عرض المشاركات

هنا يمكنك مشاهدة جميع المشاركات التى كتبها هذا العضو . لاحظ انه يمكنك فقط مشاهدة المشاركات التى كتبها فى الاقسام التى يسمح لك بدخولها فقط .


مواضيع - Cpt_Ali

صفحات: [1]
1
السلام عليكم,

اني وصلت ولاية فلوريدا يوم 27\7\2010 يعني صارلي شهر ضبط, وهسه داريد انتقل يم صديقي بولاية كولورادو, لانه بصراحه ابدا ممرتاح اهنانه لاسباب عديده,

السبب الاول هو الجو...حارة ووخمه والرطوبة كلش عالية واني محد دمرني غير الرطوبة بحيث حته الهوه ثكيل وبالكوه اشتمه ومن اشتمه احس مي فات ابخشمي وانتوا اتخيلوا شكيد لعد عاليه الرطوبة اهنا, المدينه الي عايش بيها سياحية وصايرة على البحر على الساحل الجنوب شرقي من فلوريدا, والمدينة جدا جميلة وتستاهل الواحد يجيها سياحه كم يوم...بس مو مال يعيش بيها فترة طويلة,

السبب الثاني هو المنظمة, حيل لعبت نفسي منهم لانه كلش باردين وكلشي مكاعدين يسوولي, حتى كفيلتي مبلغوها بموعد سفري من وصلت, وبالنسبة للولكم جك انطوني بس نصه (450) ورة 20 يوم! وخلال هاي ال20 يوم جانوا لابسيني لا ولكم لا فود ستامب لا مدكيت, وجنت كل ما اخابر الكيس مانجر يكلي الصك مال الولكم بعده مواصل, وحتى الاجار مدفعولها لكفيلتي لحد هسه لانه اني امأجر غرفة عدها بالبيت وكاعد يمها صار شهر, وقبل اسبوع تقريبا خابرني الكيس مانجر وكلي تعال للمكتب انت وكفيلتك علمود يقدملي على البرنامج الMatch Grants وهمين يتفق وية كفيلتي بخصوص الاجار, رحناله اني وكفيلتي وانطته العقد مال الاجار وكلها من الشهر الجاي راح يبدي يدفعلها الاجار والاجار هو 300 دولار, وراها اني سألته وين المدكيت مالتي؟ كلي متحتاج انت مدكيت لانه بعدك شاب وبحيلك وماعندك مشاكل صحية, كتلة يابه هاي اول مرة اسمع بيها لعد ليش بقية اللاجئين يستلمون مدكيت بغض النظر على اعمارهم واني لا؟ كلي كل ولاية قوانينها شكل, وكلي مع ذلك راح اقدملك على الفود ستامب والمدكيت وانت وحضك لو تنقبل لو تنرفض, المهم قدملي عليهم قبل اسبوع, وقبل 3 ايام دك التلفون عليه وطلعتلي وحده كلتلي اني من الHuman Services وسألتني اسئلة من ضمنا شنو رقم السوشل مالتي وشنو رقم ال Employment Authorization, وسالتني اذا عندي حساب بالبنك؟ وعندي دخل شهري لو لا؟ وشجنت اشتغل اخر شغله؟ وقبل شكيد؟ ووين جنت عايش؟ وبعدين كلتلي هذا هو وراحت ولحد هسه سنطة كلشي ماكو وماعرف شنو تاليها, صارلي شهر ومستلم بس 450 دولار الي هو نص الولكم, واني صارف 1700 دولار من جيبي لحد هسه.

السبب الثالث هو كفيلتي, اجيت يمها وتورطت لانه كفيلتي ممتفرغتلي وعدها شغل (ساعدتني بس بكم شغله اول ايام وهذا هو), وراها التهت بشغلها, تطلع للشغل من السبعه الصبح وترجع بال6 العصر ومن ترجع اتكون كلش تعبانة وحتة استحي اسألها اي شي لانه اكول خطيه تعبانه وماكدر همين اكلها ثانيوم وديني لفلان مكان علمود اسوي شغلتي لانه عدها شغل, وحتى دائما كاضيتها سفر هيه, تجي للبيت يوم وتغيب اسبوع وتعوفني وحدي بالبيت واني ماعرف شسوي ووين اروح لانه حتى الشوارع بعدني ما اندلها, وباصات ماكو, علاقل لو اكو باصات جان كليومية اركب باص وافتر وابدي اندل الاماكن والشوارع, بالنسبة سيارة كفيلتي اخذها بس من اروح اتسوك من ولمارت الي صاير قريب من عندي, بس ما اكدر اخذ السيارة وافرفر بيها بالشوارع لانه سيارتها 8 سلندر يعني بلوعه مال بنزين فهيج حاله يرادلي 100 دولار كليومية بس بنزين!

