عرض المشاركات

هنا يمكنك مشاهدة جميع المشاركات التى كتبها هذا العضو . لاحظ انه يمكنك فقط مشاهدة المشاركات التى كتبها فى الاقسام التى يسمح لك بدخولها فقط .


الرسائل - M.Hussam

صفحات: [1]
1
الهجرة و واللاجئين / الاخوة والخوات في عمان محتاج مساعدتكم الضرورية
« في: 23:32 08/12/2012  »
شلونكم اخوتي وخواتي جميعا وخاصة  في عمان
محتاج عونتكم اهل الغيرة
محتاج شقة بشميساني  لان عملي بيهة وقريبة عن مكان علاجي
احنة عائلة مكونة من خمس اشخاص  يعني غرفتين وصالة او تلاثة وصالة كلش كافية علينة لان والدتي تروح  وتجي علينة من بغداد
ياريت السعر يكون 300 او بالزايد 350

وشاكر لفضلكم في سعيكم لمساعدتي

اخوكم
مهندس حسام

2
الهجرة و واللاجئين / رد: محلفين عمان
« في: 12:29 09/08/2012  »
السلام عليكم

البارحة خابرت على الاي او ام وسالتهم على المحلفين كالت الموظفة المحلفين لحد الآن ما وصلوا عمان

وعدت السؤال مرة ثانية واكدتلي نفس الحجي ( المحلفين مموجودين بعمان حالياً وراح يجون بالايام الجاية )

3
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 01:27 16/05/2012  »
شكراً جزيلاً اختي مارلا
يعني هو الدكتور نصحني بعدة اماكن لكن كال بوسطن عدهة برنامج جيد جداً وتخصص دقيق في IEM بس هذا الاختصار شنو معناه بلة زحمة عليج
وآني بصراحة راح امشي بنصيحة الدكتور واطلب بوسطن وبعدهة إذا اكو غير مكان العلاج بي افضل فراح اكيد اطلعلة
الاولية حالياً بس ندخل امريكا

شكراً جزيلاً دكتورة ومتواصل مع حضرتج حول اي مستجد ان شاء الله

4
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 02:37 15/05/2012  »
اقتباس
اخي الكريم

يارب طول العمر 'لطفلك وكل امل ومستقبل لعائلتك اعود لم افعل شي الامل هو كل مانملك الامل هو كل شي احببت ان اقول لك متى وصلت هنا سوف تجد الاف من د.مارلا شعب غريب وعادات اغرب من احترام وحسن معامله وصدق وامانه وحرص عل وقت بشكل لايصدق لم اعمل مع احد الا واكلتني الحسرة عل كل يوم ضاع ولم اتعلم شئيا كل يوم اضيف واحب ان ياتي غيري ويضيف المساعدة شي نجده عجيب في تقاليدنا لاسف وعادة اخفاء معلومه تكاد اكثر مائحزنني في العراقين فكان غيره سياخذ مكانه او رزقه بكل احوال سياتي يوم جديد لغد وجيل افضل مني ومنا وهو اطفالنا وكل املي بان يكون طفلك بالف خير اخي متى ماحتجت شي فانا وعائلتي واهلي كلنا عائلتكم تحياتي لزوجتك وامنياتي الصادقه لطفلك بالشفاء
اختك
د.مارلا

أشكر دعائج اختي مارلا والله يحفظكم والاهل من كل سوء ونسأل الله ان يأتي يوم وشوفين ابني إن شاء الله بعينج وصحتة زينة ومتعافي من مرضة بإذن الله وليس ذلك على الله بعزيز فهو على كل شئٍ قدير
ونسأل الله ان يجعل سفرنا اقرب مما نظن ونتصور لخاطر طفلي وان شاء الله يرحم ربنا الكريم بحالنا ونبشركم قريباً بموعد سفرنا بإذن الله
أسأل الله ان يحفظكم اختي والاهل من كل سوء واشكرج الشكر الجزيل وما قصرتي أبداً الله يحفظكم ويرضى عليكم يارب

