تتدلل عزيزي وهذا الموضوع الخاص بأبو عمر المنسوتي وحسب طلبك إنشاء الله يفيدك وآني همين يمكن مثلك بعد أيام أسافر لتركيا مع وافر تقديري
أخواني الاعزاء العراقيين الشرفاء الهاربين من جحيم العراق ...اليكم الخطوات اللي تعملون بها عند رغبتكم القدوم الى تــــــــــــــــركيا ...وكملاحظة ...انا لست فتاح فأل ...ولكني تعلمت من وجودي بتركيا ومن سماعي الى اراء الناس ...ولكن ارجو منكم مخلصـــــــــــــــا وبحق هذا الشهر الفضيل أن تدعوا لي بسرعة الطيران ...دعاء من كل قلبكم عسى الله أن يفرج همي همكم وان يعجل لي بموعد الطيران الى بلاد العم والخال والعشيرة ...سام ...الغالي
0- أخواني الاعزاء قبل ان تقراء الفقرات اريد اكللكم شيء ...اكو بعض الاخوان من هو مترهي وبدولة معينة او بوظيفة في العراق
مثلا او لديه اعمال ...يريد يجي يقدم ويرجع الى مكانه ...عليه ان لايجي اصلا لان اولا وللعلم الامم المتحدة ماتحب اللي
مسافر هواية وعنده اختام لان يكلك هذا اموره زينة ومترهي على زمانه وبعدين من تسجل مالك حق تتحرك من محافظتك
التركية الابموافقة السلطات التركية يعني بااجازة ..واحنا معلينا بالشطار والابطال ويبيعون سباعية بروؤس الناس ...واللي يدور مخالفة لان هنا اذا ماتجر
عدل كبل طابع والله وياك منين ماجيت ...لذا اخواني اللي عنده شغل واموره عدلة لايجي ولايتعب نفسه لان مقابلته الاولى
بعد ثلاث اشهر الان صارت بسبب الزخم ..فخلي يترك مجال للتعبان واموره تعبانة خلي يشوف اله صرفة ..لان اكو هواية
بطرانين ...للعلم رجاءا ...
أخـــــــــــــــــــــــــواني الاعزاء اختار من هاي الفقرات اللي تفيدك وتنفعك واترك اللي مايفيدك لان موكل المكتوب يمكن يخصك.
1- تتوكل على الله وتجي من الطريق البري .
2- تحزم اغراض واوراقك الشخصية وكل متعلقاتك الرسمية والتعريفية والشهادات والوثائق الك ولعائلتك الاصلية ...
3- تجلب معاك خط اسيا وتخلي بيه رصيد جيد من 20 -30 الف دينار لان يعمل بتركيا ...وتجيب وياك موبايل واحد للشخص ويكون
من نوعية جيدة ...
4-تصرف بالحدود فد 100 دولار لان المطاعم والتواليت بتركيا على الطريق كلها بفلوس..(البولة بليرة)
5-حاول اتجيب وياك جنط عادية لان راح تتركها لما يطلع لك سفر لدولة الاستيطان ..
6-اجلب بطانيات لكل فرد 2 بطانية مع شراشف ووجوه مخدات وملابس شتوية جيدة لك ولااطفالك لانها شوية غالية هنا واللي
عنده امكانية طبعا الملابس التركية جيدة النوعية بس غالية...
7- طبعا كلشي موجود بتركيا من مفروشات بس انته جيب اللي عندك اصرف الك ..
8- لاتجلب وياك الرز (التمن) لان بنفس اسعار العراق ويسبب الك حمل وانته محتاج الى امور منزلية
9-جيب وياك فد 10-15 تكة سيكاير ولاتكثر لان احتمال تصادر منك وانته وحظك ...واني مالي علاقة باالابطال واللي يريد يتحدى ...
10- جيب وياك مشروبات روحية للي يشرب لان هنا غالية ...وبالعافية احسن الك من الخزعبلات ....
11-الايجارات هنا بتركيا عموما ماعدا اسطنبول وانقرة ...من 250 ليرة -500 ليرة وحسب الترف يعني مايعادل من 175 دولار -350 دولار ...ومثل ماكلت الكم حسب الترف واكو اقل واكو اكثر ...
