1
الهجرة و واللاجئين / مكاتب ترجمة المستمسكات في بغداد
« في: 21:13 23/02/2015 »
تحية طيبة للجميع / اذا مكن احد يساعدني ويدلني على عناوين مكاتب ترجمة المستمسكات المجازة رسميا والمقبولة من السفارة الامريكية في بغداد / مع اطيب التحيات
 |
|
|
|
|
|
يود موقع "عنكاوا كوم" اعلام زواره الاعزاء بقيامه تحسين خدمة تحميل الملفات في الموقع، حيث يمكنكم الان تحميل الصور والملفات الاخرى بسرعة فائقة جدا. كما سيتمكن الزوار بعد رفع الصور نسخ رابط الصورة ووضعها في مساهمته في المنتديات مباشرة.
رابط الخدمة الجديدة ...
http://uploads.ankawa.com/
عرض المشاركات
هنا يمكنك مشاهدة جميع المشاركات التى كتبها هذا العضو . لاحظ انه يمكنك فقط مشاهدة المشاركات التى كتبها فى الاقسام التى يسمح لك بدخولها فقط .
السلام عليكم
تحية طيبة من القلب الى جميع اعضاء منتديات عين كـــاوا
تحية خاصة لأعضاء اتشرف بتعرفي عليهم من خلال هذا المنتدى الاكثر من رائع
واسمحولي انه اتكلم معاكم بالعاميه لسهوله ايصال الفكرة لبعض الاعضاء
موضوعي اليوم هو رد دين لمنتدى ثقفني واسعفني وافادني وجمعني بأعضاء اكثر من رائعين
موضوعي راح يكون بخصوص تقديم IOM بغداد ... وبيه راح اخلي كل المعلومات اللي اخذتها من هذا المنتدى الرائع لعلي اوفي الدين اللي عليه وارد الخير اللي اجاني من خلاله
اول شي لازم نعرفه هو : منو اللي يحقله التقديم للهجرة من خلال منظمه IOM ؟
الجواب هو : أي شخص عمل أو تعامل أو تعاقد مع القوات الامريكية أو احدى الشركات الاجنبيه المدعومه من قبل الولايات المتحدة الامريكية وأللي استلم راتبه أو اجره من الجيش الامريكي.
بس نجي نوضح شلون ؟؟ مثلا موظف اشتغل ويه القوات الامريكيه او اي شركه او منظمه تابعه للولايات المتحده ... ياخذ منهم رسالة تزكية ال (recommendation letter ) ومن خلال هذي الوثيقه يقدم للمنظمه. زين هسه نجي نكول ... اذا واحد ما عنده أو فقد رسالة التزكية ... شلون ؟ الجواب هو انه يكون عنده ايميل او رقم هاتف من خلاله يكدر يتصل بقسم الهيومن ريسورس (HR) او المسؤول المباشر عليه. وراح تكولولي واذا ما عنده ؟ بهايه الحاله والامل الاخير انه يستعين بالاخوان هنا بالمنتدى انه ينطيهم اسم الشركة أو شخص كان مسؤول عليه ولعلى احد يكدر يساعده بهذا الموضوع . واذا مدبره ... ف عذراً اني لا اجامل مثل هيج ناس واحب اكول الهم انه همه ظلمو نفسهم قبل لا اي احد يظلمهم. وهيه مو نهاية الدنيا ,,, سافر لاي دول الجوار وقدم للجوء.
السؤال الثاني: هو كيفية التقديم ؟
طبعا التقديم من بغداد عن طريق الانترنيت عبر مراسلة الايميل IC@iom.int
زين حيجي واحد يكول شنو المطلوب مني انه ابعث الهم ؟
الجواب هو: اللي مطلوب منك بالتالي مثل ما موضح بالنقاط ادناه:-
1- ارسال نسخه من رسالة \ رسائل التزكية من الشركة او المسؤول المباشر. وكتب الشكر والتقدير والشهادات ( إن وجدت )
2- ارسال نسخه من الباجات.
