4
أخواني واخواتي انا قضيتي لاصارت ولا جرت على احد (صدكوني مرات أفكر بالانتحار) بس أرجع وأتعوذ من الشيطان وأكول حسبي الله ونعم الوكيل ... أرجوكم أن توسعون صدركم معايا ولا تبخلون علييه بالنصيحة والمشوره لأن ماخاب من أستشار ..واني شفت انه هذا احسن موقع أطرح بيه مشكلتي عسى ولعل تكون هدايه من رب العالمين حتى أجد الحل ويرتاح بالي .. أخوتي مشكلتي بأختصار كالاتي :
اني عراقي ساكن بغداد متزوج وعندي اربعة اطفال اكبرهم عمره 14 سنة وميسور الحال نوعاً ما والحمد لله .. ونتيجة الاحداث اللي جرت بالعراق بعام 2006 وانتو تعرفوها أضطريت ان اسفر عائلتي الى عمان بنهاية نفس السنة لان صار الوضع كلش خطر وكنا في حينها نسكن في منطقة حي العدل .. على كل وصلنا لعمان واجرت شقة مفروشة ودخلت اولادي الثلاثة بمدرسة خاصة لان الرابع كان بعده طفل... وانا رجعت للعراق بحكم عملي وأقمت مع اهلي لاني اكبر اخوتي ووالدتي امرأه كبيره ومريضه وما كنت اكدر اتركها .. وكنت كل شهرين او ثلاثة ازور عائلتي بعمان واقضي اجازة مابين 20 الى 25 يوم اشوف متطلبات زوجتي واطفالي .. وكانت علاقتنا كلش حلوه وطيبه وانا بصراحة اب عطوف وحنون ... وكنت ادفع ايجار الشقة كل شهر وارسل مصاريف المعيشة والمدارس لزوجتي وما مقصر باي من واجباتي تجاه عائلتي .. يعني مجمل الصرفيات كل شهر كانت مابين 1500 الى 1800 دولار بعمان واستمرينا على هذا الحال ... وخلال هاذي الفترة بدأت زوجتي تقنعني بأن نسجل بالـ (UN )لان الوضع بالعراق صار صعب ومستقبل الاطفال مجهول وعسى ان يكون الحال افضل بامريكا .. الحقيقة انا اقتنعت ووافقت بس كان الملف باسمها مع الاطفال لان انا اعرف ان الامور تاخذ وقت لحين المقابلات والسفر الى اخره وايضا اذا اسجل معاهم مراح بعد اكدر ارجع للعراق لازم ابقى بعمان .. والشي الاخر اللي مخلاني اسجل معاهم هو انه كيف راح اامن مصاريف الحياة وانا عملي في بغداد .. لذلك اتفقنا انه ابقى في عملي واصرف على عائلتي لحين ما يسافرون وبعدين التحق بيهم عن طريق لم الشمل اكون انا جمعتلي كم فلس حتى تسندني هناك.. وبالفعل حصلت موافقة سفرهم لامريكا في الشهر السابع من عام 2009 وحالياً هم الان بولاية ايداهو .. أعزائي بدأت المشكلة مع زوجتي منذ الشهر الثاني لسفرهم حيث لاحظت عليها التهرب مني وعدم الرد على الهاتف وحتى تحاول تنفر الاطفال مني بس مع ذلك بقيت اسايسها واكول ميخالف يمكن مأثر عليها الهوم سك .. وبقيت لحد هاذي اللحظة اقوم بواجبي تجاهها وتجاه اطفالي وكل شهر ادزلهم 1400 دولار لامريكا عن طريق الوستن يونين ومن نجحو السنة الماضية دزيتلهم هداياهم من بغداد لامريكا .. وهاي انا اعاني صارلي سنة و8 اشهر بالضبط من الجفاء اللي تعاملني بيه زوجتي وتصدكون من طلعوا لحد هذا اليوم وربي شاهد على كلامي انا ماشايف اطفالي على النت بس اتكلم معاهم بالتلفون .. وخلال كل هاذي الفترة بس دزتلي 9 صور واني مفاركهم صارلي سنة و8 اشهر ولحد الان ماعرف اذا اخذوا الكرين كارد ولا لاوطبعا ما تتكلم معاي على التلفون هاي صارلها سنة ومن اريد اتكلم مع اطفالي ابقى اتصل ويجاوبني الانسر مشين الى ان ينشلع كلبي يلله يكلمني احد اطفالي وبالمناسبة من طلعوا لحد الان اني يومية اكلم الاطفال ومرات بين يوم ويوم يعني بس تلفونات اصرف كل شهر حوالي 300 الف دينار لان ترفض تسوي اشتراك بالنت احجي وياهم على الماسنجر او السكاي بي.. اكول ميخالف المهم اسمع صوت اطفالي ويسمعوني حتى لا ينسوني .. والمشكلة الاكبر بدأت قبل شهرين لما صدمتني وطلبت ادزلها ورقت طلاقها حتى توافق ترسلي دعوة زيارة .... بربكم هذا الشي يرضي رب العالمين مع العلم سفرها لعمان وطلعتها لامريكا كل هذا الشي كان بزودي وبفضلي لان الخاتون كلشي ما تملك وحتى دراستها خريجة اعدادية.. مع ذلك اني ما قطعت الامل وبقيت احاول ان اوصللهم بشتى الطرق الى ان سجلت على برنامج اللجوء من العراق ( IOM) والحمد لله حصلت على كيس نمبرقبل 5 اشهر وقبل اسبوعين دزولي نماذج امليها تتكون من 9 صفحات وبيها كل المعلومات المطلوبة ومن ضمنها رايدين عنوان عائلتي بامريكا .. واضطريت بالتواسيل اتكلم معاها وطلبت منها العنوان لان كنت شاك انه هي مغيره مكان السكن وبالفعل طلع شكي بمحله ورفضت تنطي العنوان الجديد الا ادزلها ورقة الطلاق فأضطريت اكتب العنوان القديم .. بصراحة ما اريد ادز الورقة لان ما اعرف شنو راح يترتب عليها من قوانين بامريكا .. اخاف ادزها واتورط .............اخواني واني هسه الحيره راح تكتلني وما اعرف شسوي وقررت من هذا الشهر بعد ما ادزلهم ولا فلس وصدكوني هذا الشي مو هين علييه لانهم اطفالي بس اكول بلكي تكون وسيلة ضغط تعيدها لصوابها وبالمناسبة صارلها 3 اسابيع قافلة التلفون يعني راح تحرمني حتى من صوت اطفالي ... شايفين هيجي جبروت ... رجاء رجاء رجاء انصحوني وساعدوني وعلموني شكدر اسوي بمصيبتي هاذي ارجوكم ارجوكم ... راح انتظر على احر من الجمر .. وشكراً لسعة صدركم لاني طولت عليكم وازعجتكم .. بس صدكوني حيست براحة ولو قليلة من طرحت مشكلتي عليكم لاني كلي امل انه راح تفرج ان شاء الله .. وحسبي الله ونعم الوكيل.
عرض المشاركات