12- جيب وياك بهارات عراقية وعنبة طوز وشاي مهم لان الشاي التركي ماينجرع ...واجيب وياك فتاحة علب لان شوية قليلة
هنا لعدم وجود المعلبات تقريبا بس انته تحتاجها ...وماكنة عمل الفلافل لان ماتعثر عليها لاهنا بتركيا ولا في امريكا ...
13-ستلايت يعني رسيفر والعاب اطفال للي عنده اطفال لان هنا كلشي بالتركي وقصدي سيديات الالعاب للاطفال
14-معاجين اسنان تفيدك هنا وتفيدك لما تسافر اذا بقى منها شيء ...جيب فد 10 علب وخاصة من نوع سيكنال الكبير لان
معجون الاسنان شوية غالي .
15-ادوات مطبخ بسيطة يعني امور مطبخية سهلة مو قدور طبخ لان هنا موجودة واسعارها جدا مناسبة
16-معاطف تذهب الى سوق اللنكات في الباب الشرقي وتشتري لان المعاطف جدا مهمة لان الدينا باردة جدا
17-لاتشتري سجاد او تجيبه معاك لان هنا السجاد المستعمل اخو الجديد ب30-40 ليرة يعني مايعادل 20 الف -35 الف دينار
18- اللي من المناطق الجنوبية يعني (العمارة البصرة الناصرية السماوة الديوانية الحلة النجف كربلاء وغيرها) اذا ماعنده
بطاقة تموينية وبطاقة سكن من المناطق الساخنة اللي هي (بغداد الموصل الانبار ديالى صلاح الدين كركوك )...
لانها تعتبرمن المناطق الجنوبية أمنـــــــــــــــــــــــــــــــــــــــــــــــــــــة والحكومة شيعية ...لذا لازم ترتب نفسك ..
19-الاخوة المسيحين عليهم ان يحضروا لهم ...مشكلة شخصية او تهديد ...لان التهديد العام ماياكل ..اخواني ..كأن تقول اني
مسيحي ومهدد هذا الحجي مايفيد ....
20- تحضر تقارير الاصابة او اخبارية مركز الشرطة او صور تفجير السيارة او البيت او المحل يعني تحضر هاي الامور في حالة
تيسرها عندك ..
21-تجلب معاك معلبات لان هنا ماكو معلبات تقريبا واغلب المواد اللي عندهم طازجة ...جبن كرافت فول حمص بطحينة
مكدوس والخ ...
22-اتجيب معاك لابتوب من النوع الجيد وسيدات تعريف وبرامج وكلشي يفيدك
23-مكوى بسيط +ماكنة حلاقة كهربائية +اي جهاز بسيط الثمن ممكن ان يفيدك ...لان امريكا ماتشتغل بيها الاجهزة مالتنا لان
كهرباء امريكا 110 فولت ..وبكيفك ...
24-خلي ببالك عند مراجعتك اليو أن باانقرة ...انك راح تسجل بس الان ويعطوك موعد يصل الى ثلاث اشهر بالوقت الحاضر
بسبب اعداد العراقيين القادمين من سوريا...وهم يعطوك المدينة مو انته تختار ...الا اذا عندك معارف من الدرجة الاولى
ويجي وياك الى اليو أن ...
25-للملاحظة ...بالنسبة للفيزا ...تذهب الى السفارة التركية ببغداد وتقدم وتودع مبلغ 2000 دولار للفرد في المصرف الزراعي
التركي وتسحبها بعد يومين ...او تروح الى مكتب امام السفارة ..اسمه مكتب صباح اللامي ..يخرج لك الفيزا مقابل ثمن
انته تتفاهم وياه وعنده حجز من بغداد ...والرجل نزيه بعمله ومضبوط ..ومرتب جدا..