بس دكتورة اكو سؤال طبي بعثتة لحضرتج على الخاص اتمنى تجاوبيني عليه بلة زحمة عليج

5
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 15:09 14/05/2012  »
وعليكم السلام ورحمة الله وبركاته
أهلاً بالغالي الاصيل ابو الحارث شرفتني بمرورك
اشكر دعائك حبيبي قريتة اكثر من مرة لجمال عبارته ودادعي بي في صلاتي ونسال الله الاجابة
اشكر شعورك وحسك الانساني العالي واسال الله ان يقذف الرحمة بقلب من بيده امر سفرنا بعد الله عز وجل ويكون سفرنا عاجلا باذن الله لان اي تاخير لا سامح الله ليس في مصلحتنا
دكتورة مارلا اخت وانسانة رائعة بالرغم من ظروف العمل وحالة الوفاة الي حصلت عدهم خصصت وقت خاص لنا وتابعت موضوعنا لحظة بلحظة الى ان وجدت التخصص الدقيق لابني في اي مستشفى بالضبط
الله يوفقج اختي مارلا ويحفظج والاهل من كل سوء

6
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 07:19 14/05/2012  »
شكرأ جزيلاً دكتورتنة الغالية والله يرضى عليج يارب
ما قصرتي دكتورة وممنون جداً وانتظر اي جديد من حضرتج اختي الوردة
رأيج حيل فادني وراح اتوكل بالله ونشوف بوسطن والله ييسر واخذت عنوان الكفيل وتفاصيلة وادعولنة انه شغلتنة مطول ان شاء الله
طبعاً اشكرج جداً جداً على النصائح واخذتهة للدكتورة هنا بعمان وكتبتلي تقرير بالأنكليزي يكول انه هذا الطفل بي هذا المرض وهذا المرض يحتاج حليب خاص واكل خاص واذا ما أخذة راح تأدي بي الى خطر الاعاقة او الوفاة ... لا سامح الله والله يحفظلي نور عيوني ابني ويشفي يارب

دكتورة لو اظل اشكر بحضرتج منا لآخر يوم بحياتي مراح اوفي البسمة الي زرعتيهة بقلوبنا قبل وجوهنا والحمد لله اتعرفت على اخت عزيزة مثل حضرتج تحمل هذا الخلق والإنسانية العالية واتمنى ان يكون ان يجمعنا الله بكم قريباً
تحياتي للعائلة الكريمة وتحيات عائلتي لكي وللعائلة

7
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 04:20 13/05/2012  »
اخوية الوردة برنسو أشكر مرورك الطيب ودعواتك يا اصيل والله يعجل بسفرنة وسفركم وسفر كل محتاج اللهم آمين

8
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 23:54 12/05/2012  »
أشكركج اختي الكريمة ودكتورتنة العزيزة يعجز لساني عن مدى فائدة النصائح الي تنصحينة بيهة وياربي بروفوسورة بإذن الله
طبعاً جمعت معلومات كاملة عن المرض وزوجتي اخذت فكرة كاملة عن الموضوع وحتى اخذت تفاصيل عن المرض واعراضه وما يحصل في حال عدم علاجه لا سامح الله باللغتين العربية والانكليزية وراح تتكلم عنة وبنهاية الكلام حضرت الويب السايت الرسمي البي المعلومات الكاملة عن هذا المرض
وكالت هم اقدمة الهم وان شاء الله خير بس نرديد دعواتكم يا اصيلة
منعرف شلون نشكرج اختي والله ندعيلج الله يوفقج ويحفظكم والاهل من كل سوء

اخي الكريم UAE نشكر مرورك العطر ... وهي هاي اخلاق الطبيب العراقي الي فقدناهة في العراق مع الاسف
واختنة مارلا انسانة اصيلة وما تعكس الة طيب اصلهة وحسن تربيتهة واخلاقهة والله يكثر من امثالهة

9
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 03:27 12/05/2012  »
اشكرج عيني دكتورة والله يوفقج يارب
آني راح اتوكل على الله واتوجه لبوسطن وبس ادعولنة انه يرأفون بحالة ابني وميخلون شغلتنة اطول ونسافر بسرعة ان شاء الله
واختي بلة زحمة عليج ارسلت رسالة لحضرتج على الخاص اتمنى تجاوبيني عليهة على الخاص ايضا لان بيهة استفسار شخصي
ممنون جداً اختي والله يوفقكم يارب وتعبناج ويانة وسلام زوجتي لحضرتج

10
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 00:12 12/05/2012  »
أشكركم اخوتي الافاضل والله يبارك فيكم يارب ...
شكراً اختي كوكي واخوية كوبرا ممنون منكم على مروركم العطر ودعواتكم الطيبة وهذا من طيب اصلك يا افاضل

