الرسائل

1

نتاجات بالسريانية / ملحمة شعرية القصيدة الثامنة عشر

« في: 18:59 20/02/2015  »

ملحمة شعرية القصيدة الثامنة عشر

2

نتاجات بالسريانية / دويخ نوشا

« في: 18:54 20/02/2015  »

دويخ نوشا

3

نتاجات بالسريانية / ملحمة شعرية ـ القصيدة السابعة عشر ܗܘܡܣܐ ܡܚܪܝܐ ـ ܡܫܘܚܬܐ ܝܙ

« في: 05:55 06/12/2014  »

ܡܫܘܚܬܐ ܝܙ

ܦܵܣܘܿܥܝܵـܬ̣̈ـܝܼ ܠܲܩܵܕ̄ܡܵܐ ܘܥܲܝܢ̈ܝܼ ܠܲܒܵܬ̣̄ܪܵܐ ܘܠܸܒܝܼ ܟܸܠܝܵܐ ܒܦܲܠܓܵܐ
 ܒܹܝܢ ܟܘܼܬܵܫܵܐ ܕܢܲܦ̮ܫܵܐ ܘܝܵـܬܵܐ ܦܲܓ̣ܪܝܼ ܟܪܝܼܗܵܐ ܒܦܸܠܓܵܐ
ܒܹܝܢ ܬܸܪܬܹܝܢ ܐܘܼܖ̈ܚܵܬ̣ܵܐ ܝ̄ܬܝܼܒ̣ܵܐ ܬܗܝܼܪܵܐ ܐܲܝܟ̣ ܦܵܠܓܵܐ
ܠܸܒܝܼ ܒܹܝܢ ܢܘܼܪܵܐ ܕܒܘܼܠܩܵܢܵܐ ܘܒܹܝܢ ܓܠܝܼܕܼܵܐ ܕܬܲܠܓܵܐ
ܚܸܙܘܵܐ ܘܒܹܝܡܵܐ ܓܠܝܼܚܵܐ ܠܲܝܬܿ ܣܸܬܪܵܐ ܬܸܠܝܵܐ ܒܓܵܠܓܵܐ
ܐܲܠܵܗܬܵܐ ܕܚܘܼܒܵܐ ܫܬܝܼܩܬܵܐ ܪܝܵܡܵܐ ܝܠܵܗ̇ ܐܲܝܟ̣ ܠܲܗܓܵܐ
ܐܲܝܟ̣ ܦܲܪܚܘܿܢܝܼܬ̣ܵܐ ܓܵܘ ܗܵܘܵܐ ܓܘܼ̈ܠܦܵܢܵܗ̇ ܪܲܦܪܘܿܦܹ̈ܐ ܒܙܵܘܓܵܐ
ܒܓܵܘܢܹ̈ܐ ܫܲܦܝܼܖܹ̈ܐ ܡܙ̈ܝܼܓ̣ܹܐ ܣܡܘܿܩܵܐ ܘܚܘܵܪܵܐ ܘܡܝܼܠܵܐ ܘܙܵܪܓܵܐ
ܐܲܝܟ̣ ܫܘܼܦܪܵܐ ܕܘܲܖ̈ܕܹܐ ܘܗܲܒܵܒ̣ܹ̈ܐ ܦܩܝܼܚܹ̈ܐ ܒܓܲܢܬ̣ܵܐ ܕܡܲܪܓܵܐ
ܦܲܓ̣ܪܵܗ̇ ܙܲܗܝܵܐ ܫܘܼܠܚܵܝܵܐ ܕܠܵܐ ܣܲܥܪܵܐ ܘܕܠܵܐ ܡܸܠܓܵܐ
  ܠܸܒܵܗ̇ ܡܸܠܝܵܐ ܖ̈ܓ̣ܝܼܓ̣ܵܬ̣ܵܐ ܐܲܝܟ̣ ܟܲܠܬ̣ܵܐ ܕܠܵܐ ܒܲܪ ܙܵܘܓܵܐ
ܐܲܝܟ̣ ܣܲܡܝܵܐ ܒܵܒ̣ܵـ̈ـܬ̣ܵܐ ܕܥܲܝ̈ܢܝܼ ܒܲܬ̣ܪܵܗ̇ ܩܠܵܩܵܐ ܘܓܠܵܓܵܐ
ܠܸܒܝܼ ܒܠܵܥܵܐ ܚܸܫܵܐ ܘܪܵܐܬ̣ܝܼ ܓܣܵܝܵܐ ܬܸܢܲܚܬܵܐ̣ ܘܢܵܗܓܵܐ
ܥܨܹܐ ܠܹܗ ܫܸܡܵܗ̇ ܒܦܘܼܡܝܼ ܘܥܪܵܐ ܠܸܫܵܢܝܼ ܐܲܝܟ̣ ܠܲܥܓܵܐ
ܐܲܝܟ̣ ܨܸܦܪܵܐ ܐܲܣܝܼܪܵܐ ܠܥܵܙܵܐ ܒܩܵܠܵܐ ܚܢܝܼܓ̣ܵܐ ܘܓܵܘܓܵܐ
ܐܲܣܝܼܪܵܐ ܕܚܘܼܒܵܐ ܠܲܝܬ ܠܹܗ ܦܘܼܪܩܵܢܵܐ ܘܠܵܐ ܦܸܪܓܵܐ
ܢܝܼܣܵܢ ܝܼܠܹܗ ܐܝܼܢܵܐ ܫܡܲܝܵܐ ܕܢܝܼܢܘܸܐ ܩܪܝܼܡܬܵܐ ܒܢܸܫܓܵܐ
ܟܵܘܟ̣ܲܒ̣ܬ̣ـܝܼ ܕܥܝܼܟ̣ܬܵܐ ܘܫܡܲܝܝܼ ܚܫܝܼܟܬܵܐ ܕܠܵܐ ܙܸܠܓܵܐ
ܒܸܨܠܵܝܵܐ ܗ̄ܘܹܝܢ ܡ̣ܢ ܕܲܖ̈ܓܹܐ ܕܥܸܠܵܝܘܼܬ̣ܵܐ ܕܙܸܩܘܼܪܬܵܐ ܕܒܘܼܪܓܵܐ
 ܒܸܥܒ̣ܵܪܵܐ ܗ̄ܘܹܝܢ ܠܢܲܗܪܵܐ ܘܡܸܠܐܵܐ ܡܫܘܿܪܹܐ ܠܹܗ ܠܡܸܣܓܵܐ
ܠܲܝܬܿ ܡܲܫܘܼܘ̈ܪܹܐ ܘܠܵܐ ܐܸܠܦܵܐ ܘܠܵܐ ܓܸܫܪܵܐ ܘܐܲܙܓܵܐ
ܕܸܚܠ̱ܬ̣ܵܐ ܚܲܪܝܼܦܬܵܐ ܦܪܵܡܵܐ ܝܠܵܗ̇ ܠܢܲܦ̮ܫܝܼ ܐܲܝܟ̣ ܢܵܪܓܵܐ
ܡܵܘܬܵܐ ܐܲܪܒܸܥ ܐܵܬ̣̈ܘܵܬ̣ܵܐ ܦܫܝܼܛܹ̈ܐ ܐܝܼܢܵܐ ܥܲܣܩܵܐ ܠܡܸܗܓܵܐ
ܠܒ̣ܝܼܒ̣ܘܼܬ̣ܵܐ ܕܠܸܒܝܼ ܟܠܝܼܬ̣ܵܐ ܕܲܠܩܘܼܒ̣ܠ ܫܓ̣ܘܼܫܝܵܐ ܕܗܸܪܓܵܐ
ܒܵܥܹܝܢ ܕܡܵܛܹܝܢ ܠܓܲܝܣܵܐ ܕܗܵܘܹܝܢ ܦܵܠܚܵܐ ܓܵܘ ܦܵܘܓܵܐ
ܒܸܨܪܵܚܵܐ ܗ̄ܘܹܝܢ ܫܬܝܼܩܵܐ ܘܫܵܡܘܿܥܵܐ ܐܲܝܟ̣ ܨܲܠܡܵܐ ܕܘܼܓܵܐ
ܝܵܐ ܢܵܛܘܿܪܵܐ ܠܵܐ ܗ̄ܘܹܝܢ ܒܥܸܠܕܒ̣ܵܒ̣ܵܐ ܦܬ̣ܘܿܚ ܠܹܗ ܕܲܪܓܵܐ
ܒܲܪ ܡܲܠܟܵܐ ܗ̄ܘܹܝܢ ܠܵܐ ܗ̄ܘܹܝܢ ܝܲܬܘܼܡܵܐ ܘܚܘܼܪܓܵܐ
ܘܝܵܪܘܿܬ̣ܵܐ ܕܝܘܼܒܵܠܵܐ ܕܐܵܫܘܿܪ ܡ̣ܢ ܣܵܒ̣ܵܐ ܗܲܠ ܢܲܒ̣ܸܓܵܐ
ܩܸܪܝܵܐ ܠܝܼ ܠܘܼܚܵܐ ܟܠܵܗ̇ ܐܵܦ ܒܹܝܢ ܓܲܪܓܵܐ ܘܓܲܪܓܵܐ
ܬܵܓ̣ܵܐ ܕܡܲܠܟܘܼܬ̣ܵܐ ܕܠܵܐ ܙܵܟ̣ܘܼܬ̣ܵܐ ܠܲܝܬܿ ܠܹܗ ܠܵܘܓܵܐ
ܓܵܘ ܡܲܫܪܝܼܬ̣ܵܐ ܕܦܵܠܚܹ̈ܐ ܩܵܠܵܐ ܪܵܡܵܐ ܕܩܲܪܢܵܐ ܘܙܲܓܵܐ
ܒܸܬܢܵܝܵܐ ܐܲܝܟ̣ ܒܲܪ ܩܵܠܵܐ ܕܪܲܥܡܵܐ ܓܵܘ ܣܢܵܪܓܵܐ
 ܦܵܠܚܹ̈ܐ ܩܪܲܒ̣ܬ̣ܵܢܹ̈ܐ ܪܸܦ̮ܫܵܐ ܒܪܸܦ̮ܫܵܐ ܕܒ̣ܝܼܩܹ̈ܐ ܚܲܓܵܐ
ܘܨܗܵܠܵܐ ܕܣܘܼܣܵܝ̄ܐ ܚܹܐܪܵܐ ܕܠܵܐ ܠܸܓ̣ܵܡܵܐ ܘܕܠܵܐ ܘܣܲܪܓܵܐ
ܙܢܵܓ̣ܵܐ ܕܫܸܠܦܹ̈ܐ ܕܣܲܝܦܹ̈ܐ ܘܩܸܫ̈ܬܵܬ̣ܵܐ ܘܝܲܬ̣ܖܹ̈ܐ ܡܬ̣ܝܼܚܹ̈ܐ ܘܙܸܢܓܵܐ
 ܙܓ̣ܵܓ̣ܵܐ ܕܡܲܛܵܠ̄ܠܹ̈ܐ ܡܙܲܢܓܘܿܪܹܐ ܒܐܸܕܼܢܝܼ ܐܲܝܟ̣ ܩܵܠܵܐ ܕܨܲܢܓܵܐ
ܕܸܡܝܼ ܒܸܪܬܵܚܵܐ ܡ̣ܢ ܪܦܵـܬ̣ܵܐ ܕܠܸܒܝܼ ܘܩܵܠܵܐ ܕܲܦܠܲܓܵܐ

ܟ̣ܡܝܼܣ ܓܝܼܘܪܓܝܼܣ

4

نتاجات بالسريانية / ܗܘܡܣܐ ܡܚܪܝܐ ܡܫܘܚܬܐ - ܝܘ ملحمة شعرية القصيدة السادسة عشر

« في: 01:18 23/10/2014  »

ܗܘܡܣܐ ܡܚܪܝܐ
ܡܫܘܚܬܐ ܝܘ
ܙܸܠ ܒܲܫܠܵܡܵܐ ܕܸܩܠܲܬ̣ ܥܲܡ ܪܲܚܡܹ̈ܐ ܕܐܲܠܵܗܹ̈ܐ ܘܦܘܼܪܢܵܣܵܐ
ܝܵܐ ܛܵܘܣܵܐ ܫܲܦܝܼܪܵܐ ܠܡܵܐ ܠܵܐ ܡܓܘܿܒܹܐ ܠܘܼܟ̣ ܛܝܵܣܵܐ؟
ܚܹܐܪܵܐ ܓܵܘ ܫܡܲܝܵܐ ܪܸܚܩܵܐ ܡ̣ܢ ܩܲܝ̈ܕܹܐ ܘܓܲܪܕܹ̈ܐ ܕܲܩܦܵܣܵܐ
ܐܲܢ̄ܬ ܝܗ̄ܘܹܝܬ ܡܓܘܿܒܝܵܐ ܒܲܟܢܘܼܫܝܵܐ ܓܢܝܼܙܵܐ ܒܦܘܼܣܵܣܵܐ
ܡܣܲܪܓܸܕܼ ܓܵܘ ܠܸܒܝܼ ܒܨܸܨܹ̈ܐ ܚܲܪܝܼܦܹ̈ܐ ܘܫܲܦܝܼܪ ܣܘܼܠܓܵܣܵܐ
ܥܲܠ ܠܘܼܚܵܐ ܪܲܛܝܼܒ̣ܵܐ ܕܠܸܒܝܼ ܘܠܵܐ ܠܛܲܪܦܵܐ ܕܟܘܼܪܵܣܵܐ
ܡ̣ܢ ܠܘܼܚܹ̈ܐ ܕܲܩܪܵܒ̣ܵܐ ܕܚܘܼܒܵܐ ܡܲܪܝܼܪܵܐ ܒܢܝܼ ܗܘܼܡܵܣܵܐ
ܐܲܝܟ̣ ܐܲܪܕܸܟ̣ܠܵܐ ܘܡܵܚܘܿܪܵܐ ܡܢܲܣܝܵܐ ܒܗܵܘܢܵܐ ܒܸܪܡܵܣܵܐ
 ܩܵܐ ܕܦܵܝܸܫ ܓܵܘ ܡܘܼܚܵܐ ܕܫܵܡܘܿܥܵܐ ܒܥܘܼܡܩܵܐ ܒܸܕܡܵܣܵܐ
ܩܵܐ ܕܦܵܝܸܫ ܕܟ̣ܵܪܵܐ ܒܬܹܒ̣ܹܝܠ ܕܢܸܫܝܵـܢܵܐ ܒܗܸܪܓܵܐ ܘܲܥܣܵܣܵܐ
ܩܵܐ ܕܦܵܝܸܫ ܚܸܙܝܵܐ ܒܪܸܥܝܵـܢܵܐ ܓܵܘ ܨܘܼܝܵܪܵܐ ܘܛܘܼܦܵܣܵܐ
ܩܵܐ ܕܦܵܝܸܫ ܩܸܪܝܵܐ ܒܥܲܝܢܹ̈ܐ ܣܲܡܝܹ̈ܐ ܒܪܸܢܝܵܐ ܘܲܗܕܵܣܵܐ
ܚܘܼܒܵܐ ܩܪܵܒ̣ܵܐ ܝܠܹܗ ܘܥܵܪܘܿܩܵܐ ܠܲܝܬܿ ܠܹܗ ܛܦܵܣܵܐ
ܗܘܝܼ ܩܪܲܒ̣ܬ̣ܵܢܵܐ ܡܲܪܵܚܵܐ ܘܡܠܝܼ ܠܒ̣ܝܼܒ̣ܘܼܬ̣ܵܐ ܘܣܲܒ̣ܪܵܐ ܘܚܘܼܡܵܣܵܐ
ܩܵܐ ܕܦܵܝܸܫ ܕܟ̣ܝܼܪܵܐ ܫܸܡܘܼܟ̣ ܠܕܼܵܪܕܼܵܪܝܼܢ ܒܟܠ ܩܘܼܠܵܣܵܐ
ܠܸܒܵܐ ܨܠܝܼܦܵܐ ܒܓܹܐܪܵܐ ܕܚܘܼܒܵܐ ܠܲܝܬܿ ܠܹܗ ܣܘܼܘܵܣܵܐ
ܓܵܘ ܩܪܵܒ̣ܵܐ ܕܚܘܼܒܵܐ ܠܲܝܬܿ ܫܠܵܡܵܐ ܐܝܼܬ̣ ܦܘܼܪܦܵܣܵܐ
ܐܝܼܬ̣ ܚܲܒܝܼܒ̣ܹ̈ܐ ܐܲܝܟ̣ ܒܥܸܠܕܒ̣ܵܒ̣ܹ̈ܐ ܠܠܸܒܵܐ ܕܐܸܚ̈ܕܵܕܹܐ ܒܠܵܣܵܐ
 ܣܵܗܕܵܐ ܕܚܘܼܒܵܐ ܠܲܝܬܿ ܒܓܲܪܡܹ̈ܗ ܬܒ̣ܵܪܵܐ ܘܠܵܐ ܩܘܼܣܩܵܣܵܐ 
 ܚܘܼܒܵܐ ܠܵܐ ܣܵܝܸܒ̣ ܘܟܡܵܐ ܕܥܵܬܸܩ ܠܵܐ ܐܵܬ̣ܹܐ ܠܲܣܦܵܣܵܐ
ܗܘܝܼ ܙܗܝܼܪܵܐ ܒܐܘܼܪܚܵܐ ܡ̣ܢ ܚܵܛܘܿܦܵܐ ܠܸܣܛܵܐ ܘܓܲܝܵܣܵܐ
ܡ̣ܢ ܠܘܼܚܵܫܵܐ ܕܟܲܗܢܹ̈ܐ ܘܡ̣ܢ ܣܲܟܝܼܢܵܐ ܚܲܪܝܼܦܵܐ ܘܣܘܼܪܵܣܵܐ
ܘܪܲܚܝܵܐ ܝܲܩܘܼܪܵܐ ܕܚܲܣܵܡܹ̈ܐ ܡܦܲܓ̣ܪܘܿܓ̣ܹܐ ܕܗܵܘܲܝ ܠܓܲܖ̈ܡܘܼܟ̣ ܒܸܓܪܵܣܵܐ
 ܘܦܘܼܡܵܐ ܟܦܝܼܢܵܐ ܕܕܹܐܒ̣ܹ̈ܐ ܣܪܝܼܚܹ̈ܐ ܒܸܨܝܵܪܵܐ ܠܒܸܣܪܘܼܟ̣ ܒܸܗܪܵܣܵܐ
ܒܢܝܼ ܠܝܼ ܗܲܝܟܠܵܐ ܥܲܠ ܐܲܪܥܵܐ ܡܩܵܘܝܵܢܬܵܐ ܒܫܘܼܬܐܵܣܵܐ
ܥܲܠ ܢܲܗܪܵܐ ܕܚܲܝܹ̈ܐ ܡܬ̣ܘܿܡܵܝܵܐ ܕܠܲܝܬܿ ܠܹܗ ܩܪܵܣܵܐ
ܫܒ̣ܘܿܩ ܬܲܪܥܹܗ ܦܬܝܼܚܵܐ ܒܥܸܕܵܢܵܐ ܕܲܣܢܝܼܩܘܼܬ̣ܵܐ ܘܓܘܼܘܵܣܵܐ
ܙܪܘܿܥ ܒܕܵܪܬܹܗ ܘܲܪܕܹ̈ܐ ܘܐܝܼܠܵܢܹ̈ܐ ܕܪܹܝܚܵܢܵܐ ܘܐܵܣܵܐ
ܐܲܝܟܵܐ ܕܛܲܪܦܲܝ̈ܗܝ ܠܵܐ ܢܵܬ̣ܪܝܼ ܘܠܵܐ ܐܵܬ̣ܲܝ ܠܲܟܡܵܣܵܐ
 ܘܓܸܠܵܠܹـ̈ܐ ܘܐܝܼܠܵܢܹ̈ܐ ܘܗܲܒܵܒ̣ܹ̈ܐ ܕܣܵܡܲܪܡܵܐ ܘܢܲܪܩܝܼܣ ܘܪܵܣܵܐ
ܡܲܩܪܸܒ̣ ܠܝܼ ܡ̣ܢ ܦܹܐܖܹ̈ܐ ܕܕܸܩܠܵܐ ܘܲܕܼܬܐܹܢܵܐ ܘܓܲܪܓܪܵܣܵܐ
ܠܵܐ ܒܲܥܝܵܢ ܩܘܼܪܒܵܢܵܐ ܕܬܵܘ̈ܪܹܐ ܡܦܲܛܡܹ̈ܐ ܘܠܵܐ ܢܟ̣ܵܣܵܐ
ܬܵܐ ܕܥܲܒ̣ܕܹܝܚ ܚܠܘܼܠܵܐ ܕܙܘܼܘܵܓ̣ܵܐ ܡܩܲܕܫܵܐ ܕܠܵܐ ܦܣܵܣܵܐ
ܡܩܲܒܸܠ ܠܫܘܼܟܵܢܵܐ ܐܲܠܵܗܵܝܵܐ ܠܚܲܬ̣ܢܵܐ ܐ̄ܢܵܫܵܝܵܐ ܚܫܝܼܚܵܐ ܠܩܘܼܣܡܵܣܵܐ
ܕܚܘܼܒܵܐ ܫܲܪܝܼܪܵܐ ܢܒ̣ܝܼܥܵܐ ܡ̣ܢ ܨܸܒ̣ܝܵـܢܵܐ ܕܠܵܐ ܦܝܵܣܵܐ
ܠܒ̣ܘܿܫ ܒܨܸܒ̣ܥܘܼܟ̣ ܥܹܙܲܩܬ̣ܵܐ ܕܚܲܝܠܵܐ ܕܲܪܩܘܼܒ̣ܠ ܕܣܲܝܒܘܼܬ̣ܵܐ ܘܲܢܣܵܣܵܐ
ܚܫܝܼܠܬܵܐ ܡ̣ܢ ܕܲܗܒ̣ܵܐ ܣܢܝܼܢܵܐ ܕܠܵܐ ܩܵܪܸܒ̣ ܥܲܠܹܗ ܣܵܣܵܐ
ܠܲܝܬܿ ܢܵܡܘܼܣܵܐ ܒܹܝܢ ܐܲܠܵܗܵܬܵܐ ܘܒܲܪܢܵܫܵܐ ܓܵܘ ܓܘܼܢܵܣܵܐ
ܓܸܦܬܵܐ ܝܗ̄ܘܵܝܢ ܘܥܲܠܘܼܟ̣ ܝܵܐ ܕܸܩܠܵܐ ܣܵܘ̈ܟܝܼ ܒܸܥܩܵܣܵܐ
ܦܬ̣ܘܿܠ ܠܦܲܥܘܵܢ̈ܝܼ ܪܲܟ̈ܝܼܟ̣ܹܐ ܠܵܐ ܫܲܡܛܝܼ ܐܲܝܟ̣ ܟܘܼܣܟܵܣܵܐ
ܢܘܼܪܒ̣̈ܝܼ ܬܲܠܝܼܠܹ̈ܐ ܐܵܦ ܒܩܲܝܛܵܐ ܠܲܝܬܿ ܠܗ̄ܘܿܢ ܩܘܼܝܵܣܵܐ
ܫܒ̣ܘܿܩ ܠܲܢ ܐܲܣܝܼܖܹ̈ܐ ܕܐܸܚ̈ܕܼܵܕܹܐ ܓܕܝܼ̈ܠܹܐ ܒܚܲܒ̣ܠܵܐ ܕܲܡܣܵܣܵܐ
ܣܓ̣̈ܘܿܠܝܼ ܬܪܹܝܢ ܬܐܵܡܹ̈ܐ ܬܸܠܝܹ̈ܐ ܓܵܘ ܐܝܼܕܼܘܼܟ̣ ܡܥܵܣܵܐ
 ܥܸܢ̈ܒ̣ܝܼ ܚܸܠܝܹ̈ܐ ܒܫ̈ܝܼܠܹܐ ܓܵܘ ܦܘܼܡܘܼܟ̣ ܒܸܠܥܵܣܵܐ
 ܒܙܘܿܥ ܠܚܲܠܡܵܬ̣ܲܝܗ̈ܝ ܒܣܸ̈ܦܘܵܬ̣ܘܼܟ̣ ܡܵܪ ܫܸܢ̄ܒ̈ܠܹܐ ܘܚܠܲܣܠܵܣܵܐ
ܩܵܐ ܕܢܲܛܦܝܼ ܕܸܡܥܹ̈ܐ ܡܩܘܿܒ̈ܝܹܐ ܘܲܡܫܲܪܝܼ ܒܸܪܣܵܣܵܐ
ܫܬـܝܼ ܚܲܡܪܵܐ ܕܚܲܝܹ̈ܐ ܢܵܝܵܐ ܕܠܵܐ ܩܲܕܚܵܐ ܘܟܵܣܵܐ
ܚܲܡܪܵܐ ܚܲܕܼܬ̣ܵܐ ܡܲܪ̱ܘܝܵـܢܵـܐ ܘܡܲܚܕܝܵـܢܵܐ ܕܠܸܒܵܐ ܘܡܸܬܿܬܲܪܣܝܵـܢܵܐ ܕܟܵܪ̄ܣܵܐ
ܫܒ̣ܘܿܩ ܠܨܸܒ̈ܥ̣ܵܬ̣ܘܼܟ̣ ܐܲܝܟ̣ ܡܲܣܪܩܵܐ ܕܗܵܘܲܝ ܠܟܵܘܣܝܼ ܒܸܢܦܵܣܵܐ
ܙܪܘܿܥ ܓܵܘ ܐܲܪܥܝܼ ܒܬ̣ܘܿܠܬܵܐ ܘܟܲܗܝܼܢܬܵܐ ܙܲܪܥܵܐ ܕܣܘܼܒ̣ܵܣܵܐ
ܫܒ̣ܘܿܩ ܗܵܘܝܵܐ ܚܛܝܼܬܵܐ̣ ܘܲܟܦܘܼܪܝܵܐ ܕܲܠܩܘܼܒ̣ܠ ܕܟܠ ܛܘܼܟܵܣܵܐ
ܒܥܲܝܢܵܐ ܕܐܲܠܵܗܹ̈ܐ ܘܲܕܼܒܲܪܢܵܫܵܐ ܫܒ̣ܘܿܩ ܗܵܘܝܵܐ ܓܲܝܵܪܘܼܬ̣ܵܐ ܘܲܪܓܵܣܵܐ
ܫܒ̣ܘܿܩ ܗܵܘܹܐ ܥܘܼܩܵܒ̣ܵܐ ܡܵܘܬ̣ܵܐ ܕܢܲܦ̮ܫܵܐ ܘܦܲܓ̣ܪܵܐ ܒܒܘܼܣܒܵܣܵܐ
ܘܫܘܼܥܒܵܕܼܵܐ ܕܪܘܼܚܵܐ ܘܦܲܓ̣ܪܵܐ ܐܲܝܟ̣ ܚܲܝܵܒ̣ܵܐ ܬܸܠܝܵܐ ܒܗܸܪܡܵܣܵܐ
ܢܛܘܿܪ ܒܠܸܒܘܼܟ̣ ܐ̄ܪܵܙܵܐ ܕܚܘܼܒܲܢ ܕܠܵܐ ܐܵܬ̣ܹܐ ܠܲܦܪܵܣܵܐ
ܟ̣ܵܡܝܼܣ ܓܝܼܘܲܪܓܝܼܣ

5

اخبار فنية ثقافية اجتماعية / رد: كيان أبناء النهرين ينعى الفقيد نور الدين زيا بوبو (د. هرمز بوبو)

« في: 08:08 06/10/2014  »

ܩܵܐ ܒܲܝܬܘܼܬ̣ܵܐ ܘܠܸܘܝܹ̈ܐ ܘܚܲܒ̣ܪܵܘܵܬ̣ܵܐ ܕܲܡܢܵܚܵܐ ܗܘܿܪܡܝܼܙܕ ܙܲܝܥܵܐ ܒܘܼܒܘ ܡܝܲܩܖܹ̈ܐ..

ܒܚܸܫܵܐ ܪܲܒܵܐ ܡܩܘܿܒܸܠ ܠܲܢ ܛܸܒܵܐ ܕܫܘܼܢܵܝܵܐ ܕܐܵܓ̣ܘܿܢܸܣܛܵܐ ܐܵܫܘܿܪܵܝܵܐ ܗܘܿܪܡܝܼܙܕ ܙܲܝܥܵܐ ܒܘܼܒܘܼ ܪܹܫܵܐ ܕܡܵܘܬܒ̣ܵܐ ܣܘܼܝܵܣܵܝܵܐ ܕܟܘܼܝܵܢܵܐ ܕܒܢܲܝ̈ ܒܹܝܬ ܢܲܗܪܹܝܢ ܘܚܲܕ ܡ̣ܢ ܡܫܵܘܬܸܦܵܢܹ̈ܐ ܒܲܡܫܲܬܐܵܣܬܵܐ ܕܙܵܘܥܵܐ ܕܝܼܡܘܿܩܪܵܛܵܝܵܐ ܐܵܫܘܿܪܵܝܵܐ ܘܐܵܣܝܵܐ ܘܡܸܫܬܲܐܠܵܢܵܐ ܓܲܝܣܵܝܵܐ ܓܵܘܹܗ ܒܝܵܘ̈ܡܵܬ̣ܵܐ ܕܕܘܼܪܵܪܵܐ ܡܙܲܝܢܵܐ ܕܲܪܩܘܼܒ̣ܠ ܕܫܘܼܠܛܵܢܵܐ ܒܲܥܬ̣ܵܝܵܐ ܕܒܲܓ̣ܕܵܕ، ܒܝܵܗ̄ܒ̣ܵܐ ܗ̄ܘܹܝܚ ܒܘܼܝܵܐܵܐ ܩܵܐ ܒܲܝܬܘܼܬܹܗ ܘܠܸܘܝܹ̈ܗ ܘܚܲܒ̣ܪܵܘܵܬܹ̈ܗ، ܘܲܡܫܲܘܬܘܼܦܹܐ ܗ̄ܘܹܝܚ ܒܚܸܫܲܝܗ̈ܝ ܘܒܸܛܠܵܒܵܐ ܗ̄ܘܹܝܚ ܡ̣ܢ ܡܵܪܝܵܐ ܐܲܠܵܗܵܐ ܩܵܐ ܕܡܲܩܝܸܡܠܹܗ ܓܵܘ ܡܲܠܟܘܼܬܹܗ ܫܲܡܝܵܢܵܝܬܵܐ، ܘܩܵܐ ܕܝܲܗ̄ܒ̣ܠ ܠܒܲܝܬܘܼܬܹܗ ܣܲܒ̣ܪܵܐ ܘܲܡܣܲܝܒܪܵܢܘܼܬ̣ܵܐ.

ܟ̣ܵܡܝܼܣ ܓܝܼܘܲܪܓܝܼܣ


الى عائلة ورفاق وأصدقاء المرحوم هرمز زيا بوبو المحترمين..

بمزيد من الحزن تقبلنا خبر رحيل المناضل الآشوري هرمز زيا بوبو رئيس المجلس السياسي لكيان أبناء النهرين وأحد المشاركين في تأسيس الحركة الديمقراطية الآشورية،  الطبيب والمسؤول العسكري فيها ايام الكفاح المسلح ضد النظام البعثي في بغداد، نقدم التعازي لعائلته ورفاقه وأصدقائه ونشارك احزانهم ونطلب من الرب ليقيمه في ملكوته السماوي ويلهم عائلته الصبر والسلوان.

خاميس كيوركيس

6

نتاجات بالسريانية / ملحمة شعرية - القصيدة الخامسة عشر ܗܘܡܣܐ ܡܚܪܝܐ - ܡܫܘܚܬܐ ܝܗ

« في: 14:00 14/09/2014  »

ܗܘܡܣܐ ܡܚܪܝܐ
ܡܫܘܚܬܐ  - ܝܗ

ܝܵܐ ܐܲܠܵܗܬܵܐ ܫܒ̣ܘܿܩܝ ܠܝܼ ܕܕܲܥܪܸܢ ܠܒܲܝܬܝܼـ ܥܲܬܝܼܩܵܐ
ܦܬ̣ܘܿܚܝ ܬܲܪܥܵܐ ܕܕܲܥܬ̣ܝܼܕܼܝܼ ܘܚܸܠܩܝܼ ܒܩܸܦܠܵܐ ܚܠܝܼܩܵܐ
ܠܸܒܝܼ ܠܲܚܙܵܝܬܵܐ ܕܒܵܒܝܼ ܘܡܲܠܟܝܼ ܪܵܒܵܐ ܝܠܹܗ ܠܗܝܼܩܵܐ
ܒܘܼܟ̣ܪܵܐ ܘܝܼܚܝܼܕܼܵܝܵܐ ܕܝܸܡܝܼ ܗ̄ܘܹܝܢ ܘܗܵـܝ̇ ܠܸܒܵܗ̇ ܣܲܩܝܼܩܵܐ
ܐܲܠܦܵܐ ܕܪܵܥܹ̈ܐ ܠܲܫܡܲܝܵܐ ܗܵܠܵܐ ܠܵܐ ܗ̄ܘܹܝܢ ܣܠ̄ܝܼܩܵܐ
ܒܸܪܥܵܫܵܐ ܗ̄ܘܹܝܢ ܒܐܲܠܦܹ̈ܐ ܕܡܝܼܠܹ̈ܐ ܡ̣ܢ ܐܲܪܥܵܐ ܪܚܝܼܩܵܐ
ܒܹܝܢ ܫܡܲܝܵܐ ܘܐܲܪܥܵܐ ܟܸܠܝܵܐ ܥܲܠ ܬܚܘܼܡܵܐ ܪܲܩܝܼܩܵܐ
ܥܲܠ ܚܲܒ̣ܠܵܐ ܕܚܘܼܒܵܟ̣ܝ ܐܵܐܵܪܵܝܵܐ ܦܝܼܫܠܝܼ ܥܠܝܼܩܵܐ
ܚܙܘܼܩܝܝܼ ܡ̣ܢ ܚܲܝܹ̈ܐ ܠܡܵܘܬ̣ܵܐ ܠܵܐ ܝܠܹܗ ܦܫܝܼܩܵܐ
ܪܸܚܩܵܐ ܡ̣ܢ ܐܲܬ̣ܪܝܼ ܠܵܐ ܡܵܨܹܝܢ ܕܗܵܘܹܝܢ ܚܙܝܼܩܵܐ
ܓܵܘ ܒܲܝܬܵܐ ܕܠܸܒܵܟ̣ܝ ܙܥܘܿܪܵܐ ܒܸܕ ܦܵܝܫܹܢ ܛܠܝܼܩܵܐ
ܓܵܘ ܕܪܵܥܵܟ̣̈ܝ ܐܲܝܟ̣ ܝܲܠܵܕ̄ܐ ܙܥܘܿܪܵܐ ܠܨܲܕܪܵܟ̣ܝ ܥܦܝܼܩܵܐ
ܒܸܪܥܵܫܵܐ ܗ̄ܘܹܝܢ ܐܲܝܟ̣ ܐܲܝܠܵܐ ܒܲܕܼܪܵܥܵܐ ܕܐܲܪܝܼܘ̄ܬ̣ܵܐ ܚܢܝܼܩܵܐ
ܠܸܒܝܼ ܚܠܝܼܨܵܐ ܒܦܲܓ̣ܪܝܼ ܐܲܝܟ̣ ܡܝܼܬ̣ܵܐ ܒܨܲܢܕܘܼܩܵܐ ܥܝܼܩܵܐ
ܗܵܘܢܝܼ ܠܐܲܟ̣ܵܐ ܘܬܵܡܵܐ ܘܟܠ ܕܘܼܟܬ̣ܵܐ ܒܚܘܼܫܵܒ̣ܹ̈ܐ ܒܕܼܝܼܩܵܐ
ܩܵܠܵܐ ܕܢܵܩܘܿܫܵܐ ܘܩܲܪܢܵܐ ܕܲܩܪܵܒ̣ܵܐ ܓܵܘ ܢܵܬ̣ـܝܼ ܙܥܝܼܩܵܐ
ܥܲܠ ܒܹܝܡܵܐ ܕܟܘܼܬܵܫܵܐ ܕܵܐܟ̣ܝ ܡܵܨܹܝܢ ܕܦܵܝܫܸܢ ܫܬܝܼܩܵܐ
ܫܒ̣ܘܿܩ ܢܲܦܠܸܢ ܡ̣ܢ ܒܘܼܪܓܵܟ̣ܝ ܪܵܡܵܐ ܘܦܲܝܫܸܢ ܫܚܝܼܩܵܐ
ܫܒ̣ܘܿܩ ܦܲܓ̣ܪܝܼ ܡܵܝܸܬ ܘܲܫܠܲܕܝܼ ܦܵܝܸܫ ܣܸܪܝܵܐ ܚܡܝܼܩܵܐ
ܘܦܵܝܸܫ ܕܸܒ̣ܚܵܐ ܩܵܐ ܫܪܲܩܪܵܩܵܐ ܘܡ̣ܢ ܒܸܣܪܵܐ ܣܪܝܼܩܵܐ
ܓܵܘ ܟܘܼܬܵܫܵܐ ܕܚܘܼܒܵܐ ܠܲܝܬܿ ܡܵܘܬܵܐ ܕܠܵܐ ܬܲܫܢܝܼܩܵܐ
ܫܒ̣ܘܿܩ ܟܠܲܝܗ̈ܝ ܚܲܝ̈ܝܼ ܥܲܝܢ̈ܝܼ ܠܲܫܡܲܝܵܐ ܗܵܘܹܝܢ ܩܠܝܼܩܵܐ
ܠܸܒܝܼ ܚܹܐܪܵܐ ܒܐܝܼܕܼܵܟ̣ܝ ܐܲܣܝܼܪܵܐ ܐܸܕܝܘܿܡ ܦܝܼܫܠܹܗ ܕܒ̣ܝܼܩܵܐ
ܚܲܝܹ̈ܐ ܟܸܪܝܹ̈ܐ ܚܸܠܝܹ̈ܐ ܘܡܲܪܝܼܖܹ̈ܐ ܝܠܲܝܗܝ ܠܚܲܛܵܝܵܐ ܘܲܠܙܲܕܝܼܩܵܐ
ܥܸܕܵܢܵܐ ܡ̣ܢ ܫܘܼܪܵܝܵܐ ܠܲܝܬܿ ܠܵܗ̇ ܟܠܵܝܬ̣ܵܐ ܐܵܦ ܚܲܕܼ̄ ܕܲܩܝܼܩܵܐ
ܓܵܘ ܡܘܼܪܵܝܵܐ ܐܸܢ ܠܵܐ ܪܲܚܛܸܢ ܒܸܕ ܦܵܝܫܸܢ ܐ̄ܚܲܪܵܝܵܐ ܫܒ̣ܝܼܩܵܐ
ܡܬ̣ܘܿܡܵܝܘܼܬ̣ܵܐ ܕܠܵܐ ܡܵܘܬܵܐ ܝܼܠܵܗ̇ ܚܸܠܡܵܐ ܘܣܲܒ̣ܪܵܐ ܦܣܝܼܩܵܐ
ܠܲܝܬ ܙܵܟ̣ܘܼܬ̣ܵܐ ܥܲܠ ܚܸܫܟܵܐ ܐܸܢ ܫܸܡܫܵܐ ܠܹܐ ܗܵܘܹܐ ܙܪܝܼܩܵܐ
ܠܲܝܬ ܓܲܢ̄ܒܵܪܘܼܬ̣ܵܐ ܐܸܢ ܓܲܢ̄ܒܵܪܵܐ ܡ̣ܢ ܡܵܘܬܵܐ ܗܵܘܹܐ ܥܪܝܼܩܵܐ
ܫܒ̣ܘܿܩ ܓܹܐܪܵܐ ܕܚܘܼܒܵܟ̣ܝ ܣܡܝܼܡܵܐ ܠܠܸܒܝܼ ܗܵܘܹܐ ܚܪܝܼܩܵܐ
ܫܒ̣ܘܿܩ ܗܵܘܹܐ ܫܵܘܦܵܐ ܕܨܸܠܦܵܐ ܕܓܹܐܪܵܟ̣ܝ ܪܲܒܵܐ ܥܲܡܝܼܩܵܐ
ܫܒ̣ܘܿܩ ܡܲܓ̰ܪܹܐ ܠܸܒܝܼ ܕܸܡܥܹ̈ܐ ܘܗܵܘܹܐ ܒܕܸܡܵܐ ܣܡܝܼܩܵܐ
ܡܵܘܬܵܐ ܚܲܬܝܼܬܵܐ ܝܠܹܗ ܘܣܲܒ̣ܪܵܐ ܒܢܘܼܚܵܡܵܐ ܠܵܐ ܝܠܹܗ ܦܪܝܼܩܵܐ
ܫܒ̣ܘܿܩ ܗܵܘܹܝܢ ܓܹܒ̣ܵܝܵܐ ܕܚܸܟ̣ܡ̱ܬ̣ܵܐ ܘܐ̄ܪܵܙܹ̈ܐ ܘܥܲܠܹܝܟ̣ܝ ܣܢܝܼܩܵܐ
ܘܦܵܠܚܵܐ ܟܦܝܼܢܵܐ ܠܟ̰ܲܟܵܐ ܘܲܠܬܘܼܪܣܵܝܵܐ ܕܠܲܚܡܵܐ ܘܪܘܿܙܝܼܩܵܐ
ܟܡܵܐ ܕܠܸܒܝܼ ܚܲܝܵܐ ܡ̣ܢ ܨܲܕܪܝܼ ܠܵܐ ܗܵܘܹܐ ܢܦܝܼܩܵܐ
ܫܸܡܵܟ̣ܝ ܥܲܠ ܩܝܼܢܬܵܐ ܘܪܸܩܕܼܵܐ ܕܠܸܒܝܼ ܒܦܵܝܸܫ ܕܝܼܩܵܐ
ܒܝܲܬ̣̈ܪܹܐ ܕܩܝܼܬ̣ܵܪܵܐ ܕܒܵܠܘܿܥܬـܝܼ ܒܩܵܠܵܐ ܚܢܝܼܓ̣ܵܐ ܘܡܪܝܼܩܵܐ
 ܓܵܘ ܩܲܢܟܹܐ ܕܗܲܝܟܠܵܐ ܪܲܒܵܐ ܕܠܸܒܵܟ̣ܝ ܡܩܲܕܫܵܐ ܫܪܝܼܩܵܐ
ܒܐܝܼܡܵܡܵܐ ܐܝܼܬ̣ ܫܲܡܸܫ ܒܲܗܪܹܗ ܠܙܸܩܘܿܪܬܵܟ̣ܝ ܙܠܝܼܩܵܐ
ܒܠܸܠܝܵܐ ܐܝܼܬ̣ ܢܲܗܝܼܪܵܐ ܕܣܝܼܢ ܒܲܚܕܼܵܐ ܥܲܝܢܵܐ ܒܠܝܼܩܵܐ
ܓܵܘܵܝܹ̈ܐ ܕܗܲܝܟܠܵܟ̣ܝ ܐܝܼܬ̣ ܫܪܵܓ̣ܵܐ ܕܚܘܼܒܝܼ ܕܠܝܼܩܵܐ
ܛܒ̣ܘܿܥܝ ܫܸܡܵܟ̣ܝ ܠܣܸܦܘܵܬ̣̈ܝܼ ܩܵܐ ܕܗܵܘܹܐ ܥܦܝܼܦܵܐܝܼܬ̣ ܢܫܝܼܩܵܐ
ܫܬܹܐ ܠܝܼ ܚܲܡܪܵܟ̣ܝ ܬܵܐ ܫܩܘܿܠܝ ܟܵܣܵܐ ܕܚܲܝ̈ܝܼ ܣܦܝܼܩܵܐ
ܟܬ̣ܘܿܒ̣ܝ ܥܲܠ ܩܲܒ̣ܪܝܼ ܣܵܗܕܼܵܐ ܘܡܵܚܘܿܙܵܐ ܥܲܫܝܼܩܵܐ

ܟ̣ܵܡܝܼܣ ܓܝܼܘܲܪܓܝܼܣ
14 ܐܝܼܠܘܿܠ 2014

7

نتاجات بالسريانية / ܕܒܝܚ ܢܦܫܐ ܕܐܫܘܪ دويخ نوشا

« في: 03:52 28/08/2014  »