3- ارسال نسخه من الجواز والمستمسكات الاربعه.
4- ارسال وثيقة تأكيد العمل اللي هيه VOE. وسيتم الشرح على هذي الوثيقه ادناه.
5- توضيح بالرساله عن المطالبة بحقك بتقديم اللجوء من خلال هذي المنظمه وانه ( حياتك في خطر وانته مهدد )
6- وسائل الاتصال المتاحه عندك , اقصد الايميل ورقم \ ارقام الجوال.
هذي النقاط بأختصار شديد
نجي نوضح نقطه مهمه جداً ذكرناها قبل شوية اللي هيه ( VOE ) اللي هيه (verification of employment )واللي هيه بالعربي .. وثيقة تأكيد العمل ... وهيه الوثيقه الاهم لضمان حقك بالالتحاق لبرنامج الهجره من داخل العراق وبيها ينذكر ايميل ورقم تلفون وفاكس وبريد للجهة اللي تؤيد عملك معاهم
وبعد ما ترسل هذي الوثيقه اللي هيه الاهم الى المنظمه ... هنا راح المنظمه تتأكد بنفسها من مكان عملك .. وبعدها ينطيك رقم قضية تسلسلي يدعى ( Case Number ) اللي هو بالعراق يتكون من 6 ارقام يترأسها الرمز IZ اختصاراً ل ( International Zone ) ويختلف رمز بغداد عن رمز عمان اللي هو JO)) وعن رمز سوريا ((SY وإلخ ولكل دولة رم خاص بيها.
بعد استلام الكيس نمبر راح تنتظر المقابلة الاولى . قسم تطول وقسم متتأخر. وسبب التأخير بأنه المنظمه تتبع انه يبدي التجييك الامني ( Security Checking ) من البداية وحتى قبل اجراء المقابلة الاولى . ومن يوصل التجييك الامني لمرحله انه يسمحلك بإجراء المقابلة الاولى المنظمه راح ترسلك ملف وورد ( Microsoft Word File ) والاسم المتداول عليه بالمنتدى هنا هو الفورمات ( فورمة المعلومات ) . وبالفعل هيه عباره عن فورمه تملي بيها معلوماتك ومعلومات عائلتك. وما بيها اي صعوبه .. وتجي باللغتين العربيه والانكليزيه .. وانته اختار الي اسهلك.
وهنا يجي سؤال, وهو: منو الاشخاص اللي يحق لصاحب التقديم الرئيسي بشملهم باللجوء وياه؟
الجواب هو , الاقارب من الدرجه الاولى واللي همه ( الاب , الام , الزوجه, الابناء, والاخ والاخت وازواجهم وابنائهم اللذين دون سن ال 21 سنة.
وبعد املاء الفورمات وارسالهم ( واللي اني انصح أملائهم وارسالهم بأسرع وقت ) يتم الاتصال بيك من المنظمه \ عمان لتحديد موعد المقابلة الاولى.
الكثير يخافون من يسمعون مقابلة .. بس للعلم المقابلة الاولى هيه مقابلة للتعرف على المتقدم لطلب الهجره وعائلته إن وجدت. ولمعرفة سبب التقديم للهجره والسبب الاكثر هنا يجي هو الظروف الامنيه اللي يعاني منها صاحب الطلب.