اختي العزيزة والكريمة الدكتورة مارلا ...
شكراً للوقت الي دتوفري لقضيتنة وهذا من انسانيتج وطيبة قلبج يا اصيلة
اختي الغالية داتواصل مع احد الاخوة الافاضل في بوسطن ونصحني بنفس نصحيتج على مستشفى الاطفال في بوسطن وابلغني انه تواصل مع المستشفى وابلغوه بدراسة الموضوع وما ارجو من حضرتج ان تطلعين على الروابط ادناه وتنطيني رايج ونصيحتج لن حضرتج صاحبة اختصاص في هذا المجال حتى احسم قراري ان شاء الله

اتمنى اسمع رأيج وشاكر كثيراً لفضلج اختي الكريمة ولا تنسينة من دعائكم وسلام من زوجتي لحضرتج ولكل الاخوة والاخوات الي شاركونا

11
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 22:32 11/05/2012  »
شكرا shabah
أشكر تفاعلكم وطيب اصلكم وبحثكم الكريم هذا هو العراقي ابو غيرة واصيل
آني اطلعت على المركز وراسلتهم ومنتظر جواب منهم عسى الله اجد شي عدهم بإذن الله
ممنون جداً والله يكثر من امثالكم ولا تنسونة من دعواتكم

12
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 22:19 11/05/2012  »
شكراً جزيلاً اختي الكريمة دكتورة مارلا
تواصلت مع اخوة ببوسطن و اوريغون وحاليا داتاوصل وياهم بخصوص هذا الغرض والي هو توفر علاج ابني عدهم
وارجو ان سمح وقتك ان تتواصلي معي في العثور على اي مراكز مختصة في بوسطن او اوريغون
وشكراً على الوقت الي وفرتي النة وشكراً لمجهودج الرائع

13
الهجرة و واللاجئين / رد: ابشروا ياقوم خبر تازة
« في: 21:52 11/05/2012  »
يا الله الله يبشرك بالخير

14
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 07:44 11/05/2012  »
ممنون جداً اختي الكريمة والله يكون بعونج ودتخجلينة والله يا اختي
راح ابدي اسال على هاي الولاية ان شاء الله وادور على تفاصيلهة
وطبعاً أحد الاخوة ببوسطن ايضاً كال العلاج جيد والمساعدات سنتين ومثل ما اتفضلتي كال ينطو راتب وراتب لمن يقوم برعاية الطفل وعرض انه يكفلنة كعائلة
فشنو رايج ببوسطن كعلاج وتقدم من الناحية الطبية وهل تعرفين احد هناك
وآني هم راح اشوف هذا الدكتور ان شاء الله واجمع المعلومات الممكنة عن هذه الولاية

وممنونين جداً دكتورتنة الغالية والله يوفقج ويسهل امرج يارب

15
الهجرة و واللاجئين / رد: جمعيه التقديم على UN الاردن ومنتظري المحلفين
« في: 06:49 11/05/2012  »
تحية طيبة لجميع اخواني وخواتي بالجمعية
ما ادري إذا ترهم اجي يمكم لو لا
آني عندي مقابلة الاربعاء القادم مقابلة اولى وثانية IOM يوم 16/5 وما ادري شراح يصير ميصير والله ييسرهة
طبعاً آني مخلي موضوع على الصفحة الرئيسية

وهو بإختصار آني صحتي شوية تعبانة بسبب محاولة اغتيالي في بغداد وعندي محور اهم بقضيتي وهو وابني طلع بي مرض نادر مالة علاج غير برة ويرادلة عناية خاصة

طبعاً تعرفون همة يريدون من عندي عنوان معارف من اصدقاء او اقارب ( كفيل ) فىني بصراحة ما عندي بس صديقي بيوتاه
لكن آني اريد ولاية يتكفلون علاج ابني ومساعداتهم زينة وبيهة عمل
فشنو تنصحوني بيا ولاية حتى ابدي ادورلي على كفيل
وممنون منكم

أخوكم
مهندس حسام

16
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 06:03 11/05/2012  »
سؤال أخوتي وخواتي
في حال ظليت حاير بالولاية الي بيهة هذا العلاج لأبني لا سامح الله
شنو رايكم اختار مينيسوتا او مين أو اي ولاية مساعداتهة ممتازة ابدي بيهة حياتي بامريكا ومناك ابدي ادور على الولاية البيهة علاج مناسب
وإن كان هذا الخيار الافضل فشنو الولاية الي تنصحوني بيهة
طبعاً آني حسب ما فهمت من قرائتي للمشاركات الولايات الشمالية هي الافضل في المساعدات وخصوصاً مينيسوتا ومين لكن اكيد انتو اعرف من عدنة بهذا الامر
انتظر اجاباتكم أخوتي وخواتي وممنون جداً
طبعاً ملاحظة آني ما عندي بس صديق بيوتاه وما ادري إذا هاي الولاية زينة

