2
السلام عليكم جميعا
واحب اشكركم على كل المشاركات والمواضيع الجميلة الي دتطرحوها و المعلومات المفيدة والبشائر الي تتناقلوها واحب اكون واحد منكم وصديق للجميع واحب اشارككم حزني وقصتي (احنا عائلة من بغداد عدنا طفل وحيد اسمه يوسف وعمره 4 سنوات ونص عدنا كيس اس اي في ومقابلتنا كانت في الشهر السادس 2012 .. كل شي كان تمام وجميل ومشى بصورة صحيحة وفي يوم 23 سبتمبر بالتحديد استلمنا ايميل انه السفارة تطلب ارسال الجوازات لغرض اصدار الفيزا وقرينا الايميل اكثر من 3 مرات وبعد نصف ساعة اختفى الايميل من البريد الوارد ولم يعد له وجود ..غريبة مو محد يصدك ..طبعا ارسلنا ايميل طلب تأكيد للسفارة عن ارسال الجوازات لو لا وبلغناهم انه الايميل الوارد منهم اختفى يمنا وما حضر اي رد منهم بعد عموما في هاي الفترة كان ابننا يوسف يعاني من صخونة والم في البطن ونحول وتعب في يوم 25 بنفس الشهر وبعد معاينته من اكثر من طبيب تم اكتشاف مرض اللوكيميا بالدم في يوسف وبدون مسببات وبدون سابق انذار وما نعرف شنو وشلون ومنين لانه هذا المرض ما معروفة اسبابه ويصيب الاطفال من عمر سنتين الى 10 سنوات , المهم رب العاملين سخر له طبيب في الهند اخناه ورحنا الى الهند وفي الطريق الى الهند بالتحديد يوم 2 اكتوبر واحنا في مطار ابو ظبي نزلنا ترازيت فتحنا الايميل بالموبايل للتخاطب من الطبيب الهندي استلمنا رد السفارة بأنه نعم ارسل جوازاتكم بأسرع وقت ممكن ولكن شلون دزينالهم ايميل انه ابننا تمرض باللوكيميا وانه نحن في الطريق الى الهند لعلاجه ونطلب منكم انه تنتظرون علينا فترة قصيرة لحد ما نرجع ونرسل الجوازات وكان ردهم ايجابي وتمنوا الشفاء للطفل وانه نحن بأنتظار جوازاتكم وبدا العلاج ومرت الايام العصيبة يارب محد يمر بيها ابد ,, وكان بين فترة واخرى احنا نراسل السفارة ونعلمهم بتطورات الوضع مع العلاج وانه صعوبة رجعتنا لانه الطفل في مرحلة حرجة وبعد مروم شهرين اضطريت انه ارسل زوجتي ومعها الجوازات الى بغداد لتسليمها الى السفارة بعد انه تطمنا على وضع يوسف وبقيت اني وحدي مع الطفل بالهند بدون جوازات على امل صدور الفيزا سريعا ورجوع زوجتي ومعها الجوازات ومرت الايام وكلنا ننتظر بداية السنة الجاية مرت شهرين وماكو اي شي وبعدها قررنا سحب الجوازات ورجوع زوجتي النا لانه العلاج المكثف في الهند انتهى وبعد نريد نرجع الى بغداد ,, سحبت الجوازات زوجتي وجتي بأسرع طيارة النا ورجعنا ابننا الى بغداد وفور وصولنا خاطبنا السفارة انه احنا على استعداد تسليم الجوازات ولكن كان الرد انه نحن ان شاء الله على علم بظروفكم الصعبة ووضع ابنكم ولكن ما بيدنا شي وما نكدر نصدر فيزتكم اصبروا علينا ومرت الايام وماكو فيزا لحد الان والطفل مستمر على العلاج بظروف البلد وباحوال المستشفيات التعيسة والاطباء الغير كفؤين بعلاج مرض مثل هذا المرض .. واملنا انه تبدي اصدار الاس اي في سريعا لكل الناس ويارب ينقل ابننا للعلاج في امريكا وينجيه من المرض الخبيث الي يعاني منه ويشافي كل المرضى يارب ,, نكول الحمد لله على كل حال لوكنا سلمنا الجوازات يوم 23 سبتمر ما كان كدرنا ننقذ حياة ابننا وكانت الخلايا السرطانية واصلة بهذاك التاريخ الى 80 بالمية ,, الحمد لله على اختفاء الايميل والحمد لله على عدم تسليم الجوازات والحمد لله على علاج ابننا ,, نتمنى يارب الكل يسافرون ويتوفقون ويأمنون لاطفالهم مستقبل حلو ودولة بيها خير ودعواتكم النا بصدور الفيزا وشفاء ابننا اسف على الاطالة وشكرا لوقتكم ويارب يستمر التواصل
اخوكم
المهندس البغدادي
عرض المشاركات