26- تسوي لفات وطعام للطريق لان طريقك يطول حوالي 36 ساعة من بغداد الى انقرة مع التوقفات والمطاعم
27- حضر لك كاميرا من اجل ان لاتفوتك المناظر الخلابة على الطريق
28- جيب وياك ادوية للمريض جماعة السكر والضغط بس لاتكثر لان الادوية والعلاج هنا يصرف لك ...وتصرف الك فلوسه
29-اشتري لك نظارت او سوي نظارت طبية اوشمسية لان هنا شوية غالية
30-اذهب الى انقرة او انزل في كراج انقرة وامكث في انقرة يوم واذهب الى اليو ان وقدم مع عائلتك من اجل التسجيل
علمود تشيل غراضك وتروح للمحافظة اللي راح يعينوها الك ...
31-راجع جوازك ...لان الامم المتحدة واليو أن لايحبون كثيرا المسافر كثيرا ...حاول ان تتصرف بجوازك وخاصة اللي رايح الى دولة العهر اللااسلامية
ايران ...اتصرف والعاقل يفهم ..
32- لاتجلب اي شيء مزور لان التزوير مكشوف ولاتعب نفسك عمي ...
33- منتسبي مايسمى الشرطة والجيش الحالي يعني جماعة الحكومة ...يشوف اله جاره لان غير مقبول او يرتب نفسه.
34- رجال الجيش العراقي السابق والاجهزة الامنية الاخرى عليهم ...التصرف باالامور من جديد ...؟؟؟؟؟؟
35- اللي عنده بصمة سابقا عند الامريكان وعنده مشكلة وياهم او موقوف صعبة شغلته لان تبين ..بفحص البصمات
36-اللي موقوف كحبس اوسجن او لديه محكومية ايضا تدبير امره لان البصمة تكشفه
37-حاول تنظف جوازك من كل الاختام غير الصحيحة ؟؟؟؟؟
38-فترة بقاءك بتركيا والعلم عند الله من سنة الى سنة ونص اذا شغلتك مرتبة وامورك صافية
39-اجلب وياك كتب وقاموس وكتب تعليم انكليزي وحاول اطور نفسك بفترة بقاءك هنا ...
40-جلب مبلغ جيد معاك من اجل المعيشة لان انته بغربة ولايوجد احد يعينك الا الله ...
41-الكهرباء هنا غالية ..واستطيع ان اقول لك غالية جدا ...
42-حاول تصفية كل امورك المالية لان خلي ببالك انته عندما تقدم على الامم المتحدة انتهى امرك لايسمح لك
بعدها العودة الى العراق ...او انسى العراق ....
43- اترك الطائفية والامراض في العراق وتعال بعقل سليم ...لان هنا وفي دولة الاستيطان لامجال لهذه السخافات
44- توكل على الله ...واصبر لان الشغلة محتاجة صبر طويل ...
45- حاول ترتيب نفسك على هاي الظروف وهاي المتطلبات ولاتحمل نفسك اكثر من طاقتها ولاتاخذ كلامي قرأن..
يعني كل شيء قابل للتغيير حسب الظروف بس اني احكي الك عموميات ...
46- حاول المحافظة على جنطك وتدقيقها وحسابها عند التحميل والتفريغ وعليك ان تكون نبيه
47- الادوية والمراجعات للمستشفيات بموجب ورقة الامم المتحدة ومجانا بس الادوية تاخذ فلوسها بموجب عريضة
تصرف لك اثمانها...
48- ملاحظة مهمة جدا ...انا لاعلاقة بي باي شخص وارجو عدم طلب رقمي او عنواني لانني لن اقدم لكم غير المشورة
والنصيحة والتوجيه ....وابوكم الله يرحمه ...
49-لما تروح للمقابلة راح ينطوك رقم كيس نمبر لاتخلي احد يعرفه ابدا لان تره اكوا بيه محاذير
50-من تروح للمقابلة الاولى بعد ان تكون قد سجلت واعطوك موعد ...تروح وانته مرتب وملبسك نظيف مو تروح جنك عتاك وهدوم
الجهال مشككة ..تروح 24 حباية يعني مرتب ...لان تره ماتكسر خاطر احد اذا مخربط ....للعلم
عنـــــــــــــــــــــــــــــــوان اليو أن في انقـــــــره
تكتبه بورقة وتشوفه لسائق التكسي
BMMYK
Biresmis Milletler Multeciler Yuksek Komiserligi
Sancak Mah Tiflis Cad .552 Sokak No,3
06550 Ankara
------------------------------------------------------
وهذا عنوان فندق مناسب باأنقرة يفيدك
hisarpark cad.No.14 ULUS
ankara
OTEL PINAR
اتمنى لكم الموفقية والتوفيق وارجو منك فقد ان تدعوا لي بالسفر العاجل غير الآجل
أخــــــــــــــــــــــوكم
أبـــــــــــــــــو عمــــــــــــــــــــر
تـــــــــــــــركــــــــــــيا الشقيقة
____________________________________________________________________
أخوانـــــــــــــــــــــي بالنسبة للايجارات ...