17
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 05:43 11/05/2012  »
والله يا اختي انتي صاحبة فضل ومجرد تواصلج ويانة يكفي وهذا البحث الي دتقومين دتوفرين علينة هواية
جهودج مشكورة اختي وهذه النقاط الي ذكرتيهة فعلا مهمة جداً وساتوخى ذلك خلال بحثي عن الولاية
واي مركز ستجدينه راح اقدمة للوفد الامريكي والمنظمة حتى يساعدوني للأنتقال الة
عيني دكتورة آني اعرف زحمة الوقت عدكم وانتي ابداً ما قصرتي وانما انتي متفضلة علينا بهذا المجهود الرائع
انا وزوجتي ممتنين جداً لموقفج النبيل، منحتينة امل بالحياة
شكراً أختي مارلا والله يكثر من امثالج وان شاء الله نبقى على تواصل حول اي مستجدات

18
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 05:23 11/05/2012  »
لا والله اختي بالعكس آني اريد الواقع ليش بعدين اجي وانصدم واني صاحب عائلة واهم هدف عندي علاج ابني
لكن اختي خلال بحثي لكيت عدة مراكز بيوتا ولا زلت ابحث في باقي الولايات وارج من حضرتج بلة زحمة عليج تشوفيلي هاي الروابط إذا هاي المراكز تفيدني او لا لأن حضرتج اكثر اطلاعاً وفهماً بهذه الامور

http://learn.genetics.utah.edu/content/disorders/whataregd/msud/
http://www.medicalhomeportal.org/resources/services/provider/3638
http://healthcare.utah.edu/about/
http://www.medicalhomeportal.org/newborn/maple-syrup-urine-disease

ما اعرف إذا اطلاعي خطأ لكن هذا الي فهمتة وارجو من حضرتج تطلعين عليهة وتنطيني رأيج بالموضوع
آني اتصلت اليوم بصديقي هو ساكن بيوتاه وديكلي الشغل يعني مو حيل قوي والمساعدات كذلك فترة وتنقطع فانطيتة اسم المرض والتفاصيل كاملة وكتلة اسالي يمك اكو مراكز مختصة لهذا المرض لو لا
لكن تبقى نقطة مهمة تفضلتي بيهة حضرتج هل يشملهة التامين ام لا

انتظر جوابج اختي الكريمة

19
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 01:44 11/05/2012  »
UP  معلومات من الطيبين عن ( شكاغو - بوسطن - مينيسوتا - مين - يوتاه ) الافضل طبيا وعملا ومساعدات واهم شي التقدم الطبي

20
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 00:30 11/05/2012  »
اشكرج دكتورة وممنون اختي الله يوفقج يارب
انتظر ان شاء الله جواب من حضرتج اذا في مراكز ثانية وايضاً انتظر التوصية من حضرتج
شفت الموقع وامكانية الدكتورة سوزان في امراض التمثيل الغذائي
لكن مثل متعرفين حضرتج كاليفورنيا غالية جداً والعمل بيهة صعب حسب ما نقلي بعض الاخوة
لكن مع هذا ان كانت هي المكان الامثل لعلاج ابني فراح اشتغل اي شغلة وليل نهار بس حتى يتعالج ابني
بالمناسبة شنو معلوماتج دكتورة عن الطب في بوسطن او يوتاه يعني الولايتين عموماً هل فيها طب متطور او علاجات متطورة وهل تنصحين منها
وانا بصراحة اميل لشيكاغو اكثر
واشكر مجهودج الرائعة يا دكتورتنة الاصيلة

21
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 22:35 10/05/2012  »
اقتباس
  اخي حسام انشالله ربي يشافيلك ابنك من كل مرض ويكون باتم صحه وعافيه وربي يوفقك وتسهل  امورك  بجاه الله ورسوله الكريم

