ankawa
منتدى الهجرة واللجوء => الهجرة و واللاجئين => الموضوع حرر بواسطة: عمر النعيمي في 20:09 06/10/2013
-
اسلام عليكم
اني متزوج وعندي طفلة قررت اهاجر عن طريق ال un بلبداية ردت اطلع ال تركيا
بس سمعت حاليا المواعيد الاولية من سنة فما فوق ف ترددت
وفكرت اروح ال عمان ااجر شقة فارغة بمنطقة الهاشم الشمالي بعمان الشرقية
لان كالو رخيصة من ناحية سكن ومعيشة
الي اطلبة من اخوتي الي بعمان اريد بس اعرف الموعد الي ينطونيا اول مااقدم
كم شهر
وتفيدني. عمان لولا
وشكد يكفيني مصرف وعندي زوجتي وبنتي عمرها 3 شهور
من ناحية سكن وعيشة ومصاريف طفلة وكولشي
ارجوكم محتاج رد سريع
ولكم الاجر
اخوكم عمر النعيمي
-
اخي العزيز
اكو كم جمعيه هنا بالمنتدى وبيه مشاركات كثيره جدا ممكن اتفيدك لان بيه تفاصيل كثيرة
بالنسبة لجواب الاخ ابو مصطفى ..
كلام الرجل صحيح ولا غبار عليه .. لكن الاخ يمكن كانت نفسيته متعبه من كتب الجواب وربي يكون بعونه و الجميع
الاردن اتصور الان بيه حسنات اكثر من تركيا فمثلا مقابلات اليو انفي الاردن اسرع لان العراقيين دينطوهم الان مواعيد بعد شهر ومرات اقل لان تم فصل مكان مقابلات العراقيين عن السوريين .
الاردن بالتاكيد غاليه و تتغله يوميا .. لكن ممكن اتسوي مقارنه بينه وبين تركيا اللي اعتقد هي الاخرى مو رخيصة ابد
مو شرط تسكن بعمان الشرقية .. ممكن تسكن بمنطقه مثل الزركة اذا كانت امكاناتك قليله .. ربي يكون بعونك
وممكن حتى بمناطق خارج عمان اخوه كثر يسكنون بمحافظات مثل اربد و غيره وهي ارخص من عمان بكل شئ.
حسب ما سمعت من صديق الان بالهاشمي اقل شي 200 دينار للشقه الفارغه " و الله اعلم " مو متاكد
العمل غير مسموح بي طبعا لكن اذا كان عندك خبره بمجال اختصاص او حرفة ممكن تحصل على عمل وبراتب " قد " يغطي ايجارك
راتب اليو ان تعذرني ما عندي عليه اي تفاصيل ... ممكن تستمر برفع الموضوع رح تستفاد من معلومات اكثر اكيد
-
اخويه اني عايش بالاردن بس بالزرقاء تبعد عن عمان نص ساعه
اخي من ناحيه الغلا فاحسبها من سعر البانزين عدناا الليتر ب 82 قرش ما يقارب 1.20 دولار
و من ناحيه السكن اني ساكن ب ارقى منطقى بالزرقاء و اسمها جبل المغير ادفع ايجار 260 شقه جبير 3 غرف و حمامات ثنين و مطبخ و صاله و بلكون) طارمه(
من ناحيه الشغل ف انتا و حضك ممكن تشتغل شغل بالشهر 1000 دولار و ممكن تشتغل بالشهر 100 دولار حسب الشغل
من ناحيه التعامل مع الناس لا تنطيهم عين و بالذات الفلسطينيه لانهم جوعانين اما الاردنيين و بالذات عشاير البني حسن ينحطون على الجرح يطيب
و من ناحيه اﻻمان مشالله الحمدلله على نعمه اﻻمن و اﻻمان
و اي استفسار اني جاهز
اخوك محمد الكرعاوي بالاردن من سنه 1995
-
اخي العزيز كل واحد وطريقة العيشه مالته يعني الاردن غاليه اكيد بس تكدر اتكيف حالك بيه ومهما تكون احسن من العراق العظيم بلد الحراميه واللصوص والمُعفنين واللي ميعجبه الاردن وغير الاردن خل يرجع للحضارات
-
خصم الحجي .. الاردن هسه غاليه واكو ارتفاع بالاسعار راح يصير هل ايام ؟. والملابس غلت غلاء مو طبيعي . بحيث انكس قميص صار اب 20 دولار قبل جنت انصح الناس يجون للاردن بس هسه مانصحهم . لان الجو بارد والي عنده اطفال او عائله لا تفيده هاشمي الشمالي ولا احمد علي .. بعد ماعرف والله اخي ماريد اضلمهه عليك انت تريد تجي هلا بيك . بس اول شي خليني اوضح لك كم نقطه ..