هنا في تركيا الايجارات تقريبا نوعين ...نوع على الفحم والثاني على الغاز
اللي على الفحم كاالاتي تأجر بيت يعني شقة وتكون التدفئة على الفحم ...الفحم يصرف الك اذا توصل قبل شهر ال 12 يصرف الك مجانا بمعدل طنين اي 74 كيس وزن 25 كغم حجري مو خشبي مثل مالتنا العراقي وطبعا هذا مشكلته انو صعب الاشتعال ...وطبعا تروح تقدم عريضة للوالي اكو تسلسل سهل بعدين تتعلمه يصرف الك بموجبه الفحم ويحملوا هم الك الاتراك بالعربانة وتوصله الك لمكان سكنك مجانا وانته تنقله لشقتك ....بس المشكلة اذا كان هذا الفحم مرطوب يعني ماخذ مي ويراد لك تشتري فد عربانة او عربانتين خشب تخلطه وياالفحم وتشعل لان هنا الشتاء شديد البرودة وحسب المناطق طبعا اني دا اتكلم على منطقتي والمناطق القريبة ...بس اعتقد اكو اختلاف بسيط في المناطق الجنوبية من تركيا ...يمكن للاخوان يوضحوا اذا احد يعرف ...بس هذا الايجار لهيج شقة يدمر اللي عنده اطفال لان الدخان قاتل وصعب جدا بس شوية يكون رخيص يعني من 100 ليرة الى 150 ليرة ويمكن أقل
الايجار الثاني ...وهو ايجار تدفئة الغاز يعني الطبخ والسخان والتدفئة كله على الغاز وهذا على حسابك ويكون ايجار الشقة بحدود 250-450 ليرة وحسب الترف بس مريح وصحي وهذا تقريبا بكل المحافظات متساوي
وطبعا دبة الغاز بتــــــــــــــــــــركيا سعرها يتراوح بين 50-60 ليرة بس اطول شهر ونص للعائلة مع الطبخ المستمر وثلاث اشهر للاعزب اللي مايطبخ بس يحمي اكل بيها ....
سعـــــــــــــــــــــــــــــر تصريف الليرة الان لغاية اليوم22-8-2011 ...100$=172ليرة الان قابلة للتغيير
ملاحظـــــــــــــــــــــــــــــــــــــــــــــــــــــــــــة مهمــــــــــــــــــــــــــــــة ...
أخواني لاتشتري خط تركي لامن الحدود ولامن كراج انقرة اوكراج اسطنبول ...لان يكون غير مسجل ومامحجوز بيه موبايل لذا راح ينغلق بعد مضي حوالي عشرة ايام ...أتاكد من ان الخط مسجل بعد ياخذ منك نسخة جواز مستنسخة وبيه شوية اجراء بسيط من قبل ابو المحل لان من ينطيك ظرف وبيه سيم كارت ...اعتبر خطك راح ينغلق ومنطيك خط سياحي ...ذاك يسجله يمه باالحاسبة وبيه عقد ...لذا عليك التاكد لان هذا الرقم راح تنطيه للامم المتحدة ويتصلون عليك بيه ....
اــــــــــــــــــــــــــــــــــــــــــــــــــــــــــــــ
طبعا أضيف الموضوع مال 50 فقرة بناءا على طلب الاخ storm2000 والغاية هي افادة اكبر قدر من الناس وان شاء الله ...الله الموفق ويسهل على الجميع
مع تحيات اخـــــــــــــــوكم
أبـــــــــــــــــو عمــــــــــــــــر المنيسوتي
(اللي يمكن راح اسكن الكبور ومااشوفها )
عرض المشاركات