أشكر دعائك يغالي والله يسهل امرنة وامرك وكل محتاج للسفر يارب

22
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 22:29 10/05/2012  »
شكراً اختي دكتورة مارلا وممنون من حضرتج
مثل ما تفضلتي آني مستعد اشتغل اي شي أهم شي عندي احافظ على عائلتي والاولوية عندي سلامة ابني وعلاجة
تحبين ابعثلج اسم ابني حتى يصير من ضمن التوصية لو ابالج تكون توصية عامة
وطبعاً اكيد طبيب التغذية راح يكون الة رأي مميز باعتبارة قريب جداً من هكذا امراض
بس آني مقابلتي راح تكون يوم الاربعاء الجاي خاف ما الحك لو يعني اكدر بعدين اضيف كفيل في حال عرفت الولاية البيهة علاج لأبني ان شاء الله
آني دينصحوني بالولايات الشمالية وخاصة شيكاغو وبوسطن ومين ومينيسوتا واكيد راح يكون اهم شي المكان الي بي علاج لأبني والحمد لله على كل حال
أنتظر اجابتج اختي وزوجتي تسلم عليج ايضاً وتشكر جهودج الطيبة

23
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 20:11 10/05/2012  »
اقتباس
الله يشافيك ويشافي ابنك ويشافي كل مريض  وربي يوفقك ويسهل امرك يارب

أشكر دعائكم أختي الكريمة والله يسهل امرنة وامركم ... ولا تنسون ابني من دعائكم

24
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 20:08 10/05/2012  »
والله يا اختي دكتورة مارلا ما اعرف شكول على نبل اخلاقج وطيب اصلج والله آني وزوجتي ننتظر كل كلمة تكتبيهة وهسة من قرينة انه راح تحصلينة توصيات علمود المقابلة وراح تبحثيلنة عن مركز متخصص في علاج ابني دموعنة نزلت لأن تيقنة اكو أحد ديحس بمعاناتنة ويساعدنة

شغلة التوصيات مهمة جداً جداً أكيد واكيد راح تفيدني خلال المقابلات
وبالنسبة للولاية الي مختصة بعلاج ابني راح انتظر منج رد اختي الكريمة 

أختي آني بس احب اكلج انتي دتنقذين طفل وتنقذين عائلتة وهذا العمل الي دسوي الله راح يجازيج عليه ربنا باحسن الجزاء وهذا تعبج والله العظيم مراح يضيع لأن الله سبحانه وتعالى كريم وهو يكرم كل انسان كريم

25
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 11:09 10/05/2012  »
أخوتي وخواتي
أشكر تفاعلكم ودعواتكم الطيبة
يعني بعد استشارتكم بالموضوع وخاصة اختنة العزيزة dr.marla توصلت لهاي الولايات :

أوستن / تكساس
الينوي / شيكاغو
يوتا / سولت ليك سيتي
بوسطن

ما ارجوه منكم يا غوالي تفهمونة على افضل هاي الولايات من حيث :
1- تكفل ابني ومعالجته وتوفير احتياجاته الخاصة .
2- توفر العمل .
3- طبيعة الولاية ونسبة الجريمة وطبيعة السكان .
4- مدة المساعدات .

آني طبعاً اخوتي صحتي هم نص ونص وعندي اصابة بالفقرات وركبة ساقي اليمنى نتيجة محاولة اغتيال ولغتي هم نص ونص واحنة عائلة اربع نفرات .

26
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 10:52 10/05/2012  »
اقتباس
الله يكون بعونك ويسهل امرك ويشفيلك ابنك

آمين ... اشكر دعائك حبيبي الغالي والله يحفظك والاهل من كل سوء

27
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 09:51 10/05/2012  »
اقتباس
بالتوفيق الكم بالمقابلة
ان شالة تحصل لجوء باقرب وقت الك ولعائلتك وبمكان من المكانات الي بيها علاج لحالته

الله ييسر امرنة وامركم واشكر دعائكم الطيب ... لا تنسون ابني من دعائكم اخواني وخواتي

28
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 06:13 10/05/2012  »
ممنون جداً دكتور وما قصرتي والله والنعم منج ...
والله إذا تعاونيني بشغلة الاتصال بعد تتفضلين علية لأن اكيد اتصالج راح يكون ادق بالكلام وايصال المعلومة وانتظر اي خبر منج اختي وطبعاً التقارير الطبية مكتوب بيهة انه المرض يهدد الحياة وآني نفس الشي راح اكولة للمنظمة والوفد وانتظر خبر منج اختي الكريمة
واحنة كعائلة ممتنين من حضرتج لهذه الخدمات النبيلة

