ankawa
منتدى الهجرة واللجوء => الهجرة و واللاجئين => الموضوع حرر بواسطة: maltay في 13:55 18/02/2015
-
السلام عليكم إخواني وأخواتي الأعزاء
يا جماعة أني حايير لدرجة ومحتاج نصائحكم . هسه عندي الفيزة السياحية الامريكية متعددة الدخول ومدة إنتهائها راح أتكون في 2015/4/21 عندي نية من تخلص مدة الفيزة مالتي راح اطلب الفيزة السياحية لي ولزوجتي وأطفالي في القنصلية الامريكية في أربيل .. بس ما اعرف صرت متردد اخاف اطلب الفيزة بأربيل والقنصل يرفض الطلب لان وضع العراق بيها حرب .. وأخسر مبلغ رسومات الفيزة لعائلتي لان مثل ما تعرفون رسومات الفيزة غير مرجوعة سواء تم قبول الطلب او رفضها .. من ناحية أكول خلي اسافر بوحدي وأخلي أطفالي يم أبوية مع العلم عندي بيت ملك بصف بيت أبوية .. يعني أثناء غيابي عائلتي راح يكونون في مأمن وبهاي الحالة ما راح اخسر رسوم التأشيرات وبدال ما أخسر المبلغ والنتيجة غير مضمونة . أكدر بنفس المبلغ ويمكن أقل أحجز تذكرة السفر وأروح الى أمريكا يم ابن عمي اللي هو مجنس بولاية تينيسي .. ومن أوصل أتفق ويا محامي زين واطلب اللجوء .. صحيح راح أنتظر مدة طويلة لحين صدور النتيجة .. بس من خلال المستمسكات اللي عندي أني اشوفه يمكن أحصل ع اللجوء ..لأن عندي ثلاثة قضايا مرتبط بي يُبين حالتي الانسانية وبوثائق رسمية تشمل ( سوء المعاملة من الحكومة مباشرة - والاضطهاد وحرماني من حقي بسبب الطائفية الحزبية - والتهديد بالخطف والقتل عن طريق رسالة نصية ) ضدي وصادر من المحكمة .. وبالفترة الأخيرة شخص بالليل جاء الى بيتي لكن الحمد لله لم أكن في البيت وكان زوجتي وأطفالي يم أبوية . ومن دخلو بيتي ما لكوني .. قامو بسرقة مصوغات الذهبية لزوجتي و مبلغ لا بأس به .. وعلى هذا القضية أشتكيت ضد الشخص المجهول دون فائدة .. فيا اخوان حبيت أستشيركم ما هو نصيحتكم لي خاصة الإخوة اللي طلبو اللجوء داخل أمريكا . البعد عن الزوجة والأطفال صعب .. لكن أكول خلي أضحي بسنوات بعيد عن الأهل الى حين ان احصل على الإقامة الدائمة وبعدها اطلب لم الشمل . أما اذا تم رفض حق اللجوء . حين أذ أقول قمت بالمحاولات ولم افلح فيها.. وكل هذا في سبيل مستقبل أطفالي . عزيزي القارئ لو كنت في مكاني ماذا ستفعل .. أخواني أني احتاج نصائحكم .. ومن الله الموفقية . اخوكم ابو محمد ..
-
السلام عليكم اخي لو كنت مكانك لاستخرت الله سبحانه ولتوكلت باخذ كافة افراد العائلة وذهبت الى امريكا وطلبت اللجوء. فترة الانتظار صعبة جدا وممكن ما تتحملها والفراق صعب لان مو يوم ويومين ، لهذا اذا كانت عندك امكانات مادية جيدة توكلوا كلكم مع بعض. هذا رايي وانت بكيفك وانتظر بقية الاجابات.
-
اخي العزيز Ur Akkad أشكرك على ردّك الحلو ورأيك الصائب . بس خلي أوضح لك وللإخوة الباقين . أني موظف حكومي بإقليم كوردستان مثل ما تعرف رواتب الموظفين هسه صارت كل ثلاثة شهور . واني اخاف من القنصل في اربيل أكول لو يرفض الطلب راح اخسر فوك المليون ونص لان احنا ستة باالعائلة وكل واحد ١٦٠ دولار رسوم الفيزة ... بس اذا حصلنا الفيزة وراها ماراح يكون عندي مشكلة .. راح أبيع اللي عندي . ونتوكل على الله .. تحياتي لشخصك الكريم .