الوضع امان والناس تعاملهه تكدر دكول جيد .. اما من ناحية ايجارات البيوت شويه غاليه .. الملابس غاليه . الاكل رخيص الخبز رخيص . النفط والبانزين غاالياات ناار .. الجو حاليأ بارد بالهاشمي الشمالي المواصلات اكو متوفره على كل مكان .اسعار المواصلات زينه وسط ..
يعني حاليأ بالهاشمي الشمالي البيت الوسط تحصله اب 200 دولار .كل شهر . او 250 اما مصاريفك بعد ماعرف ..
السفر من العراق الى عمان يكلف ..
الفيزا 50 دولار .. الباص مال شركه الجت 50 دولار للنفر .طبعا باص حلو ومريح وتاخذ راحتك ومتحس بالوقت احسن من الجيمسي بس خساره فلوس لا اكثر . وتختنك بيهه انت والعائله . اما بالباص تاخذ راحتك . المهم .
خلي نكول الاكل 30 دولار .. انت واهلك . خلي نكول انتو 4 نفرات . الباص مدفوع والفيزا مدفوعه والاكل مدفوع انت وعائلتك واصل الحدود تقريبأ .. 450 دولار . مع دفع ضريبه الدخول مقدارها 30 دولار لكل شخص . تقريبأ 550 دولار انت داخل عمان .. بسلامه ان شاء الله اذا مشيت على مخططي اما اذا انت تريد تروح بالجمسي وحاب تتبهذل . تره خاف عبالك فرق بالوقت . ميفرق غير 3 ساعات لا اكثر .. لهذه انصحك روح بالباص كلش حلو ومريح وتدفئه وتبريد سواق اثنين وتلفيزيون وافلام كارتون للجهال . وبي حمام . فد شي يخبل .
اما من ناحية الـ يو ان .. طبعا اول متسجل باليو ان . وره شهرين او 3 يبلغوك انو انت نقبلت لولا . من تنقبل يقابلوك 4 مقابلات . ووراها بشهرين يحولوك على منظمة iom مو مثل قبل اطول لا هسه سريعه كلش . واذا انت ماعندك شي ومتضل تلف وتدور بالقصه الـ iom الحد الادنى بدون مشاكل 8 اشهر اما اذا تشيكات امنيه وسوالف تعبانه .. انت وحضك
تحياتي عمر العزاوي
-
وعليكم السلام ورحمة الله وبركاته
الأخ الكريم
شكراً للردود الكريمة
ألق دلوك في الدلاء تجئك بملئها ***** يوماً ويوما تجئ بحماة وقليل ماء
توكل على الله العظيم
وليكن سبب دخولكم الى الأردن للعلاج
ولتكن قصتكم التي تقدمونها للأمم المتحدة (( ذات صياغة جيدة ))
وفقتم للخير
-
أخي هذا الرابط بيه معلومات شوية على عمان
و بالنسبة لل يو ان مستحيل اي احد ينطيك الموعد مضبوط 100% لأن ناس شهر و ناس 8 شهور بس الوقت الستندر اللي ينطوه 3 شهور
http://www.ankawa.com/forum/index.php/topic,701565.0/topicseen.html
-
للرفع
-
اشكركم اخوتي والله خجلتوني بتعاونكم الية وبلنسبة للمعيشة اني كرايبي مدبرلي شغل يمة بالاضافة
يجيني وارد من بغداد بحدود ال 700 دولار
وعندي بس طفلة وزوجتي على كلامكم واسعار الايجار
اكدر ااجر شقة فارغة ب 300$
وعندي كرايبي يكدر يشتريلي اغراض مستعملة
بس ردت اسمع منكم لان اقاربي
عندة شركة ومستقر ف ميعرف امور العيشة بلشرقية
تكفيني هاي الفلوس لولا
واشكركم
-
السلام عليكم
اخوتي الاعزاء
محد رد علية 1000$ تكفيني عيشة بعمان اجار ومعيشة
وكولشي
لو لا واريد اعرف من اهل الخبرة
هسة عمان احسن من تركيا بلتقديم لو لا
تحيااااتي
-
اخويه العزيز انت شنو شغلك
اكيد انت من تجي لعمان ماتظل بس كاعد وتصرف اكيد راح تشتغل اذا تتوكل على الله وتشتغل