29
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 05:34 10/05/2012  »
والنعم منج اختي وما قصرتي والله ابداً
اشكرج شكر جزيل والله يكثر من امثالج ويوفقج لكل خير يارب
بس بقى طلب اخير وهو انه متنسين ابني من دعائكم
وشكراً جزيلاً على هذا المجهود الرائع وإذا استجد عند حضرتج اي معلومة اخرى ارجو ان تبلغيني بلة زحمة واذا عرفتي مراكز اخرى غير شيكاغو وتكساس فأرجو هم تبلغيني رجاءاً

ممنون جداً دكتورة واتمنالك الموفقية يارب

30
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 04:55 10/05/2012  »
أشكرك حبيبي فرعون مصر والله يعافيك من كل سوء ويشفيك ان شاء الله واشكر دعواتك يا طيب ...

دكتورتنة الوردة واختي العزيزة بلة زحمة عليج بس اسامي المراكز بالتحديد الي بشيكاغو والي بتكساس الي تعالج هذا المرض إذا امكن حتى اتواصل وياهم
آني طبعاً راح اقدم هاي التفاصيل كلهة للـIOM والوفد الامريكي بعمّان وان شاء الله يرأفون بحالنة وينطونة موافقة وميطولونة بالامنية لأن تعرفين هكذا امراض لا يستهان بها ولا تحتمل التأخير لذا قررت اراسلهم حتى يكونون عون لنا في قضيتنا
يعجز لساني عن شكرج اختي وآسف تعبتج وياية

31
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 04:14 10/05/2012  »
شكراً يا دكتورتنة الوردة ... شكراً مليون مرة واتمنى لك المزيد من الرقي
بس من رخصتج دكتورة ولو اثقلت سامحيني
يعني في حال مطلعتلي تكساس ورحت لغير ولاية هل راح يهتمون بأبني ويحاولون يوفرولة العلاج مع المراكز المختصة بهذا المرض

طبعاً آني حاليا راح اسحب التحاليل كلهة سكنر وابعثهة لهذا المركز وانتظر جواب منهم

أشكر فضلج دكتورة وادعو ربي يزيدج علم وفهم

32
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 03:47 10/05/2012  »
دكتورة بس سؤال بلة زحمة عليج
هو هذا المركز الي بتكساس كانه بس لتشخيص هذا المرض فقط، أم هذا للتشيخص والعلاج ايضاً وتوفير الغذاء المناسب والمراكز الخاصة كما اخبرتيني !؟
لو حضرتج قصدتي الي بشيكاغو الي فيه العلاج وهذا بس تشخيص ودراسة حول المرض بس ممكن تفهميني هاي الفقرة واكون ممنون

وعاشت الايادي على هذا المجهود الرائع

33
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 03:21 10/05/2012  »
والله ما اعرف شلون اشكر حضرتج ممنون جدا جدا جدا
انطيتنة امل وفرحتينة شكرا اختي والله يكثر من امثالج بس ممكن اعرف اسم المركز حتى اطلع على تفاصيلة كي اقدمها خلال مقابلتي وهل هناك حالات تم شفائها
يعجز لساني عن الشكر واتمنى لكي الموفقية يا اختنا الاصيلة وراح ابقة انتظر اي خبر من حضرتج

34
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 03:00 10/05/2012  »
والله يا اختي الكريمة انت اصيلة وكريمة نفس والله يكثر من امثالج يارب
أختي بعثتلج رسالة على الخاص بيهة تفاصيل المرض واي شي يفيد في الاستعلام عن مرض ابني انطيني خبر واوفرة لحضرتج
واذا اكو مراكز متخصصة بعلاج هذا المرض ياريت تكليلي حتى اوضح هذا الشي للـIOM والوفد
والله يادكتورة اني مهندس ولكن مستعد اشتغل اي شي بس اعالج ابني واحافظ على حياتي من الموت الاكيد
واتمنى مساعدتج اختي الكريمة
وانتظر اجابتج

35
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 01:55 10/05/2012  »
وعليكم السلام دكتورة
اشكر ردكم الكريم
يعني دكتورة هاي المستشفى تعالج هكذا امراض وهل راح تساعدني الولاية بالعلاج لو لازم على حسابي الخاص وكيفهة الينوي عموماً من ناحية العمل والسكان ومدة المساعدات إذا تنصحيني بيهة حتى ابدي ادور على كفيل بيهة ان شاء الله
اشكرج اختي ولا تنسونة من دعواتكم