-
اخي برأيي ﻻتقدم كل العائلة على فيزة ﻻن مرات يجي رفض ﻻن ممكن يصير شك انكم تروحون وماترجعون. بالنسبة الك اذا عندك فيزة ﻻزم تسافر قبل متصير اكسباير حتى تثبت انك رحت سياحة مثل مذكرت عند تقديمك الفيزة وحتى متصير نقطة عليك انك استخرجت فيزة زيارة ومسافرت خلال مدة الفيزة. بالنسبة للزوجة واﻻطفال ممكن عند التقديم تقول زوجي سافر ﻻمريكا واخبرنا انها جميلة وقضى وقت جميل واحنا نريد نروح نشوف امريكا بعد عطلة المدارس واخذوا اثبات بيت ملك ورصيد بالبنك مبلغ زين واستعدوا للمقابلة. بالنسبة لخسارة المبلغ بقت يمك بس امريكا تستحق التضحية. محد يعرف امكاناتك المادية بس انت ومع ذلك ذهاب كل العائلة احسن من اﻻنتظار لفترة بس ربنا يعلم بيها. انتظر ردود اﻻعضاء
-
والله يااخي اني هم حاير مثلك بس ان شاء الله اذا كدرت احصل على فيزا سياحية مقرر اروح وحدي لان صعبه بهذلة المره والجهال بالغربه
-
اخي العزيز Ur akkad شكرًا على وقوفك وياي .
خلي أوضح لك حالتي .
أولاً أني فنان موسيقي مشهور بالمنطقة عضو نقابة فناني كوردستان . بالنسبة الفيزة أني سافرت الى أمريكا وبقيت هناك بحدود شهرين وهسه أني موجود بالعراق . المستمسكات اللي عندي بيوم بالمقابلة راح يكون كالتالي .
تأييد من جهة العمل كوني موظف حكومي .
سند العقار ملك بإسمي .
عقد زواج .
كل المستمسكات الضرورية للعائلة من هويات وغيرهم .
دعوة رسمية من ابن عمي . راح يُبين فيها انه راح يتكفل بينا بكل ما نحتاجه داخل أمريكا .
وصولات رسوم الفيزة كل فرد من العائلة .
الشي اللي ينقصني راح يكون كشف حساب مصرفي .. شدكول كفالة ابن عمي ما راح يكون بدل الحساب المصرفي . لان القنصل يريد يعرف شلون راح أدبر أموري .. مثل ما وضحت كل حاجياتنه راح يكون عند الأهل بامريكا والحمدالله هم كثيرين من اقرباء واصدقاء ومعارف .. فشلون اتشوف القصة اذا هيجي وبهاي المستمسكات رحنا ع المقابلة . اعتقد وجود فيزة سابقة موجودة على جواز سفري .. وجود دعوة رسمية من الأقرباء وكفالتهم لنا .. يمكن يقنع به القنصل .. احتاج رأيك والاخوة الأعزاء بالمنتدى .. وشكراً
-
لازم كشف حساب مصرفي وبيه مبلغ محترم هذا رأيي. انتو عائلة يعني يلزمكم مصرف لازم تدبر حساب مصرفي. تابع ردود اﻻعضاء الي استخرجوا فيزة من العراق او تركيا كلهم ذكروا انهم قدموا حساب مصرفي.
اختك اور
-
العفو اخت أور .. عبالي انت ولد
راح أسئل على كشف الحساب و الله كريم شكراً لكي على كل كلمة كتبتيها .
-
السلام عليكم
عزيزي ضروري انو يكون عندك وصل كشف حساب خاص ب اسمك من اي بنك
ويفضل انو يكون المبلغ قوي حتى يخدمك ويقنع السفير..
واذا ماعندك مبلغ مرتب تكدر تاخذو من اي شخص من المقربين منك ويثق بيك
تاخذه وتروح للبنك يودع الفلوس بحسابك وبعدها تسوي وصل كشف حساب وبعدها
مباشرة يسحب الفلوس من حسابك او تكدر ا ذا عندك ظف بالبنك عرف هو يسويلك وصل
كشف حساب بمبلغ مرتب...وبالمقابل اكيد راح يريدلة بخشيش..
اما بخصوص عائلتك ف الامر متعلق بيك وبزوجتك واطفالك أذا تكدر تصبر فترة من الزمن
بعيد عنهم ف اوكي اتوكل ل وحدك والعكس صحيح. ....
انا من رأيي الشخصي اكول حتى لو تكلفك مبلغ عالي وراح يروح بكل الاحوال بس من رأيي
خذهم وقابلهم بالقنصلية أحسن. ...يجوز اكو اجتمال انو يعطيهم موافقة
بس المشكلة لازم تكدر تحصلك موعد قريب بالمقابلات حتى اذا قال القنصل اوكي اعطيهم فيزة
يلحكون يجون معاك قبل ما تخلص فيزتك...
تحياتي
-
استاذي العزيز USA MUSTAFA LOVE شكرًا على مشاركتك بالموضوع .
أني اللي محيرني مواعيد المقابلات في اربيل .. يعني موقع حجز المقابلات صارت بلوة .. كل خمس دقايق اشوف المواعيد كلها حجز في حجز .... يعني ما تلكي موعد متاح بحيث نكدر نحجزه ... شي عجيب .... لعد شلون صارت المواعيد محجوزة .
