ankawa
منتدى الهجرة واللجوء => الهجرة و واللاجئين => الموضوع حرر بواسطة: مصرفي في 02:17 25/02/2015
-
اخوتي الاحبه مساء الفل وصباح الياسمين
اعتذر لان افتح من الموبايل ومدا اعرف وين وصلت بالجزء الاول هههه
اكمل حسب ما اتذكر بعد وصولنا الى نيوجيرسي وبسبب العاصفه الثلجيه الي بقتنا بيها لمدة يومين كعدونا الصبح جماعة المنظمه من وكت وكالو يالله امشو للمطار احنا وويان عائلتين والحمد لله اتوجهنا للمطار وهنا اريد ابلغكم بملاحظه مهمه بخصوص الوزن ( ابمطار بغداد خففو من الوزن لان كالو وزنكم زائد جدا وبصراحه اني اعترضت على الولد وكتله يا اخي مشينا قابل هي شنو كان جوابه مؤدب وكال ترى هناك بامريكا ما يمشوكم ) بصراحه في وقتها ما فهمته بس من رحنا انريد نسافر من نيوجيرسي الى ولايتنا شافو عدنا وزن وهم خففنا يعني ملخص الموضوع اخوتي الوزن مهم وترى مو بكيف المسافر يعني اذا عبر من بغداد مراح يعبر مناك
خلي اكمل الكم يا احبتي طرنا من مطار نيوجيرسي الى واشنطن دي سي طبعا طياره صغيره ام البروانه اتلعب النفس والصوت يدوخ وصلنا الى واشنطن ومناك طرنا بطياره اخرى الى هيوستن وطبعا من وصلنا شفت الكفيل منتظرنا والكيس ووكر ما موجود رحنا لبيت الكفيل ( هنا انتهى الجزء الثاني استكمل في الجزء الثالث )
ملاحظات عن السفر :
1. الوزن يجب الالتزام به لان اني اخذت وزن زايد واتورطت واحتاريت وين اشمر الاغراض وشنو اشمر
2. في عمان جماعة الترانزيت الطويل يكدر يروح للفندق على حسابه اذا على غير خطوط لان اذا نفس الخطوط همه مجبرين ياخذوك للفندق على حسابهم يعني اقصد اذا رحلتك الثاني على الاردنيه همه ياخذوك فندق بس اذا على الالمانيه او الفرنسيه او او على حسابك ومسموح قانونيا ومعليكم بموظف المنظمه لان يريد فلوس منكم
3. شنو تحتاجون سالو عن مكان المنظمه بالمطار لان عدهم مكاتب ومن واجبهم يساعدوكم يعني هذا عملهم وهذا واجبهم
4. ديروبالكم على الفلوس الي وياكم لان ويانا واحد خطيه ضاعت فلوسه او انباكت ما ندري بس المهم خطيه فقد فلوسه
5.قانونيا الفلوس المسموح بيها هي 9.999 لكل شخص اكبر من سنتين بس بشكل عام محد سال لان بصراحه اني جننت شايل اكثر ومحد سالني بس من توصل اول مطار في امريكا يسالك الموظف مال المنظمه فانت يكون جوابك اقل من عشره بكل الاحوال لان ترى محد يفتش وقانونيا المشكله بخروج المال وليس في دخوله الى اي بلد كان
6. خلي شويه عراقي وياك اخاف تحتاجه بمطار بغداد فقط يعني على كد جاي او كهوه او عصير وجبس للطفل
7. ابتسم تبتسم لك الدنيا هذا شعار مهم اتصور اخوتي بذكائهم فهمو قصدي
8. حب القانون والنظام راح اتحبك امريكا وهاي هم رساله اتصور مفهومه من اصدقائي
9. من توصل الى اول ولايه يحق الك تطلع طبيعي داخل الولايه لان جماعة المنظمه يكذبون عليك ويكلولك ما يصير ترى كذب يصير بس يخافون على اللاجئ يضيع
10. والله اخوتي هوايه عندي امور اريد احجيها بس من الزم الموبايل انسى هههههه
عموما اكو اجزاء هوايه ورا هذا ورجاءا اي سؤال اذا اعرف جوابه اكيد مراح اتاخر
واخر نقطه لازم تعرفوها انه احبكم جميعا وحتى الي يكرهني هم اجبه لان كافي هو انسان مثلي
اخوكم مصرفي
يتبع باجزاء اخرى
-
الف الحمدلله عالسلامه واتمنالك كل الموفقية والله يحبك ويكتبلك الخير بطريقك مثل متتمناه للغير .
وشكرآ للمعلومات المفيده انشالله نستفيد منها في القريب العاجل بأذن الله .
بأنتضار الجزء الثالث .تحياتي وتقديري
اختك هيا
-
شكرا على هاي المعلومات
-
ابو المصاررررررررررررررررف منور حبيبي
وعاشت ايدك ع التفاصيل الدقيقة والجميلة
ونحن بانتظار المزيد
والف مبرووووووووك السفر مرة اخرى
تحياتي
-
حمدلله علی السلامه والف الف مبروك نتمنالك حياه سعيدة
-
نشكرك اخ مصرفي على المعلومات ... ونتمنى التواصل وبالتوفيق انشاء الله
-
شكراً جزيلاً اخ مصرفي على هذه المعلومات وبالتوفيق
بس سؤال بالنسبة للوزن اني سامعة انو اذا اكو وزن زايد تكدر تدفع عليه فلوس وعادي يمشي هل هذا الشي صح؟
-
شكراً جزيلاً اخ مصرفي على هذه المعلومات وبالتوفيق
بس سؤال بالنسبة للوزن اني سامعة انو اذا اكو وزن زايد تكدر تدفع عليه فلوس وعادي يمشي هل هذا الشي صح؟
اهلا وسهلا
لا يتم قبول اي مبلغ على الوزن الزائد بالنسبه الى جماعة ال اي او ام ولا اعرف لماذا لاني طلبت ان ادفع الغرامه على الوزن ورفضوا
-
شكرا جزيلا جميعا
-
الف شكر على المعلومات وان شاء الله التوفيق بحياتك الجديده
-
والله عمي مميز ما صارلك فترة قصيرة وكاعد تكتب تحياتي الك واحترامي وتقديري واتمنة تستمر تكتبلنة
بالموفقية يارب
-
شكرا للموظوع الجميل
و روحك الطيبة
الله يوفقك