولحد الان العراقي ينحلف براسه بتقديمه العون والمساعدة للاخرين مهما كانت الظروف واذا نفسك دتلعب اخذلك فوار وصير امريكي ومالك علاقة بيهم واذا انت هيج رايك بالعراقيين شعندك بموقع يقدم الخدمة لاي عراقي دون معرفة مسبقة لعد شخليت للعراقيين اللي دتحجي عليهم ثم يااخي هم عراقيين رغم عني وعنك ويكول ابو المثل كل لشه معلكة من كراعها وهذا المثل تطبيقه ممكن جدا في بلاد مثل امريكا فليش تضلون واحد عينه على الثاني وميشوف غير عيوب اخوه
-
مو بس دفرة 1000 دفرة بيهم
وشرط بنعال لاستيك من هذا الي يوجع
اخوية صاحب الموضوع اريد اشوف اذا شحنوك مثلي 4 سنوات مثلي وضيعوا عمرك هم تدافع عنهم هيج ؟!!
ولمن يطلعون ناس شايفين الامريكان بس بالتلفزيون ويعوفون الناس الي اشتغلت وتهددت بسببهم من حفي احجي عليهم لولا
اخوان رجاءا ماكو داعي لهيج مواضيع مستفزة ترة والله والله والله كلوبنا خلصانة
-
الف شكر لك اخي صاحب الموضوع
وكل الشكر لهذه المنظمه الانسانيه العريقه
ونحن كلنا في رسائلنا نقدم شكرنا وتقديرنا لها
ومن خلال موضوعك القيم اريد ان اشكر كل من
فخامة السيد رئيس الجمهوريه
وسعادة السيد رئيس الوزراء
وسيادة السيد رئيس البرلمان
المحترمون نتمنى من الله ان يحفظهم للعراقين جميعا
نحن اختارناهم من داخل وخارج العراق في يوم الانتخاب ولا يحق لنا ان نتكلم كلام لا يليق مثل ما نرى من بعض الاخوه في المتدى
بمعنى ان الدوله لها كل المعلومات في طلب اللجوء وتختم جوازاتنا عند المغادره ولم يحصل تاخير بعكس ما كان يحدث في زمن التصفيق
عندما تسافر عن طريق التهريب والاموال والمخاطره والعقوبات الشديده والتي تصل بعض الاحيان الى الاعدام وها هنا اليوم يستلمك IOM
من بلدك ويصلك بأمان الى سكنك الجديد وانت لا تحرك جيبك ساكن هل يعز علينا كلمة شكر في هذا المنتدى
واخيرا اقدم شكري للجميع واعتذاري من الاخوه الذي يتناقض فكره معي
ابو الوليد
-
اخوان الف بوسة بس اتركو الموضوع
-
رد ع اللي الهجري ...ممتعارك فد يوم بالموقع بس اني احجي واقع ولو الواقع مالتنا زين مجان زين وطلبت لجوء وانهزمت مع انه الاكثرية بالعراق نعرفهم اهل نخوة وممكن يحموك من الارهاب وحتى فلوس ينطوك...لكن دائما السلطة وحتى بالمنظمات الانسانية لازم تصير محسوبيات وتصير بيد الموزينين ..فأنت عايش بحلم وواقع وردي مموجود...راجع نفسك وان شاء الله توصل باميركا وتشوف شلون الاختلاط بالناس الزينة بس هو الحل ..الا اذا حضرتك تحب تكضيها مساعدات واحتيال ...انطيك امثلة ...يسجل مرته مطلقه علمود المساعدات يحصلوها الطرفين...مرته تكتب حامل...يسوون حادث ويطالبون بتعويض...يحركون بيتهم التعبان ويطلبون من التامين تعويض..وغيرها ..وارجع واكول لو خليت قلبت لكن اني قصدت الواقع مهما كان مشاكلنا محد يحس بيها غيرنا بس والله لو ع عراقي جان هسه لو انت طالع من زمان وغيرك كاعد ينتظر لو اذا ماعندك عرف جان هسه طابك وتحلم بالسرة..
-
رد ع اللي الهجري ...ممتعارك فد يوم بالموقع بس اني احجي واقع ولو الواقع مالتنا زين مجان زين وطلبت لجوء وانهزمت مع انه الاكثرية بالعراق نعرفهم اهل نخوة وممكن يحموك من الارهاب وحتى فلوس ينطوك...لكن دائما السلطة وحتى بالمنظمات الانسانية لازم تصير محسوبيات وتصير بيد الموزينين ..فأنت عايش بحلم وواقع وردي مموجود...راجع نفسك وان شاء الله توصل باميركا وتشوف شلون الاختلاط بالناس الزينة بس هو الحل ..الا اذا حضرتك تحب تكضيها مساعدات واحتيال ...انطيك امثلة ...يسجل مرته مطلقه علمود المساعدات يحصلوها الطرفين...مرته تكتب حامل...يسوون حادث ويطالبون بتعويض...يحركون بيتهم التعبان ويطلبون من التامين تعويض..وغيرها ..وارجع واكول لو خليت قلبت لكن اني قصدت الواقع مهما كان مشاكلنا محد يحس بيها غيرنا بس والله لو ع عراقي جان هسه لو انت طالع من زمان وغيرك كاعد ينتظر لو اذا ماعندك عرف جان هسه طابك وتحلم بالسرة..