اخوان نصيحة مهمه جدااااااااااا اخذو الكلام هذا مني واحفظو زين , اني احب الناس الاذكياء, اللي يعرف شلون يتكلم بالمقابلة ويكون ( مرتب ) قصته ( قصة التهديد ) وما يعقدها على نفسه, بس بالتالي اني ما اكول اكذبو , ولا اكول احجو الصدك كلله , الافكار اللي عند الاميركان الها بعد ابعد مما نتصوره احنه, يعني انته تكذب كذب مصفط , اهون مما تحجي الصدك المخربط , او الكلام اللي غير منسجم وغير منطقي وغير مرتب, يعني كون ذكي ( ورتب امورك )وخليك كلك ثقه من تدخل المقابلة لانها راح تكون اول خطوه بقبولك للهجره. يعني اكتب احفظ ادرخ . واكتبو كولشي واحفضوه مثل القصيده و لا تستهينو بالكتابه ورقه وقلم كولشي واهم شي التوايخ وهايه الامور مبيها مجال للخطأ . لان كلامكم اللي راح تكولوه بالمقابله الاولى راح تنسألون عليه بالمقابله الثانيه ( مقابلة المحلفين )
طبعا المدخل للمنظمه كل فتره يتغير , ومن يجيكم موعد المقابله اذا مفتهمتو من العنوان اللي يجيكم بالايميل اكتبو موضوع هنا بعين كاوه والشباب مراح يقصرون ابدا وياكم.
المقابلة الاولى بالنسبه اللي اني طولت 7 ساعات تقريباً. وهيه اطول وأسهل مقابلة تشوفوها بخلال مسيرتكم ويه المنظمه. وما بيها اي قرار يتخذ في حق طلبك
هنا راح تنتظرون لفتره لحين ما يتم استدعائكم للمقابلة الثانيه , والسبب ايضا التجييك الامني لقبل مقابلة المحلفين , والفتره غير ثابته وغير معروفه ابدا, لأسباب يطول شرحها. بس اول وتالي راح يتصلون بيك عن طريق الايميل او الهاتف لتبليغك بموعد المقابلة الثانيه ( مقابلة المحلفين ) واللي هيه المقابلة الحاسمه , يعني انته لو جنت قاري زين بمقابلتك الاولى وبعدك حافظ اللي قريته , مقابلتك متطول نص ساعه ... بالنسبه اللي ما طولت 20 دقيقه. اما اذا اختلفت اقوالك بين المقابلتين ؟ ف الرفض لا سامح الله راح يكون هو ردهم لمقابلة المحلفين.
خليك واثق من كلامك , لا تنفعل , اتصرف بهدوء , كلامك خليه منطقي , لا تكثر من الكلام وبالتالي راح تفتح عليك وابل من الاسئله اللي انته بغنى عنها. غير هايه النقاط ماكو, اذا تلتزم بيها , القبول والسفر لا محال.
وبعدها وغالباً خصوصا هذه الفتره يتم تحديد موعد للفحص الطبي بعد يوم واحد من مقابلة المحلفين ... وهو بمكانين معتمدين لدى المنظمه ( مستشفى ابن البيطار أو مستشفى بغداد الاهلي )
وبعد الاجرائات الاخيره تكون انتهت مهمتك,وهنا تأتي مؤشرات القبول أو التعليق ( الملفات قيد الدراسه ) او الرفض لا سامح الله.
علامة الرفض: انه يجيك رد من المحلفين برفض القضيه بأقل من 20 يوم. وبعدها تكدر تعمل الاستئناف ( وهناك مواضيع كثيره تعلم الاعضاء طريقة الاستئناف )
علامات التعليق: بقاء حالة مقابلة المحلفين ( فعال ), شيئ مؤلم انه للمترجمين الحصة الاكبر من التعليق ... ربي يفرجها عليهم وبالاخص الاخ ابو الحكم ( جار الانتظار سابقاً )
علامات القبول هي نقطتين:-
اكتمال خانه المحلفين وتغييرها الى ( مكتمل ) (Completed) وبالتالي ايضا تتحول حالة الملف الى Pending Result (بانتظارالنتيجة)
الاتصال بالكفيل ( إن وجد ), وبعدها نزول المدينه والمطار بالملف.
وبعدها استلام نتيجة المحلفين بعدحوالي 90 يوم ( قبل كانت 60 يوم ) ولكن بسبب الضغط على المنظمه اصبحت الفتره طول ,واللي هيه يتم استلامها غالباً بعد حصول النقطتين اللي ذكرناها بالاخير. راح تكون نوعين وهما:-
الموافقة المشروطة بالامنيه (Deferral letter) وهيه الشائعه ولها النسبة الاكبر من القبول
الموافقة الكامله ( وهيه نادرة الحصول )
النوع الاول يتم سفر مقدم الطلب بعد اكتمال الامنيه, اما النوع الثاني فأنه يكون تحت المراجعات الاداريه فقط وبعدها يكون على جدولة السفر.