ܕܒ̣ܝܚ ܢܦ̮ܫܐ ܕܐܫܘܪ

ܫܡܘܿܛ ܠܹܗ ܩܲܢܝܘܼܟ̣ ܐܲܢ̄ܬ ܝܵܐ ܟܵܬ̣ܘܿܒ̣ܵܐ ܝܵܐ ܣܵܦܪܵܐ ܛܲܒܫܵܪܵܐ
ܐܸܢ ܠܵܐ ܝܵܕܥܹܬ ܠܹܗ ܗܘܼܓܵܝܵܐ ܘܣܘܼܟܵܠܵܐ ܕܚܹܐܪܘܼܬ̣ܵܐ ܘܚܘܼܪܵܪܵܐ
ܬܠܘܼܚ ܠܒܵܬܹ̈ܐ ܕܲܡܫܘܼܚܬܘܼܟ̣ ܝܵܐ ܡܵܚܘܿܪܵܐ ܐܲܢ̄ܬ ܝܵܐ ܡܲܚܵܪܵܐ
ܐܸܢ ܠܵܐ ܟܵܬ̣ܒ̣ܹܬ ܗܘܼܡܵܣܵܐ ܒܘܿܕ ܕܒ̣ܝܼܚ ܢܲܦ̮ܫܵܐ ܕܐܵܫܘܿܪ ܓܲܢ̄ܒܵܪܵܐ
ܫܒ̣ܘܿܩ ܪܵܝܹܡ ܩܵܠܵܐ ܕܙܸܡܪܵܐ ܕܣܘܿܓ̣ܝܼܬ̣ܘܼܟ̣ ܝܵܐ ܐܘܼܡܵܢܵܐ ܙܲܡܵܪܵܐ
ܡܫܲܚܠܸܦ ܘܲܡܚܲܕܸܬ̣ ܠܩ̈ܝܼܢܵܬ̣ܵܐ ܥܲܬܝܼܩܹ̈ܐ ܘܩܵܠܹ̈ܐ ܫܸܠܝܹ̈ܐ ܕܟܸܢܵܪܵܐ
ܫܒ̣ܘܿܩ ܪܵܝܹܡ ܩܵܠܵܐ ܕܛܲܒ̣ܠܵܐ ܕܲܩܪܵܒ̣ܵܐ ܥܲܠ ܩܵܠܵܐ ܕܩܝܼܬ̣ܵܪܵܐ
ܩܵܐ ܕܠܵܚܹܡ ܥܲܡ ܪܸܩܕܼܵܐ ܕܲܩܪܲܒ̣ܬ̣ܵܢܵܐ ܥܲܠ ܒܹܝܡܵܐ ܕܕܘܼܪܵܪܵܐ
ܪܫܘܼܡ ܠܹܗ ܕܒ̣ܝܼܚ ܢܲܦ̮ܫܵܐ ܒܹܝܢ ܚܲܝܹ̈ܐ ܘܡܵܘܬܵܐ ܝܵܐ ܨܲܝܵܪܵܐ
ܐܲܝܟ̣ ܣܲܗܪܵܐ ܓܵܘ ܚܸܫܟܵܐ ܒܲܬ̣ܪܹܝܢ ܓܵܘܢܹ̈ܐ ܐ̄ܟܘܼܡܵܐ ܘܲܚܘܵܪܵܐ
ܐܲܝܟ̣ ܫܪܵܓ̣ܵܐ ܕܒܲܗܪܵܐ ܛܪܵܕܼܵܐ ܚܸܫܟܵܐ ܕܒ̣ܵܚܵܐ ܠܢܲܦ̮ܫܹܗ ܘܦܫܵܪܵܐ
ܒܲܕܼܡܘܼܬ̣ܵܐ ܕܐܲܪܝܵܐ ܥܲܠ ܪܵܘܡܬܵܐ ܕܢܝܼܢܘܸܐ ܠܲܡܕܼܝܼܢ̄ܬܹܗ ܒܸܢܛܵܪܵܐ
ܐܲܝܟ̣ ܓܸܠܓܵܡܸܫ ܠܲܝܬ ܠܹܗ ܫܸܢܬ̣ܐܵ ܒܠܸܠܝܵܐ ܘܐܝܼܡܵܡܵܐ ܫܗܵܪܵܐ
ܓܵܘ ܟܘܼܬܵܫܵܐ ܕܐܝܼܬ̣ܘܼܬ̣ܵܐ ܒܡܲܫܛܵܚܵܐ ܕܲܩܪܵܒ̣ܵܐ ܦܬ̣ܝܼܚܵܐ ܕܠܵܐ ܣܸܬܵܪܵܐ
ܠܒ̣ܝܼܫܵܐ ܥܲܠ ܨܲܕܪܹܗ ܕܘܼܪܥܵܐ ܙܩܝܼܪܬܵܐ ܕܠܵܐ ܐܲܬ̣ܝܵܐ ܠܲܣܬܵܪܵܐ
 ܪܸܡܙܹܗ ܐܵܬ̣ܵܐ ܕܐܵܫܘܿܪ ܘܨܲܠܡܵܐ ܕܠܲܡܵܣܘܼ ܘܒܥܸܠܕܒ̣ܵܒ̣ܵܐ ܡܸܢܹܗ ܒܸܢܘܵܪܵܐ
ܟ̮ܲܟܹܗ ܠܒ̣ܝܼܒ̣ܘܼܬ̣ܵܐ ܩܘܝܼܬ̣ܵܐ ܐܲܝܟ̣ ܦܲܪܙܠܵܐ ܠܓܲܪܡܵܐ ܕܲܒ̣ܥܸܠܕܒ̣ܵܒ̣ܵܐ ܬܒ̣ܵܪܵܐ
ܡܗܲܝܡܢܵܐ ܒܨܸܒ̣ܝܵܢܵܐ ܚܹܐܪܵܐ ܐܵܗܵܐ ܝܠܹܗ ܩܪܲܒ̣ܬ̣ܵܢܵܐ ܚܲܕܬ̣ܵܐ ܕܒܲܪ ܕܵܪܵܐ
ܩܪܲܒ̣ܬ̣ܵܢܵܐ ܕܐܵܫܘܿܪ ܠܲܝܬ ܠܹܗ ܫܠܲܡܬܵܐ ܘܠܵܐ ܕܥܲܪܬܵܐ ܠܲܒܵܬ̣̄ܪܵܐ
ܝܵܢ ܙܵܟ̣ܘܼܬ̣ܵܐ ܘܢܲܨܝܼܚܘܼܬ̣ܵܐ ܝܵܢ ܣܵܗܕܼܘܼܬ̣ܵܐ ܒܪܹܫܵܐ ܪܵܡܵܐ ܘܐܝܼܩܵܪܵܐ
ܠܵܐ ܣܵܪܸܒ̣ ܠܡܘܿܡܝܼܬ̣ܵܐ ܕܲܕܒ̣ܲܚܬܵܐ ܟܬ̣ܝܼܒ̣ܬܵܐ ܒܕܸܡܹܗ ܥܲܠ ܐܸܫܛܵܪܵܐ
ܟܠܝܼ ܝܵܐ ܘܡܸܫܬܲܐܠܵܢܵܐ ܘܩܲܝܘܿܡܵܐ ܘܨܠܝܼ ܡ̣ܢ ܟܘܼܪܣܝܵܐ ܕܫܘܼܒ̣ܗܵܪܵܐ
ܝܵܐ ܐܵܡܘܿܪܵܐ ܕܐ̄ܡܝܼܪ ܠܹܗ ܘܐ̄ܡܝܼܪ ܠܗ̄ܘܿܢ ܐ̄ܡܘܿܪ ܠܲܢ ܫܪܵܪܵܐ
ܒܫܘܼܩܵܐ ܕܣܘܼܝܵܣܵܐ ܢܝܼܫܘܼܟ̣ ܙܘܼܙܵܐ ܝܠܹܗ ܘܥܘܼܬ̣ܪܵܐ ܐܲܝܟ̣ ܣܲܡܣܵܪܵܐ
ܣܵܗܕܵܐ ܒܕܸܡܹܗ ܩܢܵܝܵܐ ܠܙܸܕܩܹ̈ܐ ܘܐܲܢ̄ܬ ܡܙܲܒܘܿܢܹܐ ܠܲܨܒ̣ܘܼܬ̣ܵܐ ܒܕܝܼܢܵܪܵܐ
ܥܲܡܵܐ ܡܸܣܟܹܝܢܵܐ ܒܝܸܙܦܵܐ ܓܒ̣ܵܝܵܐ ܠܲܚܡܵܐ ܡ̣ܢ ܥܲܬܝܼܪܵܐ ܘܡ̣ܢ ܬܲܓܵܪܵܐ
ܫܪܝܼ ܠܠܘܼܡܵܕܼܵܐ ܝܵܐ ܡܸܬ̣ܠܲܡܕܼܵܢܵܐ ܗܵܐ ܟܢܘܼܫܝܵܐ ܕܕܘܼܪܵܪܵܐ ܒܸܩܛܵܪܵܐ
ܐܲܣܝܼܪܵܐ ܘܨܸܗܝܵܐ ܠܚܹܐܪܘܼܬ̣ܵܐ ܠܹܐ ܣܵܒ̣ܲܥ ܒܘܲܥ̈ܕܹܐ ܘܡܲܝ̈ܵܐ ܕܗܲܪܗܵܪܵܐ
ܒܥܸܠܕܒ̣ܵܒ̣ܵܐ ܠܹܐ ܥܵܪܸܩ ܒܚܲܕܼ ܒܘܼܝܵـܢܵܐ ܘܐܵܦ ܠܵܐ ܒܚܲܕܼ ܙܘܼܗܵܪܵܐ
ܘܠܵܐ ܩܵܗܹܐ ܣܲܝܦܵܐ ܕܛܵܠܘܿܡܵܐ ܒܲܩܕܵܠܵܐ ܕܫܲܒ̣̈ܪܹܐ ܟܲܕ ܒܸܢܚܵܪܵܐ
ܘܠܹܐ ܢܟ̣ܸܵܦ ܒܲܕܝܵܢܬܵܐ ܩܫܝܼܬ̣ܵܐ ܥܲܠ ܛܲܪܦܵܐ ܕܘܲܪܵܩܵܐ ܓܵܘ ܢܘܼܗܵܪܵܐ
ܣܛܝܼ ܝܵܐ ܢܸܫܪܵܐ ܕܐܵܫܘܿܪ ܡ̣ܢ ܩܲܪܢܵܐ ܪܵܡܬܵܐ ܕܛܘܼܪܵܐ ܕܐ̄ܓܵܪܵܐ
ܨܦܘܿܚ ܘܲܛܪܘܿܕܼ ܠܹܗ ܒܥܸܠܕܒ̣ܵܒ̣ܵܐ ܣܪܝܼܚܵܐ ܐܝܼܬ̣ ܠܘܼܟ̣ ܒܘܼܪܵܪܵܐ
ܡܚܲܪܸܪ ܠܢܝܼܢܘܸܐ ܠܹܐ ܝܠܵܗ ܚܛܝܼܬ̣ܵܐ ܘܠܹܐ ܗ̄ܘܹܝܬ ܒܸܟܦܵܪܵܐ
ܡܚܲܪܸܪ ܠܐܵܫܘܿܪ ܐܲܬ̣ܪܵܐ ܘܥܲܡܵܐ ܐܲܣܝܼܪܵܐ ܬܚܘܿܬ ܢܝܼܪܵܐ ܕܫܘܼܥܡܵܪܵܐ
ܒܕܸܡܘܼܟ̣ ܡܲܫܬـܝܼ ܠܐܲܪܥܘܼܟ̣ ܨܗܝܼܬ̣ܵܐ ܝܵܐ ܢܵܛܲܪ ܥܲܦܪܵܐ ܘܐܲܟܵܪܵܐ
ܦܣܘܿܥ ܠܲܩܵܕ̄ܡܵܐ ܦܘܼܪܣܵܐ ܐ̄ܚܲܪܵܝܵܐ ܝܠܹܗ ܘܥܸܕܵܢܵܐ ܒܣܘܼܪܗܵܒ̣ܵܐ ܥܒ̣ܵܪܵܐ
ܐܵܫܘܿܪ ܘܢܝܼܢܘܸܐ ܬܚܘܿܬ̣ ܥܲܦܪܵܐ ܘܡܲܝ̈ܵܐ ܢܝܼܚܵܐ ܒܢܝܼܚܵܐ ܒܸܛܡܵܪܵܐ
ܠܵܐ ܗܵܘܹܐ ܠܘܼܟ̣ ܬܘܼܟ̣ܠܵܢܵܐ ܠܚܲܒ̣ܪܵܐ ܕܗܵܘܹܐ ܠܚܲܒ̣ܪܹܗ ܩܲܒ̣ܪܵܐ ܒܸܚܦܵܪܵܐ
ܚܹܐܪܵܐ ܝܗ̄ܘܹܝܬ ܫܡܘܼܛ ܠܹܗ ܩܲܝܕܵܐ ܕܓܲܒܵܐ ܘܫܲܒ̣ܛܵܐ ܘܟܠ ܐܲܣܵܪܵܐ
ܝܵܐ ܛܲܢܵܢܵܐ ܘܦܵܠܚܵܐ ܢܲܨܝܼܚܵܐ ܡܲܚܙܝܼ ܙܪܝܼܙܘܼܬ̣ܵܐ ܘܫܲܦܝܼܪ ܕܘܼܒܵܪܵܐ
ܝܵܐ ܕܒ̣ܝܼܚ ܢܲܦ̮ܫܵܐ ܕܐܵܫܘܿܪ ܡܚܲܕܸܬ̣ ܠܣܵܗܕܼܘܼܬ̣ܵܐ ܘܲܥܒ̣ܘܿܕܼ ܕܘܼܡܵܪܵܐ
ܣܵܗ̈ܕܹܐ ܟܠܲܝܗܝ ܘܝܵܘܣܸܦ ܘܝܘܼܒܸܪܬ ܘܝܘܼܚܲܢܵܐ ܥܲܠܘܼܟ̣ ܒܸܣܦܵܪܵܐ

ܟ̣ܵܡܝܼܣ ܓܝܼܘܲܪܓܝܼܣ
28 ܐܒ 2014

8

نتاجات بالسريانية / رد: الزيارة الثانية من اقربائي الى قرية قارو نيرو

« في: 05:53 21/08/2014  »

ܡܝܲܩܪܵܐ ܩܲܫܘܼ ܐܲܒ̣ܪܵܗܹܡ
ܗܵܘܹܝܬ ܒܲܣܝܼܡܵܐ ܪܲܒܵܐ ܠܐܲܢܹ̈ܐ ܨ̈ܘܼܪܝܵܬܵܐ ܕܩܵܪܘܼ ܘܢܝܼܪܘܵܐ،
ܐܲܠܵܗܵܐ ܗܵܘܹܐ ܥܲܡܘܼܟ̣

ܐܲܚܘܼܢܘܼܟ̣
ܟ̣ܵܡܝܼܣ ܓܝܼܘܲܪܓܝܼܣ 

9

نتاجات بالسريانية / ܢܝܢܘܐ - ܐܪܝܘܬܐ ܕܐܫܘܪ ܨܠܝܦܬܐ نينوى - لبوة آشور الجريحة

« في: 05:14 15/08/2014  »

ܢܝܢܘܐ
ܐܲܪܝܼܘ̄ܬ̣ܵܐ ܕܐܵܫܘܿܪ ܨܠܝܼܦܬܵܐ

ܟܬ̣ܝܼܒ̣ܵܐ ܝܠܹܗ ܫܸܡܵܟ̣ܝ ܓܵܘ ܦܵܣܘܿܩܹ̈ܐ ܕܲܚܕܼܲܬܵܐ ܘܥܲܬ̈ܝܼܩܵܬ̣ܵܐ
ܘܲܚܪܝܼܛܵܐ ܝܠܹܗ ܥܲܠ ܠܘܼܚܹ̈ܐ ܕܟܹܐܦܵܐ ܘܐܵܠܹܦ ܐܲܠܦܝܼ̈ܢ ܠܸ̈ܒܵܘܵܬ̣ܵܐ
ܗܵܐ ܡ̣ܢ ܙܲܒ̣ܢܵܐ ܕܲܙܪܵܩܬܵܐ ܕܬܵܪܝܼܚܵܐ ܕܲܡ̈ܕܼܝܼܢܵܬ̣ܐ ܘܲܕܡܲܠ̈ܟܿܘܵܬ̣ܵܐ
ܐܲܢ̄ܬـܝ ܡܲܒܪܘܿܩܹܐ ܝܗ̄ܘܵܬܝ ܐܲܝܟ̣ ܕܲܗܒ̣ܵܐ ܘܝܵܩܘܿܢ̈ܕܹܐ ܘܡܵܪܓܵܢ̈ܝܵܬ̣ܵܐ
ܝܵܐ ܡܕܼܝܼܢ̄ܬܵܐ ܕܒܘܼܪܓܹ̈ܐ ܪܵܡܹ̈ܐ ܘܗܲܝܟ̈ܠܹܐ ܘܡܲܣ̈ܓ̣ܕܹܐ ܘܙܲܩ̈ܘܼܪܵܬ̣ܵܐ
ܘܲܕܼܛܲܟ̣ܣܹ̈ܐ ܥܲܬܝܼܩܹ̈ܐ ܕܬܸܫܡܸܫܬܵܐ ܘܐ̄ܪܵܙܹ̈ܐ ܕܟܲܗܢܘܼܬ̣ܵܐ ܕܬܵܘ̈ܕܝܵܬ̣ܵܐ
ܝܵܐ ܡܕܼܝܼܢ̄ܬܵܐ ܕܓܲܢܹ̈ܐ ܬܸܠܝܹ̈ܐ ܘܒܹܝܬ̣ ܐܲܪܟܹ̈ܐ ܡܫܲܡܗܹ̈ܐ ܕܲܟܼ̈ܬ̣ܝܼܒ̣ܵܬ̣ܵܐ
ܡܫ̈ܘܿܪܸܪܹܐ ܒܡܲܟܼܬܲܒ̣ ܙܲܒ̣ܢܹ̈ܐ ܘܝܵܕܘܿܥܬ̣ܵܢܹ̈ܐ ܒܝܘܼܠܦܵܢ ܐܵܫ̈ܘܿܪܵܝܵܬ̣ܐ
ܟܒ̣ܝܼܫܠܵܟ̣ܝ ܠܒܹܝܬ̣ ܥܸܬܩܹ̈ܐ ܡܫܲܡܗܹ̈ܐ ܒܨܲܠܡܹ̈ܐ ܓܠܝܼܦܹ̈ܐ ܒܐܘܼܡܵܢܘܼܬ̣ܵܐ
ܠܵܡܵܣܘܿ ܐܵܫܘܿܪܵܝܵܐ ܘܓܲܠܓܵܡܸܫ ܘܣܲܢܚܹܪܹܝܒ̣ ܡܲܠܵܠܹ̈ܐ ܒܲܫܬܝܼܩܘܼܬ̣ܵܐ
ܒܘܼܕ ܗܘܼܡܵܣܹ̈ܐ ܕܓܲܢ̄ܒܵܪܘܼܬ̣ܵܐ ܘܐ̄ܪܵܙܹ̈ܐ ܕܙܵܟ̣ܘܼܬ̣ܵܐ ܘܲܕܼܡܬ̣ܘܼܡܵܝܘܼܬ̣ܵܐ
ܜܡܝܼܪܹܐ ܝܠܲܝܗܝ ܒܥܲܦܪܵܟ̣ܝ ܒܹܝܬ̣ ܩܒ̣̈ܘܼܪܹܐ ܕܡܲܠܟܹ̈ܐ ܕܐܵܫܘܿܪ ܘܡܲܠ̈ܟܵܬ̣ܵܐ
ܘܕܲܢܒ̣ܝܹ̈ܐ ܘܩܲܕܝܼ̈ܫܹܐ ܘܝܘܿܢܲܢ ܡܫܲܡܗܵܐ ܒܢܘܼܢܵܐ ܘܐܸܓܵܪܬܵܐ ܕܲܬ̣ܝܵܒ̣ܘܼܬ̣ܵܐ
ܘܕܲܝ̈ܪܹܐ ܘܥܘܼܡ̈ܪܹܐ ܘܩܸ̈ܠܵܝܵܬ̣ܵܐ ܕܪܲܒܵܢܹ̈ܐ ܘܝܼܚܝܼܕܵܝܹ̈ܐ ܘܪܲܒܵܢ̈ܝܵܬ̣ܵܐ
ܒܓܵܘܵܟ̣ܝ ܣܪܲܛ ܚܕܲܬܵܐ ܒܠܸܫܵܢܵܐ ܕܲܡܫܝܼܚܵܐ ܒܐܸܣܛܪܲܢ̈ܓܹܝܠܵܝܵܬ̣ܵܐ
ܒܓܵܘܵܟ̣ܝ ܦܝܼܫܠܹܗ ܕܪܝܼܫܵܐ ܘܲܡܦܘܼܫܩܵܐ ܝܘܼܠܦܵܢܵܐ ܕܐܲܠܵܗܘܼܬ̣ܵܐ ܘܲܕܐ̄ܢܵܫܘܼܬ̣ܵܐ
ܐܸܕܝܘܿܡ ܛܫܵܐ ܩܵܠܵܐ ܕܢܵܩܘܿܫܹ̈ܐ ܕܥܘܼܡܪܵܢܵܟ̣ܝ ܘܥܘܿܢ̈ܝܵܬ̣ܵܐ ܕܲܨ̈ܠܵܘܵܬ̣ܵܐ
ܬܚܘܿܬ̣ ܙ̈ܥܵܩܵܬ̣ܵܐ ܘܲܨܪܵܚ̈ܝܵܬ̣ܵܐ ܕܕܵܥܸܫ ܒܩܵܠܵܐ ܕܲܡܪܲܘ̈ܪܒ̣ܵܢܝܵܬ̣ܵܐ
ܓܙܝܼܡܠܗ̄ܘܼܢ ܘܝܼܗ̄ܒ̣ܠܗ̄ܘܼܢ ܠܲܒܢ̈ܘܼܢܵܟ̣ܝ ܐܲܦܬ̣ܵܐ ܩܵܐ ܚܲܕ̄ܟܡܵܐ ܫ̈ܵܥܵܬ̣ܵܐ
ܥܲܠ ܓܘܼ̈ܕܹܐ ܕܒܵܬܹ̈ܐ ܟܬ̣ܝܼܒ̣ܠܗ̄ܘܼܢ ܣܡܘܼܩܬܵܐ ܢܘܼܢ ܐܵܬ̣ܘܼܬ̣ܵܐ
ܘܝܸܗ̄ܒ̣ܠܗ̄ܘܼܢ ܓܘܼܒܵܝܹ̈ܐ ܡܲܪܝܼ̈ܪܹܐ ܐܲܝܟ̣ ܕܲܒ̣ܙܲܒ̣ܢܵܐ ܕܚܲܢܦܘܼܬ̣ܵܐ
ܓܙܝܼܬ̣ܵܐ ܝܵܢ ܡܲܫܠܲܡܬܵܐ ܝܵܢ ܣܲܝܦܵܐ ܘܡܵܘܬܵܐ ܝܵܢ ܬܲܘܬܵܒ̣ܼܘܬ̣ܵܐ
ܟܒ̣ܲܫ ܠܐܲܪܥܵܟ̣ܝ ܘܒܲܣܲܪܘ ܘܛܲܢܸܦܘ ܠܲܒ̣ܢܵܬ̣ܵܟ̣̈ܝ ܒܬ̣̈ܘܼܠܵܬ̣ܵܐ
ܩܛܲܠܘ ܠܲܒܢ̈ܘܿܢ̈ܵܟ̣ܝ ܘܫܒ̣ܝܼܩܝܼ ܕܠܵܐ ܩܒ̣ܲܪܬܵܐ ܘܲܕܠܵܐ ܬܸܫܡ̱̈ܫܵܬ̣ܵܐ
ܡܫܘܿܚܠܸܦܠܗ̄ܘܼܢ ܙܘܼܝܵܚܹ̈ܟ̣ܝ ܠܲܩܒ̣ܲܪܬܵܐ ܕܥܲܢܝܼ̈ܕܼܹܐ ܘܐܲܒ̣ܝܼܠܘܼܬ̣ܵܐ
ܐܝܼܢܵܐ ܨܪܵܚ̈ܝܵܬܵܟ̣ܝ ܘܬܸܢܲܚܝܵܬ̣ܵܟ̣ܝ ܝܵܐ ܐܲܪܝܼܬ̣ܵܐ ܫܥܝܼܫܠܗ̄ܘܼܢ ܠܲܒ̣ܪܝܼܬ̣ܵܐ
ܫܥܝܼܫܠܗ̄ܘܼܢ ܠܬܹܐܪܬܵܐ ܕܬܹܒ̣ܹܝܠ ܒܡܸܨܥܵܐ ܕܝܘܼܕܼܵܥܵܐ ܘܡܲܘܕܥܵܢܘܼܬ̣ܵܐ
ܡܘܼܪܥܸܫܠܵܗ̄ܘܼܢ ܠܲܕܡܝܼܟ̣ܹ̈ܐ ܐܵܦ ܠܐܵܢ̈ܝܼ ܫܸܢܝܹ̈ܐ ܒܫܸܢܬ̣ܵܐ ܕܪܵܘܵܝܘܼܬ̣ܵܐ
ܕܓܵܘ ܓܲܢܹ̈ܐ ܬܚܘܿܬ̣ ܛܸܠܵܠܹ̈ܐ ܕܐܝܼܠܵܢܹ̈ܐ ܕܒܲܠܘܼܛܵܐ ܘܬܘܼܬ̣ܵܐ
ܐܲܝܟܵܐ ܝܠܲܝܗܝ ܡܲܠܲܐܟ̣ܵܟ̣̈ܝ ܘܢܵܛ̈ܘܿܪܹܐ ܕܬܲܪܥܹ̈ܐ ܡܫܲܡܗܹ̈ܐ ܒܲܙܪܝܼܙܘܼܬ̣ܵܐ؟
ܪܓ̣ܝܼܙܵܐ ܘܲܪܚܝܼܩܵܐ ܝܠܹܗ ܡܸܢܵܟ̣ܝ ܐܵܫܘܿܪ ܐܲܠܵܗܵܐ ܕܓܲܢ̄ܒܵܪܘܼܬ̣ܵܐ؟
ܘܟܠܲܝܗ̈ܝ ܢܲܪܓܵܠ ܘܢܲܒܘܼ ܘܥܸܫܬܵܪ ܐܲܠܵܗܹ̈ܐ ܕܲܩܪܵܒ̣ܵܐ ܘܚܲܟܝܼܡܘܼܬ̣ܵܐ؟
ܠܡܵܢܵܐ ܟܠ ܐܵܗܵܐ ܫܸܬܩܵܐ ܘܲܣܒܵܪܬܵܐ ܘܲܟܠܵܝܬ̣ܵܐ ܘܫܸܠܝܘܼܬ̣ܵܐ؟
ܐܝܼܬ̣ ܠܵܟ̣ܝ ܒܢ̈ܘܼܢܹܐ ܐܝܼܬ̣ ܠܵܟ̣ܝ ܒ̈ܢܵܬ̣ܵܐ ܐܝܼܬ̣ ܠܵܟ̣ܝ ܥܠܲܝܡܘܼܬ̣ܵܐ
ܐܵܠܹܦ ܐܲܠܦ̈ܝܼܢ ܠܗܝܼܩܹ̈ܐ ܕܢܵܫܩܝܼ ܠܥܲܦܪܵܟ̣ܝ ܒܟܠ ܚܲܕܘܼܬ̣ܵܐ
ܒܸܕ ܕܲܥܪܝܼ ܡ̣ܢ ܒܵܬ̣̄ܪ ܝܲܡܹ̈ܐ ܡ̣ܢ ܢܘܼܟ̣ܪܵܝܘܼܬ̣ܵܐ ܘܡ̣ܢ ܓܵܠܘܼܬ̣ܵܐ
ܐܸܕܝܘܼܡ ܝܵܢ ܩܘܼܕܡܹܐ ܝܵܢ ܒܕܲܥܬ̣ܝܼܕܼ ܩܘܼܪܒܵܐ ܝܵܢ ܒܣܲܝܒܘܼܬ̣ܵܐ
ܠܦܘܼܪܩܵܢܹܟ̣ܝ ܘܲܠܚܘܼܪܵܪܹܟ̣ܝ ܡ̣ܢ ܫܘܼܢܵـܩܵܐ ܕܐܲܣܝܼܪܘܼܬ̣ܵܐ ܘܥܲܒ̣ܕܘܼܬ̣ܵܐ

 ܟ̣ܵܡܝܼܣ ܓܝܼܘܲܪܓܝܼܣ
ܐܒ 2014

10

نتاجات بالسريانية / رد: ܩܜܠ ܥܡܐ ܐܫܘܪܝܐ - ܣܝܦܐ 1915 ܣܡܝܠܐ 1933 المذابح الآشورية- سيفو وسميل

« في: 08:05 13/08/2014  »

ܡܝܲܩܪܵܐ ܪܵܒܝܼ ܩܲܫܘܿ ܐܲܒ̣ܪܵܗܹܡ 
ܫܠܵܡܵܐ 
ܬܵܘܕܝܼ ܪܵܒܝܼ ܩܲܫܘܿ، ܘܗܵܘܹܝܬ ܐܵܦ ܐܲܢ̄ܬ ܒܲܣܝܼܡܵܐ ܩܵܐ ܣܢܵܕܬܵܐ ܕܠܸܫܵܢܲܢ ܘܟܵܬܘܿܒ̣ܲܝ̈ܢ.
ܥܲܡ ܚܘܼܒܝܼ ܘܐܝܼܩܵܪܝܼ
ܐܲܚܘܼܢܘܿܟ̣
ܟ̣ܵܡܝܼܣ ܓܝܼܘܲܪܓܝܼܣ

11

نتاجات بالسريانية / ܩܜܠ ܥܡܐ ܐܫܘܪܝܐ - ܣܝܦܐ 1915 ܣܡܝܠܐ 1933 المذابح الآشورية- سيفو وسميل

« في: 07:55 07/08/2014  »

ܩܜܠ ܥܡܐ
ܣܝܦܐ 1915ܣܡܝܠܐ 1933
ܝܘܡܐ ܕܣܗܕܐ ܐܫܘܪܝܐ


ܬܸܫܥܝܼܢ ܘܬܸܫܥܵܐ ܫܸܢܹ̈ܐ ܥܒ̣ܲܪ ܠܲܕܟ̣ܵܪܵܐ ܕܦܸܪܡܵܐ ܕܣܲܝܦܵܐ ܥܘܼܬ̣ܡܵܢܵܝܵܐ
ܘܲܬ̣ܡܵܢܝܼܢ ܘܲܚܕܼܵܐ ܫܹܢ̄ܬܵܐ ܥܒ̣ܲܪ ܠܲܕܟ̣ܵܪܵܐ ܕܦܸܪܡܵܐ ܕܚܲܪܒܵܐ ܥܝܼܪܵܩܵܝܵܐ
ܓܘܼܢܚܵܐ ܘܪܘܼܫܥܵܐ ܪܲܒܵܐ ܣܪܝܼܚܵܐ ܘܣܲܪܝܵܐ ܕܲܩܛܲܠ ܥܲܡܵܐ ܐܵܫܘܿܪܵܝܵܐ
ܫܬܝܼܠܹܐ ܒܨܲܕܪܲܢ ܘܚܲܨܲܢ ܣܲܝܦܵܐ ܘܚܲܪܒܵܐ ܘܗܵܠܵܐ ܕܸܡܵܐ ܓܪܵܝܵܐ
ܡ̣ܢ ܐܹܘܪܘܿܦܵܐ ܩܕܝܼܚ ܠܹܗ ܢܘܼܪܵܐ ܕܲܩܪܵܒ̣ܵܐ ܬܹܒ̣ܹܝܠܵܝܵܐ ܗܵܘ̇ ܩܲܕܼ̄ܡܵܝܵܐ
ܐܲܝܟ̣ ܒܘܼܠܩܵܢܵܐ ܫܘܝܼܪ ܠܹܗ ܬܸܢܹܗ ܥܲܠ ܬܚܘܼܡܹ̈ܐ ܕܡܲܕܢ̱ܚܵܐ ܡܸܨܥܵܝܵܐ
ܐܲܝܟ̣ ܙܘܼܠܙܵܠܵܐ ܫܥܝܼܫ ܠܹܗ ܠܝܲܡܵܐ ܘܝܲܒ̣ܫܵܐ ܘܲܪܩܝܼܥܵܐ ܐܵܐܲܪܵܝܵܐ
ܩܪܵܒ̣ܵܐ ܕܡܵܘܒܕܼܵܢܘܼܬ̣ܵܐ ܕܠܲܝܬ̣ ܠܹܗ ܕܘܼܡܝܵܐ ܒܬܵܪܝܼܚ ܒܲܪܢܵܫܵܝܵܐ
ܟܦܝܼܫܠܗ̄ܘܼܢ ܥܢܵܢܹ̈ܐ ܐ̄ܟܘܿܡܹ̈ܐ ܕܪܘܼܓ̣ܙܵܐ ܒܲܫܡܲܝܵܐ ܕܥܲܡܵܐ ܒܹܝܬ̣ ܢܲܗܪܹܝܢܵܝܵܐ
ܘܕܸܐܒ̣ܹ̈ܐ ܣܪܝܼ̈ܚܹܐ ܘܥܘܼܪܒ̣ܹ̈ܐ ܟܦܝܼܢܹ̈ܐ ܘܨܸܗܝܹ̈ܐ ܠܕܸܡܵܐ ܘܒܸܣܪܵܐ ܢܵܝܵܐ
ܡܚܹܐ ܢܵܩܘܿܫܵܐ ܓܵܘ ܥܘܼܡܪܵܢܹ̈ܐ ܐܲܝܟ̣ ܙܘܼܗܵܪܵܐ ܩܸܢܜܵܐ ܘܡܘܿܬ̣ܵܐ ܡܜܵܝܵܐ
ܐܵܫܘܿܪ ܡܚܘܿܨܪܵܐ ܒܹܝܢ ܬܘܼܪܟܵܝܵܐ ܘܥܲܪܵܒܵܝܵܐ ܘܒܹܝܢ ܦܲܪܣܵܝܵܐ ܘܣܸܡܟܘܿ ܫܹܟܸܟܢܵܝܵܐ
ܡ̣ܢ ܟܠ ܓܹܒܵܢܹ̈ܐ ܡܲܕܢ̱ܚܵܝܵܐ ܘܡܲܥ̱ܪܒ̣ܵܝܵܐ ܘܓܲܪܒܝܵܝܵܐ ܘܬܲܝܡܢܵܝܵܐ
ܓܵܘ ܗܲܟܵܪܹܵܐ ܘܐܘܼܪܡܝܼ ܘܢܝܼܢܘܸܐ ܘܣܸܡܹܝܠܹܐ ܘܛܘܼܪܵܐ ܥܲܒܕܝܼܢܵܝܵܐ
ܒܥܸܠܕܒ̣ܵܒܹ̈ܐ ܕܐ̄ܬ̣ܸܡܵܠܝ ܡܚܲܝ̈ܕܹܐ ܐܸܕܝܘܿܡ ܕܲܪܩܘܼܒ̣ܠ ܕܟܠ ܡܫܝܼܚܵܝܵܐ
ܢܸܣܛܘܿܪܢܵܝܵܐ ܝܵܢ ܐܵܪܬ̣ܘܿܕܘܼܟܣܵܝܵܐ ܘܩܵܬ̣ܘܿܠܝܼܩܵܝܵܐ ܘܟܠ ܨܠܝܼܒ̣ܵܝܵܐ
ܘܐܲܚܲܝ̈ܢ ܝܵܘܢܵܝܵܐ ܥܲܡ ܐܵܪܸܡܢܵܝܵܐ ܬܸܪܘܲܝܗ̈ܝ ܬܸܠܝܹ̈ܐ ܒܲܨܠܝܼܒ̣ܵܐ ܝܼܫܘܿܥܵܝܵܐ
ܐܹܝܠ ܐܹܝܠ ܥܲܡܵܐ ܨܪܵܚܵܐ ܡܵܘܬ̣ܵܐ ܩܪܸܒ̣ܠܹܗ ܐܵܦ ܚܲܕ ܠܵܐ ܒܸܫܡܵܥܝܵܐ
ܩܸܛܠܵܐ ܘܦܪܲܡܬܵܐ ܒܟܠܲܝ̈ܗܝ ܟ̰ܲܟܹ̈ܐ ܠܟܠ ܡܲܢ ܕܠܹܐ ܝܠܹܗ ܡܘܼܚܲܡܵܕܵܝܵܐ
ܠܲܝܬ̣ ܗ̄ܘܵܐ ܦܠܲܜܬܵܐ ܐܸܠܵܐ ܥܒ̣ܲܪܬܵܐ ܥܲܡ ܒܲܪܩܝܵܡܵܐ ܐܸܢܓܠܝܼܫܵܝܵܐ ܘܐܘܼܪܸܣܢܵܝܵܐ
ܚܸܕܼܝܹ̈ܐ ܒܡܘܿܬ̣ܵܐ ܡܲܠܸܟܹ̈ܐ ܥܲܡ ܩܪܲܒ̣ܬ̣ܵܢܹ̈ܐ ܠܢܝܼܫܵܐ ܕܦܘܼܪܩܵܢܵܐ ܟܠܵܢܵܝܵܐ
ܬܚܘܼܬ ܚܕܼܵܐ ܐܵܬ̣ܵܐ ܡܚܲܝ̈ܕܹܐ ܒܪܹܫܵܢܘܼܬ̣ܵܐ ܕܐܲܒ̣ܵܐ ܡܥܲܠܝܵܐ ܐܘܼܡܬܵܢܵܝܵܐ
ܡܜܠ ܚܘܼܒܘܼܟ̣ ܠܫܲܝܢܵܐ ܘܲܫܠܵܡܵܐ ܡܪܵܪܵܐ ܕܩܲܗܘܵܐ ܒܦܘܿܡܘܼܟ̣ ܚܠܵܝܵܐ
ܒܪܝܼܟ̣ܬܵܐ ܣܲܗܕܘܼܬ̣ܘܼܟ̣ ܝܵܐ ܙܲܟܵܝܵܐ ܡܵܪܝ ܒܸܢܝܵܡܹܝܢ ܩܵܬ̣ܘܿܠܝܼܩܵܐ ܫܸܡܥܘܿܢܵܝܵܐ
ܥܹܕܬܘܼܟ̣ ܗܵܠܵܐ ܚܲܡܪܵܐ ܕܝܼܫܘܿܥ ܫܬܵܝܵܐ ܘܕܸܡܵܐ ܝܲܩܝܼܪܵܐ ܕܣܵܗ̈ܕܹܐ ܓܣܵܝܵܐ
ܓܲܖ̈ܡܹܐ ܘܩܲܪܩܲܦ̈ܝܵܬ̣ܵܐ ܕܣܵܗ̈ܕܹܐ ܦܵܝܵܫܵܐ ܐܲܝܟ̣ ܣ̈ܵܗܵܕܹܐ ܫܪܵܪܵܐ ܓܠܵܝܵܐ
ܣܵܒ̣ܹ̈ܐ ܘܐ̄ܢܸܫܹ̈ܐ ܘܫܲܒ̣̈ܪܹܐ ܩܛܝܼ̈ܠܹܐ ܒܣܲܝܦܵܐ ܣܲܢܝܵܐ ܫܲܒ̣ܛܵܢܵܝܵܐ ܘܬܵܘܕܝܼܬ̣ܵܢܵܝܵܐ
ܬܸܫܥܝܼܢ ܘܬܸܫܥܵܐ ܫܸܢܹ̈ܐ ܘܗܵܠܵܐ ܡܹܐܙܲܠܬܵܐ ܕܕܸܡܵܐ ܠܹܐ ܝܠܵܗ̇ ܟܠܵܝܵܐ
ܣܲܝܦܵܐ ܥܘܼܬ̣ܡܵܢܵܝܵܐ ܘܚܲܪܒܵܐ ܕܥܝܼܪܵܩܵܝܵܐ ܘܜܠܘܼܡܝܵܐ ܨܸܕܵܡܵܝܵܐ ܘܣܟܝܼܢܵܐ ܕܕܵܥܵܫܵܝܵܐ
ܘܗܵܠܵܐ ܣܪܵܒ̣ܬܵܐ ܘܠܵܐ ܡܵܘܕܵܝܬܵܐ ܒܝܲܕ ܝܵܪܘܿܬ̣ܵܐ ܕܩܵܪܹܐ ܠܢܲܦ̮ܫܹܗ ܥܲܠܡܵܢܵܝܵܐ
ܫܠܵܡܵܐ ܡ̣ܢ ܙܪܵܩܵܐ ܕܫܸܡܫܵܐ ܠܓܢܵܝܵܐ ܝܵܐ ܣܵܗܕܵܐ ܕܐܵܫܘܿܪ ܡܬ̣ܘܿܡܵܝܵܐ
ܫܒ̣ܘܿܩ ܥܲܒ̣ܪܝܼ ܐܲܠܦܹ̈ܐ ܕܫܸܢܹ̈ܐ ܕܵܟ̣ܪܘܼܟ̣ ܘܫܸܡܘܼܟ̣ ܒܠܸܒܲܢ ܝܼܠܹܗ ܚܵܝܵܐ

ܟ̣ܵܡܝܼܣ ܓܝܼܘܲܪܓܝܼܣ
7 ܐܒ 2014

12

أدب / نينوى- لبوة آشور الجريحة

« في: 06:43 01/08/2014  »

نينوى
لبوة آشور الجريحة

كتب اسمك في الانجيل والتوراة في ابرز الآيات
وعلى الواح  الحجر وملايين القلوب منحوت
منذ عصر فجر التاريخ والسلالات
انت تلمعين كالذهب والمرجان والياقوت
يا مدينة الابراج والمعابد والزقورات
وأقدم الطقوس وأسرار الكهنوت
يا مدينة الجنائن المعلقة واكبر واشهر المكتبات
في موسوعة التاريخ وبعلم الآشوريات مثبوت
احتليت اشهر متاحف العالم بالتماثيل والجداريات  
لماسو الآشوري وكلكامش وسنحاريب ينطقون ولو بصموت 
عن الملاحم والبطولات وأسرار الخلود والملكوت
فيك مثوى ملوك آشور والملكات 
ومراقد القديسين والأنبياء ويونان ذو قصة الحوت
واديرة الرهبان والراهبات
فيك خطط الانجيل بلغة المسيح بالاسطرنجيليات
ودرس وفسر علم اللاهوت والناسوت
اليوم اختفت اصوات اجراس كنائسك وترانيم الصلوات
تحت هتافات داعش بمكبرات الصوت
هددوا ابناءك وأمهلوهم بضع ساعات  
كتبوا حرف النون على جدران البيوت
 اعطوهم ثلاث اسوأ الخيارات
اما الرحيل او الجزية او الموت
احتلوا ارضك واغتصبوا العذارى والفتيات
ذبحوا ابناءك وتركوهم بدون دفن وبلا تابوت
لكن صراخك يا لبوة آشور الجريحة والآهات 
هز ضمائر العالم عبر شبكة العنكبوت
ايقضت النائمين وحتى السكارى في المنتزهات
 من تحت ضلال اشجار البلوط والتوت 
اين ملائكتك وحراس البوابات
هل غضب منك آشور اله الجبروت؟
هل غضبت عليك الهتك في السماوات؟ 
 نركال ونبو ونيننورتا وعشتاروت؟
حولوا الاعياد والمهرجانات الى تعازي وتشييع الجنازات
لماذا اذا كل هذا الانتظار والصمت والسكوت؟
ابنائك قادمون من وراء البحار والمحيطات
فليرحل الدخيل والمحتل والطاغوت.

خاميس كيوركيس
01 اب 2014

13

نتاجات بالسريانية / ملحمة شعرية - القصيدة الرابعة عشر ܗܘܡܣܐ ܡܚܪܝܐ - ܡܫܘܚܬܐ ܝܕ

« في: 06:38 29/07/2014  »

ܗܘܡܣܐ ܡܚܪܝܐ
ܡܫܘܚܬܐ ܝܕ
ܝܵܐ ܐܲܠܵܗܬܵܐ ܥܪܘܼܩܝ ܡ̣ܢ ܒܹܝܬ̣ ܡܲܥܡܪܵܟ̣ܝ ܕܓܵܘ ܦܲܠܝܼܛܵܐ
ܣܛܵܝ ܒܚܸܡܬ̣ܵܐ ܡ̣ܢ ܪܩܝܼܥܵܐ ܐܲܝܟ̣ ܟܵܘܟ̣ܒ̣ܵܐ ܒܲܗܪܵܢܵܐ ܟܫܝܼܛܵܐ
ܥܒ̣ܘܼܪܝ ܠܡܲܠܟܘܼܬ̣ܵܐ ܬܲܚܬܵܝܬܵܐ ܒܚܲܝܠܵܐ ܐܲܠܵܗܵܝܵܐ ܘܗܵܘܢܵܐ ܡܠܝܼܛܵܐ
ܣܪܘܼܛܝ ܠܹܗ ܩܪܵܡܵܐ ܕܚܸܫܟܵܐ ܥܲܠ ܦܲܐܬ̣ܵܐ ܕܗܵܘܬ̣ܵܐ ܚܝܼܛܵܐ
ܩܛܘܿܠܝ ܠܢܵܛܘܿܪܵܐ ܕܥܲܪܝܵܐ ܝܠܹܗ ܠܬܲܪܥܵܐ ܕܲܫܝܘܿܠ ܣܲܢܝܵܐ ܫܝܼܛܵܐ
ܡܚܲܪܪܸܪܝ ܠܢܲܦ̮ܫܵܐ ܐܲܣܝܼܪܬܵܐ ܕܒܲܪܢܵܫܵܐ ܡ̣ܢ ܐܝܼܕܼܵܐ ܕܡܲܠܲܐܟ̣ܵܐ ܠܝܼܛܵܐ
ܫܡܘܼܛܝ ܠܹܗ ܩܲܝܕܵܐ ܘܢܝܼܪܵܐ ܥܲܠ ܐܝܼܕܵܐ ܘܲܩܕܵܠܵܐ ܕܒܲܪܢܵܫܵܐ ܩܡܝܼܛܵܐ
ܬܵܐ ܛܥܘܿܡܝ ܠܵܗ̇ ܚܸܠܝܘܼܬ̣ܵܐ ܕܚܲܝܹ̈ܐ ܘܲܡܪܵܪܵܐ ܕܡܵܘܬ̣ܵܐ ܫܛܝܼܛܵܐ
ܫܬܵـܝ ܠܚܲܡܪܵܐ ܚܸܠܝܵܐ ܕܚܲܝܹ̈ܐ ܒܕܸܡܵܐ ܡܲܪܝܼܪܵܐ ܕܡܵܘܬ̣ܵܐ ܚܠܝܼܛܵܐ
 ܓܵܘ ܩܲܒ̣ܪܵܐ ܪܘܼܫܡܵܐ ܕܗܸܓܓ̣ܵܐ ܕܒܲܪ ܠܸܠܝܵܐ ܒܓܵܘܢܵܐ ܐ̄ܟܘܼܡܵܐ ܠܩܝܼܛܵܐ
ܬܵܘܠܥܹ̈ܐ ܐܲܝܟ̣ ܬܲܢܝܼܢܹ̈ܐ ܟܦܝܼܢܹ̈ܐ ܒܠܵܥܵܐ ܒܸܣܪܵܐ ܕܲܫܠܲܕܵܐ ܩܫܝܼܛܵܐ
ܓܲܪܡܹ̈ܐ ܕܡܝܼ̈ܟ̣ܹܐ ܒܣܲܒ̣ܪܵܐ ܕܢܘܼܚܵܡܵܐ ܠܒܹܝܬ̣ ܕܝܼܢܵܐ ܕܐܲܠܵܗܵܐ ܫܲܠܝܼܛܵܐ
ܟܠ ܚܲܕܼ̄ ܫܛܝܼܚܵܐ ܩܲܪܒ̣ܬ̣ܵܢܵܐ ܠܣܲܝܦܹܗ ܚܠܝܼܨܵܐ ܘܓܹܒ̣ܵܝܵܐ ܐܝܼܕܹܗ ܦܫܝܼܛܵܐ
ܡܲܠܟܵܐ ܒܩܲܨܪܵܐ ܪܘܝܼܚܵܐ ܠܲܝܬ̣ ܠܹܗ ܫܵܘܦܵܐ ܐܵܦ ܐܸܢ ܗܵܘܹܐ ܣܩܝܼܛܵܐ
ܚܸܫܟܵܐ ܘܠܲܝܬ̣ ܫܪܵܓ̣ܹ̈ܐ ܐܸܠܵܐ ܫܪܲܓ̣ܪܲܓ̣̈ܝܵـܬ̣ܵܐ ܕܣܲܡܝܵܐ ܠܒܲܗܪܵܐ ܚܦܝܼܛܵܐ
 ܠܒ̣ܘܼܫܵܐ ܘܓܸܠܕܵܐ ܕܦܲܓ̣ܪܵܐ ܒܡܲܣܵܪܑܵܐ ܚܲܪܝܼܦܵܐ ܕܫܸܢܹ̈ܐ ܕܐܵܟ̣ܠܵܐ ܩܪܝܼܛܵܐ
 ܠܲܝܬ̣ ܦܲܓ̣ܪܑܵܐ ܢܛܝܼܪܵܐ ܫܒ̣ܘܿܩ ܡ̣ܢ ܓܸܠܕܵܐ ܡܩܲܪܡ̱ܛܵܐ ܚܢܝܼܛܵܐ
ܚܸܡܩܵܐ ܘܪܹܝܚܵܐ ܣܲܪܝܵܐ ܓܵܘ ܗܵܘܵܐ ܕܲܫܡܲܝܵܐ ܙܥܘܼܪܬܵܐ ܚܒ̣ܝܼܛܵܐ
ܡܟܘܼܣܝܵܐ ܒܛܸܠܵܠܹ̈ܐ ܐ̄ܟܘܼܡܹ̈ܐ ܕܡܵܘܬ̣ܵܐ ܓܵܘ ܥܘܼܡܩܵܐ ܕܪܵܓ̣ܘܿܠܵܐ ܫܲܚܝܼܛܵܐ
ܩܲܪܩܲܦ̈ܝܵܬ̣ܵܐ ܓܸܠܕܲܝܗܝ ܫܠܝܼܚܵܐ ܘܫܸܢܹ̈ܐ ܩܪܝܼܚܹ̈ܐ ܫܸܢܝܹ̈ܐ ܒܓܸܚܟܵܐ ܩܲܢܝܼܛܵܐ
ܚܲܝܵܒ̣ܵܐ ܪܲܫܝܼܥܵܐ ܡ̣ܢ ܕܝܵܢܬܵܐ ܕܟܹܐܢܘܼܬ̣ܵܐ ܐܲܪܥܵܢܵܝܬܵܐ ܒܲܢܟ̣ܝܼܠܘܼܬ̣ܵܐ ܫܪܝܼܛܵܐ
ܒܢܲܗܪܵܐ ܬܲܚܬܵܝܵܐ ܕܕܸܡܵܐ ܕܒܲܪܢܵܫܵܐ ܙܲܟܵܝܵܐ ܣܡܘܼܩܵܐ ܒܣܘܼܪܗܵܒ̣ܵܐ ܪܗܝܼܛܵܐ
 ܒܡܲܥܒ̣ܲܪ ܬܚܘܼܡܹ̈ܐ ܕܠܵܐ ܚܵܬ̣ܡܵܐ ܘܠܵܐ ܪܡܵܝ ܐܝܼܕܼܵܐ ܠܛܲܪܦܹܗ ܣܪܝܼܛܵܐ
 ܠܲܝܬ̣ ܢܝܼܫܵܢܩܵܐ ܦܵܪܘܿܫܵܐ ܘܠܵܐ ܫܸܡܵܐ ܥܲܠ ܩܸܨܹܗ ܚܪܝܼܛܵܐ
ܠܲܝܬ̣ ܛܸܒܵܐ ܡ̣ܢ ܓܵܘ ܗܵܘܬ̣ܵܐ ܚܬ̣ܝܼܡܬܵܐ ܠܒܲܪܵܝܹܐ ܦܠܝܼܛܵܐ
ܓܲܪܡܹ̈ܐ ܢܬ̣ܝܼ̈ܪܹܐ ܕܠܵܐ ܡܸܢܝܵܢܵܐ ܐܲܝܟ̣ ܛܲܪܦܹ̈ܐ ܕܐܝܼܠܵܢܵܐ ܥܲܒܝܼܛܵܐ
ܩܲܒ̣ܪܵܐ ܕܝܸܡܵܐ ܒܕܸܦܢܵܐ ܕܫܲܒ̣ܪܵܗ̇ ܩܘܼܪܒܵܐ ܒܸܡܬ̣ܚܵܐ ܕܚܲܕܼ̄ ܣܝܼܛܵܐ
ܐܝܼܢܵܐ ܢܲܦ̮ܫܵܗ̇ ܪܸܚܩܵܐ ܒܠܝܼܬ̣ܵܐ ܘܠܸܒܵܗ̇ ܦܫܝܼܪܵܐ ܘܣܲܒ̣ܪܵܗ̇ ܫܡܝܼܛܵܐ
ܡܵܘܬ̣ܵܐ ܦܵܪܘܼܡܵܐ ܝܠܹܗ ܐܲܝܟ̣ ܣܲܟܿܝܼܢܵܐ ܠܪܘܼܚܵܐ ܡ̣ܢ ܦܲܓ̣ܪܵܐ ܢܫܝܼܛܵܐ
ܡܵܘܬ̣ܵܐ ܕܹܐܒ̣ܵܐ ܝܠܹܗ ܕܠܲܝܠܹܐ ܟܦܝܼܢܵܐ ܠܒܸܣܪܵܐ ܕܦܲܓ̣ܪܵܐ ܦܪܝܼܛܵܐ
ܟ̣ܵܡܝܼܣ ܓܝܼܘܲܪܓܝܼܣ 2014