اخي العزيز
كل انسان له ثوابت وقيم وفي اي مجتمع ترى الصالح والطالح اني مو جديد عالغربة وادري وضع العراقيين بس راح اكلك شي مو على سبيل التفاخر مافد يوم انسان عراقي طلب مساعدتي وقصرت عليه بغض النظر عن وضعه او تعليمه او طائفته او مستواه الاجتماعي وهوايه ناس لاموني وهوايه خصرت بس الشي الحلو اني ماندمان والحمد لله ولا احب انتقد ابناء جلدتي لان مثل مكتلك كل لشة متعلكة من كراعها وامريكا مو عشاير ولا عمايم امريكا تاخذك انت فقط شخصيا بما ترتكبه وتجنيه يديك انت فقط ولا احد يحاسبك عن ما فعله غيرك لانه من ابناء بلدك والكل حر يفعل مايشاء شرط ان لايتجاوز على حريتك او كرامتك او حريات الاخرين وهذا السبب الحقيقي اللي ديدفع كل الاخوة والاخوات لان يطلبو التحرر من اشياء كثيرة اهمها التخلف والتعصب وبراي الشخصي العراقي يبقى اصيل ولو ان عصابة من هنا وعصابة من هناك تجعل حياة الجميع جحيم الا انه من الخطا ان نقيس الكثير من الطيبين وابناء الاصول والمثقفين بجريرة الاخرين وهذا ملا نستطيع ان نستوعبه وهذا مايدفع الكثيرين للهجرة
اخيرا احب ان اقول لك بان لا الامريكيين ملائكة ولا العراقيين ولا الصوماليين ولا الفرنسيين وارجوا سعة صدرك وان لاتاخذ الموضوع على منحى شخصي ولكن فقط اقول لك انه حتى في امريكا هناك فرق بين ان تنادي الشخص باسمه او تناديه ب this
عودة الى موضوع الاي او ام وتكلي محسوبيات الحمد لله اني من اللي ماكذبو واللي طابكين عالسرة 5 سنوات والحمد لله بالايام الاخيرة لبرنامج الاس اي في حصلت فيزا وبفترة قياسية والحمد لله تصدك اذا اكلك شخص سوداني قابلني مقابلة اولى بالاي او ام ونهر احد اطفالي وكام يصيح وكانه احنا عبيد ؟؟؟وبسبب انه رديته واشتكيت عليه وكتله انت متستحق ان تكون انسان مو تتوظف بمكان انساني وكان سبب بان يجعل مقابلتي مع المحلف 4 ساعات طلعت باليل اني وعائلتي كاتلنا الجوع وانتظر 4 سنوات و3 مرات فحص وبدون نتيجة كله pending فهل من العدل ان تحكم على دوائر وقع ظلمها علينا وتقول انا لست اي او ام او اس اي في
وارجو ان لاتفهمني خطا انا قصدت عراقيين مجنسين امريكي يعملون في هكذا مؤسسات دولية وليس لدى رئيس الجمهورية العراقية
-
هاي منظمة ال اي او ام لها كل الشكر والتقدير للغاية يلي انوجدت من اجلها ولو ساعدت انسان واحد فقط محتاج من اول ما اتاسست فبتكون عملت الكثير لان من احيا نفسا كانما احيا الناس اجمعين ( هكذا يقولون بالتلمود اليهوديّ). خبرة هذه المنظمة مع شعوبنا ولن اخصص شعبا بعينه تجعله يكتسب الكثير من الخبرات في كثرة محاولات الاحتيال والكذب الذي يشتهر به الانسان العربي- المنظمة كانت في بدايات تعاملها معنا منظمة انسانية فحسب لكن الكثير مننا يجعلون انفسهم لاجئين ومهاجرين لياخذو نصيب غيرهم من الاكثر استحقاقا وهذا بحد ذلك نذالة مننا فالبداية اذا مننا ايضا-
اين منظمة العالم الاسلامي لاتساعد اللاجئين المسلمين في الكثير من بلداننا؟ هل سكنت السعودية عائلة واحدة مهجرة من بورما او من العراق او من سوريا؟؟ مع انها تقدر ان تكون ملجا لكل المسلمين المشردين في العالم. اين باقي دول الخليج؟ كل ثرواتهم تكدست من فرق الاجر المعطى للوافد وبين مايعطى لاهل البلد على العكس من الدول الغربية. اين تركيا ايضا؟ رغم جحود هذه البلدان الا اننا كلاجئين نكن لهم كل الحب ( بلا سبب ) وحتى بعد ان نرغد بالحياة في دول الغرب نظل نحب هذه الدول الجاحدة اكثر من غيرها-
ماعلينا الا ان نشكر كل المنظمات الدولية التي لا تنظر الينا بحسب ديننا ولا بحسب شكلنا او لوننا ولكن بحسب انسانيتنا وليسامحونا ان اتهمناهم بالكفر او باي صفة قبيحة وليعذرونا لاننا هذا ماجدنا عليه اباؤنا وما نحن الا مقلدون