وشى اخر عائلتي متكون من ستة أشخاص ( أني وزوجتي وأربعة أطفال ) وأطفالي كلهم صغار يعني بنتي الجبيرة عمرها ٧ سنين ... ومثل ما عرفت لازم أحجز ٦ مواعيد مختلفة يعني كل فرد من العائلة يرادله موعد منفصل من العائلة .. ومثل ما وضحت المواعيد أصلاً ما متاحة بالموقع ... ما أعرف شسوي .. يعني صرت مثل الحرس كل خمس دقايق أراقب حجز المواعيد أبد ماكو موعد متاح ..... شنو القصة الله أعلم ... أتمنى اللي عنده معلومة بحجز المواعيد للفيزا السياحية بأربيل أن يساعدني واني الممنون ... مع تحياتي للجميع
-
اخي العزيز اذا كنت قد نويت ان تقدم للجوء في امريكا بعد وصولك هناك فيجب عليك ان تاخذ بعين لاعتبار المدة التي سوف تبقى فيها بعيدا عن اهلك لان قبول اللجوء حسب علمي لا يقل عن سنة او سنتين اذا كان المحامي بارع في عمله , بعد الحصول على القبول في الجوء في امريكا فيجب عليك انتظار لكي تحصل على الكرين كارد ومن بعدها يمكنك ان تقدم معاملة لم شمل العائلة التي تستغرق في الغالب من سنتين الى خمس سنين او اكثر باختصار ستبقى بعيدا عن اهلك لمدة لاتقل عن 5 سنين ,اذا كنت ممن لديه الامكانيات المادية لكي تعيش مع عائلتك 5 سنين في امريكا فرائي ان تقدم لهم على الفيزة و اذا لا فلك ان تذهب لوحدك وتتحمل هذه الفترة
-
اخي العزيز اذا كنت قد نويت ان تقدم للجوء في امريكا بعد وصولك هناك فيجب عليك ان تاخذ بعين لاعتبار المدة التي سوف تبقى فيها بعيدا عن اهلك لان قبول اللجوء حسب علمي لا يقل عن سنة او سنتين اذا كان المحامي بارع في عمله , بعد الحصول على القبول في الجوء في امريكا فيجب عليك انتظار لكي تحصل على الكرين كارد ومن بعدها يمكنك ان تقدم معاملة لم شمل العائلة التي تستغرق في الغالب من سنتين الى خمس سنين او اكثر باختصار ستبقى بعيدا عن اهلك لمدة لاتقل عن 5 سنين ,اذا كنت ممن لديه الامكانيات المادية لكي تعيش مع عائلتك 5 سنين في امريكا فرائي ان تقدم لهم على الفيزة و اذا لا فلك ان تذهب لوحدك وتتحمل هذه الفترة
اخي العزيز شكراً على ردّك المفيد .. ما تقوله هو واقع .. وكل شي قسمة ونصيب .. جزاك الله الف خير ..
-
اخي نصيحة لوجه الله تعالى اذا عندك فيزة سافر قبل لاتصير اكسباير لان اذا قدمت انت والعائلة مليون بالمية تنرفضت لان اني قبل اسبوع قابلت باربيل مع زوجي وابني وكان عندنا دعوة من عائلة امريكية وايضا جوازنا فيه دخول الى امريكا وايطاليا والنروج وبلجيكا وايضا اخذنا معنا سند الاملاك شي في اربيل وشي في بغداد ولكن اول ماشافتنا القنصل احنة عائلة راسا رفضت بدون اي سؤال للعلم كان معنا عوائل اثنين ايضا انرفضوا وكانت الموافقة فقط للشباب فانا انصحك ان تسافر ولاتضيع الفرصة
-
اخي نصيحة لوجه الله تعالى اذا عندك فيزة سافر قبل لاتصير اكسباير لان اذا قدمت انت والعائلة مليون بالمية تنرفضت لان اني قبل اسبوع قابلت باربيل مع زوجي وابني وكان عندنا دعوة من عائلة امريكية وايضا جوازنا فيه دخول الى امريكا وايطاليا والنروج وبلجيكا وايضا اخذنا معنا سند الاملاك شي في اربيل وشي في بغداد ولكن اول ماشافتنا القنصل احنة عائلة راسا رفضت بدون اي سؤال للعلم كان معنا عوائل اثنين ايضا انرفضوا وكانت الموافقة فقط للشباب فانا انصحك ان تسافر ولاتضيع الفرصة
أختي العزيزة وفاء علي ... جزاك الله الف خير .. أتمنى لكي الموفقية في مسيرة حياتك ..
مشاركتك خلاني أفكر الموضوع بعمق .. يعني قرار السفر وحيداً صعب جداً عليه .. اذا يوم ما اشوف أطفالي أصير مو مرتاح .. وهسه اذا رحت وبعدت منهم الله يعلم أشوكت راح أشوفهم . يمكن اكثر من سنتين الى ثلاثة سنين . المهم شكراً على ردّك الجميل .