14

نتاجات بالسريانية / ܗܘܡܣܐ ܡܚܪܝܐ - ܡܫܘܚܬܐ ܝܓ ملحمة شعرية - القصيدة الثالثة عشر

« في: 12:46 17/07/2014  »

ܗܘܡܣܐ ܡܚܪܝܐ
ܡܫܘܚܬܐ ܝܓ

ܬܵܐ ܚܕܘܼܪܝ ܠܐܲܠܵܗܬܵܐ ܫܬܝܼܩܬܵܐ ܒܕܘܼܡܝܵܐ ܕܩܲܝܸܡܬ̣ܵܐ ܕܛܝܼܢܵܐ ܠܝܼܫܵܐ
ܬܵܐ ܥܡܘܼܪܝ ܒܗܲܝܟܠܵܐ ܕܐܵܫܘܿܪ ܘܲܫܡܘܼܥܝ ܠܦܘܼܩܕܵܢܹ̈ܐ ܕܟܲܗܢܵܐ ܩܲܫܝܼܫܵܐ
ܟܸܠܝܵܐ ܥܲܠ ܒܹܐܡܵܐ ܕܩܲܢܟܹܐ ܘܥܲܠ ܢܵܡܘܼܣܵܐ ܡܩܲܕܫܵܐ ܕܝܼܫܵܐ
ܠܟܸܢܫܵܐ ܡܗܲܝܡܢܵܐ ܒܹܝܢ ܓܘܼ̈ܕܹܐ ܕܗܲܝܟܠܵܐ ܐܲܝܟ̣ ܐܲܣܝܼܪܵܐ ܚܒܼܝܼܫܵܐ
ܟܵܪܘܿܙܵܐ ܡܲܡܠܠܹܗ ܩܲܪܝܼܪܵܐ ܒܠܸܒܵܐ ܕܫܵܡܘܿܥܵܐ ܐܲܝܟ̣ ܬܲܠܓܵܐ ܩܝܼܫܵܐ
ܠܸܫܵܢܹܗ ܪܲܩܝܼܩܵܐ ܦܪܵܡܵܐ ܒܲܬ̣ܪܹܝܢ ܓܲܒܹ̈ܐ ܐܲܝܟ ܣܲܝܦܵܐ ܠܛܝܼܫܵܐ
ܡܗܲܝܡܢܵܐ ܚܠܵܦ ܪܲܚܡܹܗ ܘܙܸܕܩܬ̣ܹܗ ܦܝܵܫܵܐ ܩܸܪܝܵܐ ܚܲܛܵܝܵܐ ܘܒܝܼܫܵܐ
ܬܵܐ ܥܡܘܼܪܝ ܒܡܲܝ̈ܵܐ ܕܝܲܡܵܐ ܡܸܠܚܵܢܵܐ ܘܢܲܗܪܵܐ ܚܸܠܝܵܐ ܘܩܲܕܝܼܫܵܐ
ܐܲܝܟ̣ ܝܲܡܵܡܵܐ ܒܐܵܓ̣ܡܵܐ ܬܛܝܼܪܵܐ ܦܲܓ̣ܪܵܟ̣ܝ ܬܚܘܿܬ̣ ܡܲܝ̈ܵܐ ܛܡܝܼܫܵܐ
ܚܕܘܼܪܝ ܠܢܘܼܢܵܐ ܕܝܵܡܵܐ ܘܦܲܓ̣ܪܵܟ̣ܝ ܠܩܲܠܦܹ̈ܐ ܕܕܲܗܒ̣ܵܐ ܘܣܹܐܡܵܐ ܠܒܼܝܼܫܵܐ
ܒܹܝܢ ܡܸܠܝܘܼܢܹ̈ܐ ܕܢܘܼܢܹ̈ܐ ܕܝܲܡܵܐ ܐܲܢ̄ܬܝ ܒܲܠܚܘܼܕ ܒܸܕ ܗܵܘܝܵܬـܝ ܢܝܼܫܵܐ
ܡܚܲܝܸܕ ܥܲܡ ܒܲܪܢܵܫܵܐ ܦܲܠܓܵܟ̣ܝ ܘܦܲܠܓܹܗ ܓܵܘ ܠܘܼܚܵܡܵܐ ܕܒܝܼܫܵܐ
ܬܪܹܝܢ ܓܘܼܫܡܹ̈ܐ ܐܲܠܵܗܵܝܵܐ ܘܒܲܪܢܵܫܵܝܵܐ ܓܵܘ ܚܲܕܼ ܦܲܓ̣ܪܵܐ ܠܵܐ ܦܪܝܼܫܵܐ
ܒܸܕ ܗܵܘܹܝܢ ܨܲܝܵܕܵܐ ܝܵܢ ܦܵܝܫܹܝܢ ܒܠܝܼܥܵܐ ܒܲܚܣܵܡܵܐ ܕܚܘܼܒܵܟ̣ܝ ܚܫܝܼܫܵܐ
ܝܵܢ ܒܸܕ ܗܵܘܹܝܢ ܠܦܲܓ̣ܪܵܟ̣ܝ ܒܚܘܼܛܵܐ ܘܨܸܢܵܪܬܵܐ ܠܝܲܒ̣ܫܵܐ ܓܪܝܼܫܵܐ
ܫܒ̣ܘܿܩ ܚܘܼܒܵܟ̣ܝ ܗܵܘܹܐ ܡܸܛܪܵܐ ܘܦܵܘܚܵܐ ܘܓܲܠܠܹ̈ܐ ܒܝܲܡܵܐ ܫܓ̣ܝܼܫܵܐ
ܫܒ̣ܘܿܩ ܠܸܒܝܼ ܛܵܥܹܝܢ ܚܸܫܵܐ ܝܲܩܘܼܪܵܐ ܘܗܵܘܹܐ ܒܥܘܼܡܩܹܗ ܥܡܝܼܫܵܐ
ܥܲܡ ܟܠܵܗ̇ ܪܲܛܝܼܒ̣ܘܬ̣ܵܐ ܠܸܒܝܼ ܒܚܘܼܒܵܟ̣ܝ ܒܸܕ ܗܵܘܹܐ ܝܼܒ̣ܝܼܫܵܐ
ܘܚܲܝܠܵܐ ܕܓܲܠܠܵܐ ܫܹܐܕܼܵܢܵܐ ܕܚܘܼܒܵܟ̣ܝ ܥܲܠ ܨܲܕܪܝܼ ܓܡܝܼܫܵܐ
ܘܦܲܓ̣ܪܝܼ ܐܲܝܟ̣ ܐܸܠܦܵܐ ܒܢܘܼܘܵܓ̣ܵܐ ܦܲܠܓܹܗ ܡܝܼܬ̣ܵܐ ܘܦܲܠܓܹܗ ܪܥܝܼܫܵܐ
ܣܦܝܼܩܵܐ ܘܩܲܠܘܼܠܵܐ ܛܝܵܦܵܐ ܘܐܲܝܟ̣ ܟܸܢܦܵܐ ܩܕܲܡ ܦܘܿܚܵܐ ܫܥܝܼܫܵܐ
ܘܩܕܲܡ ܡܘܼܵܪܵܝܵܐ ܕܣܲܗܪܵܐ ܘܐܲܪܥܵܐ ܒܡܸܠܐܵܐ ܘܬ̣ܵܘܒܵܐ ܐܸܠܦܝܼ ܢܬܝܼܫܵܐ
ܒܸܕ ܡܵܛܹܝܢ ܠܓܵܙܲܪܬܵܐ ܕܚܘܼܒܵܟ̣ܝ ܒܣܲܚܘܝܼ ܐܵܦ ܐܸܢ ܕܝܼܠܹܗ ܢܲܫܝܼܫܵܐ
ܠܣܝܼܡܬܵܟ̣ܝ ܕܝܵܩܘܼܢ̈ܕܹܐ ܘܲܕܡܲܪܓܵܢܝܵـܬ̣ܵܐ ܐܵܦ ܐܸܢ ܫܵܘܦܵܗ̇ ܘܠܵܐ ܝܠܹܗ ܓܫܝܼܫܵܐ
ܒܙܵܘܓܵܐ ܕܐܝܼ̈ܕܵܬ̣ܝܼ ܐܲܝܟ̣ ܓܸܣ̈ܦܵܪܹܐ ܘܪܘܼܫܝܵܬ̣ܵܐ ܒܸܕ ܗܵܘܹܝܢ ܠܡܲܝ̈ܵܐ ܒܚܝܼܫܵܐ
ܐܵܦ ܐܸܢ ܢܵܩܘܿܫܵܐ ܕܩܸܢܛܵܐ ܒܝܲܕ ܐܲܠܵܗܵܐ ܕܐܵܐܲܪ ܦܵܝܸܫ ܢܩܝܼܫܵܐ
ܐܵܦ ܐܸܢ ܟܠܹܗ ܚܲܝܠܵܐ ܕܲܟܝܵܢܵܐ ܗܵܘܹܐ ܕܲܪܩܘܼܒ̣ܠܝܼ ܟܦܝܼܫܵܐ
ܐܵܦ ܐܸܢ ܥܲܪܦܸܠܵܐ ܚܘܵܪܵܐ ܕܝܲܡܵܐ ܠܲܫܡܲܝܵܐ ܕܥܲܝܢܝܼ ܗܵܘܹܐ ܩܪܝܼܫܵܐ
ܫܒ̣ܘܿܩ ܚܸܙܘܝܼ ܕܝܵܘܡܵܐ ܚܵܕܸܪ ܠܚܸܠܡܵܐ ܘܢܵܠܵܐ ܥܲܠ ܨܲܕܪܝܼ ܟܒ̣ܝܼܫܵܐ
ܫܒ̣ܘܿܩ ܙܲܒ̣ܢܵܐ ܕܚܲܝ̈ܝܼ ܗܵܘܹܐ ܟܸܪܝܵܐ ܐܲܝܟ̣ ܘܲܪܕܵܐ ܘܕܲܥܬ̣ܝܼܕܼܗ ܟܡܝܼܫܵܐ
ܠܲܝܬ ܠܝܼ ܟܠܵܝܬ̣ܵܐ ܐܵܦ ܐܸܢ ܒܲܚܙܘܼܩܝܵܐ ܕܡܵܘܬ̣ܵܐ ܗܵܘܹܝܢ ܪܚܝܼܫܵܐ

ܟ̣ܵܡܝܼܣ ܓܝܼܘܲܪܓܝܼܣ 2014

15

نتاجات بالسريانية / ܗܘܡܣܐ ܡܚܪܝܐ - ܡܫܘܚܬܐ ܝܒ ملحمة شعرية - القصيدة الثانية عشر

« في: 12:00 30/06/2014  »

ܗܘܡܣܐ ܡܚܪܝܐ
ܡܫܘܚܬܐ ܝܒ

ܬܵܐ ܠܬܹܒ̣ܹܝܠ ܬܲܚܬܵܝܬ̣ܵܐ ܠܐܲܪܥܵܐ ܕܢܲܗ̈ܪܵܘܵܬ̣ܵܐ ܕܡܲܝ̈ܵܐ ܘܕܸܡܵܐ ܐܲܫܝܼܕܼܵܐ
ܐܲܝܟܵܐ ܕܛܘܼܪܵܐ ܩܕܲܡ ܩܵܠܵܐ ܕܪܲܥܡܹ̈ܐ ܗܵܘܹܐ ܒܫܵܘܦܹܗ ܪܩܝܼܕܼܵܐ
ܐܲܝܟܵܐ ܕܐܸܣܹ̈ܐ ܕܪܵܓ̣ܘܿܠܵܐ ܒܥܘܼܫܢܵܐ ܕܓܲܠ̈ܠܹܐ ܕܡܸܠܝܵܐ ܦܵܝܸܫ ܚܠܝܼܕܼܵܐ
ܠܒ̣ܘܼܫ ܦܲܓ̣ܪܵܐ ܐ̄ܢܵܫܵܝܵܐ ܕܒܸܣܪܵܐ ܘܕܸܡܵܐ ܥܲܠ ܓܲܪܡܵܐ ܠܡܝܼܕܼܵܐ
ܘܚܝܵܝ ܒܠܸܒܵܐ ܕܙܵܥܹܦ ܒܚܸܡܬ̣ܵܐ ܐܲܝܟ̣ ܢܲܗܪܵܐ ܠܕܸܡܵܐ ܓܵܘ ܘܲܪܝܼܕܼܵܐ
ܐ̄ܟ̣ܘܼܠܝ ܡ̣ܢ ܦܹܐܖܹ̈ܐ ܕܐܝܼܠܵܢܹ̈ܐ ܕܚܲܝܹ̈ܐ ܟܢܝܼܫܹ̈ܐ ܒܐܵܘܨ̈ܪܹܐ ܘܒܲܡܙܝܼܕܼܵܐ
ܕܐܲܪܥܵܐ ܪܘܝܼܬ̣ܵܐ ܒܕܸܡܵܐ ܘܫܸܒܠܵܐ ܕܚܲܝܹ̈ܐ ܒܡܲܓܠܵܐ ܕܡܵܘܬ̣ܵܐ ܚܨܝܼܕܼܵܐ
ܘܓܲܢܹ̈ܐ ܬܸܠܝܹ̈ܐ ܡ̣ܢ ܨܸܢ̱ܥܬ̣ܵܐ ܕܗܵܘܢܵܐ ܕܒܲܪܢܵܫܵܐ ܘܦܘܼܠܚܵܢܵܐ ܕܐܝܼܕܼܵܐ
ܠܫܸܡܵܐ ܕܡܲܠܟܵܐ ܕܐܵܫܘܿܪ ܒܐܵܗܵܐ ܙܲܒ̣ܢܵܐ ܘܲܠܕܼܵܪܕܵܖ̈ܝܼܢ ܕܵܟ̣ܵܪܵܐ ܥܗܝܼܕܼܵܐ
ܬܵܐ ܣܗܘܼܕܼ ܠܙܘܼܝܵܚܵܐ ܕܬܘܼܝܵـܓ̣ܵܐ ܕܡܲܠܟܵܐ ܟܲܐܝܼܒ̣ܵܐ ܓܵܘ ܣܝܲܡܐܝܼܕܼܵܐ
ܥܲܠ ܩܪܵܒ̣ܵܐ ܘܲܫܠܵܡܵܐ ܘܡܵܘܬܵܐ ܘܚܲܝܹ̈ܐ ܒܹܝܢ ܣܸܪܛܵܐ ܕܩܵܠܵܡܵܐ ܢܩܝܼܕܼܵܐ
ܫܡܘܼܥܝ ܠܡܵܘܕܿܝܵܢܘܼܬ̣ܵܐ ܕܙܲܟܵܝܵܐ ܘܣܵܗܕܘܼܬ̣ܵܐ ܕܪܲܫܝܼܥܵܐ ܘܓܘܼܢܚܵܐ ܥܒ̣ܝܼܕܼܵܐ
ܒܪܘܿܢܵܐ ܒܘܼܟ̣ܪܵܐ ܢܵܛܸܪ ܟܘܼܪܣܝܵܐ ܙܸܕܩܹܗ ܣܪܝܼܒ̣ܵܐ ܘܫܡܹܗ ܓܪܝܼܕܼܵܐ
 ܩܪܲܒ̣ܬ̣ܵܢܵܐ ܡܗܲܝܡܢܵܐ ܠܡܘܿܡܝܼܬ̣ܹܗ ܣܪܝܼܒ̣ܵܐ ܘܥܲܠ ܡܵܪܹܗ ܘܡܲܠܟܹܗ ܡܪܝܼܕܼܵܐ
ܬܵܐ ܪܥܘܿܫܝ ܒܚܸܫܵܐ ܕܒܲܪܢܵܫܵܐ ܓܵܘ ܚܲܝܹ̈ܐ ܘܡܵܘܿܬ̣ܵܐ ܘܐܸܒ̣ܠܵܐ ܕܥܲܢܝܼܕܼܵܐ
ܙܲܟܵܝܵܐ ܥܲܡ ܚܲܝܵܒ̣ܵܐ ܒܲܨܠܝܼܒ̣ܵܐ ܙܩܝܼܦܵܐ ܬܚܘܼܬ ܪܲܚܡܹ̈ܐ ܕܫܵܘܛܵܐ ܕܢܲܓܝܼܕܼܵܐ
ܨܸܗܝܵܐ ܠܡܲܝܵܐ ܓܵܘ ܚܘܼܡܵܐ ܕܒܲܪܝܼܵܐ ܦܲܓ̣ܪܹܗ ܒܡܲܥܡܘܼܕܝܼܬ̣ܵܐ ܕܕܸܡܵܐ ܥܡܝܼܕܼܵܐ
ܩܵܢܘܼܢܵܐ ܚܲܪܝܼܦܵܐ ܐܲܝܟ̣ ܣܲܝܦܵܐ ܐܝܼܢܵܐ ܫܸܠܝܵܐ ܓܵܘ ܚܸܠܬܹܗ ܨܡܝܼܕܼܵܐ
ܐܲܢ̄ܬܝ ܡܲܠܟܬ̣ܵܐ ܩܲܨܪܵܟ̣ܝ ܒܲܫܡܲܝܵܐ ܘܐܵܢܵܐ ܓܵܒ̣ܘܿܝܵܐ ܒܐܲܪܥܵܐ ܩܕܼܵܡܵܟ̣ܝ ܣܓ̣ܝܼܕܼܵܐ
ܚܘܼܒܵܟ̣ܝ ܥܲܠܥܵܠܵܐ ܘܣܸܬܘܵܐ ܩܲܪܝܼܪܵܐ ܡܸܠܝܵܐ ܬܲܠܓܵܐ ܘܒܲܪܕܼܵܐ ܘܲܓܠܝܼܕܼܵܐ
ܚܘܼܒܵܟ̣ܝ ܓܘܼܡܪܵܐ ܕܢܘܼܪܵܐ ܐܲܡܝܼܢܵܝܵܐ ܘܠܸܒܝܼ ܒܫܘܼܠܗܵܒ̣ܹܗ ܚܲܡܝܼܡܵܐ ܝܲ̄ܩܝܼܕܼܵܐ
ܚܘܼܒܵܟ̣ܝ ܡܨܝܼܕܼܬܵܐ ܐܵܢܵܐ ܛܲܝܪܵܐ ܕܠܵܐ ܢܸܣܝܵـܢܵܐ ܒܓܵܘܵܗ̇ ܦܝܼܫܠܝܼ ܨܝܼܕܼܵܐ
ܦܲܪܕܲܝܣܵܟ̣ܝ ܒܹܝܬ̣ ܚܒ̣ܘܼܫܝܵܐ ܕܚܹܐܖܹ̈ܐ ܩܦܝܼܠܵܐ ܘܐܲܢ̄ܬـܝ ܓܲܢܵܢܬܵܐ ܘܡܵܪܬ̣ܵܐ ܕܲܩܠܝܼܕܼܵܐ
ܬܲܪܥܹܗ ܦܬܝܼܚܵܐ ܥܒ̣ܪܵܬܹܗ ܡܲܓܵܢ ܢܦܲܩܬܵܐ ܒܐܝܼܕܼܵܐ ܕܫܲܠܝܼܛܵܐ ܐܲܚܝܼܕܼܵܐ
ܡܚܝܼܠܵܐ ܗ̄ܘܹܝܢ ܒܸܕ ܢܲܦܠܹܝܢ ܒܲܚܛܝܼܬ̣ܵܐ ܘܡ̣ܢ ܓܲܢܬ̣ܵܟ̣ܝ ܒܸܕ ܦܵܝܫܸܢ ܛܪܝܼܕܼܵܐ
ܐܲܢ̄ܬܝ ܫܲܠܝܼܛܬܵܐ ܥܲܠ ܟܠ ܡܲܒܘܼܥܑܵܐ ܕܡܲܝ̈ܵܐ ܘܝܲܡܵܐ ܘܢܲܗܪܵܐ ܘܲܦܨܝܼܕܼܵܐ
ܡܘܿܬ̣ܝܼ ܒܐܲܪܥܑܵܐ ܢܘܼܚܵܡܵܐ ܠܫܸܡܝܼ ܘܚܲܝܝܼ ܒܲܫܡܲܝܵܐ ܥܘܼܗܕܵܢܵܐ ܐܲܒܿܝܼܕܼܵܐ
ܐܲܪܥܵܐ ܡܸܫܛܵܚܵܐ ܕܲܩܪܵܒ̣ܝܼ ܝܠܵܗ̇ ܚܸܕܼܝܵܐ ܗ̄ܘܹܝܢ ܓܵܘ ܥܲܦܪܵܗ̇ ܕܗܵܘܹܝܢ ܣܗܝܼܕܼܵܐ
ܐܲܪܥܵܐ ܡܸܕܪܵܫܬـܝܼ ܝܠܵܗ̇ ܘܡܕܼܝܼܢ̄ܬـܝܼ ܝܸܡܝܼ ܝܠܵܗ̇ ܘܡܲܠܦܵܢܬـܝܼ ܘܐܵܢܵܐ ܬܲܠܡܝܼܕܼܵܐ
ܐܲܢ̄ܬـܝ ܐܲܠܵܗܬܵܐ ܕܚܘܼܒܵܐ ܘܫܘܼܦܪܵܐ ܘܲܕܩܪܵܒ̣ܵܐ ܐܵܢܵܐ ܦܲܠܚܵܟ̣ܝ ܠܸܘܝܵܐ ܝܲܕܝܼܕܼܵܐ
ܛܪܘܼܕܼܝ ܘܡܲܪܚܵܩܝ ܠܥܲܝܢܵܐ ܟܘܼܡܬܵܐ ܕܒܝܼܫܵܐ ܣܵܛܵܢܵܐ ܥܲܠܝܼ ܚܣܝܼܕܼܵܐ
ܐܲܢ̄ܬـܝ ܡܲܠܟܬ̣ܵܐ ܡܫܲܠܛܸܢ ܠܠܸܒܝܼ ܐܵܢܵܐ ܥܲܒ̣ܕܵܟ̣ܝ ܠܬܸܫܡܸܫܬܵܐ ܥܬ̣ܝܼܕܼܵܐ

ܟ̣ܵܡܝܼܣ ܓܝܼܘܲܪܓܝܼܣ

[/size]

16

نتاجات بالسريانية / رد: ܗܘܡܣܐ ܡܚܪܝܐ - ܡܫܘܚܬܐ ܝܐ ملحمة شعرية - القصيدة الحادية عشر

« في: 12:52 17/06/2014  »

ܡܝܩܪܐ ܫܡ. ܥܕܢܢ ܡܪܩܘܣ
ܫܠܡܐ ܘܐܝܩܪܐ

ܬܘܕܝ ܘܒܣܝܡܐ  ܠܥܒܪܬܘܟ ܘܝܨܝܦܘܬܟ ܒܐܗܐ ܚܩܠܐ  ܕܡܪܕܘܬܢ  ܘܡܠܒܒܬܘܟ ܠܟܬܘ̣̈ܒܐ ܒܐܗܐ ܠܫܢܐ ܕܝܡܐ.

ܡܝܩܪܢܘܟ 
ܟܡܝܣ ܓܝܘܪܓܝܣ

17

نتاجات بالسريانية / ܗܘܡܣܐ ܡܚܪܝܐ - ܡܫܘܚܬܐ ܝܐ ملحمة شعرية - القصيدة الحادية عشر

« في: 13:52 12/06/2014  »

ܗܘܡܣܐ ܡܚܪܝܐ
ܡܫܘܚܬܐ ܝܐ
ܨܪܘܼܚ ܐܝܼܢܵܐ ܩܵܠܘܼܟ̣ ܠܹܐ ܡܵܛܹܐ ܠܵܐ ܠܐܲܪܥܵܐ ܘܠܵܐ ܠܲܪܩܝܼܥܵܐ
ܠܵܐ ܐܲܠܵܗܵܐ ܘܠܵܐ ܒܲܪܢܵܫܵܐ ܘܠܵܐ ܒܝܼܫܵܐ ܥܲܠܘܼܟ̣ ܦܵܝܸܫ ܫܡܝܼܥܵܐ
ܟܵܘܟ̣ܒ̣ܘܼܟ̣ ܒܲܗܪܵܢܵܐ ܣܸܛܝܵܐ ܓܵܘ ܫܡܲܝܵܐ ܒܸܕ ܕܵܥܸܟ̣ ܘܠܵܐ ܦܵܝܸܫ ܝܼܕܼܝܼܥܵܐ
ܚܸܠܡܘܼܟ̣ ܘܗܸܪܓܘܼܟ̣ ܒܲܥܢܵܢܵܐ ܦܪܝܼܚܵܐ ܘܣܲܒ̣ܪܘܼܟ̣ ܒܟܘܼܪܣܝܵܐ ܕܡܲܠܟܘܼܬ̣ܵܐ ܩܛܝܼܥܵܐ
ܟܘܼܬܵܫܘܼܟ̣ ܥܲܣܩܵܐ ܩܪܵܒ̣ܘܼܟ̣ ܕܸܡܵܢܵܐ ܒܥܸܠܕܒ̣ܵܒ̣ܘܼܟ̣ ܐܲܚܘܼܢܵܐ ܣܲܟ̣ܠܵܐ ܘܪܲܫܝܼܥܵܐ
ܦܲܓ̣ܪܘܼܟ̣ ܡܵܝܘܿܬ̣ܵܐ ܓܵܘ ܫܘܼܢܵـܩܵܐ ܕܠܵܐ ܫܸܢܬ̣ܵܐ ܕܲܢܝܵܚܵܐ ܘܚܸܙܘܘܼܟ̣ ܙܝܼܥܵܐ
ܠܹܐ ܡܲܫܟ̄ܚܹܝܬ ܐܲܣܝܵܐ ܕܲܡܒܲܣܸܡ ܠܨܸܠܦܵܐ ܕܕܸܦܢܘܼܟ̣ ܒܪܘܼܡܚܵܐ ܒܙܝܼܥܵܐ
ܘܠܵܐ ܡܵܢܝܼ ܕܡܵܨܹܐ ܕܓܵܪܸܫ ܠܓܹܐܪܵܐ ܣܲܡܵܢܵܐ ܓܵܘ ܥܘܼܡܩܵܐ ܕܠܸܒܘܼܟ̣ ܩܒ̣ܝܼܥܵܐ
ܩܕܵܠܘܼܟ̣ ܬܚܘܼܬ̣ ܪܲܚ̈ܡܹܐ ܕܫܸܠܦܵܐ ܚܲܪܝܼܦܵܐ ܕܣܲܝܦܵܐ ܒܐܝܼܕܼܵܐ ܕܩܲܪܕܵܚܘܼܟ̣ ܨܢܝܼܥܵܐ
ܡܲܠܟܘܼܬ̣ܘܼܟ̣ ܫܓ̣ܝܼܫܬܵܐ ܒܹܝܢ ܓܲܒܵܐ ܕܣܸܡܵܠܵܐ ܘܝܲܡܝܼܢܵܐ ܦܘܼܠܓ̣ܵܐ ܙܪܝܼܥܵܐ

ܡܥܲܕܪܵܢܘܼܟ̣ ܥܪܝܼܩܵܐ ܠܡܸܫܛܵܚܵܐ ܫܒ̣ܝܼܩܵܐ ܠܘܲܥܕܹܗ ܣܪܝܼܒ̣ܵܐ ܠܣܲܢܝܵܘܼܟ̣ ܬܒ̣ܝܼܥܵܐ
ܣܸܬܘܘܼܟ̣ ܡܲܪܝܼܪܵܐ ܠܹܐ ܡܵܛܸܝܬ ܥܲܠ ܒܹܝܬ̣ ܢܝܼܣܵܢܹ̈ܐ ܘܠܵܐ ܥܲܠ ܪܒ̣ܝܼܥܵܐ
ܠܹܐ ܚܵܙܹܝܬ ܠܢܘܼܚܵܡܵܐ ܕܦܸܩܚܹ̈ܐ ܘܘܲܪܕܘܼܟ̣ ܫܲܦܝܼܪܵܐ ܘܲܪܝܼܕܹܼܗ ܩܠܝܼܥܵܐ
 ܚܸܨܢܘܼܟ̣ ܪܵܡܵܐ ܝܠܹܗ ܐܝܼܢܵܐ ܒܸܢܝܵܐ ܡ̣ܢ ܠܸܒ̣ܢܵܐ ܕܛܝܼܢܵܐ ܫܲܥܝܼܥܵܐ
ܒܸܕ ܬܵܠܸܚ ܩܕܲܡ ܡܸܛܪܵܐ ܕܪܘܼܓ̣ܙܵܐ ܘܲܫܡܲܝܘܼܟ̣ ܥܲܝܡܵܢܵܐ ܠܹܵܐ ܦܵܝܸܫ ܓܠܝܼܥܵܐ
 ܒܚܲܝܠܵܐ ܕܡܸܠܝܵܐ ܘܛܘܿܦܵܢܵܐ ܕܡ̈ܝܼܵܐ ܫܘܼܪܵܐ ܕܲܡܕܼܝܼܢ̄ܬܘܼܟ̣ ܒܸܕ ܦܵܝܸܫ ܬܪܝܼܥܵܐ
ܢܲܗܪܵܐ ܕܕܸܩܠܲܬ̣ ܢܸܩܝܵܐ ܨܸܦܝܵܐ ܒܕܸܡܵܐ ܣܡܘܼܩܵܐ ܒܸܕ ܗܵܘܹܐ ܨܒ̣ܝܼܥܵܐ
ܐܵܫܘܿܪ ܛܘܼܪܵܐ ܝܠܹܗ ܐܝܼܢܵܐ ܢܘܼܪܵܐ ܕܒܘܼܠܩܵܢܵܐ ܓܵܘ ܠܸܒܹܗ ܛܒܼܝܼܥܵܐ
ܡ̣ܢ ܪܸܬ̣ܚܵܐ ܕܪܘܼܓ̣ܙܵܐ ܘܚܸܡܬ̣ܵܐ ܕܓܵܘܹܗ ܥܲܦܪܵܐ ܘܟܹܐܦܵܐ ܘܦܲܪܙܠܵܐ ܚܡܝܼܥܵܐ
ܪܒ̣ܝܼܨܵܐ ܘܲܡܩܲܒܝܵܐ ܣܒܵܪܵܐ ܠܥܸܕܵܢܵܐ ܘܦܘܼܪܣܵܐ ܩܵܐ ܕܦܵܝܸܫ ܦܩܝܼܥܵܐ

ܒܸܕ ܚܵܙܹܝܬ ܡܘܿܬ̣ܵܐ ܛܪܘܿܢܵܐ ܘܢܘܼܪܵܐ ܐܵܟ̣ܘܼܠܵܐ ܘܕܸܡܵܐ ܫܦܝܼܥܵܐ
ܛܲܝܪܵܐ ܟܘܿܡܵܐ ܟܦܝܼܢܵܐ ܡ̣ܢ ܒܸܣܪܵܐ ܕܲܫܠܲܕܹ̈ܐ ܕܲܩܪܲܒ̣ܬ̣ܵܢܘܼܟ̣ ܣܒ̣ܝܼܥܵܐ
ܫܘܼܠܛܵܢܘܼܟ̣ ܒܨܝܼܪܵܐ ܩܕܲܡ ܚܲܕ̄ ܟܲܗܢܵܐ ܙܹܐܦܵܢܵܐ ܪܹܫܹܗ ܓܪܝܼܥܵܐ
ܡܣܲܦܝܵܢܘܼܟ̣ ܐܲܓܝܼܪܵܐ ܢܟ̣ܝܼܠܵܐ ܐܲܓ̣ܪܹܗ ܙܘܼܙܵܐ ܕܕܲܗܒ̣ܵܐ ܠܲܩܕ̄ܡܵܐ ܦܪܝܼܥܵܐ
ܬܵܐ ܕܸܩܠܲܬ̣ ܥܲܡܝܼ ܓܵܘ ܓܲܢܬ̣ܵܐ ܕܲܫܠܵܡܵܐ ܐܲܝܟܵܐ ܕܠܲܝܬ̣ ܠܸܒܵܐ ܕܡܝܼܥܵܐ
ܓܵܘ ܚܙܘܼܩܝܵܐ ܪܩܝܼܥܵܝܵܐ ܒܓܘܼܠܦܵܐ ܕܪܘܼܚܵܐ ܦܵܪܘܿܚܵܐ ܠܥܸܠܘܼܠ ܦܣܝܼܥܵܐ
ܬܲܡܵܢ̄ ܠܒ̣ܘܼܫ ܥܲܠ ܪܹܫܘܼܟ̣ ܬܵܓ̣ܵܐ ܫܡܲܝܵـܢܵܐ ܒܕܲܗܒ̣ܵܐ ܩܡܝܼܥܵܐ
ܬܲܡܵܢ̄ ܫܠܘܼܚ ܩܘܼܢܵܥܵܐ ܡ̣ܢ ܥܲܠ ܦܲܐܬ̣ܘܼܟ̣ ܒܓܵܘܢܵܐ ܕܚܸܫܵܐ ܩܢܝܼܥܑܵܐ
ܠܲܐܟ̣ܵܐ ܡܵܘܬ̣ܵܐ ܘܫܘܼܢܵـܩܵܐ ܒܵܬ̣ܪܘܼܟ̣ ܥܪܝܼܩܵܐ ܡ̣ܢ ܝܵܘܡܵܐ ܕܦܝܼܫܠܘܼܟ̣ ܢܒ̣ܝܼܥܵܐ
ܪܘܼܚܘܼܟ̣ ܡܸܬ̣ܠܲܗܓܵܐ ܒܦܵܘܚܵܐ ܘܦܲܓ̣ܪܘܼܟ̣ ܒܸܕ ܦܵܝܸܫ ܒܦܘܼܡܵܐ ܕܐܲܪܥܵܐ ܒܠܝܼܥܵܐ
 ܡ̣ܢ ܒܘܼܣܵܡܵܐ ܕܚܲܝܹ̈ܐ ܒܡܲܠܟܘܼܬ̣ܵܐ ܕܲܫܡܲܝܵܐ ܩܵܐ ܡܘܼܕܝܼ ܝܗ̄ܘܹܝܬ ܙܕܝܼܥܑܵܐ؟
ܡܲܢܝܼ ܝܠܹܗ ܕܡܲܟܠܹܗ ܪܘܼܓ̣ܙܵܐ ܕܡܵܪܝܵܐ ܐܸܢ ܗܵܘܹܝܬ ܠܦܘܼܣܩܵܢܹܗ ܦܠܝܼܥܵܐ؟


ܟ̣ܵܡܝܼܣ ܓܝܼܘܲܪܓܝܼܣ

[/size]

18

نتاجات بالسريانية / ملحمة شعرية - القصيدة العاشرة ܗܘܡܣܐ ܡܚܪܝܐ - ܡܫܘܚܬܐ ܝ

« في: 06:08 12/05/2014  »

ܗܘܡܣܐ ܡܚܪܝܐ
ܡܫܘܚܬܐ ـ ܝ

ܒܹܝܢ ܐܲܪܥܵܐ ܘܲܫܡܲܝܵܐ ܓܵܘ ܡܲܫܟܿܢܵܐ ܕܲܡܪܲܝܡܵܐ ܪܵܡܵܐ ܘܲܪܘܝܼܚܵܐ
ܓܵܘ ܙܸܩܘܼܪܬܵܐ ܡܩܘܼܕܸܫܬܵܐ ܒܲܝܬܵܐ ܕܐܵܫܘܿܪ ܐܲܠܵܗܵܐ ܕܩܘܼܫܬܵܐ ܢܲܨܝܼܚܵܐ
ܒܹܝܬ̣ ܛܵܘܣܵܐ ܪܩܝܼܥܵܝܵܐ ܐܲܠܵܗܵܝܵܐ ܘܩܸܢܛܪܘܼܢ ܘܟܘܼܪܣܝܼܵܐ ܘܩܸܠܵܝܬܵܐ ܕܲܫܠܝܼܚܵܐ
ܡܲܣܓܿܕܼܵܐ ܕܟܲܗܢܵܐ ܘܫܵܘܦܵܐ ܕܩܲܝܸܡܬ̣ܵܐ ܕܡܵܪܝܵܐ ܡ̣ܢ ܟܹܐܦܵܐ ܚܪܝܼܚܵܐ
ܐܲܠܵܗܵܐ ܕܫܸܡܫܵܐ ܡ̣ܢ ܡܲܕܢ̱ܚܵܐ ܥܲܠ ܐܲܪܥܵܐ ܙܲܗܪܝܼܪܹܗ ܕܢܝܼܚܵܐ
ܓܵܘ ܟܘܼܬܵܫܹܗ ܥܲܡ ܛܸܠܵܢܝܼܬ̣ܵܐ ܚܸܫܟܵܢܬܵܐ ܕܡܵܘܬ̣ܵܐ ܪܘܼܓ̣ܙܹܗ ܙܠܝܼܚܵܐ
ܡܸܠܝܵܐ ܡ̣ܢ ܚܸܡܬ̣ܵܐ ܐܲܝܟ̣ ܓܘܼܡܪܵܐ ܣܡܝܼܩܵܐ ܘܩܸܫܬܹܗ ܡܬ̣ܝܼܚܵܐ
ܪܘܼܚܵܐ ܒܝܼܫܬܵܐ ܕܬܲܝܡܢܵܐ ܒܸܢܦܵܚܵܐ ܡ̣ܢ ܬܲܪܥܵܐ ܕܗܲܝܟܠܵܐ ܦܬ̣ܝܼܚܵܐ
ܡܲܫܪܘܿܩܹܐ ܐܲܝܟ̣ ܚܲܝ̈ܘܵܬ̣ܵܐ ܕܒܲܪܝܼܵܐ ܒܠܹܝܠܹܐ ܒܩܵܠܵܐ ܪܗܝܼܒ̣ܵܐ ܨܪܝܼܚܵܐ
ܐܲܝܟ̣ ܒܸܟ̣ܝܵܐ ܘܲܥܘܵܝܵܐ ܕܕܹܐܒ̣ܵܐ ܟܦܝܼܢܵܐ ܘܚܲܪܚܲܪܬܵܐ ܕܟܲܠܒܵܐ ܣܪܝܼܚܵܐ
ܐܲܝܟ̣ ܩܵܠܵܐ ܕܲܨܪܵܚܬܵܐ ܕܒܲܪܢܵܫܵܐ ܡ̣ܢ ܡܲܪܥܵܐ ܕܨܸܠܦܵܐ ܡܠܝܼܚܵܐ
ܐܲܝܟ̣ ܒܪܵܐ ܩܵܠܵܐ ܒܸܬܢܵܝܵܐ ܓܵܘ ܫܩܝܼܦܵܐ ܣܦܝܼܩܵܐ ܥܲܬܝܼܩܵܐ ܓܒ̣ܝܼܚܵܐ
ܒܸܫܥܵܫܵܐ ܠܒܸܢܝܵـܢܵܐ ܕܗܲܝܟܠܵܐ ܐܲܝܟ̣ ܕܐܸܢ ܒܸܕ ܦܵܝܸܫ ܬܠܝܼܚܵܐ

ܐܲܝܟ̣ ܣܦܝܼܢܬܵܐ ܓܵܘ ܝܲܡܵܐ ܩܲܕ̄ܡ ܙܵܘܥܵܐ ܕܗܵܘܵܐ ܒܚܲܝܠܵܐ ܢܦܝܼܚܵܐ
ܒܢܲܦ̮ܫܝܼ ܟܸܠܝܵܐ ܩܕܲܡ ܨܲܠܡܵܐ ܕܠܵܡܵܣܘܼ ܪܸܥܝܵܢܝܼ ܘܠܸܒܝܼ ܕܠܝܼܚܵܐ
ܠܲܝܬ̣ ܫܵܡܘܿܥܵܐ ܘܠܵܐ ܨܵܝܘܿܬ̣ܵܐ ܠܩܵܠܵܐ ܕܒܸܟ̣ܝܝܼ ܚܢܝܼܓ̣ܵܐ ܬܢܝܼܚܵܐ
ܡܨܲܠܡܘܿܢܹܐ ܐܲܝܟ̣ ܐܝܼܬܵܢܵܐ ܒܓܘܼܠܦܵܐ ܕܢܸܫܪܵܐ ܠܘܵܬ̣ ܐܲܠܵܗܵܐ ܦܪܝܼܚܵܐ
ܡ̣ܢ ܫܹܝܠ ܡ̣ܢ ܫܡܲܝܵܐ ܫܥܲܫܬܵܐ ܕܪܲܥܡܵܐ ܘܒܲܪܩܵܐ ܩܕܝܼܚܵܐ
ܣܸܬܪܵܐ ܕܗܲܝܟܠܵܐ ܒܚܲܝܠܵܐ ܡ̣ܢ ܦܲܠܓܹܗ ܦܝܼܫܠܹܗ ܨܠܝܼܚܵܐ
ܢܦܝܼܠ ܠܝܼ ܥܲܠ ܐܲܪܥܵܐ ܫܸܢܝܵܐ ܐܲܝܟ̣ ܡܝܼܬ̣ܵܐ ܛܪܝܼܚܵܐ
ܚܫܝܼܒ̣ܠܝܼ ܒܐܝܼܕܼܵܐ ܕܚܲܝܠܵܐ ܕܫܹܐܕܼܵܐ ܒܝܼܫܵܐ ܦܝܼܫܠܝܼ ܩܦܝܼܚܵܐ
 ܙܪܝܼܩܠܵܗ̇ ܚܕܼܵܐ ܡܲܠܲܐܟ̣ܬܵܐ ܣܲܥܪܵܗ̇ ܕܲܗܒ̣ܵܢܵܝܵܐ ܝܲܪܝܼܟ̣ܵܐ ܒܙܲܝܬܵܐ ܡܫܝܼܚܵܐ  
 ܦܲܓ̣ܪܵܗ̇ ܥܸܛܪܵܢܵܐ ܐܲܝܟ̣ ܠܲܗܓܵܐ ܕܒܸܣܡܵܐ ܗܲܢܝܼܵܐܐ ܒܸܫܕܼܵܝܵܐ ܪܹܝܚܵܐ

ܣܸܩܠܵܐ ܕܦܲܐܬ̣ܵܗ̇ ܫܲܦܝܼܪܵܐ ܘܙܝܼܘܵܐ ܕܗܸܕܼܪܵܗ̇ ܓܵܘ ܦܲܐܬ̣ܝܼ ܢܛܝܼܚܵܐ
 ܓܸܚܟܵܐ ܕܣܸܦ̈ܘܵܬ̣ܵܗ̇ ܐܲܝܟ̣ ܘܲܪܕܵܐ ܕܒܹܝܬ̣ ܢܝܼܣܵܢܹ̈ܐ ܦܲܠܓܹܗ ܦܩܝܼܚܵܐ
ܡܲܠܸܟܬ̣ܵܐ ܫܘܼܦܪܵܗ̇ ܬܗܝܼܪܵܐ ܠܒ̣ܘܼܫܵܗ̇ ܚܘܵܪܵܐ ܨܲܕܪܵܗ̇ ܓܠܝܼܚܵܐ
ܡܵܪܬ̣ܵܐ ܕܚܲܝܠܵܐ ܘܫܘܼܠܛܵܢܵܐ ܐܝܼܢܵܐ ܪܵܒܵܐ ܡܝܲܩܲܪܬܵܐ ܘܦܲܪܨܘܿܦܵܗ̇ ܟܢܝܼܚܵܐ
ܕܠܵܐ ܝܼܕܲܥܬ̣ܵܐ ܠܸܒܝܼ ܒܚܘܼܒܵܗ̇ ܗܘܹܐ ܠܹܗ ܬܘܝܼܗܵܐ ܘܫܪܝܼܚܵܐ
ܦܘܼܩܸܕ ܠܵܗ̇ ܕܫܵܬܹܝܢ ܟܵܣܵܐ ܕܚܲܡܪܵܐ ܘܐ̄ܡܝܼܪ ܠܵܗ̇ ܫܬܝܼ ܝܵܐ ܨܲܚܝܼܚܵܐ
ܫܬܝܼ ܚܲܡܪܵܐ ܣܡܘܿܩܵܐ ܓܸܒܝܵܐ ܚܲܝܠܵܢܵܐ ܐܲܝܟ̣ ܕܸܡܵܐ ܪܬܝܼܚܵܐ
ܥܲܒ̣ܕܹܝܚ ܚܠܘܼܠܵܐ ܕܙܘܼܘܵܓ̣ܵܐ ܐܲܠܵܗܵܝܵܐ ܒܲܪܢܵܫܵܝܵܐ ܕܚܘܼܒܵܐ ܠܗܝܼܩܵܐ ܣܘܝܼܚܵܐ
ܦܲܓ̣ܪܝܼ ܩܘܼܪܒܵܢܵܐ ܥܲܠ ܡܲܕܒܚܵܐ ܕܚܘܼܒܵܐ ܕܲܫܢܵܐ ܩܵܐ ܠܘܼܟ̣ ܕܒ̣ܝܼܚܵܐ
ܪܲܩܕܸܝܚ ܘܫܵܬܹܝܚ ܘܪܵܘܹܝܚ ܘܙܲܡܪܹܝܚ ܥܲܠ ܩ̈ܝܼܢܵܬ̣ܵܐ ܒܩܵܠܵܐ ܚܢܝܼܚܵܐ

ܟܲܠܬ̣ܵܐ ܗ̄ܘܵܝܢ ܒܬ̣ܘܼܠܬܵܐ ܘܲܢܙܝܼܪܬܵܐ ܘܕܸܡܝܼ ܡܩܲܕܫܵܐ ܠܹܐ ܝܠܹܗ ܫܦܝܼܚܵܐ
ܟܘܼܢܵܝܵܐ ܕܡܲܠܟܵܐ ܘܚܲܬ̣ܢܵܐ ܫܡܲܝܵـܢܵܐ ܘܬܵܓ̣ܵܐ ܘܟܠܝܼܠܵܐ ܥܲܠܘܼܟ̣ ܚܫܝܼܚܵܐ
ܚܲܩܠܵܐ ܕܓܲܢܬ̣ܵܐ ܕܚܘܼܒܝܼ ܫܲܡܝܼܢܬܵܐ ܝܠܵܗ̇ ܘܟܲܗܝܼܢܬܵܐ ܘܥܲܦܪܵܗ̇ ܦܲܚܝܼܚܵܐ
ܒܸܕ ܝܲܗ̄ܒ̣ܸܠ ܦܹܐܪܹܐ ܛܵܒܹ̈ܐ ܐܸܢ ܦܵܝܸܫ ܒܐܲܟܵܪܵܐ ܕܐܲܪܥܵܐ ܦܠܝܼܚܵܐ
ܫܬܘܼܠ ܫܸܬܠܘܼܟ̣ ܓܵܘ ܥܘܼܡܩܵܐ ܕܠܸܒܝܼ ܐܲܝܟ̣ ܚܸܪܦܵܐ ܕܣܝܼܚܵܐ
ܡܲܫܬܝܼـ ܠܐܝܼܠܵܢܵܐ ܡܩܲܕܫܵܐ ܕܚܲܝܹ̈ܐ ܡ̣ܢ ܕܸܡܵܐ ܕܘܲܪܝܼܕܼܵܐ ܟܣܝܼܚܵܐ
ܪܫܘܼܡ ܠܹܗ ܣܝܼܩܘܿܡܵܐ ܕܐܵܗܵܐ ܥܸܕܵܢܵܐ ܥܒ̣ܘܼܕܼ ܠܘܼܟ̣ ܬܲܐܪܝܼܚܵܐ
ܫܸܡܘܼܟ̣ ܝܵܐ ܕܸܩܠܲܬ̣ ܒܸܕ ܦܵܝܸܫ ܥܲܠ ܠܘܼܚܵܐ ܕܠܸܒܝܼ ܢܣܝܼܚܵܐ
ܡܓܵܒܝܼ ܕܗܵܘܹܝܬ ܥܲܡܝܼ ܓܵܘ ܫܡܲܝܵܐ ܟܠܝܘܿܡ ܚܸܕܝܵܐ ܘܲܦܨܝܼܚܵܐ
ܝܵܢ ܡܵܘܬ̣ܵܐ ܘܒܠܝܼܥܵܐ ܒܐܲܪܥܵܐ ܘܓܲܪܡ̈ܘܼܟ̣ ܛܚܝܼܢܹ̈ܐ ܐܲܝܟ̣ ܕܲܚܝܼܚܵܐ