وهاي صارلي شهر كاضي كل وقتي بس بالبيت امكابل الانترنيت وكاعد, بحيث اكلت بوري محترم من ورة الانترنيت, اشتركت وية شركة انترنيت وارلس وسويت عقد سنتين وجان يطلعون حرامية ولحد هسه كلفني الانترنيت 300 دولار خلال شهر واحد لانه اجتازيت الlimit الي مسموح بالشهر وهسه على كل واحد كيكا ديغرموني 50 دولار واني حاليا الواحد كيكا ديكفيني بس 3 ايام يعني القائمة مال انترنيت راح تبدي تجيني 300 دولار كل شهر (هاي والله نهيبة) اسكتوا وخلوها اتملخت, اوررق وارجع ليورة, هسه انتوا يا منظمة ددزو واحد عليه او خابروني وكلولي خو ممحتاج شي؟ متريد انساعدك بفشي؟ كلشي ماكو سنطة لابسيني, بحيث البارحه طكت حوصلتي وكلت هذا هو اني لازم اسبوع الجاي احجز طيارة واروح اتحول يم صديقي بولاية كولورادو, بالمناسبة صديقي هو عضو اهنا اكيد تعرفوا  eng_ammar  هذا صديق العمر وهو الوحيد الي اثق بيه بكلشي, المهم خابرته وكتله يابة ترة راح انقل يمك, كلي هلا بيك, فأني رأسا خابرت هذا الكيس مانجر مالتي وكتله يابة اني مفكر بالانتقال الى ولاية كولورادو لانه اني ممرتاح اهنا وانطيته شنية الاسباب, شو هذا رأسا كام يهددني بغلق الكيس مالتي! كلي هشكل بالتفصيل

 (((اذا اتفكر تنقل فراح اغلق الكيس مالتك هسه وبعد مالنه علاقة بيك! وبالنسبة للبرنامج مال Match Grant الي قدمتلك عليه قبل اسبوع همين راح الغي وبعد وراها ميشملك اي برنامج اخر لانه انت لاجىء ولازم خلال 30 يوم بعد وصولك اتقدم على هذا البرنامج واذا مقدمت فبعد مالك حق اتقدم على اي برنامج...لا هذا ولا اخر حتى لو انتقلت الى ولاية كولورادو لانه راح تعبر ال30 يوم وانت ممقدم على اي برنامج, وثاني شي انت انسان محضوظ لانه كاعد ابيت قصر يم كفيلتك وعدها مسبح ومنطيتك سيارتها, روح اخذ سيارتها وضل عبي بنزين وافتر بالشوارع الى ان تندل الشوارع كلها, وهسه بسرعه انطيني جواب ناوي تبقى اهنا لو تنتقل لغير ولاية? حتى اذا ناوي تنتقل بالمستقبل فراح هسه اغلق الكيس مالتك واوقف كل المساعدات مالتك وبعد مالنه علاقة بيك, يلة جاوبني شنو قرارك؟ كتله يابة راح ابقى)))

شفتوا شنوه الحجي مالته؟ هسه الي اريد اعرفة معقولة يكدرون يغلقون الكيس مالتي بهلسهولة ويعوفوني؟ وهل فعلا اذا انتقلت الى كولورادو بعد متشملني اي مساعدات؟ زين ليش بعد متشملني اي مساعدات واني اصلا كلشي ممحصل منهن لحد هسه؟ والله مدافتهم راح اتخبل, ممكن تشرحولي هاي السالفة, ترة دمرني هذا الكيس مانجر (الزنجي) مدا اكدرله ومداعرف شلون اتعامل وياه, وشحجي وياه يطلعلي من فد دربونة ويسكتني, اخاف هذا كاعد ديلغف من وراية واني مادري وكاعد وساكت ??? ??? ???

ياريت من اصحاب الخبرة يشرحولي شنية الاجراءات مال الانتقال وشلون احول الكيس مالتي من منظمة catholic charities الى اي منظمة اخرى بكولورادو بالتفصيل علمود اعرف شلون اتصرف.

اشكركم جميعا

2
ألسلام عليكم جميعا

أني قابلت مقابلة الاولى والثانية بعمان قبل كم يوم, وانطيتهم الاسم ورقم التلفون والعنوان مال الكفيلة مالتي, أكو احد يعرف شنو البروسيجر مال IOM يعني شوكت الIOM راح يتصلون بالكفيل؟ بعد المقابلة الاولى والثانية؟ لو بعد مقابلة وموافقة المحلفين؟ لو بعد الموافقة الامنية؟

وسؤال ثاني بدون زحمه, أسمعت بأنه اذا المنظمة اتصلت بالكفيل ومشال التلفون من أول مرة فراح يحولوني رأسا على غير ولاية بكيفهم, صدك هذا الحجي؟

3
مرحبا, اني جديد على الموقع وعندي كم استفسار

أني عايش بعمان وقدمت على الامم المتحده بال 2006 وقابلت مقابلتين, بالمقابلة الثانية ورة مخلصت كلولي قصتك ممقتنعين بيها, المهم...كلولي راح ندرس قضيتك ونخابرك بعدين, ومن ذاك اليوم الى هذا اليوم كلشي ماكو صنطه واني همين عفتها ومراجعتهم بعد وراها, قبل شهر قدمت على ال IOM تقديم مباشر وانقبلت وحددولي موعد مقابلة بشهر الثاني, وحسب مسمعت بأن الIOM راح يسألني بالمقابلة الاولى على اذا قدمت اني على الامم المتحده سابقا, اني راح اكلهم اي قدمت وعفتها وحتى رقم الملف ما اتذكره, سؤالي هو هل الIOM راح يتصل بالامم المتحده وينطوهم اسمي الكامل ويطلبون منهم ان يدزون ملفي القديم الى الIOM؟ اشو ناس اتكلي الIOM يكدرون يجيبون الملف مالتي خلال خمس دقايق عن طريق الحاسبة لانه عدهم اتصال دايركت وية الامم المتحده, وناس اتكلي لدوخ نفسك ميكدرون يجيبون الملف مالتك اذا ما انطيهم رقم الملف, فهسه شلون اني اعرف الحقيقة؟ اتمنى لو احد بيكم يكدر ينطيني حجاية مضبوطة وشكرا

صفحات: [1]



" "