راح تشوف العيشه بسيطه وحلوه الغلاء اللي يحجون عليه اخواني واصدقائي هو غلاء بسيط جدا
ليس بمستوى مردود الشغل بالنسبه والتناسب وهي مرحله واليريد شي لابد ان يتحمل بعض المتاعب
اما بالنسبه للشغل اذا كنت صاحب مهنه فانت ايدك بالمي البارد صاحب المهنه هنا اذا ميعيش غني يعيش مستور
اما بالنسبه لتعامل الشعب الاردني ويه العراقيين اكيد يتعاملون ويه كل شخص حسب شخصيته اذا كان قليل الكلام
ومايدخل بما لايعنيه ولا نقاشات عقيمه فهو يعيش محترم ولا واحد يكدر يكله على عينك حاجب
وبعدين اللي يخاف من تجربة الحياة بالاردن شلون راح يكون عنده استعداد للحياة بامريكا او اوروبا
والقرار الك ياصديقي
اخوك ماجد البهادلي
في الاردن من سنة 1994
-
اخي ماجد اني شغل حر ماعندي مهنة
لان اني موضف حاليا ف احتمال يوفرولي شغل اداري
بشركة اهلية
بس اني شهريتي الثابتة 750 $
من خلال وارد يجيني من بغداد
ومااعرف اذا تكفيني
او لا
ومشكور على ردك اخوية
تحياتي
-
عيني اذا عائلتك زغيره مثل ماكلت يرادلك ايجار شقه اقل شي ب300دولار واكلك وشربك مايكلف 400دولار لان اني ساكن بمرج الحمام واذا تحب اني اخدمك واعتبرك اخويه اشوفلك يمي شقي تعال يمي وبصراحة بمرج الحمام كلش منطقه حلوه ورخيصه لان بيها الفواكه والخضار بالبوكسات حيل رخيصه ومرج الحمام قريبه على المفوظيه مال الامم المتحده بالتاكسي والله دينارين يعني بفلوسكم بالعراقي3000 دينار وبالصيف المنطقه تخبل لان حيل بارده ولا تسمع كلام الناس والله الاردنين زينين وتعاملهم زين واني سكان بمنطقه اغلبها عشائر ومرج الحمام تبعد عن عمان ماكو اقل ربع ساعه واكو سرفيس تروح للبلد بنص دينار اردني واكو باصات واذا تاخذ تكسي لوسط البلد ب3دينار اردني عمي خلي وياك واني بالخدمه وتعال واني اضيفك يمي ويه عائلتي لحد ما تلكه سكن والله وادلل واعطيك موبايلي اذا حبيت بعد شتريد واديلك بكل الطرق والمساعدات ومستعد اروح وياك والله وبالاجر والثواب واحنه كلنه اخوه وماكو فرق
-
اخي العزيز قبل ان تخطوا اي خطوه الى الاردن
اني صار اكثر من مره اسمع من اكثر من شخص انو التقديم للعراقيين راح ينسد بتاريخ 13-10
اني الصراحه مشفت الموضوع شوف عين , وهمين مشفت على الموقع , بس اكثر من واحد بلغني بهذا الشي انو حاطين قطعه , فياريت واحد يجيك , واني انشالله اذا الله سهل عكب باجر رايح حتى اخذ موعد تجديد وهمين اتأكد من هذا الموضوع واكتبلك خبر
-
اشكركم اخوتي على الرد واشكرك اخوية شمالي
والله متقصر رحمة الله والديك
واخي ياريت تتاكدلي من ال يو ان صحيح راح ينسد لو لا
ومشكورين مقصرتوا
تحياتي
-
اخي حاطين اعلان بس ما يقصدون يسدونها يقصدون انه المراجعات وطلب المواعيد والاستفسارات تكون من الموقع الثاني للمفوظيه يعني بنايه ثانيه اما قضايا المقابلات والتوطين والراتب كلها من مقر المفوظيه الرئيسيس اللي هو في دير غبار
-
اخي حاطين اعلان بس ما يقصدون يسدونها يقصدون انه المراجعات وطلب المواعيد والاستفسارات تكون من الموقع الثاني للمفوظيه يعني بنايه ثانيه اما قضايا المقابلات والتوطين والراتب كلها من مقر المفوظيه الرئيسيس اللي هو في دير غبار
\
اشكرك على التوضيح