ܟ̣ܵܡܝܼܣ ܓܝܼܘܲܪܓܝܼܣ

19

نتاجات بالسريانية / ܐܝܠ ܐܝܠ ܠܡܢܐإلهي إلهي لماذا؟

« في: 12:05 20/04/2014  »

ܐܝܠ ܐܝܠ ܠܡܢܐ؟

ܐܹܝܠ ܐܹܝܠ ܠܡܵܢܵܐ ܐܵܫܘܿܪ ܦܝܼܫܠܹܗ ܫܒ̣ܝܼܩܵـــــــــــــــــــܐ
ܓܵܘ ܒܹܝܬ̣ ܢܲܗܖܹ̈ܝܢ ܒܐܝܼܕܼܵܐ ܕܣܲܢܝܵܢ̈ܘܼܟ̣ ܐܲܣܝܼܪܵܐ ܕܒ̣ܝܼܩܵـــــــــܐ
ܩܵܠܵܐ ܕܲܨܪܵܚܬܹܗ ܠܵܐ ܡܛܹܐ ܠܵܗ̇ ܠܲܪܩܝܼܥܵـــــــــــــــــــــܐ؟
ܨܸܠܦܵܐ ܕܕܸܦܢܹܗ ܐܲܝܟ̣ ܗܵܘ ܕܝܼܠ̄ܘܼܟ̣ ܥܲܡܝܼܩܵـــــــــــــــــــــܐ
ܛܥܝܼܢܵܐ ܣܩܝܼܦܘܼܟ̣ ܛܥܵܡܵܐ ܡܵܘܬ̣ܵܐ ܥܲܡ ܬܲܫܢܝܼܩܵــــــــــــܐ
ܦܲܓ̣ܪܵܐ ܕܫܲܒ̣ـܖܹ̈ܐ ܒܡܲܥܡܘܿܕܝܼܬ̣ܵܐ ܕܕܸܡܵܐ ܣܡܝܼܩܵــــــــــــــــــܐ
ܥܲܡܵܐ ܕܐܵܫܘܿܪ ܠܦܵܪܘܿܩܵܐ ܐܲܝܟ̣ ܕܝܼܠ̄ܘܼܟ̣ ܣܢܝܼܩܵــــــــــــــــــܐ
ܐܲܝܟ̣ ܐܲܒܓܲܪ ܡܲܠܟܵܐ ܠܲܚܙܵܝܬ̣ܘܼܟ̣ ܠܸܒܹܗ ܠܗܝܼܩܵــــــــــــــــܐ
ܠܐܝܼܕܼܵܐ ܕܲܫܠܝܼܚܘܼܟ̣ ܡܸܢܕܪܹܫ̄ ܒܸܕ ܗܵܘܹܐ ܢܫܝܼܩܵـــــــــــــــــܐ
ܣܲܒ̣ܪܵܐ ܠܘܲܥܕܘܼܟ̣ ܩܵܐ ܢܝܼܢܘܵܝܹ̈ܐ ܠܹܐ ܠܹܗ ܦܣܝܼܩܵــــــــــــــــܐ
ܡܣܲܦܝܵܢܘܼܟ̣ ܒܨܸܒ̣ܝܵܢܹܗ ܥܲܠ ܢܲܦ̮ـܫܹܗ ܚܢܝܼܩܵـــــــــــــــــــــܐ
ܡܣܲܦܝܵـܢܵܐ ܕܐܘܼܡܬܸܢ ܦܝܼܫܠܹܗ ܩܸܪܝܵܐ ܙܲܕܝܼܩܵــــــــــــــــــــܐ

ܟ̣ܵܡܝܼܣ ܓܝܼܘܲܪܓܝܼܣ
20 ܢܝܼܣܵܢ 2014

20

نتاجات بالسريانية / ܗܘܡܣܐ ܡܚܪܝܐ - ܡܫܘܚܬܐ ܛ - ܢܝܣܢ ملحمة شعرية - القصيدة التاسعة - نيسان

« في: 12:23 29/03/2014  »

ܗܘܡܣܐ ܡܚܪܝܐ
ܡܫܘܚܬܐ ܛ

ܚܲܕ̄ ܡ̣ܢ ܠܲܝ̈ܠܵܘܵܬ̣ܵܐ ܫܸܠܝܹ̈ܐ ܕܢܝܼܢܘܸܐ ܩܪܝܼܡܵܐ ܥܲܠ ܫܡܲܝܵܐ ܚܸܫܟܵܐ ܥܲܡܛܵܢܵܐ
ܐܝܼܢܵܐ ܫܡܲܝܵܐ ܨܦܝܼܬ̣ܵܐ ܝܗ̄ܘܵܬ̣ ܘܟܵܘܟ̣ܒܹ̈ܐ ܒܲܠܒܘܿܨܹܐ ܘܣܲܗܪܵܐ ܓܡܝܼܪܵܐ ܒܲܗܪܵܢܵܐ
ܫܲܘܝܵܐ ܗ̄ܘܵܐ ܠܲܝܠܹܐ ܥܲܡ ܝܵܘܡܵܐ ܠܦܘܼܬ̣ ܣܘܼܪܓܵܕܵܐ ܕܝܼܕܲܥܬ̣ܵܐ ܘܝܘܼܠܦܵܢܵܐ
ܢܝܼܣܵܢ ܝܗ̄ܘܵܐ ܘܒܸܢܫܵܡܵܐ ܝܗ̄ܘܹܝܢ ܗ̄ܘܵܐ ܪܹܝܚܵܐ ܘܥܸܛܪܵܐ ܕܦܸܩܚܵܐ ܕܒܸܒ̈ܠܹܐ ܘܪܹܝܚܵܢܵܐ
ܝܲܪܚܵܐ ܕܫܘܼܚܠܵܦܵܐ ܕܐܵܐܲܪ ܘܗܵܘܵܐ ܘܢܘܼܚܵܡܵܐ ܕܥܸܫܒܵܐ ܘܓܸܠܵܐ ܘܟܠ ܐܝܼܠܵܢܵܐ
ܚܸܕܝܵܐ ܝܗ̄ܘܵܐ ܘܦܨܝܼܚܵܐ ܒܐܲܩܡܵܐ ܚܲܕܬܵܐ ܪܲܥܝܵܐ ܘܦܲܠܵܚܵܐ ܘܐܲܟܵܪܵܐ ܘܓܲܢܵܢܵܐ
ܫܸܢܬ̣ـܝܼ ܚܪܝܼܡܬܵܐ ܥܲܝ̈ܢܝܼ ܩܠܝܼܩܹ̈ܐ ܠܲܫܡܲܝܵܐ ܡܓܲܫܘܼܩܹ̈ܐ ܒܟܵܘܟ̣ܒ̣ܹ̈ܐ ܒܐܘܼܪܚܵܐ ܕܬܲܒܵܢܵܐ
ܒܸܨܝܵܪܵܐ ܒܪܸܥܝܵܢܝܼ ܠܫܘܿܥܝܼܬ̣ܵܐ ܕܐܲܠܵܗܬܵܐ ܥܸܫܬܵܪ ܘܡܘܼܚܸܒܵܗ̇ ܬܲܡܘܼܙ ܪܲܥܝܵܐ ܫܸܛܪܵܢܵܐ
 ܟܲܠܒ̣ܹ̈ܐ ܪܥܝܼܫܹ̈ܐ ܒܸܢܒ̣ܵܚܵܐ ܐܲܝܟ̣ ܕܐܸܢ ܒܸܚܙܵܝܵܐ ܝܗ̄ܘܵܘ ܠܡܲܠܲܐܟ̣ܵܐ ܒܓܸܠܝܵܢܵܐ
ܘܩܵܠܵܐ ܕܨܸܨܖܹ̈ܐ ܘܐܘܼܖ̈ܕܥܹܐ ܓܵܘ ܡܘܼܪܵܝܵܐ ܕܙܸܡܪܵܐ ܡܘܼܣܝܼܩܵܝܵܐ ܪܵܒܵܐ ܚܸܡܬ̣ܵܢܵܐ
ܚܸܕܝܹܐ ܗ̄ܘܵܘ ܘܠܹܐ ܗ̄ܘܵܘ ܡܬܲܚܡܘܼܢܹܐ ܐܸܢ ܐܝܼܬ̣ ܝܵܢ ܠܲܝܬ̣ ܡܸܫܬܲܡܥܵܢܵܐ
ܓܵܘ ܐܝܼܣܵܓܹܝܠܵܐ ܒܡܸܕܝܵܪܵܐ ܕܫܲܒ̣ܥܵܐ ܒܪܹܫ ܙܲܩܵܪܬܵܐ ܪܵܡܬܵܐ ܒܥܸܠܵܝܘܼܬ̣ܵܐ ܕܲܥܢܵܢܵܐ
ܐܲܝܟ̣ ܛܘܼܪܵܐ ܪܵܡܵܐ ܥܲܠ ܪܹܫܹܗ ܠܒ̣ܝܼܟ̣ܠܹܗ ܢܘܼܪܵܐ ܐܲܝܟ̣ ܫܲܠܗܹܒ̣ܝܼܬ̣ܵܐ ܕܒܘܼܠܩܵܢܵܐ
ܒܥܹܐ ܠܝܼ ܕܚܵܙܹܝܢ ܠܛܲܟ̣̈ܣܹܐ ܛܸܫ̈ܝܹܐ ܘܡܵܛܹܝܢ ܠܐ̈ܪܵܙܹ̈ܐ ܕܲܒܪܝܼܬ̣ܵܐ ܘܕܲܟܝܵܢܵܐ
ܐܲܝܟ̣ ܐܲܝܠܵܐ ܢܕܼܵܝܵܐ ܘܫܘܵܪܵܐ ܡ̣ܢ ܐܸܓܵܪܹܐ ܕܩܲܨܪܵܐ ܪܵܡܵܐ ܒܒܸܢܝܵܢܵܐ
ܠܹܐ ܗ̄ܘܹܝܢ ܗܵܘܵܐ ܒܸܙܕܵܥ̄ܝܵܐ ܡ̣ܢ ܢܦܲܠܬܵܐ ܐܲܝܟ̣ ܪܵܘܵܝܵܐ ܐܲܝܟ̣ ܫܹܐܕܵܢܵܐ
ܐܲܝܟ̣ ܓܲܢܵܒ̣ܵܐ ܪܚܵܛܵܐ ܘܲܛܫܵܝܵܐ ܡܛܹܐ ܠܝܼ ܠܒܘܼܪܓܵܐ ܡܕܲܪܓ̣ܵܐ ܡܸܬ̣ܕܲܡܪܵܢܵܐ
ܡ̣ܢ ܡܸܕܝܵܪܵܐ ܠܡܸܕܝܵܪܵܐ ܒܸܣܵܠ̄ܩܵܐ ܒܕܲܖ̈ܓ̣ܹܐ ܕܠܒ̣ܢܹ̈ܐ ܕܛܝܼܢܵܐ ܕܠܵܐ ܡܸܢܝܵـܢܵܐ
ܡܛܹܐ ܠܝܼ ܠܗܲܝܟܠܵܐ ܡܪܲܒܿܥܵܐ ܡܲܕܒܚܹܗ ܦܬܝܼܚܵܐ ܠܨܘܼܒ ܟܵܘܟ̣ܲܒ̣ܬ̣ܵܐ ܕܐܝܼܢܵܢܵܐ
ܩܕܲܡ ܬܲܪܥܹܗ ܟܸܠܝܹ̈ܐ ܬܪܹܝܢ ܨܲܠܡܹ̈ܐ ܕܫܹܝܕܘܼ ܠܲܡܵܣܘܼ ܬܵܘܪܵܐ ܩܲܪܢܵܢܵܐ
ܡܘܼܪܸܡܠܹܗ ܐܝܼ̈ܕܵܬܹܗ ܟܲܗܢܵܐ ܕܐܵܫܘܿܪ ܕܸܟ̣ܝܵܐ ܘܙܲܕܝܼܩܵܐ ܠܡܵܪܝܵܐ ܫܡܲܝܵܢـܵܐ
ܠܒ̣ܝܼܫܵܐ ܡܲܥܦܪܵܐ ܓܵܘܢܹܗ ܙܲܗܝܵܐ ܪܲܒ ܟܘܼܡܪܵܐ ܕܐܵܫܘܿܪ ܣܵܒ̣ܵܐ ܕܸܩܢܵܢܵܐ
ܚܲܟܝܼܡܵܐ ܘܕܸܟ̣ܝܵܐ ܘܟܹܐܢܵܐ ܘܲܬܪܝܼܨܵܐ ܬܲܡܝܼܡܵܐ ܙܲܕܝܼܩܵܐ ܐܵܒ̣ܵܐ ܡܥܲܠܝܵܐ ܘܛܘܼܒ̣ܵܢܵܐ
ܥܲܡܹܗ ܒܬܸܫܡܸܫܬܵܐ ܡܫܵܘܬܦܹ̈ܐ ܟܲܗ̈ܢܹܐ ܘܩܵܪܘܿܝܹ̈ܐ ܕܗܲܝܟܠܵܐ ܘܓܒ̣ܲܝܵܐ ܡܫܲܡܫܵܢܵܐ
««««««««««««««««
ܥܲܡ ܣܝܼܥܵܬ̣ܵܐ ܕܙܲܡܵܖܹ̈ܐ ܠܓܘܼܕܵܐ ܕܝܲܡܝܼܢܵܐ ܘܥܲܠ ܣܲܡܵܠܵܐ ܒܣܸܕܪܵܐ ܬܪܲܝܵܢܵܐ
ܘܡܲܠܟܵܐ ܘܥܲܠܠܵܢܹ̈ܐ ܒܫܸܠܝܵܐ ܟܸܠܝܹ̈ܐ ܟܠ ܚܲܕ̄ ܒܠܸܒܹܗ ܛܠܵܒܵܐ ܚܵܘܣܵܢܵܐ
ܗܹܐ ܡܲܠܟܵܐ ܕܐܵܫܘܿܪ ܘܐܲܪܒܲܥ ܦܸܢܝܵܬ̣ܵܐ ܓܲܢ̄ܒܵܪܵܐ ܕܲܩܪܵܒ̣ܵܐ ܡܸܠܝܵܐ ܚܘܼܡܣܵܢܵܐ
ܐܲܝܟ̣ ܨܸܦܪܵܐ ܡܲܒܝܘܼܢܹܐ ܝܗ̄ܘܵܐ ܡܫܘܼܠܚܵܐ ܡ̣ܢ ܙܲܝܢܵܐ ܘܬܵܓ̣ܵܐ ܘܚܘܼܛܪܵܐ ܕܫܘܼܠܛܵܢܵܐ
ܣܸܬܖܹ̈ܐ ܦܬܝܼܚܹܐ ܚܸܙܘܵܐ ܓܸܠܝܵܐ ܘܐܲܠܵܗܵܐ ܡܛܲܝܒ̣ܵܐ ܒܪܘܼܚܵܐ ܘܠܵܐ ܡܸܬ̣ܚܲܙܝܵܢܵܐ
ܪܹܝܚܵܐ ܗܲܢܝܼܐܵܐ ܕܒܸܣܡܹ̈ܐ ܒܸܣܵܠ̄ܩܵܐ ܠܩܲܪܫܹܐ ܕܗܲܝܟܠܵܐ ܡ̣ܢ ܦܝܼܪܡܵܐ ܬܸܢܵܢܵܐ
ܒܛܲܟ̣ܣܵܐ ܥܲܬܝܼܩܵܐ ܥܲܠ ܡܲܕܒܚܵܐ ܡܩܘܿܕܸܫܠܹܗ ܘܡܘܼܩܪܸܒ̣ܠܹܗ ܥܸܪܒܵܐ ܐܲܝܟ̣ ܩܘܼܪܒܵܢܵܐ
ܒܝܲܕ ܨ̈ܠܵܘܵܬ̣ܵܐ ܘܣܘܿܓ̣ܝܵܬ̣ܵܐ ܩܵܐ ܐܵܫܘܿܪ ܡܠܸـܟ̣ ܡܲܠܟܹ̈ܐ ܡܸܠܝܵܐ ܥܘܼܫܢܵܐ ܘܲܚܢܵܢܵܐ
ܒܕܟ̣ܵܪܵܐ ܠܙܵܟ̣ܘܼܬ̣ܹܗ ܥܲܠ ܬܝܵܡܵܬ ܘܐܵܒܣܘܿ ܘܟܠܝܲܗ̈ܝ ܘܲܚܫܹ̈ܐ ܒܢ̈ܘܿܢܹܐ ܕܣܵܛܵܢܵܐ
ܐܲܢ̄ܬ ܡܫܘܼܠܛܸܢܘܼܟ̣ ܥܲܠ ܟܠ ܐܲܠܵܗܹ̈ܐ ܘܥܒ̣ܝܼܕܠܘܼܟ̣ ܚܘܼܝܵܕܵܐ ܘܗܘܹܐ ܠܘܼܟ̣ ܢܲܨܚܵܢܵܐ
ܐܵܘ ܒܵܪܘܿܝܵܐ ܕܲܫܡܲܝܵܐ ܘܐܲܪܥܵܐ ܘܒܲܪܢܵܫܵܐ ܡ̣ܢ ܕܸܡܵܐ ܘܥܲܦܪܵܐ ܛܝܼܢܵܢܵܐ
ܘܟܠ ܪܲܚܫܵܐ ܘܦܵܪܲܚܬ̣ܵܐ ܕܓܵܘ ܫܡܲܝܵܐ ܘܐܲܪܥܵܐ ܘܝܲܡܵܐ ܠܵܐ ܡܸܬ̣ܡܲܠܠܵܢܵܐ
ܨܲܠܡܘܼܟ̣ ܪܫܝܼܡܵܐ ܥܲܠ ܐܵܬ̣ܵܐ ܓܵܘ ܩܪܵܒ̣ܲܝ̈ܢ ܘܐܲܢ̄ܬ ܪܲܒ ܦܵܠܚܹ̈ܐ ܡܗܲܕܝܵܢـܵܐ
ܡ̣ܢ ܒܥܸܠܕܒ̣ܵܒ̣ܲܝ̈ܢ ܘܡ̣ܢ ܘܢܲܟܘܼܠܬ̣ܢܹ̈ܐ ܘܡ̣ܢ ܪܘܼܚܵܐ ܒܝܼܫܬܵܐ ܐܲܢ̄ܬ ܡܫܵܘܒ̣ܙܒ̣ܵܢܵܐ
ܫܘܼܒ̣ܚܵܐ ܠܫܸܡܘܼܟ̣ ܝܵܐ ܡܵܪܵܐ ܕܐܲܠܵܗܹ̈ܐ ܐܲܢ̄ܬ ܕܲܥܒ̣ܝܼܕܼܠܘܼܟ̣ ܠܲܒ̣ܢܲܝ̈ܢܵܫܲܐ ܦܘܼܪܩܵܢܵܐ
ܐܝܼܡܵܢ ܕܪܓ̣ܝܼܙܠܗ̄ܘܼܢ ܐܲܠܵܗܹ̈ܐ ܘܒܥܹܐ ܠܗ̄ܘܿܢ ܕܚܲܢܩܝܼ ܠܒܲܪܢܵܫܵܐ ܓܵܘ ܛܘܿܦܵܢܵܐ
ܒܸܕ ܥܲܒ̣ܕܸܝܚ ܕܟ̣ܵܪܵܐ ܒܲܡܕܼܝܼܢܵܬ̈ܘܼܟ̣ ܘܙܘܼܝܵܚܵܐ ܬܪܹܝܢ̄ܥܣܲܪ ܝܵܘ̈ܡܵܬ̣ܵܐ ܘܫܲܗܪܵܐ ܘܕܘܼܟ̣ܪܵܢܵܐ
ܥܲܒ̣ܕܹܚ ܨܸܒ̣ܝܵܢܘܼܟ̣ ܘܢܲܛܪܹܚ ܠܢܵܡܘܼܣ̈ܘܼܟ̣ ܘܫܲܠܡܹܚ ܠܩܵܢܘܼܢܘܼ̈ܟ̣ ܦܘܼܩܕܵܢܵܐ ܒܦܘܼܩܕܵܢܵܐ
ܓܵܘ ܩܘܼܕܸܫ ܩܘܼܕܫܹ̈ܐ ܩܕܲܡ ܐܵܫܘܿܪ ܒܪܝܼܟܵܐ ܣܓ̣ܝܼܕܼܵܐ ܐܲܝܟ̣ ܡܗܲܝܡܢܵܐ ܡܨܲܠܝܵܢܵܐ
ܨܠܘܼܬܹܗ ܩܵܐ ܡܵܪܝܵܐ ܒܒܸܟ̣ܝܵܐ ܘܲܪܬ̣ܹܝܬ̣ܵܐ ܠܚܵܘܒܹ̈ܐ ܕܥܲܡܹܗ ܛܠܵܒܵܐ ܫܘܼܒ̣ܩܵܢܵܐ
«««««««««««««««««
ܒܕܸܚܠ̱ܬ̣ܵܐ ܘܒ̣ܐܝܼܩܵܪܵܐ ܒܠܸܒܵܐ ܕܲܟ̣ܝܵܐ ܒܥܵܝܵܐ ܪܲܚ̈ܡܹܐ ܡ̣ܢ ܐܲܠܵܗܵܐ ܡܪܲܚܡܵܢܵܐ
ܥܒ̣ܵܕܵܐ ܬܝܵܒ̣ܘܼܬ̣ܵܐ ܐܲܝܟ̣ ܡܸܨܥܵܝܵܐ ܒܹܝܢ ܥܲܡܵܐ ܘܡܵܪܝܵܐ ܓܒ̣ܵܝܵܐ ܥܘܼܕܼܪܵܢܵܐ
ܒܣܲܒ̣ܪܵܐ ܕܩܲܒܸܠ ܩܘܼܪܒܵܢܹܗ ܘܝܲܗܒ̣ܸܠ ܦܘܼܢܵܝܵܐ ܓܵܘ ܚܲܕ̄ ܪܸܡܙܵܐ ܡܚܵܘܝܵܢܵـܐ
ܓܵܘ ܚܘܼܬܵܡܵܐ ܡܘܿܟܪܸܙܠܹܗ ܘܦܬܝܼܚܠܹܗ ܐܸܓܲܪܬܹܗ ܘܩܪܹܐ ܠܹܗ ܒܘܼܝܵܢܵܐ
ܒܪܘܼܓ̣ܙܵܐ ܓܙܸܡܠܹܗ ܠܡܲܠܟܵܐ ܕܡܲܦܠܸܚ ܚܸܟ̣ܡ̱ܬܵܐ ܘܗܵܘܹܐ ܙܗܝܼܪܵܐ ܘܡܸܫܬܲܐܠܢܵܐ
ܗܵܐ ܒܥܸܠܕܒ̣ܵܒ̣ܵܐ ܡܘܼܚܪܸܦܵܐ ܝܠܹܗ ܟܵܟܹ̈ܗ ܐܲܝܟ̣ ܕܹܐܒ̣ܵܐ ܣܪܝܼܚܵܐ ܕܸܡܵܢܵܐ
ܗܵܐ ܐܵܬ̣ܵܐ ܕܦܘܼܠܵܓ̣ܵܐ ܡܪܲܦܪܘܿܦܹܐ ܝܠܹܗ ܒܪܹܫ ܡܲܠܟܘܼܬ̣ܘܼܟ̣ ܩܪܝܼܒܠܹܗ ܐܘܼܠܨܵܢܵܐ
ܥܒ̣ܘܼܕ ܬܘܼܪܵܨܵܐ ܥܒ̣ܘܼܕ ܚ̈ܘܼܕܵܬ̣ܵܐ ܓܲܝܣܵܐ ܣܢܝܼܩܵܐ ܝܠܹܗ ܠܪܲܒ ܚܲܝܠܵܐ ܩܪܲܒ̣ܬ̣ܵܢܵܐ
ܡܒܘܿܪܸܟ̣ ܠܹܗ ܠܫܲܢ̄ܬܵܐ ܚܲܕܬܵܐ ܐܵܫܘܿܪܵܝܬܵܐ ܠܟܠܲܝܗܝ ܐܵܦ ܠܐܲܣܝܼܪܵܐ ܘܓܵܘܣܵܢܵܐ
ܒܫܸܡܵܐ ܕܐܵܫܘܿܪ ܐܲܠܵܗܵܐ ܚܲܝܵܐ ܫܒ̣ܘܼܩ ܡܫܲܪܹܐ ܙܘܼܝܵܚܵܐ ܡ̣ܢ ܕܐܵܗܵܐ ܥܸܕܵܢܵܐ
ܓܵܘ ܟܠ ܡܵܬ̣ܵܐ ܘܲܡܕܼܝܼ̄ܬܵܐ ܓܵܘ ܢܝܼܢܘܸܐ ܘܐܵܫܘܿܪ ܘܒܵܒܐܹܝܠ ܘܟܠ ܐܘܼܚܕܵܢܵܐ
ܘܡܘܿܩܘܸܚܠܗ̄ܘܿܢ ܚܲܝܹ̈ܐ ܠܐܵܫܘܿܪ ܥܲܡܵܐ ܘܐܲܬ̣ܪܵܐ ܘܫܘܼܒ̣ܚܵܐ ܠܐܵܫܘܿܪ ܠܵܐ ܡܸܬ̣ܕܲܪܟܵܢܵܐ
ܝܲܪܚܵܐ ܕܐܵܘܝܘܼܬ̣ܵܐ ܘܣܲܒ̣ܪܵܐ ܒܚܘܼܝܵܕܵܐ ܘܫܲܝܢܵܐ ܘܲܫܠܵܡܵܐ ܘܲܠܐܲܠܵܗܵܐ ܬܘܼܟ̣ܠܵܢܵܐ
ܥܲܕܥܹܐܕܵܐ ܡܩܲܕܫܵܐ ܘܡܹܐܙܲܠܬܵܐ ܕܙܵܟ̣ܘܼܬ̣ܵܐ ܗܲܠ ܬܲܪܥܵܐ ܕܥܸܫܬܵܪ ܠܲܝܬ ܠܵܗ̇ ܟܸܠܝܵܢܵܐ

ܟ̣ܵܡܝܼܣ ܓܝܼܘܲܪܓܝܼܣ

21

نتاجات بالسريانية / ܗܘܡܣܐ ܡܚܪܝܐ - ܡܫܘܚܬܐ ܚ ملحمة شعرية - القصيدة الثامنة

« في: 12:15 15/03/2014  »

ܗܘܡܣܐ ܡܚܪܝܐ
ܡܫܘܚܬܐ ܚ

ܒܡܲܕܢܵܚܵܐ ܕܨܲܦܪܵܐ ܩܵܠܵܐ ܕܩܲܪܢܵܐ ܘܲܕܫܝܼܦܘܿܪܵܐ ܡܚܹܐ ܠܹܗ ܪܵܡܵܐ
ܐܲܝܟ̣ ܪܲܥܡܵܐ ܕܫܵܥܸܫ ܠܛܘܼܖܹ̈ܐ ܘܐܲܝܟ̣ ܐܲܪܝܵܐ ܒܥܵܒ̣ܵܐ ܢܗܵܡܵܐ
ܚܲܝܠܵܢܵܐ ܘܪܗܝܼܒ̣ܵܐ ܪܲܒܵܐ ܘܦܪܝܼܫܵܐ ܘܠܲܝܬ ܗ̄ܘܵܐ ܠܹܗ ܦܘܼܚܵܡܵܐ
ܣܸܠ̄ܩܠܹܗ ܒܪܵܐ ܩܵܠܵܐ ܒܲܡܪܵܘܡܵܐ ܕܲܫܡܲܝܵܐ ܕܠܲܝܬ ܠܹܗ ܬܘܼܚܵܡܵܐ
 ܢܚܸܬ̣ܠܹܗ ܠܐܲܪܥܵܐ ܘܲܠܥܘܼܡܩܵܐ ܕܲܫܝܘܿܠ ܘܠܲܬ̣ܗܘܿܡܵܐ ܬܲܚܬܵܝܵܐ ܕܝܵܡܵܐ
ܦܬܝܼܚܠܗ̄ܘܼܢ ܬܲܖ̈ܥܹܐ ܥܒ̣ܝܼܪܠܗ̄ܘܼܢ ܡܙܲܝܢܹ̈ܐ ܕܠܵܐ ܫܩܲܠܬܵܐ ܕܲܫܠܵܡܵܐ
ܡܲܩܘܘܿܚܹ̈ܐ ܪܥܘܼܫ̈ܘܼ ܩܘܼܡ̈ܘܼ ܕܡܝܼܟ̣ܹ̈ܐ ܒܫܸܢܬ̣ܵܐ ܕܢܸܚܠܹܗ ܐܝܼܡܵܡܵܐ
ܣܲܝܦܲܝܗ̈ܝ ܚܲܪܝܼܦܹ̈ܐ ܡ̣ܢ ܚܸܠܬ̣ܲܝ̈ܗܝ ܓܖ̈ܝܼܫܹܐ ܨܪܵܚܵܐ ܘܒܸܓܙܵܡܵܐ
ܐܲܝܟ̣ ܕܐܸܢ ܒܝܵܘܡܵܐ ܐ̄ܚܲܪܵܝܵܐ ܘܚܲܝܹ̈ܐ ܡܛܐܹ ܠܗ̄ܘܼܢ ܠܫܘܼܠܵܡܵܐ
ܐܲܝܟ̣ ܩܕܲܡ ܕܝܲܢܬܵܐ ܪܲܒܬ̣ܵܐ ܕܐܵܫܘܿܪ ܓܵܘ ܝܵܘܡܵܐ ܕܢܘܼܚܵܡܵܐ
ܝܵܐ ܪܲܒ ܚܸܙܘܵܐ ܝܠܹܗ ܫܲܪܝܼܪܵܐ ܝܵܢ ܚܸܠܡܵܐ ܗ̄ܘܹܝܢ ܒܸܚܠܵܡܵܐ؟
ܐܸܓܲܪܬܵܐ ܥܲܠ ܠܘܿܚܵܐ ܕܛܝܼܢܵܐ ܦܝܼܫܠܵܗ̇ ܩܪܝܼܬ̣ܵܐ ܦܸܬ̣ܓ̣ܵܡܵܐ ܒܦܸܬ̣ܓ̣ܵܡܵܐ
ܣܸܦ̈ܘܵܬ̣ܵܐ ܕܩܵܪܘܼܝܵܐ ܒܸܫܥܵܫܵܐ ܥܲܡ ܙܵܘܥܹ̈ܐ ܕܗܘܼܓܵܝܵܐ ܘܡܸ̈ܠܹܐ ܒܸܪܬ̣ܵܡܵܐ
 ܠܲܥܙܹܗ ܐܵܫܘܿܪܵܝܵܐ ܦܫܝܼܩܵܐ ܘܦܫܝܼܛܵܐ ܡܸܬܕܲܪܟܵܢܵܐ ܕܠܵܐ ܬܘܼܪܓܵܡܵܐ
ܒܲܕܡܘܼܬ̣ܵܐ ܟܲܗܢܵܐ ܒܗܲܝܟܠܵܐ ܕܐܵܫܘܿܪ ܕܸܩܢܹܗ ܝܲܪܝܼܟ̣ܵܐ ܚܘܵܪܵܐ ܘܐܘܼܟܵܡܵܐ
ܐܝܼܢܵܐ ܠܲܝܬ̣ ܚܕܵܐ ܐܵܬ̣ܵܐ ܡܲܚܙܘܼܝܹܐ ܕܝܼܠܹܗ ܒܲܟܢܘܼܫܝܵܐ ܕܟܲܗܢܹ̈ܐ ܗܲܕܵܡܵܐ
ܝܵܐ ܪܲܒ ܦܘܼܩܕܵܢܵܐ ܝܠܹܗ ܡ̣ܢ ܡܲܠܟܘܼܬ̣ܵܐ ܝܵܢ ܠܘܼܚܵܫܵܐ ܕܚܲܣܵܡܵܐ؟
ܡܲܡܠܠܵܐ ܕܲܓܵܠܵܐ ܣܵܟ̣ ܠܲܝܬ̣ ܒܹܗ ܫܪܵܪܵܐ ܠܹܐ ܝܠܹܗ ܒܸܠܚܵܡܵܐ
ܟܲܗܢܵܐ ܙܹܐܦܵܢܵܐ ܝܠܹܗ ܘܕܲܓܵܠܵܐ ܘܛܲܡܐܵܐ ܘܡܸܠܝܵܐ ܫܘܼܚܵܡܵܐ
ܓܵܘ ܥܲܝ̈ܢܹܗ ܒܸܚܙܵܝܵܐ ܗ̄ܘܹܝܢ ܒܝܼܫܬܵܐ ܘܪܹܝܚܵܐ ܕܢܸܟ̣ܠܵܐ ܒܸܢܫܵܡܵܐ
ܐ̄ܡܝܼܪ ܠܹܗ ܙܘܼܗܵܪܵܐ ܝܠܹܗ ܐܝܼܬ̣ ܫܠܲܡܬܵܐ ܝܵܢ ܣܲܝܦܵܐ ܘܦܪܵܡܵܐ
ܡܵܢܝ ܝܼܠܹܗ ܕܸܩܠܲܬ̣ ܒܪܘܼܢܵܐ ܕܐܝܼܢܵܢܵܐ؟ ܫܒ̣ܘܼܩ ܦܵܣܸܥ ܠܲܩܵܕ̄ܡܵܐ
ܝܸܡܝܼ ܫܓ̣ܝܼܫܬܵܐ ܡܲܢܬ̣ܘܿܖܹ̈ܐ ܕܸܡܥܹ̈ܐ ܒܟ̣ܵܝܵܐ ܥܲܠ ܦܲܐܬ̣ܵܗ̇ ܒܸܠܛܵܡܵܐ
ܩܒܵܠܵܐ ܒܵܥܘܼܬ̣ܵܐ ܩܵܐ ܐܲܠܵܗܵܐ ܘܘܲܥܕܵܐ ܒܲܨܠܘܿܬ̣ܵܐ ܘܨܝܵܡܵܐ
ܕܥܵܒ̣ܸܕ ܦܘܼܪܩܵܢܵܐ ܘܲܡܦܲܨܹܐ ܠܚܲܒܝܼܒ̣ܵܗ̇ ܡ̣ܢ ܐܝܼܕܼܵܐ ܕܠܝܼܛܵܐ ܚܲܪܵܡܵܐ
ܝܒ̣ܝܼܫܠܝܼ ܒܫܵܘܦܝܼ ܟܠ ܡܸܢܕܝܼ ܩܕܲܡ ܥܲܝ̈ܢܝܼ ܡܫܘܿܪܹܐ ܠܹܗ ܟܝܵܡܵܐ
ܡܘܼܕܝܼ ܥܲܒ̣ܕܸܢ ܠܲܝܬ ܠܝܼ ܚܲܪܒܵܐ ܘܚܸܪܦܵܐ ܘܠܵܐ ܢܸܣܝܵܢܵܐ ܒܢܘܼܩܵܡܵܐ؟
 ܡܘܼܕܝܼ ܡܓܵܒܹܝܢ ܚܲܝܹ̈ܐ ܒܥܲܒ̣ܕܘܼܬ̣ܵܐ ܝܵܢ ܡܘܿܬ̣ܵܐ ܒܚܸܩܪܵܐ ܘܪܘܼܡܪܵܡܵܐ؟
ܣܲܒ̣ܪܝܼ ܒܐܲܠܵܗܵܐ ܘܐܘܼܪܚܵܐ ܕܦܘܼܪܩܵܢܵܐ ܓܵܘ ܡܘܼܚܝܼ ܒܣܘܼܪܗܵܒ̣ܵܐ ܪܫܵܡܵܐ
ܒܚܲܝܠܵܐ ܕܲܥܠܲܝܡܘܼܬ̣ܝܼ ܥܪܝܼܩܠܝܼ ܠܲܩܵܕ̄ܡܵܐ ܘܥܲܝܢ̈ܝܼ ܥܲܠ ܣܲܝܦܵܐ ܣܝܵܡܵܐ
ܐܲܝܟ̣ ܩܪܲܒ̣ܬ̣ܵܢܵܐ ܨܦܝܼܚܠܝܼ ܠܚܲܕ̄ ܡ̣ܢ ܒܥܸ̈ܠܕܒ̣ܵܒ̣ܝܼ ܒܲܠܒ̣ܝܼܒ̣ܘܼܬ̣ܵܐ ܕܠܵܐ ܙܠܵܡܵܐ
ܐܲܝܟ̣ ܟܘܼܬܵܫܵܐ ܕܓܸܠܓܵܡܸܫ ܥܲܡ ܚܲܡܒܵܒܵܐ ܕܠܵܐ ܪܲܚܡܹ̈ܐ ܘܠܵܐ ܪܘܼܚܵܡܵܐ
ܨܲܕܪܵܐ ܒܨܲܕܪܵܐ ܕܠܵܐ ܟܠܵܝܬ̣ܵܐ ܘܠܲܝܬ̣ ܫܠܲܡܬܵܐ ܗܲܠ ܙܵܟ̣ܘܼܬ̣ܵܐ ܘܚܘܼܬܵܡܵܐ
ܢܦܝܼܠ ܠܹܗ ܬܚܘܼܬ ܐܲܩ̈ܠܝܼ ܦܲܠܓܹܗ ܡܝܼܬ̣ܵܐ ܝܕܝܼܥܠܝܼ ܕܠܲܝܬ ܠܹܗ ܩܘܼܝܵܡܵܐ
 ܕܥܝܼܣܠܝܼ ܠܣܲܝܦܹܗ ܣܡܝܼܡܵܐ ܓܵܘ ܠܸܒܹܗ ܕܠܵܐ ܗܵܘܹܐ ܠܹܗ ܣܘܼܡܣܵܡܵܐ
ܐܸܢ ܓܘܼܢܚܵܐ ܝܠܹܗ ܘܩܸܛܠܵܐ ܚܸܕܝܵܐ ܗ̄ܘܹܝܢ ܕܩܲܒܠܹܢ ܟܹܐܦܹ̈ܐ ܘܪܓܵܡܵܐ
ܐܸܢ ܓܲܢ̄ܒܵܪܘܼܬ̣ܵܐ ܝܠܵܗ̇ ܫܒ̣ܘܼܩ ܟܵܬ̣ܸܒ̣ ܡܵܚܘܿܪܵܐ ܒܕܝܘܼܬ̣ܵܐ ܘܩܲܠܵܡܵܐ

ܟ̣ܵܡܝܼܣ ܓܝܼܘܲܪܓܝܼܣ

22

نتاجات بالسريانية / ملحمة شعرية - القصيدة السابعة ܗܘܡܣܐ ܡܚܪܝܐ - ܡܫܘܚܬܐ ܙ

« في: 01:24 19/02/2014  »

ܗܘܡܣܐ ܡܚܪܝܐ
ܡܫܘܚܬܐ- ܙ

ܓܵܘ ܒܲܝܬܵܐ ܕܢܸܫܹ̈ܐ ܓܵܘ ܩܲܨܪܵܐ ܪܵܡܵܐ ܒܲܡܕܝܼܢ̄ܬܵܐ ܥܡܝܼܪܵܐ
ܕܡܝܼܟ̣ܵܐ ܥܲܠ ܡܸܣܛܲܒܬ̣ܵܐ ܓܵܘ ܚܘܼܫܵܒܹ̈ܐ ܘܗܸ̈ܪܓܹܐ ܥܲܡܘܼܩܹ̈ܐ ܛܡܝܼܪܵܐ
ܫܘܼ̈ܐܵܠܝܼ ܒܲܪ ܡܵܢܝܼ ܗ̄ܘܹܝܢ ܐܵܢܵܐ؟ ܚܹܐܪܵܐ ܗ̄ܘܹܝܢ ܝܲܢ ܐܲܣܝܼܪܵܐ؟
ܦܲܓ̣ܪܝܼ ܫܸܢܝܵܐ ܘܫܦܝܼܠܵܐ ܪܸܦܝܵܐ ܘܫܸܠܝܵܐ ܐܲܝܟ̣ ܢܲܗܪܵܐ ܨܡܝܼܪܵܐ
ܫܸܢܬ̣ܝܼ ܝܲܩܘܼܪܬܵܐ ܘܚܸܠܡܝܼ ܩܲܠܘܼܠܵܐ ܦܪܵܚܵܐ ܐܲܝܟ̣ ܛܲܪܦܵܐ ܢܬ̣ܝܼܪܵܐ
ܒܨܲܦܪܵܐ ܦܬܝܼܚܠܝܼ ܠܥܲܝܢ̈ܝܼ ܪܓ̣ܸܫܠܝܼ ܒܲܫܚܘܼܢܬܵܐ ܕܫܸܡܫܵܐ ܘܙܲܗܪܝܼܪܵܐ
ܓܵܘ ܚܸܡܵܐ ܕܩܲܝܛܵܐ ܒܥܸܕܵܢܵܐ ܕܛܲܗܪܵܐ ܐܲܝܟ̣ ܐܲܬܘܼܢܵܐ ܕܢܘܼܪܵܐ ܫܓ̣̄ܝܼܪܵܐ
ܬܲܪܒܵܐ ܕܡܘܿܚܝܼ ܩܸܫܝܵܐ ܐܲܝܟ̣ ܫܥܘܿܬ̣ܵܐ ܪܟܝܼܟ̣ܵܐ ܫܚܝܼܢܵܐ ܘܦܫܝܼܪܵܐ
ܠܸܒܝܼ ܚܪܝܼܟ̣ܵܐ ܩܝܼܕܵܐ ܘܨܸܗܝܵܐ ܠܡ̈ܝܼܵܐ ܘܬܲܠܓܵܐ ܩܲܪܝܼܪܵܐ
ܒܠܲܝ̈ܠܘܵܬ̣ܵܐ ܚܸܫܟܵܐ ܥܲܡܛܵܢܵܐ ܡܓܲܫܘܼܩܹܐ ܒܚܸܙܘܵܐ ܕܲܫܡܲܝܵܐ ܫܲܦܝܼܪܵܐ
ܐܘܼܪܚܵܐ ܕܬܲܒܵܢܵܐ ܒܲܗܪܵܢܬܵܐ ܘܟܵܘܟ̣ܒ̣ܹ̈ܐ ܕܠܵܐ ܡܸܢܝܵܢܵܐ ܘܣܲܗܪܵܐ ܓܡܝܼܪܵܐ
ܠܲܝܬ̣ ܕܡܵܨܹܐ ܕܲܡܦܵܫܸܩ ܠܐ̄ܪܵܙܵܐ ܕܲܟܝܵܢܵܐ ܠܵܐ ܐܵܦ ܟܲܠܕܼܵܝܵܐ ܒܚܝܼܪܵܐ
ܒܸܙܕܵܥܝܵܐ ܕܲܡܒܲܩܪܸܢ ܐܲܝܟܵܐ ܝܠܹܗ ܐܲܠܵܗܵܐ ܕܠܵܐ ܗܵܘܹܝܢ ܒܬܵܘܕܝܼܬ̣ܝܼ ܟܦܝܼܪܵܐ
ܚܲܝܵܐ ܓܵܘ ܫܡܲܝܵܐ؟ ܝܵܢ ܡܝܼܬ̣ܵܐ ܥܲܠ ܐܲܪܥܵܐ ܐܲܝܟ̣ ܨܲܠܡܵܐ ܢܩܝܼܪܵܐ؟
ܡ̣ܢ ܪܸܚܩܵܐ ܒܸܫܡܵܥ̄ܝܵܐ ܩܵܠܵܐ ܕܙܸܡܪܵܐ ܕܫܲܗܪܵܢܵܐ ܒܡܲܫܬܘܼܬ̣ܵܐ ܫܗܝܼܪܵܐ
ܩܵܠܵܐ ܕܩܸܪܕܸܚܬܵܐ ܕܟܵܣܹ̈ܐ ܘܡܵܐܢܹ̈ܐ ܕܲܫܬܵܝܬܵܐ ܘܠܝܼܢܵܐ ܬܒ̣ܝܼܪܵܐ
 ܒܸܚܙܵܝܵܐ ܗ̄ܘܹܝܢ ܐܝܼ̈ܕܵܬ̣ܵܐ ܪܓܵܕܵܐ ܡ̣ܢ ܚܲܝܠܵܐ ܕܚܲܡܪܵܐ ܥܲܬܝܼܩܵܐ ܬܛܝܼܪܵܐ
ܫܲܟ̣ܪܵܐ ܡܲܫܢܘܼܝܹܐ ܠܦܲܓ̣ܪܵܐ ܕܒܲܪܢܵܫܵܐ ܡܚܝܼܠܵܐ ܐܲܝܟ̣ ܣܲܡܵܐ ܡܲܪܝܼܪܵܐ
ܘܪܘܵܝܵܐ ܒܚܘܼܒܵܐ ܕܪܵܩܲܕܼܬܵܐ ܙܲܠܝܼܠܬܵܐ ܒܸܩܛܵܠܵܐ ܚܲܫܵܐ ܕܠܸܒܵܐ ܟܡܝܼܪܵܐ
ܢܫܵܡܵܐ ܗ̄ܘܹܝܢ ܪܹܝܚܵܐ ܕܚܲܡܪܵܐ ܕܥܸܢܒ̣ܹ̈ܐ ܐ̄ܟܘܼܡܹ̈ܐ ܕܟܲܪܡܵܐ ܥܨܝܼܪܵܐ
ܘܪܹܝܚܵܐ ܗܲܢܝܼܐܵܐ ܘܒܲܣܝܼܡܵܐ ܕܒܸܣܪܵܐ ܢܵܝܵܐ ܕܥܸܓ̣ܠܵܐ ܢܚܝܼܪܵܐ
ܡܛܘܼܝܵܐ ܥܲܠ ܓܘܼܡܖܹ̈ܐ ܕܫܸܚܪܵܐ ܘܚܸܡܬ̣ܵܐ ܕܢܘܼܪܵܐ ܢܲܓܝܼܪܵܐ
ܠܵܝܫܵܐ ܕܩܲܡܚܵܐ ܕܚܸܛܹ̈ܐ ܚܡܝܼܥܵܐ ܘܓܸܒܝܵܐ ܡ̣ܢ ܚܲܝܠܵܐ ܕܲܚܡܝܼܪܵܐ
ܝܵܦܵܝܵܐ ܒܹܐܦܵܝܵܐ ܠܲܚܡܵܐ ܕܲܓܪܝܼܨܬܵܐ ܒܬܲܢܘܼܪܵܐ ܓܵܘ ܐܲܪܥܑܵܐ ܚܦܝܼܪܵܐ
ܩܵܐ ܟܲܪܣܵܐ ܟܦܝܼܢܬܵܐ ܠܲܝܬ ܦܘܼܪܫܘܼܢܝܵܐ ܠܲܚܡܵܐ ܚܡܝܼܥܵܐ ܝܵܢ ܦܲܛܝܼܪܵܐ
ܥܲܒ̣ܕܵܐ ܡܸܣܟܹܝܢܵܐ ܥܒ̣ܵܕܵܐ ܬܸܫܡܸܫܬܵܐ ܠܲܝܬ ܠܹܗ ܦܘܼܪܥܵܢܵܐ ܝܼܠܹܗ ܐܲܓܝܼܪܵܐ
ܙܸܕܩܹܗ ܡܬܘܼܚܸܒܵܐ ܒܢܵܡܘܼܣܵܐ ܥܪܝܼܒ̣ܵܐ ܡܗܲܝܡܢܵܐ ܠܡܵܪܹܗ ܥܲܬܝܼܪܵܐ
ܡܫܘܼܥܒܕܼܵܐ ܬܚܘܼܬ ܫܘܼܠܛܵܢܵܐ ܘܩܵܢܘܼܢܵܐ ܕܠܵܐ ܒܨܸܒ̣ܝܵܢܹܗ ܦܠܵܚܵܐ ܒܲܩܛܝܼܪܵܐ
ܝܸܡܝܼ ܫܗܝܼܪܬܵܐ ܡܬܲܢܘܼܝܹܐ ܠܗܘܼܡܵܣܵܐ ܕܓܸܠܓܵܡܸܫ ܡܲܠܟܵܐ ܢܲܚܫܝܼܪܵܐ
ܒܘܼܬ ܚܲܝܹ̈ܐ ܘܡܵܘܬ̣ܵܐ ܘܲܡܬ̣ܘܼܡܵܝܘܼܬ̣ܵܐ ܕܓܲܢ̄ܒܵܖܹ̈ܐ ܕܐܵܫܘܼܪ ܒܙܲܒ̣ܢܵܐ ܥܒ̣ܝܼܪܵܐ
ܒܘܼܕ ܢܵܕܹܢ ܒܪܘܼܢܵܐ ܣܲܟ̣ܠܵܐ ܘܡܲܬ̣ܠܹ̈ܐ ܕܚܲܟܝܼܡܵܐ ܐܵܚܘܿܢܵܐ ܚܩܝܼܪܵܐ
ܐܵܚܘܼܢ̈ܘܵܬ̣ܝܼ ܒܫܸ̈ܢܹܐ ܕܝܲܠܘܼܕܵܐ ܘܛܲܠܝܵܐ ܘܫܲܒ̣ܪܵܐ ܘܲܥܠܲܝܡܵܐ ܟܲܫܝܼܪܵܐ
ܒܓܵܘܢܹ̈ܐ ܦܪܝܼܫܹ̈ܐ ܚܘܵܖܹ̈ܐ ܘܣܡܘܿܩܹܵܐ ܘܚܲܕ̄ܟ̈ܡܵܐ ܐ̄ܟܘܼܡܹ̈ܐ ܐܲܝܟ̣ ܩܝܼܪܵܐ
ܟܠܲܢ ܡ̣ܢ ܚܲܕ̄ ܐܲܒ̣ܵܐ ܘܓܵܘ ܫܸܖ̈ܝܵܢܲܝܢ ܘܘܲܖ̈ܝܼܕܲܝܢ ܒܸܚܕܵܪܵܐ ܕܸܡܹܗ ܝܲܩܝܼܪܵܐ
ܚܲܬ̈ܘܵܬ̣ܝܼ ܟܵܘܣܲܝ̈ܗܝ ܝܲܪܝܼܟ̣ܵܐ ܓܕܝܼܠܵܐ ܨܘܼܨܝܼܬ̣ܵܐ ܐܲܝܟ̣ ܚܲܒ̣ܠܵܐ ܙܩܝܼܪܵܐ
 ܒܨܸܒ̈ܥܵܬ̣ܲܝܗܝ ܥܸ̈ܙܩܵܬ̣ܵܐ ܕܣܹܐܡܵܐ ܘܕܲܗܒ̣ܵܐ ܡܬܘܼܪܨܹܐ ܒܝܲܕ ܩܝܼܢܵܝܵܐ ܡܗܝܼܪܵܐ
ܥܲܠ ܩܕܵܠܲܝܗ̈ܝ ܚܘܼܡܖܹ̈ܐ ܘܒܐܝܼܕܵܬܲܝܗ̈ܝ ܩܘܼܠܒܹ̈ܐ ܡܛܲܥ̈ܡܹܐ ܒܟܹܐܦܵܐ ܕܫܲܡܝܼܪܵܐ
ܡܲܠܟ̈ܝܵܬ̣ܵܐ ܐܲܝܟ̣ ܡܲܠܲܐܟ̣̈ܝܵܬ̣ܵܐ ܐܲܣ̈ܝܼܪܹܐ ܕܚܘܼܒܵܐ ܕܡܲܠܟܵܐ ܫܘܼܦܪܲܝ̈ܗܝ ܬܗܝܼܪܵܐ
ܐܲܪܡ̈ܠܝܵܬ̣ܵܐ ܕܡܲܠܟܹ̈ܐ ܥܢ̈ܝܼܕܹܐ ܣܝܼܒ̣ܹ̈ܐ ܘܟܵܘܣܲܝܗܝ ܐܲܝܟ̣ ܬܲܠܓܵܐ ܚܘܝܼܪܵܐ
ܝܸ̈ܡܵܬ̣ܵܐ ܟܠ ܚܕܼܵܐ ܡܲܩܪܘܿܒ̣ܹܐ ܠܒܪܘܿܢܵܗ̇ ܒܘܼܟ̣ܪܵܐ ܐܲܝܟ̣ ܩܸܒܠܵܐ ܢܕܝܼܪܵܐ
ܩܵܐ ܐܵܫܘܼܪ ܐܲܠܵܗܵܐ ܕܲܩܪܵܒ̣ܵܐ ܘܡܵܪܵܐ ܘܡܲܠܟܵܐ ܕܲܫܢܵܐ ܘܕܸܒ̣ܚܵܐ ܒܲܪܝܼܪܵܐ
ܚܲܕ̄ ܒܲܠܚܘܼܕ ܒܸܕ ܗܵܘܹܐ ܡܓܘܼܒܝܵܐ ܘܲܠܟܘܼܪܣܝܵܐ ܕܡܲܠܟܵܐ ܢܛܝܼܪܵܐ
ܡܵܘܬܒ̣ܵܐ ܥܸܠܝܵܐ ܕܲܟܢܘܼܫܝܵܐ ܕܐܲܠܵܗܹ̈ܐ ܕܲܒ̣ܫܡܲܝܵܐ ܗܲܠܵܐ ܠܹܐ ܝܠܹܗ ܩܛܝܼܪܵܐ
ܟܪܝܼܟ̣ܵܐ ܗ̄ܘܹܝܢ ܒܩܸܢܛܵܐ ܐܲܡܝܼܢܵܝܵܐ ܐܲܠܝܼܨܵܐ ܕܗܵܘܹܝܢ ܠܚܲܝ̈ܝܼ ܙܗܝܼܪܵܐ
ܠܲܝܬ ܫܒ̣ܘܼܩ ܡ̣ܢ ܝܸܡܝܼ ܒܹܝܬ̣ ܓܵܘܣܝܼ ܡܥܲܕܪܵܢܵܐ ܘܚܲܒ̣ܪܵܐ ܫܲܪܝܼܪܵܐ

