5
السلام عليكم جميعا،
هليوم قابلنة المحلف و خلي احجيلكم عالتفاصيل:
وصلنا حوالي ساعة 7:25 و انتظرنا حوالي نص ساعة بالقاعة الخارجية الى ان فوتونا للقاعة اللي بالطابق الاول. اول ما فتنة سجلنا اسمائنا وبعدها ب5 دقائق صاحونة نوقع على اوراق. بعد ما رجعنا نكعد كالوا اللي وقعوا عالاوراق يتفضلون للقاعة اللي بالطابق اللي فوك. جان بالقاعة حوالي 10 كيسات بين عوائل و عزابية. فد شوية كاموا يصيحون اسم اسم، اخذوا اول شي الاوراق مثل الجوازات و الهويات و دفتر الخدمة وراها يطلبون من الناس الدخول لغرفة المحلف. طبعا جان اكو ورقة عالحايط مال استلام الظرف والتاريخ هو 5/9 ساعة 9. احنة فتنة حوالي ساعة 9:45 وكان المحلف شاب عندة لحية خفيفة. اول شي حجالنة على تفاصيل المقابلة و شنو الغرض منها و بعدين طلب من عدنة نوقف نحلف. اول شي كام يسال زوجتي الاسئلة العامة مثل الاسم و العمر و الدراسة و هالسوالف، وراها اجة دور اسئلة النعم او لا اللي موجودة بموضوع اخونة عكعك وراها طلب من الباقين المغادرة و بقاني وحدي. اول شي بلش بالاسئلة العامة وراها اسئلة متعلقة بالقضية مالتي، هو ما سال اسئلة كلش هواية يعني الاسئلة بثاني مقابلة بال اياوام و بمقابلة التوطون جانت اكثر، احتمال بس جان دا يريد يتاكد من تطابق الاجوبة. بعدين حول على موضوع العسكرية وهمينة جانت الاسئلة مختصرة: شوكت خدمت، شوكت تسرحت، صنفك، التدريب، اسم المعسكر، البدل شكد جان، حتى ما سالني على الاحتياط. بعدين سالني اذا جنت منظم للبعث و اذا احد حاول يظمك للبعث. وراها سالني عالوضع العام في العراق واذا تعرضت لمضايقات و ليش ما تكدر ترجع للعراق او تبقى بالاردن. يعني بشكل عام المقابلة جانت مو اسفزازية و المحلف عبالك جان بس دا يريد يتاكد من المعلومات اللي ذاكريهة بغير مقابلات. المحلف جان كلش جديات و ماكو اي تعبير على وجهة بس ابد ما حاول يستفزني مثل ما ذكروا البعض بمقابلات سابقة. مقابلتي وحدي طولت حوالي نص ساعة. وراهة كعدنا بالقاعة حوالي ساعتين ووراها طلعونا.
صديقي هم قابل هليوم و قابلتة المحلفة اللي شكلهة ياباني و يكول كلش حبابة.
ادعو للجميع بمقابلات سهلة و القبول و السفر السريع.
عرض المشاركات