36
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 01:28 10/05/2012  »
اقتباس
اخويه هيه شنو حالة ابنك بلا زحمة عليك

أشكر تواصلك أخوية الغالي windtalker :
عيوني مرض ابني هو مرض إستقلابي في الاحماض العضوية في الجسم هذا يصير نقص انزيم فمتتكسر البروتينات بالجسم ويصير تراكم بالأحماض الأمينية بالدم مما يؤدي الى رفع نسبة الامونيا في الدم ايضاً
المرض نادر وحتى تحاليلة ممتوفرة بالوطن العربي والمشكلة بهذا المرض لازم يترك الاكل العادي ويعتمد على اكل وحليب مركب مخبرياً وهسة دنجيبلة اكلة وحليبة من بريطانيا عن طريق مستشفى الملكة رانيا للاطفال في المدينة الطبية وطبعاً مكلف جداً والتحاليل قسم دنسويهة هنا بعمّان وقسم نبعث العينات لبريطانيا.
الله اليعلم بحالننة والله اليعلم بحاجتنة للسفر لذلك ارجو مساعدتكم يا اخواني الاكارم ...

37
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 00:51 10/05/2012  »
والله ونعم الاخوة الله يبارك بيكم ويسهل امرنة وامركم يارب
أشكر الجميع على دعواتكم الطيبة وتفاعلكم والله يحفظكم والاهل من كل سوء
حيل نورتوني الله ينور دربكم وبانتظار معلوماتكم يا اخوتي وخواتي الغوالي

38
الهجرة و واللاجئين / رد: اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 00:10 10/05/2012  »
اشكركم أخوتي وخواتي على سرعة إجابتكم واشكر كل UP وانتظر تفاصيل اكثر ...

بالنسبة لتقاريري صادرة من :
1- مستشفى الجامعة الاردنية .
2- المدينة الطبية / مسشتفى الملكة رانيا للاطفال .
3- المركز العربي الأمريكي للأشعة التخصصية .

طبعاً مستشفى الجامعة الاردنية حولوني عليهم الكريتاس والمستشفى الايطالي ... دعواتكم ...

عيني windtalker بالنسبة ليوتا بصراحة آني نصحوني بيهة بس هية شلونهة من حيث الاهتمام طبياً بهكذا حالات وكم مدة مساعداتهة وهل بيهة عمل.

ممنون للجميع والله يحفظكم واهلكم من كل مكروه .

39
الهجرة و واللاجئين / اخوانا بأمريكا وجماعة عمّان ساعدوني ... استفسار مصيري رحمة على والديكم
« في: 23:52 09/05/2012  »
إخواني وخواتي الافاضل ...
عندي مقابلة اولى وثانية IOM الاربعاء الجاي إن شاء الله ... طلبوا مني بالإضافة للوثائق الرسمية ان احضر اسماء وارقام وعناويين معارفي من اصدقاء او اقارب في أمريكا ...
ملفي بي محوريين :

الاول : تعرضي للتهديد ومحاولات الاغتيال واصابتي إصابات لحد الآن اتعالج منهة .
الثاني : وهو الاهم أن ابني مريض بمرض نادر علاجه متوفر فقط في أمريكا وأوربا .

آني عندي معارف في ( سياتل - يوتا - الاباما ) ... وما ااعرف إذا راح يوافقون على كفالتي او لا .
ونصحوني بعض الاخوة بولاية ( مين - دنفر - نبراسكا ) ... كلولي مساعداته جيدة ومدتهة اطول، وإذا كتولي وحدة منهة حتى ان شاء الله ابدي ادورلي على كفيل بيهة .
وخلال بحثي بالنت عرفت إنه ولاية بوسطن مختصة بالابحاث العلمية الخاصة بالامراض النادرة وعلاجها عن طريق نخاع العظم لكن كلولي غالية جداً .

ما أرجوه منكم يا غوالي التالي :

1- تنصحوني بالولاية المناسبة من حيث توفر العمل لمثل حالتي الصحية وعلاج أبني والاهتمام به صحياً ومدة المساعدات ( حسب ما وضحت لحضراتكم من حيث الولايات أو إذا عدكم رأي خاص مخالف يعني ولاية غير الي ذكرتهن) .
2- هل من طريقة اسرع بيهة ملفي من عمّان بسبب مرض ابني اكو طريقة معينة او منظمة تدعم ملفي .