ܟ̣ܵܡܝܼܣ ܓܝܼܘܲܪܓܝܼܣ

23

نتاجات بالسريانية / رد: ܝܘܒܪܬ ܝܘܣܦ ܝܘܚܢܐ يوبرت يوسب يوخنا

« في: 12:01 08/02/2014  »

ܡܝܲܩܪܵܐ ܪܵܒܝܼ ܩܲܫܘܿ ܐܲܒ̣ܪܵܗܡ

ܫܠܵܡܵܐ ܘܐܝܼܩܵܪܵܐ

ܬܵܘܕܝܼ ܪܵܒܝܼ ܩܲܫܘܿ، ܘܗܵܘܹܝܬ ܐܵܦ ܐܲܢ̄ܬ ܒܲܣܝܼܡܵܐ ܩܵܐ ܣܢܵܕܬܵܐ ܕܠܸܫܵܢܲܢ ܘܟܵܬ̣ܘܿܒ̣ܲܝ̈ܢ ܓܵܘ ܕܐܵܗܵܐ ܦܲܐܬ̣ܵܐ ܕܠܸܫܵܢܵܐ ܐܵܫܘܿܪܵܝܵܐ ܓܵܘ ܫܵܘܦܵܐ ܡܝܲܩܪܵܐ ܕܥܹܢܟܵܒ̣ܵܐ.

ܥܲܡ ܚܘܼܒܝܼ ܘܐܝܼܩܵܪܝܼ

ܐܲܚܘܿܢܘܼܟ̣

ܟ̣ܵܡܝܼܣ ܓܝܼܘܲܪܓܝܼܣ

24

نتاجات بالسريانية / ܝܘܒܪܬ ܝܘܣܦ ܝܘܚܢܐ يوبرت يوسب يوخنا

« في: 16:01 01/02/2014  »

[[/img]

ܝܘܒܪܬ ܝܘܣܦ ܝܘܚܢܐ

ܬܠܵܬ̣ܵܐ ܫܡܵܗܹ̈ܐ ܡܫܲܪܘܿܝܹܐ ܒܝܘܼܬ̣ ܐܵܬ̣ܘܼܬ̣ܵܐ
ܬܠܵܬ̣ܵܐ ܬܐܵܡܹ̈ܐ ܒܪܸܥܝܵـܢܵܐ ܘܪܸܢܵܝܵܐ ܘܩܵܘܡܵܢܵܝܘܼܬ̣ܵܐ
ܬܠܵܬ̣ܵܐ ܠܸܘܝܹ̈ܐ ܚܲܒ̣ܖܹ̈ܐ ܘܪܲܚܡܹ̈ܐ ܒܫܲܪܝܼܪܘܼܬ̣ܵܐ
ܬܠܵܬ̣ܵܐ ܦܲܪܨ̈ܘܿܦܹܐ ܫܲܘܝܹ̈ܐ ܒܲܟܝܵـܢܵܐ ܕܐ̄ܢܵܫܘܼܬ̣ܵܐ
ܬܠܵܬ̣ܵܐ ܗܲܕܵܡܹ̈ܐ ܠܵܐ ܡܸܬ̣ܦܲܣܩܵܢܹ̈ܐ ܕܲܬܠܝܼܬ̣ܵܝܘܼܬ̣ܵܐ
ܬܠܵܬ̣ܵܐ ܩܢܘܿܡܹ̈ܐ ܡܚܲܝ̈ܕܹܐ ܒܓܘܼܫܡܵܐ ܕܐܵܫܘܿܪܵܝܘܼܬ̣ܵܐ
ܬܠܵܬ̣ܵܐ ܐܸܠܥܹ̈ܐ ܫܲܘܝܹܐ ܕܲܡܬ̣ܲܠܬ̣ܵܐ ܕܡܲܚܵܪܘܼܬ̣ܵܐ
ܬܠܵܬ̣ܵܐ ܪܹܫܵܢܹ̈ܐ ܡܫܵܘܬܦܹ̈ܐ ܒܲܚܕܼܵܐ ܡܗܲܕܝܵܢܘܼܬ̣ܵܐ
ܬܠܵܬ̣ܵܐ ܐܲܪܕܸܟ̣̈ܠܹܐ ܕܒܸܢܝܵـܢܵܐ ܘܲܕܨܸܢ̱ܥܬ̣ܵܐ ܘܡܸܬ̣ܛܵܘܪܵܢܘܼܬ̣ܵܐ
ܬܠܵܬ̣ܵܐ ܫܠܝܼܚܹ̈ܐ ܡܲܫܚܸܕܵܢܹ̈ܐ ܘܡܲܟܪܸܙܵܢܹ̈ܐ ܕܗܲܝܡܵܢܘܼܬ̣ܵܐ
ܬܠܵܬ̣ܵܐ ܡܗܲܕܝܵـܢܹ̈ܐ ܕܙܵܘܥܵܐ ܘܩܵܘܡܵܐ ܕܙܵܟ̣ܘܼܬ̣ܵܐ
ܬܠܵܬ̣ܵܐ ܒܚܲܝܹ̈ܐ ܘܡܘܿܬ̣ܵܐ ܘܢܘܼܚܵܡܵܐ ܘܲܡܬ̣ܘܼܡܵܝܘܼܬ̣ܵܐ
ܬܠܵܬ̣ܵܐ ܢܲܨܝܼܚܹ̈ܐ ܐܵܓ̣ܘܿܢܸܣ̈ܛܹܐ ܘܩܪܲܒ̣ܬ̣ܵܢܹ̈ܐ ܕܐܝܼܬܘܼܬ̣ܵܐ
ܬܠܵܬ̣ܵܐ ܢܵܛܘܿܖܹ̈ܐ ܕܠܸܫܵܢܵܐ ܘܫܸܡܵܐ ܘܗܲܝܵܝܘܼܬ̣ܵܐ
ܬܠܵܬ̣ܵܐ ܡܲܠܦܵܢܹ̈ܐ ܡܫܲܬܐܸܣܵܢܹ̈ܐ ܕܡܲܕܪܲܫܬܵܐ ܕܐܘܼܡܬܵܢܵܝܘܼܬ̣ܵܐ
ܬܠܵܬ̣ܵܐ ܡܲܒܘܼܥܹ̈ܐ ܕܚܘܼܒܵܐ ܘܚܘܼܝܵـܕܵܐ ܘܐܵܘܝܘܼܬ̣ܵܐ
ܬܠܵܬ̣ܵܐ ܛܥܝܼܢܹ̈ܐ ܢܝܼܫܵܐ ܘܐܵܬ̣ܵܐ ܕܚܹܐܪܘܼܬ̣ܵܐ
ܬܠܵܬ̣ܵܐ ܡܸܠܝܹ̈ܐ ܣܲܒ̣ܪܵܐ ܘܚܘܼܡܣܵܢܵܐ ܘܲܠܒ̣ܝܼܒ̣ܘܼܬ̣ܵܐ
ܬܠܵܬ̣ܵܐ ܟܸܠܝܹ̈ܐ ܕܲܪܩܘܼܒ̣ܠ ܕܫܘܼܠܛܵܢܵܐ ܕܙܸܐܦܵܢܘܼܬ̣ܵܐ
ܬܠܵܬ̣ܵܐ ܡܣܘܼܦܝܹ̈ܐ ܒܚܲܒ̣ܪܵܐ ܪܲܫܝܼܥܵܐ ܒܲܢܟ̣ܝܼܠܘܼܬ̣ܵܐ
ܬܠܵܬ̣ܵܐ ܐܲܖ̈ܝܹܐ ܚܒ̣ܝܼܫܹ̈ܐ ܒܩܲܦܸܣ ܕܐܲܣܝܼܪܘܼܬ̣ܵܐ
ܬܠܵܬ̣ܵܐ ܢܸܫ̈ܪܹܐ ܢܦ̈ܝܼܠܹܐ ܒܢܸܫܒ̣ܹ̈ܐ ܕܪܲܫܝܼܥܘܼܬ̣ܵܐ
ܬܠܵܬ̣ܵܐ ܙܲܟܵܝܹ̈ܐ ܩܕܲܡ ܕܲܝܵـܢܵܐ ܕܠܵܐ ܟܹܐܢܘܼܬ̣ܵܐ
ܬܠܵܬ̣ܵܐ ܒܲܖ̈ܝܼܪܹܐ ܕܠܵܐ ܣܢܹܐܓ̣ܪܵܐ ܘܲܡܣܲܬܪܵܢܘܼܬ̣ܵܐ
ܬܠܵܬ̣ܵܐ ܚܸܕܝܹ̈ܐ ܒܡܵܘܬ̣ܵܐ ܘܠܵܐ ܒܥܲܒ̣ܕܘܼܬ̣ܵܐ
ܬܠܵܬ̣ܵܐ ܬܚܘܼܬ̣ ܙܘܼܠܵܗ̄ܙܵܐ ܘܫܘܼܢܵـܩܵܐ ܘܡܲܪܝܼܪܘܼܬ̣ܵܐ
ܬܠܵܬ̣ܵܐ ܒܕܸܡܵܐ ܟܬ̣ܵܒ̣ܵܐ ܚܠܵܦ ܕܝܘܼܬ̣ܵܐ
ܬܠܵܬ̣ܵܐ ܪܹܫܵܢܹ̈ܐ ܬܸܠܝܹܐ ܒܥܲܡ̈ܘܼܕܹܐ ܕܥܸܠܵܝܘܼܬ̣ܵܐ
ܬܠܵܬ̣ܵܐ ܙܵܘܓܹ̈ܐ ܕܪܸܓ̣̈ܠܹܐ ܕܝܵܫܵܐ ܠܒܲܥܬ̣ܵܝܘܼܬ̣ܵܐ
ܬܠܵܬ̣ܵܐ ܦܲܓ̣ܖܹ̈ܐ ܕܡܝܼ̈ܟ̣ܹܐ ܡܸܠܝܹܐ ܙܲܗܝܘܼܬ̣ܵܐ
ܬܠܵܬ̣ܵܐ ܣܲܗ̈ܕܹܐ ܡܫܲܒܚܹ̈ܐ ܠܥܵܠܸܡ ܒܐܲܡܝܼܢܘܼܬ̣ܵܐ
ܝܘܼܒܸܪܬ ܝܵܘܣܸܦ ܝܘܼܚܲܢܵܐ  


ܟ̣ܵܡܝܼܣ ܓܝܼܘܲܪܓܝܼܣ
02/02/2014

  

25

نتاجات بالسريانية / ܗܘܡܣܐ ܡܚܪܝܐ - ܡܫܘܚܬܐ ܘ ملحمة شعرية - القصيدة السادسة Epic poem 6

« في: 03:13 13/01/2014  »

ܗܘܡܣܐ ܡܚܪܝܐ
ܬܪܥܐ ܩܕܡܝܐ –ܐ-
ܡܫܘܚܬܐ ܘ

ܡ̣ܢ ܩܕܲܡ ܡܵܘܠܵܕܝܼ ܓܵܘ ܟܬ̣ܵܒ̣ܵܐ ܕܲܢܒ̣ܝܘܼܬ̣ܵܐ ܫܸܡܝܼ ܟܬ̣ܝܼܒ̣ܵܐ
ܒܦܘܼܩܕܵܢܵܐ ܕܐܵܠܲܗܵܐ ܓܵܘ ܣܸܕܪܵܐ ܕܡܲܠܟܹ̈ܐ ܙܸܕܩܝܼ ܥܪܝܼܒ̣ܵܐ
ܡ̣ܢ ܙܲܪܥܵܐ ܕܐܵܫܘܿܪ ܒܡܲܪܒܥܵܐ ܕܲܒܬ̣ܘܼܠܬܵܐ ܦܝܼܫܠܝܼ ܢܨܝܼܒ̣ܵܐ
ܒܲܪ ܡܲܠܟܵܐ ܕܐܵܫܘܿܪ ܘܲܕܐܲܪܒܲܥ ܦܸܢ̈ܝܵܬ̣ܵܐ ܢܲܨܝܼܚܵܐ ܛܒ̣ܝܼܒ̣ܵܐ
ܡ̣ܢ ܐܲܠܵܗܵܐ ܚܲܝܠܵܐ ܘܒܘܼܪܟܬ̣ܵܐ ܫܸܡܝܼ ܘܟܘܼܢܵܝܝܼ ܢܣܝܼܒ̣ܵܐ
ܟܲܕ ܥܘܸܠܵܐ ܒܟܲܪ̄ܣܵܐ ܕܝܸܡܝܼ ܐ̄ܣܝܼܪܵܐ ܒܚܲܒ̣ܠܵܐ ܩܛܝܼܒ̣ܵܐ
ܫܵܘܦܝܼ ܥܝܼܩܬܵܐ ܘܕܘܼܟܬ̣ܝܼ ܪܒ̣ܝܼܨܬܵܐ ܓܵܘ ܥܘܼܒܵܗ̇ ܩܒ̣ܝܒ̣ܵܐ
ܣܸܡܝܵܐ ܐܝܼܢܵܐ ܫܡܵܥܵܝܵܐ ܠܩܵܠܵܐ ܕܛܲܒ̣ܠܵܐ ܕܲܩܪܵܒ̣ܵܐ ܬܟ̣ܝܼܒ̣ܵܐ
ܟܵܘܟ̣ܒ̣ܵܐ ܣܛܹܐ ܠܹܗ ܛܸܒܵܐ ܦܪܝܼܣܠܹܗ ܒܘܼܕ ܡܵܘܠܵܕܵܝܼ ܪܗܝܼܒ̣ܵܐ
ܚܸܫܟܵܐ ܥܪܝܼܩܠܹܗ ܘܛܫܹܐ ܠܹܗ ܡ̣ܢ ܩܲܕ̄ܡ ܙܲܗܪܝܼܪܹܗ ܫܒ̣ܝܼܒ̣ܵܐ
ܐܵܦ ܚܲܪܵܫܵܐ ܘܡܢܲܣܝܵܐ ܒܝܘܼܠܦܵܢ ܟܵܘܟ̣ܒ̣ܹ̈ܐ ܒܵܬ̣ܪܹܗ ܥܩܝܼܒ̣ܵܐ
ܡܲܠܲܐܟ̣ܵܐ ܢܵܛܘܿܪܵܐ ܘܡܫܲܕܪܵܐ ܕܐܲܠܵܗܵܐ ܡܸܢܝܼ ܟܸܠܝܵܐ ܩܲܪܝܼܒ̣ܵܐ
ܢܦܲܠܬܵܐ ܕܪܹܫܝܼ ܘܲܨܪܲܚܬܵܐ ܩܲܕ̄ܡܵܝܬܵܐ ܟܲܕ ܗܵܠܵܐ ܦܲܓ̣ܪܝܼ ܪܲܛܝܼܒ̣ܵܐ
ܐܵܬ̣ܵܐ ܕܚܘܼܝܵܕܵܐ ܥܲܠ ܨܲܕܪܝܼ ܪܫܝܼܡܬܵܐ ܒܕܘܼܡܝܵܐ ܕܲܨܠܝܼܒ̣ܵܐ
ܥܲܠ ܨܲܕܪܵܐ ܕܝܸܡܝܼ ܫܡܝܼܥܠܝܼ ܩܵܠܵܗ̇ ܐܵܘ ܒܪܘܿܢܝܼ ܚܲܒܝܼܒ̣ܵܐ
ܪܸܓ̣ܫܠܝܼ ܒܚܘܼܒܵܗ̇ ܘܲܚܢܵܢܵܗ̇ ܘܐܘܼܠܨܵܢܵܗ̇ ܘܦܲܓ̣ܪܵܗ̇ ܢܚܝܼܒ̣ܵܐ
ܡ̣ܢ ܚܸܒ̣̈ܠܹܐ ܕܡܵܘܠܵܕܵܐ ܘܲܕܢܘܼܟ̣ܪܵܝܘܼܬ̣ܵܐ ܦܲܪܨܘܿܦܵܗ̇ ܟܲܐܝܼܒ̣ܵܐ
ܫܬܹܐ ܠܝܼ ܚܲܠܒ̣ܵܐ ܚܘܵܪܵܐ ܚܲܠܵܠܵܐ ܡ̣ܢ ܬܸܕܼܐܵܗ̇ ܚܠܝܼܒ̣ܵܐ
ܚܠܸܨܠܝܼ ܥܲܠ ܨܲܕܪܵܗ̇ ܒܸܙܕܵܥܵܐ ܕܠܵܐ ܦܵܝܫܸܢ ܓܢܝܼܒ̣ܵܐ
ܟܲܗܢܵܐ ܕܐܵܫܘܼܪ ܙܲܕܝܼܩܵܐ ܢܙܝܼܪܵܐ ܡ̣ܢ ܢܸܣܝܵܢܵܐ ܣܝܼܒ̣ܵܐ
ܡܦܘܼܫܩܵܐ ܠܹܗ ܠܘܼܚܵܐ ܐܵܗܵܐ ܝܠܹܗ ܦܵܪܘܿܩܵܐ ܠܒ̣ܝܼܒ̣ܵܐ
ܓܵܘ ܨܠܘܿܬ̣ܹܗ ܒܥܹܐ ܠܹܗ ܡ̣ܢ ܐܲܠܵܗܵܐ ܕܡܲܪܚܸܩ ܠܒܝܼܫܵܐ ܚܪܝܼܒ̣ܵܐ
ܠܲܛܪܵܕܬܵܐ ܕܪܘܼܚܵܐ ܘܥܲܝܢܵܐ ܒܚܝܼܠܬܵܐ ܥܲܠ ܩܕܵܠܝܼ ܬܠܹܐ ܠܹܗ ܢܝܼܒ̣ܵܐ
ܓܲܒܵܐ ܣܲܢܝܵܢܵܐ ܥܒ̣ܵܕܵܐ ܠܘܼܚܵܫܵܐ ܥܲܠ ܢܒ̣ܝܼܘܼܬ̣ܵܐ ܠܹܐ ܝܠܹܗ ܚܫܝܼܒ̣ܵܐ
ܒܸܚܠܵܡܵܐ ܕܚܵܙܲܝ ܦܲܓ̣ܪܝܼ ܙܥܘܼܪܵܐ ܓܵܘ ܩܲܒ̣ܪܵܐ ܫܟ̣ܝܼܒ̣ܵܐ
ܩܵܘܠܵܐ ܘܘܲܥܕܵܐ ܕܚܲܣܵܡܘܼܬ̣ܵܐ ܥܲܡ ܢܘܼܩܵܡܵܐ ܦܝܼܫܠܹܗ ܝܗ̄ܝܼܒ̣ܵܐ
ܕܠܵܐ ܚܵܙܲܝ ܒܪܘܼܢܵܐ ܕܢܘܼܟ̣ܪܵܝܬ̣ܵܐ ܥܲܠ ܟܘܼܪܣܝܵܐ ܕܡܲܠܟܘܼܬ̣ܵܐ ܝܬܝܼܒ̣ܵܐ
ܟܬ̣ܸܒ̣ܠܗ̄ܘܼܢ ܠܘܼܚܵܐ ܙܹܐܦܵܢܵܐ ܘܫܸܡܝܼ ܦܝܼܫܠܹܗ ܫܝܼܦܵܐ ܘܣܪܝܼܒ̣ܵܐ
ܠܛܸܫܠܗ̄ܘܼܢ ܣܲܝܦܵܐ ܦܬܸܚܠܗ̄ܘܼܢ ܠܨܸܠܦܵܐ ܕܡܲܠܟܘܼܬ̣ܵܐ ܥܨܝܼܒ̣ܵܐ

ܣܦܘܼܪܘܼ ܠܲܢ ܓܵܘ ܡܫܘܼܚܬܵܐ ܙ
ܟ̣ܵܡܝܼܣ ܓܝܼܘܲܪܓܝܼܣ

26

نتاجات بالسريانية / ܗܘܡܣܐ ܡܚܪܝܐ - ܡܫܘܚܬܐ ܗ ملحمة شعرية - القصيدة الخامسة

« في: 05:45 15/12/2013  »

ܗܘܡܣܐ ܡܚܪܝܐ
ܬܪܥܐ ܩܕܡܝܐ –ܐ-
ܡܫܘܚܬܐ ܗ

ܐܵܗܵܐ ܝܠܵܗ̇ ܢܝܼܢܘܸܐ ܡܕܝܼܢ̄ܬܵܐ ܕܚܹܐܪܵܐ ܘܥܲܒ̣ܕܵܐ ܘܩܲܝܵܦܵܐ
ܟܪܝܼܟ̣ܬܵܐ ܒܢܲܗ̈ܪܵܘܵܬ̣ܵܐ ܘܡ̈ܝܼܵܐ ܥܵܪܘܿܩܹ̈ܐ ܥܲܠ ܡܕܝܼܢ̄ܬܵܐ ܨܛܵܦܵܐ
ܡ̈ܝܼܵܐ ܚܲܒ̣ܪܵܐ ܘܒܥܸܠܕܒ̣ܵܒ̣ܵܐ ܕܢܝܼܢܘܸܐ ܡܥܲܕܪܘܿܢܹܐ ܘܪܕܵܦܵܐ
ܡܵܢܝܼ ܝܼܠܹܗ ܕܡܲܟܠܹܗ ܚܲܝܠܵܐ ܕܡ̈ܝܼܵܐ ܒܥܘܼܫܢܵܐ ܫܩܵܦܵܐ
ܨܘܼܪܬܵܐ ܫܲܦܝܼܪܬܵܐ ܕܲܡܕܝܼܢ̄ܬܵܐ ܪܲܒܬ̣ܵܐ ܓܵܘ ܡ̈ܝܼܵܐ ܥܛܵܦܵܐ
ܚܸܙܘܵܐ ܡܙܲܝܥܵܢܵܐ ܒܹܝܢ ܠܲܦܹ̈ܐ ܕܢܲܗܪܵܐ ܪܝܵܡܵܐ ܘܟܝܵܦܵܐ
ܥܲܝܢܵܐ ܪܦܵܬ̣ܵܐ ܠܩܵܛܵܐ ܘܢܣܵܚܵܐ ܠܨܘܼܪܬܵܐ ܟܠ ܪܸܦܵܦܵܐ
ܨܘܼܪܬܵܐ ܛܡܵܪܵܐ ܠܥܘܼܡܩܵܐ ܕܡܲܝܵ̈ܐ ܘܒܣܘܼܪܗܵܒ̣ܵܐ ܛܝܵܦܵܐ
ܛܒ̣ܵܥܵܐ ܓܵܘ ܡܘܼܚܵܐ ܗܲܠ ܡܘܿܬ̣ܵܐ ܠܲܝܬ ܠܵܗ̇ ܫܝܵܦܵܐ
ܢܝܼܢܘܸܐ ܐܲܪܝܼܬ̣ܵܐ ܥܲܠ ܪܘܿܡܬܵܐ ܟܠܝܼܬ̣ܵܐ ܢܗܵܡܵܐ ܘܒܸܚܪܵܦܵܐ
ܨܲܕܪܵܗ̇ ܠܲܩܵܕ̄ܡܵܐ ܪܸܫܵܗ̇ ܪܵܡܵܐ ܚܵܨܵܗ̇ ܒܸܟܦܵܦܵܐ
ܒܪܘܼܓ̣ܙܵܐ ܓܙܵܡܵܐ ܒܢܝܼ̈ܒ̣ܵܗ ܚܲܪܝܼܦܹ̈ܐ ܗܕܝܼܪܬܵܐ ܩܵܐ ܛܪܵܦܵܐ
ܠܓܘܼܖ̈ܝܵܗ̇ ܒܸܢܛܵܪܵܐ ܡ̣ܢ ܕܹܐܒ̣ܹ̈ܐ ܕܠܲܝܠܹܐ ܕܗܵܘܲܝ ܒܸܚܛܵܦܵܐ
ܝܸܡܵܐ ܕܲܒ̣ܚܵܢܬܵܐ ܒܢ̈ܘܼܢܵܗ̇ ܙܥܘܿܖܹ̈ܐ ܓܵܘ ܩܲܦܠܵܗ̇ ܟܢܵܦܵܐ
ܝܸܡܵܐ ܨܲܝܵܕܬܵܐ ܒܢ̈ܘܼܢܵܗ̇ ܢܸܣܝܵܢܵܐ ܡܸܢܵܗ̇ ܒܝܼܠܵܦܵܐ
ܩܸܢܵܐ ܕܢܸܫ̈ܪܹܐ ܪܵܡܬܵܐ ܘܬܲܢܝܼ̈ܢܹܐ ܬܚܘܼܬ̣ܵܗ̇ ܪܫܵܦܵܐ
»»»»»»»»»»»»»»»»»»»
ܚܸܨܢܵܐ ܕܐܲܖ̈ܝܹܐ ܘܢܸܡܖܹ̈ܐ ܣܖ̈ܝܼܚܹܐ ܘܡܸܠܝܹܐ ܥܢܵܦܵܐ
ܟܪܝܼܟ̣ܬܵܐ ܒܥܵܒ̣ܵܐ ܘܡܲܝܫܵܐ ܕܐܝܼܠܵܢܹ̈ܐ ܣܵܒ̣ـܹ̈ܐ ܕܚܹܝܠܵܦܵܐ
ܕܸܩ̈ܠܹܐ ܘܓܵܘܙܹ̈ܐ ܘܬܘܼܬ̣ܹ̈ܐ ܙܲܚܡܹ̈ܐ ܘܟܠ ܐܵܕܫܹ̈ܐ ܕܨܸܦܨܵܦܵܐ
ܥܲܩ̈ܪܲܝܗܝ ܘܘܲܪܝܼ̈ܕܲܝܗܝ ܓܵܘ ܐܲܪܥܵܐ ܛܡܝܼܖܹ̈ܐ ܡ̈ܝܼܵܐ ܣܪܵܦܵܐ
 ܩܘܼܪܡܹ̈ܐ ܡܚܲܕܘܼܬ̣ܹܐ ܠܓܸܠܕܲܝܗ̈ܝ ܥܲܬܝܼܩܵܐ ܫܠܵܚܵܐ ܘܩܠܵܦܵܐ
ܓܲܢܬ̣ܵܐ ܡܩܘܼܕܫܬܵܐ ܘܐܝܼܠܵܢܵܐ ܕܲܚܲܝܹ̈ܐ ܘܟܲܪܡܵܐ ܫܲܦܵܦܵܐ
ܐܝܼܠܵܢܹ̈ܐ ܕܲܛܥܘܼܢܬܵܐ ܛܥܝܼܢܹܐ ܦܹܐܖܹ̈ܐ ܡܸܛܝܹ̈ܐ ܠܲܩܛܵܦܵܐ
ܢܵܥܘܼܪܵܐ ܦܬ̣ܵܠܵܐ ܘܬܲܠܸܡܬ̣ܵܐ ܡܝܼܵ̈ܐ ܡܠܵܝܵܐ ܘܙܠܵܦܵܐ
ܬܘܼܩܵܢܵܐ ܚܲܕܬ̣ܵܐ ܓܵܘ ܩܵܘܡܵܐ ܕܨܸܢܥ̱ܬ̣ܵܐ ܥܒ̣ܸܕܠܹܗ ܫܘܼܚܠܵܦܵܐ
ܢܚܵܫܵܐ ܦܬܝܼܠܵܐ ܐܲܝܟ̣ ܙܲܠܦܬ̣ܵܐ ܓܵܘ ܡ̈ܝܼܵܐ ܬܪܵܦܵܐ
ܐܲܒܘܼܒܵܐ ܕܫܵܩܵܐ ܕܕܸܩܠܵܐ ܘܐܲܠܵܡܝܼܬܘܿ ܡ̈ܝܼܵܐ ܙܥܵܦܵܐ
ܡܲܫܬܘܼܝܹ̈ܐ ܠܓܲܢܹ̈ܐ ܬܸܠܝܹ̈ܐ ܘܐܝܼܠܵܢܹ̈ܐ ܓܵܘ ܗܵܘܵܐ ܙܩܵܦܵܐ
ܬܹܒ̣ܹܝܠ ܒܸܓܘܵܝܵܐ ܝܘܼܠܦܵܢܵܐ ܘܡܲܕܝܘܼܢܹ̈ܐ ܬܘܼܩܵܢܹ̈ܐ ܒܝܙܵܦܵܐ
ܣܲܢ̈ܝܵܢܹܐ ܢܚ̈ܝܼܠܹܐ ܩܛܵܪܵܐ ܠܘܼܚܵܫܵܐ ܡܛܲܝ̈ܒ̣ܹܐ ܠܲܣܚܵܦܵܐ
ܚܘܼܬܵܡܵܐ ܕܲܚܙܘܼܩܝܵܐ ܩܵܐ ܓܲܝܣܵܐ ܢܲܨܝܼܚܵܐ ܚܲܕܘܼܬ̣ܵܐ ܥܦܵܦܵܐ
ܩܵܐ ܡܲܠܟܵܐ ܘܐܝܼܢܵܢܵܐ ܚܲܝܘܼܬ̣ܵܐ ܚܲܕܬܵܐ ܘܫܘܼܪܵܝܵܐ ܕܢܘܼܩܵܦܵܐ
 ܕܸܡܥܹ̈ܐ ܡܙܝܼܓ̣ܹܐ ܕܚܲܕܘܼܬ̣ܵܐ ܘܚܲܫܵܐ ܡ̣ܢ ܥܲܝܢܹ̈ܐ ܢܛܵܦܵܐ
ܡܕܲܟ̣ܘܝܹ̈ܐ ܠܦܲܓ̣ܪܵܐ ܡ̣ܢ ܫܸܚܬܵܐ ܘܲܚܛܝܼܬ̣ܵܐ ܓܵܘ ܢܲܗܪܵܐ ܚܦܵܦܵܐ
ܙܘܼܝܵܚܵܐ ܘܲܚܠܘܼܠܵܐ ܕܙܵܟ̣ܘܼܬ̣ܵܐ ܘܙܘܼܘܵܓ̣ܵܐ ܡܚܲܝܕܵܐ ܘܫܵܘܬܵܦܵܐ
ܟܸܢܫܵܐ ܕܥܲܡܵܐ ܘܟܲܗ̈ܢܹܐ ܘܪܲܒܫܵܩܹ̈ܐ ܒܣܘܼܩܒܵܠܵܐ ܘܢܘܼܩܵܦܵܐ
ܠܒ̣ܝܼܫܹ̈ܐ ܓܵܘ̈ܢܹܐ ܙܲܗܝܹ̈ܐ ܐܵܦ ܐܲܪܡ̈ܠܵܬ̣ܵܐ ܟܘܼܡܵܐ ܫܠܵܦܵܐ
»»»»»»»»»»»»»»»»»»»»»
ܥܒ̣ܵܪܵܐ ܡ̣ܢ ܬܲܪܥܵܐ ܕܢܲܪܓܵܠ ܡܲܠܟܵܐ ܡܸܠܝܵܐ ܬܘܼܩܵܦܵܐ
ܬܲܪܥܵܐ ܩܛܝܼܪܵܐ ܡܢܘܼܩܫܵܐ ܘܨܒ̣ܝܼܥܵܐ ܒܓܵܘܢܵܐ ܠܹܐ ܐܵܬ̣ܹܐ ܩܫܵܦܵܐ
ܡܕܝܼܢ̄ܬܵܐ ܕܩܲܝܡ̈ܝܵܬ̣ܵܐ ܘܨܲܠܡܹ̈ܐ ܘܐܘܼܡܵܢܹ̈ܐ ܢܩܵܫܵܐ ܘܓܠܵܦܵܐ
ܫܒ̣ܝܼ̈ܠܹܐ ܡܫܲܘܝܹ̈ܐ ܒܩܝܼܪܵܐ ܘܒܲܢܵܝܹ̈ܐ ܟܹܐܦܹ̈ܐ ܪܨܵܦܵܐ
ܒܹܝܬ̣ ܓܲܙܵܐ ܕܥܘܼܬ̣ܪܵܐ ܘܫܘܼܩܹ̈ܐ ܘܬܲܓܵܪܵܐ ܕܙܘܼܙܵܐ ܘܨܲܪܵܦܵܐ
ܒܸܝܬ̣ ܡܲܪܕܘܬ̣ܵܐ ܘܟܬܵܒ̣ܹ̈ܐ ܕܝܘܼܠܦܵܢܵܐ ܣܢܝܼܕܹܐ ܥܲܠ ܕܵܦܵܐ
ܒܹܝܬ̣ ܚܲܡܖܹ̈ܐ ܘܙܲܠܝܼ̈ܠܵܬ̣ܵܐ ܥܒ̣ܵܕܵܐ ܬܸܫܡܸܫܬܵܐ ܘܠܵܐ ܢܟ̣ܵܦܵܐ
ܐܝܼܬ̣ ܩܲܨܖܹ̈ܐ ܪܵܡܹ̈ܐ ܘܡܲܠܟܹ̈ܐ ܘܡܸܣ̈ܟܹܝܢܹܐ ܘܟܘܿܚܹ̈ܐ ܕܠܵܦܵܐ
ܐܝܼܬ̣ ܛܵܒ̣ܬܵܐ ܘܒܝܼܫܬܵܐ ܐܝܼܬ̣ ܗܲܝܡܵܢܘܼܬ̣ܵܐ ܒܐܲܠܵܗܵܐ ܘܓܘܼܕܵܦܵܐ
ܐܝܼܬ̣ ܟܲܗܢܹ̈ܐ ܘܗܲܝܟ̈ܠܹܐ ܕܐܲܠܵܗܵܐ ܘܲܨܠܘܼܬ̣ܵܐ ܘܟܘܼܫܵܦܵܐ
 ܐܲܠܵܗܵܐ ܘܣܵܛܵܢܵܐ ܟܠ ܚܲܕ̄ ܠܒܲܪܢܵܫܵܐ ܠܘܵܬܹܗ ܢܬܵܦܵܐ

ܣܦܘܼܪܘܼ ܠܲܢ ܓܵܘ ܡܫܘܼܚܬܵܐ ܘ
ܟ̣ܵܡܝܼܣ ܓܝܼܘܲܪܓܝܼܣ

27

نتاجات بالسريانية / ܗܘܡܣܐ ܡܚܪܝܐ - ܡܫܘܚܬܐ ܕ ملحمة شعرية - القصيدة الرابعة

« في: 13:18 02/11/2013  »

