10
تحية طيبة الكم ومساكم الله بالف خير
طبعا بالبداية حبيت اخفف جو التوتر عدكم وابعث الامل بقلوبكم ... اكيد طبعا يوم الاحد عدنا هو من اهم الايام بأعتباره بداية الدوام الرسمي لل IOM و UNHCR وICMC والسفارات وكلنا بهذا اليوم اول منفز من النوم الصبح نباوع عالتليفون نشوف اكو علامة مال ايميل فوك جايتنة لو لا واذا اكو اني بالنسبة الي ايدي تكوم ترجف بس اريد افتحة واشوف منين بالتالي يطلع لو من ابل لو من طيران الامارات لو مال دعاية لشي وبعدين ثاني شغلة نسويهة اذا مجان واصلنة ايميل فأكيد راح نفتح موقع الفرج ((موقع عمان)) وهم نشوف طبعا نباوع عالجدول ونردد بصوت ناصي انتظار النتيجة معلق فعال غير فعال انتظار مكتمل طبعا نقراها عالسريع لان حافظيهة **ها لتكولون ممسويهة** واذا اكو تغيير راح نبدي نسوي زوم عالجدول حتى نصدك عيونة دتباوع صح لو دتسورب **وهم كولو ممسويهة** بعدهة راح نقفل موقع عمان ونبلش بالسجل اخاف جاية مكالمة واحد فاصلهة لو طفل لاعب بالتليفون وبعدين الي عندة خدمة رسائل لمعرفة المكالمات المتصلة بيك اذا جان تليفونك مغلق او شبكة ضعيفة راح تدز رسالة وتعرف اكو اتصالات لو لا **وهم كولو ممسويهة** زين بعد هاي السالفة اكيد راح نرجع للملجأ ومصدر الاخبار والعلوم ((عين كاوا)) ونشوف شصاير مصاير منو مبشرنا بخبر حلو حتى نفرحلة ونباركلة والي عندة مشكلة نواسي ونساعدة **وهم كولو ممسويهة**
زين دقيقة اكو سالفة ... اذا دك عليك رقم وانكطع شلون ..! راح تبقى بقلق اكيد ... اهنا لازم ترجع لبرنامج ترو كولر حتى تشوف الرقم بأسم منو حتى تتاكد **لا دكولو ممسويهة**
**طبعا راح نظل الاسبوع كلة اكيد مكابلين التليفون وكاعدين وننتظر بس يدك حتى نكمز نشوف من اتصل علينة وطبعا لازم التليفون مينقص شحن ونتابع الشبكة اخاف تضعف **والله الي يكول ممسويهة اجي ابسطة**
**المهم وخصم الحجي ... باجر هو يوم ((الاحد)) .. الهي وسيدي ومولاي بحق محمد وبجاه كل واحد عندة جاه عندك سهل امرنة ويسر دربنة ودبر حالنة والطف واعطف علينة وفرحنة بخبر حلو يشفي جروحنا وكلوبنة ...يارب اجعل هذا الاسبوع بشارة خير علية وعلى اخوتي الاعضاء ومشاهدي ومتابعي هذا المنتدى الجميل ((اللهم امين يارب العالمين))
اتمنى اني كنت خفيف الظل عليكم وماطولت عليكم وهذا دعائي الكم والي من قلب صافي ونظيف وطيب ومع اذان المغرب اللهم تقبل مني هذا الدعاء ومن جميع اخوتي يامسهل الامور يا الله عليك توكلنا وانت نعم الوكيل
تقبلو تحياتي
عرض المشاركات