بإنتظار اجوبتكم أخوتي وخواتي لأن وقتي ضيق وحتى الحك اسوي شي الى ان يحين موعد المقابلة وولله ووضعنة والله مأساوي وهذا الامل الوحيد بعد الله سبحانه وتعالى في توفير الحياة الآمنة لنا ومعالجة طفلي .

40
الهجرة و واللاجئين / رد: موعد مقابلة اولى وثانية IOM عمّان ... أرجو المساعدة كلشي ما اعرف
« في: 14:25 09/05/2012  »
Up لمن يملك اي معلومة رجاءاً

41
الهجرة و واللاجئين / رد: موعد مقابلة اولى وثانية IOM عمّان ... أرجو المساعدة كلشي ما اعرف
« في: 02:01 09/05/2012  »
أخوية الوردة abuhatem الله يبشرك بالخير يا ورد متصور شكد فرحتنة وهونت علينة ممنون منك جداً والله يسلمك واهلك من كل سوء يارب والله شايلين مليون هم لهذا الامر والحمد لله على كل حال
زين كلي بلة زحمة عليك شلون اكدر اتواصل ويا هاي اللجنة لأن اليوان عدهم تفاصيل عن حالة ابني بس مكلولي هذا الشي يعني بخصوص هاي اللجنة، زين شلون يعني اتصل بيهم افهم منهم لو اكو منظمة بعمّان معينة توصلني الهم
ممنون منك مرة ثانية وبانتظار اجابتك

42
الهجرة و واللاجئين / رد: موعد مقابلة اولى وثانية IOM عمّان ... أرجو المساعدة كلشي ما اعرف
« في: 01:32 09/05/2012  »
ممنون منكم واشكركم على سرعة الاجابة
آني فعلاً الموظف كلي اذا عندك احد بامريكا انطينة اسمة آني بصراحة عندي صديق بسياتل وصديق بيوتا وصديق بميرلاند
لكن بصراحة آني ملفي بالاضافة للتهديد الي اتعرضتلة اكو امر مهم وهو اصابة ابني بمرض نادر في الاحماض العضوية هو عمرة سنتين ونص وعلاجة متواجد بامريكا واوروبا والة اكل خاص، بس ما ادري بيا ولاية بالضبط بيها العلاج وما اعراف هل راح يساعدوني بهذا الشي لو لا يعني كعلاج
وهم ما ادري ياولاية بيهة قدر من الاهتمام بهكذا نوع من الامراض فشلون اكلهم عندي ذولة اصدقائي لو اكلهم انتو اختارولي ولاية بيهة علاج لأبني
اني بصراحة بعض معارفي نصحوني بمين او دنفر او يوتا بس والله يا اخواني ملتهي بمرض ابني وكلشي ما اعرف عن هذي المواضيع اتمنى مساعدتكم بهذا الموضوع الي هو شغلة الولاية
وهل بامريكا يساعدوني بعلاج ابني وهل هذا الشي راح يسرع من ملفنة

43
الهجرة و واللاجئين / موعد مقابلة اولى وثانية IOM عمّان ... أرجو المساعدة كلشي ما اعرف
« في: 01:09 09/05/2012  »
تحية طيبة لكل الاعضاء
بلة زحمة عليكم اتمنى مساعدتكم بشغلتين :

الاولى : خابروني IOM على موعد مقابلة اولى وثانية على يوم الاربعاء الجاي 16/5
آني بصراحة مفاهم شلون راح تكون المقابلة او طبيعة الاسئلة او الشخص الي راح يقابلني الي اطلبة من حضراتكم اخوتي وخواتي شوية تفاصيل وارشادات عن المقابلة واكون ممنون منكم لان تدرون الامر مصيري وكل كلمة محسوبة وخاف اتورط بكلمة والوصهة على نفسي لا سامح الله،
علماً احنة عائلة 4 اشخاص تقديم UN واتحولنة IOM مو تقديم مباشر .

والثانية : واتصلوا بية البارحة الـUN كلولي تعال يوم الاربعاء يعني باجر علمود الكارت الازرق وهم هذا ما اعرف شنو سالفتة راح اتعبكم شوية بس اتحملوني هاي اول مشاركة والموضوع كلة غريب علينة .

اخوكم
مهندس حسام

صفحات: [1]