ܗܘܡܣܐ ܡܚܪܝܐ
ܡܫܘܚܬܐ ܕ

ܦܣܝܼܥܠܵܗ̇ ܠܲܩܵܕ̄ܡܵܐ ܒܲܙܗܝܼܪܘܼܬ̣ܵܐ ܪܲܒܬ̣ܵܐ ܘܡܲܣܝܵܡܬܵܐ ܕܒܵـܠܵܐ
ܚܙܘܼܩܝܵܐ ܠܵܐ ܝܕܝܼܥܵܐ ܘܕܲܥܬ̣ܝܼܕ ܚܸܫܟܵܢܵܐ ܒܲܬܗܝܼܪܘܼܬ̣ܵܐ ܢܦܵـܠܵܐ
ܢܵܛ̈ܘܼܪܹܐ ܕܡܲܠܟܵܐ ܟܪܝܼܟ̣ܹ̈ܐ ܠܐܝܼܢܵܢܵܐ ܒܣܲܝܦܵܐ ܘܡܲܛܵܠܵܐ
ܓܲܝܣܵܐ ܒܐܝܼܩܵܪܵܐ ܘܡܲܟܸܦܬܵܐ ܕܪܹܫܵܐ ܫܠܵܡܵܐ ܒܸܫܩܵܠܵܐ
ܡܲܠܟܵܐ ܥܲܠ ܡܟܼܝܼܪܬܹܗ ܒܚܲܕܘܼܬ̣ܵܐ ܪܲܒܬ̣ܵܐ ܠܨܲܕܪܹܗ ܒܸܩܦܵـܠܵܐ
ܓܝܼܓ̣ܠܵܐ ܕܡܲܪܟܵܒ̇ܬܵܐ ܠܓـܹܒܵܐ ܕܝܲܡܝܼܢܵܐ ܡܫܲܪܘܿܝܹܐ ܦܬ̣ܵܠܵܐ
ܣܲܪܢܵܐ ܕܲܦܪܸܙܠܵܐ ܓܵܘ ܚܘܼܓܬܵܐ ܛܚܵܢܵܐ ܘܨܸܪܨܸܪܬܵܐ ܕܩܵܠܵܐ
ܣܘܼܣܵܝ̄ܐ ܛܥܝܼܢܵܐ ܢܝܼܪܵܐ ܘܝܘܼܩܪܵܐ ܘܠܹܐ ܝܠܹܗ ܩܒ̣ܵـܠܵܐ
ܐܲܪܥܵܐ ܒܸܫܥܵܫܵܐ ܡܲܪܟܲܒ̇ܬܵܐ ܢܗܵܙܵܐ ܘܣܘܼܣܵܝ̄ܐ ܒܸܨܗܵܠܵܐ
ܠܲܩܲܕ̄ܡܵܐ ܛܪܵܝܵܐ ܒܹܝܢ ܓܲܠܹܠ̈ܐ ܕܚܝܼܙܵܐ ܬܪܵܥܵܐ ܘܦܨܵܠܵܐ
ܒܸܓܪܵܫܵܐ ܒܚܲܝܠܵܐ ܕܓܲܪܡܵܐ ܘܒܸܣܪܵܐ ܕܠܲܝܬ ܠܹܗ ܫܦܵܠܵܐ
ܫܡܲܝܵܐ ܫܓ̣ܝܼܫܬܵܐ ܦܘܼܚܵܐ ܕܬܵܝܡܢܵܐ ܘܙܵܘܥܵܐ ܕܥܲܠܥܵܠܵܐ
ܚܝܼܙܵܐ ܘܬܘܼܙ ܐܲܝܟ̣ ܩܲܡܚܵܐ ܛܚܝܼܢܵܐ ܒܲܡܚܘܼܠܬܵܐ ܢܚܵܠܵܐ
ܪܬܹܝܬܵܐ ܘܕܸܚ̱ܠܬ̣ܵܐ ܢܲܦ̮ܫܵܗ̇ ܘܪܸܥܝܵـܢܵܗ̇ ܘܦܲܓ̣ܪܵܗ̇ ܒܸܪܥܵܠܵܐ
ܚܸܠܡܵܗ̇ ܘܚܸܙܘܵܗ̇ ܘܪܸܓ̣̈ܫܵܗ̇ ܟܠܲܝܗܝ ܚܒ̣ܵܛܵܐ ܘܓܒ̣ܵܠܵܐ
 ܠܸܒܵܐ ܦܠܝܼܓ̣ܵܐ ܦܲܠܓܹܗ ܒܸܓܢܵܝܵܐ ܠܓܹܒܵܐ ܕܣܸܡܵܠܵܐ
ܚܘܼܒܵܐ ܕܒܲܪܝܼܵܐ ܥܲܡ ܚܘܼܒܵܐ ܕܡܲܠܟܵܐ ܒܡܲܣܲܐܬ̣ܵܐ ܬܩܵܠܵܐ
»»»»»»»»»»»»»»»»
ܬܪܵܘܝܗܝ ܒܫܲܘܝܘܼܬ̣ܵܐ ܡܫܘܼܚܬܵܐ ܕܚܘܼܒܵܐ ܒܟܹܐܢܘܼܬܵܐ ܟܝܵܠܵܐ
ܦܪܵܫܬܵܐ ܘܫܘܼܢܵܝܵܐ ܡܘܿܬ̣ܵܐ ܕܚܲܝܹ̈ܐ ܠܪܘܼܚܵܐ ܩܛܵܠܵܐ
ܦܘܼܣܩܵܢܵܐ ܫܩܝܼܠܵܐ ܚܸܠܛܵܐ ܝܵܢ ܬܪܝܼܨܵܐ ܠܒܵܪܘܿܝܵܐ ܬܟ̣ܵـܠܵܐ
ܗܘܼܝܡܵܢܵܐ ܕܒܵܒܵܐ ܘܕܟ̣ܵܪܵܐ ܕܝܸܡܵܐ ܬܸܠܝܹ̈ܐ ܥܲܠ ܩܕܵܠܵܐ
ܡ̣ܢ ܦܘܼܡܵܐ ܠܦܘܼܡܵܐ ܒܸܕ ܦܵܝܫܝܼ ܢ̈ܛܝܼܪܹܐ ܒܝܘܼܒܵܠܵܐ
 ܝܵܘܡܵܐ ܝܲܪܝܼܟ̣ܵܐ ܡܲܢܝܵܚܬܵܐ ܟܪܝܼܬ̣ܵܐ ܩܵܐ ܠܥܲܣܬܵܐ ܕܐܹܟ̣ܵـܠܵܐ
ܬܚܘܼܬ ܪܲܚ̈ܡܹܐ ܕܫܸܡܫܵܐ ܒܸܣܒܵܪܵܐ ܠܪܲܡܫܵܐ ܘܛܸܠܵܠܵܐ
ܒܸܚܠܵܡܵܐ ܒܛܘܼܪܵܐ ܘܓܲܢܬ̣ܵܐ ܘܪܲܓ̣ܘܿܠܵܐ ܘܢܲܗܪܵܐ ܙܲܠܵܠܵܐ
ܒܸܩܛܵܠܵܐ ܚܲܫܵܐ ܘܥܸܕܵܢܵܐ ܒܚܘܼܠܡܵܢܹ̈ܐ ܛܵܒ̣ܹ̈ܐ ܒܸܚܡܵܠܵܐ
ܣܲܒ̣ܪܵܐ ܕܐܲܣܝܼܪܵܐ ܕܲܕܥܲܪܬܵܐ ܠܒܲܝܬܵܐ ܚܘܼܠܡܵܐ ܕܲܓܵܠܵܐ
ܒܲܪܝܼܵܐ ܐܲܬ̣ܪܵܐ ܚܘܼܪܒܵܐ ܘܡܲܥܡܪܵܐ ܕܓܘܼܡ̈ܠܹܐ ܘܓܲܡܵܠܵܐ
ܒܠܸܠܝܵܐ ܘܐܝܼܡܵܡܵܐ ܐܲܝܟ̣ ܣܦܝܼܢܹ̈ܐ ܕܝܲـܡܵـ̈ܐ ܛܲܥ̈ܢܹܐ ܒܸܢܩܵܠܵܐ
ܐܲܪܥܑܵܐ ܝܒ̣ܝܼܫܬܵܐ ܡ̈ܝܼܵܐ ܡ̣ܢ ܒܹܐܪܑܵܐ ܒܥܲܣܩܘܼܬ̣ܵܐ ܢܛܵܠܵܐ
ܐܲܠܵܗܹ̈ܐ ܥܪܝܼܩܹ̈ܐ ܠܲܫܡܲܝܵܐ ܘܒܝܼܫܹ̈ܐ ܛܸܫܝܹ̈ܐ ܓܵܘ ܚܠܵܠܵܐ
ܐܲܠܵܗܵܐ ܐܵܫܘܿܪ ܓܵܘ ܬܵܝܡܢܵܐ ܠܲܝܬ ܠܹܗ ܗܲܝܟܠܵܐ ܘܐܝܼܣܵܓܵܝܠܵܐ
ܘܠܵܐ ܣܲܓ̣ܕܵܢܵܐ ܘܠܵܐ ܡܨܲܠܝܵـܢܵܐ ܘܠܵܐ ܟܲܗܢܵܐ ܡܲܠܵـܠܵܐ
ܘܠܵܐ ܕܟ̣ܵܪܵܐ ܘܙܘܼܝܵܚܵܐ ܘܠܵܐ ܥܲܕܥܹܐܕܵܐ ܘܨܠܘܼܬ̣ܵܐ ܘܗܘܼܠܵܠܵܐ
ܫܸܡܹܗ ܡܩܲܕܫܵܐ ܢܦܝܼܠܵܐ ܛܠܝܼܩܵܐ ܡ̣ܢ ܡܫܘܼܚܬܵܐ ܕܫܘܼܕܵܠܵܐ
 ܪܲܚ̈ܡܹܐ ܩܛܝܼܥܹܐ  ܒܝܼ̈ܫܵܬ̣ܵܐ ܘܥܵܩܵܬ̣ܵܐ ܫܦܵܥܵܐ ܐܲܝܟ̣ ܡܵܡܘܿܠܵܐ
»»»»»»»»»»»»»»»»»»»»»
ܡܹܐܙܲܠܬܵܐ ܓ̰ܘܵܓ̰ܵܐ ܚܲܕ̄ܟܡܵܐ ܫܠܵܡܵܐ ܘܟܠܵܝܵܐ ܘܒܸܢܦܵـܠܵܐ
ܠܲܝܬ̣ ܕܥܵܪܵܬܵܐ ܠܲܒܵܬ̣̄ܪܵܐ ܘܠܵܐ ܥܘܼܕܪܵܢܵܐ ܘܠܵܐ ܐܝܼܵـܠܵܐ
ܚܲܒ̣ܪܵܐ ܫܲܪܝܼܪܵܐ ܒܥܸܕܵܢܵܐ ܕܲܣܢܝܼܩܘܼܬܵܐ ܚܕܵܪܵܐ ܠܥܵܘܵܠܵܐ
ܐܲܝܟ̣ ܐܲܪܝܵܐ ܒܫܘܼܪܵܝܵܐ ܕܩܪܵܒ̣ܵܐ ܐܸܕܝܘܼܡ ܡܚܝܼܠܵܐ ܪܫܵܠܵܐ
ܕܲܪܒܹ̈ܐ ܨܠܝܼܦܹ̈ܐ ܢܲܦ̮ܫ̈ܬ̣ܵܐ ܟܪܝܼ̈ܗܹܐ ܒܫܵܘܒܵܐ ܘܲܫܥܵܠܵܐ
ܡܲܖ̈ܥܹܐ ܡܫܲܚ̱ܠܦܹ̈ܐ ܘܟܘܼܪܗܵܢܹ̈ܐ ܘܐܸܫܵܬ̣ܵܐ ܘܥܘܼܒܝܵܢـܵܐ ܕܛܲܚܵܠܵܐ
ܡܲܓܠܵܐ ܕܡܘܿܬ̣ܵܐ ܒܸܚܨܵܕܵܐ ܠܫܸܒ̈ܠܹܐ ܬܲܠܝܼܠܹ̈ܐ ܕܠܵܐ ܒܫܵܠܵܐ
ܐܲܝܟ̣ ܪܹܫܵܐ ܕܪܘܼܡܚܵܐ ܚܲܪܝܼܦܵܐ ܓܵܘ ܦܲܓ̣ܪܵܐ ܫܬܵܠܵܐ
ܠܲܝܬ̣ ܩܒ̣ܲܪܬܵܐ ܘܫܘܼܡܵܫܵܐ ܕܠܵܐ ܒܸܟ̣ܝܵܐ ܕܸܡ̈ܥܹܐ ܢܨܵܠܵܐ
ܦܲܓ̣ܪܵܐ ܕܲܟ̣ܝܵܐ ܒܥ̄ܓ̰ܠܕܘܼܬܑ̣ܵܐ ܚܕܵܪܵܐ ܠܚܸܡܩܵܐ ܘܲܚܒ̣ܵܠܵܐ
ܢܲܨܝܼܚܹ̈ܐ ܕܲܩܪܵܒ̣ܵܐ ܣܒܵܪܵܐ ܠܲܡܛܵܝܬ̣ܵܐ ܠܢܝܼܢܘܸܐ ܘܣܘܼܩܒܵܠܵܐ
ܠܡܸܫܬܘܼܬ̣ܵܐ ܕܙܘܼܘܵܓ̣ܵܐ ܕܡܲܠܟܵܐ ܘܚܲܡܪܵܐ ܘܥܸܢ̈ܒܹܐ ܒܲܣܓ̣ܘܿܠܵܐ
ܠܒܘܼܪܟܵܬ̣ܵܐ ܕܟܲܗܢܹ̈ܐ ܘܩܵܠܵܐ ܕܙܲܡܵܖܹ̈ܐ ܘܟܠܝܼܠܵܐ ܘܟܘܼܠܵܠܵܐ
ܘܩܪܵܝܬܵܐ ܕܲܨ̈ܠܘܵܬ̣ܵܐ ܥܲܠ ܠܘܼܚܹ̈ܐ ܣܪܝܼܛܹ̈ܐ ܒܩܲܢܝܵܐ ܕܙܵܠܵܐ
ܪܹܝܚܵܐ ܕܒܸܣܡܹ̈ܐ ܘܥܸܛܖܹ̈ܐ ܓܵܘ ܗܝܲܟܠܵܐ ܘܚܲܡܪܵܐ ܫܚܵܠܵܐ
ܡܲܠܟܵܐ ܡܗܲܕܝܵـܢܵܐ ܡܢܲܣܝܵܐ ܠܐܘܼܪܚܵܐ ܬܪܝܼܨܬܵܐ ܫܒܵـܠܵܐ
ܫܵܒ̣ܘܿܥܹ̈ܐ ܘܝܵܘܡܵܬ̣ܵܐ ܘܐܲܠܦܹ̈ܐ ܕܡܝܼܠܹ̈ܐ ܐܲܝܟ̣ ܩܲܡ̈ܨܹܐ ܙܚܵܠܵܐ
ܙܲܗܪܝܼܪܵܐ ܙܪܵܩܵܐ ܫܡܲܝܵܐ ܚܘܵܪܬܵܐ ܠܨܸܚܘܵܐ ܒܕܵܠܵܐ
ܥܒ̣ܵܪܵܐ ܩܘܼܖ̈ܝܹܐ ܘܡܲܬ̣̈ܘܵܬ̣ܵܐ ܘܫܘܼܩܹ̈ܐ ܘܚܵܢܘܼܬ̣ܵܐ ܕܒܲܩܵܠܵܐ
»»»»»»»»»»»»»»»»»»»»
ܐܲܟܵܖܹ̈ܐ ܒܟܲܪܡܹ̈ܐ ܒܸܠܩܵܛܵܐ ܥܸܢ̈ܒ̣ܹܐ ܒܣܲܠܵܐ ܘܩܸܪܛܵܠܵܐ
ܬܵܘܖܹ̈ܐ ܕܒ̣ܵܪܵܐ ܠܫܸܒ̈ܠܹܐ ܘܒܲܟ̣̈ܬܵܬ̣ܵܐ ܣܸܡ̈ܕܹܐ ܚܫܵܠܵܐ
ܚܸܛܹ̈ܐ ܘܣܲܥ̈ܪܹܐ ܓܵܘ ܒܹܝܬ ܐܸܕܖܹ̈ܐ ܣܪܵܕܵܐ ܒܥܲܪܒܵܠܵܐ
ܒܵܬܹ̈ܐ ܒܸܢܝܹ̈ܐ ܡ̣ܢ ܛܝܼܢܵܐ ܥܲܠ ܐ̄ܓܵܪܹܐ ܬܫܘܝܼܬ̣ܵܐ ܕܐܲܪܙܵܠܵܐ
ܡܕܼܝܼܢ̄ܬܵܐ ܩܲܪܒܘܼܢܹܐ ܒܘܼܪܓ̰ܵܗ̇ ܪܵܡܵܐ ܓܵܘ ܫܡܲܝܵܐ ܓܕܵܠܵܐ
ܡܲܩܘܵܚܬܵܐ ܕܓܲܝܣܵܐ ܘܩܵܠܵܐ ܕܛܲܒ̣̈ܠܹܐ ܥܒ̣ܵܕܵܐ ܙܸܠܙܵܠܵܐ
 ܢܝܼܢܘܸܐ ܡܕܝܼܢ̄ܬܵܐ ܕܓܲܢܹ̈ܐ ܬܸܠܝܹ̈ܐ ܕܣܲܢܚܹܝܪܲܒ̣ ܐܲܪܕܸܟ̣ܠܵܐ
ܠܲܡܵܣܘܿ ܢܵܛܘܿܪܵܐ ܩܕܲܡ ܬܲܪܥܵܐ ܟܸܠܝܵܐ ܡܲܒܝܘܿܢܹܐ ܪܲܓܵܠܵܐ
ܬܵܘܪܵܐ ܘܐܲܪܝܵܐ ܘܢܸܫܪܵܐ ܘܒܲܪܢܵܫܵܐ ܪܸܡܙܵܐ ܬܗܝܼܪܵܐ ܒܣܘܼܟܵܠܵܐ
ܚܲܝܠܵܐ ܘܲܠܒ̣ܝܼܒ̣ܘܼܬ̣ܵܐ ܘܚܸܟ̣ܡ̱ܬ̣ܵܐ ܡܚܲܝ̈ܕܹܐ ܒܓܘܼܫܡܵܐ ܦܥܵـܠܵܐ
ܡ̣ܢ ܫܡܲܝܵܐ ܢܚܸܬ̣ܠܹܗ ܝܵܢ ܡܛܲܝܒ̣ܵܐ ܠܲܦܪܵܚܵܐ ܝܼܠܹܗ ܫܘܼܐܵܠܵܐ؟
ܣܦܘܼܪܘܼ ܠܲܢ ܓܵܘ ܡܫܘܼܚܬܵܐ ܗ

ܟ̣ܵܡܝܼܣ ܓܝܼܘܲܪܓܝܼܣ

28

نتاجات بالسريانية / ܗܘܡܣܐ ܡܚܪܝܐ - ܡܫܘܚܬܐ ܓ ملحمة شعرية - القصيدة الثالثة

« في: 01:50 28/09/2013  »

ܗܘܡܣܐ ܡܚܪܝܐ

ܡܫܘܚܬܐ ܓ

ܐܸܢ ܒܙܵܟ̣ܘܼܬ̣ܵܐ ܘܢܲܨܝܼܚܘܼܬ̣ܵܐ ܡ̣ܢ ܩܪܵܒ̣ܵܐ ܕܵܥܸܪ ܚܵܝܵܐ
ܐܝܼܢܵܢܵܐ ܝܵܘܢܵܐ ܕܒܲܪܝܼܵܐ ܚܘܼܒܵܗ̇ ܕܸܟ̣ܝܵܐ ܘܙܲܟܵܝܵܐ
ܥܲܝܢܵܗ̈ ܠܩܵܛܵܐ ܨܘܼܪܬܵܐ ܘܛܒ̣ܵܥܵܐ ܒܚܵܫܘܿܒ̣ܵܐ ܡܘܼܚܵܝܵܐ
ܣܘܼܣܝܹܗ̄ ܨܗܵܠܵܐ ܠܸܓ̣ܵܡܹܗ ܪܦܝܼܚܵܐ ܒܣܘܼܪܗܵܒ̣ܵܐ ܛܪܵܝܵܐ
ܓܵܘ ܪܸܦܵܦܹ̈ܐ ܒܵܬܲܪ ܪܘܿܡ̈ܝܵـܬ̣ܵܐ ܕܚܝܼܙܵܐ ܬܠܵܩܵܐ ܚܦܵܝܵܐ
ܙܪܝܼܥܠܹܗ ܘܲܢܨܸܒ̣ܠܹܗ ܒܠܸܒܵܗ̇ ܘܲܪܕܵܐ ܣܡܘܿܩܵܐ ܢܝܼܣܵܢܵܝܵܐ
ܕܲܫܢܵܐ ܕܚܘܼܒܵܐ ܕܪܸܓ̣ܫܵܐ ܕܠܸܒܵܐ ܪܵܦܘܿܬ̣ܵܐ ܝܼܚܝܼܕܵܝܵܐ
ܚܸܩܠܵܐ ܕܠܸܒܵܐ ܚܲܡܪܵܐ ܫܬܵܝܵܐ ܡ̣ܢ ܘܲܪܝܼܕܵܐ ܫܸܪܫܵܝܵܐ
ܙܲܒ̣ܢܵܐ ܘܥܸܕܢܵܐ ܘܣـܒܵܪܵܐ ܕܠܵܐ ܣܲܒ̣ܪܵܐ ܫܘܼܥܒܵܕܵܐ ܝܵܘܡܵܝܵܐ
ܐܲܝܟ̣ ܣܒܵܪܬܵܐ ܠܚܹܐܪܘܼܬ̣ܵܐ ܕܐܲܣܝܼܪܵܐ ܒܩܵܘܕܵܐ ܦܲܪܙܠܵܝܵܐ
ܫܲܥܬ̣ܵܐ ܘܚܘܼܫܒܵܢܵܐ ܕܥܸܕܵܢܵܐ ܝܼܠܵܗ̇ ܕܘܼܪܬܵܐ ܕܝܲܪܚܵܐ ܣܲܗܪܵܝܵܐ
ܙܲܒ̣ܢܵܐ ܥܒ̣ܵܪܵܐ ܘܝܵܘܡܵܐ ܬܢܵܝܵܐ ܓܵܘ ܚܘܼܕܪܵܐ ܫܵܒ̣ܘܿܥܵܝܵܐ
ܠܵܐ ܚܲܒܪܵܐ ܡܸܢܹܗ ܘܠܵܐ ܢܝܼܫܲܢܩܵܐ ܘܠܵܐ ܛܲܝܪܵܐ ܗܵܘܵܝܵܐ
ܠܵܐ ܥܢܵܢܵܐ ܘܠܵܐ ܩܵܠܵܐ ܘܠܵܐ ܬܸܢܵܐ ܥܲܡܘܼܕܵܝܵܐ
ܣܲܒ̣ܪܵܐ ܘܬܘܼܟ̣ܠܵܢܵܐ ܩܕܝܼܠܵܐ ܦܲܬ̣ܚܵܢܵܐ ܕܩܸܦܠܵܐ ܛܵܘܩܵܝܵܐ
ܒܘܼܥܕܵܐ ܠܹܐ ܡܲܟܠܹܐ ܠܚܘܼܒܵܐ ܦܵܪܘܿܚܵܐ ܒܓܘܼܠܦܵܐ ܛܵܘܣܵܝܵܐ   
ܚܘܼܒܵܐ ܡܩܲܒܸܠ ܪܸܡܙܵܐ ܒܕܵܘܩܵܐ ܕܙܵܘܥܵܐ ܟܵܘܟ̣ܒ̣ܵܝܵܐ
ܫܵܡܲܥ ܘܲܡܦܵܫܸܩ ܡ̣ܢ ܪܸܚܩܵܐ ܩܵܠܵܐ ܕܥܘܼܢܵܝܵܐ
ܚܘܼܒܵܐ ܐܝܼܬܠܹܗ ܘܐ̄ܪܵܙܵܐ ܦܪܝܼܫܵܐ ܛܸܫܝܵܐ ܕܝܼܠܵܢܵܝܵܐ
ܫܸܬܩܵܐ ܕܚܘܼܒܵܐ ܒܘܼܫ ܚܲܝܠܵܢܵܐ ܝܠܹܗ ܡ̣ܢ ܙܵܘܥܵܐ ܩܵܠܵܝܵܐ
ܬܪܹܝܢ ܠܸܒܹ̈ܐ ܐ̄ܣܝܼ̈ܪܹܐ ܒܚܲܕ ܪܸܓ̣ܫܵܐ ܡܫܵܘܬܦܵܐ ܚܘܼܝܵـܕܵܝܵܐ
ܢܫܵܡܵܐ ܗܵܘܵܐ ܢܦܵܚܵܐ ܩܵܠܵܐ ܓܵܘ ܡܹܐܡܪܵܐ ܟܸܢܵܪܵܝܵܐ
ܢܩܵܫܵܐ ܡܸ̈ܠܹܐ ܥܲܠ ܡܸܢܹ̈ܐ ܘܝܲܬ̣ܪܵܐ ܩܝܼܬ̣ܵܪܵܝܵܐ
ܙܡܵܪܵܐ ܒܩܝܼܢܬܵܐ ܚܲܫܵܐ ܘܦܸܨܚܵܐ ܒܡܲܕܪܵܫܵܐ ܙܵܘܓܵܢܵܝܵܐ
ܙܓ̣ܵܕܵܐ ܒܗܲܝܟܠܵܐ ܡܩܲܕܫܵܐ ܕܚܘܼܒܵܐ ܪܵܡܵܐ ܙܸܩܘܼܪܬܵܝܵܐ
ܓܵܘ ܚܸܠܡܵܐ ܪܗܝܼܒ̣ܵܐ ܒܲܕܡܘܼܬ̣ܵܐ ܕܦܲܪܨܘܼܦܵܐ ܡܲܠܲܐܟ̣ܵܝܵܐ
ܒܠܲܝܠܹܐ ܓܵܘ ܫܡܲܝܵܐ ܣܛܵܝܵܐ ܐܲܝܟ̰ ܢܲܝܙܟ̣ܵܐ ܢܘܼܪܵܢܵܝܵܐ
ܡ̣ܢ ܪܸܚܩܵܐ ܪܥܘܼܫ ܪܥܘܼܫ ܒܩܵܠܵܐ ܪܵܡܵܐ ܩܥܵܝܵܐ
ܢܵـܠܵܐ ܒܝܼܫܵܐ ܚܵܢܘܼܩܵܐ ܥܲܠ ܨܲܕܪܵܗ̇ ܪܒ̣ܵܨܵܐ ܩܫܵܝܵܐ
ܚܲܝܠܵܐ ܕܛܵܒ̣ܬ̣ܵܐ ܡܲܥܕܪܵܢܵܐ ܕܐܝܼܢܵܢܵܐ ܦܵܪܘܿܩܵܐ ܡܵܪܵܢܵܝܵܐ
ܛܪܵܕܵܐ ܒܝܼܫܵܐ ܘܡܚܲܪܘܿܪܹܐ ܠܢܵܦ̮ܫܵܗ̇ ܘܫܸܢܬ̣ܵܗ̇ ܚܠܵܝܵܐ
ܚܸܠܡܵܐ ܘܢܵـܠܵܐ ܟܵܒ̇ܘܼܫܵܐ ܘܚܸܙܘܵܐ ܘܪܸܓ̣ܫܵܐ ܫܬܝܼܬ̣ܵܝܵܐ
ܚܒ̣ܝܼ̈ܛܹܐ ܘܡܙܝܼܓ̣ܹ̈ܐ ܫܪܵܪܵܐ ܘܕܘܼܓܠܵܐ ܘܠܲܝܬ̣ ܦܘܼܫܵܩܵܐ ܣܘܼܟܵـܠܵܝܵܐ
 ܒܸܪܥܵܫܵܐ ܡ̣ܢ ܫܸܢܬ̣ܵܐ ܦܲܓ̣ܪܵܗ̇ ܡ̣ܢ ܕܸܚܠ̱ܬ̣ܵܐ ܫܦܵـܠܵܐ ܨܘܵܝܵܐ
ܟܲܠܒܵܐ ܥܝܼܪܵܐ ܙܗܝܼܪܵܐ ܢܵܛܘܿܪܵܐ ܕܫܲܝܢܵܐ ܠܸܠܝܵܝܵܐ
ܢܒ̣ܵܚܵܐ ܩܵܐ ܙܘܼܗܵܪܵܐ ܐܘܼܪܚܵܐ ܕܣܘܼܣܵܝ̄ܐ ܒܸܥܪܵܝܵܐ
ܠܵܐ ܚܵܛܘܿܦܵܐ ܘܠܵܐ ܓܹܢܵܒ̣ܵܐ ܐܸܠܵܐ ܦܲܪܨܘܿܦܵܐ ܐܝܼܙܓܲܕܵܝܵܐ
ܡܫܲܕܪܵܐ ܒܦܘܼܩܕܵܢܵܐ ܛܥܝܼܢܵܐ ܠܘܼܚܵܐ ܐܸܓܲܪܬܵܐ ܒܲܪܝܼܕܵܝܵܐ
ܫܸܚܕܵܐ ܛܵܒ̣ܵܐ ܡܛܵܝܵܐ ܘܠܸܒܵܐ ܕܐܝܼܢܵܢܵܐ ܪܘܵܙܵܐ ܚܕܵܝܵܐ
ܡܲܠܟܵܐ ܕܐܵܫܘܿܪ ܡܸܢܕܪܹܫ̄ ܥܒ̣ܵܕܵܐ ܕܟ̣ܵܪܵܐ ܬܲܐܪܝܼܚܵܝܵܐ
ܩܵܠܵܐ ܕܓܲܝܣܵܐ ܥܲܡ ܩܲܪܢܹ̈ܐ ܘܫܝܼܦ̈ܘܿܪܹܐ ܒܣܸܩܠܵܐ ܡܘܼܣܝܼܩܵܝܵܐ
ܥܝܼܠܵܡܵܝܹ̈ܐ ܥܸܠܕܒ̣ܵܒܹ̈ܐ ܣܪܝܼܚܹ̈ܐ ܓܵܘ ܠܝܵܝܵܐ ܘܒܸܟ̣ܝܵܐ ܥܲܢܝܼܕܵܝܵܐ
ܓܘܼܡ̈ܠܹܐ ܛܥܝܼܢܹ̈ܐ ܠܚܵܨܲܝܗܝ ܩܛܝܼܪܵܐ ܫܠܹܝܠܵܐ ܩܪܵܒ̣ܵܝܵܐ
ܕܲܗܒ̣ܵܐ ܘܣܹܐܡܵܐ ܕܓܵܘ ܒܹܝܬ̣ ܐܵܣܘܪܵܐ ܩܸܢܛܪܘܿܢܵܝܵܐ
ܘܡܵܪܓܸܢ̈ܝܵܬ̣ܵܐ ܘܝܲܩܘܼܢ̈ܕܹܐ ܝܲܩܝܼ̈ܪܹܐ ܘܟܸܣܢܵܐ ܘܟܹܐܦܵܐ ܫܲܡܝܼܪܵܝܵܐ
ܐܲܣܝܼ̈ܪܹܐ ܒܐܲܠܦܵܝܹ̈ܐ ܡ̣ܢ ܟܠ ܕܲܪܓ̣ܵܐ ܐܲܚܝܼܕܵܐ ܘܦܵܠܚܵܝܵܐ
ܫܸܫܠܬܵܐ ܘܩܵܘܕܵܐ ܒܐܝܼܕܲܝܗܝ ܘܐܲܩܠܲܝܗܝ ܘܦܲܓ̣ܪܲܝܗܝ ܫܘܼܠܚܵܝܵܐ
ܩܨܵܨܵܐ ܩܸܫܝܵܐ ܕܲܩܪܵܒ̣ܵܐ ܡܘܼܦܠܸܚܵܐ ܓܵܘ ܡܲܕܼܢ̱ܚܵܐ ܡܸܨܥܵܝܵܐ
ܐܸܡ̈ܘܵܬ̣ܵܐ ܕܠܵܐ ܐܵܘܝܘܼܬ̣ܵܐ ܘܠܵܐ ܢܵܡܘܼܣܵܐ ܕܲܩܪܵܒ̣ܵܐ ܬܹܒ̣ܝܠܵܝܵܐ
ܕܥܵܪܵܐ ܩܪܝܼܡܵܐ ܚܸܕܝܵܐ ܦܨܝܼܚܵܐ ܦܪܵܚܵܐ ܐܲܝܟ̣ ܪܵܘܵܝܵܐ
ܘܲܪܕܵܐ ܕܚܘܼܒܹܗ̇ ܗܵܠܵܐ ܢܛܝܼܪܵܐ ܘܓܵܘܹܢܹܗ ܙܗܵܝܵܐ
ܪܹܝܚܵܐ ܕܥܸܛܪܹܗ ܗܲܢܝܼܐܵܐ ܘܚܲܝܠܹܗ ܚܲܡܪܵܐ ܓܒܵܝܵܐ
ܡܲܠܟܵܐ ܠܡܘܼܚܸܒܬܹܗ ܬܲܡܡܘܼܡܹܐ ܠܘܲܥܕܵܐ ܘܩܵܘܠܵܐ ܫܘܼܘܕܵܝܵܐ
ܩܵܐ ܪܲܥܝܵܐ ܥܸܕܵܢܵܐ ܕܲܦܪܵܫܬܵܐ ܡܛܵܝܵܐ ܕܦܵܝܹܫ ܒܲܠܚܘܿܕܵܝܵܐ
ܐܝܼܢܵܢܵܐ ܛܥܘܼܢܬܵܐ ܕܚܲܝܹ̈ܗ ܘܟܵܘܟ̣ܲܒ̣ܬ̣ܵܐ ܕܣܲܒ̣ܪܹܗ ܐܘܼܦܩܵܝܵܐ
ܡܲܗܪܵܐ ܘܗܵܘܡܵܐ ܝܼܠܲܝܗܝ ܐܲܝܟ̣ ܠܲܗܓܵܐ ܒܝܵܘܡܵܐ ܫܸܡܫܵܝܵܐ
ܘܙܘܼܙܵܐ ܘܕܲܗܒ̣ܵܐ ܘܣܹܐܡܵܐ ܥܘܼܬ̣ܪܵܐ ܕܥܵܠܡܵܐ ܗܘܼܠܵܢܵܝܵܐ
ܠܹܐ ܙܲܒ̣ܢܝܼ ܡܲܝܵــ̈ܐ ܘܠܵܐ ܡܛܲܠܬ̣ܵܐ ܕܲܥܢܵܢܵܐ ܛܸܠܵܠܵܝܵܐ
ܒܵܒܵܐ ܣܵܒ̣ܵܐ ܚܲܟܝܼܡܵܐ ܘܪܲܥܝܵܐ ܡܫܲܡܗܵܐ ܒܟܘܼܢܵܝܵܐ
ܒܲܗܪܵܐ ܠܘܵܬܹܗ ܚܸܫܟܵܐ ܕܠܵܐ ܐܝܼܢܵܢܵܐ ܥܲܝܢܹ̈ܗ ܣܡܵܝܵܐ
ܬܗܝܼܪܵܐ ܨܡܝܼܪܵܐ ܠܸܫܵܢܹܗ ܕܒ̣ܝܼܩܵܐ ܠܲܝܬ ܠܹܗ ܦܘܼܢܵܝܵܐ
ܪܲܥܝܵܐ ܡܢܲܣܝܵܐ ܣܵܒ̣ܵܐ ܚܲܟܝܼܡܵܐ ܘܡܲܠܦܵܢܵܐ ܣܸܦܘܵܬ̣ܵܢܵܝܵܐ
ܡܨܲܠܡܘܼܢܹܐ ܘܲܨܝܵܪܵܐ ܠܚܲܝܹ̈ܐ ܓܵܘ ܚܒ̣ܘܼܫܝܵܐ ܩܲܨܪܵܝܵܐ
ܒܡܲܕܥܵܐ ܘܗܵܘܢܵܐ ܕܒܲܪܝܼܵܐ ܒܩܲܢܝܵܐ ܓܵܘܢܹܗ ܩܸܛܡܵܝܵܐ
ܐܲܝܟ̣ ܦܲܪܙܠܵܐ ܘܣܹܐܡܵܐ ܒܐܲܬܘܼܢܵܐ ܕܢܘܼܪܵܐ ܕܩܲܪܕܵܚܵܐ ܘܩܝܼܢܵܝܵܐ     
ܐ̄ܣܝܼܪܬܵܐ ܒܩܵܢܘܼܢܵܐ ܘܛܲܟ̣ܣܵܐ ܕܲܫܠܵܡܬܵܐ ܠܵܐ ܐܵܢܸܢܩܵܝܵܐ
ܨܸܦܸܪܬ̣ܵܐ ܕܒܲܪܝܼܵܐ ܢܦܝܼܠܬܵܐ ܘܕܒ̣ܝܼܩܬܵܐ ܓܵܘ ܓܲܪܕܵܐ ܢܸܫܒ̣ܵܝܵܐ
ܡܕܝܼܢ̄ܬܵܐ ܓܘܼܒ̣ܪܬܵܐ ܩܲܒ̣ܪܵܐ ܙܥܘܼܪܬܵܐ ܘܙܘܼܠܗܵܙܵܐ ܢܦ̮ܫܵܢܵܝܵܐ
ܡܚܘܼܨܸܪܬܵܐ ܒܡܲܝܵ̈ܐ ܘܡܸܠܝܵܐ ܕܛܘܿܦܵܢܵܐ ܢܲܗܪܵܝܵܐ
ܐܲܝܟ̣ ܡܸܠܐܵܐ ܘܬܵܘܒܵܐ ܕܝܲܡܵܐ ܘܓܲܠܠܵܐ ܗܲܦܟܵܝܵܐ
ܕܲܪܩܘܼܒ̣ܠ ܣܦܝܼܢܬܵܐ ܛܠܝܼܩܬܵܐ ܕܠܵܐ ܐܸܠܦܵܪܵܐ ܡܲܠܵܚܵܝܵܐ
ܟܪܝܼܟ̣ܬܵܐ ܒܫܘܼܪܵܐ ܪܵܡܵܐ ܐܲܝܟ̣ ܒܹܝܬ̣ ܐܲܣܝܼܖܹ̈ܐ ܟܠܵܢܵܝܵܐ 
ܬܲܪܥܹ̈ܐ ܕܩܲܨܪܵܐ ܕܒ̣ܝܼ̈ܪܹܐ ܩܦܝܼܠܹܐ ܒܦܘܼܣܩܵܢܵܐ ܩܛܝܼܪܵܝܵܐ
ܫܘܼܩܹ̈ܐ ܘܚܵܢ̈ـܘܵܬ̣ܵܐ ܕܪܵܘܵܝܘܼܬ̣ܵܐ ܘܙܲܠܝܼܠܘܼܬ̣ܵܐ ܘܚܲܡܪܵܐ ܕܚܲܢܘܵܝܵܐ
ܚܹܐܪܘܼܬ̣ܵܐ ܠܲܝܬ ܠܵܗ̇ ܐܝܼܬܘܼܬܵܐ ܐܲܚܟ̰ܝܼ ܪܸܬܡܵܐ ܠܸܫܵܢܵܝܵܐ
ܠܲܚܡܵܐ ܕܥܲܬܝܼܪܵܐ ܩܵܐ ܡܸܣܟܹܢܵܐ ܕܲܝܢܵܐ ܘܝܸܙܦܵܐ ܟܸܣܦܵܝܵܐ
ܒܪܲܬ̣ ܒܲܪܝܼܵܐ ܠܲܝܬ ܠܵܗ̇ ܢܸܣܝܵܢܵܐ ܒܥܲܡܵܐ ܟܢܘܼܫܝܵܝܵܐ
ܬܪܹܝܢ ܩܢܘܿܡܹ̈ܐ ܦܪܝܼܫܹ̈ܐ ܒܲܪ ܥܲܬܝܼܪܵܐ ܘܒܪܲܬ̣ ܥܵܢܘܵܝܵܐ
ܦܖ̈ܝܼܫܹ̈ܐ ܒܚܲܝܹ̈ܐ ܘܫܲܘܝܹ̈ܐ ܐܲܚܟ̰ܝܼ ܕܸܡܝܹ̈ܐ ܒܓܸܢܣܵܐ ܐܵܕܵܡܵܝܵܐ
ܫܪܵܪܵܐ ܝܠܹܗ ܐܵܣܝܵܐ ܚܲܟܝܼܡܵܐ ܒܡܲܬܠܹܗ ܓܵܘܵܢܵܝܵܐ
ܚܘܼܒܵܐ ܣܸܡܝܵܐ ܝܠܹܗ ܘܠܲܝܬ ܠܹܗ ܥܲܝܢܹ̈ܐ ܩܵܐ ܚܙܵܝܵܐ
ܥܵܒ̣ܸܪ ܬܚܘܼܡܹ̈ܐ ܕܬܵܘܕܝܼـܬ̣ܵܐ ܘܓܸܢܣܵܐ ܘܠܹܐ ܝܠܹܗ ܫܲܒ̣ܛܵܢܵܝܵܐ
ܪܲܥܝܵܐ ܫܠܵܡܵܐ ܠܪܸܢܝܵܐ ܕܨܸܒ̣ܝܵـܢܵܐ ܚܹܐܪܵܐ ܝܵܬܵܝܵܐ
ܦܘܼܫ ܒܲܫܠܵܡܵܐ ܒܕܸܡܥܹ̈ܐ ܕܥܲܝܢܹ̈ܐ ܘܒܸܟ̣ܝܵܐ ܘܠܝܵܝܵܐ
ܦܘܼܫ ܒܲܫܠܵܡܵܐ ܒܲܪܝܼܵܐ ܝܸܡܵܐ ܘܚܸܙܘܵܐ ܫܘܼܠܵܡܵܝܵܐ

ܩܵܐ ..... ܣܦܘܼܪܘ ܠܲܢ ܓܵܘ ܡܫܘܼܚܬܵܐ ܕ
ܟ̣ܵܡܝܼܣ ܓܝܼܘܲܪܓܝܼܣ

29

نتاجات بالسريانية / رد: ܗܘܡܣܐ ܡܚܪܝܐ - ܡܫܘܚܬܐ ܒ ملحمة شعرية - القصيدة الثانية

« في: 11:18 16/09/2013  »

ܡܝܲܩܪܵܐ ܪܵܒܝܼ ܘܡܵܚܘܿܪܵܐ ܡܗܝܼܪܵܐ ܥܲܒ̣ܕܝܼܫܘܿܥ ܣܲܗ̄ܕܵܐ ܝܘܼܚܲܢܵܐ

ܫܠܵܡܵܐ

ܒܸܛܠܒܵܐ ܝܗ̄ܘܹܝܢ ܫܘܼܒ̣ܩܵܢܵܐ ܠܬܵܘܚܲܪܬܵܐ ܠܲܟܬ̣ܵܒ̣ܬܵܐ ܠܡܲܩܪܲܒ̣ܬܵܐ ܕܩܘܼܒܲܠܛܲܝܒܘܼܬ̣ܵܐ ܪܲܒܬ̣ܵܐ ܠܦܲܪܨܘܼܦܘܼܟ̣ܘܿܢ ܠܟܠ ܡܵܐ ܕܲܟܬ̣ܝܼܒ̣ܠܘܼܟ̣ ܩܵܐ ܠܝܼ ܒܘܼܕ ܡܫܘܼܚܬܝـܼ ܠܥܸܠ ܡ̣ܢ ܪܸܥܝܵܢܵܐ ܘܲܡܛܲܝܡܵܢܬܵܐ ܘܲܣܢܲܕܬܵܐ ܘܝܲܗ̄ܒ̣ܲܠܬܵܐ ܕܲܠܒ̣ܝܼܒ̣ܘܼܬ̣ܵܐ ܕܡܵܪܬܝܵܢܘܼܬ̣ܵܐ ܠܬܲܡܸܡܬܵܐ ܕܐܘܼܪܚܵܐ ܓܵܘ ܕܐܵܗܵܐ ܚܲܩܠܵܐ ܕܡܲܪܕܘܼܬ̣ܵܐ ܡܛܠ ܡܲܪܘܲܚܬܵܐ ܕܣܲܦܪܵܝܘܼܬ̣ܢ، ܬܵܘܕܝܼ ܪܵܒܝܼ ܘܐܲܚܢܲ̈ܢ ܘܐܲܝܟ̰ ܡܨܵܝܬ̣ܸܢ ܦܫܝܼܛܬܵܐ ܘܲܡܬܘܼܚܸܒܬܵܐ ܒܸܕ ܡܚܵܦܛܸܚ ܠܡܲܓܡܲܪܬܵܐ ܠܡܸܢܕܝܼ ܕܲܡܫܘܼܪܹܐ ܠܲܢ ܒܲܣܢܵܬܵܐ ܣܘܼܟܵܠܵܝܬܵܐ ܕܝܲܨܝܼܦܹ̈ܐ ܐܲܝܟ̣ ܦܲܪܨܘܼܦܘܼܟ̣ ܘܟܠ ܐܵܢܝܼ ܕܦܵܫܛܝܼ ܐܝܼܕܼܵܐ ܕܲܣܢܵܬܵܐ ܘܥܘܼܕܪܵܢܵܐ ܘܗܵܘܲ̈ܝ ܡܗܲܕܝܵܢܹܐ ܩܵܐ ܠܲܢ ܓܵܘ ܕܐܵܗܵܐ ܦܘܼܠܚܵܢܵܐ ܕܡܲܪܕܘܼܬ̣ܵܐ ܒܠܸܫܵܢܲ̈ܢ ܘܦܪܝܼܫܵܐܝܼܬ̣ ܓܵܘ ܚܲܩܠܵܐ ܕܡܲܚܵܘܼܪܘܼܬ̣ܵܐ ܕܝܼܠܵܗ̇ ܝܲܡܵܐ ܥܲܡܘܼܩܬܵܐ ܘܲܪܘܝܼܚܬܵܐ.

ܥܲܡ ܐܝܼܩܵܪܝܼ

ܡܝܲܩܪܵܢܘܼܟ̣
ܟ̣ܵܡܝܼܣ ܓܝܼܘܲܪܓܝܼܣ   

30

نتاجات بالسريانية / ܗܘܡܣܐ ܡܚܪܝܐ - ܡܫܘܚܬܐ ܒ ملحمة شعرية - القصيدة الثانية

« في: 15:56 06/09/2013  »