اما عن اصحاب الموافقة المشروطة بالامنيه, واللي همه حيسافرون بعد ما تكتمل امنيتهم انصحهم بأنه يراسلون المنظمه اسبوعيا ويبلغوهم دوماً انهم متعرضين للتهديد. لضمان انه المنظمه متنساهم ويبقى دائما ملفهم على الطاولة ولا يهمل.
وهنا نجي موضوع ثانوي لا يقل اهميه ابدا عن ما سبق من كلامي
هو كيفية مراسلة المنظمه ؟
اكثر الاعضاء هنا اشوفهم يتداولون انه المنظمه تجاوبهم كوبي بيست !!
يعني هل انه من المعقول منظمه دولية موظفيهم يراسلون كوبي بيست ؟؟
طبعا غير معقول... والحقيقه انه المنظمه لديها سستم الكتروني لأرشفة الرسائل .. والاولويه للرسائل المنظمه عند ارسالها كالتالي, يعني مثلا تجي تريد تراسلهم , اني ما عليه بمضمون الرساله , بس الاهم منه هو موضوع الرساله, واللي هو لازم يكون بنفس صيغة جوابهم على رسائلنه, يعني مثلا لازم يكون موضوع الرساله كالتالي:-
IZ-XXXXXX / Family Name , Full Name / Urgent
يعني مثلا لو اسمك احمد محمد علي العبيدي والكيس نمبر مالتك IZ-123456 لازم يكون موضوع الرساله كالتالي:-
IZ-123456 /AL UBAIDY, Ahmed Mohammed Ali / Urgent
وهنا ضفنه كلمة أرجنت ( يعني طارئ ) لحصول ايميلكم على الاولوية للرد عليه لان مثل ما ذكرت انه السستم المعتمد لدى المنظمه هو سستم الكتروني يعطي الاولوية للرسائل الوارده لديهم حسب موضوع الرسالة.
والى هنا انتهيت بتقديم لحضراتكم كل ما عرفته من خلال منتديات عين كاوه, لكن هنا كلام بيني وبينكم هو انه لحد يعتب على المنظمه انه أخرت ملفه وما سفرته وهو خله قضيته تمر بنقطة ضعف... وهيه متعددة مثلا:-
1- الربط القوي (Strong Bond ) واللي هو يكون بين الملفات ربط بحيث لو كل الملفات تسافر لو لا ... وهنا راح يصير اختلاف بأكتمال الامنيات وبالتالي لو اكتملت امنية قسم منهم والاخر اثناء انتظار اكتمال امنيتهم اصبح اكسباير بالامنيه. وهكذا تصير معاناة. فلا انصح به نهائياً. وانصح بتحويل الربط الى ( Soft Bond ).
2- عدم مطابقة الاقوال بين المقابلات الاولى والثانيه.
3- التعذر من حضور المقابلات, وبالتالي راح يعتبرك شخص غير مهتم بالهجره.
4- اهمال مراسلة المنظمة اسبوعياً.
5- كل يوم اضافة شخص أو الغاء شخص من الملف .
وبهذا اكون قدمت افرغت ما بجعبتي من معلومات لأضعها بين يديكم عسى الله ان يسهل امر سفركم ويوفقكم
وبنهاية موضوعي احب ان اشكر الاخ ابو الحكم ( جار الانتظار ) لتشجيعي لكتابه هذا الموضوع داعياً الله عز وجل ان يسهل أمره ويسرع سفره .
والموضوع قابل للنقد وتصحيح اي معلومه قدمتها وما نيتي إلا الفائدة العامه لأعضاء هذا المنتدى الاكثر من رائع.
اســــألكم الدعــــــاء
تحياتي لكم
اخوكم ومحبكم
أبــو محمـــد