ܗܘܡܣܐ ܡܚܪܝܐ
ܡܫܘܚܬܐ ܒ
ܐܵܢܵܐ ܗ̄ܘܹܝܢ ܕܸܩܠܲܬ̣ ܒܪܘܿܢܵܐ ܕܡܲܠܟܵܐ ܐܵܫܘܿܪܵܝܵܐ
ܝܸܡܝܼ ܡ̣ܢ ܓܸܢܣܵܐ ܘܫܲܒ̣ܛܵܐ ܘܐܲܬ̣ܪܵܐ ܢܘܼܟ̣ܪܵܝܵܐ
ܬܦܸܩܠܹܗ ܘܲܢܦܸܠ ܠܹܗ ܒܚܘܼܒܵܗ̇ ܡ̣ܢ ܫܘܼܪܵܝܵܐ
ܒܐܘܼܪܚܵܐ ܠܲܦܠܵܫܵܐ ܕܲܪܩܘܼܒ̣ܠ ܒܥܸܠܕܒ̣ܵܒ̣ܵܐ ܥܝܼܠܵܡܵܝܵܐ
ܒܡܲܢܝܵܚܬܵܐ ܕܛܲܗܪܵܐ ܥܲܡ ܓܲܝܣܹܗ ܒܐܲܬ̣ܪܵܐ ܬܵܝܡܢܵܝܵܐ
ܐܲܪܥܵܐ ܒܪܝܼܙܬܵܐ ܥܲܦܪܵܐ ܘܚܝܼܙܵܐ ܒܫܸܡܫܵܐ ܩܠܵܝܵܐ
ܟܝܵܢܵܐ ܩܸܫܝܵܐ ܠܟܠ ܐܝܼܬ̣ܝܵܐ ܫܬܝܼܩܵܐ ܐܵܦ ܡܠܝܼܠܵܝܵܐ
ܐܲܪܥܵܐ ܪܘܝܼܚܬܵܐ ܛܘܼܪܵܐ ܘܕܲܫܬܵܐ ܘܟܠ ܚܲܕ ܚܹܐܪܵܐ ܒܓܘܼܒܵܝܵܐ
ܡܸܠܚܵܐ ܡܵܘܩܸܕܬܵܐ ܠܟܠ ܥܸܫܒܵܐ ܘܓܸܠܵܐ ܢܵܨ̄ܒܵܬ̣ܵܢܝܵܐ
ܗܵܘ̇ ܕܡܘܼܚܸܒܠܹܗ ܘܝܠܸܦܠܹܗ ܡܸܢܹܗ ܦܝܼܫܠܹܗ ܒܲܝܬܵܝܵܐ
ܡ̈ܝܼܵܐ ܚܲܝܹ̈ܐ ܛܝܼܡܲܝܗܝ ܝܲܩܝܼܪܵܐ ܩܵܐ ܦܲܓ̣ܪܵܐ ܒܲܪܢܵܫܵܝܵܐ
ܢܘܼܛܸܦܬ̣ܵܐ ܕܡ̈ܝܼܵܐ ܒܲܪܩܘܼܒ̣ܠ ܢܘܼܛܸܦܬ̣ܵܐ ܕܕܸܡܵܐ ܒܟܲܝܠܵܐ ܐܵܣܝܵܝܵܐ
ܡ̈ܝܼܵܐ ܛܸܫܝܹܐ ܒܠܸܒܵܐ ܕܐܲܪܥܵܐ ܠܵܐ ܐܵܬ̣ܲܝ ܠܲܚܙܵܝܵܐ
ܥܘܼܬ̣ܪܵܐ ܛܡܝܼܪܵܐ ܩܵܐ ܡܵܪܵܐ ܕܐܲܪܥܵܐ ܒܐܲܩܡܵܐ ܩܲܝܛܵܝܵܐ
ܠܲܝܬ̣ ܐܝܼܠܵܢܵܐ ܘܠܵܐ ܛܸܠܵܐ ܘܐܲܪܥܵܐ ܢܘܼܪܵܐ ܓܹܗܲܢܵܝܵܐ
ܠܵܐ ܡܲܠܲܐܟ̣ܵܐ ܘܠܵܐ ܒܲܪܢܵܫܵܐ ܘܠܵܐ ܩܲܛܝܼܢܹܐ ܘܚܲܡܒܝܼܫܵܝܵܐ
ܗܲܪܗܵܪܵܐ ܕܲܓܵܠܵܐ ܩܕܲܡ ܥܲܝܢܹܗ ܒܸܙܪܵܩܵܐ ܘܛܫܵܝܵܐ
ܝܵܐ ܪܲܒ ܚܸܙܘܵܐ ܝܠܹܗ ܝܵܢ ܚܸܠܡܵܐ ܛܲܗܪܵܝܵܐ
ܚܝܼܙܵܐ ܡܫܲܢܝܵܢܵܐ ܒܥܸܕܵܢܵܐ ܟܪܝܼܬ̣ܵܐ ܬܸܠܵܠܹ̈ܐ ܒܢܵܝܵܐ
ܐܘܼܖ̈ܚܵܬ̣ܵܐ ܕܲܓ̰ܘܵܓ̰ܬܵܐ ܩܕܲܡ ܬܘܿܙ ܚܠܝܼܡܬܵܐ ܟܣܵܝܵܐ
ܒܲܪܝܼܵܐ ܝܵܡܵܐ ܝܠܵܗ̇ ܒܸܕ ܚܵܢܩܵܐ ܗܵܘ̇ ܕܠܵܐ ܝܵܕܸܥ ܣܚܵܝܵܐ
ܐܲܝܟ̣  ܓ̰ܘܵܓ̰ܬܵܐ ܥܲܠ ܬܲܠܓܵܐ ܚܠܝܼܡܵܐ ܕܒܲܪܢܵܫܵܐ ܪܸܓ̣ܠܵܝܵܐ
ܐܲܩ̈ܠܹܗ ܓܵܘ ܚܝܼܙܵܐ ܒܸܛܡܵܪܵܐ ܘܛܒ̣ܵܥܵܐ ܘܒܸܥܨܵܝܵܐ
ܓܲܪܡܹ̈ܐ ܘܩܲܖ̈ܩܸܦܝܵܬ̣ܐ ܕܲܚ̈ܝܘܵܬ̣ܵܐ ܡܝܼ̈ܬ̣ܹܐ ܠܹܐ ܐܵܬ̣ܲܝ ܠܲܡܢܵܝܵܐ
ܚܸ̈ܠܕܹܐ ܘܥܲܩܘܼܒܖܹ̈ܐ ܟܠ ܚܲܕ̄ ܩܵܐ ܓܵܢܹܗ ܐܲܪܥܵܐ ܒܸܒܙܵܝܵܐ
ܚܲܝ̈ܘܵܬ̣ܵܐ ܘܪܲܚܫܹ̈ܐ ܘܦܲܪܚܬ̣ܵܐ ܓܵܘ ܟܘܼܬܵܫܵܐ ܒܥܸܠܕܒ̣ܵܒ̣ܵܝܵܐ
ܕܸܒ̈ܘܼܪܹܐ ܣܡܘܼܩܹ̈ܐ ܡܸܠܝܹܐ ܚܣܵܡܵܐ ܠܕܲܒܵܫܹ̈ܐ ܣܢܵܝܵܐ
ܨܦܵܚܵܐ ܩܛܵܠܵܐ ܓܢܵܒ̣ܵܐ ܕܸܒ̣ܫܵܐ ܕܲܒܪܲܝܗܝ ܣܸܬܘܵܝܵܐ
ܙܵܩܪܵܐ ܩܘܼܕ̈ܐ ܓܲܪܕܵܗ ܕܲܒܘܼܫܵܐ ܡܨܝܼܕܬܵܐ ܬܠܵܝܵܐ
ܨܸܨܪܵܐ ܙܡܵܪܵܐ ܒܠܲܝܠܹܐ ܘܝܵܘܡܵܐ ܘܩܵܠܹܗ ܠܵܐ ܒܸܫܵܗ̄ܝܵܐ
ܬܲܢܝܼܢܵܐ ܒܸܥܪܵܩܵܐ ܡ̣ܢ ܩܕܲܡ ܓܕܘܿܕܼܵܐ ܣܲܥܪܹܗ ܟܘܼܒܵܝܵܐ
ܛܲܝܪܵܐ ܒܸܩܢܵܐ ܨܲܝܕܵܐ ܒܠܝܼܵܥ̄ܐ ܠܙܵܥ̄ܝܹ̈ܗ ܓܣܵܝܵܐ
ܬܲܥܠܵܐ ܨܲܝܵـܕܵܐ ܡܗܝܼܪܵܐ ܒܲܢܟ̣ܝܼܠܘܬ̣ܵܐ ܣܸܦ̈ܘܵܬܹܗ ܡܫܵܝܵܐ
ܫܠܵܡܵܐ ܚܸܠܡܵܐ ܘܚܲܝܘܼܬ̣ܵܐ ܓܵܘ ܩܸܢܛܵܐ ܝܵܘܡܵܝܵܐ
ܚܸܘܹܐ ܕܡܝܼܟ̣ܵܐ ܦܲܓ̣ܪܹܗ ܫܘܼܠܚܵܝܵܐ ܥܲܠ ܚܝܼܙܵܐ ܛܘܵܝܵܐ
ܓܸܕܝܵܐ ܢܥ̄ܝܼܨܵܐ ܠܕܹܐܒ̣ܵܐ ܣܪܝܼܚܵܐ ܟܪܝܼܗܵܐ ܢܗܵܝܵܐ
ܠܲܝܬ̣ ܟܹܐܢܘܼܬ̣ܵܐ ܘܢܵܡܘܼܣܵܐ ܘܠܵܐ ܫܘܼܠܛܵܢܵܐ ܩܵܢܘܼܢܵܝܵܐ
 ܚܲܕ̄ܟ̈ܡܵܐ ܒܸܦܠܵܚܵܐ ܘܒܸܓ̰ܵܗ̄ܝܵܐ ܘܐ̄ܚܖܹ̈ܢܹܐ ܝܬ̈ܝܼܒ̣ܹܐ ܒܠܵܥ̄ܝܵܐ
ܚܲܝܠܵܢܵܐ ܡܫܲܠܛܘܿܢܹܐ ܘܥܲܠ ܪܹܫܵܐ ܕܡ̈ܝܼܵܐ ܩܲܕ̄ܡܵܝܵܐ
ܢܵܦܵܣܹܗ ܡ̣ܢ ܬܘܼܙ ܕܲܩܝܼܩܬܵܐ ܒܸܥܝܵـܩܵܐ ܘܩܛܵܥ̄ܝܵܐ
ܚܲܝܠܹܗ ܡ̣ܢ ܨܸܗܘܵܐ ܒܸܒܨܵܪܵܐ ܘܦܵܣܘܼܥ̈ܝܵܬܹܗ ܟܪܵܝܵܐ
ܡܵܘܬ̣ܵܐ ܘܚܲܝܹ̈ܐ ܥܲܠܹܗ ܓܕܵܠܵܐ ܓܵܘ ܡܘܼܪܵܝܵܐ
ܢܸܫ̈ܪܹܐ ܟܦܝܼܢܹ̈ܐ ܣܦܵܪܵܐ ܠܲܫܠܲܕܵܐ ܘܒܸܣܪܵܐ ܢܵܝܵܐ
ܚܕܵܐ ܕܡܘܼܬ̣ܵܐ ܒܕܘܼܡܝܵܐ ܕܡܲܠܲܐܟ̣ܵܐ ܐܝܼܢܵܐ ܐܲܪܥܵܢܵܝܵܐ
ܚܸܙܝܵܐ ܠܹܗ ܟܠܝܼܬܵܐ ܪܵܡܬܵܐ ܐܲܝܟ̣ ܐܝܼܠܵܢܵܐ ܪܹܫܵܗ̇ ܥܸܠܵܝܵܐ
ܦܘܿܚܵܐ ܚܲܡܝܼܡܵܐ ܕܩܲܝܛܵܐ ܕܒܲܪܝܼܵܐ ܥܲܠܵܗ̇ ܒܸܡܚܵܝܵܐ
ܒܫܸܥܵܫܵܐ ܝܵܠܸܚܬܵܐ ܪܲܩܝܼܩܬܵܐ ܕܪܹܫܵܗ̇ ܘܓܵܘܣܵܗ̇ ܓܠܵܝܵܐ
ܪܹܫܹܗ ܟܝܵܦܵܐ ܡ̣ܢ ܪܸܚܩܵܐ ܒܐܝܼܩܵܪܵܐ ܫܠܵܡܵܐ ܒܸܕܪܵܝܵܐ
ܒܐܝܼܕܹܗ ܡܘܼܪܡܵܐ ܐܵܬ̣ܵܐ ܚܘܵܪܬܵܐ ܢܝܼܫܵܐ ܫܠܵܡܵܝܵܐ
ܒܸܨܪܵܚܵܐ ܘܒܲܪ ܩܵܠܹܗ ܒܸܬܢܵܝܵܐ ܘܗܵـܝ̇ ܠܵܐ ܒܸܫܡܵܥ̄ܝܵܐ
ܗܵܘ̇ ܡܩܲܪܒܘܼܢܹ̈ܐ ܘܗܵـܝ̇ ܒܸܪܚܵܩܵܐ ܠܐܸܚ̈ܕܵܕܹܐ ܠܵܐ ܡܛܵܝܵܐ
ܥܕܵܢܵܐ ܥܒ̣ܵܪܵܐ ܡ̣ܢ ܚܸܡܵܐ ܘܫܸܡܫܵܐ ܠܡ̈ܝܼܵܐ ܨܵܗ̄ܝܵܐ
ܡܲܠܟܵܐ ܥܲܬܝܼܪܵܐ ܒܥܘܼܬ̣ܪܵܐ ܘܟ̰ܲܟܵܐ ܘܲܒܚܲܝܠܵܐ ܓܲܝܣܵܝܵܐ
ܐܵܦ ܩܪܲܒ̣ܬ̣ܵܢܵܐ ܙܲܚܡܵܐ ܘܡܸܠܝܵܐ ܒܓܘܼܫܡܵܐ ܦܲܓ̣ܪܵܢܵܝܵܐ
ܡܚܝܼܠܵܐ ܢܘܝܼܠܵܐ ܩܕܲܡ ܟܝܵܢܵܐ ܘܓܸܢܣܵܐ ܢܸܩܒ̣ܵܝܵܐ
ܟܝܼܦܵܐ ܘܒܪܝܼܟܵܐ ܡܦܲܪܦܘܼܠܹܐ ܚܘܼܒܵܐ ܘܡ̈ܝܼܵܐ ܓܒ̣ܵܝܵܐ
ܒܐ̄ܚܲܪܬ̣ܵܐ ܡܬܲܪܩܘܼܠܹܐ ܘܢܦܵܠܵܐ ܘܦܲܓ̣ܪܹܗ ܒܸܫܢܵܝܵܐ
ܥܲܠ ܒܹܐܪܵܐ ܟܠܹܐ ܠܵܗ̇ ܬܲܠܸܡܬ̣ܵܗ̇ ܡ̈ܝܼܵܐ ܠܸܡܠܵܝܵܐ
ܫܢܝܼܬ̣ܵܐ ܒܸܟܚܵܟܵܐ ܒܐܵܗܵܐ ܚܸܙܘܵܐ ܕܠܵܐ ܐܵܬ̣ܹܐ ܠܲܬܢܵܝܵܐ
ܗܵܘ ܛܠܵܒܵܐ ܡܝܼܵܐ ܣܸܦ̈ܘܵܬ̣ܹܗ ܒܪܝܼܙܹܐ ܪܲܚ̈ܡܹܐ ܒܸܛܥܵܝܵܐ
ܗܵܝ ܡܲܚܦܘܿܠܹܐ ܝܸܗ̄ܒ̣ܠܵܗ̇ ܠܹܗ ܫܲܪܛܵܐ ܩܲܕ̄ܡܵܝܵܐ
ܒܠܲܥܙܵܗ̇ ܚܸܠܝܵܐ ܚܒ̣ܝܼܛܵܐ ܒܹܝܢ ܐܲܟܲܕܵܝܵܐ ܘܒܵܒ̣ܠܵܝܵܐ
ܐ̄ܡܘܼܪ ܠܝܼ ܡܵܢܝܼ ܘܡ̣ܢ ܐܲܝܟܵܐ ܝܗ̄ܘܹܝܬ ܐ̄ܬ̣ܵܝܵܐ
ܡܘܼܚܙܹܐ ܠܹܗ ܥܹܙܸܩܬ̣ܹܗ ܥܲܠܵܗ ܚܵܬ̣ܡܵܐ ܪܘܼܫܡܵܝܵܐ
ܡܲܠܟܵܐ ܕܐܵܫܘܿܪ ܘܐܲܪܒܲܥ ܦܸܢ̈ܝܵܬ̣ܵܐ ܡ̣ܢ ܐܲܬ̣ܪܵܐ ܓܲܪܒܝܵܝܵܐ
ܡܝܼܵܐ ܚܸܠܝܹ̈ܐ ܫܬܵܝܵܐ ܘܟܲܪܣܹܗ ܪܘܵܝܵܐ ܐܝܼܢܵܐ ܠܵܐ ܣܒ̣ܵܥ̄ܝܵܐ
ܐܵܦ ܗܵܘ ܒܘܼܩܵܪܹܗ ܡܵܢܝܼ ܗ̄ܘܵܝܬܝ ܘܕܵܐܟ̣ܝܼ ܗ̄ܘܵܝܬܝ ܒܸܚܵܝܵܐ؟
ܓܵܘ ܕܐܵܗܵܐ ܒܲܪܝܼܵܐ ܕܠܲܝܬ ܠܵܗ̇ ܚܘܼܬܵܡܵܐ ܘܠܵܐ ܫܘܼܪܵܝܵܐ
ܘܟܝܵܢܵܐ ܩܸܫܝܵܐ ܥܲܡ ܐ̄ܚܖܹ̈ܢܹܐ ܐܝܼܢܵܐ ܥܲܡܵܟ̣ܝ ܫܲܝܢܵܝܵܐ
ܡܐܲܝܟܵܐ ܚܲܝܠܵܟ̣ܝ ܘܥܘܼܕܪܵܢܵܟ̣ܝ ܝܼܠܹܗ ܟܝܵܢܵܝܵܐ ܝܵܢ ܪܘܼܚܵܢܵܝܵܐ؟
ܫܸܡܝܼ ܐܝܼ ܢܵܐ ܢܵܐ ܟܲܘܟ̣ܲܒ̣ܬ̣ܵܐ ܕܨܲܦܪܵܐ ܒܠܸܫܵܢܵܐ ܫܘܼܡܹܪܵܝܵܐ
ܒܪܵܬܵܐ ܕܓܲܒ̣ܪܵܐ ܣܵܒ̣ܵܐ ܐܲܪܸܡܠܵܐ ܡܸܣܟܹܢܵܐ ܘܪܲܥܝܵܐ
ܝܵܬܘܿܡܬܵܐ ܘܝܸܡܝܼ ܫܒ̣ܝܼܩܬܵܐ ܠܐܵܗܵܐ ܥܵܠܡܵܐ ܙܲܒ̣ܢܵܢܵܝܵܐ
ܚܲܝܠܵܐ ܕܦܲܓ̣ܪܝܼ ܡ̣ܢ ܟܝܵܢܵܐ ܐܲܪܥܵܢܵܝܵܐ ܘܪܘܼܚܝܼ ܫܡܲܝܵܢܵܝܵܐ
ܟ̰ܝܼܕܠܵܗ̇ ܕܗܵܘܹܐ ܐܲܪܚܵܐ ܕܐܝܼܩܵܪܵܐ ܐܲܝܟ̣ ܥܝܵܕܵܐ ܫܲܒ̣ܛܵܢܵܝܵܐ
ܒܵܒܵܗ̇ ܪܵܥܝܵܐ ܕܲܩܢܹܗ ܚܘܵܪܵܐ ܦܲܓ̣ܪܹܗ ܟܪܝܼܟ̣ܵܐ ܓܵܘ ܥܵܒܵܝܵܐ
ܡ̣ܢ ܪܸܚܩܵܐ ܨܪܵܚܵܐ ܘܩܘܼܦܵܠܹܗ ܫܥܵܫܵܐ ܡܘܼܕܝܼ ܝܠܹܗ ܒܪܵܝܵܐ
ܐܝܼܢܵܢܵܐ ܩܵܐ ܒܵܒܵܗ̇ ܪܡܸܙܠܵܗ̇ ܒܚܲܕ ܪܸܡܙܵܐ ܐ̄ܪܙܵܢܵܝܵܐ
ܝܼܠܹܗ ܐܲܪܚܵܐ ܕܠܵܐ ܢܸܣܝܵܢܵܐ ܬܠܝܼܩܵܐ ܒܒܲܪܝܼܵܐ ܝܼܠܹܗ ܡܕܝܼܢܵܝܵܐ
ܓܲܝܣܹܗ ܪܸܚܩܵܐ ܘܣܘܼܣܹܝ̄ܗ ܨܠܝܼܒ̣ܵܐ ܘܡ̣ܢ ܟ̰ܲܟܵܐ ܫܘܼܠܚܵܝܵܐ
ܪܲܥܝܵܐ ܒܫܲܝܢܵܐ ܘܫܠܵܡܵܐ ܡܩܘܼܒܸܠܠܹܗ ܠܡܲܠܟܵܐ ܢܝܼܢܘܵܝܵܐ
ܐܝܼܢܵܢܵܐ ܟܵܘܟ̣ܲܒ̣ܬ̣ܵܐ ܕܨܲܦܪܵܐ ܒܲܗܪܵܗ̇ ܐܵܦ ܒܝܵܘܡܵܐ ܠܵܐ ܟ̰ܡܵܝܵܐ
ܠܒ̣ܝܼܫܬܵܗ̇ ܕܥܲܡܪܵܐ ܣܪܝܼܩܵܐ ܘܲܡܢܘܼܦܫܵܐ ܒܝܲܕ ܫܲܕܼܵܝܵܐ
ܥ̄ܙܝܼܠܵܐ ܒܟܘܼܒ̣ܫܵܐ ܙܩܝܼܪܵܐ ܘܲܡܢܘܼܩܫܵܐ ܒܚܲܘܵܟܵܐ ܐܘܼܡܵܢܵܝܵܐ
ܨܒ̣ܝܼܥܵܬܵܐ ܒܲܕܝܘܼܬ̣ܵܐ ܕܒܸܒ̈ܠܹܐ ܕܒܲܪܝܼܵܐ ܒܓܵܘܢܵܐ ܒܹܢܲܦ̮ܫܵܝܵܐ
ܫܘܼܦܪܵܗ̇ ܬܗܝܼܪܵܐ ܩܘܿܡܬܵܗ̇ ܣܩܝܼܠܬܵܐ ܘܟܵܘܣܵܐ ܕܲܗܒ̣ܵܢܵܝܵܐ
ܥܲܝܢܵܗ̇ ܓܘܼܒ̣ܖܹ̈ܐ ܐ̄ܟܘܿܡܹ̈ܐ ܟܚܝܼܠܹܐ ܒܟܸܚܠܵܐ ܥܲܪܵܒܵܝܵܐ
ܚܕܵܐ ܚܲܠܵܩܬܵܐ ܒܢܵܬ̣ܵܗ̇ ܬܠܝܼܬ̣ܵܐ ܠܵܘܓ̰ܵܗ ܠܗܵܝܵܐ
ܡܠܝܼܬ̣ܵܐ ܚܸܟ̣ܸܡܬ̣ܵܐ ܟܲܕ ܠܵܐ ܝܠܝܼܦܬܵܐ ܟܬ̣ܵܒ̣ܵܐ ܘܲܩܪܵܝܵܐ
ܝܘܼܠܦܵܢܵܐ ܕܟܵܘ̈ܟ̣ܒ̣ܹܐ ܐܝܼܬܠܵܗ̇ ܝܼܕܲܥܬ̣ܵܐ ܐܲܝܟ̣ ܟܵܠܕܵܝܵܐ
ܦܲܐܬ̣ܵܗ̇ ܚܘܵܪܬܵܐ ܡ̣ܢ ܫܸܡܫܵܐ ܚܕܝܼܪܬܵܐ ܠܓܵܘܢܵܐ ܫܘܼܡܹܪܵܝܵܐ
ܐܲܩܠܵܗ̇ ܚܸܦܝܵܝܹ̈ܐ ܕܪܝܼܬܵܐ ܚܸܠܚܵܠܵܐ ܡ̣ܢ ܣܹܐܡܵܐ ܐܲܨܠܵܝܵܐ
ܡܫܲܢ̈ܝܵܢܹܐ ܓܵܘ ܒܲܪܝܼܵܐ ܠܲܝܬ ܠܗ̄ܘܿܢ ܡܲܫܟܢܵܐ ܐܲܡܝܼܢܵܝܵܐ
ܚܹܐܖܹ̈ܐ ܓܵܘ ܒܲܪܝܼܵܐ ܥܒ̣ܵܪܵܐ ܬܚܘܼܡܹ̈ܐ ܡܲܥܪܒ̣ܵܝܵܐ ܘܡܲܕܢ̱ܚܵܝܵܐ
ܠܵܐ ܚܸܡܵܐ ܘܫܸܡܫܵܐ ܘܠܵܐ ܡ̣ܢ ܚܲܝ̈ܘܵܬ̣ܵܐ ܣܖ̈ܝܼܚܹ̈ܐ ܒܸܙܕܵܥ̄ܝܵܐ
ܥܸܠܥܵܠܹ̈ܐ ܕܚܝܼܙܵܐ ܘܬܘܿܙ ܕܩܲܝܛܵܐ ܕܠܲܝܬ ܠܗ̄ܘܿܢ ܟܠܵܝܵܐ
ܡ̣ܢ ܒܵܒܵܐ ܘܣܵܒ̣ܵܐ ܦܠܝܼܚܹ̈ܐ ܐܵܗܵܐ ܫܘܼܓ̣̄ܠܵܐ ܦܝܼܫܵܐ ܥܝܵܕܵܝܵܐ
ܡܲܪܥ̄ܘܿܝܹ̈ܐ ܠܦܸܣܩܵܐ ܕܥܸܖ̈ܒܹܐ ܘܥܸ̈ܙܐܹ ܡ̣ܢ ܐܲܨܠܵܐ ܫܵܡܵܝܵܐ
ܚܲܕ̄ܟܡܵܐ ܓܘܼܡ̈ܠܹܐ ܩܵܐ ܛܥܵܢܬܵܐ ܘܲܢܩܲܠܬܵܐ ܓܵܘ ܫܘܼܢܵܝܵܐ
ܬܪܹܝܢ̄ ܟܲܠܒܹ̈ܐ ܙܲܚ̈ܡܹܐ ܕܢܵܛܘܼܪܘܼܬ̣ܵܐ ܠܐܲܪܝܹ̈ܐ ܕܡܵܝܵܐ
ܒܲܝܬܲܝܗܝ ܟܒ̣ܝܼܢܵܐ ܙܩܝܼܪܵܐ ܡ̣ܢ ܣܲܥܪܵܐ ܓܵܘܢܸܗ ܟܘܿܡܢܵܝܵܐ
ܢܩܝܼܪܵܐ ܠܐܲܪܥܵܐ ܒܣܸܟܹ̈ܐ ܘܚܲܒ̣̈ܠܹܐ ܡ̣ܢ ܠܥܸܠ ܨܠܵܝܵܐ
ܣܢܝܼܕܵܐ ܥܲܠ ܣܬܘܼܢܹ̈ܐ ܕܩܲܝܣܵܐ ܡ̣ܢ ܓܹܒܵܐ ܬܲܚܬܵܝܵܐ
ܬܸܠܝܹܐ ܒܲܣܬܘܼܢܵܐ ܡ̣ܢ ܟܠ ܓܹܒܵܐ ܠܲܡܦܵܐ ܘܲܫܪܵܓ̣̄ܝܵܐ
ܡܫܲܘܝܵܐ ܒܚܲܨܝܼܪܵܐ ܙܩܝܼܪܵܐ ܫܲܦܝܼܪܵܐ ܡ̣ܢ ܙܵܠܵܐ ܪܹܫܵܝܵܐ
ܓ̰ܵܠܵܐ ܕܥܲܡܪܵܐ ܠܐܲܪܥܵܐ ܦܪܝܼܣܵܐ ܠܲܝܬ ܠܹܗ ܒܠܵܝܵܐ
ܚܲܕ ܟܲܢܘܼܢܵܐ ܕܛܝܼܢܵܐ ܒܸܢܝܵܐ ܓܠܘܼܠܵܐ ܦܲܠܓܵܝܵܐ
ܢܘܼܪܵܐ ܕܓܘܼܡܖܹ̈ܐ ܒܕܵܘܩܵܐ ܕܦܲܪܙܠܵܐ ܠܲܚܡܵܐ ܒܝܼܦܵܝܵܐ
ܒܹܐ̄ܟ̣ܵܠܵܐ ܚܘܼܖ̈ܡܹܐ ܘܕܲܘܹ̈ܓ̣̄ܐ ܕܡܲܣܬܵܐ ܨܢܝܼܨܬܵܐ ܫܬܵܝܵܐ
ܫܸܡܫܵܐ ܒܸܟܝܵܦܵܐ ܫܝܵܦܵܐ ܠܚܸܙܘܵܐ ܘܐ̄ܚܲܪܬܵܐ ܓܢܵܝܵܐ
ܕܟ̣ܵܪܵܐ ܕܝܵܘܡܵܐ ܛܡܝܼܪܵܐ ܓܵܘ ܡܘܼܚܹܗ ܠܹܐ ܐܵܬ̣ܹܐ ܢܫܵܝܵܐ
ܚܲܝܹ̈ܐ ܡܲܕܪܵܫܬܵܐ ܘܟܠ ܝܵܘܡܵܐ ܚܲܕܬ̣ܵܐ ܝܼܕܲܥܬ̣ܵܐ ܩܢܵܝܵܐ
ܐܝܼܢܵܢܵܐ ܐܲܝܟ̣ ܩܵܨܘܼܡܬܵܐ ܟܲܦܵܐ ܕܐܝܼܕܹܗ ܕܒ̣ܝܼܩܬܵܐ ܩܪܵܝܵܐ
ܩܪܵܒ̣ܘܟ̣ ܝܲܪܝܼܟ̣ܵܐ ܘܒܸܥ̈ܠܕܒ̣ܵܒ̣ܘܟ̣ ܡܚܲܝ̈ܕܹܐ ܥܲܡ ܐ̄ܚܘܿܢܘܼܟ̣ ܓܵܘܵܝܵܐ
ܚܸܠܡܘܼܟ̣ ܓܘܼܒ̣ܪܵܐ ܡܲܠܟܘܼܬ̣ܘܼܟ̣ ܩܘܵܝܵܐ ܘܲܬܚ̈ܘܼܡܵܗ̇ ܦܬ̣ܵܝܵܐ
ܚܘܼܝܵܕܵܐ ܘܫܠܵܡܵܐ ܩܵܐ ܥܲܡܘܼܟ̣ ܐܵܫܘܿܪ ܢܝܼܫܘܼܟ̣ ܐܲܬ̣ܪܵܝܵܐ
 ܒܚܘܼܒܵܐ ܠܸܒܘܼܟ̣ ܠܵܐ ܡܵܝܘܼܬ̣ܵܐ ܐܲܝܟ̣ ܬܲܡܘܼܙ ܡܬ̣ܘܿܡܵܝܵܐ
ܗܲܕܟ̣ܵܐ ܝܠܹܗ ܡܲܚܙܘܿܝܹܐ ܟܵܘܟ̣ܒ̣ܘܼܟ̣ ܠܪܸܚܩܵܐ ܕܲܥܬ̣ܝܼܕܵܝܵܐ
ܚܲܒ̈ܪܵܢܹܐ ܕܐܝܼܢܵܢܵܐ ܠܨܲܕܪܹܗ ܡܚܵܝܵܐ ܐܲܝܟ̣ ܒܲܪܩܵܐ ܪܩܝܼܥܵܝܵܐ
ܐܲܝܟ̣ ܓܹܐ̈ܪܹܐ ܣܲܡܡܵܢܹ̈ܐ ܓܵܘ ܠܸܒܹܗ ܫܬܵܠܵܐ ܘܟܘܵܝܵܐ
ܣܲܒ̣ܪܹܗ ܘܗܸܪܓܹܗ ܓܕܵܠܵܐ ܓܵܘ ܕܘܼܪܵܫܵܐ ܚܘܼܫܵܒ̣ܵܝܵܐ
ܡ̣ܢ ܫܘܼܦܪܵܐ ܘܲܚܢܵܢܵܐ ܕܐܝܼܢܵܢܵܐ ܠܸܒܹܗ ܪܘܵܝܵܐ ܚܕܵܝܵܐ
ܘܐ̄ܣܝܼܪܵܐ ܒܩܸܬ̣ܪܵܐ ܕܚܘܼܒܵܐ ܕܠܹܐ ܐܵܬܹ̣ܐ ܠܲܫܪܵܝܵܐ
ܘܪܘܼܚܹܗ ܠܕܲܥܬ̣ܝܼܕ ܕܐܲܬ̣ܪܹܗ ܘܥܲܡܹܗ ܐܵܫܘܿܪ ܒܟ̣ܵܝܵܐ
ܟܵܘܟ̣̈ܒ̣ܹܐ ܓܘܼܒ̣ܖܹ̈ܐ ܡܫܲܪܘܿܝܹܐ ܠܗܵܝܵܐ ܘܲܫܡܲܝܵܐ ܚܘܵܝܵܐ
ܦܘܿܚܵܐ ܡܫܲܚܠܘܼܦܹܐ ܘܦܝܵܚܵܐ ܘܐܵܐܲܪ ܘܲܫܡܲܝܵܐ ܨܦܵܝܵܐ
ܥܲܠ ܥܲܪܙܵܠܵܐ ܫܛܝܼܚܵܐ ܓܲܫܘܼܩܹܐ ܒܣܲܗܪܵܐ ܒܲܕܪܵܝܵܐ
 ܝܵܐ ܪܲܒܝ ܐܸܢ ܐܝܼܬ̣ ܦܝܵܫܵܐ ܦܘܼܪܣܲܬ ܩܵܐ ܚܘܼܣܵܝܵܐ
ܡܨܲܠܘܼܝܹܐ ܒܠܸܒܹܗ ܡ̣ܢ ܒܵܪܘܝܵܐ ܛܠܵܒܵܐ ܦܘܼܢܵܝܵܐ
ܩܵܘܡܵܐ ܕܟܵܘܟ̣ܒ̣ܹܗ ܚܠܝܼܛܵܐ ܝܠܹܗ ܒܫܸܡܹܗ ܓܵܘ ܗܘܼܓܵܝܵܐ
ܝܵܐ ܐܵܫܘܿܪ ܡܪܲܝܡܵܐ ܩܲܝܘܿܡܘܼܟ̣ ܡܲܠܟܵܐ ܒܹܝܬ ܢܲܗܪܹܢܵܝܵܐ
ܢܵܛܘܿܪܵܐ ܕܫܸܡܘܼܟ̣ ܘܲܡܕܼܝܼܢ̄ܬܘܼܟ̣ ܡܓܘܿܒܝܵܐ ܒܨܸܒ̣ܝܵܢܘܼܟ̣ ܐܲܠܵܗܵܝܵܐ
ܩܲܝܘܼܡܘܟ̣ ܒܐܲܪܥܵܐ ܟܲܗܢܵܐ ܬܲܘܕܝܼܬܵܢܵܝܵܐ ܘܡܲܠܟܵܐ ܐܘܼܡܬܵܢܵܝܵܐ
ܩܘܼܕܡܹܐ ܐܘܼܪܚܵܐ ܝܲܪܝܼܟ̣ܬܵܐ ܘܡܹܐܙܲܠܬܵܐ ܠܲܝܬ ܠܵܗ̇ ܫܠܵܝܵܐ
ܒܥܸܠܕܒ̣ܵܒ̣ܵܐ ܣܪܝܼܚܵܐ ܓܪܵܫܵܐ ܠܲܒܬ̣̄ܪܵܐ ܒܲܟܡܹܐܢܵܐ ܛܫܵܝܵܐ
ܨܸܗܝܵܐ ܥܲܠ ܕܸܡܹܗ ܕܫܵܬܹܐ ܠܹܗ ܒܟܵܣܵܐ ܐܲܝܟ̣ ܒܲܪܒܪܵܝܵܐ
ܒܘܼܫ ܒܫܲܝܢܵܐ ܘܲܫܥܲܫܬܵܐ ܕܐܝܼܕܵܐ ܘܫܠܵܡܵܐ ܐ̄ܚܲܪܵܝܵܐ
ܩܵܐ ܐܝܼܢܵܢܵܐ ܩܵܘܠܹܗ ܬܢܵܝܵܐ ܘܕܸܡܥܹ̈ܐ ܒܥܲܝܢܹ̈ܗ ܓ̰ܪܵܝܵܐ
ܒܸܕ ܛܵܠܸܒ ܠܐܝܼܕܵܗ̇ ܡ̣ܢ ܒܵܒܵܗ̇ ܩܵܐ ܙܘܼܘܵܓ̣ܵܐ ܢܵܡܘܼܣܵܝܵܐ
ܕܐܵܙܵܠ̄ܐ ܥܲܡܹܗ ܠܡܕܝܼܢ̄ܬܹܗ ܢܝܼܢܘܸܐ ܓܵܘ ܩܲܨܪܵܐ ܡܲܠܟܵܝܵܐ
ܐܸܢ ..... ܣܦܘܼܪܘܿ ܠܲܢ ܓܵܘ ܡܫܘܼܚܬܵܐ - ܓ

ܟ̣ܵܡܝܼܣ ܓܝܼܘܲܪܓܝܼܣ

[/font][/size][/size]

31

نتاجات بالسريانية / رد: يوم اللغة الآشورية

« في: 06:55 03/09/2013  »

ܡܝܲܩܪܵܐ ܪܵܒܝܼ ܘܡܲܠܦܵܢܵܐ ܛܒ̣ܝܼܒ̣ܵܐ ܡܝܼܟ̣ܵـܐܹܝܠ ܡܲܡܘܼ
ܡܝܲܩܪܵܐ ܪܵܒܝܼ ܡܵܚܘܿܪܵܐ ܡܗܝܼܪܵܐ ܥܲܒ̣ܕܝܼܫܘܿܥ ܣܲܗ̄ܕܵܐ ܝܘܼܚܲܢܵܐ

ܫܠܵܡܵܐ ܘܐܝܼܩܵܪܵܐ

ܗܹܐ ܘܐܵܡܹܝܢ ...

ܚܫܝܼܚܵܐ ܝܠܹܗ ܠܸܫܵܢܲܢ ܐܵܫܘܿܪܵܝܵܐ ܚܲܕ ܝܵܘܡܵܐ ܘܥܹܐܕܼܵܐ ܦܪܝܼܫܵܐ ܐܲܝܟ̣ ܟܠܲܝܗܝ ܠܸܫܵܢܹ̈ܐ ܕܥܲܡܡܹ̈ܐ ܘܐܸܡ̈ܘܵܬ̣ܵܐ ܐ̄ܚܹܪ̄ܢܹܐ ܒܬܹܒ̣ܹܝܠ، ܠܲܕܟ̣ܵܪܵܐ ܘܲܡܝܲܩܘܼܪܹܐ ܘܲܡܙܲܝܘܿܚܹܐ ܠܐܵܗܵܐ ܠܸܫܵܢܵܐ ܥܲܬܝܼܪܵܐ ܘܫܸܪܫܵܝܵܐ ܘܡܲܒܘܼܥܵܐ ܕܪܵܒ̈ـܵܐ ܠܸܫܵܢܹ̈ܐ ܕܲܦܢܝܼܬܵܐ ܕܡܲܕ̱ܢܚܵܐ ܡܸܨܥܵܝܵܐ ܘܲܒܟܠܲܝܗ̈ܝ ܚܒ̣ܝܼܫܵܬܹ̈ܗ ܡ̣ܢ ܐܵܬ̣ܘܵܬܹ̈ܗ ܘܣܸܖ̈ܛܹܗ ܘܟܬ̣ܝܸܒ̣ܘܵܬ̣ܹ̈ܗ ܘܣܲܦܪܵܝܘܼܬܹܗ ܘܩܵܠܹ̈ܗ ܘܬܘܼܪܵܨ ܡܲܡܠܹܠܗ ܘܟܘܼܢܸܫ ܡܸ̈ܠܠܹܗ ܘܠܸܥ̈ܙܹܗ ܗܵܐ ܡ̣ܢ ܡܫܲܪܝܵܬܹܗ ܟܲܕ ܗܵܘ̇ ܪܬܝܼܡܵܐ ܒܣܸܦ̈ܘܵܬ̣ܵܐ ܕܒܲܪܢܵܫܵܐ ܐܵܫܘܿܪܵܝܵܐ ܡ̣ܢ ܩܕܲܡ ܕܦܵܝܸܫ ܗܵܘܐ ܟܬ̣ܝܼܒ̣ܵܐ ܥܲܠ ܠܘܼܚܹ̈ܐ ܕܛܝܼܢܵܐ ܘܓܸܠܕܵܐ ܕܚܲܝܘܵܬ̣ܵܐ ܘܘܲܪܵܩܵܐ ... ܗܲܠ ܡܛܵܝܬ̣ܹܗ ܠܡܵܐܢܹ̈ܐ ܘܬܘܼܩܵܢܹ̈ܐ ܘܚܵܒ̣ܘܼܫܹ̈ܐ ܕܒܲܪܩܵܐ ܟܲܕ  ܓܵܘ ܥܠܲܝܡܘܼܬ̣ܹܗ ܚܝܠܵܢܵܐ ܝܗ̄ܘܵܐ ܘܲܝܕܝܼܥܵܐ ܘܲܡܝܲܩܪܵܐ ܘܡܘܼܦܠܸܚܵܐ ܓܵܘ ܩܪܝܼܬܹܗ ܘܐܲܬ̣ܪܹܗ ܘܐܲܬ̣ܪܵܘܵܬ̣ܵܐ ܕܲܫܒ̣ܵܒ̣ܘܼܬ̣ܵܐ ܘܲܡܨܵܘܬ̣ܵܐ ܒܐܲܟܵܖܹ̈ܐ ܘܡܲܠܟܹ̈ܐ ܘܟܲܗܢܹ̈ܐ ܘܲܢܒ̣̈ܝܼـܹܐ ܘܲܡܫܝܼܚܵܐ، ܗܹܐ ܚܫܝܼܚܵܐ ܝܠܹܗ ܠܲܕܟ̣ܵܪܵܐ ܘܲܡܝܲܩܘܖܹ̈ܐ ܠܡܵܐ ܕܡܘܼܩܪܸܒ̣ܠܹܗ ܩܵܐ ܬܸܫܡܸܫܬܵܐ ܕܒܲܪܢܵܫܘܼܬ̣ܵܐ ܟܠܵܢܵܐܝܼܬ̣ ܘܲܢܛܵܪܬܵܐ ܕܐܝܼܬܘܼܬ̣ܸܢ ܐܵܫܘܿܪܵܝܬܵܐ ܦܪܝܼܫܵܐܝܼܬ̣ ܘܐܵܦ ܠܲܡܝܲܩܲܪܬܑܵܐ ܠܟܠܲܝܗܝ ܐܵܢܝܼ ܕܲܡܫܵܘܬܸܦܠܗ̄ܘܼܢ ܒܲܡܬܵܪܵܨܬܹܗ ܘܲܒܢܵܝܬ̣ܹܗ ܘܡܲܪܘܵܝܬܹܗ ܘܡܲܪܘܵܚܬܹܗ ܓܵܘ ܒܪܵܝܬܹܗ ܘܲܥܠܲܝܡܘܼܬ̣ܹܗ ܘܐܵܢܝܼ ܕܲܣܢܸܕܠܗ̄ܘܼܢ ܘܗܵܘ ܓܵܘ ܣܲܝܒܘܼܬܹܗ ܘܲܡܚܝܼܠܘܼܬܹܗ ܘܡܲܚܝܵܝܬܹܗ ܘܲܡܛܵܘܲܪܬܹܗ ܩܵܐ ܕܡܵܨܹܐ ܕܓ̰ܵـܘܸܓ̰ ܥܲܡ ܫܘܼܚܠܵܦܹ̈ܐ ܘܩܵܢܘܼܢܹ̈ܐ ܠܸܫܵܢܵܝܹ̈ܐ ܕܙܲܒ̣ܢܵܐ ܕܩܵܐܸܡ.

ܫܒ̣ܘܼܩ ܐܵܗܵܐ ܨܪܵܚܬܵܐ ܗܵܘܝܵܐ ܦܘܼܪܣܵܐ ܚܲܕ̄ܬ̣ܵܐ ܘܡܸܨܥܵܐ ܠܲܩܪܵܝܬ̣ܵܐ ܕܟܠܲܝܗܝ ܡܠܸܫ̈ܢܵܢܹܐ ܘܝܲܨܘܼܦܹ̈ܐ ܘܡܲܠܦ̈ܢܹܐ ܘܟܵܬ̣ܘܿܒ̣ܹ̈ܐ ܘܣܵܝܘܼܡܹ̈ܐ ܝܕܝܼܥܹ̈ܐ ܘܚܲܒܝܼܖܹ̈ܐ ܘܣܲܢ̈ܕܵܢܹܐ ܕܠܸܫܵܢܲܢ  ܠܚܲܕ̄ ܟܢܘܼܫܝܵܐ ܠܸܫܵܢܵܝܵܐ ܓܵܘܵܢܵܝܵܐ ܪܘܝܼܚܵܐ.

ܬܵܘܕܝܼ ܠܡܲܚܫܵܚܬܘܼܟ̣
ܡܝܲܩܪܵܢܘܟ̣ܘܿܢ

32

نتاجات بالسريانية / رد: ܗܘܡܣܐ ܡܚܪܝܐ - ܡܫܘܚܬܐ ܐ ملحمة شعرية - القصيدة الاولى

« في: 22:52 29/08/2013  »

ܡܝܲܩܖܹ̈ܐ ܪܵܒܝܼ ܐܝܼܒ̣ܸܢ ܥܲܡ ܡܫܲܡܫܵܢܵܐ ܙܗܲܝܵܐ ܘܸܠܨܸܢ

 ܫܠܵܡܵܐ

ܐܵܦ ܐܲܚܬܘܼܢ ܗܵܘܝܼܬܘܼܢ ܒܲܣܝܼܡܹ̈ܐ ܪܵܒܵܐ ܠܬܸܫܡܸܫܬܘܿܟ̣ܘܢ ܘܚܘܼܒܘܼܟ̣ܘܼܢ ܐܲܡܝܼܢܵܐܝܼܬ̣ ܩܵܐ ܐܘܼܡܬܵܢ ܘܥܹܕܬܸܢ ܘܠܸܫܵܢܲܢ

ܥܲܡ ܐܝܼܩܵܪܝܼ
ܐܲܚܘܼܢܘܼܟ̣ܘܢ
ܟ̣ܵܡܝܼܣ ܓܝܼܘܲܪܓܝܼܣ

33

نتاجات بالسريانية / ܗܘܡܣܐ ܡܚܪܝܐ - ܡܫܘܚܬܐ ܐ ملحمة شعرية - القصيدة الاولى

« في: 05:32 26/08/2013  »

ܗܘܡܣܐ ܡܚܪܝܐ
ܡܫܘܚܬܐ ܐ

ܩܘܼܪܒܵܐ ܕܢܲܗܪܵܐ ܓܵܘ ܚܕܵܐ ܡܵܬܐ̣ܵ ܥܲܠ ܪܵܘܡܬܐܵ ܟܠܝܼܬܐ̣ܵ
ܟܪܝܼܟ̣ܬܵܐ ܒܟܲܖ̈ܡܹܐ ܥܲܡ ܐܝܼܠܵܢܹ̈ܐ ܕܛܥܘܼܢܬܐܵ ܡܠܝܼܬܐ̣ܵ
ܐܲܪܥܵܗ ܦܠܝܼܚܬܐܵ ܒܝܲܕ ܐܲܟܵܖܹ̈ܐ ܘܲܒܣܸܟܬܐ̣ܵ ܕܲܦܕܵܢܵܐ ܨܪܝܼܬܐ̣ܵ
ܕܵܚ̈ܠܵܐ ܕܚܸ̈ܛܹܐ ܘܨܲܥܖܹ̈ܐ ܡ̣ܢ ܡܲܝܼܵ̈ܐ ܕܡܸܛܪܵܐ ܫܬܝܼܬ̣ܵܐ
 ܠܲܚܡܵܐ ܕܣܘܼܢܩܵܢܵܐ  ܩܵܐ ܡܸܣܟܹܢܵܐ ܘܩܵܐ ܙܲܕܝܼܩܵܐ ܘܐܵܦ ܙܵܢܝܼܬ̣ܵܐ
ܒܲܝܬ̣ܝܼ ܟܘܿܚܵܐ ܒܸܢܝܵܐ ܡ̣ܢ ܛܝܼܢܵܐ ܠܡܲܪܙܵܐ ܕܲܚܕܵܐ ܫܵܩܝܼܬ̣ܐ
ܐ̄ܓܵܪܸܗ ܟܘܼܦܵܐ ܘܲܚܕܵܐ ܒܹܝܬ̣ ܥܸܠܵܝܹ̈ܐ ܒܪܹܫܸܗ ܒܢܝܼܬܐ̣ܵ
ܩܲܪܫܹܗ ܫܲܩ̈ܠܹܐ ܡܫ̈ܘܼܡܪܹܐ ܣܢܝܼܕܹܐ ܥܲܠ ܩܵܪܝܼܬܐ̣ܵ
 ܟܵܘܹܐ ܒܓܘܼܕܵܐ ܩܵܐ ܛܪܲܕܬܵܐ ܕܬܸܢܵܐ ܐܵܦ ܩܵܐ ܬܲܗܘܝܼܬ̣ܵܐ
ܕܵܪܬܹܗ ܙܥܘܼܪܬܵܐ ܓܵܘܵܗ̇ ܬܘܼܬ̣ܵܐ ܘܚܕܵܐ ܕܵܠܝܼܬ̣ܵܐ
ܣܝܓ̣ܵܐ ܕܕܵܪܬܵܐ ܓܸܕܠܵܐ ܓܕܝܼܠܵܐ ܒܟܸܬܘܹ̈ܐ ܥܲܡ ܣܸܢܝܼܬܐ̣ܵ
ܒܠܸܠܝܵܐ ܕܣܸܬܘܵܐ ܚܸܫܟܵܐ ܐ̄ܟܘܿܡܵܐ ܘܫܸܡܫܵܐ ܓܢܝܼܬܵܐ̣
ܩܲܪܬܵܐ ܘܦܵܘܚܵܐ ܘܐܲܪܥܵܐ ܟܠܵܗ̇ ܬܲܠܓܵܐ ܟܣܝܼܬܐ̣ܵ
ܒܲܗܪܵܐ ܠܲܝܬܠܝܼ ܫܒ̣ܘܼܩ ܡ̣ܢ ܫܪܵܓ̣ܵܐ ܠܓܘܼܕܵܐ ܬܠܝܼܬ̣ܐܵ
ܡܸܫܚܵܗ̇ ܒܨܝܼܪܵܐ ܓܵܗܹܐ ܡܕܲܦܕܘܼܦܹ̈ܐ ܘܓܵܗܹܐ ܟ̰ܡܝܼܬܐ̣ܵ
ܢܘܼܪܝܼ ܕܥܝܼܟ̣ܵܐ ܘܫܚܘܼܢܬܐܵ ܠܲܝܬ ܠܝܼ ܫܒ̣ܘܿܩ ܡ̣ܢ ܬ̄ܫܘܝܼܬ̣ܵܐ
ܙܘܵܕܹ̈ܐ ܠܲܝܬ ܠܝܼ ܟܠܲܝܗ̈ܝ ܫܒ̣ܝܼܩܹ̈ܐ ܓܵܘ ܡܲܫܪܝܼܬ̣ܵܐ
ܠܝܼܢܵܐ ܕܚܲܡܪܝܼ ܦܪܝܼܩܵܐ ܣܦܝܼܩܵܐ ܣܢܝܼܕܵܐ ܥܲܠ ܙܵܘܝܼܬ̣ܵܐ
ܘܠܲܝܬ̣ ܡܹܐܟ̣ܘܠܬܝܼ ܒܸܨܪܵܐ ܕܥܸܖ̈ܒܹܐ ܩܸܠܝܵܐ ܓܵܘ ܐܹܠܝܼܬ̣ܵܐ
ܘܠܵܐ ܓܘܼܒܬܵܐ ܚܘܵܪܬܵܐ ܡܛܘܿܡܸܪܬܵܐ ܓܵܘ ܓ̰ܘܼܒ̣ܝܼܬ̣ܐܵ
ܚܕܵܐ ܩܵܝܸܡܬܐ̣ܵ ܙܥܘܼܪܬܵܐ ܕܡܵܪܝܼ ܐܵܫܘܿܪ ܠܐܵܩܠܵܗ̇ ܟܠܝܼܬ̣ܵܐ
ܒܝܲܕ ܦܵܚܵܪܵܐ ܓܒ̣ܝܼܠܬܵܐ ܡ̣ܢ ܛܝܼܢܵܐ ܒܢܘܼܪܵܐ ܩܠܝܼܬ̣ܵܐ
ܠܐܲܠܦܹ̈ܐ ܕܫܸ̈ܢܹܐ ܕܠܵܐ ܡܲܡܠܠܵܐ ܘܩܵܠܵܐ ܫܬܝܼܩܬܵܐ ܫܠܝܼܬ̣ܵܐ
 ܠܡܲܠܟܹ̈ܐ ܘܟܲܗܢܹ̈ܐ ܘܲܡܗܲܝܡܢܹ̈ܐ ܝܼܠܵܗ̇ ܪܸܡܙܵܐ ܕܬܵܘܕܝܼܬ̣ܵܐ
ܣܓ̣ܝܼܕܵܐ ܩܲܕ̄ܡܵܗ ܐܲܝܟ̣ ܡܗܲܝܡܢܵܐ ܕܬܲܡܸܡ ܥܲܠ ܘܵܠܝܼܬ̣ܵܐ
ܡܨܲܠܘܼܝܹ̈ܐ ܨܠܘܿܬ̣ܝܼ ܘܡܲܩܪܘܿܒ̣ܹܐ ܒܥܵܘܼܬ̣ܝܼ ܓܵܘ ܡܲܪܡܝܼܬ̣ܵܐ
ܛܠܵܒܵܐ ܦܘܼܚܵܠܵܐ ܩܵܘܡܵܐ ܕܲܥܒ̣ܝܼܕܵܐ ܝܗ̄ܘܹܝܢ ܪܲܒܵܐ ܚܛܝܼܬ̣ܵܐ
ܝܵܐ ܡܵܪܝܼ ܘܡܲܠܟܝܼ ܩܵܐ ܡܘܼܕܝܼ ܥܲܠܝܼ ܕܝܲܢܬܘܼܟ̣ ܩܫܝܼܬܵܐ
ܟܲܘ̄ܟ̣ܲܒ̣ܬ̣ܝܼ ܒܲܗܪܵܢܬܵܐ ܓܵܘ ܪܩܝܼܥܵܐ ܕܚܲܝܝܼ ܠܓܢܵܝܵܐ ܣܛܝܼܬ̣ܵܐ
ܐܵܬ̣ܘܼܬ̣ܵܐ ܠܨܲܕܪܝܼ ܒܝܵܘܡܵܐ ܕܡܘܼܠܵܕܝܼ ܡ̣ܢ ܫܡܲܝܵܐ ܨܠܝܼܬ̣ܵܐ
ܒܟܲܗ̈ܢܹܐ ܘܩܲܨܘܿܡܹ̈ܐ ܕܵܐܟ̣ܝܼ ܒܚܸܠܛܵܐ ܦܝܼܫܠܵܗ̇ ܩܪܝܼܬ̣ܵܐ؟
ܡ̣ܢ ܚܲܫܵܐ ܘܟܲܪܒܵܐ ܦܲܓ̣ܪܝܼ ܛܒ̣ܝܼܚܵܐ ܘܪܘܼܚܝܼ ܒܠܝܼܬ̣ܵܐ
 ܪܸܚܩܵܐ ܡ̣ܢ ܒܢ̈ܘܿܢܝܼ ܘܐ̄ܚܘܿܢܝܼ ܘܚܵܬ̣ܵܐ ܘܝܸܡܝܼ ܚܠܝܼܬ̣ܵܐ
ܐܵܦ ܡܘܼܚܸܒܬܝܼ ܥܪܝܼܩܬܵܐ ܪܚܝܼܩܬܵܐ ܘܬܠܝܼܩܬܵܐ ܘܛܫܝܼܬ̣ܵܐ
ܠܸܒܝܼ ܚܪܝܼܟ̣ܵܐ ܡ̣ܢ ܡܲܚܢܵܝܬܵܐ ܘܥܲܝܢܝܼ ܡ̣ܢ ܒܸܟ̣ܝܵܐ ܣܡܝܼܬܐ̣ܵ   
ܢܲܦ̮ܫܝܼ ܠܲܚܙܵܝܬܵܝܗ̈ܝ ܐܵܦ ܐܸܢ ܒܚܸܠܡܵܐ ܪܵܒ̈ـܵܐ ܨܗܝܼܬ̣ܵܐ
 ܣܲܝܦܝܼ ܘܪܘܼܡܚܝܼ ܕܲܫܢܵܐ ܦܝܵܫܵܐ ܡ̣ܢ ܒܵܒܝܼ ܡܲܠܟܵܐ ܕܲܒܪܝܼܬ̣ܵܐ
ܟ̰ܲܟܝܼ ܕܲܩܪܵܒ̣ܵܐ ܡܬܘܼܪܨܹ̈ܐ ܟܠܲܝܗܝ ܡ̣ܢ ܦܲܪܙܠܵܐ ܐܵܦ ܟܘܿܣܝܼܬ̣ܵܐ
ܒܝܲܕ ܩܲܪܕܵܚܵܐ ܣܵܒ̣ܵܐ ܡܗܝܼܪܵܐ ܘܲܡܫܲܡܗܵܐ ܒܟܠܵܗ̇ ܩܪܝܼܬ̣ܵܐ
ܫܸܡܝܼ ܥܲܠܲܝܗܝ ܚܪܝܼܛܵܐ ܒܣܸܪܛܵܐ ܕܨܸܨܹ̈ܐ ܩܵܐ ܬܲܚܘܝܼܬ̣ܵܐ
 ܚܲܪܒܝܼ ܨܒ̣ܝܼܥܬܵܐ ܒܕܸܡܵܐ ܣܡܘܿܩܵܐ ܘܚܲܪܝܼܦܘܼܬܵܗ ܟܠܵܗ̇ ܩܗܝܼܬ̣ܵܐ
 ܦܲܝܫܝܼ ܡܚܘܿܡܝܹܐ ܥܲܡܝܼ ܐܵܦ ܐܸܢ ܗܵܘܹܝܢ ܡܝܼܬ̣ܵܐ 
ܦܲܝܫܝܼ ܠܲܕܟ̣ܵܪܵܐ ܡ̣ܢ ܕܐܵܢ̈ܝܼ ܩܪܵܒܹ̣̈ܐ ܩܵܐ ܬܲܫܥܝܼܬ̣ܵܐ
ܠܒ̣ܝܼܫܬܝܼ ܓܲܝܣܵܝܬܵܐ ܡ̣ܢ ܕܸܡܵܐ ܘܕܸܥܬ̣ܵܐ ܕܦܲܓ̣ܪܝܼ ܬܪܝܼܬ̣ܵܐ
ܟܘܿܣܝܼ ܚܘܝܼܪܵܐ ܓܕܝܼܠܵܐ ܥܲܠ ܪܲܦ̮ܫܵܢ̈ܝܼ ܐܲܝܟ̣ ܨܘܼܨܝܼܬ̣ܵܐ
ܕܲܖ̈ܒܝܼ ܨܠܝܼܦܵܐ ܒܓܹܐܪܵܐ ܣܲܡܡܵܢܵܐ ܘܚܲܪܒܵܐ ܠܟܲܒ̣ܕܝܼ ܟܘܝܼܬ̣ܵܐ
ܕܸܦܢܝܼ ܕܣܲܡܵܠܵܐ ܒܪܘܼܡܚܵܐ ܕܕܲܪܩܘܼܒ̣ܠܵܝܵܐ ܒܥܘܼܡܩܵܐ ܡܚܝܼܬܵܐ̣
ܠܲܝܬ ܐܵܣܝܵܐ ܕܲܡܒܲܣܸܡ ܠܕܸܦܢܝܼ ܒܫܘܼܠܗܵܒ̣ܵܐ ܛܦܝܼܬ̣ܵܐ
ܕܪܵܥܢܝܼ ܡ̣ܢ ܚܲܝܠܵܐ ܕܡܲܪܥܵܐ ܫܦܝܼܠܵܐ ܘܐܝܼܕܝܼ ܫܢܝܼܬ̣ܵܐ
ܒܲܐܬ̣ܪܵܐ ܕܐܵܫܘܿܪ ܦܠܵܫܵܐ ܠܒ̣ܝܼܚܵܐ ܓܵܘ ܟܠ ܦܢܝܼܬ̣ܵܐ
 ܪܲܒ ܓܲܝܣܵܐ ܐܲܚܟ̰ܝܼ ܡܓܲܫܘܿܩܹ̈ܐ ܠܐܲܝܵܐ ܨܘܼܪܬܵܐ ܣܪܝܼܬ̣ܵܐ
ܐܵܚܘܿܢܝܼ ܘܚܲܒ̣ܪܝܼ ܚܕܝܼܪܠܹܗ ܕܲܪܩܘܼܒ̣ܠܝܼ ܒܥܸܕܵܢܵܐ ܟܪܝܼܬ̣ܵܐ
ܡܸܛܝܵܐ ܠܣܸܦܬ̣ܵܐ ܕܩܲܒ̣ܪܵܐ ܣܦܵܪܵܐ ܠܡܵܘܬ̣ܵܐ ܥܸܕܵܢܝܼ ܡܛܝܼܬ̣ܵܐ
ܓܵܪܸܓ ܫܲܩܠܸܢ ܩܲܢܝܵܐ ܘܚܲܕ̄ܟܡܵܐ ܛܲܖ̈ܦܹܐ ܡ̣ܢ ܦܸܢܩܝܼܬ̣ܵܐ
ܟܲܬܒ̣ܸܢ ܟܡܵܐ ܕܐܝܼܬ̣ ܦܝܵܫܵܐ ܕܝܘܼܬ̣ܵܐ ܓܵܘ ܙܓ̣ܘܿܓ̣ܝܼܬ̣ܵܐ
ܫܲܪܝܼܪܵܐܝܼܬ̣ ܘܠܵܐ ܐܲܝܟ̣ ܕܦܲܝܫܵܐ ܟܬ̣ܝܼܒ̣ܬܵܐ ܫܘܿܥܝܼܬ̣ܵܐ
ܐܸܠܵܐ ܐܲܝܟ̣ ܣܵܗܵܕܵܐ ܠܡܸܢܕܝܼ ܕܥܲܝܢܝܼ ܦܝܼܫܠܵܗ̇ ܚܙܝܼܬ̣ܵܐ
 ܒܫܸܡܵܐ ܕܡܵܪܝܼ ܐܵܫܘܿܪ ܒܕܸܡܵܐ ܕܣܲܗ̈ܕܹܐ ܒܝܵܡܸܢ ܡܘܿܡܝܼܬ̣ܐܵ
ܠܩܵܪܘܿܝܵܐ ܡܲܡܛܸܢ ܚܲܒܪܵܐ ܨܝܼܚܵܐ ܘܡܲܚܙܸܢ ܠܨܘܼܪܬܵܐ ܨܦܝܼܬ̣ܵܐ
ܐ̄ܚܲܪܬܵܐ ܫܒ̣ܘܿܩ ܡܲܝܬ̣ܸܢ ܐܝܼܢܵܐ ܪܘܼܚܝܼ ܒܸܕ ܗܵܘܝܵܐ ܚܕܝܼܬ̣ܵܐ
ܐܵܢܵܐ ܗ̄ܘܹܝܢ .... ܣܦܘܼܪܘܿ ܠܲܢ ܓܵܘ ܡܫܘܼܚܬܵܐ ܒ
ܟ̣ܵܡܝܼܣ ܓܝܼܘܲܪܓܝܼܣ

تنويه

الى الاخوة القراء الاعزاء الذين تظهر لديهم كتابتنا بالخط الاسطنرجيلي   او قد لا تظهر لديهم اطلاقا يرجى الاستعانة بالرابط  ادناه لتحميل وتثبيت الخطوط لتسهل لكم قرائته بالخط الاصلي الذي كتب به او اي خط تفضلونه.

مع  تحياتي
 
http://www.bethmardutho.org/index.php/resources/fonts.html


ܡܲܢܗܵܪܬܵܐ

ܩܐܵ ܐܲܚܘܼܢܘܵܬܸ̈ܢ ܩܵܖ̈ܘܼܝܹܐ ܡܝܲܩܖܹ̈ܐ ܐܵܢ̈ܝܼ ܕܦܝܵܫܵܐ ܚܙܝܼܬ̣ܵܐ ܠܘܵܬ̣ܲܝ̈ܗܝ ܟܬ̣ܝܼܒ̣ܬܸܢ ܒܣܸܪܛܵܐ ܐܸܣܛܪܲܢܓܹܝܠܵܝܵܐ ܝܵܢ ܠܹܐ ܝܠܵܗ̇ ܡܲܒܝܘܿܢܹܐ ܣܵܟ̣ (ܒܲܚܕܵܐ ܓܵܗܵܐ) ܛܠܘܼܒܘܿܢ (ܒ̈ܥܵܘ) ܠܲܡܥܲܕܪܵܢܘܼܬ̣ܵܐ ܒܐܲܣܵܪܵܐ ܕܲܠܬܲܚܬ̈ ܠܡܲܛܥܵܢܬܵܐ ܘܲܢܨܲܒ̣ܬܵܐ ܕܣܸܖ̈ܛܹܐ ܩܵܐ ܕܦܲܫܩܵܐ ܠܟ̣ܘܼܢ ܩܪܵܝܬ̣ܵܗ̇ ܒܣܸܪܛܵܐ ܐܵܨܠܵܝܵܐ ܗܵܘ̇ ܕܦܝܼܫܠܹܗ ܟܬ̣ܝܼܒ̣ܵܐ ܒܹܗ ܝܵܢ ܒܟܠ ܣܸܪܛܵܐ ܕܡܲܛܐ̄ܒ̣ܝܼܬܘܼܢ ܠܹܗ.
ܥܲܡ ܐܝܼܩܵܪܝܼ
 

http://www.bethmardutho.org/index.php/resources/fonts.html

34

نتاجات بالسريانية / رد: ܕܩܠܬ̣ ܘܦܪܬ ܢܗܖ̈ܘܬ̣ܐ ܕܚܝ̈ܐ دجلة والفرات انهار الحياة

« في: 08:14 21/08/2013  »

تنويه

الى الاخوة القراء الاعزاء الذين تظهر لديهم كتابتنا بالخط الاسطرنجيلي  او قد لا تظهر لديهم اطلاقا يرجى الاستعانة بالرابط  ادناه لتحميل وتثبيت الخطوط لتسهل لكم قرائته بالخط الاصلي الذي كتب به او اي خط تفضلونه.

مع  تحياتي

http://www.bethmardutho.org/index.php/resources/fonts.html

ܡܢܗܪܬܐ

[/size][/font]

ܩܐܵ ܐܲܚܘܼܢܘܵܬܸ̈ܢ ܩܵܖ̈ܘܼܝܹܐ ܡܝܲܩܖܹ̈ܐ ܐܵܢ̈ܝܼ ܕܦܝܵܫܵܐ ܚܙܝܼܬ̣ܵܐ ܠܘܵܬ̣ܲܝ̈ܗܝ ܟܬ̣ܝܼܒ̣ܬܸܢ ܒܣܸܪܛܵܐ ܐܸܣܛܪܲܓܹܝܠܵܝܵܐ ܝܵܢ ܠܹܐ ܝܠܵܗ̇ ܡܲܒܝܘܿܢܹܐ ܣܵܟ̣ (ܒܲܚܕܵܐ ܓܵܗܵܐ) ܛܠܘܼܒܘܿܢ (ܒ̈ܥܵܘ) ܠܲܡܥܲܕܪܵܢܘܼܬ̣ܵܐ ܒܐܲܣܵܪܵܐ ܕܲܠܬܲܚܬ̈ ܠܡܲܛܥܵܢܬܵܐ ܘܲܢܨܲܒ̣ܬܵܐ ܕܣܸܖ̈ܛܹܐ ܩܵܐ ܕܦܲܫܩܵܐ ܠܟ̣ܘܼܢ ܩܪܵܝܬ̣ܵܗ̇ ܒܣܸܪܛܵܐ ܐܵܨܠܵܝܵܐ ܗܵܘ̇ ܕܦܝܼܫܠܹܗ ܟܬ̣ܝܼܒ̣ܵܐ ܒܹܗ ܝܵܢ ܒܟܠ ܣܸܪܛܵܐ ܕܡܲܛܐ̄ܒ̣ܝܼܬܘܼܢ ܠܹܗ.

ܥܲܡ ܐܝܼܩܵܪܝܼ.
 
http://www.bethmardutho.org/index.php/resources/fonts.html

35

نتاجات بالسريانية / رد: ܕܩܠܬ̣ ܘܦܪܬ ܢܗܖ̈ܘܬ̣ܐ ܕܚܝ̈ܐ دجلة والفرات انهار الحياة

« في: 08:10 21/08/2013  »

ܬܘܕܝ ܘܒܣܝܡܐ ܪܒܝ ܩܫܘ

ܚܝܐ ܐܘܡܬܐ ܐܫܘܪܝܬܐ


ܡܝܩܪܢܘܟ̣

ܟ̣ܡܝܣ ܓܝܘܪܓܝܣ

36

نتاجات بالسريانية / ܕܩܠܬ̣ ܘܦܪܬ ܢܗܖ̈ܘܬ̣ܐ ܕܚܝ̈ܐ دجلة والفرات انهار الحياة

« في: 06:25 17/08/2013  »

ܕܩܠܬ̣ ܘܦܪܬ ܢܗܖ̈ܘܬ̣ܐ ܕܚܝ̈ܐ

ܓܵܘ ܡܲܕܢ̱ܚܵܐ ܓܵܘ ܚܕܵܐ ܐܲܪܥܵܐ ܕܢܲܗ̈ܪܵܘܵܬ̣ܵܐ
ܐܝܼܬ ܬܪܝܹܢ ܢܲܗ̈ܪܹܐ ܙܲܚ̈ܡܹܐ ܬܐܵܡܹ̈ܐ ܐܲܚ̈ܘܼܢܘܵܬ̣ܵܐ
ܡܢ݂ ܛܘܼܪܵܢܹ̈ܐ ܕܛܘܿܪܘܼܣ ܢܒ̣ܵܥܵܐ ܘܓ̰ܪܵܝܵܐ ܠܨܘܼܒ ܕܲܫ̈ܝܵܬ̣ܐܵ
ܒܫܲܘܝܵܐ ܟܝܵܦܵܐ ܥܲܡ ܐܸܚ̈ܕܵܕܹܐ ܒܬܲܪܬܹܝܢ̄ ܐܘܼܪܚܵܬܐ̣ܵ
ܓ̰ܘܵܓ̰ܬܐܵ ܕܚܸܘܵܘܹ̈ܐ ܒܸܕܡܵܝܵܐ ܝܠܲܝܗܝ ܓܵܘ ܦܬܲܠܝܵܬܐ̣ܵ
ܡܝܼܝܲܗ̈ܝ ܚܸ̈ܠܝܹܐ ܡܩܘܼܕܫܹ̈ܐ ܒܡܵܪܵܐ ܕܡܵܪܵܘܵܬ̣ܵܐ
ܡܕܲܟ̣ܝܼ ܠܦܓ̣ܪܵܐ ܘܪܘܼܚܵܐ ܡ̣ܢ ܟܠ ܡܲܪܥܵܐ ܘܲܚ̈ܛܝܼܵܬ̣ܵܐ
ܒܗܲܝܡܵܢܘܼܬ̣ܐܵ ܘܛܲܟ̣ܣ̈ܐ ܕܚܲܕ̄ܟܡܵܐ ܡ̣ܢ ܬܵܘ̈ܕܝܼܵܬ̣ܐ
ܒܝܲܕ ܡܚܲܠܸܠܬܐܵ ܘܥܡܵܕܵܐ ܡܩܲܕܫܵܐ ܘܲܬܝܵܒ̣ܘܼܬ̣ܵܐ
 ܫܸܡܲܝܗܝ ܕܟ̣ܝܼܪܵܐ ܓܵܘ ܣܘܿܓ̣̈ܝܵܬ̣ܵܐ ܘܓܵܘ ܥܘܿܢ̈ܝܵܬܵܐ̣
ܒܥܲܡܵܐ ܘܟܲܗܢܹ̈ܐ ܒܗܲܝܟܠܹ̈ܐ ܘܥܘܼܡܖܹ̈ܐ ܓܵܘ ܨܠܵܘܵܬ̣ܵܐ
ܫܸܡܲܝܗܝ ܢܩܝܼܪܵܐ ܘܟܬ̣ܝܼܒ̣ܵܐ ܒܲܟܬܵܒܹ̈ܐ ܕܒܪܝܼܬܵܐ̣
ܒܬܸܪܘܲܝܗܝ ܢܘܼܣܚܹ̈ܐ ܓܵܘ ܐܝܼܢܘܼܡܵܐ ܘܐܵܦ ܐܵܘܪܵܝܬܵܐ̣
ܠܘܼܚܹ̈ܐ ܕܛܝܼܢܵܐ ܘܐܵܦ ܘܵܪܵܩܵܐ ܗܲܠܵܐ ܦܝܵܫܵܐ ܩܵܐ ܣܲܗܕܘܼܬ̣ܵܐ
ܢܲܗܪܵܐ ܕܸܩܠܲܬ̣ ܓ̰ܪܵܝܵܐ ܥܲܠ ܡܲܕ̱ܢܚܵܐ ܕܐܵܫܘܿܪ ܡܕܝܼܢ̄ܬܐ̣ܵ
ܘܢܝܼܢܘܸܐ ܓܘܼܒ̣ܪܬܵܐ ܐܵܪܸܫܟ̣ܵܝܬܵܐ ܠܡܲܪܙܹܗ ܒܢܝܼܬ̣ܵܐ
ܢܲܗܪܵܐ ܕܦܪܵܬ ܗܵܘ ܡܘܿܚܸܒܵܐ ܕܒܵܒ̣ܹܠ ܡܕܝܼܢ̄ܬܵܐ ܐܵܫܘܿܪܵܝܬܐ̣ܵ
ܕܸܩܠܲܬ ܘܦܪܵܬ ܡܲܫ̈ܬܝܵܢܹܐ ܕܲܥܕܸܢ ܐܲܪܥܵܐ ܘܓܲܢܬܐ̣ܵ
ܠܐܲܠܦܹ̈ܐ ܕܫܸܢܹ̈ܐ ܗ̄ܘ̈ܝܼܹܐ ܐܘܼܪܚܵܐ ܕܬܲܓܵܪܘܼܬ̣ܵܐ
ܘܨܲܝܕܵܐ ܕܢܘܼܢܹ̈ܐ ܩܵܐ ܡܹܐܟ̣ܘܼܠܬܐܵ ܕܒܲܪܢܵܫܘܼܬ̣ܵܐ
ܥܠܲܝ̈ܗܝ ܕܟ̣ܝܼܠܬܵܐ ܘܣܝܼܢܩܬܵܐ ܙܪܘܼܥܬܵܐ ܘܐܲܟܵܪܘܼܬ̣ܵܐ
 ܠܐܲܬ̣ܪܵܐ ܕܐܵܫܘܿܪ ܦܝܼܫܠܗ̄ܘܿܢ ܬܚ̈ܘܼܡܹܐ ܕܢܵܛܘܼܪܘܬ̣ܵܐ
ܘܓܲܪܝ̈ܗܝ ܓܘܼܒ̣ܪܵܐ ܓܵܘ ܡܬܲܪܵܨܬܵܐ ܕܲܡܕܝܼܢܵܝܘܼܬ̣ܵܐ
ܠܐܲܠܦܹ̈ܐ ܕܫܢܹ̈ܐ ܢܒ̣ܵܥܵܐ ܘܓ̰ܪܵܝܵܐ ܒܟܠ ܚܹܐܪܘܼܬ̣ܵܐ
ܓܵܗܹ̈ܐ ܒܫܲܝܢܵܐ ܘܫܠܵܡܵܐ ܫܬܝܼܩܹ̈ܐ ܐܲܝܟ̣ ܝܘܵܢܵܬܐ̣ܵ
ܘܓܵܗܹ̈ܐ ܫܓ̣ܝܫܹ̈ܐ ܟܪܝܼܒܹ̈ܐ ܢܗܵܡܵܐ ܐܲܝܟ̣ ܐܲܖ̈ܝܵܘܵܬ̣ܵܐ
ܒܟܠ ܪܸܦܵܦܵܐ ܒܐܲܠܦܹ̈ܐ ܕܠܝܼܬ̈ܪܹܐ ܕܡܲܝ̈ܵܐ ܪܦܵܬ̣ܐܵ
ܚܦܵܩܵܐ ܙܵܒ̣ܹ̈ܐ ܘܥܲܡ ܚܵܒ̣̈ܘܖܹ̈ܐ ܘܐܵܦ ܫܵܩ̈ܝܵܬܐ̣ܵ
ܘܡܲ̈ܝܼܵܐ ܕܬܵܠܓܵܐ ܘܥܲܡ ܥܲܝܢܵܬܐܵ ܘܐܵܦ ܡܸ̈ܛܪܵܬ̣ܵܐ
ܟ̰ܠܵܦܵܐ ܠܛ̈ܘܼܪܹܐ ܥܲܡ ܐܝܼ̈ܣܵܪܹܐ ܘܪܵܓ̣̄ܘܼܠܝܵܬ̣ܵܐ
ܒܪܵܝܵܐ ܡܸܠܝܹ̈ܐ ܐܵܦ ܛ̈ܘܿܦܵܢܵܐ ܓܵܘ ܡܕܝܼ̈ܢܵܬܐ̣ܵ
ܫܡܵܛܵܐ ܓܸܫ̈ܪܹܐ ܬܠܵܚܵܐ ܫܘܼܖܹ̈ܐ ܐܵܦ ܩܵܠ̈ܥܵܬܐ̣ܵ
ܠܵܐ ܚܲܫܒ̣ܝܼܬܘܼܢ ܕܝܼܠܵܗ ܨܦܵܚܬܵܐ ܕܡܸܬ̣ܢܵܩܡܵܢܘܬ̣ܵܐ
ܘܠܵܐ ܡܘܼܪܵܝܵܐ ܕܲܩܪܵܡܬܵܐ ܝܵܢ ܡܲܩܪܵܡܬܵܐ ܘܐܵܢܵܝܘܼܬ̣ܵܐ
ܘܠܵܐ ܢܝܼܫܵܢܩܵܐ ܕܲܩܪܵܒ̣ܐ ܘܚܣܵܡܐ ܕܒܸܥܠܕܒ̣ܵܒ̣ܘܼܬ̣ܵܐ
ܐܵܗܵܐ ܝܠܵܗ ܐܘܼܪܚܵܐ ܕܟܝܵܢܵܐ ܒܟܠ ܦܸܢܝܵܬ̣ܐܵ
ܓܵܘ ܫܘܼܚܠܵܦܵܐ ܕܐܲܩܡܵܐ ܕܟܝܵܢܵܐ ܥܲܡ ܚܲܝܘܼܬ̣ܵܐ
ܒܐ̄ܚܵܪܬܵܐ ܡܙܵܓ̣ܵܐ ܘܚܒ̣ܵܛܵܐ ܥܲܡ ܐܸܚܕܵܕܹܐ ܓܵܘ ܝܵ̈ܡܵܬ̣ܵܐ
ܐܲܝܟ̣ ܥܝܵܕܵܐ ܕܟܝܵܢܵܐ ܐܲܡܝܼܢܵܐܝܼܬ̣ ܓܵܘ ܚ̈ܘܼܕܵܬ̣ܵܐ
ܡ̣ܢ ܩܲܕ̄ܡ ܡܫܲܪܵܝܬܵܐ ܕܲܒܢܲܝܬܵܐ ܕܟܠ ܬܲܪܡܝܼܬ̣ܵܐ
ܫܲܩܠܸܚ ܛܘܼܦ̮ܣܵܐ ܘܐܵܦ ܢܸܣܝܵܢܵܐ ܘܚܲܟܝܼܡܘܼܬ̣ܵܐ
ܡ̣ܢ ܙܝܵܢܵܐ ܕܲܡܩܲܘܸܡ ܥܲܡ ܚܘܼܙܕܵܓܵܐ ܒܐܲܬ̣̈ܪܵܘܵܬ̣ܵܐ
 ܒܗܸܢܕܘܼ ܘܟ̰ܵܝܢܵܐ ܘܐܵܦ ܒܐܲܖ̈ܥܵܬ̣ܵܐ ܕܲܫܒ̣ܵܒ̣ܘܼܬ̣ܵܐ
ܡܝܲܩܪܸܚ ܠܟܝܵܢܵܐ ܘܝܲܠܦܸܚ ܡܸܢܹܗ ܒܟܠ ܥ̄ܕܵܢܵܬ̣ܵܐ

ܟ̣ܵܡܝܼܣ ܓܝܼܘܲܪܓܝܼܣ

37

نتاجات بالسريانية / رد: 7 ܐܒ ܝܘܡܐ ܕܣܗܕܐ ܐܫܘܪܝܐ

« في: 09:05 15/08/2013  »

ܡܝܩܪܐ ܪܒܝ ܩܫܘ ܐܒܪܗܡ

ܫܠܡܐ ܘܐܝܩܪܐ

ܬܘܕܝ ܪܒܝ ܩܫܘ، ܘܗܘܝܬ ܐܢ̄ܬ ܒܣܝܡܐ ܩܐ ܬܪܓܡܬܐ ܘܦܪܣܬܐ ܠܐܡܝ̈ܐ ܕܛܒ̈ܐ ܘܟܫܝܖ̈ܘܬܐ ܕܥܕܬܐ ܕܡܕ̱ܢܚܐ ܕܐܬܘܖ̈ܝܐ ܓܘ ܬܒ̣ܝܠ ܘܓܒ̈ܐ ܘܫܘܬܐܣ̈ܐ ܐܘܡܬܢܝ̈ܐ ܐܫܘܖ̈ܝܐ، ܘܣܢܕܬܐ ܕܠܫܢ ܘܟܬܘܒ̣ܝ̈ܢ ܐܘܡܬܢܝ̈ܐ ܐܫܘܖ̈ܝܐ ܕܒܟܬܒ̣ܐ ܝܠܝܗܝ ܒܠܫܢܢ ܘܒܠܫܢ̈ܐ ܐ̄ܚܖ̈ܢܐ ܓܘ ܕܐܗܐ ܫܘܦܐ ܕܥܢܟܒ̣ܐ ܫܒ̣ܘܩ ܡ̣ܢ ܡܠܘܐ̈ܐ ܐ̄ܚܖ̈ܢܐ ܕܟܬܝܒ̣ܠܘܟ̣، ܦܘܠܚܢܘܟ̣ ܐܗܐ ܡܙܒܘܛܐ ܝܠܗ ܩܐ ܚܘܒܘܟ̣ ܥܕܬܘܟ̣ ܘܐܘܡܬܘܟ̣. ܙܠ ܠܩܕ̄ܡܐ ܒܐܗܐ ܫܘܓ̣̄ܠܐ ܐܘܡܬܢܝܐ ܛܒ̣ܐ.

ܥܡ ܐܝܩܪܐ

ܡܝܩܪܢܘܟ̣
ܟ̣ܡܝܣ ܓܝܘܪܓܝܣ
ܡܠܒܘܪܢ

38

نتاجات بالسريانية / رد: ملوا

« في: 05:31 12/08/2013  »

ܡܝܲܩܪܵܐ ܪܵܒܝܼ ܐܝܼܒ̣ܵܢ ܓ̰ܵܢܝܼ
ܫܠܵܡܵܐ ܘܐܝܼܩܵܪܵܐ

ܬܵܘܕܝܼ ܠܐܵܗܵܐ ܡܹܐܡܪܵܐ ܡܵܪܹܐ ܝܘܼܬܪܵܢܵܐ ܡ̣ܢ ܪܵܒܵܐ ܓܸܒܵܢܸ̈ܐ ܘܡܸܠܝܵܐ ܡܢ݂ ܫܘܼ̈ܐܵܠܸܐ ܘܦܘܼܫܵܩܹ̈ܐ ܘܖܸ̈ܢܝܹܐ ܒܘܼܕ ܝܘܼܠܦܵܢܵܐ ܘܗܲܝܡܵܢܘܼܬܵܐ ܘܟܹܐܢܘܼܬ̣ܵܐ ܘܙܸܕܩܹ̈ܐ ܐ̄ܢܵܫܵܝܹ̈ܐ ܘܐܘܼܡ̈ܬܵܢܵܝܹܐ، ܘܩܵܢܘܼܢܹ̈ܐ ܡܢܲܘܡܸܣܹܐ ܒܬܵܘܕܝܼܵܬ݂̈ܐ ܦܖ̈ܝܼܫܹܐ ܠܡܲܓ̰ܘܲܓ̰ܬܵܐ ܕܚܲܝܘܼܬܵܐ ܕܒܲܪܢܵܫܵܐ ܓܵܘ ܡܫܲܪܵܝܬܹܗ ܘܕܦܝܼܫܠܗ̄ܘܿܢ ܚܲܕ̄ܟܡܵܐ ܡܸܢܲܝܗܝ ܒܸܚܟܵܡܵܐ ܗܲܠ ܐܸܕܝܘܿܡ ܘܡܘܼܥܒ̣ܸܪܹܐ ܘܡܢܲܘܡܸܣܹܐ ܓܵܘ ܩܵܢܘܼܢܹ̈ܐ ܫܲܬܐܸܣܵܝܹ̈ܐ ܘܛܲܟ̣ܣܹ̈ܐ ܕܪܵܒܵܐ ܐܲܬ̣ܪܵܘܵܬ̣ܵܐ ܕܒܸܚܟܵܡܵܐ ܝܠܵܗ̇ ܬܵܘܕܝܼܬ̣ܵܐ ܥܲܠܲܝܗܝ ܘܐܵܦ ܐܵܢ̈ܝܼ ܐܲܬ̈ܪܵܘܵܬ̣ܵܐ ܐ̄ܚܖܹ̈ܢܹܐ ܕܒܸܩܪܵܝܵܐ ܝܠܲܝܗܝ ܓܵܢܲܝܗܝ ܕܝܼܡܘܩܪܵܛܵܝܹ̈ܐ ܘܥܵܠܡܵܝܹ̈ܐ ܘܦܪܝܼܫܵܐܝܬܼ ܓܵܘ ܡܲܕ̱ܢܚܵܐ ܡܸܨܥܵܝܵܐ، ܐܲܢܹ̈ܐ ܩܵܢ̈ܘܼܢܹܐ ܩܸܫ̈ܝܹܐ ܘܛܵܠܘܿܡ̈ܐ ܩܵܐ ܒܲܪܢܵܫܘܼܬܵܐ ܟܠܵܢܵܐܝܬ̣.

ܐܲܝܟ̣ ܕܟܠܢ ܝܲܕܥܸܚ ܝܘܼܠܦܵܢܵܐ ܝܠܹܗ ܡܲܒܘܿܥܵܐ ܕܝܼܕܲܥܬܵܐ ܘܒܚܒ̣ܵܫܵܐ ܝܠܹܗ ܪܵܒܵܐ ܚܲܩ̈ܠܹܐ ܘܡܲܙܒܘܿܛܹܐ ܝܠܹܗ ܩܵܐ ܕܐܵܦ ܟܝܵܢܵܐ ܐܝܼܬ ܠܹܗ ܩܵܢܘܼܢܹ̈ܐ ܕܓܵܢܸܗ ܘܚܲܕ̄ ܡܸܢܲܝܗܝ ܝܠܹܗ ܫܲܘܝܘܬ̣ܵܐ (ܡ̣ܢ ܟܠ ܐܲܝܟܵܐ ܕܒܸܐܬܵܝܵܐ ܝܠܵܗ) ܗܵܝ̇ ܕܲܡܚܵܡܘܿܝܹܐ ܝܠܵܗ̇ ܘܒܸܢܛܵܪܵܐ ܠܐܝܼܬܘܼܬܹܗ ܡ̣ܢ ܢܦܲܠܬܵܐ ܘܚܪܵܒ̣ܬܵܐ ܘܐܗܵܐ ܫܲܘܝܘܼܬ̣ܵܐ ܕܒܲܥ̄ܝܵܐ ܠܵܗ ܘܲܣܢܝܼܩܬܵܐ ܝܠܵܗ ܥܲܠܵܗ̇ ܒܲܪܢܵܫܘܼܬܵܐ ܡ̣ܢ ܚܹܐܪܘܼܬܵܐ ܘܟܹܐܢܘܼܬܵܐ ܘܙܸܕܩܹ̈ܐ ܕܚܲܝܘܼܬܵܐ ܕܒܲܪܢܵܫܵܐ ܘܫܲܪܟܵܐ ... ܠܹܐ ܝܠܵܗ̇ ܓܡܝܼܪܬܵܐ ܓܵܘ ܩܵܢ̈ܘܼܢܹܐ ܕܬܵܘ̈ܕܝܼܵܬܵܐ ܘܠܹܐ ܝܠܵܗ ܒܸܥܪܵܒ̣ܵܐ ܠܙܸܕܩ̈ܐ ܕܒܲܪܢܵܫܵܐ ܓܵܘ ܚܲܝܘܼܬܵܐ ܒܐܵܗܵܐ ܥܵܠܡܵܐ ܘܗܲܕܟ̣ܵܐ ܐܵܦ ܟܹܐܢܘܼܬܵܐ ܕܥܵܠܡܵܝܘܼܬܵܐ ܗܲܠܵܐ ܠܹܐ ܝܠܵܗ ܓܡܝܼܪܬܵܐ ܐܝܼܢܵܐ ܠܹܐ ܐܵܬܝܵܐ ܠܲܣܪܵܒ̣ܐ ܝܼܠܵܗ̇ ܓܵܘ ܡܸܬܛܵܘܪܵܢܘܼܬܵܐ ܝܵܘܡܵܐܝܼܬ̣ ܘܲܦܪܝܼܫܵܐܝܼܬ̣ ܓܵܘ ܡܲܥܪܒ̣ܵܐ(ܐܸܢ ܥܲܒ̣ܕܸܚ ܡܦܲܚܡܘܼܬܵܐ ܒܹܝܢ ܡܲܕ̱ܢܚܵܐ ܘܒܹܝܢ ܡܲܥܪܒ̣ܵܐ). ܘܐܸܢ ܟܠ ܐܝܼܬ̣ܝܵܐ ܟܝܵܢܵܝܵܐ ܐܝܼܬܠܹܗ ܐܘܼܖ̈ܚܵܬܵܐ ܦܖ̈ܝܼܫܹܐ ܠܡܲܩܘܵܝܬܵܐ ܘܢܛܲܪܬܵܐ ܕܢܲܦ̮ܫܹܗ ܡ̣ܢ ܩܸܫܝܘܼܬܵܐ ܕܟܝܵܢܵܐ ܘܐܲܝܟܵܢܵܝܘܬ̣ܵܐ ܕܚܲܕܪܘܵܢܸܗ ܘܲܕܗܵܝ ܕܘܼܟܬ̣ܵܐ ܩܵܐ ܕܡܵܨܹܐ ܕܚܲܝܹܐ ܗܲܠ ܕܐܵܬ̣ܸܐ ܫܘܼܚܠܵܦܵܐ ܘܗܵܘܸܐ ܠܝܘܼܬܪܵܢܸܗ، ܐܵܦ ܒܲܪܢܵܫܵܐ ܕܝܼܠܹܗ ܦܝܼܫܵܐ ܛܠܝܼܡܵܐ ܒܣܵܢܝܵܢܸܗ ܡܛܠ ܩܵܘܡܵܢܵܝܘܼܬܸܗ ܘܬܵܘܕܝܼܬܸܗ ܐܟ̣ܘܵܬ̣ܸܢ ܐܵܫ̈ܘܿܪܵܝܹܐ ܡܫܝܼ̈ܚܵܝܹܐ ܘܵܠܹܐ ܕܲܡܣܲܝܒܪܸܚ ܘܲܡܗܲܝܡܢܸܚ ܩܵܐ ܕܟܹܐܢܘܼܬܵܐ ܘܫܲܘܝܘܼܬܵܐ ܒܸܕ ܐܵܬ̣ܝܵܐ ܐܸܢ ܡ̣ܢ ܒܵܪܘܿܝܵܐ ܝܵܢ ܡ̣ܢ ܒܲܪܢܵܫܵܐ ܐܝܼܢܵܐ ܛܠܝܼܒܬܵܐ ܝܠܵܗ ܦܘܼܠܚܵܢܵܐ ܡܫܵܘܬܦܵܐ ܘܩܸܫܝܵܐ ܘܥܲܠ ܟܠܲܝܗ̈ܝ ܫܲܘ̈ܝܹܐ.

ܥܲܡ ܐܝܼܩܵܪܵܐ

ܐܲܚܘܼܢܘܿܟ̣
ܟ̣ܵܡܝܼܣ ܓܝܼܘܲܪܓܝܼܣ


 

39

نتاجات بالسريانية / رد: 7 ܐܒ ܝܘܡܐ ܕܣܗܕܐ ܐܫܘܪܝܐ

« في: 02:25 07/08/2013  »

ܡܝܩܪܐ ܪܒܝ ܐܕܝ ܒܝܬ̣ ܒܢܝܡܝܢ

ܫܠܡܐ ܘܐܝܩܪܐ

ܬܘܕܝ ܘܒܣܝܡܐ ܪܒܐ ܠܦܘܢܝܘܟ̣ ܥܠ ܐܓܪܬܝ، ܒܚܘܦܛܐ ܘܟܫܝܪܘܬܐ ܕܡܘܠܦܬܐ ܘܦܪܣܬܐ ܘܣܢܕܬܐ ܕܠܫܢܢ ܒܝܕ ܪܒ̈ܐ ܡܢ ܦܪܨܘܦ̈ܐ ܘܫܘܬܐܣ̈ܐ ܐܘܡܬܢܝ̈ܐ ܘܥܕܬܢܝ̈ܐ ܓܘ 100 ܫܢ̈ܐ ܐ̄ܚܪܝ̈ܐ ܒܚܙܝܐ ܗ̄ܘܝܚ ܐܕܝܘܡ ܐܝܬܠܢ ܘܒܙܝܕܐ ܝܠܝܗܝ ܟܬܘ̈ܒ̣ܐ ܒܠܫܢܢ، ܘܡܗܝܡܘܢܐ ܝܗܘܝܢ ܕܐܝܬ ܐ̄ܚܪܢ̈ܐ ܕܐܝܬܠܗ̄ܘܢ ܡܨܝ̈ܬܐ ܕܟܬܒ̣ܬܐ ܒܠܫܢܢ ܐܫܘܪܝܐ ܐܝܢܐ ܩܘܡܐ ܕܐܝܬܠܗ̄ܘܢ ܥܣܩܘ̈ܬܐ ܦܪܝܫ̈ܐ ܐܝܟ̣ ܠܝܬܝܘܬܐ ܕܢܣܝܢܐ ܕܛܒ̣ܥܬܐ ܥܠ ܠܘܚܐ ܝܢ ܝܘܠܦܢܐ ܒܐܢܬܪܢܬ ܘܫܪ.... ܒܣܒ̣ܪܐ ܝܗܘܝܢ ܡܢ ܡܝܩܪܘܬܘܟ̣ܘܢ ܥܡ ܚܒ̣ܪܘܬܘܟ̣ܘܢ ܡܚܒܢ̈ܐ ܕܠܫܢܢ ܡܚܦܛܝܬܘܢ ܠܡܛܘܪܢܘܬܐ ܕܣܪܛܐ ܕܦܝܫܐ ܝܠܗ ܝܕܝܥܐ ܕܪܒܝ ܕܢܝܐܝܠ ܒܝܬ ܒܢܝܡܝܢ ܕܐܢܐ ܦܪܨܘܦܐܝܬ ܐܝܬܠܝ ܬܘܪܓܡ̈ܐ ܕܪܒ̈ܐ ܡܐܡ̈ܪܐ ܛܒ̣ܝܥܐ ܒܝܗ ܘܐ̄ܚܪܢ̈ܐ ܐܝܬܠܗ̄ܘܢ ܒܥܣ̈ܪܝܐ ܕܟܬܒ̣̈ܐ ܐܝܟ̣ ܕܪܒܐ ܛܒ̣ ܝܕܥܝܬܘܢ، ܝܢ ܡܬܪܨܝܬܘܢ ܚܕ̄ ܣܪܛܐ ܚܕ̄ܬܐ ܒܫ ܫܦܝܪܐ ܘܦܫܝܛܐ ܩܐ ܐܬܘܬ̈ܐ ܕܠܫܢܢ ܩܐ ܕܦܝܫ ܩܒܝܠܐ ܒܐܢܬܪܢܬ، ܐܢܐ ܡܩܘܘܠܐ ܝܗܘܝܢ ܡܗܝܪܬܘܟ̣ܘܢ ܒܪܫܡܬܐ ܕܐܬܘܬ̈ܐ ܐܢ ܗܘܝܐ ܣܢܝܩܘܬܐ ܥܠܗ̇.

ܡܝܩܪܢܘܟ̣ܘܢ

ܟ̣ܡܝܣ ܓܝܘܪܓܝܣ
  

40

نتاجات بالسريانية / 7 ܐܒ ܝܘܡܐ ܕܣܗܕܐ ܐܫܘܪܝܐ

« في: 14:07 06/08/2013  »

7 ܐܒ ܝܘܡܐ ܕܣܗܕܐ ܐܫܘܪܝܐ


ܒܥܒ̣ܪܐ ܝܠܗ ܥܠܝܢ ܐܕܝܘܡ ܕܟ̣ܪܐ ܚܫܢܐ ܕ7 ܐܒ (ܛܒܚ) ܝܘܡܐ ܕܣܗܕܐ ܐܫܘܪܝܐ ܘܕܟ̣ܪܐ ܕ 80 ܫܢ̈ܐ ܠܦܪܡܬܐ ܕܣܝܡܝܠܐ، ܟܠ ܫܢ̄ܬܐ ܦܝܫ ܢܛܝܪܐ ܐܗܐ ܝܘܡܐ ܠܐܝܩܪܐ ܕܕܡܐ ܙܟܝܐ ܕܣܗ̈ܕܐ ܕܐܘܡܬܢ ܕܦܝܫܠܗ ܫܦܝܟ̣ܐ ܡܛܠ ܢܛܪܬܐ ܕܗܝܝܘܬܢ ܘܐܝܬܘܬܢ ܐܘܡܬܢܝܬܐ ܐܫܘܪܝܬܐ.

ܡܚܝܝܬܐ ܕܐܗܐ ܝܘܡܐ ܝܠܗ̇ ܘܠܝܬܐ ܥܠ ܩܕܠܐ ܕܟܠܢ ܡ̣ܢ ܓܒ̈ܐ ܘܫܘܬܐܣ̈ܐ ܘܥܕܬ̈ܐ ܘܫܘܬܦܘܝܬ̈ܐ ܘܦܪܨܘܦ̈ܐ... ܓܘ ܐܬܪܐ ܘܓܘ ܓܠܘܬܐ ܠܡܝܩܪܬܐ ܕܣܗܕܝ̈ܢ ܓܢ̄ܒ̈ܪܐ ܐܢ̈ܝ ܕܣܠ̄ܩܠܗ̄ܘܢ ܥܠ ܚܒ̣ܠ̈ܐ ܕܡܚܢܩܬܐ ܘܐܢ̈ܝ ܕܡܘܬܒ̣ܠܗܘܢ ܩܕܠܝ̈ܗܝ ܩܕ̄ܡ ܣܝܦܐ ܕܠܐ ܙܕܘܥܬܐ ܘܐܢ̈ܝ ܕܢܦܠ ܠܗ̄ܘܢ ܓܘ ܡܫܛܚܐ ܕܩܪܒ̣ܐ ܕܪܩܘܒ̣ܠ ܕܒܥܠܕܒܒ̣ܐ ܘܡܩܘܒܠ ܠܗ̄ܘܢ ܒܪܫܐ ܪܡܐ ܟܠܝܠܐ ܕܣܗܕܘܬܐ ܕܝܠܗ ܗܘ ܕܪܓ̣ܐ ܒܫ ܥܠܝܐ ܓܘ ܕܒ̣ܚܬܐ ܕܒܪܢܫܐ، ܘܟܠܝ̈ܗܝ ܣܗ̈ܕܐ ܒܟܠܝܗܝ ܕܪܓ̣̈ܐ ܕܐܝܬ ܗ̄ܘܐ ܠܗ̄ܘܢ ܡܢ ܦܩܘ̈ܕܐ ܘܡܗܕܝܢ̈ܐ ܐܘܡܬܢܝ̈ܐ ܘܪܫܢ̈ܐ ܘܟܗ̈ܢܐ ܥܕܬܢܝ̈ܐ ܘܩܪܒ̣ܬܢ̈ܐ ܘܣܒ̣̈ܐ ܘܝܠ̈ܕ̄ܐ ܙܥ̈ܘܪܐ...ܕܢܦܠ ܠܗ̄ܘܢ ܓܘ ܦܪܡ̈ܐ ܘܩܛܠ ܥܡܐ ܐܫܘܪܝܐ ܘܐܢ̈ܝ ܕܡܓܘܒܐ ܠܗ̄ܘܢ ܡܘܬܐ ܡܢ ܓܝܒ ܚܝ̈ܐ ܕܐܣܝܪܘܬܐ ܘܥܒ̣ܕܘܬܐ ܘܫܠܡܬܐ ܕܡܘܚܙܐ ܠܗ̄ܘܢ ܠܒ̣ܝܒ̣ܘܬܐ ܓܘܒ̣ܪܬܐ ܘܗܝܡܢܘܬܐ ܪܒܬܐ ܘܠܐ ܣܪܒ̣ܠܗ̄ܘܢ ܠܐܫܘܪܝܘܬܝܗ ܘܠܐ ܠܡܫܝܚܝܘܬܝܗܝ ܘܡܘܙܒܛܠ ܠܗ̄ܘܢ ܕܝܗ̄ܘܝܚ ܥܡܐ ܚܲܝܵܐ ܘܠܐ ܡܝܘܬܐ.

ܗܕܟ̣ܐ ܛܠܝܒܬܐ ܝܠܵܗ̇ ܡܢܢ ܐܚܢ̈ܢ ܕܒܚܝܐ ܗ̄ܘܝܚ ܩܐ ܕܡܝܩܪܚ ܘܢܛܪܚ ܠܗܝܡܢܬܐ ܕܣܗ̈ܕܝܢ ܕܝܠܵܗ̇ ܕܲܝܢܵܐ ܥܠ ܩܕܠܐ ܕܟܠ ܚܕ̄ ܡܢܢ ܩܐ ܬܡܡܬܐ ܕܡܐܙܠܬܝܗܝ ܐܘܡܬܢܝܬܐ ܘܢܝܫܝ̈ܗܝ ܗܠ ܫܪܪܬܐ ܕܟܠܝܗܝ ܙܕܩܝ̈ܢ ܢܡܘܣܝ̈ܐ ܓܘ ܐܬܪܢ، ܡܫܘܬܦܬܐ ܕܒܢ̈ܝ ܥܡܢ ܒܐܗܐ ܝܘܡܐ ܝܠܗ ܘܠܝܬܐ ܐܘܡܬܢܝܬܐ ܐܠܨܝܬܐ ܘܢܛܪܬܐ ܕܐܗܐ ܕܟ̣ܪܐ ܝܠܗ ܡܕܟ̣ܪܬܐ ܒܦܪܡ̈ܐ ܘܩܛ̈ܠܐ ܕܦܝܫܠܗ̄ܘܢ ܥܒ̣ܝ̈ܕܐ ܕܪܩܘܒ̣ܠ ܕܥܡܢ ܐܫܘܪܝܐ ܒܟܠܝܗܝ ܥܕܬ̈ܗ ܒܝܕ ܒܠܕܒ̣ܒ̣ܝ̈ܢ ܣܪܝܚ̈ܐ ܓܘ ܬܫܥܝܬܐ ܥܬܝܩܬܐ ܘܚܕܬܐ ܕܐܘܡܬܢ ܘܓܠܝܬܐ ܘܡܝܕܥܬܐ ܕܐܢ̈ܝ ܥܒ̣̈ܕܐ ܠܐ ܐ̄ܢܫܝ̈ܐ ܩܐ ܟܠܝܗܝ ܥܡܡ̈ܐ ܘܐܡܘܬ̈ܐ ܡܘܪܕܢ̈ܐ ܘܚ̈ܐܪܐ ܒܬܒ̣ܝܠ ܘܐܡܘܬ̈ܐ ܡܚ̈ܝܕܐ ܠܢܝܫܐ ܕܡܘܕܝܬܐ ܒܝܝ̈ܗܝ ܘܫܩܠܬܐ ܕܦܘܣܩܢ̈ܐ ܐܢܢܩܝ̈ܐ ܘܕܝܢܬܐ ܕܟܠܝܗܝ ܐܬܪܘܬ̈ܐ ܐܢܝ̈ ܕܡܫܘܬܦܠܗ̄ܘܢ ܒܩܛܠܬܐ ܘܦܪܡܬܐ ܕܥܡܢ ܐܫܘܪܝܐ ܡܫܝܚܝܐ ܘܡܬܒ̣ܬܐ ܕܚܠܘܨܝܐ ܥܠܝܗܝ ܠܦܘܬ ܩܢܘܢ̈ܐ ܬܒ̣ܝܠܝ̈ܐ ܘܡܠܝܨܬܝܗܝ ܘܡܥܒ̣ܕܬܝܗܝ ܠܡܘܕܝܬܐ ܒܓܘܢܚܝ̈ܗܝ ܘܣܘܪܚܢܝ̈ܗܝ ܘܦܪܥܬܐ ܕܟܠܝܗܝ ܚܘܣܪܢ̈ܢ ܓܡܝܪܐܝܬ.

ܫܘܒ̣ܚܐ ܘܪܘܡܪܡܐ ܠܪܘܚܐ ܕܣܗ̈ܕܝܢ.
ܚܝܐ ܐܘܡܬܐ ܐܫܘܪܝܬܐ

 ܟ̣ܡܝܣ ܓܝܘܪܓܝܣ